ଗୀତଗୋଵିଂଦଂ ଦ୍ଵାଦଶଃ ସର୍ଗଃ – ସୁପ୍ରୀତ ପୀତାଂବରଃ

॥ ଦ୍ଵାଦଶଃ ସର୍ଗଃ ॥
॥ ସୁପ୍ରୀତପୀତାଂବରଃ ॥

ଗତଵତି ସଖୀଵୃଂଦେଽମଂଦତ୍ରପାଭରନିର୍ଭର-ସ୍ମରପରଵଶାକୂତସ୍ଫୀତସ୍ମିତସ୍ନପିତାଧରମ୍ ।
ସରସମନସଂ ଦୃଷ୍ଟ୍ଵା ରାଧାଂ ମୁହୁର୍ନଵପଲ୍ଲଵ-ପ୍ରସଵଶୟନେ ନିକ୍ଷିପ୍ତାକ୍ଷୀମୁଵାଚ ହରଃ ॥ 68 ॥

॥ ଗୀତଂ 23 ॥

କିସଲୟଶୟନତଲେ କୁରୁ କାମିନି ଚରଣନଲିନଵିନିଵେଶମ୍ ।
ତଵ ପଦପଲ୍ଲଵଵୈରିପରାଭଵମିଦମନୁଭଵତୁ ସୁଵେଶମ୍ ॥
କ୍ଷଣମଧୁନା ନାରାୟଣମନୁଗତମନୁସର ରାଧିକେ ॥ 1 ॥

କରକମଲେନ କରୋମି ଚରଣମହମାଗମିତାସି ଵିଦୂରମ୍ ।
କ୍ଷଣମୁପକୁରୁ ଶୟନୋପରି ମାମିଵ ନୂପୁରମନୁଗତିଶୂରମ୍ ॥ 2 ॥

ଵଦନସୁଧାନିଧିଗଲିତମମୃତମିଵ ରଚୟ ଵଚନମନୁକୂଲମ୍ ।
ଵିରହମିଵାପନୟାମି ପୟୋଧରରୋଧକମୁରସି ଦୁକୂଲମ୍ ॥ 3 ॥

ପ୍ରିୟପରିରଂଭଣରଭସଵଲିତମିଵ ପୁଲକିତମତିଦୁରଵାପମ୍ ।
ମଦୁରସି କୁଚକଲଶଂ ଵିନିଵେଶୟ ଶୋଷୟ ମନସିଜତାପମ୍ ॥ 4 ॥

ଅଧରସୁଧାରସମୁପନୟ ଭାଵିନି ଜୀଵୟ ମୃତମିଵ ଦାସମ୍ ।
ତ୍ଵୟି ଵିନିହିତମନସଂ ଵିରହାନଲଦଗ୍ଧଵପୁଷମଵିଲାସମ୍ ॥ 5 ॥

ଶଶିମୁଖି ମୁଖରୟ ମଣିରଶନାଗୁଣମନୁଗୁଣକଂଠନିଦାନମ୍ ।
ଶ୍ରୁତିୟୁଗଲେ ପିକରୁତଵିକଲେ ମମ ଶମୟ ଚିରାଦଵସାଦମ୍ ॥ 6 ॥

ମାମତିଵିଫଲରୁଷା ଵିକଲୀକୃତମଵଲୋକିତମଧୁନେଦମ୍ ।
ମୀଲିତଲଜ୍ଜିତମିଵ ନୟନଂ ତଵ ଵିରମ ଵିସୃଜ ରତିଖେଦମ୍ ॥ 7 ॥

ଶ୍ରୀଜୟଦେଵଭଣିତମିଦମନୁପଦନିଗଦିତମଧୁରିପୁମୋଦମ୍ ।
ଜନୟତୁ ରସିକଜନେଷୁ ମନୋରମତିରସଭାଵଵିନୋଦମ୍ ॥ 8 ॥

ମାରଂକେ ରତିକେଲିସଂକୁଲରଣାରଂଭେ ତୟା ସାହସ-ପ୍ରାୟଂ କାଂତଜୟାୟ କିଂଚିଦୁପରି ପ୍ରାରଂଭି ୟତ୍ସଂଭ୍ରମାତ୍ ।
ନିଷ୍ପଂଦା ଜଘନସ୍ଥଲୀ ଶିଥିଲତା ଦୋର୍ଵଲ୍ଲିରୁତ୍କଂପିତଂ ଵକ୍ଷୋ ମୀଲିତମକ୍ଷି ପୌରୁଷରସଃ ସ୍ତ୍ରୀଣାଂ କୁତଃ ସିଧ୍ୟତି ॥ 69 ॥

ଅଥ କାଂତଂ ରତିକ୍ଲାଂତମପି ମଂଡନଵାଂଛୟା ।
ନିଜଗାଦ ନିରାବାଧା ରାଧା ସ୍ଵାଧୀନଭର୍ତୃକା ॥ 70 ॥

॥ ଗୀତଂ 24 ॥

କୁରୁ ୟଦୁନଂଦନ ଚଂଦନଶିଶିରତରେଣ କରେଣ ପୟୋଧରେ ।
ମୃଗମଦପତ୍ରକମତ୍ର ମନୋଭଵମଂଗଲକଲଶସହୋଦରେ ।
ନିଜଗାଦ ସା ୟଦୁନଂଦନେ କ୍ରୀଡତି ହୃଦୟାନଂଦନେ ॥ 1 ॥

ଅଲିକୁଲଗଂଜନମଂଜନକଂ ରତିନାୟକସାୟକମୋଚନେ ।
ତ୍ଵଦଧରଚୁଂବନଲଂବିତକଜ୍ଜଲମୁଜ୍ଜ୍ଵଲୟ ପ୍ରିୟ ଲୋଚନେ ॥ 2 ॥

ନୟନକୁରଂଗତରଂଗଵିକାସନିରାସକରେ ଶ୍ରୁତିମଂଡଲେ ।
ମନସିଜପାଶଵିଲାସଧରେ ଶୁଭଵେଶ ନିଵେଶୟ କୁଂଡଲେ ॥ 3 ॥

ଭ୍ରମରଚୟଂ ରଚହୟଂତମୁପରି ରୁଚିରଂ ସୁଚିରଂ ମମ ସଂମୁଖେ ।
ଜିତକମଲେ ଵିମଲେ ପରିକର୍ମୟ ନର୍ମଜନକମଲକଂ ମୁଖେ ॥ 4 ॥

ମୃଗମଦରସଵଲିତଂ ଲଲିତଂ କୁରୁ ତିଲକମଲିକରଜନୀକରେ ।
ଵିହିତକଲଂକକଲଂ କମଲାନନ ଵିଶ୍ରମିତଶ୍ରମଶୀକରେ ॥ 5 ॥

ମମ ରୁଚିରେ ଚିକୁରେ କୁରୁ ମାନଦ ମାନସଜଧ୍ଵଜଚାମରେ ।
ରତିଗଲିତେ ଲଲିତେ କୁସୁମାନି ଶିଖଂଡିଶିଖଂଡକଡାମରେ ॥ 6 ॥

ସରସଘନେ ଜଘନେ ମମ ଶଂବରଦାରଣଵାରଣକଂଦରେ ।
ମଣିରଶନାଵସନାଭରଣାନି ଶୁଭାଶୟ ଵାସୟ ସୁଂଦରେ ॥ 7 ॥

ଶ୍ରୀଜୟଦେଵଵଚସି ରୁଚିରେ ହୃଦୟଂ ସଦୟଂ କୁରୁ ମଂଡନେ ।
ହରିଚରଣସ୍ମରଣାମୃତକୃତକଲିକଲୁଷଭଵଜ୍ଵରଖଂଡନେ ॥ 8 ॥

ରଚୟ କୁଚୟୋଃ ପତ୍ରଂ ଚିତ୍ରଂ କୁରୁଷ୍ଵ କପୋଲୟୋ-ର୍ଘଟୟ ଜଘନେ କାଂଚୀମଂଚ ସ୍ରଜା କବରୀଭରମ୍ ।
କଲୟ ଵଲୟଶ୍ରେଣୀଂ ପାଣୌ ପଦେ କୁରୁ ନୂପୁରା-ଵିତି ନିଗତିତଃ ପ୍ରୀତଃ ପୀତାଂବରୋଽପି ତଥାକରୋତ୍ ॥ 71 ॥

ୟଦ୍ଗାଂଧ୍ଗର୍ଵକଲାସୁ କୌଶଲମନୁଧ୍ୟାନଂ ଚ ୟଦ୍ଵୈଷ୍ଣଵଂ ୟଚ୍ଛୃଂଗାରଵିଵେକତତ୍ଵମପି ୟତ୍କାଵ୍ୟେଷୁ ଲୀଲାୟିତମ୍ ।
ତତ୍ସର୍ଵଂ ଜୟଦେଵପଂଡିତକଵେଃ କୃଷ୍ଣୈକତାନାତ୍ମନଃ ସାନଂଦାଃ ପରିଶୋଧୟଂତୁ ସୁଧିୟଃ ଶ୍ରୀଗୀତଗୋଵିଂଦତଃ ॥ 72 ॥

ଶ୍ରୀଭୋଜଦେଵପ୍ରଭଵସ୍ୟ ରାମାଦେଵୀସୁତଶ୍ରୀଜୟଦେଵକସ୍ୟ ।
ପରାଶରାଦିପ୍ରିୟଵର୍ଗକଂଠେ ଶ୍ରୀଗୀତଗୋଵିଂଦକଵିତ୍ଵମସ୍ତୁ ॥ 73 ॥

॥ ଇତି ଶ୍ରୀଜୟଦେଵକୃତୌ ଗୀତଗୋଵିଂଦେ ସୁପ୍ରୀତପୀତାଂବରୋ ନାମ ଦ୍ଵାଦଶଃ ସର୍ଗଃ ॥
॥ ଇତି ଗୀତଗୋଵିଂଦଂ ସମାପ୍ତମ୍ ॥