විෂ්ණු පාදාදි කේශාංත වර්ණන ස්තෝත්රං

ලක්ෂ්මීභර්තුර්භුජාග්රේ කෘතවසති සිතං යස්ය රූපං විශාලං
නීලාද්රේස්තුංගශෘංගස්ථිතමිව රජනීනාථබිංබං විභාති ।
පායාන්නඃ පාංචජන්යඃ ස දිතිසුතකුලත්රාසනෛඃ පූරයන්ස්වෛ-
-ර්නිධ්වානෛර්නීරදෞඝධ්වනිපරිභවදෛරංබරං කංබුරාජඃ ॥ 1 ॥

ආහුර්යස්ය ස්වරූපං ක්ෂණමුඛමඛිලං සූරයඃ කාලමේතං
ධ්වාංතස්යෛකාංතමංතං යදපි ච පරමං සර්වධාම්නාං ච ධාම ।
චක්රං තච්චක්රපාණේර්දිතිජතනුගලද්රක්තධාරාක්තධාරං
ශශ්වන්නෝ විශ්වවංද්යං විතරතු විපුලං ශර්ම ධර්මාංශුශෝභම් ॥ 2 ॥

අව්යාන්නිර්ඝාතඝෝරෝ හරිභුජපවනාමර්ශනාධ්මාතමූර්තේ-
-රස්මාන්විස්මේරනේත්රත්රිදශනුතිවචඃසාධුකාරෛඃ සුතාරඃ ।
සර්වං සංහර්තුමිච්ඡෝරරිකුලභුවන ස්ඵාරවිෂ්ඵාරනාදඃ
සංයත්කල්පාංතසිංධෞ ශරසලිලඝටාවාර්මුචඃ කාර්මුකස්ය ॥ 3 ॥

ජීමූතශ්යාමභාසා මුහුරපි භගවද්බාහුනා මෝහයංතී
යුද්ධේෂූද්ධූයමානා ඣටිති තටිදිවාලක්ෂ්යතේ යස්ය මූර්තිඃ ।
සෝऽසිස්ත්රාසාකුලාක්ෂත්රිදශරිපුවපුඃශෝණිතාස්වාදතෘප්තෝ
නිත්යානංදාය භූයාන්මධුමථනමනෝනංදනෝ නංදකෝ නඃ ॥ 4 ॥

කම්රාකාරා මුරාරේඃ කරකමලතලේනානුරාගාද්ගෘහීතා
සම්යග්වෘත්තා ස්ථිතාග්රේ සපදි න සහතේ දර්ශනං යා පරේෂාම් ।
රාජංතී දෛත්යජීවාසවමදමුදිතා ලෝහිතාලේපනාර්ද්රා
කාමං දීප්තාංශුකාංතා ප්රදිශතු දයිතේවාස්ය කෞමෝදකී නඃ ॥ 5 ॥

යෝ විශ්වප්රාණභූතස්තනුරපි ච හරේර්යානකේතුස්වරූපෝ
යං සංචිංත්යෛව සද්යඃ ස්වයමුරගවධූවර්ගගර්භාඃ පතංති ।
චංචච්චංඩෝරුතුංඩත්රුටිතඵණිවසාරක්තපංකාංකිතස්යං
වංදේ ඡංදෝමයං තං ඛගපතිමමලස්වර්ණවර්ණං සුපර්ණම් ॥ 6 ॥

විෂ්ණෝර්විශ්වේශ්වරස්ය ප්රවරශයනකෘත්සර්වලෝකෛකධර්තා
සෝऽනංතඃ සර්වභූතඃ පෘථුවිමලයශාඃ සර්වවේදෛශ්ච වේද්යඃ ।
පාතා විශ්වස්ය ශශ්වත්සකලසුරරිපුධ්වංසනඃ පාපහංතා
සර්වජ්ඤඃ සර්වසාක්ෂී සකලවිෂභයාත්පාතු භෝගීශ්වරෝ නඃ ॥ 7 ॥

වාග්භූගෛර්යාදිභේදෛර්විදුරිහ මුනයෝ යාං යදීයෛශ්ච පුංසාං
කාරුණ්යාර්ද්රෛඃ කටාක්ෂෛඃ සකෘදපි පතිතෛඃ සංපදඃ ස්යුඃ සමග්රාඃ ।
කුංදේංදුස්වච්ඡමංදස්මිතමධුරමුඛාංභෝරුහාං සුංදරාංගීං
වංදේ වංද්යාමශේෂෛරපි මුරභිදුරෝමංදිරාමිංදිරාං තාම් ॥ 8 ॥

යා සූතේ සත්ත්වජාලං සකලමපි සදා සංනිධානේන පුංසෝ
ධත්තේ යා තත්ත්වයෝගාච්චරමචරමිදං භූතයේ භූතජාතම් ।
ධාත්රීං ස්ථාත්රීං ජනිත්රීං ප්රකෘතිමවිකෘතිං විශ්වශක්තිං විධාත්රීං
විෂ්ණෝර්විශ්වාත්මනස්තාං විපුලගුණමයීං ප්රාණනාථාං ප්රණෞමි ॥ 9 ॥

යේභ්යෝऽසූයද්භිරුච්චෛඃ සපදි පදමුරු ත්යජ්යතේ දෛත්යවර්ගෛ-
-ර්යේභෝ ධර්තුං ච මූර්ධ්නා ස්පෘහයති සතතං සර්වගීර්වාණවර්ගඃ ।
නිත්යං නිර්මූලයේයුර්නිචිතතරමමී භක්තිනිඝ්නාත්මනාං නඃ
පද්මාක්ෂස්යාංඝ්රිපද්මද්වයතලනිලයාඃ පාංසවඃ පාපපංකම් ॥ 10 ॥

රේඛා ලේඛාදිවංද්යාශ්චරණතලගතාශ්චක්රමත්ස්යාදිරූපාඃ
ස්නිග්ධාඃ සූක්ෂ්මාඃ සුජාතා මෘදුලලිතතරක්ෂෞමසූත්රායමාණාඃ ।
දද්යුර්නෝ මංගළානි භ්රමරභරජුෂා කෝමලේනාබ්ධිජායාඃ
කම්රේණාම්රේඩ්යමානාඃ කිසලයමෘදුනා පාණිනා චක්රපාණේඃ ॥ 11 ॥

යස්මාදාක්රාමතෝ ද්යාං ගරුඩමණිශිලාකේතුදංඩායමානා
දාශ්ච්යෝතංතී බභාසේ සුරසරිදමලා වෛජයංතීව කාංතා ।
භූමිෂ්ඨෝ යස්තථාන්යෝ භුවනගෘහබෘහත්‍ස්තංභශෝභාං දධෞ නඃ
පාතාමේතෞ පායෝජෝදරලලිතතලෞ පංකජාක්ෂස්ය පාදෞ ॥ 12 ॥

ආක්රාමද්භ්යාං ත්රිලෝකීමසුරසුරපතී තත්ක්ෂණාදේව නීතෞ
යාභ්යාං වෛරෝචනීංද්රෞ යුගපදපි විපත්සංපදෝරේකධාමඃ ।
තාභ්යාං තාම්රෝදරාභ්යාං මුහුරහමජිතස්යාංචිතාභ්යාමුභාභ්යාං
ප්රාජ්යෛශ්වර්යප්රදාභ්යාං ප්රණතිමුපගතඃ පාදපංකේරුහාභ්යාම් ॥ 13 ॥

යේභ්යෝ වර්ණශ්චතුර්ථශ්චරමත උදභූදාදිසර්ගේ ප්රජානාං
සාහස්රී චාපි සංඛ්යා ප්රකටමභිහිතා සර්වවේදේෂු යේෂාම් ।
ප්රාප්තා විශ්වංභරා යෛරතිවිතතතනෝර්විශ්වමූර්තේර්විරාජෝ
විෂ්ණෝස්තේභ්යෝ මහද්භ්යඃ සතතමපි නමෝऽස්ත්වංඝ්රිපංකේරුහේභ්යඃ ॥ 14 ॥

විෂ්ණෝඃ පාදද්වයාග්රේ විමලනඛමණිභ්රාජිතා රාජතේ යා
රාජීවස්යේව රම්යා හිමජලකණිකාලංකෘතාග්රා දලාලී ।
අස්මාකං විස්මයාර්හාණ්යඛිලජනමන ප්රාර්ථනීයා හි සේයං
දද්යාදාද්යානවද්යා තතිරතිරුචිරා මංගළාන්යංගුළීනාම් ॥ 15 ॥

යස්යාං දෘෂ්ට්වාමලායාං ප්රතිකෘතිමමරාඃ සංභවංත්යානමංතඃ
සේංද්රාඃ සාංද්රීකෘතේර්ෂ්යාස්ත්වපරසුරකුලාශංකයාතංකවංතඃ ।
සා සද්යඃ සාතිරේකාං සකලසුඛකරීං සංපදං සාධයේන්න-
-ශ්චංචච්චාර්වංශුචක්රා චරණනළිනයෝශ්චක්රපාණේර්නඛාලී ॥ 16 ॥

පාදාංභෝජන්මසේවාසමවනතසුරව්රාතභාස්වත්කිරීට-
-ප්රත්යුප්තෝච්චාවචාශ්මප්රවරකරගණෛශ්චිංතිතං යද්විභාති ।
නම්රාංගානාං හරේර්නෝ හරිදුපලමහාකූර්මසෞංදර්යහාරි-
-ච්ඡායං ශ්රේයඃප්රදායි ප්රපදයුගමිදං ප්රාපයේත්පාපමංතම් ॥ 17 ॥

ශ්රීමත්යෞ චාරුවෘත්තේ කරපරිමලනානංදහෘෂ්ටේ රමායාඃ
සෞංදර්යාඪ්යේංද්රනීලෝපලරචිතමහාදංඩයෝඃ කාංතිචෝරේ ।
සූරීංද්රෛඃ ස්තූයමානේ සුරකුලසුඛදේ සූදිතාරාතිසංඝේ
ජංඝේ නාරායණීයේ මුහුරපි ජයතාමස්මදංහෝ හරංත්යෞ ॥ 18 ॥

සම්යක්සාහ්යං විධාතුං සමමිව සතතං ජංඝයෝඃ ඛින්නයෝර්යේ
භාරීභූතෝරුදංඩද්වයභරණකෘතෝත්තංභභාවං භජේතේ ।
චිත්තාදර්ශං නිධාතුං මහිතමිව සතාං තේ සමුද්රායමානේ
වෘත්තාකාරේ විධත්තාං හ්යදි මුදමජිතස්යානිශං ජානුනී නඃ ॥ 19 ॥

දේවෝ භීතිං විධාතුඃ සපදි විදධතෞ කෛටභාඛ්යං මධුං චා-
-ප්යාරෝප්යාරූඪගර්වාවධිජලධි යයෝරාදිදෛත්යෞ ජඝාන ।
වෘත්තාවන්යෝන්යතුල්යෞ චතුරමුපචයං බිභ්රතාවභ්රනීලා-
-වූරූ චාරූ හරේස්තෞ මුදමතිශයිනීං මානසේ නෝ විධත්තාම් ॥ 20 ॥

පීතේන ද්යෝතතේ යච්චතුරපරිහිතේනාංබරේණාත්යුදාරං
ජාතාලංකාරයෝගං ජලමිව ජලධේර්බාඩබාග්නිප්රභාභිඃ ।
ඒතත්පාතිත්යදාන්නෝ ජඝනමතිඝනාදේනසෝ මානනීයං
සාතත්යේනෛව චේතෝවිෂයමවතරත්පාතු පීතාංබරස්ය ॥ 21 ॥

යස්යා දාම්නා ත්රිධාම්නෝ ජඝනකලිතයා භ්රාජතේऽංගං යථාබ්ධේ-
-ර්මධ්යස්ථෝ මංදරාද්රිර්භුජගපතිමහාභෝගසංනද්ධමධ්යඃ ।
කාංචී සා කාංචනාභා මණිවරකිරණෛරුල්ලසද්භිඃ ප්රදීප්තා
කල්යාං කළ්යාණදාත්රීං මම මතිමනිශං කම්රරූපාං කරෝතු ॥ 22 ॥

උන්නම්රං කම්රමුච්චෛරුපචිතමුදභූද්යත්ර පත්රෛර්විචිත්රෛඃ
පූර්වං ගීර්වාණපූජ්යං කමලජමධුපස්යාස්පදං තත්පයෝජම් ।
යස්මින්නීලාශ්මනීලෛස්තරලරුචිජලෛඃ පූරිතේ කේලිබුද්ධ්යා
නාලීකාක්ෂස්ය නාභීසරසි වසතු නශ්චිත්තහංසශ්චිරාය ॥ 23 ॥

පාතාලං යස්ය නාලං වලයමපි දිශාං පත්රපංක්තීර්නගේංද්රා-
-න්විද්වාංසඃ කේසරාලීර්විදුරිහ විපුලාං කර්ණිකාං ස්වර්ණශෛලම් ।
භූයාද්ගායත්ස්වයංභූමධුකරභවනං භූමයං කාමදං නෝ
නාලීකං නාභිපද්මාකරභවමුරු තන්නාගශය්යස්ය ශෞරේඃ ॥ 24 ॥

ආදෞ කල්පස්ය යස්මාත්ප්රභවති විතතං විශ්වමේතද්විකල්පෛඃ
කල්පාංතේ යස්ය චාංත ප්රවිශති සකලං ස්ථාවරං ජංගමං ච ।
අත්යංතාචිංත්යමූර්තේශ්චිරතරමජිතස්යාංතරික්ෂස්වරූපේ
තස්මින්නස්මාකමංතඃකරණමතිමුදා ක්රීඩතාත්ක්රෝඩභාගේ ॥ 25 ॥

කාංත්යංභඃපූරපූර්ණේ ලසදසිතවලීභංගභාස්වත්තරංගේ
ගංභීරාකාරනාභීචතුරතරමහාවර්තශෝභින්යුදාරේ ।
ක්රීඩත්වානද්වහේමෝදරනහනමහාබාඩබාග්නිප්රභාඪ්යේ
කාමං දාමෝදරීයෝදරසලිලනිධෞ චිත්තමත්ස්යශ්චිරං නඃ ॥ 26 ॥

නාභීනාලීකමූලාදධිකපරිමළෝන්මෝහිතානාමලීනාං
මාලා නීලේව යාංතී ස්ඵුරති රුචිමතී වක්ත්රපද්මෝන්මුඛී යා ।
රම්යා සා රෝමරාජිර්මහිතරුචිකරී මධ්යභාගස්ය විෂ්ණෝ-
-ශ්චිත්තස්ථා මා විරංසීච්චිරතරමුචිතාං සාධයංතී ශ්රියං නඃ ॥ 27 ॥

සංස්තීර්ණං කෞස්තුභාංශුප්රසරකිසලයෛර්මුග්ධමුක්තාඵලාඪ්යං
ශ්රීවත්සෝල්ලාසි ඵුල්ලප්රතිනවවනමාලාංකි රාජද්භුජාංතම් ।
වක්ෂඃ ශ්රීවෘක්ෂකාංතං මධුකරනිකරශ්යාමලං ශාර්ඞ්ගපාණේඃ
සංසාරාධ්වශ්රමාර්තෛරුපවනමිව යත්සේවිතං තත්ප්රපද්යේ ॥ 28 ॥

කාංතං වක්ෂෝ නිතාංතං විදධදිව ගලං කාලිමා කාලශත්රෝ-
-රිංදෝර්බිංබං යථාංකෝ මධුප ඉව තරෝර්මංජරීං රාජතේ යඃ ।
ශ්රීමාන්නිත්යං විධේයාදවිරලමිලිතඃ කෞස්තුභශ්රීප්රතානෛඃ
ශ්රීවත්සඃ ශ්රීපතේඃ ස ශ්රිය ඉව දයිතෝ වත්ස උච්චෛඃශ්රියං නඃ ॥ 29 ॥

සංභූයාංභෝධිමධ්යාත්සපදි සහජයා යඃ ශ්රියා සංනිධත්තේ
නීලේ නාරායණෝරඃස්ථලගගනතලේ හාරතාරෝපසේව්යේ ।
ආශාඃ සර්වාඃ ප්රකාශා විදධදපිදධච්චාත්මභාසාන්යතේජා-
-ස්යාශ්චර්යස්යාකරෝ නෝ ද්යුමණිරිව මණිඃ කෞස්තුභඃ සෝऽස්තුභූත්යෛ ॥ 30 ॥

යා වායාවානුකූල්යාත්සරති මණිරුචා භාසමානා සමානා
සාකං සාකංපමංසේ වසති විදධතී වාසුභද්රං සුභද්රම් ।
සාරං සාරංගසංඝෛර්මුඛරිතකුසුමා මේචකාංතා ච කාංතා
මාලා මාලාලිතාස්මාන්න විරමතු සුඛෛර්යෝජයංතී ජයංතී ॥ 31 ॥

හාරස්යෝරුප්රභාභිඃ ප්රතිනවවනමාලාශුභිඃ ප්රාංශුරූපෛඃ
ශ්රීභිශ්චාප්යංගදානාං කබලිතරුචි යන්නිෂ්කභාභිශ්ච භාති ।
බාහුල්යේනෛව බද්ධාංජලිපුටමජිතස්යාභියාචාමහේ ත-
-ද්වංධාර්තිං බාධතාං නෝ බහුවිහතිකරීං බංධුරං බාහුමූලම් ॥ 32 ॥

විශ්වත්රාණෛකදීක්ෂාස්තදනුගුණගුණක්ෂත්රනිර්මාණදක්ෂාඃ
කර්තාරෝ දුර්නිරූපස්ඵුටගුණයශසා කර්මණාමද්භුතානාම් ।
ශාර්ඞ්ගං බාණං කෘපාණං ඵලකමරිගදේ පද්මශංඛෞ සහස්රං
බිභ්රාණාඃ ශස්ත්රජාලං මම දධතු හරේර්බාහවෝ මෝහහානිම් ॥ 33 ॥

කංඨාකල්පෝද්ගතෛර්යඃ කනකමයලසත්කුංඩලෝත්ථෛරුදාරෛ-
-රුද්යෝතෛඃ කෞස්තුභස්යාප්යුරුභිරුපචිතශ්චිත්රවර්ණෝ විභාති ।
කංඨාශ්ලේෂේ රමායාඃ කරවලයපදෛර්මුද්රිතේ භද්රරූපේ
වෛකුංඨීයේऽත්ර කංඨේ වසතු මම මතිඃ කුංඨභාවං විහාය ॥ 34 ॥

පද්මානංදප්රදාතා පරිලසදරුණශ්රීපරීතාග්රභාගඃ
කාලේ කාලේ ච කංබුප්රවරශශධරාපූරණේ යඃ ප්රවීණඃ ।
වක්ත්රාකාශාංතරස්ථස්තිරයති නිතරාං දංතතාරෞඝශෝභාං
ශ්රීභර්තුර්දංතවාසෝද්යුමණිරඝතමෝනාශනායාස්ත්වසෞ නඃ ॥ 35 ॥

නිත්යං ස්නේහාතිරේකාන්නිජකමිතුරලං විප්රයෝගාක්ෂමා යා
වක්ත්රේංදෝරංතරාලේ කෘතවසතිරිවාභාති නක්ෂත්රරාජිඃ ।
ලක්ෂ්මීකාංතස්ය කාංතාකෘතිරතිවිලසන්මුග්ධමුක්තාවලිශ්රී-
-ර්දංතාලී සංතතං සා නතිනුතිනිරතානක්ෂතාන්රක්ෂතාන්නඃ ॥ 36 ॥

බ්රහ්මන්බ්රහ්මණ්යජිහ්මාං මතිමපි කුරුෂේ දේව සංභාවයේ ත්වාං
ශංභෝ ශක්ර ත්රිලෝකීමවසි කිමමරෛර්නාරදාද්යාඃ සුඛං වඃ ।
ඉත්ථං සේවාවනම්රං සුරමුනිනිකරං වීක්ෂ්ය විෂ්ණෝඃ ප්රසන්න-
-ස්යාස්යේංදෝරාස්රවංතී වරවචනසුධාහ්ලාදයේන්මානසං නඃ ॥ 37 ॥

කර්ණස්ථස්වර්ණකම්රෝජ්ජ්වලමකරමහාකුංඩලප්රෝතදීප්ය-
-න්මාණික්යශ්රීප්රතානෛඃ පරිමිලිතමලිශ්යාමලං කෝමලං යත් ।
ප්රෝද්යත්සූර්යාංශුරාජන්මරකතමුකුරාකාරචෝරං මුරාරේ-
-ර්ගාඪාමාගාමිනීං නඃ ශමයතු විපදං ගංඩයෝර්මංඩලං තත් ॥ 38 ॥

වක්ත්රාංභෝජේ ලසංතං මුහුරධරමණිං පක්වබිංබාභිරාමං
දෘෂ්ට්වා ද්රෂ්ටුං ශුකස්ය ස්ඵුටමවතරතස්තුංඩදංඩායතේ යඃ ।
ඝෝණඃ ශෝණීකෘතාත්මා ශ්රවණයුගළසත්කුංඩලෝස්රෛර්මුරාරේඃ
ප්රාණාඛ්යස්යානිලස්ය ප්රසරණසරණිඃ ප්රාණදානාය නඃ ස්යාත් ॥ 39 ॥

දික්කාලෞ වේදයංතෞ ජගති මුහුරිමෞ සංචරංතෞ රවීංදූ
ත්රෛලෝක්යාලෝකදීපාවභිදධති යයෝරේව රූපං මුනීංද්රාඃ ।
අස්මානබ්ජප්රභේ තේ ප්රචුරතරකෘපානිර්භරං ප්රේක්ෂමාණේ
පාතාමාතාම්රශුක්ලාසිතරුචිරුචිරේ පද්මනේත්රස්ය නේත්රේ ॥ 40 ॥

පාතාත්පාතාලපාතාත්පතගපතිගතේර්භ්රූයුගං භුග්නමධ්යං
යේනේෂච්චාලිතේන ස්වපදනියමිතාඃ සාසුරා දේවසංඝාඃ ।
නෘත්යල්ලාලාටරංගේ රජනිකරතනෝරර්ධඛංඩාවදාතේ
කාලව්යාලද්වයං වා විලසති සමයා වාලිකාමාතරං නඃ ॥ 41 ॥

ලක්ෂ්මාකාරාලකාලිස්ඵුරදලිකශශාංකාර්ධසංදර්ශමීල-
-න්නේත්රාංභෝජප්රබෝධෝත්සුකනිභෘතතරාලීනභෘංගච්ඡටාභේ ।
ලක්ෂ්මීනාථස්ය ලක්ෂ්යීකෘතවිබුධගණාපාංගබාණාසනාර්ධ-
-ච්ඡායේ නෝ භූරිභූතිප්රසවකුශලතේ භ්රූලතේ පාලයේතාම් ॥ 42 ॥

රූක්ෂස්මාරේක්ෂුචාපච්යුතශරනිකරක්ෂීණලක්ෂ්මීකටාක්ෂ-
-ප්රෝත්ඵුල්ලත්පද්මමාලාවිලසිතමහිතස්ඵාටිකෛශානලිංගම් ।
භූයාද්භූයෝ විභූත්යෛ මම භුවනපතේර්භ්රූලතාද්වංද්වමධ්යා-
-දුත්ථං තත්පුංඩ්රමූර්ධ්වං ජනිමරණතමඃඛංඩනං මංඩනං ච ॥ 43 ॥

පීඨීභූතාලකාංතේ කෘතමකුටමහාදේවලිංගප්රතිෂ්ඨේ
ලාලාටේ නාට්යරංගේ විකටතරතටේ කෛටභාරේශ්චිරාය ।
ප්රෝද්ධාට්යෛවාත්මතංද්රීප්රකටපටකුටීං ප්රස්ඵුරංතීං ස්ඵුටාංගං
පට්වීයං භාවනාඛ්යාං චටුලමතිනටී නාටිකාං නාටයේන්නඃ ॥ 44 ॥

මාලාලීවාලිධාම්නඃ කුවලයකලිතා ශ්රීපතේඃ කුංතලාලී
කාලිංද්යාරුහ්ය මූර්ධ්නෝ ගලති හරශිරඃස්වර්ධුනීස්පර්ධයා නු ।
රාහුර්වා යාති වක්ත්රං සකලශශිකලාභ්රාංතිලෝලාංතරාත්මා
ලෝකෛරාලෝක්යතේ යා ප්රදිශතු සතතං සාඛිලං මංගළං නඃ ॥ 45 ॥

සුප්තාකාරාඃ ප්රසුප්තේ භගවති විබුධෛරප්යදෘෂ්ටස්වරූපා
ව්යාප්තව්යෝමාංතරාලාස්තරලමණිරුචා රංජිතාඃ ස්පෂ්ටභාසඃ ।
දේහච්ඡායෝද්ගමාභා රිපුවපුරගුරුප්ලෝෂරෝෂාග්නිධූම්යාඃ
කේශාඃ කේශිද්විෂෝ නෝ විදධතු විපුලක්ලේශපාශප්රණාශම් ॥ 46 ॥

යත්ර ප්රත්යුප්තරත්නප්රවරපරිලසද්භූරිරෝචිෂ්ප්රතාන-
-ස්ඵූර්ත්යාං මූර්තිර්මුරාරේර්ද්යුමණිශතචිතව්යෝමවද්දුර්නිරීක්ෂ්යා ।
කුර්වත්පාරේපයෝධි ජ්වලදකෘශශිඛාභාස්වදෞර්වාග්නිශංකාං
ශශ්වන්නඃ ශර්ම දිශ්යාත්කලිකලුෂතමඃපාටනං තත්කිරීටම් ॥ 47 ॥

භ්රාංත්වා භ්රාංත්වා යදංතස්ත්රිභුවනගුරුරප්යබ්දකෝටීරනේකා
ගංතුං නාංතං සමර්ථෝ භ්රමර ඉව පුනර්නාභිනාලීකනාලාත් ।
උන්මජ්ජන්නූර්ජිතශ්රීස්ත්රිභුවනමපරං නිර්මමේ තත්සදෘක්ෂං
දේහාංභෝධිඃ ස දේයාන්නිරවධිරමෘතං දෛත්යවිද්වේෂිණෝ නඃ ॥ 48 ॥

මත්ස්යඃ කූර්මෝ වරාහෝ නරහරිණපතිර්වාමනෝ ජාමදග්න්යඃ
කාකුත්ස්ථඃ කංසඝාතී මනසිජවිජයී යශ්ච කල්කිර්භවිෂ්යන් ।
විෂ්ණෝරංශාවතරා භුවනහිතකරා ධර්මසංස්ථාපනාර්ථාඃ
පායාසුර්මාං ත ඒතේ ගුරුතරකරුණාභාරඛින්නාශයා යේ ॥ 49 ॥

යස්මාද්වාචෝ නිවෘත්තාඃ සමමපි මනසා ලක්ෂණාමීක්ෂමාණාඃ
ස්වාර්ථාලාභාත්පරාර්ථව්යපගමකථනශ්ලාඝිනෝ වේදවාදාඃ ।
නිත්යානංදං ස්වසංවින්නිරවධිවිමලස්වාංතසංක්රාංතබිංබ-
-ච්ඡායාපත්යාපි නිත්යං සුඛයති යමිනෝ යත්තදව්යාන්මහෝ නඃ ॥ 50 ॥

ආපාදාදා ච ශීර්ෂාද්වපුරිදමනඝං වෛෂ්ණවං යඃ ස්වචිත්තේ
ධත්තේ නිත්යං නිරස්තාඛිලකලිකලුෂ සංතතාංතඃ ප්රමෝදම් ।
ජුහ්වජ්ජිහ්වාකෘශානෞ හරිචරිතහවිඃ ස්තෝත්රමංත්රානුපාඨෛ-
-ස්තත්පාදාංභෝරුහාභ්යාං සතතමපි නමස්කුර්මහේ නිර්මලාභ්යාම් ॥ 51 ॥

මෝදාත්පාදාදිකේශස්තුතිමිතිරචිතා කීර්තයිත්වා ත්රිධාම්න
පාදාබ්ජද්වංද්වසේවාසමයනතමතිර්මස්තකේනානමේද්ය ।
උන්මුච්යෛවාත්මනෛනෝනිචයකවචක පංචතාමේත්ය භානෝ-
-ර්බිංබාංතර්ගෝචර ස ප්රවිශති පරමානංදමාත්මස්වරූපම් ॥ 52 ॥

ඉති ශ්රීමත්පරමහංසපරිව්රාජකාචාර්යස්ය ශ්රීගෝවිංදභගවත්පූජ්යපාදශිෂ්යස්ය ශ්රීමච්ඡංකරභගවතඃ කෘතෞ ශ්රී විෂ්ණු පාදාදිකේශාංතවර්ණණ ස්තෝත්රං සංපූර්ණම් ।