ଶିଵ ମହିମ୍ନା ସ୍ତୋତ୍ରମ୍
ଅଥ ଶ୍ରୀ ଶିଵମହିମ୍ନସ୍ତୋତ୍ରମ୍ ॥
ମହିମ୍ନଃ ପାରଂ ତେ ପରମଵିଦୁଷୋ ୟଦ୍ୟସଦୃଶୀ
ସ୍ତୁତିର୍ବ୍ରହ୍ମାଦୀନାମପି ତଦଵସନ୍ନାସ୍ତ୍ଵୟି ଗିରଃ ।
ଅଥାଽଵାଚ୍ୟଃ ସର୍ଵଃ ସ୍ଵମତିପରିଣାମାଵଧି ଗୃଣନ୍
ମମାପ୍ୟେଷ ସ୍ତୋତ୍ରେ ହର ନିରପଵାଦଃ ପରିକରଃ ॥ 1 ॥
ଅତୀତଃ ପଂଥାନଂ ତଵ ଚ ମହିମା ଵାଙ୍ମନସୟୋଃ
ଅତଦ୍ଵ୍ୟାଵୃତ୍ତ୍ୟା ୟଂ ଚକିତମଭିଧତ୍ତେ ଶ୍ରୁତିରପି ।
ସ କସ୍ୟ ସ୍ତୋତଵ୍ୟଃ କତିଵିଧଗୁଣଃ କସ୍ୟ ଵିଷୟଃ
ପଦେ ତ୍ଵର୍ଵାଚୀନେ ପତତି ନ ମନଃ କସ୍ୟ ନ ଵଚଃ ॥ 2 ॥
ମଧୁସ୍ଫୀତା ଵାଚଃ ପରମମମୃତଂ ନିର୍ମିତଵତଃ
ତଵ ବ୍ରହ୍ମନ୍ କିଂ ଵାଗପି ସୁରଗୁରୋର୍ଵିସ୍ମୟପଦମ୍ ।
ମମ ତ୍ଵେତାଂ ଵାଣୀଂ ଗୁଣକଥନପୁଣ୍ୟେନ ଭଵତଃ
ପୁନାମୀତ୍ୟର୍ଥେଽସ୍ମିନ୍ ପୁରମଥନ ବୁଦ୍ଧିର୍ଵ୍ୟଵସିତା ॥ 3 ॥
ତଵୈଶ୍ଵର୍ୟଂ ୟତ୍ତଜ୍ଜଗଦୁଦୟରକ୍ଷାପ୍ରଲୟକୃତ୍
ତ୍ରୟୀଵସ୍ତୁ ଵ୍ୟସ୍ତଂ ତିସୃଷୁ ଗୁଣଭିନ୍ନାସୁ ତନୁଷୁ ।
ଅଭଵ୍ୟାନାମସ୍ମିନ୍ ଵରଦ ରମଣୀୟାମରମଣୀଂ
ଵିହଂତୁଂ ଵ୍ୟାକ୍ରୋଶୀଂ ଵିଦଧତ ଇହୈକେ ଜଡଧିୟଃ ॥ 4 ॥
କିମୀହଃ କିଂକାୟଃ ସ ଖଲୁ କିମୁପାୟସ୍ତ୍ରିଭୁଵନଂ
କିମାଧାରୋ ଧାତା ସୃଜତି କିମୁପାଦାନ ଇତି ଚ ।
ଅତର୍କ୍ୟୈଶ୍ଵର୍ୟେ ତ୍ଵୟ୍ୟନଵସର ଦୁଃସ୍ଥୋ ହତଧିୟଃ
କୁତର୍କୋଽୟଂ କାଂଶ୍ଚିତ୍ ମୁଖରୟତି ମୋହାୟ ଜଗତଃ ॥ 5 ॥
ଅଜନ୍ମାନୋ ଲୋକାଃ କିମଵୟଵଵଂତୋଽପି ଜଗତାଂ
ଅଧିଷ୍ଠାତାରଂ କିଂ ଭଵଵିଧିରନାଦୃତ୍ୟ ଭଵତି ।
ଅନୀଶୋ ଵା କୁର୍ୟାଦ୍ ଭୁଵନଜନନେ କଃ ପରିକରୋ
ୟତୋ ମଂଦାସ୍ତ୍ଵାଂ ପ୍ରତ୍ୟମରଵର ସଂଶେରତ ଇମେ ॥ 6 ॥
ତ୍ରୟୀ ସାଂଖ୍ୟଂ ୟୋଗଃ ପଶୁପତିମତଂ ଵୈଷ୍ଣଵମିତି
ପ୍ରଭିନ୍ନେ ପ୍ରସ୍ଥାନେ ପରମିଦମଦଃ ପଥ୍ୟମିତି ଚ ।
ରୁଚୀନାଂ ଵୈଚିତ୍ର୍ୟାଦୃଜୁକୁଟିଲ ନାନାପଥଜୁଷାଂ
ନୃଣାମେକୋ ଗମ୍ୟସ୍ତ୍ଵମସି ପୟସାମର୍ଣଵ ଇଵ ॥ 7 ॥
ମହୋକ୍ଷଃ ଖଟ୍ଵାଂଗଂ ପରଶୁରଜିନଂ ଭସ୍ମ ଫଣିନଃ
କପାଲଂ ଚେତୀୟତ୍ତଵ ଵରଦ ତଂତ୍ରୋପକରଣମ୍ ।
ସୁରାସ୍ତାଂ ତାମୃଦ୍ଧିଂ ଦଧତି ତୁ ଭଵଦ୍ଭ୍ରୂପ୍ରଣିହିତାଂ
ନ ହି ସ୍ଵାତ୍ମାରାମଂ ଵିଷୟମୃଗତୃଷ୍ଣା ଭ୍ରମୟତି ॥ 8 ॥
ଧ୍ରୁଵଂ କଶ୍ଚିତ୍ ସର୍ଵଂ ସକଲମପରସ୍ତ୍ଵଧ୍ରୁଵମିଦଂ
ପରୋ ଧ୍ରୌଵ୍ୟାଽଧ୍ରୌଵ୍ୟେ ଜଗତି ଗଦତି ଵ୍ୟସ୍ତଵିଷୟେ ।
ସମସ୍ତେଽପ୍ୟେତସ୍ମିନ୍ ପୁରମଥନ ତୈର୍ଵିସ୍ମିତ ଇଵ
ସ୍ତୁଵନ୍ ଜିହ୍ରେମି ତ୍ଵାଂ ନ ଖଲୁ ନନୁ ଧୃଷ୍ଟା ମୁଖରତା ॥ 9 ॥
ତଵୈଶ୍ଵର୍ୟଂ ୟତ୍ନାଦ୍ ୟଦୁପରି ଵିରିଂଚିର୍ହରିରଧଃ
ପରିଚ୍ଛେତ୍ତୁଂ ୟାତାଵନଲମନଲସ୍କଂଧଵପୁଷଃ ।
ତତୋ ଭକ୍ତିଶ୍ରଦ୍ଧା-ଭରଗୁରୁ-ଗୃଣଦ୍ଭ୍ୟାଂ ଗିରିଶ ୟତ୍
ସ୍ଵୟଂ ତସ୍ଥେ ତାଭ୍ୟାଂ ତଵ କିମନୁଵୃତ୍ତିର୍ନ ଫଲତି ॥ 10 ॥
ଅୟତ୍ନାଦାସାଦ୍ୟ ତ୍ରିଭୁଵନମଵୈରଵ୍ୟତିକରଂ
ଦଶାସ୍ୟୋ ୟଦ୍ବାହୂନଭୃତ ରଣକଂଡୂ-ପରଵଶାନ୍ ।
ଶିରଃପଦ୍ମଶ୍ରେଣୀ-ରଚିତଚରଣାଂଭୋରୁହ-ବଲେଃ
ସ୍ଥିରାୟାସ୍ତ୍ଵଦ୍ଭକ୍ତେସ୍ତ୍ରିପୁରହର ଵିସ୍ଫୂର୍ଜିତମିଦମ୍ ॥ 11 ॥
ଅମୁଷ୍ୟ ତ୍ଵତ୍ସେଵା-ସମଧିଗତସାରଂ ଭୁଜଵନଂ
ବଲାତ୍ କୈଲାସେଽପି ତ୍ଵଦଧିଵସତୌ ଵିକ୍ରମୟତଃ ।
ଅଲଭ୍ୟା ପାତାଲେଽପ୍ୟଲସଚଲିତାଂଗୁଷ୍ଠଶିରସି
ପ୍ରତିଷ୍ଠା ତ୍ଵୟ୍ୟାସୀଦ୍ ଧ୍ରୁଵମୁପଚିତୋ ମୁହ୍ୟତି ଖଲଃ ॥ 12 ॥
ୟଦୃଦ୍ଧିଂ ସୁତ୍ରାମ୍ଣୋ ଵରଦ ପରମୋଚ୍ଚୈରପି ସତୀଂ
ଅଧଶ୍ଚକ୍ରେ ବାଣଃ ପରିଜନଵିଧେୟତ୍ରିଭୁଵନଃ ।
ନ ତଚ୍ଚିତ୍ରଂ ତସ୍ମିନ୍ ଵରିଵସିତରି ତ୍ଵଚ୍ଚରଣୟୋଃ
ନ କସ୍ୟାପ୍ୟୁନ୍ନତ୍ୟୈ ଭଵତି ଶିରସସ୍ତ୍ଵୟ୍ୟଵନତିଃ ॥ 13 ॥
ଅକାଂଡ-ବ୍ରହ୍ମାଂଡ-କ୍ଷୟଚକିତ-ଦେଵାସୁରକୃପା
ଵିଧେୟସ୍ୟାଽଽସୀଦ୍ ୟସ୍ତ୍ରିନୟନ ଵିଷଂ ସଂହୃତଵତଃ ।
ସ କଲ୍ମାଷଃ କଂଠେ ତଵ ନ କୁରୁତେ ନ ଶ୍ରିୟମହୋ
ଵିକାରୋଽପି ଶ୍ଲାଘ୍ୟୋ ଭୁଵନ-ଭୟ- ଭଂଗ- ଵ୍ୟସନିନଃ ॥ 14 ॥
ଅସିଦ୍ଧାର୍ଥା ନୈଵ କ୍ଵଚିଦପି ସଦେଵାସୁରନରେ
ନିଵର୍ତଂତେ ନିତ୍ୟଂ ଜଗତି ଜୟିନୋ ୟସ୍ୟ ଵିଶିଖାଃ ।
ସ ପଶ୍ୟନ୍ନୀଶ ତ୍ଵାମିତରସୁରସାଧାରଣମଭୂତ୍
ସ୍ମରଃ ସ୍ମର୍ତଵ୍ୟାତ୍ମା ନ ହି ଵଶିଷୁ ପଥ୍ୟଃ ପରିଭଵଃ ॥ 15 ॥
ମହୀ ପାଦାଘାତାଦ୍ ଵ୍ରଜତି ସହସା ସଂଶୟପଦଂ
ପଦଂ ଵିଷ୍ଣୋର୍ଭ୍ରାମ୍ୟଦ୍ ଭୁଜ-ପରିଘ-ରୁଗ୍ଣ-ଗ୍ରହ- ଗଣମ୍ ।
ମୁହୁର୍ଦ୍ୟୌର୍ଦୌସ୍ଥ୍ୟଂ ୟାତ୍ୟନିଭୃତ-ଜଟା-ତାଡିତ-ତଟା
ଜଗଦ୍ରକ୍ଷାୟୈ ତ୍ଵଂ ନଟସି ନନୁ ଵାମୈଵ ଵିଭୁତା ॥ 16 ॥
ଵିୟଦ୍ଵ୍ୟାପୀ ତାରା-ଗଣ-ଗୁଣିତ-ଫେନୋଦ୍ଗମ-ରୁଚିଃ
ପ୍ରଵାହୋ ଵାରାଂ ୟଃ ପୃଷତଲଘୁଦୃଷ୍ଟଃ ଶିରସି ତେ ।
ଜଗଦ୍ଦ୍ଵୀପାକାରଂ ଜଲଧିଵଲୟଂ ତେନ କୃତମିତି
ଅନେନୈଵୋନ୍ନେୟଂ ଧୃତମହିମ ଦିଵ୍ୟଂ ତଵ ଵପୁଃ ॥ 17 ॥
ରଥଃ କ୍ଷୋଣୀ ୟଂତା ଶତଧୃତିରଗେଂଦ୍ରୋ ଧନୁରଥୋ
ରଥାଂଗେ ଚଂଦ୍ରାର୍କୌ ରଥ-ଚରଣ-ପାଣିଃ ଶର ଇତି ।
ଦିଧକ୍ଷୋସ୍ତେ କୋଽୟଂ ତ୍ରିପୁରତୃଣମାଡଂବର-ଵିଧିଃ
ଵିଧେୟୈଃ କ୍ରୀଡଂତ୍ୟୋ ନ ଖଲୁ ପରତଂତ୍ରାଃ ପ୍ରଭୁଧିୟଃ ॥ 18 ॥
ହରିସ୍ତେ ସାହସ୍ରଂ କମଲ ବଲିମାଧାୟ ପଦୟୋଃ
ୟଦେକୋନେ ତସ୍ମିନ୍ ନିଜମୁଦହରନ୍ନେତ୍ରକମଲମ୍ ।
ଗତୋ ଭକ୍ତ୍ୟୁଦ୍ରେକଃ ପରିଣତିମସୌ ଚକ୍ରଵପୁଷଃ
ତ୍ରୟାଣାଂ ରକ୍ଷାୟୈ ତ୍ରିପୁରହର ଜାଗର୍ତି ଜଗତାମ୍ ॥ 19 ॥
କ୍ରତୌ ସୁପ୍ତେ ଜାଗ୍ରତ୍ ତ୍ଵମସି ଫଲୟୋଗେ କ୍ରତୁମତାଂ
କ୍ଵ କର୍ମ ପ୍ରଧ୍ଵସ୍ତଂ ଫଲତି ପୁରୁଷାରାଧନମୃତେ ।
ଅତସ୍ତ୍ଵାଂ ସଂପ୍ରେକ୍ଷ୍ୟ କ୍ରତୁଷୁ ଫଲଦାନ-ପ୍ରତିଭୁଵଂ
ଶ୍ରୁତୌ ଶ୍ରଦ୍ଧାଂ ବଦ୍ଧ୍ଵା ଦୃଢପରିକରଃ କର୍ମସୁ ଜନଃ ॥ 20 ॥
କ୍ରିୟାଦକ୍ଷୋ ଦକ୍ଷଃ କ୍ରତୁପତିରଧୀଶସ୍ତନୁଭୃତାଂ
ଋଷୀଣାମାର୍ତ୍ଵିଜ୍ୟଂ ଶରଣଦ ସଦସ୍ୟାଃ ସୁର-ଗଣାଃ ।
କ୍ରତୁଭ୍ରଂଶସ୍ତ୍ଵତ୍ତଃ କ୍ରତୁଫଲ-ଵିଧାନ-ଵ୍ୟସନିନଃ
ଧ୍ରୁଵଂ କର୍ତୁଃ ଶ୍ରଦ୍ଧା-ଵିଧୁରମଭିଚାରାୟ ହି ମଖାଃ ॥ 21 ॥
ପ୍ରଜାନାଥଂ ନାଥ ପ୍ରସଭମଭିକଂ ସ୍ଵାଂ ଦୁହିତରଂ
ଗତଂ ରୋହିଦ୍ ଭୂତାଂ ରିରମୟିଷୁମୃଷ୍ୟସ୍ୟ ଵପୁଷା ।
ଧନୁଷ୍ପାଣେର୍ୟାତଂ ଦିଵମପି ସପତ୍ରାକୃତମମୁଂ
ତ୍ରସଂତଂ ତେଽଦ୍ୟାପି ତ୍ୟଜତି ନ ମୃଗଵ୍ୟାଧରଭସଃ ॥ 22 ॥
ସ୍ଵଲାଵଣ୍ୟାଶଂସା ଧୃତଧନୁଷମହ୍ନାୟ ତୃଣଵତ୍
ପୁରଃ ପ୍ଲୁଷ୍ଟଂ ଦୃଷ୍ଟ୍ଵା ପୁରମଥନ ପୁଷ୍ପାୟୁଧମପି ।
ୟଦି ସ୍ତ୍ରୈଣଂ ଦେଵୀ ୟମନିରତ ଦେହାର୍ଧ-ଘଟନାତ୍
ଅଵୈତି ତ୍ଵାମଦ୍ଧା ବତ ଵରଦ ମୁଗ୍ଧା ୟୁଵତୟଃ ॥ 23 ॥
ଶ୍ମଶାନେଷ୍ଵାକ୍ରୀଡା ସ୍ମରହର ପିଶାଚାଃ ସହଚରାଃ
ଚିତା-ଭସ୍ମାଲେପଃ ସ୍ରଗପି ନୃକରୋଟୀ-ପରିକରଃ ।
ଅମଂଗଲ୍ୟଂ ଶୀଲଂ ତଵ ଭଵତୁ ନାମୈଵମଖିଲଂ
ତଥାପି ସ୍ମର୍ତୄଣାଂ ଵରଦ ପରମଂ ମଂଗଲମସି ॥ 24 ॥
ମନଃ ପ୍ରତ୍ୟକ୍ଚିତ୍ତେ ସଵିଧମଵିଧାୟାତ୍ତ-ମରୁତଃ
ପ୍ରହୃଷ୍ୟଦ୍ରୋମାଣଃ ପ୍ରମଦ-ସଲିଲୋତ୍ସଂଗତି-ଦୃଶଃ ।
ୟଦାଲୋକ୍ୟାହ୍ଲାଦଂ ହ୍ରଦ ଇଵ ନିମଜ୍ୟାମୃତମୟେ
ଦଧତ୍ୟଂତସ୍ତତ୍ତ୍ଵଂ କିମପି ୟମିନସ୍ତତ୍ କିଲ ଭଵାନ୍ ॥ 25 ॥
ତ୍ଵମର୍କସ୍ତ୍ଵଂ ସୋମସ୍ତ୍ଵମସି ପଵନସ୍ତ୍ଵଂ ହୁତଵହଃ
ତ୍ଵମାପସ୍ତ୍ଵଂ ଵ୍ୟୋମ ତ୍ଵମୁ ଧରଣିରାତ୍ମା ତ୍ଵମିତି ଚ ।
ପରିଚ୍ଛିନ୍ନାମେଵଂ ତ୍ଵୟି ପରିଣତା ବିଭ୍ରତି ଗିରଂ
ନ ଵିଦ୍ମସ୍ତତ୍ତତ୍ତ୍ଵଂ ଵୟମିହ ତୁ ୟତ୍ ତ୍ଵଂ ନ ଭଵସି ॥ 26 ॥
ତ୍ରୟୀଂ ତିସ୍ରୋ ଵୃତ୍ତୀସ୍ତ୍ରିଭୁଵନମଥୋ ତ୍ରୀନପି ସୁରାନ୍
ଅକାରାଦ୍ୟୈର୍ଵର୍ଣୈସ୍ତ୍ରିଭିରଭିଦଧତ୍ ତୀର୍ଣଵିକୃତି ।
ତୁରୀୟଂ ତେ ଧାମ ଧ୍ଵନିଭିରଵରୁଂଧାନମଣୁଭିଃ
ସମସ୍ତଂ ଵ୍ୟସ୍ତଂ ତ୍ଵାଂ ଶରଣଦ ଗୃଣାତ୍ୟୋମିତି ପଦମ୍ ॥ 27 ॥
ଭଵଃ ଶର୍ଵୋ ରୁଦ୍ରଃ ପଶୁପତିରଥୋଗ୍ରଃ ସହ ମହାନ୍
ତଥା ଭୀମେଶାନାଵିତି ୟଦଭିଧାନାଷ୍ଟକମିଦମ୍ ।
ଅମୁଷ୍ମିନ୍ ପ୍ରତ୍ୟେକଂ ପ୍ରଵିଚରତି ଦେଵ ଶ୍ରୁତିରପି
ପ୍ରିୟାୟାସ୍ମୈଧାମ୍ନେ ପ୍ରଣିହିତ-ନମସ୍ୟୋଽସ୍ମି ଭଵତେ ॥ 28 ॥
ନମୋ ନେଦିଷ୍ଠାୟ ପ୍ରିୟଦଵ ଦଵିଷ୍ଠାୟ ଚ ନମଃ
ନମଃ କ୍ଷୋଦିଷ୍ଠାୟ ସ୍ମରହର ମହିଷ୍ଠାୟ ଚ ନମଃ ।
ନମୋ ଵର୍ଷିଷ୍ଠାୟ ତ୍ରିନୟନ ୟଵିଷ୍ଠାୟ ଚ ନମଃ
ନମଃ ସର୍ଵସ୍ମୈ ତେ ତଦିଦମିତିସର୍ଵାୟ ଚ ନମଃ ॥ 29 ॥
ବହୁଲ-ରଜସେ ଵିଶ୍ଵୋତ୍ପତ୍ତୌ ଭଵାୟ ନମୋ ନମଃ
ପ୍ରବଲ-ତମସେ ତତ୍ ସଂହାରେ ହରାୟ ନମୋ ନମଃ ।
ଜନ-ସୁଖକୃତେ ସତ୍ତ୍ଵୋଦ୍ରିକ୍ତୌ ମୃଡାୟ ନମୋ ନମଃ
ପ୍ରମହସି ପଦେ ନିସ୍ତ୍ରୈଗୁଣ୍ୟେ ଶିଵାୟ ନମୋ ନମଃ ॥ 30 ॥
କୃଶ-ପରିଣତି-ଚେତଃ କ୍ଲେଶଵଶ୍ୟଂ କ୍ଵ ଚେଦଂ
କ୍ଵ ଚ ତଵ ଗୁଣ-ସୀମୋଲ୍ଲଂଘିନୀ ଶଶ୍ଵଦୃଦ୍ଧିଃ ।
ଇତି ଚକିତମମଂଦୀକୃତ୍ୟ ମାଂ ଭକ୍ତିରାଧାଦ୍
ଵରଦ ଚରଣୟୋସ୍ତେ ଵାକ୍ୟ-ପୁଷ୍ପୋପହାରମ୍ ॥ 31 ॥
ଅସିତ-ଗିରି-ସମଂ ସ୍ୟାତ୍ କଜ୍ଜଲଂ ସିଂଧୁ-ପାତ୍ରେ
ସୁର-ତରୁଵର-ଶାଖା ଲେଖନୀ ପତ୍ରମୁର୍ଵୀ ।
ଲିଖତି ୟଦି ଗୃହୀତ୍ଵା ଶାରଦା ସର୍ଵକାଲଂ
ତଦପି ତଵ ଗୁଣାନାମୀଶ ପାରଂ ନ ୟାତି ॥ 32 ॥
ଅସୁର-ସୁର-ମୁନୀଂଦ୍ରୈରର୍ଚିତସ୍ୟେଂଦୁ-ମୌଲେଃ
ଗ୍ରଥିତ-ଗୁଣମହିମ୍ନୋ ନିର୍ଗୁଣସ୍ୟେଶ୍ଵରସ୍ୟ ।
ସକଲ-ଗଣ-ଵରିଷ୍ଠଃ ପୁଷ୍ପଦଂତାଭିଧାନଃ
ରୁଚିରମଲଘୁଵୃତ୍ତୈଃ ସ୍ତୋତ୍ରମେତଚ୍ଚକାର ॥ 33 ॥
ଅହରହରନଵଦ୍ୟଂ ଧୂର୍ଜଟେଃ ସ୍ତୋତ୍ରମେତତ୍
ପଠତି ପରମଭକ୍ତ୍ୟା ଶୁଦ୍ଧ-ଚିତ୍ତଃ ପୁମାନ୍ ୟଃ ।
ସ ଭଵତି ଶିଵଲୋକେ ରୁଦ୍ରତୁଲ୍ୟସ୍ତଥାଽତ୍ର
ପ୍ରଚୁରତର-ଧନାୟୁଃ ପୁତ୍ରଵାନ୍ କୀର୍ତିମାଂଶ୍ଚ ॥ 34 ॥
ମହେଶାନ୍ନାପରୋ ଦେଵୋ ମହିମ୍ନୋ ନାପରା ସ୍ତୁତିଃ ।
ଅଘୋରାନ୍ନାପରୋ ମଂତ୍ରୋ ନାସ୍ତି ତତ୍ତ୍ଵଂ ଗୁରୋଃ ପରମ୍ ॥ 35 ॥
ଦୀକ୍ଷା ଦାନଂ ତପସ୍ତୀର୍ଥଂ ଜ୍ଞାନଂ ୟାଗାଦିକାଃ କ୍ରିୟାଃ ।
ମହିମ୍ନସ୍ତଵ ପାଠସ୍ୟ କଲାଂ ନାର୍ହଂତି ଷୋଡଶୀମ୍ ॥ 36 ॥
କୁସୁମଦଶନ-ନାମା ସର୍ଵ-ଗଂଧର୍ଵ-ରାଜଃ
ଶଶିଧରଵର-ମୌଲେର୍ଦେଵଦେଵସ୍ୟ ଦାସଃ ।
ସ ଖଲୁ ନିଜ-ମହିମ୍ନୋ ଭ୍ରଷ୍ଟ ଏଵାସ୍ୟ ରୋଷାତ୍
ସ୍ତଵନମିଦମକାର୍ଷୀଦ୍ ଦିଵ୍ୟ-ଦିଵ୍ୟଂ ମହିମ୍ନଃ ॥ 37 ॥
ସୁରଗୁରୁମଭିପୂଜ୍ୟ ସ୍ଵର୍ଗ-ମୋକ୍ଷୈକ-ହେତୁଂ [ସୁରଵରମୁନିପୂଜ୍ୟଂ ସ୍ଵର୍ଗ-ମୋକ୍ଷୈକ-ହେତୁଂ]
ପଠତି ୟଦି ମନୁଷ୍ୟଃ ପ୍ରାଂଜଲିର୍ନାନ୍ୟ-ଚେତାଃ ।
ଵ୍ରଜତି ଶିଵ-ସମୀପଂ କିନ୍ନରୈଃ ସ୍ତୂୟମାନଃ
ସ୍ତଵନମିଦମମୋଘଂ ପୁଷ୍ପଦଂତପ୍ରଣୀତମ୍ ॥ 38 ॥
ଶ୍ରୀ ପୁଷ୍ପଦଂତ-ମୁଖ-ପଂକଜ-ନିର୍ଗତେନ
ସ୍ତୋତ୍ରେଣ କିଲ୍ବିଷ-ହରେଣ ହର-ପ୍ରିୟେଣ ।
କଂଠସ୍ଥିତେନ ପଠିତେନ ସମାହିତେନ
ସୁପ୍ରୀଣିତୋ ଭଵତି ଭୂତପତିର୍ମହେଶଃ ॥ 43 ॥
ଆସମାପ୍ତମିଦଂ ସ୍ତୋତ୍ରଂ ପୁଣ୍ୟଂ ଗଂଧର୍ଵ-ଭାଷିତମ୍ ।
ଅନୌପମ୍ୟଂ ମନୋହାରି ସର୍ଵମୀଶ୍ଵରଵର୍ଣନମ୍ ॥ 39 ॥
ତଵ ତତ୍ତ୍ଵଂ ନ ଜାନାମି କୀଦୃଶୋଽସି ମହେଶ୍ଵର ।
ୟାଦୃଶୋଽସି ମହାଦେଵ ତାଦୃଶାୟ ନମୋ ନମଃ ॥ 41 ॥
ଏକକାଲଂ ଦ୍ଵିକାଲଂ ଵା ତ୍ରିକାଲଂ ୟଃ ପଠେନ୍ନରଃ ।
ସର୍ଵପାପ-ଵିନିର୍ମୁକ୍ତଃ ଶିଵ ଲୋକେ ମହୀୟତେ ॥ 42 ॥
ଇତ୍ୟେଷା ଵାଙ୍ମୟୀ ପୂଜା ଶ୍ରୀମଚ୍ଛଂକର-ପାଦୟୋଃ ।
ଅର୍ପିତା ତେନ ଦେଵେଶଃ ପ୍ରୀୟତାଂ ମେ ସଦାଶିଵଃ ॥ 40 ॥
॥ ଇତି ଶ୍ରୀ ପୁଷ୍ପଦଂତ ଵିରଚିତଂ ଶିଵମହିମ୍ନ-ସ୍ତୋତ୍ରଂ ସମାପ୍ତମ୍ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ଶିଵ ମହିମ୍ନା ସ୍ତୋତ୍ରମ୍?
ଶିଵ ମହିମ୍ନା ସ୍ତୋତ୍ରମ୍ is a Shiva Stotrams available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ଶିଵ ମହିମ୍ନା ସ୍ତୋତ୍ରମ୍ online?
Yes. The imported text is available directly on this page for online reading and recitation.
Can I download ଶିଵ ମହିମ୍ନା ସ୍ତୋତ୍ରମ୍ as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.