નારાયણ કવચમ્

ન્યાસઃ

અંગન્યાસઃ
ઓં ઓં પાદયોઃ નમઃ ।
ઓં નં જાનુનોઃ નમઃ ।
ઓં મોં ઊર્વોઃ નમઃ ।
ઓં નાં ઉદરે નમઃ ।
ઓં રાં હૃદિ નમઃ ।
ઓં યં ઉરસિ નમઃ ।
ઓં ણાં મુખે નમઃ ।
ઓં યં શિરસિ નમઃ ।

કરન્યાસઃ
ઓં ઓં દક્ષિણતર્જન્યાં નમઃ ।
ઓં નં દક્ષિણમધ્યમાયાં નમઃ ।
ઓં મોં દક્ષિણાનામિકાયાં નમઃ ।
ઓં ભં દક્ષિણકનિષ્ઠિકાયાં નમઃ ।
ઓં ગં વામકનિષ્ઠિકાયાં નમઃ ।
ઓં વં વામાનિકાયાં નમઃ ।
ઓં તેં વામમધ્યમાયાં નમઃ ।
ઓં વાં વામતર્જન્યાં નમઃ ।
ઓં સું દક્ષિણાંગુષ્ઠોર્ધ્વપર્વણિ નમઃ ।
ઓં દેં દક્ષિણાંગુષ્ઠાધઃ પર્વણિ નમઃ ।
ઓં વાં વામાંગુષ્ઠોર્ધ્વપર્વણિ નમઃ ।
ઓં યં વામાંગુષ્ઠાધઃ પર્વણિ નમઃ ।

વિષ્ણુષડક્ષરન્યાસઃ
ઓં ઓં હૃદયે નમઃ ।
ઓં વિં મૂર્ધ્નૈ નમઃ ।
ઓં ષં ભ્રુર્વોર્મધ્યે નમઃ ।
ઓં ણં શિખાયાં નમઃ ।
ઓં વેં નેત્રયોઃ નમઃ ।
ઓં નં સર્વસંધિષુ નમઃ ।
ઓં મઃ પ્રાચ્યાં અસ્ત્રાય ફટ્ ।
ઓં મઃ આગ્નેય્યાં અસ્ત્રાય ફટ્ ।
ઓં મઃ દક્ષિણસ્યાં અસ્ત્રાય ફટ્ ।
ઓં મઃ નૈઋત્યે અસ્ત્રાય ફટ્ ।
ઓં મઃ પ્રતીચ્યાં અસ્ત્રાય ફટ્ ।
ઓં મઃ વાયવ્યે અસ્ત્રાય ફટ્ ।
ઓં મઃ ઉદીચ્યાં અસ્ત્રાય ફટ્ ।
ઓં મઃ ઐશાન્યાં અસ્ત્રાય ફટ્ ।
ઓં મઃ ઊર્ધ્વાયાં અસ્ત્રાય ફટ્ ।
ઓં મઃ અધરાયાં અસ્ત્રાય ફટ્ ।

શ્રી હરિઃ

અથ શ્રીનારાયણકવચ

રાજોવાચ
યયા ગુપ્તઃ સહસ્રાક્ષઃ સવાહાન્ રિપુસૈનિકાન્ ।
ક્રીડન્નિવ વિનિર્જિત્ય ત્રિલોક્યા બુભુજે શ્રિયમ્ ॥ 1 ॥

ભગવંસ્તન્મમાખ્યાહિ વર્મ નારાયણાત્મકમ્ ।
યથાઽઽતતાયિનઃ શત્રૂન્ યેન ગુપ્તોઽજયન્મૃધે ॥ 2 ॥

શ્રી શુક ઉવાચ
વૃતઃ પુરોહિતસ્ત્વાષ્ટ્રો મહેંદ્રાયાનુપૃચ્છતે ।
નારાયણાખ્યં વર્માહ તદિહૈકમનાઃ શૃણુ ॥ 3 ॥

શ્રીવિશ્વરૂપ ઉવાચ
ધૌતાંઘ્રિપાણિરાચમ્ય સપવિત્ર ઉદઙ્મુખઃ ।
કૃતસ્વાંગકરન્યાસો મંત્રાભ્યાં વાગ્યતઃ શુચિઃ ॥ 4 ॥

નારાયણમયં વર્મ સન્નહ્યેદ્ભય આગતે ।
દૈવભૂતાત્મકર્મભ્યો નારાયણમયઃ પુમાન્ ॥ 5 ॥

પાદયોર્જાનુનોરૂર્વોરુદરે હૃદ્યથોરસિ ।
મુખે શિરસ્યાનુપૂર્વ્યાદોંકારાદીનિ વિન્યસેત્ ॥ 6 ॥

ઓં નમો નારાયણાયેતિ વિપર્યયમથાપિ વા ।
કરન્યાસં તતઃ કુર્યાદ્દ્વાદશાક્ષરવિદ્યયા ॥ 7 ॥

પ્રણવાદિયકારાંતમંગુલ્યંગુષ્ઠપર્વસુ ।
ન્યસેદ્ધૃદય ઓંકારં વિકારમનુ મૂર્ધનિ ॥ 8 ॥

ષકારં તુ ભ્રુવોર્મધ્યે ણકારં શિખયા ન્યસેત્ ।
વેકારં નેત્રયોર્યુંજ્યાન્નકારં સર્વસંધિષુ ॥ 9 ॥

મકારમસ્ત્રમુદ્દિશ્ય મંત્રમૂર્તિર્ભવેદ્બુધઃ ।
સવિસર્ગં ફડંતં તત્સર્વદિક્ષુ વિનિર્દિશેત્ ॥ 10 ॥

ઓં વિષ્ણવે નમઃ ॥

ઇત્યાત્માનં પરં ધ્યાયેદ્ધ્યેયં ષટ્છક્તિભિર્યુતમ્ ।
વિદ્યાતેજસ્તપોમૂર્તિમિમં મંત્રમુદાહરેત્ ॥ 11 ॥

ઓં હરિર્વિદધ્યાન્મમ સર્વરક્ષાં
ન્યસ્તાંઘ્રિપદ્મઃ પતગેંદ્ર પૃષ્ઠે ।
દરારિચર્માસિગદેષુચાપ-
-પાશાંદધાનોઽષ્ટગુણોઽષ્ટબાહુઃ ॥ 12 ॥

જલેષુ માં રક્ષતુ મત્સ્યમૂર્તિ-
-ર્યાદોગણેભ્યો વરુણસ્ય પાશાત્ ।
સ્થલેષુ માયાવટુવામનોઽવ્યા-
-ત્ત્રિવિક્રમઃ ખેઽવતુ વિશ્વરૂપઃ ॥ 13 ॥

દુર્ગેષ્વટવ્યાજિમુખાદિષુ પ્રભુઃ
પાયાન્નૃસિંહોઽસુરયૂથપારિઃ ।
વિમુંચતો યસ્ય મહાટ્ટહાસં
દિશો વિનેદુર્ન્યપતંશ્ચ ગર્ભાઃ ॥ 14 ॥

રક્ષત્વસૌ માધ્વનિ યજ્ઞકલ્પઃ
સ્વદંષ્ટ્રયોન્નીતધરો વરાહઃ ।
રામોઽદ્રિકૂટેષ્વથ વિપ્રવાસે
સલક્ષ્મણોઽવ્યાદ્ભરતાગ્રજોઽસ્માન્ ॥ 15 ॥

મામુગ્રધર્માદખિલાત્પ્રમાદા-
-ન્નારાયણઃ પાતુ નરશ્ચ હાસાત્ ।
દત્તસ્ત્વયોગાદથ યોગનાથઃ
પાયાદ્ગુણેશઃ કપિલઃ કર્મબંધાત્ ॥ 16 ॥

સનત્કુમારોઽવતુ કામદેવા-
-દ્ધયાનનો માં પથિ દેવહેલનાત્ ।
દેવર્ષિવર્યઃ પુરુષાર્ચનાંતરા-
-ત્કૂર્મો હરિર્માં નિરયાદશેષાત્ ॥ 17 ॥

ધન્વંતરિર્ભગવાન્પાત્વપથ્યા-
-દ્દ્વંદ્વાદ્ભયાદૃષભો નિર્જિતાત્મા ।
યજ્ઞશ્ચ લોકાદવતાજ્જનાંતા-
-દ્બલો ગણાત્ક્રોધવશાદહીંદ્રઃ ॥ 18 ॥

દ્વૈપાયનો ભગવાનપ્રબોધા-
-દ્બુદ્ધસ્તુ પાષંડગણાત્પ્રમાદાત્ ।
કલ્કિઃ કલેઃ કાલમલાત્પ્રપાતુ
ધર્માવનાયોરુકૃતાવતારઃ ॥ 19 ॥

માં કેશવો ગદયા પ્રાતરવ્યા-
-દ્ગોવિંદ આસંગવમાત્તવેણુઃ ।
નારાયણઃ પ્રાહ્ણ ઉદાત્તશક્તિ-
-ર્મધ્યંદિને વિષ્ણુરરીંદ્રપાણિઃ ॥ 20 ॥

દેવોઽપરાહ્ણે મધુહોગ્રધન્વા
સાયં ત્રિધામાવતુ માધવો મામ્ ।
દોષે હૃષીકેશ ઉતાર્ધરાત્રે
નિશીથ એકોઽવતુ પદ્મનાભઃ ॥ 21 ॥

શ્રીવત્સધામા¶રાત્ર ઈશઃ
પ્રત્યુષ ઈશોઽસિધરો જનાર્દનઃ ।
દામોદરોઽવ્યાદનુસંધ્યં પ્રભાતે
વિશ્વેશ્વરો ભગવાન્કાલમૂર્તિઃ ॥ 22 ॥

ચક્રં યુગાંતાનલતિગ્મનેમિ
ભ્રમત્સમંતાદ્ભગવત્પ્રયુક્તમ્ ।
દંદગ્ધિ દંદગ્ધ્યરિસૈન્યમાશુ
કક્ષં યથા વાતસખો હુતાશઃ ॥ 23 ॥

ગદેઽશનિસ્પર્શનવિસ્ફુલિંગે
નિષ્પિંઢિ નિષ્પિંઢ્યજિતપ્રિયાસિ ।
કૂષ્માંડવૈનાયકયક્ષરક્ષો
ભૂતગ્રહાંશ્ચૂર્ણય ચૂર્ણયારીન્ ॥ 24 ॥

ત્વં યાતુધાનપ્રમથપ્રેતમાતૃ-
-પિશાચવિપ્રગ્રહઘોરદૃષ્ટીન્ ।
દરેંદ્ર વિદ્રાવય કૃષ્ણપૂરિતો
ભીમસ્વનોઽરેર્હૃદયાનિ કંપયન્ ॥ 25 ॥

ત્વં તિગ્મધારાસિવરારિસૈન્ય-
-મીશપ્રયુક્તો મમ છિંધિ છિંધિ ।
ચક્ષૂંષિ ચર્મન્ શતચંદ્ર છાદય
દ્વિષામઘોનાં હર પાપચક્ષુષામ્ ॥ 26 ॥

યન્નો ભયં ગ્રહેભ્યોઽભૂત્કેતુભ્યો નૃભ્ય એવ ચ ।
સરીસૃપેભ્યો દંષ્ટ્રિભ્યો ભૂતેભ્યોઽઘેભ્ય એવ ચ ॥ 27 ॥

સર્વાણ્યેતાનિ ભગવન્નામરૂપાસ્ત્રકીર્તનાત્ ।
પ્રયાંતુ સંક્ષયં સદ્યો યે નઃ શ્રેયઃપ્રતીપકાઃ ॥ 28 ॥

ગરુડો ભગવાન્ સ્તોત્રસ્તોમશ્છંદોમયઃ પ્રભુઃ ।
રક્ષત્વશેષકૃચ્છ્રેભ્યો વિષ્વક્સેનઃ સ્વનામભિઃ ॥ 29 ॥

સર્વાપદ્ભ્યો હરેર્નામરૂપયાનાયુધાનિ નઃ ।
બુદ્ધીંદ્રિયમનઃપ્રાણાન્પાંતુ પાર્ષદભૂષણાઃ ॥ 30 ॥

યથા હિ ભગવાનેવ વસ્તુતઃ સદસચ્ચ યત્ ।
સત્યેનાનેન નઃ સર્વે યાંતુ નાશમુપદ્રવાઃ ॥ 31 ॥

યથૈકાત્મ્યાનુભાવાનાં વિકલ્પરહિતઃ સ્વયમ્ ।
ભૂષણાયુધલિંગાખ્યા ધત્તે શક્તીઃ સ્વમાયયા ॥ 32 ॥

તેનૈવ સત્યમાનેન સર્વજ્ઞો ભગવાન્ હરિઃ ।
પાતુ સર્વૈઃ સ્વરૂપૈર્નઃ સદા સર્વત્ર સર્વગઃ ॥ 33 ॥

વિદિક્ષુ દિક્ષૂર્ધ્વમધઃ સમંતા-
-દંતર્બહિર્ભગવાન્નારસિંહઃ ।
પ્રહાપયઁલ્લોકભયં સ્વનેન
સ્વતેજસા ગ્રસ્તસમસ્તતેજાઃ ॥ 34 ॥

મઘવન્નિદમાખ્યાતં વર્મ નારાયણાત્મકમ્ ।
વિજેષ્યસ્યંજસા યેન દંશિતોઽસુરયૂથપાન્ ॥ 35 ॥

એતદ્ધારયમાણસ્તુ યં યં પશ્યતિ ચક્ષુષા ।
પદા વા સંસ્પૃશેત્સદ્યઃ સાધ્વસાત્સ વિમુચ્યતે ॥ 36 ॥

ન કુતશ્ચિદ્ભયં તસ્ય વિદ્યાં ધારયતો ભવેત્ ।
રાજદસ્યુગ્રહાદિભ્યો વ્યાધ્યાદિભ્યશ્ચ કર્હિચિત્ ॥ 37 ॥

ઇમાં વિદ્યાં પુરા કશ્ચિત્કૌશિકો ધારયન્ દ્વિજઃ ।
યોગધારણયા સ્વાંગં જહૌ સ મરુધન્વનિ ॥ 38 ॥

તસ્યોપરિ વિમાનેન ગંધર્વપતિરેકદા ।
યયૌ ચિત્રરથઃ સ્ત્રીભિર્વૃતો યત્ર દ્વિજક્ષયઃ ॥ 39 ॥

ગગનાન્ન્યપતત્સદ્યઃ સવિમાનો હ્યવાક્છિરાઃ ।
સ વાલખિલ્યવચનાદસ્થીન્યાદાય વિસ્મિતઃ ।
પ્રાપ્ય પ્રાચ્યાં સરસ્વત્યાં સ્નાત્વા ધામ સ્વમન્વગાત્ ॥ 40 ॥

શ્રી શુક ઉવાચ
ય ઇદં શૃણુયાત્કાલે યો ધારયતિ ચાદૃતઃ ।
તં નમસ્યંતિ ભૂતાનિ મુચ્યતે સર્વતો ભયાત્ ॥ 41 ॥

એતાં વિદ્યામધિગતો વિશ્વરૂપાચ્છતક્રતુઃ ।
ત્રૈલોક્યલક્ષ્મીં બુભુજે વિનિર્જિત્ય મૃધેઽસુરાન્ ॥ 42 ॥

ઇતિ શ્રીમદ્ભાગવતે મહાપુરાણે ષષ્ઠસ્કંધે નારાયણવર્મોપદેશો નામાષ્ટમોઽધ્યાયઃ ।