શ્રી વેંકટેશ્વર શરણાગતિ ગદ્યમ્

યો નિત્યમચ્યુતપદાંબુજયુગ્મરુક્મ
વ્યામોહતસ્તદિતરાણિ તૃણાય મેને ।
અસ્મદ્ગુરોર્ભગવતોઽસ્ય દયૈકસિંધોઃ
રામાનુજસ્ય ચરણૌ શરણં પ્રપદ્યે ॥

વંદે વેદાંતકર્પૂરચામીકર કરંડકમ્ ।
રામાનુજાર્યમાર્યાણાં ચૂડામણિમહર્નિશમ્ ॥

ઓમ્ ॥ ભગવન્નારાયણાભિમતાનુરૂપ સ્વરૂપરૂપ ગુણવિભવૈશ્વર્ય શીલાદ્યનવધિકાતિશય અસંખ્યેય કલ્યાણગુણગણાં પદ્મવનાલયાં ભગવતીં શ્રિયં દેવીં નિત્યાનપાયિનીં નિરવદ્યાં દેવદેવદિવ્યમહિષીં અખિલજગન્માતરં અસ્મન્માતરં અશરણ્યશરણ્યાં અનન્યશરણઃ શરણમહં પ્રપદ્યે ॥

પારમાર્થિક ભગવચ્ચરણારવિંદ યુગળૈકાંતિકાત્યંતિક પરભક્તિ પરજ્ઞાન પરમભક્તિકૃત પરિપૂર્ણાનવરત નિત્યવિશદતમાનન્ય પ્રયોજનાનવધિકાતિશય પ્રિય ભગવદનુભવજનિતાનવધિકાતિશય પ્રીતિકારિતાશેષાવસ્થોચિત અશેષશેષતૈકરતિરૂપ નિત્યકૈંકર્યપ્રાપ્ત્યપેક્ષયા પારમાર્થિકી ભગવચ્ચરણારવિંદ શરણાગતિઃ યથાવસ્થિતા અવિરતાઽસ્તુ મે ॥

અસ્તુ તે । તયૈવ સર્વં સંપત્સ્યતે ॥

અખિલહેયપ્રત્યનીક કલ્યાણૈકતાન, સ્વેતર સમસ્તવસ્તુવિલક્ષણાનંત જ્ઞાનાનંદૈકસ્વરૂપ, સ્વાભિમતાનુરૂપૈકરૂપાચિંત્ય દિવ્યાદ્ભુત નિત્યનિરવદ્ય નિરતિશયૌજ્જ્વલ્ય સૌંદર્ય સૌગંધ્ય સૌકુમાર્ય લાવણ્ય યૌવનાદ્યનંતગુણનિધિ દિવ્યરૂપ, સ્વાભાવિકાનવધિકાતિશય જ્ઞાન બલૈશ્વર્ય વીર્ય શક્તિ તેજસ્સૌશીલ્ય વાત્સલ્ય માર્દવાર્જવ સૌહાર્દ સામ્ય કારુણ્ય માધુર્ય ગાંભીર્યૌદાર્ય ચાતુર્ય સ્થૈર્ય ધૈર્ય શૌર્ય પરાક્રમ સત્યકામ સત્યસંકલ્પ કૃતિત્વ કૃતજ્ઞતાદ્યસંખ્યેય કલ્યાણગુણગણૌઘ મહાર્ણવ,
સ્વોચિત વિવિધ વિચિત્રાનંતાશ્ચર્ય નિત્ય નિરવદ્ય નિરતિશય સુગંધ નિરતિશય સુખસ્પર્શ નિરતિશયૌજ્જ્વલ્ય કિરીટ મકુટ ચૂડાવતંસ મકરકુંડલ ગ્રૈવેયક હાર કેયૂર કટક શ્રીવત્સ કૌસ્તુભ મુક્તાદામોદરબંધન પીતાંબર કાંચીગુણ નૂપુરાદ્યપરિમિત દિવ્યભૂષણ, સ્વાનુરૂપાચિંત્યશક્તિ શંખચક્રગદાઽસિ શારંગાદ્યસંખ્યેય
નિત્યનિરવદ્ય નિરતિશય કલ્યાણદિવ્યાયુધ,
સ્વાભિમત નિત્યનિરવદ્યાનુરૂપ સ્વરૂપરૂપગુણ વિભવૈશ્વર્ય શીલાદ્યનવધિકાતિશયાસંખ્યેય કલ્યાણગુણગણશ્રીવલ્લભ, એવંભૂત ભૂમિનીળાનાયક, સ્વચ્છંદાનુવર્તિ સ્વરૂપસ્થિતિ પ્રવૃત્તિભેદાશેષ શેષતૈકરતિરૂપ
નિત્યનિરવદ્યનિરતિશય જ્ઞાન ક્રિયૈશ્વર્યાદ્યનંત કલ્યાણગુણગણ શેષ શેષાશન
ગરુડપ્રમુખ નાનાવિધાનંત પરિજન પરિચારિકા પરિચરિત ચરણયુગળ, પરમયોગિ વાઙ્મનસાઽપરિચ્છેદ્ય સ્વરૂપ સ્વભાવ સ્વાભિમત વિવિધવિચિત્રાનંતભોગ્ય ભોગોપકરણ ભોગસ્થાન સમૃદ્ધાનંતાશ્ચર્યાનંત મહાવિભવાનંત પરિમાણ નિત્ય નિરવદ્ય નિરતિશય શ્રીવૈકુંઠનાથ, સ્વસંકલ્પાનુવિધાયિ સ્વરૂપસ્થિતિ પ્રવૃત્તિ સ્વશેષતૈકસ્વભાવ પ્રકૃતિ પુરુષ કાલાત્મક વિવિધ વિચિત્રાનંત ભોગ્ય ભોક્તૃવર્ગ ભોગોપકરણ ભોગસ્થાનરૂપ
નિખિલજગદુદય વિભવ લયલીલ, સત્યકામ, સત્યસંકલ્પ, પરબ્રહ્મભૂત, પુરુષોત્તમ,મહાવિભૂતે,

શ્રીમન્ નારાયણ, વૈકુંઠનાથ, અપાર કારુણ્ય સૌશીલ્ય વાત્સલ્યૌદાર્યૈશ્વર્ય સૌંદર્ય મહોદધે, અનાલોચિતવિશેષાશેષલોક શરણ્ય, પ્રણતાર્તિહર, આશ્રિત વાત્સલ્યૈકજલધે, અનવરતવિદિત નિખિલભૂતજાતયાથાત્મ્ય, અશેષચરાચરભૂત નિખિલનિયમન નિરત, અશેષચિદચિદ્વસ્તુ શેષિભૂત, નિખિલજગદાધાર, અખિલજગત્સ્વામિન્, અસ્મત્સ્વામિન્, સત્યકામ,
સત્યસંકલ્પ, સકલેતરવિલક્ષણ, અર્થિકલ્પક, આપત્સખ, શ્રીમન્, નારાયણ, અશરણ્યશરણ્ય, અનન્યશરણસ્ત્વત્પાદારવિંદ યુગળં શરણમહં પ્રપદ્યે ॥

અત્ર દ્વયમ્ ।

પિતરં માતરં દારાન્ પુત્રાન્ બંધૂન્ સખીન્ ગુરૂન્ ।
રત્નાનિ ધનધાન્યાનિ ક્ષેત્રાણિ ચ ગૃહાણિ ચ ॥ 1

સર્વધર્માંશ્ચ સંત્યજ્ય સર્વકામાંશ્ચ સાક્ષરાન્ ।
લોકવિક્રાંતચરણૌ શરણં તેઽવ્રજં વિભો ॥ 2

ત્વમેવ માતા ચ પિતા ત્વમેવ
ત્વમેવ બંધુશ્ચ ગુરુસ્ત્વમેવ ।
ત્વમેવ વિદ્યા દ્રવિણં ત્વમેવ
ત્વમેવ સર્વં મમ દેવદેવ ॥ 3

પિતાઽસિ લોકસ્ય ચરાચરસ્ય
ત્વમસ્ય પૂજ્યશ્ચ ગુરુર્ગરીયાન્ ।
ન ત્વત્સમોઽસ્ત્યભ્યધિકઃ કુતોઽન્યો
લોકત્રયેઽપ્યપ્રતિમપ્રભાવ ॥ 4

તસ્માત્પ્રણમ્ય પ્રણિધાય કાયં
પ્રસાદયે ત્વામહમીશમીડ્યમ્ ।
પિતેવ પુત્રસ્ય સખેવ સખ્યુઃ
પ્રિયઃ પ્રિયાયાર્હસિ દેવ સોઢુમ્ ॥

મનોવાક્કાયૈરનાદિકાલ પ્રવૃત્તાનંતાકૃત્યકરણ કૃત્યાકરણ ભગવદપચાર ભાગવતાપચારાસહ્યાપચારરૂપ નાનાવિધાનંતાપચારાન્ આરબ્ધકાર્યાન્ અનારબ્ધકાર્યાન્ કૃતાન્ ક્રિયમાણાન્ કરિષ્યમાણાંશ્ચ સર્વાનશેષતઃ ક્ષમસ્વ ।

અનાદિકાલપ્રવૃત્તવિપરીત જ્ઞાનમાત્મવિષયં કૃત્સ્ન જગદ્વિષયં ચ વિપરીતવૃત્તં ચાશેષવિષયમદ્યાપિ વર્તમાનં વર્તિષ્યમાણં ચ સર્વં ક્ષમસ્વ ।

મદીયાનાદિકર્મ પ્રવાહપ્રવૃત્તાં ભગવત્સ્વરૂપ તિરોધાનકરીં વિપરીતજ્ઞાનજનનીં સ્વવિષયાયાશ્ચ ભોગ્યબુદ્ધેર્જનનીં દેહેંદ્રિયત્વેન ભોગ્યત્વેન સૂક્ષ્મરૂપેણ ચાવસ્થિતાં દૈવીં ગુણમયીં માયાં દાસભૂતં શરણાગતોઽસ્મિ તવાસ્મિ દાસઃ ઇતિ વક્તારં માં તારય ।

તેષાં જ્ઞાની નિત્યયુક્તઃ એકભક્તિર્વિશિષ્યતે ।
પ્રિયો હિ જ્ઞાનિનોઽત્યર્થમહં સ ચ મમ પ્રિયઃ ॥

ઉદારાઃ સર્વ એવૈતે જ્ઞાની ત્વાત્મૈવ મે મતમ્ ।
આસ્થિતઃ સ હિ યુક્તાત્મા મામેવાનુત્તમાં ગતિમ્ ॥

બહૂનાં જન્મનામંતે જ્ઞાનવાન્માં પ્રપદ્યતે ।
વાસુદેવઃ સર્વમિતિ સ મહાત્મા સુદુર્લભઃ ॥

ઇતિ શ્લોકત્રયોદિતજ્ઞાનિનં માં કુરુષ્વ ।

પુરુષઃ સ પરઃ પાર્થ ભક્ત્યા લભ્યસ્ત્વનન્યયા ।
ભક્ત્યા ત્વનન્યયા શક્યઃ મદ્ભક્તિં લભતે પરામ્ ।
ઇતિ સ્થાનત્રયોદિત પરભક્તિયુક્તં માં કુરુષ્વ ।

પરભક્તિ પરજ્ઞાન પરમભક્ત્યેકસ્વભાવં માં કુરુષ્વ ।
પરભક્તિ પરજ્ઞાન પરમભક્તિકૃત પરિપૂર્ણાનવરત નિત્યવિશદતમાનન્ય પ્રયોજનાનવધિકાતિશય પ્રિય ભગવદનુભવોઽહં તથાવિધ ભગવદનુભવ જનિતાનવધિકાતિશય પ્રીતિકારિતાશેષાવસ્થોચિતાશેષ શેષતૈકરતિરૂપ નિત્યકિંકરો ભવાનિ ।

એવંભૂત મત્કૈંકર્યપ્રાપ્ત્યુપાયતયાઽવક્લુપ્તસમસ્ત વસ્તુવિહીનોઽપિ, અનંત તદ્વિરોધિપાપાક્રાંતોઽપિ, અનંત મદપચારયુક્તોઽપિ, અનંત મદીયાપચારયુક્તોઽપિ, અનંતાસહ્યાપચાર યુક્તોઽપિ, એતત્કાર્યકારણ ભૂતાનાદિ વિપરીતાહંકાર વિમૂઢાત્મ સ્વભાવોઽપિ, એતદુભયકાર્યકારણભૂતાનાદિ વિપરીતવાસના સંબદ્ધોઽપિ, એતદનુગુણ પ્રકૃતિ વિશેષસંબદ્ધોઽપિ, એતન્મૂલાધ્યાત્મિકાધિભૌતિકાધિદૈવિક સુખદુઃખ તદ્ધેતુ
તદિતરોપેક્ષણીય વિષયાનુભવ જ્ઞાનસંકોચરૂપ મચ્ચરણારવિંદયુગળૈકાંતિકાત્યંતિક પરભક્તિ પરજ્ઞાન પરમભક્તિ વિઘ્નપ્રતિહતોઽપિ, યેન કેનાપિ પ્રકારેણ દ્વયવક્તા ત્વં કેવલં મદીયયૈવ દયયા નિશ્શેષવિનષ્ટ સહેતુક મચ્ચરણારવિંદયુગળૈકાંતિકાત્યંતિક પરભક્તિ પરજ્ઞાન પરમભક્તિવિઘ્નઃ મત્પ્રસાદલબ્ધ મચ્ચરણારવિંદયુગળૈકાંતિકાત્યંતિક પરભક્તિ પરજ્ઞાન પરમભક્તિઃ મત્પ્રસાદાદેવ સાક્ષાત્કૃત યથાવસ્થિત મત્સ્વરૂપરૂપગુણવિભૂતિ લીલોપકરણવિસ્તારઃ અપરોક્ષસિદ્ધ મન્નિયામ્યતા મદ્દાસ્યૈક સ્વભાવાત્મ સ્વરૂપઃ મદેકાનુભવઃ મદ્દાસ્યૈકપ્રિયઃ પરિપૂર્ણાનવરત નિત્યવિશદતમાનન્ય પ્રયોજનાનવધિકાતિશયપ્રિય મદનુભવસ્ત્વં તથાવિધ મદનુભવ જનિતાનવધિકાતિશય પ્રીતિકારિતાશેષાવસ્થોચિતાશેષ શેષતૈકરતિરૂપ નિત્યકિંકરો ભવ ।

એવંભૂતોઽસિ । આધ્યાત્મિકાધિભૌતિકાધિદૈવિક દુઃખવિઘ્નગંધરહિતસ્ત્વં દ્વયમર્થાનુસંધાનેન સહ સદૈવં વક્તા યાવચ્છરીરપાતમત્રૈવ શ્રીરંગે સુખમાસ્વ ॥

શરીરપાતસમયે તુ કેવલં મદીયયૈવ દયયાઽતિપ્રબુદ્ધઃ મામેવાવલોકયન્ અપ્રચ્યુત પૂર્વસંસ્કારમનોરથઃ જીર્ણમિવ વસ્ત્રં સુખેનેમાં પ્રકૃતિં સ્થૂલસૂક્ષ્મરૂપાં વિસૃજ્ય તદાનીમેવ મત્પ્રસાદલબ્ધ મચ્ચરણારવિંદ યુગળૈકાંતિકાત્યંતિક પરભક્તિ પરજ્ઞાન પરમભક્તિકૃત પરિપૂર્ણાનવરત નિત્યવિશદતમાનન્ય પ્રયોજનાનવધિકાતિશય પ્રિય મદનુભવસ્ત્વં તથાવિધ મદનુભવજનિતાનવધિકાતિશય પ્રીતિકારિતાશેષાવસ્થોચિતાશેષશેષતૈક રતિરૂપ નિત્યકિંકરો ભવિષ્યસિ । માતેઽભૂદત્ર સંશયઃ ।

અનૃતં નોક્તપૂર્વં મે ન ચ વક્ષ્યે કદાચન ।
રામો દ્વિર્નાભિભાષતે ।
સકૃદેવ પ્રપન્નાય તવાસ્મીતિ ચ યાચતે ।
અભયં સર્વભૂતેભ્યો દદામ્યેતદ્વ્રતં મમ ॥
સર્વધર્માન્ પરિત્યજ્ય મામેકં શરણં વ્રજ ।
અહં ત્વા સર્વપાપેભ્યો મોક્ષયિષ્યામિ મા શુચઃ ॥
ઇતિ મયૈવ હ્યુક્તમ્ ।

અતસ્ત્વં તવ તત્ત્વતો મત્ જ્ઞાનદર્શન પ્રાપ્તિષુ નિસ્સંશયઃ સુખમાસ્વ ॥

અંત્યકાલે સ્મૃતિર્યાતુ તવ કૈંકર્યકારિતા ।
તામેનાં ભગવન્નદ્ય ક્રિયમાણાં કુરુષ્વ મે ॥

ઇતિ શ્રીભગવદ્રામાનુજ વિરચિતં શરણાગતિ ગદ્યમ્ ।