මණිද්වීප වර්ණන – 3 (දේවී භාගවතම්)

(ශ්රීදේවීභාගවතං, ද්වාදශ ස්කංධං, ද්වාදශෝऽධ්යායඃ, මණිද්වීප වර්ණන – 3)

ව්යාස උවාච ।
තදේව දේවීසදනං මධ්යභාගේ විරාජතේ ।
සහස්ර ස්තංභසංයුක්තාශ්චත්වාරස්තේෂු මංඩපාඃ ॥ 1 ॥

ශෘංගාරමංඩපශ්චෛකෝ මුක්තිමංඩප ඒව ච ।
ජ්ඤානමංඩප සංජ්ඤස්තු තෘතීයඃ පරිකීර්තිතඃ ॥ 2 ॥

ඒකාංතමංඩපශ්චෛව චතුර්ථඃ පරිකීර්තිතඃ ।
නානා විතානසංයුක්තා නානා ධූපෛස්තු ධූපිතාඃ ॥ 3 ॥

කෝටිසූර්යසමාඃ කාංත්යා භ්රාංජංතේ මංඩපාඃ ශුභාඃ ।
තන්මංඩපානාං පරිතඃ කාශ්මීරවනිකා ස්මෘතා ॥ 4 ॥

මල්ලිකාකුංදවනිකා යත්ර පුෂ්කලකාඃ ස්ථිතාඃ ।
අසංඛ්යාතා මෘගමදෛඃ පූරිතාස්තත්ස්රවා නෘප ॥ 5 ॥

මහාපද්මාටවී තද්වද්රත්නසෝපානනිර්මිතා ।
සුධාරසේනසංපූර්ණා ගුංජන්මත්තමධුව්රතා ॥ 6 ॥

හංසකාරංඩවාකීර්ණා ගංධපූරිත දික්තටා ।
වනිකානාං සුගංධෛස්තු මණිද්වීපං සුවාසිතම් ॥ 7 ॥

ශෘංගාරමංඩපේ දේව්යෝ ගායංති විවිධෛඃ ස්වරෛඃ ।
සභාසදෝ දේවවශා මධ්යේ ශ්රීජගදංබිකා ॥ 8 ॥

මුක්තිමංඩපමධ්යේ තු මෝචයත්යනිශං ශිවා ।
ජ්ඤානෝපදේශං කුරුතේ තෘතීයේ නෘප මංඩපේ ॥ 9 ॥

චතුර්ථමංඩපේ චෛව ජගද්රක්ෂා විචිංතනම් ।
මංත්රිණී සහිතා නිත්යං කරෝති ජගදංබිකා ॥ 10 ॥

චිංතාමණිගෘහේ රාජංඡක්ති තත්ත්වාත්මකෛඃ පරෛඃ ।
සෝපානෛර්දශභිර්යුක්තෝ මංචකෝප්යධිරාජතේ ॥ 11 ॥

බ්රහ්මා විෂ්ණුශ්ච රුද්රශ්ච ඊශ්වරශ්ච සදාශිවඃ ।
ඒතේ මංචඛුරාඃ ප්රෝක්තාඃ ඵලකස්තු සදාශිවඃ ॥ 12 ॥

තස්යෝපරි මහාදේවෝ භුවනේශෝ විරාජතේ ।
යා දේවී නිජලීලාර්ථං ද්විධාභූතා බභූවහ ॥ 13 ॥

සෘෂ්ට්යාදෞ තු ස ඒවායං තදර්ධාංගෝ මහේශ්වරඃ ।
කංදර්ප දර්පනාශෝද්යත්කෝටි කංදර්පසුංදරඃ ॥ 14 ॥

පංචවක්ත්රස්ත්රිනේත්රශ්ච මණිභූෂණ භූෂිතඃ ।
හරිණාභීතිපරශූන්වරං ච නිජබාහුභිඃ ॥ 15 ॥

දධානඃ ෂෝඩශාබ්දෝऽසෞ දේවඃ සර්වේශ්වරෝ මහාන් ।
කෝටිසූර්ය ප්රතීකාශශ්චංද්රකෝටි සුශීතලඃ ॥ 16 ॥

ශුද්ධස්ඵටික සංකාශස්ත්රිනේත්රඃ ශීතල ද්යුතිඃ ।
වාමාංකේ සන්නිෂණ්ණාऽස්ය දේවී ශ්රීභුවනේශ්වරී ॥ 17 ॥

නවරත්නගණාකීර්ණ කාංචීදාම විරාජිතා ।
තප්තකාංචනසන්නද්ධ වෛදූර්යාංගදභූෂණා ॥ 18 ॥

කනච්ඡ්රීචක්රතාටංක විටංක වදනාංබුජා ।
ලලාටකාංති විභව විජිතාර්ධසුධාකරා ॥ 19 ॥

බිංබකාංති තිරස්කාරිරදච්ඡද විරාජිතා ।
ලසත්කුංකුමකස්තූරීතිලකෝද්භාසිතානනා ॥ 20 ॥

දිව්ය චූඩාමණි ස්ඵාර චංචච්චංද්රකසූර්යකා ।
උද්යත්කවිසමස්වච්ඡ නාසාභරණ භාසුරා ॥ 21 ॥

චිංතාකලංබිතස්වච්ඡ මුක්තාගුච්ඡ විරාජිතා ।
පාටීර පංක කර්පූර කුංකුමාලංකෘත ස්තනී ॥ 22 ॥

විචිත්ර විවිධා කල්පා කංබුසංකාශ කංධරා ।
දාඩිමීඵලබීජාභ දංතපංක්ති විරාජිතා ॥ 23 ॥

අනර්ඝ්ය රත්නඝටිත මුකුටාංචිත මස්තකා ।
මත්තාලිමාලාවිලසදලකාඪ්ය මුඛාංබුජා ॥ 24 ॥

කළංකකාර්ශ්යනිර්මුක්ත ශරච්චංද්රනිභානනා ।
ජාහ්නවීසලිලාවර්ත ශෝභිනාභිවිභූෂිතා ॥ 25 ॥

මාණික්ය ශකලාබද්ධ මුද්රිකාංගුළිභූෂිතා ।
පුංඩරීකදලාකාර නයනත්රයසුංදරී ॥ 26 ॥

කල්පිතාච්ඡ මහාරාග පද්මරාගෝජ්ජ්වලප්රභා ।
රත්නකිංකිණිකායුක්ත රත්නකංකණශෝභිතා ॥ 27 ॥

මණිමුක්තාසරාපාර ලසත්පදකසංතතිඃ ।
රත්නාංගුළිප්රවිතත ප්රභාජාලලසත්කරා ॥ 28 ॥

කංචුකීගුංඵිතාපාර නානා රත්නතතිද්යුතිඃ ।
මල්ලිකාමෝදි ධම්මිල්ල මල්ලිකාලිසරාවෘතා ॥ 29 ॥

සුවෘත්තනිබිඩෝත්තුංග කුචභාරාලසා ශිවා ।
වරපාශාංකුශාභීති ලසද්බාහු චතුෂ්ටයා ॥ 30 ॥

සර්වශෘංගාරවේෂාඪ්යා සුකුමාරාංගවල්ලරී ।
සෞංදර්යධාරාසර්වස්වා නිර්ව්යාජකරුණාමයී ॥ 31 ॥

නිජසංලාපමාධුර්ය විනිර්භර්ත්සිතකච්ඡපී ।
කෝටිකෝටිරවීංදූනාං කාංතිං යා බිභ්රතී පරා ॥ 32 ॥

නානා සඛීභිර්දාසීභිස්තථා දේවාංගනාදිභිඃ ।
සර්වාභිර්දේවතාභිස්තු සමංතාත්පරිවේෂ්ටිතා ॥ 33 ॥

ඉච්ඡාශක්ත්යා ජ්ඤානශක්ත්යා ක්රියාශක්ත්යා සමන්විතා ।
ලජ්ජා තුෂ්ටිස්තථා පුෂ්ටිඃ කීර්තිඃ කාංතිඃ ක්ෂමා දයා ॥ 34 ॥

බුද්ධිර්මේධාස්මෘතිර්ලක්ෂ්මීර්මූර්තිමත්යෝංගනාඃ ස්මෘතාඃ ।
ජයා ච විජයා චෛවාප්යජිතා චාපරාජිතා ॥ 35 ॥

නිත්යා විලාසිනී දෝග්ධ්රී ත්වඝෝරා මංගළා නවා ।
පීඨශක්තය ඒතාස්තු සේවංතේ යාං පරාංබිකාම් ॥ 36 ॥

යස්යාස්තු පාර්ශ්වභාගේස්තෝනිධීතෞ ශංඛපද්මකෞ ।
නවරත්න වහානද්යස්තථා වෛ කාංචනස්රවාඃ ॥ 37 ॥

සප්තධාතුවහානද්යෝ නිධිභ්යාං තු විනිර්ගතාඃ ।
සුධාසිංධ්වංතගාමින්යස්තාඃ සර්වා නෘපසත්තම ॥ 38 ॥

සා දේවී භුවනේශානී තද්වාමාංකේ විරාජතේ ।
සර්වේශ ත්වං මහේශස්ය යත්සංගා දේව නාන්යථා ॥ 39 ॥

චිංතාමණි ගෘහස්යාऽස්ය ප්රමාණං ශෘණු භූමිප ।
සහස්රයෝජනායාමං මහාංතස්තත්ප්රචක්ෂතේ ॥ 40 ॥

තදුත්තරේ මහාශාලාඃ පූර්වස්මාද් ද්විගුණාඃ ස්මෘතාඃ ।
අංතරික්ෂගතං ත්වේතන්නිරාධාරං විරාජතේ ॥ 41 ॥

සංකෝචශ්ච විකාශශ්ච ජායතේऽස්ය නිරංතරම් ।
පටවත්කාර්යවශතඃ ප්රළයේ සර්ජනේ තථා ॥ 42 ॥

ශාලානාං චෛව සර්වේෂාං සර්වකාංතිපරාවධි ।
චිංතාමණිගෘහං ප්රෝක්තං යත්ර දේවී මහෝමයී ॥ 43 ॥

යේයේ උපාසකාඃ සංති ප්රතිබ්රහ්මාංඩවර්තිනඃ ।
දේවේෂු නාගලෝකේෂු මනුෂ්යේෂ්විතරේෂු ච ॥ 44 ॥

ශ්රීදේව්යාස්තේ ච සර්වේපි ව්රජංත්යත්රෛව භූමිප ।
දේවීක්ෂේත්රේ යේ ත්යජංති ප්රාණාංදේව්යර්චනේ රතාඃ ॥ 45 ॥

තේ සර්වේ යාංති තත්රෛව යත්ර දේවී මහෝත්සවා ।
ඝෘතකුල්යා දුග්ධකුල්යා දධිකුල්යා මධුස්රවාඃ ॥ 46 ॥

ස්යංදංති සරිතඃ සර්වාස්තථාමෘතවහාඃ පරාඃ ।
ද්රාක්ෂාරසවහාඃ කාශ්චිජ්ජංබූරසවහාඃ පරාඃ ॥ 47 ॥

ආම්රේක්ෂුරසවාහින්යෝ නද්යස්තාස්තු සහස්රශඃ ।
මනෝරථඵලාවෘක්ෂාවාප්යඃ කූපාස්තථෛව ච ॥ 48 ॥

යථේෂ්ටපානඵලදාන න්යූනං කිංචිදස්ති හි ।
න රෝගපලිතං වාපි ජරා වාපි කදාචන ॥ 49 ॥

න චිංතා න ච මාත්සර්යං කාමක්රෝධාදිකං තථා ।
සර්වේ යුවානඃ සස්ත්රීකාඃ සහස්රාදිත්යවර්චසඃ ॥ 50 ॥

භජංති සතතං දේවීං තත්ර ශ්රීභුවනේශ්වරීම් ।
කේචිත්සලෝකතාපන්නාඃ කේචිත්සාමීප්යතාං ගතාඃ ॥ 51 ॥

සරූපතාං ගතාඃ කේචිත්සාර්ෂ්ටිතාං ච පරේගතාඃ ।
යායාස්තු දේවතාස්තත්ර ප්රතිබ්රහ්මාංඩවර්තිනාම් ॥ 52 ॥

සමෂ්ටයඃ ස්ථිතාස්තාස්තු සේවංතේ ජගදීශ්වරීම් ।
සප්තකෝටිමහාමංත්රා මූර්තිමංත උපාසතේ ॥ 53 ॥

මහාවිද්යාශ්ච සකලාඃ සාම්යාවස්ථාත්මිකාං ශිවාම් ।
කාරණබ්රහ්මරූපාං තාං මායා ශබලවිග්රහාම් ॥ 54 ॥

ඉත්ථං රාජන්මයා ප්රෝක්තං මණිද්වීපං මහත්තරම් ।
න සූර්යචංද්රෞ නෝ විද්යුත්කෝටයෝග්නිස්තථෛව ච ॥ 55 ॥

ඒතස්ය භාසා කෝට්යංශ කෝට්යංශෝ නාපි තේ සමාඃ ।
ක්වචිද්විද්රුමසංකාශං ක්වචින්මරකතච්ඡවි ॥ 56 ॥

විද්යුද්භානුසමච්ඡායං මධ්යසූර්යසමං ක්වචිත් ।
විද්යුත්කෝටිමහාධාරා සාරකාංතිතතං ක්වචිත් ॥ 57 ॥

ක්වචිත්සිංදූර නීලේංද්රං මාණික්ය සදෘශච්ඡවි ।
හීරසාර මහාගර්භ ධගද්ධගිත දික්තටම් ॥ 58 ॥

කාංත්යා දාවානලසමං තප්තකාංචන සන්නිභම් ।
ක්වචිච්චංද්රෝපලෝද්ගාරං සූර්යෝද්ගාරං ච කුත්ර චිත් ॥ 59 ॥

රත්නශෘංගි සමායුක්තං රත්නප්රාකාර ගෝපුරම් ।
රත්නපත්රෛ රත්නඵලෛර්වෘක්ෂෛශ්ච පරිමංඩිතම් ॥ 60 ॥

නෘත්යන්මයූරසංඝෛශ්ච කපෝතරණිතෝජ්ජ්වලම් ।
කෝකිලාකාකලීලාපෛඃ ශුකලාපෛශ්ච ශෝභිතම් ॥ 61 ॥

සුරම්ය රමණීයාංබු ලක්ෂාවධි සරෝවෘතම් ।
තන්මධ්යභාග විලසද්විකචද්රත්න පංකජෛඃ ॥ 62 ॥

සුගංධිභිඃ සමංතාත්තු වාසිතං ශතයෝජනම් ।
මංදමාරුත සංභින්න චලද්ද්රුම සමාකුලම් ॥ 63 ॥

චිංතාමණි සමූහානාං ජ්යෝතිෂා විතතාංබරම් ।
රත්නප්රභාභිරභිතෝ ධගද්ධගිත දික්තටම් ॥ 64 ॥

වෘක්ෂව්රාත මහාගංධවාතව්රාත සුපූරිතම් ।
ධූපධූපායිතං රාජන්මණිදීපායුතෝජ්ජ්වලම් ॥ 65 ॥

මණිජාලක සච්ඡිද්ර තරලෝදරකාංතිභිඃ ।
දිඞ්මෝහජනකං චෛතද්දර්පණෝදර සංයුතම් ॥ 66 ॥

ඓශ්වර්යස්ය සමග්රස්ය ශෘංගාරස්යාඛිලස්ය ච ।
සර්වජ්ඤතායාඃ සර්වායාස්තේජසශ්චාඛිලස්ය ච ॥ 67 ॥

පරාක්රමස්ය සර්වස්ය සර්වෝත්තමගුණස්ය ච ।
සකලා යා දයායාශ්ච සමාප්තිරිහ භූපතේ ॥ 68 ॥

රාජ්ඤ ආනංදමාරභ්ය බ්රහ්මලෝකාංත භූමිෂු ।
ආනංදා යේ ස්ථිතාඃ සර්වේ තේऽත්රෛවාංතර්භවංති හි ॥ 69 ॥

ඉති තේ වර්ණිතං රාජන්මණිද්වීපං මහත්තරම් ।
මහාදේව්යාඃ පරංස්ථානං සර්වලෝකෝත්තමෝත්තමම් ॥ 70 ॥

ඒතස්ය ස්මරණාත්සද්යඃ සර්වපාපං විනශ්යති ।
ප්රාණෝත්ක්රමණසංධෞ තු ස්මෘත්වා තත්රෛව ගච්ඡති ॥ 71 ॥

අධ්යාය පංචකං ත්වේතත්පඨේන්නිත්යං සමාහිතඃ ।
භූතප්රේතපිශාචාදි බාධා තත්ර භවේන්න හි ॥ 72 ॥

නවීන ගෘහ නිර්මාණේ වාස්තුයාගේ තථෛව ච ।
පඨිතව්යං ප්රයත්නේන කල්යාණං තේන ජායතේ ॥ 73 ॥

ඉති ශ්රීදේවීභාගවතේ මහාපුරාණේ ද්වාදශස්කංධේ ද්වාදශෝධ්යායඃ ॥