ශ්රී දුර්ගා ස්තෝත්රම් (යුධිෂ්ඨිර කෘතං)

විරාටනගරං රම්යං ගච්ඡමානෝ යුධිෂ්ඨිරඃ ।
අස්තුවන්මනසා දේවීං දුර්ගාං ත්රිභුවනේශ්වරීම් ॥ 1 ॥

යශෝදාගර්භසංභූතාං නාරායණවරප්රියාම් ।
නංදගෝපකුලේ ජාතාං මංගළ්යාං කුලවර්ධිනීම් ॥ 2 ॥

කංසවිද්රාවණකරීමසුරාණාං ක්ෂයංකරීම් ।
ශිලාතටවිනික්ෂිප්තාමාකාශං ප්රති ගාමිනීම් ॥ 3 ॥

වාසුදේවස්ය භගිනීං දිව්යමාල්යවිභූෂිතාම් ।
දිව්යාංබරධරාං දේවීං ඛඩ්ගඛේටකධාරිණීම් ॥ 4 ॥

භාරාවතරණේ පුණ්යේ යේ ස්මරංති සදාශිවාම් ।
තාන් වෛ තාරයතේ පාපාත් පංකේ ගාමිව දුර්බලාම් ॥ 5 ॥

ස්තෝතුං ප්රචක්රමේ භූයෝ විවිධෛඃ ස්තෝත්රසංභවෛඃ ।
ආමංත්ර්ය දර්ශනාකාංක්ෂී රාජා දේවීං සහානුජඃ ॥ 6 ॥

නමෝऽස්තු වරදේ කෘෂ්ණේ කුමාරි බ්රහ්මචාරිණි ।
බාලාර්කසදෘශාකාරේ පූර්ණචංද්රනිභානනේ ॥ 7 ॥

චතුර්භුජේ චතුර්වක්ත්රේ පීනශ්රෝණිපයෝධරේ ।
මයූරපිච්ඡවලයේ කේයූරාංගදධාරිණි ॥ 8 ॥

භාසි දේවි යථා පද්මා නාරායණපරිග්රහඃ ।
ස්වරූපං බ්රහ්මචර්යං ච විශදං තව ඛේචරි ॥ 9 ॥

කෘෂ්ණච්ඡවිසමා කෘෂ්ණා සංකර්ෂණසමානනා ।
බිභ්රතී විපුලෞ බාහූ ශක්රධ්වජසමුච්ඡ්රයෞ ॥ 10 ॥

පාත්රී ච පංකජී ඝංටී ස්ත්රීවිශුද්ධා ච යා භුවි ।
පාශං ධනුර්මහාචක්රං විවිධාන්යායුධානි ච ॥ 11 ॥

කුංඩලාභ්යාං සුපූර්ණාභ්යාං කර්ණාභ්යාං ච විභූෂිතා ।
චංද්රවිස්පර්ධිනා දේවි මුඛේන ත්වං විරාජසේ ॥ 12 ॥

මුකුටේන විචිත්රේණ කේශබංධේන ශෝභිනා ।
භුජංගාභෝගවාසේන ශ්රෝණිසූත්රේණ රාජතා ॥ 13 ॥

විභ්රාජසේ චාබද්ධේන භෝගේනේවේහ මංදරඃ ।
ධ්වජේන ශිඛිපිච්ඡානාමුච්ඡ්රිතේන විරාජසේ ॥ 14 ॥

කෞමාරං ව්රතමාස්ථාය ත්රිදිවං පාවිතං ත්වයා ।
තේන ත්වං ස්තූයසේ දේවි ත්රිදශෛඃ පූජ්යසේऽපි ච ॥ 15 ॥

ත්රෛලෝක්යරක්ෂණාර්ථාය මහිෂාසුරනාශිනි ।
ප්රසන්නා මේ සුරශ්රේෂ්ඨේ දයාං කුරු ශිවා භව ॥ 16 ॥

ජයා ත්වං විජයා චෛව සංග්රාමේ ච ජයප්රදා ।
මමාපි විජයං දේහි වරදා ත්වං ච සාංප්රතම් ॥ 17 ॥

විංධ්යේ චෛව නගශ්රේෂ්ඨේ තව ස්ථානං හි ශාශ්වතම් ।
කාළි කාළි මහාකාළි ශීධුමාංසපශුප්රියේ ॥ 18 ॥

කෘතානුයාත්රා භූතෛස්ත්වං වරදා කාමචාරිණී ।
භාරාවතාරේ යේ ච ත්වාං සංස්මරිෂ්යංති මානවාඃ ॥ 19 ॥

ප්රණමංති ච යේ ත්වාං හි ප්රභාතේ තු නරා භුවි ।
න තේෂාං දුර්ලභං කිංචිත් පුත්රතෝ ධනතෝऽපි වා ॥ 20 ॥

දුර්ගාත් තාරයසේ දුර්ගේ තත් ත්වං දුර්ගා ස්මෘතා ජනෛඃ ।
කාංතාරේෂ්වවසන්නානාං මග්නානාං ච මහාර්ණවේ ।
දස්යුභිර්වා නිරුද්ධානාං ත්වං ගතිඃ පරමා නෘණාම් ॥ 21 ॥

ජලප්රතරණේ චෛව කාංතාරේෂ්වටවීෂු ච ।
යේ ස්මරංති මහාදේවි න ච සීදංති තේ නරාඃ ॥ 22 ॥

ත්වං කීර්තිඃ ශ්රීර්ධෘතිඃ සිද්ධිර්හ්රීර්විද්යා සංතතිර්මතිඃ ।
සංධ්යා රාත්රිඃ ප්රභා නිද්රා ජ්යෝත්ස්නා කාංතිඃ ක්ෂමා දයා ॥ 23 ॥

නෘණාං ච බංධනං මෝහං පුත්රනාශං ධනක්ෂයම් ।
ව්යාධිං මෘත්යුං භයං චෛව පූජිතා නාශයිෂ්යසි ॥ 24 ॥

සෝऽහං රාජ්යාත්පරිභ්රෂ්ටඃ ශරණං ත්වාං ප්රපන්නවාන් ।
ප්රණතශ්ච යථා මූර්ධ්නා තව දේවි සුරේශ්වරි ॥ 25 ॥

ත්රාහි මාං පද්මපත්රාක්ෂි සත්යේ සත්යා භවස්ව නඃ ।
ශරණං භව මේ දුර්ගේ ශරණ්යේ භක්තවත්සලේ ॥ 26 ॥

ඒවං ස්තුතා හි සා දේවී දර්ශයාමාස පාංඩවම් ।
උපගම්ය තු රාජානාමිදං වචනමබ්රවීත් ॥ 27 ॥

දේව්යුවාච ।
ශෘණු රාජන් මහාබාහෝ මදීයං වචනං ප්රභෝ ।
භවිෂ්යත්යචිරාදේව සංග්රාමේ විජයස්තව ॥ 28 ॥

මම ප්රසාදාන්නිර්ජිත්ය හත්වා කෞරවවාහිනීම් ।
රාජ්යං නිෂ්කංටකං කෘත්වා භෝක්ෂ්යසේ මේදිනීං පුනඃ ॥ 29 ॥

භාත්රෘභිඃ සහිතෝ රාජන් ප්රීතිං ප්රාප්ස්යසි පුෂ්කලාම් ।
මත්ප්රසාදාච්ච තේ සෞඛ්යමාරෝග්යං ච භවිෂ්යති ॥ 30 ॥

යේ ච සංකීර්තයිෂ්යංති ලෝකේ විගතකල්මෂාඃ ।
තේෂාං තුෂ්ටා ප්රදාස්යාමි රාජ්යමායුර්වපුඃ සුතම් ॥ 31 ॥

ප්රවාසේ නගරේ චාපි සංග්රාමේ ශත්රුසංකටේ ।
අටව්යාං දුර්ගකාංතාරේ සාගරේ ගහනේ ගිරෞ ॥ 32 ॥

යේ ස්මරිෂ්යංති මාං රාජන් යථාऽහං භවතා ස්මෘතා ।
න තේෂාං දුර්ලභං කිංචිදස්මිල්ලෝකේ භවිෂ්යති ॥ 33 ॥

ඉදං ස්තෝත්රවරං භක්ත්යා ශෘණුයාද්වා පඨේත වා ।
තස්ය සර්වාණි කාර්යාණි සිද්ධිං යාස්යංති පාංඩවාඃ ॥ 34 ॥

මත්ප්රසාදාච්ච වඃ සර්වාන්විරාටනගරේ ස්ථිතාන් ।
න ප්රජ්ඤාස්යංති කුරවෝ නරා වා තන්නිවාසිනඃ ॥ 35 ॥

ඉත්යුක්ත්වා වරදා දේවී යුධිෂ්ඨිරමරිංදමම් ।
රක්ෂාං කෘත්වා ච පාංඩූනාං තත්රෛවාංතරධීයත ॥ 36 ॥

ඉති ශ්රීමන්මහාභාරතේ විරාටපර්වණි අෂ්ටමෝऽධ්යායේ යුධිෂ්ඨිර කෘත ශ්රී දුර්ගා ස්තෝත්රම් ।