𑌶𑍍𑌰𑍀 𑌦𑍁𑌰𑍍𑌗𑌾 𑌸𑌪𑍍𑌤 𑌶𑍍𑌲𑍋𑌕𑍀

𑌶𑌿𑌵 𑌉𑌵𑌾𑌚 ।
𑌦𑍇𑌵𑍀 𑌤𑍍𑌵𑌂 𑌭𑌕𑍍𑌤𑌸𑍁𑌲𑌭𑍇 𑌸𑌰𑍍𑌵𑌕𑌾𑌰𑍍𑌯𑌵𑌿𑌧𑌾𑌯𑌿𑌨𑌿 ।
𑌕𑌲𑍌 𑌹𑌿 𑌕𑌾𑌰𑍍𑌯𑌸𑌿𑌦𑍍𑌧𑍍𑌯𑌰𑍍𑌥𑌮𑍁𑌪𑌾𑌯𑌂 𑌬𑍍𑌰𑍂𑌹𑌿 𑌯𑌤𑍍𑌨𑌤𑌃 ॥

𑌦𑍇𑌵𑍍𑌯𑍁𑌵𑌾𑌚 ।
𑌶𑍃𑌣𑍁 𑌦𑍇𑌵 𑌪𑍍𑌰𑌵𑌕𑍍𑌷𑍍𑌯𑌾𑌮𑌿 𑌕𑌲𑍌 𑌸𑌰𑍍𑌵𑍇𑌷𑍍𑌟𑌸𑌾𑌧𑌨𑌮𑍍 ।
𑌮𑌯𑌾 𑌤𑌵𑍈𑌵 𑌸𑍍𑌨𑍇𑌹𑍇𑌨𑌾𑌪𑍍𑌯𑌂𑌬𑌾𑌸𑍍𑌤𑍁𑌤𑌿𑌃 𑌪𑍍𑌰𑌕𑌾𑌶𑍍𑌯𑌤𑍇 ॥

𑌅𑌸𑍍𑌯 𑌶𑍍𑌰𑍀 𑌦𑍁𑌰𑍍𑌗𑌾 𑌸𑌪𑍍𑌤𑌶𑍍𑌲𑍋𑌕𑍀 𑌸𑍍𑌤𑍋𑌤𑍍𑌰𑌮𑌂𑌤𑍍𑌰𑌸𑍍𑌯 𑌨𑌾𑌰𑌾𑌯𑌣 𑌋𑌷𑌿𑌃, 𑌅𑌨𑍁𑌷𑍍𑌟𑍁𑌪𑍍 𑌛𑌂𑌦𑌃, 𑌶𑍍𑌰𑍀 𑌮𑌹𑌾𑌕𑌾𑌳𑍀 𑌮𑌹𑌾𑌲𑌕𑍍𑌷𑍍𑌮𑍀 𑌮𑌹𑌾𑌸𑌰𑌸𑍍𑌵𑌤𑍍𑌯𑍋 𑌦𑍇𑌵𑌤𑌾𑌃, 𑌶𑍍𑌰𑍀 𑌦𑍁𑌰𑍍𑌗𑌾 𑌪𑍍𑌰𑍀𑌤𑍍𑌯𑌰𑍍𑌥𑌂 𑌸𑌪𑍍𑌤𑌶𑍍𑌲𑍋𑌕𑍀 𑌦𑍁𑌰𑍍𑌗𑌾𑌪𑌾𑌠𑍇 𑌵𑌿𑌨𑌿𑌯𑍋𑌗𑌃 ।

𑌜𑍍𑌞𑌾𑌨𑌿𑌨𑌾𑌮𑌪𑌿 𑌚𑍇𑌤𑌾𑌂𑌸𑌿 𑌦𑍇𑌵𑍀 𑌭𑌗𑌵𑌤𑍀 𑌹𑌿 𑌸𑌾 ।
𑌬𑌲𑌾𑌦𑌾𑌕𑍃𑌷𑍍𑌯 𑌮𑍋𑌹𑌾𑌯 𑌮𑌹𑌾𑌮𑌾𑌯𑌾 𑌪𑍍𑌰𑌯𑌚𑍍𑌛𑌤𑌿 ॥ 1 ॥

𑌦𑍁𑌰𑍍𑌗𑍇 𑌸𑍍𑌮𑍃𑌤𑌾 𑌹𑌰𑌸𑌿 𑌭𑍀𑌤𑌿𑌮𑌶𑍇𑌷𑌜𑌂𑌤𑍋𑌃
𑌸𑍍𑌵𑌸𑍍𑌥𑍈𑌃 𑌸𑍍𑌮𑍃𑌤𑌾 𑌮𑌤𑌿𑌮𑌤𑍀𑌵 𑌶𑍁𑌭𑌾𑌂 𑌦𑌦𑌾𑌸𑌿 ।
𑌦𑌾𑌰𑌿𑌦𑍍𑌰𑍍𑌯𑌦𑍁𑌃𑌖 𑌭𑌯𑌹𑌾𑌰𑌿𑌣𑌿 𑌕𑌾 𑌤𑍍𑌵𑌦𑌨𑍍𑌯𑌾
𑌸𑌰𑍍𑌵𑍋𑌪𑌕𑌾𑌰𑌕𑌰𑌣𑌾𑌯 𑌸𑌦𑌾𑌰𑍍𑌦𑍍𑌰 𑌚𑌿𑌤𑍍𑌤𑌾 ॥ 2 ॥

𑌸𑌰𑍍𑌵𑌮𑌂𑌗𑌳𑌮𑌾𑌂𑌗𑌳𑍍𑌯𑍇 𑌶𑌿𑌵𑍇 𑌸𑌰𑍍𑌵𑌾𑌰𑍍𑌥𑌸𑌾𑌧𑌿𑌕𑍇 ।
𑌶𑌰𑌣𑍍𑌯𑍇 𑌤𑍍𑌰𑍍𑌯𑌂𑌬𑌕𑍇 𑌗𑍌𑌰𑍀 𑌨𑌾𑌰𑌾𑌯𑌣𑌿 𑌨𑌮𑍋𑌽𑌸𑍍𑌤𑍁 𑌤𑍇 ॥ 3 ॥

𑌶𑌰𑌣𑌾𑌗𑌤𑌦𑍀𑌨𑌾𑌰𑍍𑌤𑌪𑌰𑌿𑌤𑍍𑌰𑌾𑌣𑌪𑌰𑌾𑌯𑌣𑍇 ।
𑌸𑌰𑍍𑌵𑌸𑍍𑌯𑌾𑌰𑍍𑌤𑌿𑌹𑌰𑍇 𑌦𑍇𑌵𑌿 𑌨𑌾𑌰𑌾𑌯𑌣𑌿 𑌨𑌮𑍋𑌽𑌸𑍍𑌤𑍁 𑌤𑍇 ॥ 4 ॥

𑌸𑌰𑍍𑌵𑌸𑍍𑌵𑌰𑍂𑌪𑍇 𑌸𑌰𑍍𑌵𑍇𑌶𑍇 𑌸𑌰𑍍𑌵𑌶𑌕𑍍𑌤𑌿𑌸𑌮𑌨𑍍𑌵𑌿𑌤𑍇 ।
𑌭𑌯𑍇𑌭𑍍𑌯𑌸𑍍𑌤𑍍𑌰𑌾𑌹𑌿 𑌨𑍋 𑌦𑍇𑌵𑌿 𑌦𑍁𑌰𑍍𑌗𑍇 𑌦𑍇𑌵𑌿 𑌨𑌮𑍋𑌽𑌸𑍍𑌤𑍁 𑌤𑍇 ॥ 5 ॥

𑌰𑍋𑌗𑌾𑌨𑌶𑍇𑌷𑌾𑌨𑌪𑌹𑌂𑌸𑌿 𑌤𑍁𑌷𑍍𑌟𑌾-
𑌰𑍁𑌷𑍍𑌟𑌾 𑌤𑍁 𑌕𑌾𑌮𑌾𑌨𑍍 𑌸𑌕𑌲𑌾𑌨𑌭𑍀𑌷𑍍𑌟𑌾𑌨𑍍 ।
𑌤𑍍𑌵𑌾𑌮𑌾𑌶𑍍𑌰𑌿𑌤𑌾𑌨𑌾𑌂 𑌨 𑌵𑌿𑌪𑌨𑍍𑌨𑌰𑌾𑌣𑌾𑌂
𑌤𑍍𑌵𑌾𑌮𑌾𑌶𑍍𑌰𑌿𑌤𑌾 𑌹𑍍𑌯𑌾𑌶𑍍𑌰𑌯𑌤𑌾𑌂 𑌪𑍍𑌰𑌯𑌾𑌂𑌤𑌿 ॥ 6 ॥

𑌸𑌰𑍍𑌵𑌬𑌾𑌧𑌾𑌪𑍍𑌰𑌶𑌮𑌨𑌂 𑌤𑍍𑌰𑍈𑌲𑍋𑌕𑍍𑌯𑌸𑍍𑌯𑌾𑌖𑌿𑌲𑍇𑌶𑍍𑌵𑌰𑌿 ।
𑌏𑌵𑌮𑍇𑌵 𑌤𑍍𑌵𑌯𑌾 𑌕𑌾𑌰𑍍𑌯𑌮𑌸𑍍𑌮𑌦𑍍𑌵𑍈𑌰𑌿 𑌵𑌿𑌨𑌾𑌶𑌨𑌮𑍍 ॥ 𑍭 ॥

𑌇𑌤𑌿 𑌶𑍍𑌰𑍀 𑌦𑍁𑌰𑍍𑌗𑌾 𑌸𑌪𑍍𑌤𑌶𑍍𑌲𑍋𑌕𑍀 ।