ଗୀତଗୋଵିଂଦଂ ପଂଚମଃ ସର୍ଗଃ – ସାକାଂକ୍ଷ ପୁଂଡରୀକାକ୍ଷଃ

॥ ପଂଚମଃ ସର୍ଗଃ ॥
॥ ସାକାଂକ୍ଷପୁଂଡରୀକାକ୍ଷଃ ॥

ଅହମିହ ନିଵସାମି ୟାହି ରାଧାଂ ଅନୁନୟ ମଦ୍ଵଚନେନ ଚାନୟେଥାଃ ।
ଇତି ମଧୁରିପୁଣା ସଖୀ ନିୟୁକ୍ତା ସ୍ଵୟମିଦମେତ୍ୟ ପୁନର୍ଜଗାଦ ରାଧାମ୍ ॥ 31 ॥

॥ ଗୀତଂ 10 ॥

ଵହତି ମଲୟସମୀରେ ମଦନମୁପନିଧାୟ ।
ସ୍ଫୁଟତି କୁସୁମନିକରେ ଵିରହିହୃଦୟଦଲନାୟ ॥
ତଵ ଵିରହେ ଵନମାଲୀ ସଖି ସୀଦତି ॥ 1 ॥

ଦହତି ଶିଶିରମୟୂଖେ ମରଣମନୁକରୋତି ।
ପତତି ମଦନଵିଶିଖେ ଵିଲପତି ଵିକଲତରୋଽତି ॥ 2 ॥

ଧ୍ଵନତି ମଧୁପସମୂହେ ଶ୍ରଵଣମପିଦଧାତି ।
ମନସି ଚଲିତଵିରହେ ନିଶି ନିଶି ରୁଜମୁପୟାତି ॥ 3 ॥

ଵସତି ଵିପିନଵିତାନେ ତ୍ୟଜତି ଲଲିତଧାମ ।
ଲୁଠତି ଧରଣିଶୟନେ ବହୁ ଵିଲପତି ତଵ ନାମ ॥ 4 ॥

ରଣତି ପିକସମଵାୟେ ପ୍ରତିଦିଶମନୁୟାତି ।
ହସତି ମନୁଜନିଚୟେ ଵିରହମପଲପତି ନେତି ॥ 5 ॥

ସ୍ଫୁରତି କଲରଵରାଵେ ସ୍ମରତି ମଣିତମେଵ।
ତଵରତିସୁଖଵିଭଵେ ଗଣୟତି ସୁଗୁଣମତୀଵ ॥ 6 ॥

ତ୍ଵଦଭିଧଶୁଭଦମାସଂ ଵଦତି ନରି ଶୃଣୋତି ।
ତମପି ଜପତି ସରସଂ ୟୁଵତିଷୁ ନ ରତିମୁପୈତି ॥ 7 ॥

ଭଣତି କଵିଜୟଦେଵେ ଵିରହଵିଲସିତେନ ।
ମନସି ରଭସଵିଭଵେ ହରିରୁଦୟତୁ ସୁକୃତେନ ॥ 8 ॥

ପୂର୍ଵଂ ୟତ୍ର ସମଂ ତ୍ଵୟା ରତିପତେରାସାଦିତଃ ସିଦ୍ଧୟ-ସ୍ତସ୍ମିନ୍ନେଵ ନିକୁଂଜମନ୍ମଥମହାତୀର୍ଥେ ପୁନର୍ମାଧଵଃ ।
ଧ୍ୟାୟଂସ୍ତ୍ଵାମନିଶଂ ଜପନ୍ନପି ତଵୈଵାଲାପମଂତ୍ରାଵଲୀଂ ଭୂୟସ୍ତ୍ଵତ୍କୁଚକୁଂଭନିର୍ଭରପରୀରଂଭାମୃତଂ ଵାଂଛତି ॥ 32 ॥

॥ ଗୀତଂ 11 ॥

ରତିସୁଖସାରେ ଗତମଭିସାରେ ମଦନମନୋହରଵେଶମ୍ ।
ନ କୁରୁ ନିତଂବିନି ଗମନଵିଲଂବନମନୁସର ତଂ ହୃଦୟେଶମ୍ ॥
ଧୀରସମୀରେ ୟମୁନାତୀରେ ଵସତି ଵନେ ଵନମାଲୀ ॥ 1 ॥

ନାମ ସମେତଂ କୃତସଂକେତଂ ଵାଦୟତେ ମୃଦୁଵେଣୁମ୍ ।
ବହୁ ମନୁତେ ନନୁ ତେ ତନୁସଂଗତପଵନଚଲିତମପି ରେଣୁମ୍ ॥ 2 ॥

ପତତି ପତତ୍ରେ ଵିଚଲତି ପତ୍ରେ ଶଂକିତଭଵଦୁପୟାନମ୍ ।
ରଚୟତି ଶୟନଂ ସଚକିତନୟନଂ ପଶ୍ୟତି ତଵ ପଂଥାନମ୍ ॥ 3 ॥

ମୁଖରମଧୀରଂ ତ୍ୟଜ ମଂଜୀରଂ ରିପୁମିଵ କେଲିଷୁଲୋଲମ୍ ।
ଚଲ ସଖି କୁଂଜଂ ସତିମିରପୁଂଜଂ ଶୀଲୟ ନୀଲନିଚୋଲମ୍ ॥ 4 ॥

ଉରସି ମୁରାରେରୁପହିତହାରେ ଘନ ଇଵ ତରଲବଲାକେ ।
ତଟିଦିଵ ପୀତେ ରତିଵିପରୀତେ ରାଜସି ସୁକୃତଵିପାକେ ॥ 5 ॥

ଵିଗଲିତଵସନଂ ପରିହୃତରସନଂ ଘଟୟ ଜଘନମପିଧାନମ୍ ।
କିସଲୟଶୟନେ ପଂକଜନୟନେ ନିଧିମିଵ ହର୍ଷନିଦାନମ୍ ॥ 6 ॥

ହରିରଭିମାନୀ ରଜନିରିଦାନୀମିୟମପି ୟାତି ଵିରାମମ୍ ।
କୁରୁ ମମ ଵଚନଂ ସତ୍ଵରରଚନଂ ପୂରୟ ମଧୁରିପୁକାମମ୍ ॥ 7 ॥

ଶ୍ରୀଜୟଦେଵେ କୃତହରିସେଵେ ଭଣତି ପରମରମଣୀୟମ୍ ।
ପ୍ରମୁଦିତହୃଦୟଂ ହରିମତିସଦୟଂ ନମତ ସୁକୃତକମନୀୟମ୍ ॥ 8 ॥

ଵିକିରତି ମୁହୁଃ ଶ୍ଵାସାଂଦିଶଃ ପୁରୋ ମୁହୁରୀକ୍ଷତେ ପ୍ରଵିଶତି ମୁହୁଃ କୁଂଜଂ ଗୁଂଜନ୍ମୁହୁର୍ବହୁ ତାମ୍ୟତି ।
ରଚୟତି ମୁହୁଃ ଶୟ୍ୟାଂ ପର୍ୟାକୁଲଂ ମୁହୁରୀକ୍ଷତେ ମଦନକଦନକ୍ଲାଂତଃ କାଂତେ ପ୍ରିୟସ୍ତଵ ଵର୍ତତେ ॥ 33 ॥

ତ୍ଵଦ୍ଵାମ୍ୟେନ ସମଂ ସମଗ୍ରମଧୁନା ତିଗ୍ମାଂଶୁରସ୍ତଂ ଗତୋ ଗୋଵିଂଦସ୍ୟ ମନୋରଥେନ ଚ ସମଂ ପ୍ରାପ୍ତଂ ତମଃ ସାଂଦ୍ରତାମ୍ ।
କୋକାନାଂ କରୁଣସ୍ଵନେନ ସଦୃଶୀ ଦୀର୍ଘା ମଦଭ୍ୟର୍ଥନା ତନ୍ମୁଗ୍ଧେ ଵିଫଲଂ ଵିଲଂବନମସୌ ରମ୍ୟୋଽଭିସାରକ୍ଷଣଃ ॥ 34 ॥

ଆଶ୍ଲେଷାଦନୁ ଚୁଂବନାଦନୁ ନଖୋଲ୍ଲେଖାଦନୁ ସ୍ଵାଂତଜ-ପ୍ରୋଦ୍ବୋଧାଦନୁ ସଂଭ୍ରମାଦନୁ ରତାରଂଭାଦନୁ ପ୍ରୀତୟୋଃ ।
ଅନ୍ୟାର୍ଥଂ ଗତୟୋର୍ଭ୍ରମାନ୍ମିଲିତୟୋଃ ସଂଭାଷଣୈର୍ଜାନତୋ-ର୍ଦଂପତ୍ୟୋରିହ କୋ ନ କୋ ନ ତମସି ଵ୍ରୀଡାଵିମିଶ୍ରୋ ରସଃ ॥ 35 ॥

ସଭୟଚକିତଂ ଵିନ୍ୟସ୍ୟଂତୀଂ ଦୃଶୌ ତିମିରେ ପଥି ପ୍ରତିତରୁ ମୁହୁଃ ସ୍ଥିତ୍ଵା ମଂଦଂ ପଦାନି ଵିତନ୍ଵତୀମ୍ ।
କଥମପି ରହଃ ପ୍ରାପ୍ତାମଂଗୈରନଂଗତରଂଗିଭିଃ ସୁମୁଖି ସୁଭଗଃ ପଶ୍ୟନ୍ସ ତ୍ଵାମୁପୈତୁ କୃତାର୍ଥତାମ୍ ॥ 36 ॥

ରାଧାମୁଗ୍ଧମୁଖାରଵିଂଦମଧୁପସ୍ତ୍ରୈଲୋକ୍ୟମୌଲିସ୍ଥଲୀ ନେପଥ୍ୟୋଚିତନୀଲରତ୍ନମଵନୀଭାରାଵତାରାଂତକଃ।
ସ୍ଵଚ୍ଛଂଦଂ ଵ୍ରଜସୁବ୍ଦରୀଜନମନସ୍ତୋଷପ୍ରଦୋଷୋଦୟଃ କଂସଧ୍ଵଂସନଧୂମକେତୁରଵତୁ ତ୍ଵାଂ ଦେଵକୀନଂଦନଃ॥ 36 + 1 ॥

॥ ଇତି ଶ୍ରୀଗୀତଗୋଵିଂଦେଽଭିସାରିକଵର୍ଣନେ ସାକାଂକ୍ଷପୁଂଡରୀକାକ୍ଷୋ ନାମ ପଂଚମଃ ସର୍ଗଃ ॥