ଶିଵାପରାଧ କ୍ଷମାପଣ ସ୍ତୋତ୍ରମ୍

ଆଦୌ କର୍ମପ୍ରସଂଗାତ୍କଲୟତି କଲୁଷଂ ମାତୃକୁକ୍ଷୌ ସ୍ଥିତଂ ମାଂ
ଵିଣ୍ମୂତ୍ରାମେଧ୍ୟମଧ୍ୟେ କ୍ଵଥୟତି ନିତରାଂ ଜାଠରୋ ଜାତଵେଦାଃ ।
ୟଦ୍ୟଦ୍ଵୈ ତତ୍ର ଦୁଃଖଂ ଵ୍ୟଥୟତି ନିତରାଂ ଶକ୍ୟତେ କେନ ଵକ୍ତୁଂ
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 1॥

ବାଲ୍ୟେ ଦୁଃଖାତିରେକୋ ମଲଲୁଲିତଵପୁଃ ସ୍ତନ୍ୟପାନେ ପିପାସା
ନୋ ଶକ୍ତଶ୍ଚେଂଦ୍ରିୟେଭ୍ୟୋ ଭଵଗୁଣଜନିତାଃ ଜଂତଵୋ ମାଂ ତୁଦଂତି ।
ନାନାରୋଗାଦିଦୁଃଖାଦ୍ରୁଦନପରଵଶଃ ଶଂକରଂ ନ ସ୍ମରାମି
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 2॥

ପ୍ରୌଢୋଽହଂ ୟୌଵନସ୍ଥୋ ଵିଷୟଵିଷଧରୈଃ ପଂଚଭିର୍ମର୍ମସଂଧୌ
ଦଷ୍ଟୋ ନଷ୍ଟୋ ଵିଵେକଃ ସୁତଧନୟୁଵତିସ୍ଵାଦୁସୌଖ୍ୟେ ନିଷଣ୍ଣଃ ।
ଶୈଵୀଚିଂତାଵିହୀନଂ ମମ ହୃଦୟମହୋ ମାନଗର୍ଵାଧିରୂଢଂ
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 3॥

ଵାର୍ଧକ୍ୟେ ଚେଂଦ୍ରିୟାଣାଂ ଵିଗତଗତିମତିଶ୍ଚାଧିଦୈଵାଦିତାପୈଃ
ପାପୈ ରୋଗୈର୍ଵିୟୋଗୈସ୍ତ୍ଵନଵସିତଵପୁଃ ପ୍ରୌଢହୀନଂ ଚ ଦୀନମ୍ ।
ମିଥ୍ୟାମୋହାଭିଲାଷୈର୍ଭ୍ରମତି ମମ ମନୋ ଧୂର୍ଜଟେର୍ଧ୍ୟାନଶୂନ୍ୟଂ
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 4॥

ସ୍ନାତ୍ଵା ପ୍ରତ୍ୟୂଷକାଲେ ସ୍ନପନଵିଧିଵିଧୌ ନାହୃତଂ ଗାଂଗତୋୟଂ
ପୂଜାର୍ଥଂ ଵା କଦାଚିଦ୍ବହୁତରଗହନାତ୍ଖଂଡବିଲ୍ଵୀଦଲାନି ।
ନାନୀତା ପଦ୍ମମାଲା ସରସି ଵିକସିତା ଗଂଧଧୂପୈଃ ତ୍ଵଦର୍ଥଂ
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 5॥

ଦୁଗ୍ଧୈର୍ମଧ୍ଵାଜ୍ୟୟୁକ୍ତୈର୍ଦଧିସିତସହିତୈଃ ସ୍ନାପିତଂ ନୈଵ ଲିଂଗଂ
ନୋ ଲିପ୍ତଂ ଚଂଦନାଦ୍ୟୈଃ କନକଵିରଚିତୈଃ ପୂଜିତଂ ନ ପ୍ରସୂନୈଃ ।
ଧୂପୈଃ କର୍ପୂରଦୀପୈର୍ଵିଵିଧରସୟୁତୈର୍ନୈଵ ଭକ୍ଷ୍ୟୋପହାରୈଃ
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 6॥

ନୋ ଶକ୍ୟଂ ସ୍ମାର୍ତକର୍ମ ପ୍ରତିପଦଗହନପ୍ରତ୍ୟଵାୟାକୁଲାଖ୍ୟଂ
ଶ୍ରୌତେ ଵାର୍ତା କଥଂ ମେ ଦ୍ଵିଜକୁଲଵିହିତେ ବ୍ରହ୍ମମାର୍ଗାନୁସାରେ । ଵର୍ ବ୍ରହ୍ମମାର୍ଗେ ସୁସାରେ
ଜ୍ଞାତୋ ଧର୍ମୋ ଵିଚାରୈଃ ଶ୍ରଵଣମନନୟୋଃ କିଂ ନିଦିଧ୍ୟାସିତଵ୍ୟଂ
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 7॥

ଧ୍ୟାତ୍ଵା ଚିତ୍ତେ ଶିଵାଖ୍ୟଂ ପ୍ରଚୁରତରଧନଂ ନୈଵ ଦତ୍ତଂ ଦ୍ଵିଜେଭ୍ୟୋ
ହଵ୍ୟଂ ତେ ଲକ୍ଷସଂଖ୍ୟୈର୍ହୁତଵହଵଦନେ ନାର୍ପିତଂ ବୀଜମଂତ୍ରୈଃ ।
ନୋ ତପ୍ତଂ ଗାଂଗାତୀରେ ଵ୍ରତଜପନିୟମୈଃ ରୁଦ୍ରଜାପ୍ୟୈର୍ନ ଵେଦୈଃ
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 8॥

ନଗ୍ନୋ ନିଃସଂଗଶୁଦ୍ଧସ୍ତ୍ରିଗୁଣଵିରହିତୋ ଧ୍ଵସ୍ତମୋହାଂଧକାରୋ
ନାସାଗ୍ରେ ନ୍ୟସ୍ତଦୃଷ୍ଟିର୍ଵିଦିତଭଵଗୁଣୋ ନୈଵ ଦୃଷ୍ଟଃ କଦାଚିତ୍ ।
ଉନ୍ମନ୍ୟାଽଵସ୍ଥୟା ତ୍ଵାଂ ଵିଗତକଲିମଲଂ ଶଂକରଂ ନ ସ୍ମରାମି
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 9॥

ସ୍ଥିତ୍ଵା ସ୍ଥାନେ ସରୋଜେ ପ୍ରଣଵମୟମରୁତ୍କୁଂଭକେ (କୁଂଡଲେ) ସୂକ୍ଷ୍ମମାର୍ଗେ
ଶାଂତେ ସ୍ଵାଂତେ ପ୍ରଲୀନେ ପ୍ରକଟିତଵିଭଵେ ଜ୍ୟୋତିରୂପେଽପରାଖ୍ୟେ ।
ଲିଂଗଜ୍ଞେ ବ୍ରହ୍ମଵାକ୍ୟେ ସକଲତନୁଗତଂ ଶଂକରଂ ନ ସ୍ମରାମି
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 10॥

ହୃଦ୍ୟଂ ଵେଦାଂତଵେଦ୍ୟଂ ହୃଦୟସରସିଜେ ଦୀପ୍ତମୁଦ୍ୟତ୍ପ୍ରକାଶଂ
ସତ୍ୟଂ ଶାଂତସ୍ଵରୂପଂ ସକଲମୁନିମନଃପଦ୍ମଷଂଡୈକଵେଦ୍ୟମ୍ ।
ଜାଗ୍ରତ୍ସ୍ଵପ୍ନେ ସୁଷୁପ୍ତୌ ତ୍ରିଗୁଣଵିରହିତଂ ଶଂକରଂ ନ ସ୍ମରାମି
କ୍ଷଂତଵ୍ୟୋ ମେଽପରାଧଃ ଶିଵ ଶିଵ ଶିଵ ଭୋ ଶ୍ରୀମହାଦେଵ ଶଂଭୋ ॥ 11॥

ଚଂଦ୍ରୋଦ୍ଭାସିତଶେଖରେ ସ୍ମରହରେ ଗଂଗାଧରେ ଶଂକରେ
ସର୍ପୈର୍ଭୂଷିତକଂଠକର୍ଣଵିଵରେ ନେତ୍ରୋତ୍ଥଵୈଶ୍ଵାନରେ । ୟୁଗଲେ
ଦଂତିତ୍ଵକ୍କୃତସୁଂଦରାଂବରଧରେ ତ୍ରୈଲୋକ୍ୟସାରେ ହରେ
ମୋକ୍ଷାର୍ଥଂ କୁରୁ ଚିତ୍ତଵୃତ୍ତିମଚଲାମନ୍ୟୈସ୍ତୁ କିଂ କର୍ମଭିଃ ॥ 12॥

କିଂ ଵାଽନେନ ଧନେନ ଵାଜିକରିଭିଃ ପ୍ରାପ୍ତେନ ରାଜ୍ୟେନ କିଂ
କିଂ ଵା ପୁତ୍ରକଲତ୍ରମିତ୍ରପଶୁଭିର୍ଦେହେନ ଗେହେନ କିମ୍ ।
ଜ୍ଞାତ୍ଵୈତତ୍କ୍ଷଣଭଂଗୁରଂ ସପଦି ରେ ତ୍ୟାଜ୍ୟଂ ମନୋ ଦୂରତଃ
ସ୍ଵାତ୍ମାର୍ଥଂ ଗୁରୁଵାକ୍ୟତୋ ଭଜ ମନ ଶ୍ରୀପାର୍ଵତୀଵଲ୍ଲଭମ୍ ॥ 13॥

ପୌରୋହିତ୍ୟଂ ରଜନିଚରିତଂ ଗ୍ରାମଣୀତ୍ଵଂ ନିୟୋଗୋ
ମାଠାପତ୍ୟଂ ହ୍ୟନୃତଵଚନଂ ସାକ୍ଷିଵାଦଃ ପରାନ୍ନମ୍ ।
ବ୍ରହ୍ମଦ୍ଵେଷଃ ଖଲଜନରତିଃ ପ୍ରାଣିନାଂ ନିର୍ଦୟତ୍ଵଂ
ମା ଭୂଦେଵଂ ମମ ପଶୁପତେ ଜନ୍ମଜନ୍ମାଂତରେଷୁ ॥ 14॥

ଆୟୁର୍ନଶ୍ୟତି ପଶ୍ୟତାଂ ପ୍ରତିଦିନଂ ୟାତି କ୍ଷୟଂ ୟୌଵନଂ
ପ୍ରତ୍ୟାୟାଂତି ଗତାଃ ପୁନର୍ନ ଦିଵସାଃ କାଲୋ ଜଗଦ୍ଭକ୍ଷକଃ ।
ଲକ୍ଷ୍ମୀସ୍ତୋୟତରଂଗଭଂଗଚପଲା ଵିଦ୍ୟୁଚ୍ଚଲଂ ଜୀଵିତଂ
ତସ୍ମାତ୍ତ୍ଵାଂ ଶରଣାଗତଂ ଶରଣଦ ତ୍ଵଂ ରକ୍ଷ ରକ୍ଷାଧୁନା ॥ 15॥ ତସ୍ମାନ୍ମାଂ

ଵଂଦେ ଦେଵମୁମାପତିଂ ସୁରଗୁରୁଂ ଵଂଦେ ଜଗତ୍କାରଣଂ
ଵଂଦେ ପନ୍ନଗଭୂଷଣଂ ମୃଗଧରଂ ଵଂଦେ ପଶୂନାଂ ପତିମ୍ ।
ଵଂଦେ ସୂର୍ୟଶଶାଂକଵହ୍ନିନୟନଂ ଵଂଦେ ମୁକୁଂଦପ୍ରିୟଂ
ଵଂଦେ ଭକ୍ତଜନାଶ୍ରୟଂ ଚ ଵରଦଂ ଵଂଦେ ଶିଵଂ ଶଂକରମ୍ ॥16॥

ଗାତ୍ରଂ ଭସ୍ମସିତଂ ସିତଂ ଚ ହସିତଂ ହସ୍ତେ କପାଲଂ ସିତଂ ଵର୍ ସ୍ମିତଂ ଚ
ଖଟ୍ଵାଂଗଂ ଚ ସିତଂ ସିତଶ୍ଚ ଵୃଷଭଃ କର୍ଣେ ସିତେ କୁଂଡଲେ ।
ଗଂଗା ଫେନସିତା ଜଟା ପଶୁପତେଶ୍ଚଂଦ୍ରଃ ସିତୋ ମୂର୍ଧନି
ସୋଽୟଂ ସର୍ଵସିତୋ ଦଦାତୁ ଵିଭଵଂ ପାପକ୍ଷୟଂ ସର୍ଵଦା ॥ 17॥

କରଚରଣକୃତଂ ଵାକ୍କାୟଜଂ କର୍ମଜଂ ଵା
ଶ୍ରଵଣନୟନଜଂ ଵା ମାନସଂ ଵାଽପରାଧମ୍ ।
ଵିହିତମଵିହିତଂ ଵା ସର୍ଵମେତତ୍କ୍ଷ୍ମସ୍ଵ
ଶିଵ ଶିଵ କରୁଣାବ୍ଧେ ଶ୍ରୀମହାଦେଵ ଶଂଭୋ ॥ 18॥

॥ ଇତି ଶ୍ରୀମଦ୍ ଶଂକରାଚାର୍ୟକୃତ ଶିଵାପରାଧକ୍ଷମାପଣସ୍ତୋତ୍ରଂ ସଂପୂର୍ଣମ୍ ॥