ଗୀତଗୋଵିଂଦଂ ଦଶମଃ ସର୍ଗଃ – ଚତୁର ଚତୁର୍ଭୁଜଃ

॥ ଦଶମଃ ସର୍ଗଃ ॥
॥ ଚତୁରଚତୁର୍ଭୁଜଃ ॥

ଅତ୍ରାଂତରେ ମସୃଣରୋଷଵଶାମସୀମ୍-ନିଃଶ୍ଵାସନିଃସହମୁଖୀଂ ସୁମୁଖୀମୁପେତ୍ୟ ।
ସଵ୍ରୀଡମୀକ୍ଷିତସଖୀଵଦନାଂ ଦିନାଂତେ ସାନଂଦଗଦ୍ଗଦପଦଂ ହରିରିତ୍ୟୁଵାଚ ॥ 53 ॥

॥ ଗୀତଂ 19 ॥

ଵଦସି ୟଦି କିଂଚିଦପି ଦଂତରୁଚିକୌମୁଦୀ ହରତି ଦରତିମିରମତିଘୋରମ୍ ।
ସ୍ଫୁରଦଧରସୀଧଵେ ତଵ ଵଦନଚଂଦ୍ରମା ରୋଚୟତୁ ଲୋଚନଚକୋରମ୍ ॥
ପ୍ରିୟେ ଚାରୁଶୀଲେ ମୁଂଚ ମୟି ମାନମନିଦାନଂ ସପଦି ମଦନାନଲୋ ଦହତି ମମ ମାନସଂ ଦେହି ମୁଖକମଲମଧୁପାନମ୍ ॥ 1 ॥

ସତ୍ୟମେଵାସି ୟଦି ସୁଦତି ମୟି କୋପିନୀ ଦେହି ଖରନଖଶରଘାତମ୍ ।
ଘଟୟ ଭୁଜବଂଧନଂ ଜନୟ ରଦଖଂଡନଂ ୟେନ ଵା ଭଵତି ସୁଖଜାତମ୍ ॥ 2 ॥

ତ୍ଵମସି ମମ ଭୂଷଣଂ ତ୍ଵମସି ମମ ଜୀଵନଂ ତ୍ଵମସି ଭଵଜଲଧିରତ୍ନମ୍ ।
ଭଵତୁ ଭଵତୀହ ମୟି ସତତମନୋରୋଧିନି ତତ୍ର ମମ ହୃଦୟମତିରତ୍ନମ୍ ॥ 3 ॥

ନୀଲନଲିନାଭମପି ତନ୍ଵି ତଵ ଲୋଚନଂ ଧାରୟତି କୋକନଦରୂପମ୍ ।
କୁସୁମଶରବାଣଭାଵେନ ୟଦି ରଂଜୟସି କୃଷ୍ଣମିଦମେତଦନୁରୂପମ୍ ॥ 4 ॥

ସ୍ଫୁରତୁ କୁଚକୁଂଭୟୋରୁପରି ମଣିମଂଜରୀ ରଂଜୟତୁ ତଵ ହୃଦୟଦେଶମ୍ ।
ରସତୁ ରଶନାପି ତଵ ଘନଜଘନମଂଡଲେ ଘୋଷୟତୁ ମନ୍ମଥନିଦେଶମ୍ ॥ 5 ॥

ସ୍ଥଲକମଲଗଂଜନଂ ମମ ହୃଦୟରଂଜନଂ ଜନିତରତିରଂଗପରଭାଗମ୍ ।
ଭଣ ମସୃଣଵାଣି କରଵାଣି ପଦପଂକଜଂ ସରସଲସଦଲକ୍ତକରାଗମ୍ ॥ 6 ॥

ସ୍ମରଗରଲଖଂଡନଂ ମମ ଶିରସି ମଂଡନଂ ଦେହି ପଦପଲ୍ଲଵମୁଦାରମ୍ ।
ଜ୍ଵଲତି ମୟି ଦାରୁଣୋ ମଦନକଦନାରୁଣୋ ହରତୁ ତଦୁପାହିତଵିକାରମ୍ ॥ 7 ॥

ଇତି ଚଟୁଲଚାଟୁପଟୁଚାରୁ ମୁରଵୈରିଣୋ ରାଧିକାମଧି ଵଚନଜାତମ୍ ।
ଜୟତି ପଦ୍ମାଵତୀରମଣଜୟଦେଵକଵି-ଭାରତୀଭଣିତମତିଶାତମ୍ ॥ 8 ॥

ପରିହର କୃତାତଂକେ ଶଂକାଂ ତ୍ଵୟା ସତତଂ ଘନ-ସ୍ତନଜଘନୟାକ୍ରାଂତେ ସ୍ଵାଂତେ ପରାନଵକାଶିନି ।
ଵିଶତି ଵିତନୋରନ୍ୟୋ ଧନ୍ୟୋ ନ କୋଽପି ମମାଂତରଂ ସ୍ତନଭରପରୀରଂଭାରଂଭେ ଵିଧେହି ଵିଧେୟତାମ୍ ॥ 54 ॥

ମୁଗ୍ଧେ ଵିଧେହି ମୟି ନିର୍ଦୟଦଂତଦଂଶ-ଦୋର୍ଵଲ୍ଲିବଂଧନିବିଡସ୍ତନପୀଡନାନି ।
ଚଂଡି ତ୍ଵମେଵ ମୁଦମଂଚ ନ ପଂଚବାଣ-ଚଂଡାଲକାଂଡଦଲନାଦସଵଃ ପ୍ରୟାଂତୁ ॥ 55 ॥

ଵ୍ୟଥୟତି ଵୃଥା ମୌନଂ ତନ୍ଵି ପ୍ରପଂଚୟ ପଂଚମଂ ତରୁଣୀ ମଧୁରାଲାପୈସ୍ତାପଂ ଵିନୋଦୟ ଦୃଷ୍ଟିଭିଃ ।
ସୁମୁଖି ଵିମୁଖୀଭାଵଂ ତାଵଦ୍ଵିମୁଂଚ ନ ମୁଂଚ ମାଂ ସ୍ଵୟମତିଶୟସ୍ନିଗ୍ଧୋ ମୁଗ୍ଧେ ପ୍ରିୟିଽହମୁପସ୍ଥିତଃ ॥ 56 ॥

ବଂଧୂକଦ୍ୟୁତିବାଂଧଵୋଽୟମଧରଃ ସ୍ନିଗ୍ଧୋ ମଧୂକଚ୍ଚଵି-ର୍ଗଂଡଶ୍ଚଂଡି ଚକାସ୍ତି ନୀଲନଲିନଶ୍ରୀମୋଚନଂ ଲୋଚନମ୍ ।
ନାସାଭ୍ୟେତି ତିଲପ୍ରସୂନପଦଵୀଂ କୁଂଦାଭଦାଂତି ପ୍ରିୟେ ପ୍ରାୟସ୍ତ୍ଵନ୍ମୁଖସେଵୟା ଵିଜୟତେ ଵିଶ୍ଵଂ ସ ପୁଷ୍ପାୟୁଧଃ ॥ 57 ॥

ଦୃଶୌ ତଵ ମଦାଲସେ ଵଦନମିଂଦୁସଂଦୀପକଂ ଗତିର୍ଜନମନୋରମା ଵିଧୁତରଂଭମୂରୁଦ୍ଵୟମ୍ ।
ରତିସ୍ତଵ କଲାଵତୀ ରୁଚିରଚିତ୍ରଲେଖେ ଭ୍ରୁଵା-ଵହୋ ଵିବୁଧୟୌଵନଂ ଵହସି ତନ୍ଵୀ ପୃଥ୍ଵୀଗତା ॥ 58 ॥

॥ ଇତି ଶ୍ରୀଗୀତଗୋଵିଂଦେ ମାନିନୀଵର୍ଣନେ ଚତୁରଚତୁର୍ଭୁଜୋ ନାମ ଦଶମଃ ସର୍ଗଃ ॥