ଶ୍ରୀମଦ୍ଭଗଵଦ୍ଗୀତା ପାରାୟଣ – ଗୀତା ମହାତ୍ମ୍ୟମ୍

ଅଥ ଗୀତାମାହାତ୍ମ୍ୟଂ

ଧରୋଵାଚ

ଭଗଵନ୍ ପରମେଶାନ ଭକ୍ତିରଵ୍ୟଭିଚାରିଣୀ ।
ପ୍ରାରବ୍ଧଂ ଭୁଜ୍ୟମାନସ୍ୟ କଥଂ ଭଵତି ହେ ପ୍ରଭୋ ॥ 1 ॥

ଶ୍ରୀଵିଷ୍ଣୁରୁଵାଚ
ପ୍ରାରବ୍ଧଂ ଭୁଜ୍ୟମାନୋ ହି ଗୀତାଭ୍ୟାସରତଃ ସଦା ।
ସ ମୁକ୍ତଃ ସ ସୁଖୀ ଲୋକେ କର୍ମଣା ନୋପଲିପ୍ୟତେ ॥ 2 ॥

ମହାପାପାଦିପାପାନି ଗୀତାଧ୍ୟାନଂ କରୋତି ଚେତ୍ ।
କ୍ଵଚିତ୍ସ୍ପର୍ଶଂ ନ କୁର୍ଵଂତି ନଲିନୀଦଲମଂବୁଵତ୍ ॥ 3 ॥

ଗୀତାୟାଃ ପୁସ୍ତକଂ ୟତ୍ର ୟତ୍ର ପାଠଃ ପ୍ରଵର୍ତତେ ।
ତତ୍ର ସର୍ଵାଣି ତୀର୍ଥାନି ପ୍ରୟାଗାଦୀନି ତତ୍ର ଵୈ ॥ 4 ॥

ସର୍ଵେ ଦେଵାଶ୍ଚ ଋଷୟଃ ୟୋଗିନଃ ପନ୍ନଗାଶ୍ଚ ୟେ ।
ଗୋପାଲା ଗୋପିକା ଵାଽପି ନାରଦୋଦ୍ଧଵପାର୍ଷଦୈଃ ॥ 5 ॥

ସହାୟୋ ଜାୟତେ ଶୀଘ୍ରଂ ୟତ୍ର ଗୀତା ପ୍ରଵର୍ତତେ ।
ୟତ୍ର ଗୀତାଵିଚାରଶ୍ଚ ପଠନଂ ପାଠନଂ ଶ୍ରୁତମ୍ ।
ତତ୍ରାହଂ ନିଶ୍ଚିତଂ ପୃଥ୍ଵି ନିଵସାମି ସଦୈଵ ହି ॥ 6 ॥

ଗୀତାଶ୍ରୟେଽହଂ ତିଷ୍ଠାମି ଗୀତା ମେ ଚୋତ୍ତମଂ ଗୃହମ୍ ।
ଗୀତାଜ୍ଞାନମୁପାଶ୍ରିତ୍ୟ ତ୍ରୀँଲ୍ଲୋକାନ୍-ପାଲୟାମ୍ୟହମ୍ ॥ 7 ॥

ଗୀତା ମେ ପରମା ଵିଦ୍ୟା ବ୍ରହ୍ମରୂପା ନ ସଂଶୟଃ ।
ଅର୍ଧମାତ୍ରାକ୍ଷରା ନିତ୍ୟା ସ୍ଵାନିର୍ଵାଚ୍ୟପଦାତ୍ମିକା ॥ 8 ॥

ଚିଦାନଂଦେନ କୃଷ୍ଣେନ ପ୍ରୋକ୍ତା ସ୍ଵମୁଖତୋଽର୍ଜୁନମ୍ ।
ଵେଦତ୍ରୟୀ ପରାନଂଦା ତତ୍ତ୍ଵାର୍ଥଜ୍ଞାନସଂୟୁତା ॥ 9 ॥

ୟୋଽଷ୍ଟାଦଶଂ ଜପେନ୍ନିତ୍ୟଂ ନରୋ ନିଶ୍ଚଲମାନସଃ ।
ଜ୍ଞାନସିଦ୍ଧିଂ ସ ଲଭତେ ତତୋ ୟାତି ପରଂ ପଦମ୍ ॥ 10 ॥

ପାଠେଽସମର୍ଥଃ ସଂପୂର୍ଣେ ତତୋଽର୍ଧଂ ପାଠମାଚରେତ୍ ।
ତଦା ଗୋଦାନଜଂ ପୁଣ୍ୟଂ ଲଭତେ ନାତ୍ର ସଂଶୟଃ ॥ 11 ॥

ତ୍ରିଭାଗଂ ପଠମାନସ୍ତୁ ଗଂଗାସ୍ନାନଫଲଂ ଲଭେତ୍ ।
ଷଡଂଶଂ ଜପମାନସ୍ତୁ ସୋମୟାଗଫଲଂ ଲଭେତ୍ ॥ 12 ॥

ଏକାଧ୍ୟାୟଂ ତୁୟୋ ନିତ୍ୟଂ ପଠତେ ଭକ୍ତିସଂୟୁତଃ ।
ରୁଦ୍ରଲୋକମଵାପ୍ନୋତି ଗଣୋ ଭୂତ୍ଵା ଵସେଚ୍ଚିରମ୍ ॥ 13 ॥

ଅଧ୍ୟାୟଂ ଶ୍ଲୋକପାଦଂ ଵା ନିତ୍ୟଂ ୟଃ ପଠତେ ନରଃ ।
ସ ୟାତି ନରତାଂ ୟାଵତ୍ ମନ୍ଵଂତରଂ ଵସୁଂଧରେ ॥ 14 ॥

ଗୀତାୟାଃ ଶ୍ଲୋକଦଶକଂ ସପ୍ତ ପଂଚ ଚତୁଷ୍ଟୟମ୍ ।
ଦ୍ଵୌତ୍ରୀନେକଂ ତଦର୍ଧଂ ଵା ଶ୍ଲୋକାନାଂ ୟଃ ପଠେନ୍ନରଃ ॥ 15 ॥

ଚଂଦ୍ରଲୋକମଵାପ୍ନୋତି ଵର୍ଷାଣାମୟୁତଂ ଧୃଵମ୍ ।
ଗୀତାପାଠସମାୟୁକ୍ତଃ ମୃତୋ ମାନୁଷତାଂ ଵ୍ରଜେତ୍ ॥ 16 ॥

ଗୀତାଭ୍ୟାସଂ ପୁନଃ କୃତ୍ଵା ଲଭତେ ମୁକ୍ତିମୁତ୍ତମମ୍ ।
ଗୀତେତ୍ୟୁଚ୍ଚାରସଂୟୁକ୍ତଃ ମ୍ରିୟମାଣୋ ଗତିଂ ଲଭେତ୍ ॥ 17 ॥

ଗୀତାର୍ଥଶ୍ରଵଣାସକ୍ତଃ ମହାପାପୟୁତୋଽପି ଵା ।
ଵୈକୁଂଠଂ ସମଵାପ୍ନୋତି ଵିଷ୍ଣୁନା ସହମୋଦତେ ॥ 18 ॥

ଗୀତାର୍ଥଂ ଧ୍ୟାୟତେ ନିତ୍ୟଂ କୃତ୍ଵା କର୍ମାଣି ଭୂରିଶଃ ।
ଜୀଵନ୍ମୁକ୍ତଃ ସ ଵିଜ୍ଞେୟଃ ଦେହାଂତେ ପରମଂ ପଦମ୍ ॥ 19 ॥

ମଲନିର୍ମୋଚନଂ ପୁଂସାଂ ଜଲସ୍ନାନଂ ଦିନେ ଦିନେ ।
ସକୃଦ୍ଗୀତାଂଭସି ସ୍ନାନଂ ସଂସାରମଲନାଶନମ୍ ॥ 20 ॥

ଗୀତାମାଶ୍ରିତ୍ୟ ବହଵଃ ଭୂଭୁଜୋ ଜନକାଦୟଃ ।
ନିର୍ଧୂତକଲ୍ମଷା ଲୋକେ ଗୀତା ୟାତାଃ ପରଂ ପଦମ୍ ॥ 21 ॥

ତେ ଶୃଣ୍ଵଂତି ପଠଂତ୍ୟେଵ ଗୀତାଶାସ୍ତ୍ରମହର୍ନିଶମ୍ ।
ନ ତେ ଵୈ ମାନୁଷା ଜ୍ଞେୟା ଦେଵା ଏଵ ନ ସଂଶୟଃ ॥ 22 ॥

ଜ୍ଞାନାଜ୍ଞାନକୃତଂ ନିତ୍ୟଂ ଇଂଦ୍ରିୟୈର୍ଜନିତଂ ଚ ୟତ୍ ।
ତତ୍ସର୍ଵଂ ନାଶମାୟାତି ଗୀତାପାଠେନ ତକ୍ଷଣମ୍ ॥ 23 ॥

ଧିକ୍ ତସ୍ୟ ଜ୍ଞାନମାଚାରଂ ଵ୍ରତଂ ଚେଷ୍ଟାଂ ତପୋ ୟଶଃ ।
ଗୀତାର୍ଥପଠନଂ ନାଽସ୍ତି ନାଧମସ୍ତତ୍ପରୋ ଜନଃ ॥ 24 ॥

ସଂସାରସାଗରଂ ଘୋରଂ ତର୍ତୁମିଚ୍ଛତି ୟୋ ଜନଃ ।
ଗୀତାନାଵଂ ସମାରୁହ୍ୟ ପାରଂ ୟାତି ସୁଖେନ ସଃ ॥ 25 ॥

ଗୀତାୟାଃ ପଠନଂ କୃତ୍ଵା ମାହାତ୍ମ୍ୟଂ ନୈଵ ୟଃ ପଠେତ୍ ।
ଵୃଥା ପାଠୋ ଭଵେତ୍ତସ୍ୟ ଶ୍ରମ ଏଵ ହ୍ୟୁଦାହୃତଃ ॥ 26 ॥

ଏତନ୍ମାହାତ୍ମ୍ୟସଂୟୁକ୍ତଂ ଗୀତାଭ୍ୟାସଂ କରୋତି ୟଃ ।
ସ ତତ୍ଫଲମଵାପ୍ନୋତି ଦୁର୍ଲଭାଂ ଗତିମାପ୍ନୁୟାତ୍ ॥ 27 ॥

ସୂତ ଉଵାଚ
ମାହାତ୍ମ୍ୟମେତଦ୍ଗୀତାୟାଃ ମୟା ପ୍ରୋକ୍ତଂ ସନାତନମ୍ ।
ଗୀତାଂତେ ଚ ପଠେଦ୍ୟସ୍ତୁ ୟଦୁକ୍ତଂ ତତ୍ଫଲଂ ଭଵେତ୍ ॥ 28 ॥

ଇତି ଶ୍ରୀ ଵରାହପୁରାଣେ ଶ୍ରୀ ଗୀତାମାହାତ୍ମ୍ୟଂ ସଂପୂର୍ଣମ୍ ॥

ଓଂ ଶାଂତିଃ ଶାଂତିଃ ଶାଂତିଃ ॥