లక్ష్మీ నిత్య పూజా విధానం

ఆవశ్యకాని వస్తూని
– ఆసనం
– దీపః
– గంధః
– కుంకుమం
– అక్షతాః
– పుష్పాణి
– ధూపః
– నైవేద్యం
– తాంబూలం
– ఆచమనీయం
– పూజా పాత్రం
– కలశః
– శంఖః [optional]
– లక్ష్మీ దేవీ ప్రతిమా వా చిత్రపటః వా

పూర్వాంగ పూజా
శ్రీమహాగణాధిపతయే నమః ।
శ్రీ గురుభ్యో నమః ।
హరిః ఓమ్ ।

శుచిః
అపవిత్రః పవిత్రో వా సర్వావస్థాం గతోఽపి వా ।
యః స్మరేత్ పుండరీకాక్షం స బాహ్యాభ్యంతరః శుచిః ॥
పుండరీకాక్ష పుండరీకాక్ష పుండరీకాక్షాయ నమః ॥

ప్రార్థనా
శుక్లాంబరధరం విష్ణుం శశివర్ణం చతుర్భుజమ్ ।
ప్రసన్నవదనం ధ్యాయేత్ సర్వవిఘ్నోపశాంతయే ॥

అగజానన పద్మార్కం గజాననమహర్నిశమ్ ।
అనేకదం తం భక్తానాం ఏకదంతముపాస్మహే ॥

తదేవ లగ్నం సుదినం తదేవ
తారాబలం చంద్రబలం తదేవ ।
విద్యాబలం దైవబలం తదేవ
లక్ష్మీపతే తేఽంఘ్రియుగం స్మరామి ॥

గురుర్బ్రహ్మా గురుర్విష్ణుః గురుర్దేవో మహేశ్వరః ।
గురుః సాక్షాత్ పరబ్రహ్మ తస్మై శ్రీగురవే నమః ॥

సర్వమంగళ మాంగళ్యే శివే సర్వార్థసాధికే ।
శరణ్యే త్ర్యంబకే గౌరీ నారాయణి నమోఽస్తు తే ॥

శ్రీలక్ష్మీనారాయణాభ్యాం నమః ।
ఉమామహేశ్వరాభ్యాం నమః ।
వాణీహిరణ్యగర్భాభ్యాం నమః ।
శచీపురందరాభ్యాం నమః ।
అరుంధతీవసిష్ఠాభ్యాం నమః ।
శ్రీసీతారామాభ్యాం నమః ।
మాతాపితృభ్యో నమః ।
సర్వేభ్యో మహాజనేభ్యో నమః ।

ఆచమనం
ఓం కేశవాయ స్వాహా ।
ఓం నారాయణాయ స్వాహా ।
ఓం మాధవాయ స్వాహా ।
ఓం గోవిందాయ నమః ।
ఓం విష్ణవే నమః ।
ఓం మధుసూదనాయ నమః ।
ఓం త్రివిక్రమాయ నమః ।
ఓం వామనాయ నమః ।
ఓం శ్రీధరాయ నమః ।
ఓం హృషీకేశాయ నమః ।
ఓం పద్మనాభాయ నమః ।
ఓం దామోదరాయ నమః ।
ఓం సంకర్షణాయ నమః ।
ఓం వాసుదేవాయ నమః ।
ఓం ప్రద్యుమ్నాయ నమః ।
ఓం అనిరుద్ధాయ నమః ।
ఓం పురుషోత్తమాయ నమః ।
ఓం అధోక్షజాయ నమః ।
ఓం నారసింహాయ నమః ।
ఓం అచ్యుతాయ నమః ।
ఓం జనార్దనాయ నమః ।
ఓం ఉపేంద్రాయ నమః ।
ఓం హరయే నమః ।
ఓం శ్రీకృష్ణాయ నమః ।

దీపారాధనం
దీపస్త్వం బ్రహ్మరూపోఽసి జ్యోతిషాం ప్రభురవ్యయః ।
సౌభాగ్యం దేహి పుత్రాంశ్చ సర్వాన్కామాంశ్చ దేహి మే ॥
భో దీప దేవి రూపస్త్వం కర్మసాక్షీ హ్యవిఘ్నకృత్ ।
యావత్పూజాం కరిష్యామి తావత్త్వం సుస్థిరో భవ ॥
దీపారాధన ముహూర్తః సుముహూర్తోఽస్తు ॥

భూతోచ్చాటనం
ఉత్తిష్ఠంతు భూతపిశాచాః య ఏతే భూమిభారకాః ।
ఏతేషామవిరోధేన బ్రహ్మకర్మ సమారభే ॥
అపసర్పంతు తే భూతా యే భూతా భూమిసంస్థితాః ।
యే భూతా విఘ్నకర్తారస్తే గచ్ఛంతు శివాఽజ్ఞయా ॥

ప్రాణాయామః

ఓం భూః । ఓం భువః॑ । ఓగ్ం సువః॑ । ఓం మహః॑ । ఓం జనః॑ । ఓం తపః॑ । ఓగ్ం సత్యమ్ ।
ఓం తత్స॑వి॒తుర్వరే᳚ణ్యం॒ భర్గో॑ దే॒వస్య॑ ధీమహి ।
ధియో॒ యో నః॑ ప్రచో॒దయా᳚త్ ॥
ఓమాపో॒ జ్యోతీ॒ రసో॒ఽమృతం॒ బ్రహ్మ॒ భూర్భువ॒స్సువ॒రోమ్ ॥

సంకల్పః
మమ ఉపాత్త సమస్త దురితక్షయ ద్వారా శ్రీపరమేశ్వర ప్రీత్యర్థం, మమ/అస్మాకం సహకుటుంబస్య క్షేమ-స్థైర్య-ధైర్య-వీర్య-విజయ-అభయ-ఆయుః-ఆరోగ్య-ఐశ్వర్య-అభివృద్ధ్యర్థం, ధర్మార్థ-కామ-మోక్ష-చతుర్విధ-పురుషార్థ-ఫల-సిద్ధ్యర్థం, సర్వాభీష్ట-సిద్ధ్యర్థం, శ్రీమహాలక్ష్మీ-ప్రీత్యర్థం, యావచ్ఛక్తి ధ్యాన-ఆవాహనాది-షోడశోపచార-పూజాం కరిష్యే ॥

తదంగ కలశారాధనం కరిష్యే ॥

కలశారాధనం
కలశే గంధ పుష్పాక్షతైరభ్యర్చ్య ।
కలశే ఉదకం పూరయిత్వా ।
కలశస్యోపరి హస్తం నిధాయ ।

కలశస్య ముఖే విష్ణుః కంఠే రుద్రః సమాశ్రితః ।
మూలే త్వస్య స్థితో బ్రహ్మా మధ్యే మాతృగణాః స్మృతాః ॥
కుక్షౌ తు సాగరాః సర్వే సప్తద్వీపా వసుంధరా ।
ఋగ్వేదోఽథ యజుర్వేదో సామవేదో హ్యథర్వణః ॥
అంగైశ్చ సహితాః సర్వే కలశాంబు సమాశ్రితాః ॥

గంగే చ యమునే చైవ గోదావరీ సరస్వతీ ।
నర్మదే సింధు కావేరీ జలేఽస్మిన్ సన్నిధిం కురు ॥
కావేరీ తుంగభద్రా చ కృష్ణవేణీ చ గౌతమీ ।
భాగీరథీతి విఖ్యాతాః పంచగంగాః ప్రకీర్తితాః ॥

ఆయాంతు దేవపూజార్థం మమ దురితక్షయకారకాః ।
కలశోదకేన పూజా ద్రవ్యాణి సంప్రోక్ష్య, దేవం సంప్రోక్ష్య, ఆత్మానం చ సంప్రోక్ష్య ॥

శంఖపూజా
శంఖం చంద్రార్క దైవతం మధ్యే వరుణ దేవతామ్ ।
పృష్ఠే ప్రజాపతిం వింద్యాదగ్రే గంగా సరస్వతీమ్ ॥
త్రైలోక్యే యాని తీర్థాని వాసుదేవస్య ఆజ్ఞయా ।
శంఖే తిష్ఠంతు విప్రేంద్రాః తస్మాత్ శంఖం ప్రపూజయేత్ ॥

ఓం శంఖాయ నమః ।
ఓం ధవళాయ నమః ।
ఓం పాంచజన్యాయ నమః ।
ఓం శంఖదేవతాభ్యో నమః ।
సకలపూజార్థే అక్షతాన్ సమర్పయామి ॥

ఘంటానాదః
ఆగమార్థం తు దేవానాం గమనార్థం తు రాక్షసామ్ ।
ఘంటారవం కరోమ్యాదౌ దేవతాహ్వాన లాంఛనమ్ ॥
ఓం ఘంటాదేవతాభ్యో నమః ।
సకలోపచార పూజార్థే అక్షతాన్ సమర్పయామి ॥

శ్రీ మహాగణపతి పూజా

ఓం గ॒ణానాం᳚ త్వా గ॒ణప॑తిగ్ం హవామహే క॒విం క॑వీ॒నాం ఉప॒మశ్ర॑వస్తవమ్ ।
జ్యే॒ష్ఠ॒రాజం॒ బ్రహ్మ॑ణాం బ్రహ్మణస్పత॒ ఆ నః॑ శృ॒ణ్వన్నూ॒తిభి॑స్సీద॒ సాద॑నమ్ ॥

సుముఖశ్చైకదంతశ్చ కపిలో గజకర్ణకః ।
లంబోదరశ్చ వికటో విఘ్నరాజో గణాధిపః ॥
ధూమకేతుర్గణాధ్యక్షః ఫాలచంద్రో గజాననః ।
వక్రతుండః శూర్పకర్ణో హేరంబః స్కందపూర్వజః ॥

ఓం శ్రీమహాగణపతయే నమః ।
ధ్యాయామి । ఆవాహయామి । ఆసనం సమర్పయామి ।
పాద్యం సమర్పయామి । అర్ఘ్యం సమర్పయామి । ఆచమనీయం సమర్పయామి ।
స్నానం సమర్పయామి । వస్త్రం సమర్పయామి । యజ్ఞోపవీతం సమర్పయామి ।
గంధం సమర్పయామి । పుష్పాణి సమర్పయామి ।
ధూపమాఘ్రాపయామి । దీపం దర్శయామి ।
నైవేద్యం సమర్పయామి । తాంబూలం సమర్పయామి ।
నీరాజనం సమర్పయామి । మంత్రపుష్పం సమర్పయామి ।
ప్రదక్షిణ నమస్కారాన్ సమర్పయామి ॥

షోడశోపచార పూజా
లక్ష్మీ దేవీ ధ్యానం
యా సా పద్మాసనస్థా విపులకటితటీ పద్మపత్రాయతాక్షీ ।
గంభీరావర్తనాభిః స్తనభర నమితా శుభ్ర వస్త్రోత్తరీయా ॥
లక్ష్మీర్దివ్యైర్గజేంద్రైర్మణిగణ ఖచితైః స్నాపితా హేమకుంభైః ।
నిత్యం సా పద్మహస్తా మమ వసతు గృహే సర్వమాంగల్యయుక్తా ॥

లక్ష్మీం క్షీరసముద్రరాజతనయాం శ్రీరంగధామేశ్వరీమ్ ।
దాసీభూతసమస్తదేవ వనితాం లోకైక దీపాంకురామ్ ॥
శ్రీమన్మందకటాక్షలబ్ధ విభవ బ్రహ్మేంద్రగంగాధరామ్ ।
త్వాం త్రైలోక్య కుటుంబినీం సరసిజాం వందే ముకుందప్రియామ్ ॥

ఓమ్ ॥ హిర॑ణ్యవర్ణాం॒ హరి॑ణీం సు॒వర్ణ॑రజ॒తస్ర॑జామ్ ।
చం॒ద్రాం హి॒రణ్మ॑యీం-లఀ॒క్ష్మీం జాత॑వేదో మ॒మావ॑హ ॥

ఓం శ్రీమహాలక్ష్మ్యై నమః ।
ధ్యాయామి । ధ్యానం సమర్పయామి ॥

ఆవాహనం

తాం మ॒ ఆవ॑హ॒ జాత॑వేదో ల॒క్ష్మీమన॑పగా॒మినీ᳚మ్ ।
యస్యాం॒ హిర॑ణ్యం-విఀం॒దేయం॒ గామశ్వం॒ పురు॑షాన॒హమ్ ॥

సహస్రదలపద్మస్థాం స్వస్థాం చ సుమనోహరామ్ ।
శాంతాం చ శ్రీహరేః కాంతాం తాం భజే జగతాం ప్రసూమ్ ॥
ఓం శ్రీమహాలక్ష్మ్యై నమః ।
ఆవాహయామి । స్థాపయామి । పూజయామి ॥

ఆసనం
అమూల్యరత్నఖచితం నిర్మితం విశ్వకర్మణా ।
ఆసనం చ విచిత్రం చ మహాలక్ష్మి ప్రగృహ్యతామ్ ॥
ఓం శ్రీమహాలక్ష్మ్యై నమః ।
ఆసనం సమర్పయామి ॥

పాద్యం
అశ్వపూర్వాం రథమధ్యాం హస్తినాద ప్రబోధినీమ్ ।
శ్రియం దేవీముపహ్వయే శ్రీర్మా దేవీర్జుషతామ్ ॥
పుష్పచందనదూర్వాది సంయుతం జాహ్నవీజలమ్ ।
శంఖగర్భస్థితం శుద్ధం గృహ్యతాం పద్మవాసిని ॥
ఓం శ్రీమహాలక్ష్మ్యై నమః ।
పాదయోః పాద్యం సమర్పయామి ॥

అర్ఘ్యం
గంధ పుష్పాక్షతైర్యుక్తం అర్ఘ్యం సంపాదితం మయా ।
గృహాణ త్వం మహాలక్ష్మి ప్రసన్నా భవ సర్వదా ॥
ఓం శ్రీమహాలక్ష్మ్యై నమః ।
హస్తయోః అర్ఘ్యం సమర్పయామి ॥

ఆచమనీయం
పుణ్యతీర్థోదకం చైవ విశుద్ధం శుద్ధిదం సదా ।
గృహ్యతాం కృష్ణకాంతే త్వం రమ్యమాచమనీయకమ్ ॥
ఓం శ్రీమహాలక్ష్మ్యై నమః ।
ముఖే ఆచమనీయం సమర్పయామి ॥

స్నానం

ఆపో॒ హిష్ఠా మ॑యో॒భువ॒స్తా న॑ ఊ॒ర్జే ద॑ధాతన ।
మ॒హే రణా॑య॒ చక్ష॑సే ॥
యో వః॑ శి॒వత॑మో రస॒స్తస్య॑ భాజయతే॒హ నః॑ ।
ఉ॒శ॒తీరి॑వ మా॒త॑రః ॥
తస్మా॒ అరం॑ గమామ వో॒ యస్య॒ క్షయా॑య॒ జిన్వ॑థ ।
ఆపో॑ జ॒నయ॑థా చ నః ॥

ఓం శ్రీమహాలక్ష్మ్యై నమః ।
శుద్ధోదక స్నానం సమర్పయామి ॥
స్నానానంతరం ఆచమనీయం సమర్పయామి ॥

వస్త్రం

ఉపై॑తు॒ మాం దే॑వస॒ఖః కీ॒ర్తిశ్చ॒ మణి॑నా స॒హ ।
ప్రా॒దు॒ర్భూ॒తోఽస్మి॑ రాష్ట్రే॒ఽస్మిన్ కీ॒ర్తి॒మృ॑ద్ధిం ద॒దాతు॑ మే ॥

దేహసౌమ్దర్యబీజం చ సదా శోభా వివర్ధనమ్ ।
కార్పాసజం చ కృమిజం వసనం దేవి గృహ్యతామ్ ॥
ఓం శ్రీమహాలక్ష్మ్యై నమః ।
వస్త్రం సమర్పయామి ॥

యజ్ఞోపవీతం
యజ్ఞోపవీతం పరమం పవిత్రం ప్రజాపతేర్యత్సహజం పురస్తాత్ ।
ఆయుష్యమగ్ర్యం ప్రతిముంచ శుభ్రం యజ్ఞోపవీతం బలమస్తు తేజః ॥
ఓం శ్రీమహాలక్ష్మ్యై నమః ।
యజ్ఞోపవీతం సమర్పయామి ॥

గంధం

గం॒ధ॒ద్వా॒రాం దు॑రాధ॒ర్​షాం॒ ని॒త్యపు॑ష్టాం కరీ॒షిణీ᳚మ్ ।
ఈ॒శ్వరీగ్ం॑ సర్వ॑భూతా॒నాం॒ తామి॒హోప॑హ్వయే॒ శ్రియమ్ ॥

మలయాచలసంభూతం వృక్షసారం మనోహరమ్ ।
సుగంధియుక్తం సుఖదం చందనం దేవి గృహ్యతామ్ ॥
ఓం శ్రీమహాలక్ష్మ్యై నమః ।
గంధం సమర్పయామి ॥

అర్చన
అక్షతాన్ ధవళాన్ దివ్యాన్ పుష్పాణి చ సుగంధీని ।
భక్త్యా దత్తాని గృహ్యంతాం సర్వదేవాః ప్రసీదత ॥

అంగ పూజా
ఓం చపలాయై నమః – పాదౌ పూజయామి ।
ఓం చంచలాయై నమః – జానునీ పూజయామి ।
ఓం కమలాయై నమః – కటిం పూజయామి ।
ఓం కాత్యాయన్యై నమః – నాభిం పూజయామి ।
ఓం జగన్మాత్రే నమః – జఠరం పూజయామి ।
ఓం విశ్వవల్లభాయై నమః – వక్షఃస్థలం పూజయామి ।
ఓం కమలవాసిన్యై నమః – నేత్రత్రయం పూజయామి ।
ఓం శ్రియై నమః – శిరః పూజయామి ।
ఓం మహాలక్ష్మ్యై నమః – సర్వాణ్యంగాని పూజయామి ॥

[Recite the SrI mahAlakShmI aShTOttara Sata nAmAvaLI, or at least a few known names of Lakshmi. Offer flowers or akshatas with each name.]

అథవా లక్ష్మీ నామావళీ పఠనమ్ ॥

ఓం శ్రీమహాలక్ష్మ్యై నమః ।
అష్టోత్తర శత నామావళీ పూజాం సమర్పయామి ।
అక్షతాన్ పుష్పాణి చ సమర్పయామి ॥

ధూపం

ఆపః॑ సృ॒జంతు॑ స్ని॒గ్ధా॒ని॒ చి॒క్లీ॒త వ॑స మే॒ గృహే ।
ని చ॑ దే॒వీం మా॒తరం॒ శ్రియం॑-వాఀ॒సయ॑ మే కు॒లే ॥

వృక్షనిర్యాసరూపం చ గంధద్రవ్యాది సంయుతమ్ ।
కృష్ణకాంతే పవిత్రో వై ధూపోఽయం ప్రతిగృహ్యతామ్ ॥
ఓం శ్రీమహాలక్ష్మ్యై నమః ।
ధూపమాఘ్రాపయామి ॥

దీపం

ఆ॒ర్ద్రాం పు॒ష్కరి॑ణీం పు॒ష్టిం॒ పిం॒గ॒ళాం ప॑ద్మమా॒లినీమ్ ।
చం॒ద్రాం హి॒రణ్మ॑యీం-లఀ॒క్ష్మీం జాత॑వేదో మ॒మావ॑హ ॥

జగచ్చక్షుః స్వరూపం చ ధ్వాంత ప్రధ్వంసకారణమ్ ।
ప్రదీపం శుద్ధరూపం చ గృహ్యతాం పరమేశ్వరి ॥
ఓం శ్రీమహాలక్ష్మ్యై నమః ।
దీపం దర్శయామి ॥

నైవేద్యం
నైవేద్యం గృహ్యతాం దేవి భక్త్యా సంపాదితం మయా ।
ఇదం ఫలం చ పానీయం సర్వోపచార సంయుతమ్ ॥

ఓం భూర్భువ॒స్సువః॒ । తత్స॑వి॒తుర్వరే᳚ణ్యం॒ భర్గో॑ దే॒వస్య॑ ధీమహి ।
ధి॒యో యో నః॑ ప్రచో॒దయా᳚త్ ॥

సత్యం త్వా ఋతేన పరిషించామి ।
అమృతమస్తు । అమృతోపస్తరణమసి ।
ఓం ప్రాణాయ స్వాహా । ఓం అపానాయ స్వాహా । ఓం వ్యానాయ స్వాహా ।
ఓం ఉదానాయ స్వాహా । ఓం సమానాయ స్వాహా ।
మధ్యే మధ్యే పానీయం సమర్పయామి ।
అమృతాపిధానమసి ।
ఉత్తరాపోశనం సమర్పయామి ।
హస్తౌ ప్రక్షాళయామి । పాదౌ ప్రక్షాళయామి ।
శుద్ధాచమనీయం సమర్పయామి ॥

ఓం శ్రీమహాలక్ష్మ్యై నమః ।
నైవేద్యం సమర్పయామి ॥

తాంబూలం
తాంబూలం చ వరం రమ్యం కర్పూరాది సువాసితమ్ ।
జిహ్వాజాడ్యచ్ఛేదకరం తాంబూలం దేవి గృహ్యతామ్ ॥
ఓం శ్రీమహాలక్ష్మ్యై నమః ।
తాంబూలం సమర్పయామి ॥

నీరాజనం
చక్షుర్దం సర్వలోకానాం తిమిరస్య నివారణమ్ ।
ఆర్తిక్యం కల్పితం భక్త్యా గృహాణ పరమేశ్వరి ॥
సంతత శ్రీరస్తు సమస్త మంగళాని భవంతు ।
నిత్య శ్రీరస్తు నిత్యమంగళాని భవంతు ॥
ఓం శ్రీమహాలక్ష్మ్యై నమః ।
నీరాజనం సమర్పయామి ॥

మంత్రపుష్పం

ఓం మ॒హా॒దే॒వ్యై చ॑ వి॒ద్మహే॑ విష్ణుప॒త్నీ చ॑ ధీమహి ।
తన్నో॑ లక్ష్మీః ప్రచో॒దయా᳚త్ ॥

సద్భావపుష్పాణ్యాదాయ సహజ ప్రేమరూపిణే ।
లోకమాత్రే దదామ్యద్య ప్రీత్యా సంగృహ్యతాం సదా ॥
ఓం శ్రీమహాలక్ష్మ్యై నమః ।
మంత్రపుష్పం సమర్పయామి ॥

ప్రదక్షిణం
యాని కాని చ పాపాని జన్మాంతర కృతాని చ ।
తాని తాని ప్రణశ్యంతి ప్రదక్షిణ పదే పదే ॥
పాపోఽహం పాపకర్మాఽహం పాపాత్మా పాపసంభవ ।
త్రాహి మాం కృపయా దేవి శరణాగతవత్సలే ॥
అన్యథా శరణం నాస్తి త్వమేవ శరణం మమ ।
తస్మాత్కారుణ్య భావేన రక్ష మాం పరమేశ్వరి ॥
ఓం శ్రీమహాలక్ష్మ్యై నమః ।
ప్రదక్షిణ నమస్కారాన్ సమర్పయామి ॥

నమస్కారః
ఉరసా శిరసా దృష్ట్యా మనసా వచసా తథా ।
పద్భ్యాం కరాభ్యాం కర్ణాభ్యాం ప్రణామోఽష్టాంగ ఉచ్యతే ॥
ఓం శ్రీమహాలక్ష్మ్యై నమః ।
నమస్కారాన్ సమర్పయామి ॥

సర్వోపచారాః
ఓం శ్రీమహాలక్ష్మ్యై నమః ।
ఛత్రం సమర్పయామి ।
చామరం సమర్పయామి ।
గీతం శ్రావయామి ।
నృత్యం దర్శయామి ।
సమస్త రాజోపచారాన్ దేవోపచారాన్ సమర్పయామి ॥

స్తోత్ర/సూక్త పఠనం

క్షమాప్రార్థనా
అపరాధసహస్రాణి క్రియంతేఽహర్నిశం మయా ।
దాసోఽయమితి మాం మత్వా క్షమస్వ పరమేశ్వరి ॥
మంత్రహీనం క్రియాహీనం భక్తిహీనం మహాలక్ష్మి ।
యత్పూజితం మయా దేవి పరిపూర్ణం తదస్తు తే ॥

కాయేన వాచా మనసేంద్రియైర్వా
బుద్ధ్యాత్మనా వా ప్రకృతేః స్వభావాత్ ।
కరోమి యద్యత్ సకలం పరస్మై
నారాయణాయేతి సమర్పయామి ॥

అనయా ధ్యాన-ఆవాహనాది-షోడశోపచార పూజయా శ్రీమహాలక్ష్మీ దేవీ సుప్రీతా సుప్రసన్నా వరదా భవతు ॥

ఉద్వాసనం
ఓం శ్రీమహాలక్ష్మ్యై నమః ।
యథాస్థానం ఉద్వాసయామి ।
శోభనార్థే క్షేమాయ పునరాగమనాయ చ ॥

ప్రసాద గ్రహణం
అకాలమృత్యుహరణం సర్వవ్యాధినివారణమ్ ।
సమస్తపాపక్షయకరం దేవతా పాదోదకం శుభమ్ ॥

శ్రీమహాలక్ష్మీ దేవీ ప్రసాదం శిరసా గృహ్ణామి ॥

ఓం శాంతిః శాంతిః శాంతిః ॥

ఓం తత్సత్ బ్రహ్మార్పణమస్తు ॥