ଗୀତଗୋଵିଂଦଂ ସପ୍ତମଃ ସର୍ଗଃ – ନାଗର ନାରୟଣଃ

॥ ସପ୍ତମଃ ସର୍ଗଃ ॥
॥ ନାଗରନାରାୟଣଃ ॥

ଅତ୍ରାଂତରେ ଚ କୁଲଟାକୁଲଵର୍ତ୍ମପାତ-ସଂଜାତପାତକ ଇଵ ସ୍ଫୁଟଲାଂଛନଶ୍ରୀଃ ।
ଵୃଂଦାଵନାଂତରମଦୀପୟଦଂଶୁଜାଲୈ-ର୍ଦିକ୍ସୁଂଦରୀଵଦନଚଂଦନବିଂଦୁରିଂଦୁଃ ॥ 40 ॥

ପ୍ରସରତି ଶଶଧରବିଂବେ ଵିହିତଵିଲଂବେ ଚ ମାଧଵେ ଵିଧୁରା ।
ଵିରଚିତଵିଵିଧଵିଲାପଂ ସା ପରିତାପଂ ଚକାରୋଚ୍ଚୈଃ ॥ 41 ॥

॥ ଗୀତଂ 13 ॥

କଥିତସମୟେଽପି ହରିରହହ ନ ୟୟୌ ଵନମ୍ ।
ମମ ଵିଫଲମିଦମମଲରୂପମପି ୟୌଵନମ୍ ॥
ୟାମି ହେ କମିହ ଶରଣଂ ସଖୀଜନଵଚନଵଂଚିତା ॥ 1 ॥

ୟଦନୁଗମନାୟ ନିଶି ଗହନମପି ଶୀଲିତମ୍ ।
ତେନ ମମ ହୃଦୟମିଦମସମଶରକୀଲିତମ୍ ॥ 2 ॥

ମମ ମରଣମେଵ ଵରମତିଵିତଥକେତନା ।
କିମିହ ଵିଷହାମି ଵିରହାନଲଚେତନା ॥ 3 ॥

ମାମହହ ଵିଧୁରୟତି ମଧୁରମଧୁୟାମିନୀ ।
କାପି ହରିମନୁଭଵତି କୃତସୁକୃତକାମିନୀ ॥ 4 ॥

ଅହହ କଲୟାମି ଵଲୟାଦିମଣୀଭୂଷଣମ୍ ।
ହରିଵିରହଦହନଵହନେନ ବହୁଦୂଷଣମ୍ ॥ 5 ॥

କୁସୁମସୁକୁମାରତନୁମତନୁଶରଲୀଲୟା ।
ସ୍ରଗପି ହୃଦି ହଂତି ମାମତିଵିଷମଶୀଲୟା ॥ 6 ॥

ଅହମିହ ନିଵସାମି ନଗଣିତଵନଵେତସା ।
ସ୍ମରତି ମଧୁସୂଦନୋ ମାମପି ନ ଚେତସା ॥ 7 ॥

ହରିଚରଣଶରଣଜୟଦେଵକଵିଭାରତୀ ।
ଵସତୁ ହୃଦି ୟୁଵତିରିଵ କୋମଲକଲାଵତୀ ॥ 8 ॥

ତତ୍କିଂ କାମପି କାମିନୀମଭିସୃତଃ କିଂ ଵା କଲାକେଲିଭି-ର୍ବଦ୍ଧୋ ବଂଧୁଭିରଂଧକାରିଣି ଵନୋପାଂତେ କିମୁ ଭ୍ରାମ୍ୟତି ।
କାଂତଃ କ୍ଲାଂତମନା ମନାଗପି ପଥି ପ୍ରସ୍ଥାତୁମେଵାକ୍ଷମଃ ସଂକେତୀକୃତମଂଜୁଵଂଜୁଲଲତାକୁଂଜେଽପି ୟନ୍ନାଗତଃ ॥ 42 ॥

ଅଥାଗତାଂ ମାଧଵମଂତରେଣ ସଖୀମିୟଂ ଵୀକ୍ଷ୍ୟ ଵିଷାଦମୂକାମ୍ ।
ଵିଶଂକ୍ମାନା ରମିତଂ କୟାପି ଜନାର୍ଦନଂ ଦୃଷ୍ଟଵଦେତଦାହ ॥ 43 ॥

॥ ଗୀତଂ 14 ॥

ସ୍ମରସମରୋଚିତଵିରଚିତଵେଶା ।
ଗଲିତକୁସୁମଦରଵିଲୁଲିତକେଶା ॥
କାପି ମଧୁରିପୁଣା ଵିଲସତି ୟୁଵତିରଧିକଗୁଣା ॥ 1 ॥

ହରିପରିରଂଭଣଵଲିତଵିକାରା ।
କୁଚକଲଶୋପରି ତରଲିତହାରା ॥ 2 ॥

ଵିଚଲଦଲକଲଲିତାନନଚଂଦ୍ରା ।
ତଦଧରପାନରଭସକୃତତଂଦ୍ରା ॥ 3 ॥

ଚଂଚଲକୁଂଡଲଦଲିତକପୋଲା ।
ମୁଖରିତରସନଜଘନଗଲିତଲୋଲା ॥ 4 ॥

ଦୟିତଵିଲୋକିତଲଜ୍ଜିତହସିତା ।
ବହୁଵିଧକୂଜିତରତିରସରସିତା ॥ 5 ॥

ଵିପୁଲପୁଲକପୃଥୁଵେପଥୁଭଂଗା ।
ଶ୍ଵସିତନିମୀଲିତଵିକସଦନଂଗା ॥ 6 ॥

ଶ୍ରମଜଲକଣଭରସୁଭଗଶରୀରା ।
ପରିପତିତୋରସି ରତିରଣଧୀରା ॥ 7 ॥

ଶ୍ରୀଜୟଦେଵଭଣିତହରିରମିତମ୍ ।
କଲିକଲୁଷଂ ଜନୟତୁ ପରିଶମିତମ୍ ॥ 8 ॥

ଵିରହପାଂଡୁମୁରାରିମୁଖାଂବୁଜ-ଦ୍ୟୁତିରିୟଂ ତିରୟନ୍ନପି ଚେତନାମ୍ ।
ଵିଧୁରତୀଵ ତନୋତି ମନୋଭୁଵଃ ସହୃଦୟେ ହୃଦୟେ ମଦନଵ୍ୟଥାମ୍ ॥ 44 ॥

॥ ଗୀତଂ 15 ॥

ସମୁଦିତମଦନେ ରମଣୀଵଦନେ ଚୁଂବନଵଲିତାଧରେ ।
ମୃଗମଦତିଲକଂ ଲିଖତି ସପୁଲକଂ ମୃଗମିଵ ରଜନୀକରେ ॥
ରମତେ ୟମୁନାପୁଲିନଵନେ ଵିଜୟୀ ମୁରାରିରଧୁନା ॥ 1 ॥

ଘନଚୟରୁଚିରେ ରଚୟତି ଚିକୁରେ ତରଲିତତରୁଣାନନେ ।
କୁରବକକୁସୁମଂ ଚପଲାସୁଷମଂ ରତିପତିମୃଗକାନନେ ॥ 2 ॥

ଘଟୟତି ସୁଘନେ କୁଚୟୁଗଗଗନେ ମୃଗମଦରୁଚିରୂଷିତେ ।
ମଣିସରମମଲଂ ତାରକପଟଲଂ ନଖପଦଶଶିଭୂଷିତେ ॥ 3 ॥

ଜିତବିସଶକଲେ ମୃଦୁଭୁଜୟୁଗଲେ କରତଲନଲିନୀଦଲେ ।
ମରକତଵଲୟଂ ମଧୁକରନିଚୟଂ ଵିତରତି ହିମଶୀତଲେ ॥ 4 ॥

ରତିଗୃହଜଘନେ ଵିପୁଲାପଘନେ ମନସିଜକନକାସନେ ।
ମଣିମୟରସନଂ ତୋରଣହସନଂ ଵିକିରତି କୃତଵାସନେ ॥ 5 ॥

ଚରଣକିସଲୟେ କମଲାନିଲୟେ ନଖମଣିଗଣପୂଜିତେ ।
ବହିରପଵରଣଂ ୟାଵକଭରଣଂ ଜନୟତି ହୃଦି ୟୋଜିତେ ॥ 6 ॥

ରମୟତି ସଦୃଶଂ କାମପି ସୁଭୃଶଂ ଖଲହଲଧରସୋଦରେ ।
କିମଫଲମଵସଂ ଚିରମିହ ଵିରସଂ ଵଦ ସଖି ଵିଟପୋଦରେ ॥ 7 ॥

ଇହ ରସଭଣନେ କୃତହରିଗୁଣନେ ମଧୁରିପୁପଦସେଵକେ ।
କଲିୟୁଗଚରିତଂ ନ ଵସତୁ ଦୁରିତଂ କଵିନୃପଜୟଦେଵକେ ॥ 8 ॥

ନାୟାତଃ ସଖି ନିର୍ଦୟୋ ୟଦି ଶଠସ୍ତ୍ଵଂ ଦୂତି କିଂ ଦୂୟସେ ସ୍ଵଚ୍ଛଂଦଂ ବହୁଵଲ୍ଲଭଃ ସ ରମତେ କିଂ ତତ୍ର ତେ ଦୂଷଣମ୍ ।
ପଶ୍ୟାଦ୍ୟ ପ୍ରିୟସମ୍ଗମାୟ ଦୟିତସ୍ୟାକୃଷ୍ୟମାଣଂ ଗଣୈ-ରୁତ୍କଂଠାର୍ତିଭରାଦିଵ ସ୍ଫୁଟଦିଦଂ ଚେତଃ ସ୍ଵୟଂ ୟାସ୍ୟତି ॥ 45 ॥

॥ ଗୀତଂ 16 ॥

ଅନିଲତରଲକୁଵଲୟନୟନେନ ।
ତପତି ନ ସା କିସଲୟଶୟନେନ ॥
ସଖି ୟା ରମିତା ଵନମାଲିନା ॥ 1 ॥

ଵିକସିତସରସିଜଲଲିତମୁଖେନ ।
ସ୍ଫୁଟତି ନ ସା ମନସିଜଵିଶିଖେନ ॥ 2 ॥

ଅମୃତମଧୁରମୃଦୁତରଵଚନେନ ।
ଜ୍ଵଲତି ନ ସା ମଲୟଜପଵନେନ ॥ 3 ॥

ସ୍ଥଲଜଲରୁହରୁଚିକରଚରଣେନ ।
ଲୁଠତି ନ ସା ହିମକରକିରଣେନ ॥ 4 ॥

ସଜଲଜଲଦସମୁଦୟରୁଚିରେଣ ।
ଦଲତି ନ ସା ହୃଦି ଚିରଵିରହେଣ ॥ 5 ॥

କନକନିକଷରୁଚିଶୁଚିଵସନେନ ।
ଶ୍ଵସତି ନ ସା ପରିଜନହସନେନ ॥ 6 ॥

ସକଲଭୁଵନଜନଵରତରୁଣେନ ।
ଵହତି ନ ସା ରୁଜମତିକରୁଣେନ ॥ 7 ॥

ଶ୍ରୀଜୟଦେଵଭଣିତଵଚନେନ ।
ପ୍ରଵିଶତୁ ହରିରପି ହୃଦୟମନେନ ॥ 8 ॥

ମନୋଭଵାନଂଦନ ଚଂଦନାନିଲ ପ୍ରସୀଦ ରେ ଦକ୍ଷିଣ ମୁଂଚ ଵାମତାମ୍ ।
କ୍ଷଣଂ ଜଗତ୍ପ୍ରାଣ ଵିଧାୟ ମାଧଵଂ ପୁରୋ ମମ ପ୍ରାଣହରୋ ଭଵିଷ୍ୟସି ॥ 46 ॥

ରିପୁରିଵ ସଖୀସଂଵାସୋଽୟଂ ଶିଖୀଵ ହିମାନିଲୋ ଵିଷମିଵ ସୁଧାରଶ୍ମିର୍ୟସ୍ମିଂଦୁନୋତି ମନୋଗତେ ।
ହୃଦୟମଦୟେ ତସ୍ମିନ୍ନେଵଂ ପୁନର୍ଵଲତେ ବଲାତ୍ କୁଵଲୟଦୃଶାଂ ଵାମଃ କାମୋ ନିକାମନିରଂକୁଶଃ ॥ 47 ॥

ବାଧାଂ ଵିଧେହି ମଲୟାନିଲ ପଂଚବାଣ ପ୍ରାଣାନ୍ଗୃହାଣ ନ ଗୃହଂ ପୁନରାଶ୍ରୟିଷ୍ୟେ ।
କିଂ ତେ କୃତାଂତଭଗିନି କ୍ଷମୟା ତରଂଗୈ-ରଂଗାନି ସିଂଚ ମମ ଶାମ୍ୟତୁ ଦେହଦାହଃ ॥ 48 ॥

ପ୍ରାତର୍ନୀଲନିଚୋଲମଚ୍ୟୁତମୁରସ୍ସଂଵୀତପୀତାଂବରମ୍
ରଧାୟାଶ୍କିତଂ ଵିଲୋକ୍ୟ ହସତି ସ୍ଵୈରଂ ସଖୀମଂଡଲେ ।
ଵ୍ରୀଡାଚଂଚଲମଂଚଲଂ ନୟନୟୋରାଧାୟ ରାଧାନନେ
ସ୍ଵାଦୁସ୍ମେରମୁଖୋଽୟମସ୍ତୁ ଜଗଦାନଂଦାୟ ନଂଦାତ୍ମଜଃ॥ (କସ୍ମିଂଶ୍ଚନ ପାଠାଂତରେ ଇଦଂ ପଦ୍ୟଂ ଵିଦ୍ୟତେ)

॥ ଇତି ଗୀତଗୋଵିଂଦେ ଵିପ୍ରଲବ୍ଧାଵର୍ଣନେ ନାଗନାରାୟଣୋ ନାମ ସପ୍ତମଃ ସର୍ଗଃ ॥