ଗୀତଗୋଵିଂଦଂ ଦ୍ଵିତୀୟଃ ସର୍ଗଃ – ଅକ୍ଲେଶ କେଶଵଃ

॥ ଦ୍ଵିତୀୟଃ ସର୍ଗଃ ॥
॥ ଅକ୍ଲେଶକେଶଵଃ ॥

ଵିହରତି ଵନେ ରାଧା ସାଧାରଣପ୍ରଣୟେ ହରୌ ଵିଗଲିତନିଜୋତ୍କର୍ଷାଦୀର୍ଷ୍ୟାଵଶେନ ଗତାନ୍ୟତଃ ।
କ୍ଵଚିଦପି ଲତାକୁଂଜେ ଗୁଂଜନ୍ମଧୁଵ୍ରତମଂଡଲୀ-ମୁଖରଶିଖରେ ଲୀନା ଦୀନାପ୍ୟୁଵାଚ ରହଃ ସଖୀମ୍ ॥ 14 ॥

॥ ଗୀତଂ 5 ॥

ସଂଚରଦଧରସୁଧାମଧୁରଧ୍ଵନିମୁଖରିତମୋହନଵଂଶମ୍ ।
ଚଲିତଦୃଗଂଚଲଚଂଚଲମୌଲିକପୋଲଵିଲୋଲଵତଂସମ୍ ॥
ରାସେ ହରିମିହ ଵିହିତଵିଲାସଂ ସ୍ମରତି ମନୋ ମମ କୃତପରିହାସମ୍ ॥ 1 ॥

ଚଂଦ୍ରକଚାରୁମୟୂରଶିଖଂଡକମଂଡଲଵଲୟିତକେଶମ୍ ।
ପ୍ରଚୁରପୁରଂଦରଧନୁରନୁରଂଜିତମେଦୁରମୁଦିରସୁଵେଶମ୍ ॥ 2 ॥

ଗୋପକଦଂବନିତଂବଵତୀମୁଖଚୁଂବନଲଂଭିତଲୋଭମ୍ ।
ବଂଧୁଜୀଵମଧୁରାଧରପଲ୍ଲଵମୁଲ୍ଲସିତସ୍ମିତଶୋଭମ୍ ॥ 3 ॥

ଵିପୁଲପୁଲକଭୁଜପଲ୍ଲଵଵଲୟିତଵଲ୍ଲଵୟୁଵତିସହସ୍ରମ୍ ।
କରଚରଣୋରସି ମଣିଗଣଭୂଷଣକିରଣଵିଭିନ୍ନତମିସ୍ରମ୍ ॥ 4 ॥

ଜଲଦପଟଲଵଲଦିଂଦୁଵିନଂଦକଚଂଦନତିଲକଲଲାଟମ୍ ।
ପୀନପୟୋଧରପରିସରମର୍ଦନନିର୍ଦୟହୃଦୟକଵାଟମ୍ ॥ 5 ॥

ମଣିମୟମକରମନୋହରକୁଂଡଲମଂଡିତଗଂଡମୁଦାରମ୍ ।
ପୀତଵସନମନୁଗତମୁନିମନୁଜସୁରାସୁରଵରପରିଵାରମ୍ ॥ 6 ॥

ଵିଶଦକଦଂବତଲେ ମିଲିତଂ କଲିକଲୁଷଭୟଂ ଶମୟଂତମ୍ ।
ମାମପି କିମପି ତରଂଗଦନଂଗଦୃଶା ମନସା ରମୟଂତମ୍ ॥ 7 ॥

ଶ୍ରୀଜୟଦେଵଭଣିତମତିସୁଂଦରମୋହନମଧୁରିପୁରୂପମ୍ ।
ହରିଚରଣସ୍ମରଣଂ ପ୍ରତି ସଂପ୍ରତି ପୁଣ୍ୟଵତାମନୁରୂପମ୍ ॥ 8 ॥

ଗଣୟତି ଗୁଣଗ୍ରାମଂ ଭାମଂ ଭ୍ରମାଦପି ନେହତେ ଵହତି ଚ ପରିତୋଷଂ ଦୋଷଂ ଵିମୁଂଚତି ଦୂରତଃ ।
ୟୁଵତିଷୁ ଵଲସ୍ତୃଷ୍ଣେ କୃଷ୍ଣେ ଵିହାରିଣି ମାଂ ଵିନା ପୁନରପି ମନୋ ଵାମଂ କାମଂ କରୋତି କରୋମି କିମ୍ ॥ 15 ॥

॥ ଗୀତଂ 6 ॥

ନିଭୃତନିକୁଂଜଗୃହଂ ଗତୟା ନିଶି ରହସି ନିଲୀୟ ଵସଂତମ୍ ।
ଚକିତଵିଲୋକିତସକଲଦିଶା ରତିରଭସରସେନ ହସଂତମ୍ ॥
ସଖି ହେ କେଶିମଥନମୁଦାରଂ ରମୟ ମୟା ସହ ମଦନମନୋରଥଭାଵିତୟା ସଵିକାରମ୍ ॥ 1 ॥

ପ୍ରଥମସମାଗମଲଜ୍ଜିତୟା ପଟୁଚାଟୁଶତୈରନୁକୂଲମ୍ ।
ମୃଦୁମଧୁରସ୍ମିତଭାଷିତୟା ଶିଥିଲୀକୃତଜଘନଦୁକୂଲମ୍ ॥ 2 ॥

କିସଲୟଶୟନନିଵେଶିତୟା ଚିରମୁରସି ମମୈଵ ଶୟାନମ୍ ।
କୃତପରିରଂଭଣଚୁଂବନୟା ପରିରଭ୍ୟ କୃତାଧରପାନମ୍ ॥ 3 ॥

ଅଲସନିମୀଲିତଲୋଚନୟା ପୁଲକାଵଲିଲଲିତକପୋଲମ୍ ।
ଶ୍ରମଜଲସକଲକଲେଵରୟା ଵରମଦନମଦାଦତିଲୋଲମ୍ ॥ 4 ॥

କୋକିଲକଲରଵକୂଜିତୟା ଜିତମନସିଜତଂତ୍ରଵିଚାରମ୍ ।
ଶ୍ଲଥକୁସୁମାକୁଲକୁଂତଲୟା ନଖଲିଖିତଘନସ୍ତନଭାରମ୍ ॥ 5 ॥

ଚରଣରଣିତମନିନୂପୁରୟା ପରିପୂରିତସୁରତଵିତାନମ୍ ।
ମୁଖରଵିଶୃଂଖଲମେଖଲୟା ସକଚଗ୍ରହଚୁଂବନଦାନମ୍ ॥ 6 ॥

ରତିସୁଖସମୟରସାଲସୟା ଦରମୁକୁଲିତନୟନସରୋଜମ୍ ।
ନିଃସହନିପତିତତନୁଲତୟା ମଧୁସୂଦନମୁଦିତମନୋଜମ୍ ॥ 7 ॥

ଶ୍ରୀଜୟଦେଵଭଣିତମିଦମତିଶୟମଧୁରିପୁନିଧୁଵନଶୀଲମ୍ ।
ସୁଖମୁତ୍କଂଠିତଗୋପଵଧୂକଥିତଂ ଵିତନୋତୁ ସଲୀଲମ୍ ॥ 8 ॥

ହସ୍ତସ୍ରସ୍ତଵିଲାସଵଂଶମନୃଜୁଭ୍ରୂଵଲ୍ଲିମଦ୍ବଲ୍ଲଵୀ-ଵୃଂଦୋତ୍ସାରିଦୃଗଂତଵୀକ୍ଷିତମତିସ୍ଵେଦାର୍ଦ୍ରଗଂଡସ୍ଥଲମ୍ ।
ମାମୁଦ୍ଵୀକ୍ଷ୍ୟ ଵିଲକ୍ଷିତଂ ସ୍ମିତସୁଧାମୁଗ୍ଧାନନଂ କାନନେ ଗୋଵିଂଦଂ ଵ୍ରଜସୁଂଦରୀଗଣଵୃତଂ ପଶ୍ୟାମି ହୃଷ୍ୟାମି ଚ ॥ 16 ॥

ଦୁରାଲୋକସ୍ତୋକସ୍ତବକନଵକାଶୋକଲତିକା-ଵିକାସଃ କାସାରୋପଵନପଵନୋଽପି ଵ୍ୟଥୟତି ।
ଅପି ଭ୍ରାମ୍ୟଦ୍ଭୃଂଗୀରଣିତରମଣୀୟା ନ ମୁକୁଲ-ପ୍ରସୂତିଶ୍ଚୂତାନାଂ ସଖି ଶିଖରିଣୀୟଂ ସୁଖୟତି ॥ 17 ॥

॥ ଇତି ଗୀତଗୋଵିଂଦେ ଅକ୍ଲେଶକେଶଵୋ ନାମ ଦ୍ଵିତୀୟଃ ସର୍ଗଃ ॥