శ్రీ సాంబ సదాశివ అక్షరమాలా స్తోత్రం (మాతృక వర్ణమాలికా స్తోత్రం)

సాంబసదాశివ సాంబసదాశివ సాంబసదాశివ సాంబశివ ॥

అద్భుతవిగ్రహ అమరాధీశ్వర అగణితగుణగణ అమృతశివ ॥

ఆనందామృత ఆశ్రితరక్షక ఆత్మానంద మహేశ శివ ॥

ఇందుకళాధర ఇంద్రాదిప్రియ సుందరరూప సురేశ శివ ॥

ఈశ సురేశ మహేశ జనప్రియ కేశవసేవితపాద శివ ॥

ఉరగాదిప్రియభూషణ శంకర నరకవినాశ నటేశ శివ ॥

ఊర్జితదానవనాశ పరాత్పర ఆర్జితపాపవినాశ శివ ॥

ఋగ్వేదశ్రుతిమౌళివిభూషణ రవిచంద్రాగ్ని త్రినేత్ర శివ ॥

ౠపమనాది ప్రపంచవిలక్షణ తాపనివారణ తత్త్వ శివ ॥

లింగస్వరూప సర్వబుధప్రియ మంగళమూర్తి మహేశ శివ ॥

లూతాధీశ్వర రూపప్రియశివ వేదాంతప్రియవేద్య శివ ॥

ఏకానేకస్వరూప విశ్వేశ్వర యోగిహృదిప్రియవాస శివ ॥

ఐశ్వర్యాశ్రయ చిన్మయ చిద్ఘన అచ్యుతానంత మహేశ శివ ॥

ఓంకారప్రియ ఉరగవిభూషణ హ్రీంకారాది మహేశ శివ ॥

ఔరసలాలిత అంతకనాశన గౌరిసమేత గిరీశ శివ ॥

అంబరవాస చిదంబరనాయక తుంబురునారదసేవ్య శివ ॥

ఆహారప్రియ ఆదిగిరీశ్వర భోగాదిప్రియ పూర్ణ శివ ॥

కమలాక్షార్చిత కైలాసప్రియ కరుణాసాగర కాంతి శివ ॥

ఖడ్గశూలమృగఢక్కాద్యాయుధ విక్రమరూప విశ్వేశ శివ ॥

గంగాగిరిసుతవల్లభ గుణహిత శంకర సర్వజనేశ శివ ॥

ఘాతకభంజన పాతకనాశన గౌరిసమేత గిరీశ శివ ॥

ఙఙాశ్రితశ్రుతిమౌళివిభూషణ వేదస్వరూప విశ్వేశ శివ ॥

చండవినాశన సకలజనప్రియ మండలాధీశ మహేశ శివ ॥

ఛత్రకిరీటసుకుండలశోభిత పుత్రప్రియ భువనేశ శివ ॥

జన్మజరామృతినాశన కల్మషరహిత తాపవినాశ శివ ॥

ఝంకారాశ్రయ భృంగిరిటిప్రియ ఓంకారేశ మహేశ శివ ॥

జ్ఞానాజ్ఞానవినాశక నిర్మల దీనజనప్రియ దీప్త శివ ॥

టంకాద్యాయుధధారణ సత్వర హ్రీంకారైది సురేశ శివ ॥

ఠంకస్వరూపా సహకారోత్తమ వాగీశ్వర వరదేశ శివ ॥

డంబవినాశన డిండిమభూషణ అంబరవాస చిదీశ శివ ॥

ఢంఢండమరుక ధరణీనిశ్చల ఢుంఢివినాయకసేవ్య శివ ॥

ణళినవిలోచన నటనమనోహర అలికులభూషణ అమృత శివ ॥

తత్త్వమసీత్యాది వాక్యస్వరూపక నిత్యానంద మహేశ శివ ॥

స్థావర జంగమ భువనవిలక్షణ భావుకమునివరసేవ్య శివ ॥

దుఃఖవినాశన దలితమనోన్మన చందనలేపితచరణ శివ ॥

ధరణీధర శుభ ధవళవిభాస్వర ధనదాదిప్రియదాన శివ ॥

నానామణిగణభూషణ నిర్గుణ నటనజనసుప్రియనాట్య శివ ॥

పన్నగభూషణ పార్వతినాయక పరమానంద పరేశ శివ ॥

ఫాలవిలోచన భానుకోటిప్రభ హాలాహలధర అమృత శివ ॥

బంధవినాశన బృహదీశామరస్కందాదిప్రియ కనక శివ ॥

భస్మవిలేపన భవభయనాశన విస్మయరూప విశ్వేశ శివ ॥

మన్మథనాశన మధుపానప్రియ మందరపర్వతవాస శివ ॥

యతిజనహృదయనివాసిత ఈశ్వర విధివిష్ణ్వాది సురేశ శివ ॥

రామేశ్వర రమణీయముఖాంబుజ సోమేశ్వర సుకృతేశ శివ ॥

లంకాధీశ్వర సురగణసేవిత లావణ్యామృతలసిత శివ ॥

వరదాభయకర వాసుకిభూషణ వనమాలాదివిభూష శివ ॥

శాంతిస్వరూప జగత్త్రయ చిన్మయ కాంతిమతీప్రియ కనక శివ ॥

షణ్ముఖజనక సురేంద్రమునిప్రియ షాడ్గుణ్యాదిసమేత శివ ॥

సంసారార్ణవనాశన శాశ్వతసాధుహృదిప్రియవాస శివ ॥

హర పురుషోత్తమ అద్వైతామృతపూర్ణ మురారిసుసేవ్య శివ ॥

ళాళితభక్తజనేశ నిజేశ్వర కాళినటేశ్వర కామ శివ ॥

క్షరరూపాదిప్రియాన్విత సుందర సాక్షిజగత్త్రయ స్వామి శివ ॥

సాంబసదాశివ సాంబసదాశివ సాంబసదాశివ సాంబశివ ॥

ఇతి శ్రీసాంబసదాశివ మాతృకావర్ణమాలికా స్తోత్రమ్ ।