ଗୀତଗୋଵିଂଦଂ ଏକାଦଶଃ ସର୍ଗଃ – ସାନଂଦ ଦାମୋଦରଃ

॥ ଏକାଦଶଃ ସର୍ଗଃ ॥
॥ ସାନଂଦଦାମୋଦରଃ ॥

ସୁଚିରମନୁନୟନେ ପ୍ରୀଣୟିତ୍ଵା ମୃଗାକ୍ଷୀଂ ଗତଵତି କୃତଵେଶେ କେଶଵେ କୁଂଜଶୟ୍ୟାମ୍ ।
ରଚିତରୁଚିରଭୂଷାଂ ଦୃଷ୍ଟିମୋଷେ ପ୍ରଦୋଷେ ସ୍ଫୁରତି ନିରଵସାଦାଂ କାପି ରାଧାଂ ଜଗାଦ ॥ 59 ॥

॥ ଗୀତଂ 20 ॥

ଵିରଚିତଚାଟୁଵଚନରଚନଂ ଚରଣେ ରଚିତପ୍ରଣିପାତମ୍ ।
ସଂପ୍ରତି ମଂଜୁଲଵଂଜୁଲସୀମନି କେଲିଶୟନମନୁୟାତମ୍ ॥
ମୁଗ୍ଧେ ମଧୁମଥନମନୁଗତମନୁସର ରାଧିକେ ॥ 1 ॥

ଘନଜଘନସ୍ତନଭାରଭରେ ଦରମଂଥରଚରଣଵିହାରମ୍ ।
ମୁଖରିତମଣୀମଂଜୀରମୁପୈହି ଵିଧେହି ମରାଲଵିକାରମ୍ ॥ 2 ॥

ଶୃଣୁ ରମଣୀୟତରଂ ତରୁଣୀଜନମୋହନମଧୁପଵିରାଵମ୍ ।
କୁସୁମଶରାସନଶାସନବଂଦିନି ପିକନିକରେ ଭଜ ଭାଵମ୍ ॥ 3 ॥

ଅନିଲତରଲକିସଲୟନିକରେଣ କରେଣ ଲତାନିକୁରଂବମ୍ ।
ପ୍ରେରଣମିଵ କରଭୋରୁ କରୋତି ଗତିଂ ପ୍ରତିମୁଂଚ ଵିଲଂବମ୍ ॥ 4 ॥

ସ୍ଫୁରିତମନଂଗତରଂଗଵଶାଦିଵ ସୂଚିତହରିପରିରଂଭମ୍ ।
ପୃଚ୍ଛ ମନୋହରହାରଵିମଲଜଲଧାରମମୁଂ କୁଚକୁଂଭମ୍ ॥ 5 ॥

ଅଧିଗତମଖିଲସଖୀଭିରିଦଂ ତଵ ଵପୁରପି ରତିରଣସଜ୍ଜମ୍ ।
ଚଂଡି ରସିତରଶନାରଵଡିଂଡିମମଭିସର ସରସମଲଜ୍ଜମ୍ ॥ 6 ॥

ସ୍ମରଶରସୁଭଗନଖେନ କରେଣ ସଖୀମଵଲଂବ୍ୟ ସଲୀଲମ୍ ।
ଚଲ ଵଲୟକ୍ଵଣୀତୈରଵବୋଧୟ ହରମପି ନିଜଗତିଶୀଲମ୍ ॥ 7 ॥

ଶ୍ରୀଜୟଦେଵଭଣିତମଧରୀକୃତହାରମୁଦାସିତଵାମମ୍ ।
ହରିଵିନିହିତମନସାମଧିତିଷ୍ଠତୁ କଂଠତଟୀମଵିରାମମ୍ ॥ 8 ॥

ସା ମାଂ ଦ୍ରକ୍ଷ୍ୟତି ଵକ୍ଷ୍ୟତି ସ୍ମରକଥାଂ ପ୍ରତ୍ୟଂଗମାଲିଂଗନୈଃ ପ୍ରୀତିଂ ୟାସ୍ୟତି ରମ୍ୟତେ ସଖି ସମାଗତ୍ୟେତି ଚିଂତାକୁଲଃ ।
ସ ତ୍ଵାଂ ପଶ୍ୟତି ଵେପତେ ପୁଲକୟତ୍ୟାନଂଦତି ସ୍ଵିଦ୍ୟତି ପ୍ରତ୍ୟୁଦ୍ଗଚ୍ଛତି ମୂର୍ଚ୍ଛତି ସ୍ଥିରତମଃପୁଂଜେ ନିକୁଂଜେ ପ୍ରିୟଃ ॥ 60 ॥

ଅକ୍ଷ୍ଣୋର୍ନିକ୍ଷିପଦଂଜନଂ ଶ୍ରଵଣୟୋସ୍ତାପିଚ୍ଛଗୁଚ୍ଛାଵଲୀଂ ମୂର୍ଧ୍ନି ଶ୍ୟାମସରୋଜଦାମ କୁଚୟୋଃ କସ୍ତୂରିକାପାତ୍ରକମ୍ ।
ଧୂର୍ତାନାମଭିସାରସତ୍ଵରହୃଦାଂ ଵିଷ୍ଵଙ୍ନିକୁଂଜେ ସଖି ଧ୍ଵାଂତଂ ନୀଲନିଚୋଲଚାରୁ ସଦୃଶାଂ ପ୍ରତ୍ୟଂଗମାଲିଂଗତି ॥ 61 ॥

କାଶ୍ମୀରଗୌରଵପୁଷାମଭିସାରିକାଣାଂ ଆବଦ୍ଧରେଖମଭିତୋ ରୁଚିମଂଜରୀଭିଃ ।
ଏତତ୍ତମାଲଦଲନୀଲତମଂ ତମିଶ୍ରଂ ତତ୍ପ୍ରେମହେମନିକଷୋପଲତାଂ ତନୋତି ॥ 62 ॥

ହାରାଵଲୀତରଲକାଂଚନକାଂଚିଦାମ-କେୟୂରକଂକଣମଣିଦ୍ୟୁତିଦୀପିତସ୍ୟ ।
ଦ୍ଵାରେ ନିକୁଂଜନିଲୟସ୍ୟହରିଂ ନିରୀକ୍ଷ୍ୟ ଵ୍ରୀଡାଵତୀମଥ ସଖୀ ନିଜଗାହ ରାଧାମ୍ ॥ 63 ॥

॥ ଗୀତଂ 21 ॥

ମଂଜୁତରକୁଂଜତଲକେଲିସଦନେ ।
ଵିଲସ ରତିରଭସହସିତଵଦନେ ॥
ପ୍ରଵିଶ ରାଧେ ମାଧଵସମୀପମିହ ॥ 1 ॥

ନଵଭଵଦଶୋକଦଲଶୟନସାରେ ।
ଵିଲସ କୁଚକଲଶତରଲହାରେ ॥ 2 ॥

କୁସୁମଚୟରଚିତଶୁଚିଵାସଗେହେ ।
ଵିଲସ କୁସୁମସୁକୁମାରଦେହେ ॥ 3 ॥

ଚଲମଲୟଵନପଵନସୁରଭିଶୀତେ ।
ଵିଲସ ରସଵଲିତଲଲିତଗୀତେ ॥ 4 ॥

ମଧୁମୁଦିତମଧୁପକୁଲକଲିତରାଵେ ।
ଵିଲସ ମଦନରସସରସଭାଵେ ॥ 5 ॥

ମଧୁତରଲପିକନିକରନିନଦମୁଖରେ ।
ଵିଲସ ଦଶନରୁଚିରୁଚିରଶିଖରେ ॥ 6 ॥

ଵିତତ ବହୁଵଲ୍ଲିନଵପଲ୍ଲଵଘନେ ।
ଵିଲସ ଚିରମଲସପୀନଜଘନେ ॥ 7 ॥

ଵିହିତପଦ୍ମାଵତୀସୁଖସମାଜେ ।
ଭଣତି ଜୟଦେଵକଵିରାଜେ ॥ 8 ॥

ତ୍ଵାଂ ଚିତ୍ତେନ ଚିରଂ ଵହନ୍ନୟମତିଶ୍ରାଂତୋ ଭୃଶଂ ତାପିତଃ କଂଦର୍ପେଣ ତୁ ପାତୁମିଚ୍ଛତି ସୁଧାସଂବାଧବିଂବାଧରମ୍ ।
ଅସ୍ୟାଂଗଂ ତଦଲଂକୁରୁ କ୍ଷଣମିହ ଭ୍ରୂକ୍ଷେପଲକ୍ଷ୍ମୀଲଵ-କ୍ରୀତେ ଦାସ ଇଵୋପସେଵିତପଦାଂଭୋଜେ କୁତଃ ସଂଭ୍ରମଃ ॥ 64 ॥

ସା ସସାଧ୍ଵସସାନଂଦଂ ଗୋଵିଂଦେ ଲୋଲଲୋଚନା ।
ସିଂଜାନମଂଜୁମଂଜୀରଂ ପ୍ରଵିଵେଶ ନିଵେଶନମ୍ ॥ 65 ॥

॥ ଗୀତଂ 22 ॥

ରାଧାଵଦନଵିଲୋକନଵିକସିତଵିଵିଧଵିକାରଵିଭଂଗମ୍ ।
ଜଲନିଧିମିଵ ଵିଧୁମଂଡଲଦର୍ଶନତରଲିତତୁଂଗତରଂଗମ୍ ॥
ହରିମେକରସଂ ଚିରମଭିଲଷିତଵିଲାସଂ ସା ଦଦାର୍ଶ ଗୁରୁହର୍ଷଵଶଂଵଦଵଦନମନଂଗନିଵାସମ୍ ॥ 1 ॥

ହାରମମଲତରତାରମୁରସି ଦଧତଂ ପରିରଭ୍ୟ ଵିଦୂରମ୍ ।
ସ୍ଫୁଟତରଫେନକଦଂବକରଂବିତମିଵ ୟମୁନାଜଲପୂରମ୍ ॥ 2 ॥

ଶ୍ୟାମଲମୃଦୁଲକଲେଵରମଂଡଲମଧିଗତଗୌରଦୁକୂଲମ୍ ।
ନୀଲନଲିନମିଵ ପୀତପରାଗପତଲଭରଵଲୟିତମୂଲମ୍ ॥ 3 ॥

ତରଲଦୃଗଂଚଲଚଲନମନୋହରଵଦନଜନିତରତିରାଗମ୍ ।
ସ୍ଫୁଟକମଲୋଦରଖେଲିତଖଂଜନୟୁଗମିଵ ଶରଦି ତଡାଗମ୍ ॥ 4 ॥

ଵଦନକମଲପରିଶୀଲନମିଲିତମିହିରସମକୁଂଡଲଶୋଭମ୍ ।
ସ୍ମିତରୁଚିରୁଚିରସମୁଲ୍ଲସିତାଧରପଲ୍ଲଵକୃତରତିଲୋଭମ୍ ॥ 5 ॥

ଶଶିକିରଣଚ୍ଛୁରିତୋଦରଜଲଧରସୁଂଦରସକୁସୁମକେଶମ୍ ।
ତିମିରୋଦିତଵିଧୁମଣ୍ଦଲନିର୍ମଲମଲୟଜତିଲକନିଵେଶମ୍ ॥ 6 ॥

ଵିପୁଲପୁଲକଭରଦଂତୁରିତଂ ରତିକେଲିକଲାଭିରଧୀରମ୍ ।
ମଣିଗଣକିରଣସମୂହସମୁଜ୍ଜ୍ଵଲଭୂଷଣସୁଭଗଶରୀରମ୍ ॥ 7 ॥

ଶ୍ରୀଜୟଦେଵଭଣିତଵିଭଵଦ୍ଵିଗୁଣୀକୃତଭୂଷଣଭାରମ୍ ।
ପ୍ରଣମତ ହୃଦି ସୁଚିରଂ ଵିନିଧାୟ ହରିଂ ସୁକୃତୋଦୟସାରମ୍ ॥ 8 ॥

ଅତିକ୍ରମ୍ୟାପାଂଗଂ ଶ୍ରଵଣପଥପର୍ୟଂତଗମନ-ପ୍ରୟାସେନେଵାକ୍ଷ୍ଣୋସ୍ତରଲତରତାରଂ ପତିତୟୋଃ ।
ଇଦାନୀଂ ରାଧାୟାଃ ପ୍ରିୟତମସମାଲୋକସମୟେ ପପାତ ସ୍ଵେଦାଂବୁପ୍ରସର ଇଵ ହର୍ଷାଶ୍ରୁନିକରଃ ॥ 66 ॥

ଭଵଂତ୍ୟାସ୍ତଲ୍ପାଂତଂ କୃତକପଟକଂଡୂତିପିହିତ-ସ୍ମିତଂ ୟାତେ ଗେହାଦ୍ବହିରଵହିତାଲୀପରିଜନେ ।
ପ୍ରିୟାସ୍ୟଂ ପଶ୍ୟଂତ୍ୟାଃ ସ୍ମରଶରସମାକୂଲସୁଭଗଂ ସଲଜ୍ଜା ଲଜ୍ଜାପି ଵ୍ୟଗମଦିଵ ଦୂରଂ ମୃଗଦୃଶଃ ॥ 67 ॥

॥ ଇତି ଶ୍ରୀଗୀତଗୋଵିଂଦେ ରାଧିକାମିଲନେ ସାନଂଦଦାମୋଦରୋ ନାମୈକାଦଶଃ ସର୍ଗଃ ॥