ଗୀତଗୋଵିଂଦଂ ଚତୁର୍ଥଃ ସର୍ଗଃ – ସ୍ନିଗ୍ଧ ମଧୁସୂଦନଃ

॥ ଚତୁର୍ଥଃ ସର୍ଗଃ ॥
॥ ସ୍ନିଗ୍ଧମଧୁସୂଦନଃ ॥

ୟମୁନାତୀରଵାନୀରନିକୁଂଜେ ମଂଦମାସ୍ଥିତମ୍ ।
ପ୍ରାହ ପ୍ରେମଭରୋଦ୍ଭ୍ରାଂତଂ ମାଧଵଂ ରାଧିକାସଖୀ ॥ 25 ॥

॥ ଗୀତଂ 8 ॥

ନିଂଦତି ଚଂଦନମିଂଦୁକିରଣମନୁ ଵିଂଦତି ଖେଦମଧୀରମ୍ ।
ଵ୍ୟାଲନିଲୟମିଲନେନ ଗରଲମିଵ କଲୟତି ମଲୟସମୀରମ୍ ॥
ସା ଵିରହେ ତଵ ଦୀନା ମାଧଵ ମନସିଜଵିଶିଖଭୟାଦିଵ ଭାଵନୟା ତ୍ଵୟି ଲୀନା ॥ 1 ॥

ଅଵିରଲନିପତିତମଦନଶରାଦିଵ ଭଵଦଵନାୟ ଵିଶାଲମ୍ ।
ସ୍ଵହୃଦୟର୍ମଣୀ ଵର୍ମ କରୋତି ସଜଲନଲିନୀଦଲଜାଲମ୍ ॥ 2 ॥

କୁସୁମଵିଶିଖଶରତଲ୍ପମନଲ୍ପଵିଲାସକଲାକମନୀୟମ୍ ।
ଵ୍ରତମିଵ ତଵ ପରିରଂଭସୁଖାୟ କରୋତି କୁସୁମଶୟନୀୟମ୍ ॥ 3 ॥

ଵହତି ଚ ଗଲିତଵିଲୋଚନଜଲଭରମାନନକମଲମୁଦାରମ୍ ।
ଵିଧୁମିଵ ଵିକଟଵିଧୁଂତୁଦଦଂତଦଲନଗଲିତାମୃତଧାରମ୍ ॥ 4 ॥

ଵିଲିଖତି ରହସି କୁରଂଗମଦେନ ଭଵଂତମସମଶରଭୂତମ୍ ।
ପ୍ରଣମତି ମକରମଧୋ ଵିନିଧାୟ କରେ ଚ ଶରଂ ନଵଚୂତମ୍ ॥ 5 ॥

ପ୍ରତିପଦମିଦମପି ନିଗତତି ମାଧଵ ତଵ ଚରଣେ ପତିତାହମ୍ ।
ତ୍ଵୟି ଵିମୁଖେ ମୟି ସପଦି ସୁଧାନିଧିରପି ତନୁତେ ତନୁଦାହମ୍ ॥ 6 ॥

ଧ୍ୟାନଲୟେନ ପୁରଃ ପରିକଲ୍ପ୍ୟ ଭଵଂତମତୀଵ ଦୁରାପମ୍ ।
ଵିଲପତି ହସତି ଵିଷୀଦତି ରୋଦିତି ଚଂଚତି ମୁଂଚତି ତାପମ୍ ॥ 7 ॥

ଶ୍ରୀଜୟଦେଵଭଣିତମିଦମଧିକଂ ୟଦି ମନସା ନଟନୀୟମ୍ ।
ହରିଵିରହାକୁଲବଲ୍ଲଵୟୁଵତିସଖୀଵଚନଂ ପଠନୀୟମ୍ ॥ 8 ॥

ଆଵାସୋ ଵିପିନାୟତେ ପ୍ରିୟସଖୀମାଲାପି ଜାଲାୟତେ ତାପୋଽପି ଶ୍ଵସିତେନ ଦାଵଦହନଜ୍ଵାଲାକଲାପାୟତେ ।
ସାପି ତ୍ଵଦ୍ଵିରହେଣ ହଂତ ହରିଣୀରୂପାୟତେ ହା କଥଂ କଂଦର୍ପୋଽପି ୟମାୟତେ ଵିରଚୟଞ୍ଶାର୍ଦୂଲଵିକ୍ରୀଡିତମ୍ ॥ 26 ॥

॥ ଗୀତଂ 9 ॥

ସ୍ତନଵିନିହିତମପି ହାରମୁଦାରମ୍ ।
ସା ମନୁତେ କୃଶତନୁରତିଭାରମ୍ ॥
ରାଧିକା ଵିରହେ ତଵ କେଶଵ ॥ 1 ॥

ସରସମସୃଣମପି ମଲୟଜପଂକମ୍ ।
ପଶ୍ୟତି ଵିଷମିଵ ଵପୁଷି ସଶଂକମ୍ ॥ 2 ॥

ଶ୍ଵସିତପଵନମନୁପମପରିଣାହମ୍ ।
ମଦନଦହନମିଵ ଵହତି ସଦାହମ୍ ॥ 3 ॥

ଦିଶି ଦିଶି କିରତି ସଜଲକଣଜାଲମ୍ ।
ନୟନନଲିନମିଵ ଵିଗଲିତନାଲମ୍ ॥ 4 ॥

ନୟନଵିଷୟମପି କିସଲୟତଲ୍ପମ୍ ।
କଲୟତି ଵିହିତହୁତାଶଵିକଲ୍ପମ୍ ॥ 5 ॥

ତ୍ୟଜତି ନ ପାଣିତଲେନ କପୋଲମ୍ ।
ବାଲଶଶିନମିଵ ସାୟମଲୋଲମ୍ ॥ 6 ॥

ହରିରିତି ହରିରିତି ଜପତି ସକାମମ୍ ।
ଵିରହଵିହିତମରଣେନ ନିକାମମ୍ ॥ 7 ॥

ଶ୍ରୀଜୟଦେଵଭଣିତମିତି ଗୀତମ୍ ।
ସୁଖୟତୁ କେଶଵପଦମୁପୁନୀତମ୍ ॥ 8 ॥

ସା ରୋମାଂଚତି ସୀତ୍କରୋତି ଵିଲପତ୍ୟୁତ୍କଂପତେ ତାମ୍ୟତି ଧ୍ୟାୟତ୍ୟୁଦ୍ଭ୍ରମତି ପ୍ରମୀଲତି ପତତ୍ୟୁଦ୍ୟାତି ମୂର୍ଚ୍ଛତ୍ୟପି ।
ଏତାଵତ୍ୟତନୁଜ୍ଵରେ ଵରତନୁର୍ଜୀଵେନ୍ନ କିଂ ତେ ରସାତ୍ ସ୍ଵର୍ଵୈଦ୍ୟପ୍ରତିମ ପ୍ରସୀଦସି ୟଦି ତ୍ୟକ୍ତୋଽନ୍ୟଥା ନାଂତକଃ ॥ 27 ॥

ସ୍ମରାତୁରାଂ ଦୈଵତଵୈଦ୍ୟହୃଦ୍ୟ ତ୍ଵଦଂଗସଂଗାମୃତମାତ୍ରସାଧ୍ୟାମ୍ ।
ଵିମୁକ୍ତବାଧାଂ କୁରୁଷେ ନ ରାଧା-ମୁପେଂଦ୍ର ଵଜ୍ରାଦପି ଦାରୁଣୋଽସି ॥ 28 ॥

କଂଦର୍ପଜ୍ଵରସଂଜ୍ଵରସ୍ତୁରତନୋରାଶ୍ଚର୍ୟମସ୍ୟାଶ୍ଚିରଂ ଚେତଶ୍ଚଂଦନଚଂଦ୍ରମଃକମଲିନୀଚିଂତାସୁ ସଂତାମ୍ୟତି ।
କିଂତୁ କ୍ଲାଂତିଵଶେନ ଶୀତଲତନୁଂ ତ୍ଵାମେକମେଵ ପ୍ରିୟଂ ଧ୍ୟାୟଂତୀ ରହସି ସ୍ଥିତା କଥମପି କ୍ଷୀଣା କ୍ଷଣଂ ପ୍ରାଣିତି ॥ 29 ॥

କ୍ଷଣମପି ଵିରହଃ ପୁରା ନ ସେହେ ନୟନନିମୀଲନଖିନ୍ନୟା ୟୟା ତେ ।
ଶ୍ଵସିତି କଥମସୌ ରସାଲଶାଖାଂ ଚିରଵିରହେଣ ଵିଲୋକ୍ୟ ପୁଷ୍ପିତାଗ୍ରାମ୍ ॥ 30 ॥

॥ ଇତି ଗୀତଗୋଵିଂଦେ ସ୍ନିଗ୍ଧମାଧଵୋ ନାମ ଚତୁର୍ଥଃ ସର୍ଗଃ ॥