সরস্বতী কবচম্

(ব্রহ্মবৈবর্ত মহাপুরাণাংতর্গতং)

ভৃগুরুবাচ ।
ব্রহ্মন্ব্রহ্মবিদাংশ্রেষ্ঠ ব্রহ্মজ্ঞানবিশারদ ।
সর্বজ্ঞ সর্বজনক সর্বপূজকপূজিত ॥ 60

সরস্বত্যাশ্চ কবচং ব্রূহি বিশ্বজযং প্রভো ।
অযাতযামমংত্রাণাং সমূহো যত্র সংযুতঃ ॥ 61 ॥

ব্রহ্মোবাচ ।
শৃণু বত্স প্রবক্ষ্যামি কবচং সর্বকামদম্ ।
শ্রুতিসারং শ্রুতিসুখং শ্রুত্যুক্তং শ্রুতিপূজিতম্ ॥ 62 ॥

উক্তং কৃষ্ণেন গোলোকে মহ্যং বৃংদাবনে বনে ।
রাসেশ্বরেণ বিভুনা রাসে বৈ রাসমংডলে ॥ 63 ॥

অতীব গোপনীযংচ কল্পবৃক্ষসমং পরম্ ।
অশ্রুতাদ্ভুতমংত্রাণাং সমূহৈশ্চ সমন্বিতম্ ॥ 64 ॥

যদ্ধৃত্বা পঠনাদ্ব্রহ্মন্বুদ্ধিমাংশ্চ বৃহস্পতিঃ ।
যদ্ধৃত্বা ভগবাংছুক্রঃ সর্বদৈত্যেষু পূজিতঃ ॥ 65 ॥

পঠনাদ্ধারণাদ্বাগ্মী কবীংদ্রো বাল্মিকী মুনিঃ ।
স্বাযংভুবো মনুশ্চৈব যদ্ধৃত্বা সর্বপূজিতাঃ ॥ 66 ॥

কণাদো গৌতমঃ কণ্বঃ পাণিনিঃ শাকটাযনঃ ।
গ্রংথং চকার যদ্ধৃত্বা দক্ষঃ কাত্যাযনঃ স্বযম্ ॥ 67 ॥

ধৃত্বা বেদবিভাগংচ পুরাণান্যখিলানি চ ।
চকার লীলামাত্রেণ কৃষ্ণদ্বৈপাযনঃ স্বযম্ ॥ 68 ॥

শাতাতপশ্চ সংবর্তো বসিষ্ঠশ্চ পরাশরঃ ।
যদ্ধৃত্বা পঠনাদ্গ্রংথং যাজ্ঞবল্ক্যশ্চকার সঃ ॥ 69 ॥

ঋষ্যশৃংগো ভরদ্বাজশ্চাস্তীকো দেবলস্তথা ।
জৈগীষব্যোঽথ জাবালির্যদ্ধৃত্বা সর্বপূজিতঃ ॥ 70 ॥

কবচস্যাস্য বিপ্রেংদ্র ঋষিরেষ প্রজাপতিঃ ।
স্বযং বৃহস্পতিশ্ছংদো দেবো রাসেশ্বরঃ প্রভুঃ ॥ 71 ॥

সর্বতত্ত্বপরিজ্ঞানে সর্বার্থেঽপি চ সাধনে ।
কবিতাসু চ সর্বাসু বিনিযোগঃ প্রকীর্তিতঃ ॥ 72 ॥

( কবচং )
ওং হ্রীং সরস্বত্যৈ স্বাহা শিরো মে পাতু সর্বতঃ ।
শ্রীং বাগ্দেবতাযৈ স্বাহা ভালং মে সর্বদাঽবতু ॥ 73 ॥

ওং হ্রীং সরস্বত্যৈ স্বাহেতি শ্রোত্রে পাতু নিরংতরম্ ।
ওং শ্রীং হ্রীং ভগবত্যৈ সরস্বত্যৈ স্বাহা নেত্রযুগ্মং সদাঽবতু ॥ 74 ॥

ঐং হ্রীং বাগ্বাদিন্যৈ স্বাহা নাসাং মে সর্বদাঽবতু ।
হ্রীং বিদ্যাধিষ্ঠাতৃদেব্যৈ স্বাহা চোংষ্ঠ সদাঽবতু ॥ 75 ॥

ওং শ্রীং হ্রীং ব্রাহ্ম্যৈ স্বাহেতি দংতপংক্তিং সদাঽবতু ।
ঐমিত্যেকাক্ষরো মংত্রো মম কংঠং সদাঽবতু ॥ 76 ॥

ওং শ্রীং হ্রীং পাতু মে গ্রীবাং স্কংধং মে শ্রীং সদাঽবতু ।
ওং হ্রীং বিদ্যাধিষ্ঠাতৃদেব্যৈ স্বাহা বক্ষঃ সদাঽবতু ॥ 77 ॥

ওং হ্রীং বিদ্যাস্বরূপাযৈ স্বাহা মে পাতু নাভিকাম্ ।
ওং হ্রীং ক্লীং বাণ্যৈ স্বাহেতি মম পৃষ্ঠং সদাঽবতু ॥ 78 ॥

ওং সর্ববর্ণাত্মিকাযৈ পাদযুগ্মং সদাঽবতু ।
ওং রাগাধিষ্ঠাতৃদেব্যৈ সর্বাংগং মে সদাঽবতু ॥ 79 ॥

ওং সর্বকংঠবাসিন্যৈ স্বাহা প্রচ্যাং সদাঽবতু ।
ওং হ্রীং জিহ্বাগ্রবাসিন্যৈ স্বাহাঽগ্নিদিশি রক্ষতু ॥ 80 ॥

ওং ঐং হ্রীং শ্রীং সরস্বত্যৈ বুধজনন্যৈ স্বাহা ।
সততং মংত্ররাজোঽযং দক্ষিণে মাং সদাঽবতু ॥ 81 ॥

ওং হ্রীং শ্রীং ত্র্যক্ষরো মংত্রো নৈরৃত্যাং মে সদাঽবতু ।
কবিজিহ্বাগ্রবাসিন্যৈ স্বাহা মাং বারুণেঽবতু ॥ 82 ॥

ওং সদংবিকাযৈ স্বাহা বাযব্যে মাং সদাঽবতু ।
ওং গদ্যপদ্যবাসিন্যৈ স্বাহা মামুত্তরেঽবতু ॥ 83 ॥

ওং সর্বশাস্ত্রবাসিন্যৈ স্বাহৈশান্যাং সদাঽবতু ।
ওং হ্রীং সর্বপূজিতাযৈ স্বাহা চোর্ধ্বং সদাঽবতু ॥ 84 ॥

ঐং হ্রীং পুস্তকবাসিন্যৈ স্বাহাঽধো মাং সদাবতু ।
ওং গ্রংথবীজরূপাযৈ স্বাহা মাং সর্বতোঽবতু ॥ 85 ॥

ইতি তে কথিতং বিপ্র সর্বমংত্রৌঘবিগ্রহম্ ।
ইদং বিশ্বজযং নাম কবচং ব্রহ্মারূপকম্ ॥ 86 ॥

পুরা শ্রুতং ধর্মবক্ত্রাত্পর্বতে গংধমাদনে ।
তব স্নেহান্মযাঽঽখ্যাতং প্রবক্তব্যং ন কস্যচিত্ ॥ 87 ॥

গুরুমভ্যর্চ্য বিধিবদ্বস্ত্রালংকারচংদনৈঃ ।
প্রণম্য দংডবদ্ভূমৌ কবচং ধারযেত্সুধীঃ ॥ 88 ॥

পংচলক্ষজপেনৈব সিদ্ধং তু কবচং ভবেত্ ।
যদি স্যাত্সিদ্ধকবচো বৃহস্পতি সমো ভবেত্ ॥ 89 ॥

মহাবাগ্মী কবীংদ্রশ্চ ত্রৈলোক্যবিজযী ভবেত্ ।
শক্নোতি সর্বং জেতুং স কবচস্য প্রভাবতঃ ॥ 90 ॥

ইদং তে কাণ্বশাখোক্তং কথিতং কবচং মুনে ।
স্তোত্রং পূজাবিধানং চ ধ্যানং বৈ বংদনং তথা ॥ 91 ॥

ইতি শ্রী ব্রহ্মবৈবর্তে মহাপুরাণে প্রকৃতিখংডে নারদনারাযণসংবাদে সরস্বতীকবচং নাম চতুর্থোঽধ্যাযঃ ।