ශ්රී මනසා දේවී ස්තෝත්රම් (මහේංද්ර කෘතම්)

දේවි ත්වාං ස්තෝතුමිච්ඡාමි සාධ්වීනාං ප්රවරාං පරාම් ।
පරාත්පරාං ච පරමාං න හි ස්තෝතුං ක්ෂමෝऽධුනා ॥ 1 ॥

ස්තෝත්රාණාං ලක්ෂණං වේදේ ස්වභාවාඛ්යානතඃ පරම් ।
න ක්ෂමඃ ප්රකෘතිං වක්තුං ගුණානාං තව සුව්රතේ ॥ 2 ॥

ශුද්ධසත්ත්වස්වරූපා ත්වං කෝපහිංසාවිවර්ජිතා ।
න ච ශප්තෝ මුනිස්තේන ත්යක්තයා ච ත්වයා යතඃ ॥ 3 ॥

ත්වං මයා පූජිතා සාධ්වී ජනනී ච යථාऽදිතිඃ ।
දයාරූපා ච භගිනී ක්ෂමාරූපා යථා ප්රසූඃ ॥ 4 ॥

ත්වයා මේ රක්ෂිතාඃ ප්රාණා පුත්රදාරාඃ සුරේශ්වරි ।
අහං කරෝමි ත්වාං පූජ්යාං මම ප්රීතිශ්ච වර්ධතේ ॥ 5 ॥

නිත්යං යද්යපි පූජ්යා ත්වං භවේऽත්ර ජගදංබිකේ ।
තථාපි තව පූජාං වෛ වර්ධයාමි පුනඃ පුනඃ ॥ 6 ॥

යේ ත්වාමාෂාඪසංක්රාංත්යාං පූජයිෂ්යංති භක්තිතඃ ।
පංචම්යාං මනසාඛ්යායාං මාසාංතේ වා දිනේ දිනේ ॥ 7 ॥

පුත්රපෞත්රාදයස්තේෂාං වර්ධංතේ ච ධනානි ච ।
යශස්විනඃ කීර්තිමංතෝ විද්යාවංතෝ ගුණාන්විතාඃ ॥ 8 ॥

යේ ත්වාං න පූජයිෂ්යංති නිංදංත්යජ්ඤානතෝ ජනාඃ ।
ලක්ෂ්මීහීනා භවිෂ්යංති තේෂාං නාගභයං සදා ॥ 9 ॥

ත්වං ස්වර්ගලක්ෂ්මීඃ ස්වර්ගේ ච වෛකුංඨේ කමලාකලා ।
නාරායණාංශෝ භගවාන් ජරත්කාරුර්මුනීශ්වරඃ ॥ 10 ॥

තපසා තේජසා ත්වාං ච මනසා සසෘජේ පිතා ।
අස්මාකං රක්ෂණායෛව තේන ත්වං මනසාභිධා ॥ 11 ॥

මනසා දේවි තු ශක්තා චාත්මනා සිද්ධයෝගිනී ।
තේන ත්වං මනසාදේවී පූජිතා වංදිතා භවේ ॥ 12 ॥

යාං භක්ත්යා මනසා දේවාඃ පූජයංත්යනිශං භෘශම් ।
තේන ත්වාං මනසාදේවීං ප්රවදංති පුරාවිදඃ ॥ 13 ॥

සත්ත්වරූපා ච දේවී ත්වං ශශ්වත්සත්ත්වනිෂේවයා ।
යෝ හි යද්භාවයේන්නිත්යං ශතං ප්රාප්නෝති තත්සමම් ॥ 14 ॥

ඉදං ස්තෝත්රං පුණ්යබීජං තාං සංපූජ්ය ච යඃ පඨේත් ।
තස්ය නාගභයං නාස්ති තස්ය වංශෝද්භවස්ය ච ॥ 15 ॥

විෂං භවේත්සුධාතුල්යං සිද්ධස්තෝත්රං යදා පඨේත් ।
පංචලක්ෂජපේනෛව සිද්ධස්තෝත්රෝ භවේන්නරඃ ।
සර්පශායී භවේත්සෝऽපි නිශ්චිතං සර්පවාහනඃ ॥ 16 ॥

ඉති ශ්රීබ්රහ්මවෛවර්තේ මහාපුරාණේ ප්රකෘතිඛංඩේ ෂට්චත්වාරිංශෝऽධ්යායේ මහේංද්ර කෘත ශ්රී මනසාදේවී ස්තෝත්රම් ॥

ආස්තීකමුනි මංත්රඃ
සර්පාපසර්ප භද්රං තේ ගච්ඡ සර්ප මහාවිෂ ।
ජනමේජයස්ය යජ්ඤාංතේ ආස්තීකවචනං ස්මර ॥