ଗୀତଗୋଵିଂଦଂ ଷଷ୍ଟଃ ସର୍ଗଃ – କୁଂଠ ଵୈକୁଂଠଃ

॥ ଷଷ୍ଠଃ ସର୍ଗଃ ॥
॥ କୁଂଠଵୈକୁଂଠଃ ॥

ଅଥ ତାଂ ଗଂତୁମଶକ୍ତାଂ ଚିରମନୁରକ୍ତାଂ ଲତାଗୃହେ ଦୃଷ୍ଟ୍ଵା ।
ତଚ୍ଚରିତଂ ଗୋଵିଂଦେ ମନସିଜମଂଦେ ସଖୀ ପ୍ରାହ ॥ 37 ॥

॥ ଗୀତଂ 12 ॥

ପଶ୍ୟତି ଦିଶି ଦିଶି ରହସି ଭଵଂତମ୍ ।
ତଦଧରମଧୁରମଧୂନି ପିବଂତମ୍ ॥
ନାଥ ହରେ ଜଗନ୍ନାଥ ହରେ ସୀଦତି ରାଧା ଵାସଗୃହେ – ଧ୍ରୁଵମ୍ ॥ 1 ॥

ତ୍ଵଦଭିସରଣରଭସେନ ଵଲଂତୀ ।
ପତତି ପଦାନି କିୟଂତି ଚଲଂତୀ ॥ 2 ॥

ଵିହିତଵିଶଦବିସକିସଲୟଵଲୟା ।
ଜୀଵତି ପରମିହ ତଵ ରତିକଲୟା ॥ 3 ॥

ମୁହୁରଵଲୋକିତମଂଡନଲୀଲା ।
ମଧୁରିପୁରହମିତି ଭାଵନଶୀଲା ॥ 4 ॥

ତ୍ଵରିତମୁପୈତି ନ କଥମଭିସାରମ୍ ।
ହରିରିତି ଵଦତି ସଖୀମନୁଵାରମ୍ ॥ 5 ॥

ଶ୍ଲିଷ୍ୟତି ଚୁଂବତି ଜଲଧରକଲ୍ପମ୍ ।
ହରିରୁପଗତ ଇତି ତିମିରମନଲ୍ପମ୍ ॥ 6 ॥

ଭଵତି ଵିଲଂବିନି ଵିଗଲିତଲଜ୍ଜା ।
ଵିଲପତି ରୋଦିତି ଵାସକସଜ୍ଜା ॥ 7 ॥

ଶ୍ରୀଜୟଦେଵକଵେରିଦମୁଦିତମ୍ ।
ରସିକଜନଂ ତନୁତାମତିମୁଦିତମ୍ ॥ 8 ॥

ଵିପୁଲପୁଲକପାଲିଃ ସ୍ଫୀତସୀତ୍କାରମଂତ-ର୍ଜନିତଜଡିମକାକୁଵ୍ୟାକୁଲଂ ଵ୍ୟାହରଂତୀ ।
ତଵ କିତଵ ଵିଧତ୍ତେଽମଂଦକଂଦର୍ପଚିଂତାଂ ରସଜଲଧିନିମଗ୍ନା ଧ୍ୟାନଲଗ୍ନା ମୃଗାକ୍ଷୀ ॥ 38 ॥

ଅଂଗେଷ୍ଵାଭରଣଂ କରୋତି ବହୁଶଃ ପତ୍ରେଽପି ସଂଚାରିଣି ପ୍ରାପ୍ତଂ ତ୍ଵାଂ ପରିଶଂକତେ ଵିତନୁତେ ଶୟ୍ୟାଂ ଚିରଂ ଧ୍ୟାୟତି ।
ଇତ୍ୟାକଲ୍ପଵିକଲ୍ପତଲ୍ପରଚନାସଂକଲ୍ପଲୀଲାଶତ-ଵ୍ୟାସକ୍ତାପି ଵିନା ତ୍ଵୟା ଵରତନୁର୍ନୈଷା ନିଶାଂ ନେଷ୍ୟତି ॥ 39 ॥

କିଂ ଵିଶ୍ରାମ୍ୟସି କୃଷ୍ଣଭୋଗିଭଵନେ ଭାଂଡୀରଭୂମୀରୁହି ଭ୍ରାତ ର୍ୟାହି ନଦୃଷ୍ଟିଗୋଚରମିତସ୍ସାନଂଦନଂଦାସ୍ପଦମ୍।
ରଧାୟାଵଚନଂ ତଦଧ୍ଵଗମୁଖାନ୍ନଂଦାଂତିକେଗୋପତୋ ଗୋଵିଂଦସ୍ୟଜୟଂତି ସାୟମତିଥିପ୍ରାଶସ୍ତ୍ୟଗର୍ଭାଗିରଃ॥ 40 ॥

॥ ଇତି ଗୀତଗୋଵିଂଦେ ଵାସକସଜ୍ଜାଵର୍ଣନେ କୁଂଠଵୈକୁଂଠୋ ନାମ ଷଷ୍ଠଃ ସର୍ଗଃ ॥