ઋણ વિમોચન નૃસિંહ સ્તોત્રમ્

ધ્યાનમ્ –
વાગીશા યસ્ય વદને લક્ષ્મીર્યસ્ય ચ વક્ષસિ ।
યસ્યાસ્તે હૃદયે સંવિત્તં નૃસિંહમહં ભજે ॥

અથ સ્તોત્રમ્ –
દેવતાકાર્યસિદ્ધ્યર્થં સભાસ્તંભસમુદ્ભવમ્ ।
શ્રીનૃસિંહં મહાવીરં નમામિ ઋણમુક્તયે ॥ 1 ॥

લક્ષ્મ્યાલિંગિત વામાંકં ભક્તાનાં વરદાયકમ્ ।
શ્રીનૃસિંહં મહાવીરં નમામિ ઋણમુક્તયે ॥ 2 ॥

આંત્રમાલાધરં શંખચક્રાબ્જાયુધધારિણમ્ ।
શ્રીનૃસિંહં મહાવીરં નમામિ ઋણમુક્તયે ॥ 3 ॥

સ્મરણાત્ સર્વપાપઘ્નં કદ્રૂજવિષનાશનમ્ ।
શ્રીનૃસિંહં મહાવીરં નમામિ ઋણમુક્તયે ॥ 4 ॥

સિંહનાદેન મહતા દિગ્વિદિગ્ભયનાશનમ્ । [દિગ્દંતિ]
શ્રીનૃસિંહં મહાવીરં નમામિ ઋણમુક્તયે ॥ 5 ॥

પ્રહ્લાદવરદ શ્રીશં દૈત્યેશ્વરવિદારણમ્ ।
શ્રીનૃસિંહં મહાવીરં નમામિ ઋણમુક્તયે ॥ 6 ॥

ક્રૂરગ્રહૈઃ પીડિતાનાં ભક્તાનામભયપ્રદમ્ ।
શ્રીનૃસિંહં મહાવીરં નમામિ ઋણમુક્તયે ॥ 7 ॥

વેદવેદાંતયજ્ઞેશં બ્રહ્મરુદ્રાદિવંદિતમ્ ।
શ્રીનૃસિંહં મહાવીરં નમામિ ઋણમુક્તયે ॥ 8 ॥

ઇત્થં યઃ પઠતે નિત્યં ઋણમોચન સિદ્ધયે । [સંજ્ઞિતમ્]
અનૃણો જાયતે શીઘ્રં ધનં વિપુલમાપ્નુયાત્ ॥ 9 ॥

સર્વસિદ્ધિપ્રદં નૃણાં સર્વૈશ્વર્યપ્રદાયકમ્ ।
તસ્માત્ સર્વપ્રયત્નેન પઠેત્ સ્તોત્રમિદં સદા ॥ 10 ॥

ઇતિ શ્રીનૃસિંહપુરાણે ઋણમોચન શ્રી નૃસિંહ સ્તોત્રમ્ ।