શ્રી નારાયણ હૃદય સ્તોત્રમ્

અસ્ય શ્રીનારાયણહૃદયસ્તોત્રમંત્રસ્ય ભાર્ગવ ઋષિઃ, અનુષ્ટુપ્છંદઃ, શ્રીલક્ષ્મીનારાયણો દેવતા, ઓં બીજં, નમશ્શક્તિઃ, નારાયણાયેતિ કીલકં, શ્રીલક્ષ્મીનારાયણ પ્રીત્યર્થે જપે વિનિયોગઃ ।

કરન્યાસઃ ।
ઓં નારાયણઃ પરં જ્યોતિરિતિ અંગુષ્ઠાભ્યાં નમઃ ।
નારાયણઃ પરં બ્રહ્મેતિ તર્જનીભ્યાં નમઃ ।
નારાયણઃ પરો દેવ ઇતિ મધ્યમાભ્યાં નમઃ ।
નારાયણઃ પરં ધામેતિ અનામિકાભ્યાં નમઃ ।
નારાયણઃ પરો ધર્મ ઇતિ કનિષ્ઠિકાભ્યાં નમઃ ।
વિશ્વં નારાયણ ઇતિ કરતલકરપૃષ્ઠાભ્યાં નમઃ ।
અંગન્યાસઃ ।
નારાયણઃ પરં જ્યોતિરિતિ હૃદયાય નમઃ ।
નારાયણઃ પરં બ્રહ્મેતિ શિરસે સ્વાહા ।
નારાયણઃ પરો દેવ ઇતિ શિખાયૈ વૌષટ્ ।
નારાયણઃ પરં ધામેતિ કવચાય હુમ્ ।
નારાયણઃ પરો ધર્મ ઇતિ નેત્રાભ્યાં વૌષટ્ ।
વિશ્વં નારાયણ ઇતિ અસ્ત્રાય ફટ્ ।
દિગ્બંધઃ ।
ઓં ઐંદ્ર્યાદિદશદિશં ઓં નમઃ સુદર્શનાય સહસ્રારાય હું ફટ્ બધ્નામિ નમશ્ચક્રાય સ્વાહા । ઇતિ પ્રતિદિશં યોજ્યમ્ ।

અથ ધ્યાનમ્ ।
ઉદ્યાદાદિત્યસંકાશં પીતવાસં ચતુર્ભુજમ્ ।
શંખચક્રગદાપાણિં ધ્યાયેલ્લક્ષ્મીપતિં હરિમ્ ॥ 1 ॥

ત્રૈલોક્યાધારચક્રં તદુપરિ કમઠં તત્ર ચાનંતભોગી
તન્મધ્યે ભૂમિપદ્માંકુશશિખરદળં કર્ણિકાભૂતમેરુમ્ ।
તત્રસ્થં શાંતમૂર્તિં મણિમયમકુટં કુંડલોદ્ભાસિતાંગં
લક્ષ્મીનારાયણાખ્યં સરસિજનયનં સંતતં ચિંતયામિ ॥ 2 ॥

અથ મૂલાષ્ટકમ્ ।
ઓમ્ ॥ નારાયણઃ પરં જ્યોતિરાત્મા નારાયણઃ પરઃ ।
નારાયણઃ પરં બ્રહ્મ નારાયણ નમોઽસ્તુ તે ॥ 1 ॥

નારાયણઃ પરો દેવો ધાતા નારાયણઃ પરઃ ।
નારાયણઃ પરો ધાતા નારાયણ નમોઽસ્તુ તે ॥ 2 ॥

નારાયણઃ પરં ધામ ધ્યાનં નારાયણઃ પરઃ ।
નારાયણ પરો ધર્મો નારાયણ નમોઽસ્તુ તે ॥ 3 ॥

નારાયણઃ પરોવેદ્યઃ વિદ્યા નારાયણઃ પરઃ ।
વિશ્વં નારાયણઃ સાક્ષાન્નારાયણ નમોઽસ્તુ તે ॥ 4 ॥

નારાયણાદ્વિધિર્જાતો જાતો નારાયણાદ્ભવઃ ।
જાતો નારાયણાદિંદ્રો નારાયણ નમોઽસ્તુ તે ॥ 5 ॥

રવિર્નારાયણસ્તેજઃ ચંદ્રો નારાયણો મહઃ ।
વહ્નિર્નારાયણઃ સાક્ષાન્નારાયણ નમોઽસ્તુ તે ॥ 6 ॥

નારાયણ ઉપાસ્યઃ સ્યાદ્ગુરુર્નારાયણઃ પરઃ ।
નારાયણઃ પરો બોધો નારાયણ નમોઽસ્તુ તે ॥ 7 ॥

નારાયણઃ ફલં મુખ્યં સિદ્ધિર્નારાયણઃ સુખમ્ ।
સેવ્યોનારાયણઃ શુદ્ધો નારાયણ નમોઽસ્તુ તે ॥ 8 ॥ [હરિ]

અથ પ્રાર્થનાદશકમ્ ।
નારાયણ ત્વમેવાસિ દહરાખ્યે હૃદિ સ્થિતઃ ।
પ્રેરકઃ પ્રેર્યમાણાનાં ત્વયા પ્રેરિતમાનસઃ ॥ 9 ॥

ત્વદાજ્ઞાં શિરસા ધૃત્વા જપામિ જનપાવનમ્ ।
નાનોપાસનમાર્ગાણાં ભવકૃદ્ભાવબોધકઃ ॥ 10 ॥

ભાવાર્થકૃદ્ભવાતીતો ભવ સૌખ્યપ્રદો મમ ।
ત્વન્માયામોહિતં વિશ્વં ત્વયૈવ પરિકલ્પિતમ્ ॥ 11 ॥

ત્વદધિષ્ઠાનમાત્રેણ સા વૈ સર્વાર્થકારિણી ।
ત્વમેતાં ચ પુરસ્કૃત્ય સર્વકામાન્પ્રદર્શય ॥ 12 ॥

ન મે ત્વદન્યસ્ત્રાતાસ્તિ ત્વદન્યન્ન હિ દૈવતમ્ ।
ત્વદન્યં ન હિ જાનામિ પાલકં પુણ્યવર્ધનમ્ ॥ 13 ॥

યાવત્સાંસારિકો ભાવો મનસ્સ્થો ભાવનાત્મકઃ ।
તાવત્સિદ્ધિર્ભવેત્સાધ્યા સર્વથા સર્વદા વિભો ॥ 14 ॥

પાપિનામહમેવાગ્ર્યો દયાળૂનાં ત્વમગ્રણીઃ ।
દયનીયો મદન્યોઽસ્તિ તવ કોઽત્ર જગત્ત્રયે ॥ 15 ॥

ત્વયાહં નૈવ સૃષ્ટશ્ચેન્ન સ્યાત્તવ દયાળુતા ।
આમયો વા ન સૃષ્ટશ્ચેદૌષધસ્ય વૃથોદયઃ ॥ 16 ॥

પાપસંઘપરિશ્રાંતઃ પાપાત્મા પાપરૂપધૃત્ ।
ત્વદન્યઃ કોઽત્ર પાપેભ્યસ્ત્રાતાસ્તિ જગતીતલે ॥ 17 ॥

ત્વમેવ માતા ચ પિતા ત્વમેવ
ત્વમેવ બંધુશ્ચ સખા ત્વમેવ ।
ત્વમેવ સેવ્યશ્ચ ગુરુસ્ત્વમેવ
ત્વમેવ સર્વં મમ દેવ દેવ ॥ 18 ॥

પ્રાર્થનાદશકં ચૈવ મૂલાષ્ટકમતઃ પરમ્ ।
યઃ પઠેચ્છૃણુયાન્નિત્યં તસ્ય લક્ષ્મીઃ સ્થિરા ભવેત્ ॥ 19 ॥

નારાયણસ્ય હૃદયં સર્વાભીષ્ટફલપ્રદમ્ ।
લક્ષ્મીહૃદયકં સ્તોત્રં યદિ ચેત્તદ્વિનાકૃતમ્ ॥ 20 ॥

તત્સર્વં નિષ્ફલં પ્રોક્તં લક્ષ્મીઃ ક્રુદ્ધ્યતિ સર્વદા ।
એતત્સંકલિતં સ્તોત્રં સર્વકામફલપ્રદમ્ ॥ 21 ॥

લક્ષ્મીહૃદયકં ચૈવ તથા નારાયણાત્મકમ્ ।
જપેદ્યઃ સંકલીકૃત્ય સર્વાભીષ્ટમવાપ્નુયાત્ ॥ 22 ॥

નારાયણસ્ય હૃદયમાદૌ જપ્ત્વા તતઃ પરમ્ ।
લક્ષ્મીહૃદયકં સ્તોત્રં જપેન્નારાયણં પુનઃ ॥ 23 ॥

પુનર્નારાયણં જપ્ત્વા પુનર્લક્ષ્મીનુતિં જપેત્ ।
પુનર્નારાયણં જાપ્યં સંકલીકરણં ભવેત્ ॥ 24 ॥

એવં મધ્યે દ્વિવારેણ જપેત્સંકલિતં તુ તત્ ।
લક્ષ્મીહૃદયકં સ્તોત્રં સર્વકામપ્રકાશિતમ્ ॥ 25 ॥

તદ્વજ્જપાદિકં કુર્યાદેતત્સંકલિતં શુભમ્ ।
સર્વાન્કામાનવાપ્નોતિ આધિવ્યાધિભયં હરેત્ ॥ 26 ॥

ગોપ્યમેતત્સદા કુર્યાન્ન સર્વત્ર પ્રકાશયેત્ ।
ઇતિ ગુહ્યતમં શાસ્ત્રં પ્રાપ્તં બ્રહ્માદિકૈઃ પુરા ॥ 27 ॥

તસ્માત્સર્વપ્રયત્નેન ગોપયેત્સાધયેસુધીઃ ।
યત્રૈતત્પુસ્તકં તિષ્ઠેલ્લક્ષ્મીનારાયણાત્મકમ્ ॥ 28 ॥

ભૂતપૈશાચવેતાળ ભયં નૈવ તુ સર્વદા ।
લક્ષ્મીહૃદયકં પ્રોક્તં વિધિના સાધયેત્સુધીઃ ॥ 29 ॥

ભૃગુવારે ચ રાત્રૌ ચ પૂજયેત્પુસ્તકદ્વયમ્ ।
સર્વથા સર્વદા સત્યં ગોપયેત્સાધયેત્સુધીઃ ।
ગોપનાત્સાધનાલ્લોકે ધન્યો ભવતિ તત્ત્વતઃ ॥ 30 ॥

ઇત્યથર્વરહસ્યે ઉત્તરભાગે નારાયણહૃદયં સંપૂર્ણમ્ ।