ଶ୍ରୀମଦ୍ଭଗଵଦ୍ଗୀତା ପାରାୟଣ – ଷୋଡଶୋଽଧ୍ୟାୟଃ

ଓଂ ଶ୍ରୀ ପରମାତ୍ମନେ ନମଃ
ଅଥ ଷୋଡଶୋଽଧ୍ୟାୟଃ
ଦୈଵାସୁରସଂପଦ୍ଵିଭାଗୟୋଗଃ

ଶ୍ରୀ ଭଗଵାନୁଵାଚ
ଅଭୟଂ ସତ୍ତ୍ଵସଂଶୁଦ୍ଧିଃ ଜ୍ଞାନୟୋଗଵ୍ୟଵସ୍ଥିତିଃ ।
ଦାନଂ ଦମଶ୍ଚ ୟଜ୍ଞଶ୍ଚ ସ୍ଵାଧ୍ୟାୟସ୍ତପ ଆର୍ଜଵମ୍ ॥1॥

ଅହିଂସା ସତ୍ୟମକ୍ରୋଧଃ ତ୍ୟାଗଃ ଶାଂତିରପୈଶୁନମ୍ ।
ଦୟା ଭୂତେଷ୍ଵଲୋଲୁପ୍ତ୍ଵଂ ମାର୍ଦଵଂ ହ୍ରୀରଚାପଲମ୍ ॥2॥

ତେଜଃ କ୍ଷମା ଧୃତିଃ ଶୌଚମ୍ ଅଦ୍ରୋହୋ ନାତିମାନିତା ।
ଭଵଂତି ସଂପଦଂ ଦୈଵୀମ୍ ଅଭିଜାତସ୍ୟ ଭାରତ ॥3॥

ଦଂଭୋ ଦର୍ପୋଽଭିମାନଶ୍ଚ କ୍ରୋଧଃ ପାରୁଷ୍ୟମେଵ ଚ ।
ଅଜ୍ଞାନଂ ଚାଭିଜାତସ୍ୟ ପାର୍ଥ ସଂପଦମାସୁରୀମ୍ ॥4॥

ଦୈଵୀ ସଂପଦ୍ଵିମୋକ୍ଷାୟ ନିବଂଧାୟାସୁରୀ ମତା ।
ମା ଶୁଚଃ ସଂପଦଂ ଦୈଵୀମ୍ ଅଭିଜାତୋଽସି ପାଂଡଵ ॥5॥

ଦ୍ଵୌ ଭୂତସର୍ଗୌ ଲୋକେଽସ୍ମିନ୍ ଦୈଵ ଆସୁର ଏଵ ଚ ।
ଦୈଵୋ ଵିସ୍ତରଶଃ ପ୍ରୋକ୍ତଃ ଆସୁରଂ ପାର୍ଥ ମେ ଶୃଣୁ ॥6॥

ପ୍ରଵୃତ୍ତିଂ ଚ ନିଵୃତ୍ତିଂ ଚ ଜନା ନ ଵିଦୁରାସୁରାଃ ।
ନ ଶୌଚଂ ନାପି ଚାଚାରଃ ନ ସତ୍ୟଂ ତେଷୁ ଵିଦ୍ୟତେ ॥7॥

ଅସତ୍ୟମପ୍ରତିଷ୍ଠଂ ତେ ଜଗଦାହୁରନୀଶ୍ଵରମ୍ ।
ଅପରସ୍ପରସଂଭୂତଂ କିମନ୍ୟତ୍କାମହୈତୁକମ୍ ॥8॥

ଏତାଂ ଦୃଷ୍ଟିମଵଷ୍ଟଭ୍ୟ ନଷ୍ଟାତ୍ମାନୋଽଲ୍ପବୁଦ୍ଧୟଃ ।
ପ୍ରଭଵଂତ୍ୟୁଗ୍ରକର୍ମାଣଃ କ୍ଷୟାୟ ଜଗତୋଽହିତାଃ ॥9॥

କାମମାଶ୍ରିତ୍ୟ ଦୁଷ୍ପୂରଂ ଦଂଭମାନମଦାନ୍ଵିତାଃ ।
ମୋହାଦ୍ଗୃହୀତ୍ଵାସଦ୍ଗ୍ରାହାନ୍ ପ୍ରଵର୍ତଂତେଽଶୁଚିଵ୍ରତାଃ ॥10॥

ଚିଂତାମପରିମେୟାଂ ଚ ପ୍ରଲୟାଂତାମୁପାଶ୍ରିତାଃ ।
କାମୋପଭୋଗପରମାଃ ଏତାଵଦିତି ନିଶ୍ଚିତାଃ ॥11॥

ଆଶାପାଶଶତୈର୍ବଦ୍ଧାଃ କାମକ୍ରୋଧପରାୟଣାଃ ।
ଈହଂତେ କାମଭୋଗାର୍ଥମ୍ ଅନ୍ୟାୟେନାର୍ଥସଂଚୟାନ୍ ॥12॥

ଇଦମଦ୍ୟ ମୟା ଲବ୍ଧମ୍ ଇମଂ ପ୍ରାପ୍ସ୍ୟେ ମନୋରଥମ୍ ।
ଇଦମସ୍ତୀଦମପି ମେ ଭଵିଷ୍ୟତି ପୁନର୍ଧନମ୍ ॥13॥

ଅସୌ ମୟା ହତଃ ଶତୃଃ ହନିଷ୍ୟେ ଚାପରାନପି ।
ଈଶ୍ଵରୋଽହମହଂ ଭୋଗୀ ସିଦ୍ଧୋଽହଂ ବଲଵାନ୍ସୁଖୀ ॥14॥

ଆଢ୍ୟୋଽଭିଜନଵାନସ୍ମି କୋଽନ୍ୟୋଽସ୍ତି ସଦୃଶୋ ମୟା ।
ୟକ୍ଷ୍ୟେ ଦାସ୍ୟାମି ମୋଦିଷ୍ୟେ ଇତ୍ୟଜ୍ଞାନଵିମୋହିତାଃ ॥15॥

ଅନେକଚିତ୍ତଵିଭ୍ରାଂତାଃ ମୋହଜାଲସମାଵୃତାଃ ।
ପ୍ରସକ୍ତାଃ କାମଭୋଗେଷୁ ପତଂତି ନରକେଽଶୁଚୌ ॥16॥

ଆତ୍ମସଂଭାଵିତାଃ ସ୍ତବ୍ଧାଃ ଧନମାନମଦାନ୍ଵିତାଃ ।
ୟଜଂତେ ନାମୟଜ୍ଞୈସ୍ତେ ଦଂଭେନାଵିଧିପୂର୍ଵକମ୍ ॥17॥

ଅହଂକାରଂ ବଲଂ ଦର୍ପଂ କାମଂ କ୍ରୋଧଂ ଚ ସଂଶ୍ରିତାଃ ।
ମାମାତ୍ମପରଦେହେଷୁ ପ୍ରଦ୍ଵିଷଂତୋଽଭ୍ୟସୂୟକାଃ ॥18॥

ତାନହଂ ଦ୍ଵିଷତଃ କ୍ରୂରାନ୍ ସଂସାରେଷୁ ନରାଧମାନ୍ ।
କ୍ଷିପାମ୍ୟଜସ୍ରମଶୁଭାନ୍ ଆସୁରୀଷ୍ଵେଵ ୟୋନିଷୁ ॥19॥

ଆସୁରୀଂ ୟୋନିମାପନ୍ନାଃ ମୂଢା ଜନ୍ମନି ଜନ୍ମନି ।
ମାମପ୍ରାପ୍ୟୈଵ କୌଂତେୟ ତତୋ ୟାଂତ୍ୟଧମାଂ ଗତିମ୍ ॥20॥

ତ୍ରିଵିଧଂ ନରକସ୍ୟେଦଂ ଦ୍ଵାରଂ ନାଶନମାତ୍ମନଃ ।
କାମଃ କ୍ରୋଧସ୍ତଥା ଲୋଭଃ ତସ୍ମାଦେତତ୍ତ୍ରୟଂ ତ୍ୟଜେତ୍ ॥21॥

ଏତୈର୍ଵିମୁକ୍ତଃ କୌଂତେୟ ତମୋଦ୍ଵାରୈସ୍ତ୍ରିଭିର୍ନରଃ ।
ଆଚରତ୍ୟାତ୍ମନଃ ଶ୍ରେୟଃ ତତୋ ୟାତି ପରାଂ ଗତିମ୍ ॥22॥

ୟଃ ଶାସ୍ତ୍ରଵିଧିମୁତ୍ସୃଜ୍ୟ ଵର୍ତତେ କାମକାରତଃ ।
ନ ସ ସିଦ୍ଧିମଵାପ୍ନୋତି ନ ସୁଖଂ ନ ପରାଂ ଗତିମ୍ ॥23॥

ତସ୍ମାଚ୍ଛାସ୍ତ୍ରଂ ପ୍ରମାଣଂ ତେ କାର୍ୟାକାର୍ୟଵ୍ୟଵସ୍ଥିତୌ ।
ଜ୍ଞାତ୍ଵା ଶାସ୍ତ୍ରଵିଧାନୋକ୍ତଂ କର୍ମ କର୍ତୁମିହାର୍ହସି ॥24॥

॥ ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୁ ଉପନିଷତ୍ସୁ ବ୍ରହ୍ମଵିଦ୍ୟାୟାଂ
ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ ଦୈଵାସୁରସଂପଦ୍ଵିଭାଗୟୋଗୋ ନାମ ଷୋଡଶୋଽଧ୍ୟାୟଃ ॥