ଗୀତଗୋଵିଂଦଂ ନଵମଃ ସର୍ଗଃ – ମଂଦ ମୁକୁଂଦଃ

॥ ନଵମଃ ସର୍ଗଃ ॥
॥ ମଂଦମୁକୁଂଦଃ ॥

ତାମଥ ମନ୍ମଥଖିନ୍ନାଂ ରତିରସଭିନ୍ନାଂ ଵିଷାଦସଂପନ୍ନାମ୍ ।
ଅନୁଚିଂତିତହରିଚରିତାଂ କଲହାଂତରିତମୁଵାଚ ସଖୀ ॥ 51 ॥

॥ ଗୀତଂ 18 ॥

ହରିରଭିସରତି ଵହତି ମଧୁପଵନେ ।
କିମପରମଧିକସୁଖଂ ସଖି ଭୁଵନେ ॥
ମାଧଵେ ମା କୁରୁ ମାନିନି ମାନମୟେ ॥ 1 ॥

ତାଲଫଲାଦପି ଗୁରୁମତିସରସମ୍ ।
କିଂ ଵିଫଲୀକୁରୁଷେ କୁଚକଲଶମ୍ ॥ 2 ॥

କତି ନ କଥିତମିଦମନୁପଦମଚିରମ୍ ।
ମା ପରିହର ହରିମତିଶୟରୁଚିରମ୍ ॥ 3 ॥

କିମିତି ଵିଷୀଦସି ରୋଦିଷି ଵିକଲା ।
ଵିହସତି ୟୁଵତିସଭା ତଵ ସକଲା ॥ 4 ॥

ସଜଲନଲିନୀଦଲଶୀତଲଶୟନେ ।
ହରିମଵଲୋକ୍ୟ ସଫଲୟ୍ ନୟନେ ॥ 5 ॥

ଜନୟସି ମନସି କିମିତି ଗୁରୁଖେଦମ୍ ।
ଶୃଣୁ ମମ ଵଚନମନୀହିତଭେଦମ୍ ॥ 6 ॥

ହରିରୁପୟାତୁ ଵଦତୁ ବହୁମଧୁରମ୍ ।
କିମିତି କରୋଷି ହୃଦୟମତିଵିଧୁରମ୍ ॥ 7 ॥

ଶ୍ରୀଜୟଦେଵଭଣିତମତିଲଲିତମ୍ ।
ସୁଖୟତୁ ରସିକଜନଂ ହରିଚରିତମ୍ ॥ 8 ॥

ସ୍ନିଗ୍ଧେ ୟତ୍ପରୁଷାସି ୟତ୍ପ୍ରଣମତି ସ୍ତବ୍ଧାସି ୟଦ୍ରାଗିଣି ଦ୍ଵେଷସ୍ଥାସି ୟଦୁନ୍ମୁଖେ ଵିମୁଖତାଂ ୟାତାସି ତସ୍ମିନ୍ପ୍ରିୟେ ।
ୟୁକ୍ତଂ ତଦ୍ଵିପରୀତକାରିଣି ତଵ ଶ୍ରୀଖଂଡଚର୍ଚା ଵିଷଂ ଶୀତାଂଶୁସ୍ତପନୋ ହିମଂ ହୁତଵହଃ କ୍ରୀଡାମୁଦୋ ୟାତନାଃ ॥ 52 ॥

॥ ଇତି ଗୀତଗୋଵିଂଦେ କଲହାଂତରିତାଵର୍ଣନେ ମଂଦମୁକୁଂଦୋ ନାମ ନଵମଃ ସର୍ଗଃ ॥