ගණේශ මානස පූජ

ගෘත්සමද උවාච ।
විඝ්නේශවීර්යාණි විචිත්රකාණි
බංදීජනෛර්මාගධකෛඃ ස්මෘතානි ।
ශ්රුත්වා සමුත්තිෂ්ඨ ගජානන ත්වං
බ්රාහ්මේ ජගන්මංගළකං කුරුෂ්ව ॥ 1 ॥

ඒවං මයා ප්රාර්ථිත විඝ්නරාජ-
-ශ්චිත්තේන චෝත්ථාය බහිර්ගණේශඃ ।
තං නිර්ගතං වීක්ෂ්ය නමංති දේවාඃ
ශංභ්වාදයෝ යෝගිමුඛාස්තථාහම් ॥ 2 ॥

ශෞචාදිකං තේ පරිකල්පයාමි
හේරංබ වෛ දංතවිශුද්ධිමේවම් ।
වස්ත්රේණ සංප්රෝක්ෂ්ය මුඛාරවිංදං
දේවං සභායාං විනිවේශයාමි ॥ 3 ॥

ද්විජාදිසර්වෛරභිවංදිතං ච
ශුකාදිභිර්මෝදසුමෝදකාද්යෛඃ ।
සංභාෂ්ය චාලෝක්ය සමුත්ථිතං තං
සුමංඩපං කල්ප්ය නිවේශයාමි ॥ 4 ॥

රත්නෛඃ සුදීප්තෛඃ ප්රතිබිංබිතං තං
පශ්යාමි චිත්තේන විනායකං ච ।
තත්රාසනං රත්නසුවර්ණයුක්තං
සංකල්ප්ය දේවං විනිවේශයාමි ॥ 5 ॥

සිද්ධ්යා ච බුද්ධ්යා සහ විඝ්නරාජ
පාද්යං කුරු ප්රේමභරේණ සර්වෛඃ ।
සුවාසිතං නීරමථෝ ගෘහාණ
චිත්තේන දත්තං ච සුඛෝෂ්ණභාවම් ॥ 6 ॥

තතඃ සුවස්ත්රේණ ගණේශමාදෞ
සංප්රෝක්ෂ්ය දූර්වාදිභිරර්චයාමි ।
චිත්තේන භාවප්රිය දීනබංධෝ
මනෝ විලීනං කුරු තේ පදාබ්ජේ ॥ 7 ॥

කර්පූරකෛලාදිසුවාසිතං තු
සුකල්පිතං තෝයමථෝ ගෘහාණ ।
ආචම්ය තේනෛව ගජානන ත්වං
කෘපාකටාක්ෂේණ විලෝකයාශු ॥ 8 ॥

ප්රවාලමුක්තාඵලහාටකාද්යෛඃ
සුසංස්කෘතං හ්යංතරභාවකේන ।
අනර්ඝ්යමර්ඝ්යං සඵලං කුරුෂ්ව
මයා ප්රදත්තං ගණරාජ ඪුංඪේ ॥ 9 ॥

සෞගංධ්යයුක්තං මධුපර්කමාද්යං
සංකල්පිතං භාවයුතං ගෘහාණ ।
පුනස්තථාචම්ය විනායක ත්වං
භක්තාංශ්ච භක්තේශ සුරක්ෂයාශු ॥ 10 ॥

සුවාසිතං චංපකජාතිකාද්යෛ-
-ස්තෛලං මයා කල්පිතමේව ඪුංඪේ ।
ගෘහාණ තේන ප්රවිමර්දයාමි
සර්වාංගමේවං තව සේවනාය ॥ 11 ॥

තතඃ සුඛෝෂ්ණේන ජලේන චාහ-
-මනේකතීර්ථාහෘතකේන ඪුංඪේ ।
චිත්තේන ශුද්ධේන ච ස්නාපයාමි
ස්නානං මයා දත්තමථෝ ගෘහාණ ॥ 12 ॥

තතඃ පයඃස්නානමචිංත්යභාව
ගෘහාණ තෝයස්ය තථා ගණේශ ।
පුනර්දධිස්නානමනාමය ත්වං
චිත්තේන දත්තං ච ජලස්ය චෛව ॥ 13 ॥

තතෝ ඝෘතස්නානමපාරවංද්ය
සුතීර්ථජං විඝ්නහර ප්රසීද ।
ගෘහාණ චිත්තේන සුකල්පිතං තු
තතෝ මධුස්නානමථෝ ජලස්ය ॥ 14 ॥

සුශර්කරායුක්තමථෝ ගෘහාණ
ස්නානං මයා කල්පිතමේව ඪුංඪේ ।
තතෝ ජලස්නානමඝාපහංතෘ
විඝ්නේශ මායාභ්රමං වාරයාශු ॥ 15 ॥

සුයක්ෂපංකස්ථමථෝ ගෘහාණ
ස්නානං පරේශාධිපතේ තතශ්ච ।
කෞමංඩලීසංභවජං කුරුෂ්ව
විශුද්ධමේවං පරිකල්පිතං තු ॥ 16 ॥

තතස්තු සූක්තෛර්මනසා ගණේශං
සංපූජ්ය දූර්වාදිභිරල්පභාවෛඃ ।
අපාරකෛර්මංඩලභූතබ්රහ්ම-
-ණස්පත්යකෛස්තං හ්යභිෂේචයාමි ॥ 17 ॥

තතඃ සුවස්ත්රේණ තු ප්රෝංඡනං ත්වං
ගෘහාණ චිත්තේන මයා සුකල්පිතම් ।
තතෝ විශුද්ධේන ජලේන ඪුංඪේ
හ්යාචාංතමේවං කුරු විඝ්නරාජ ॥ 18 ॥

අග්නෞ විශුද්ධේ තු ගෘහාණ වස්ත්රේ
හ්යනර්ඝ්යමෞල්යේ මනසා මයා තේ ।
දත්තේ පරිච්ඡාද්ය නිජාත්මදේහං
තාභ්යාං මයූරේශ ජනාංශ්ච පාලය ॥ 19 ॥

ආචම්ය විඝ්නේශ පුනස්තථෛව
චිත්තේන දත්තං මුඛමුත්තරීයම් ।
ගෘහාණ භක්තප්රතිපාලක ත්වං
නමෝ යථා තාරකසංයුතං තු ॥ 20 ॥

යජ්ඤෝපවීතං ත්රිගුණස්වරූපං
සෞවර්ණමේවං හ්යහිනාථභූතම් ।
භාවේන දත්තං ගණනාථ තත්ත්වං
ගෘහාණ භක්තෝද්ධෘතිකාරණාය ॥ 21 ॥

ආචාංතමේවං මනසා ප්රදත්තං
කුරුෂ්ව ශුද්ධේන ජලේන ඪුංඪේ ।
පුනශ්ච කෞමංඩලකේන පාහි විශ්වං
ප්රභෝ ඛේලකරං සදා තේ ॥ 22 ॥

උද්යද්දිනේශාභමථෝ ගෘහාණ
සිංදූරකං තේ මනසා ප්රදත්තම් ।
සර්වාංගසංලේපනමාදරාද්වෛ
කුරුෂ්ව හේරංබ ච තේන පූර්ණම් ॥ 23 ॥

සහස්රශීර්ෂං මනසා මයා ත්වං
දත්තං කිරීටං තු සුවර්ණජං වෛ ।
අනේකරත්නෛඃ ඛචිතං ගෘහාණ
බ්රහ්මේශ තේ මස්තකශෝභනාය ॥ 24 ॥

විචිත්රරත්නෛඃ කනකේන ඪුංඪේ
යුතානි චිත්තේන මයා පරේශ ।
දත්තානි නානාපදකුංඩලානි
ගෘහාණ ශූර්පශ්රුතිභූෂණාය ॥ 25 ॥

ශුංඩාවිභූෂාර්ථමනංතඛේලින්
සුවර්ණජං කංචුකමාගෘහාණ ।
රත්නෛශ්ච යුක්තං මනසා මයා ය-
-ද්දත්තං ප්රභෝ තත්සඵලං කුරුෂ්ව ॥ 26 ॥

සුවර්ණරත්නෛශ්ච යුතානි ඪුංඪේ
සදෛකදංතාභරණානි කල්ප්ය ।
ගෘහාණ චූඩාකෘතයේ පරේශ
දත්තානි දංතස්ය ච ශෝභනාර්ථම් ॥ 27 ॥

රත්නෛඃ සුවර්ණේන කෘතානි තානි
ගෘහාණ චත්වාරි මයා ප්රකල්ප්ය ।
සංභූෂය ත්වං කටකානි නාථ
චතුර්භුජේෂු හ්යජ විඝ්නහාරින් ॥ 28 ॥

විචිත්රරත්නෛඃ ඛචිතං සුවර්ණ-
-සංභූතකං ගෘහ්ය මයා ප්රදත්තම් ।
තථාංගුලීෂ්වංගුලිකං ගණේශ
චිත්තේන සංශෝභය තත්පරේශ ॥ 29 ॥

විචිත්රරත්නෛඃ ඛචිතානි ඪුංඪේ
කේයූරකාණි හ්යථ කල්පිතානි ।
සුවර්ණජානි ප්රමථාධිනාථ
ගෘහාණ දත්තානි තු බාහුෂු ත්වම් ॥ 30 ॥

ප්රවාලමුක්තාඵලරත්නජෛස්ත්වං
සුවර්ණසූත්රෛශ්ච ගෘහාණ කංඨේ ।
චිත්තේන දත්තා විවිධාශ්ච මාලා
උරෝදරේ ශෝභය විඝ්නරාජ ॥ 31 ॥

චංද්රං ලලාටේ ගණනාථ පූර්ණං
වෘද්ධික්ෂයාභ්යාං තු විහීනමාද්යම් ।
සංශෝභය ත්වං වරසංයුතං තේ
භක්තිප්රියත්වං ප්රකටීකුරුෂ්ව ॥ 32 ॥

චිංතාමණිං චිංතිතදං පරේශ
හෘද්දේශගං ජ්යෝතිර්මයං කුරුෂ්ව ।
මණිං සදානංදසුඛප්රදං ච
විඝ්නේශ දීනාර්ථද පාලයස්ව ॥ 33 ॥

නාභෞ ඵණීශං ච සහස්රශීර්ෂං
සංවේෂ්ටනේනෛව ගණාධිනාථ ।
භක්තං සුභූෂං කුරු භූෂණේන
වරප්රදානං සඵලං පරේශ ॥ 34 ॥

කටීතටේ රත්නසුවර්ණයුක්තාං
කාංචීං සුචිත්තේන ච ධාරයාමි ।
විඝ්නේශ ජ්යෝතිර්ගණදීපනීං තේ
ප්රසීද භක්තං කුරු මාං දයාබ්ධේ ॥ 35 ॥

හේරංබ තේ රත්නසුවර්ණයුක්තේ
සුනූපුරේ මංජිරකේ තථෛව ।
සුකිංකිණීනාදයුතේ සුබුද්ධ්යා
සුපාදයෝඃ ශෝභය මේ ප්රදත්තේ ॥ 36 ॥

ඉත්යාදි නානාවිධභූෂණානි
තවේච්ඡයා මානසකල්පිතානි ।
සංභූෂයාම්යේව ත්වදංගකේෂු
විචිත්රධාතුප්රභවානි ඪුංඪේ ॥ 37 ॥

සුචංදනං රක්තමමෝඝවීර්යං
සුඝර්ෂිතං හ්යෂ්ටකගංධමුඛ්යෛඃ ।
යුක්තං මයා කල්පිතමේකදංත
ගෘහාණ තේ ත්වංගවිලේපනාර්ථම් ॥ 38 ॥

ලිප්තේෂු වෛචිත්ර්යමථාෂ්ටගංධෛ-
-රංගේෂු තේऽහං ප්රකරෝමි චිත්රම් ।
ප්රසීද චිත්තේන විනායක ත්වං
තතඃ සුරක්තං රවිමේව ඵාලේ ॥ 39 ॥

ඝෘතේන වෛ කුංකුමකේන රක්තාන්
සුතංඩුලාංස්තේ පරිකල්පයාමි ।
ඵාලේ ගණාධ්යක්ෂ ගෘහාණ පාහි
භක්තාන් සුභක්තිප්රිය දීනබංධෝ ॥ 40 ॥

ගෘහාණ භෝ චංපකමාලතීනි
ජලපංකජානි ස්ථලපංකජානි ।
චිත්තේන දත්තානි ච මල්ලිකානි
පුෂ්පාණි නානාවිධවෘක්ෂජානි ॥ 41 ॥

පුෂ්පෝපරි ත්වං මනසා ගෘහාණ
හේරංබ මංදාරශමීදළානි ।
මයා සුචිත්තේන ප්රකල්පිතානි
හ්යපාරකාණි ප්රණවාකෘතේ තු ॥ 42 ॥

දූර්වාංකුරාන්වෛ මනසා ප්රදත්තාං-
-ස්ත්රිපංචපත්රෛර්යුතකාංශ්ච ස්නිග්ධාන් ।
ගෘහාණ විඝ්නේශ්වර සංඛ්යයා ත්වං
හීනාංශ්ච සර්වෝපරි වක්රතුංඩ ॥ 43 ॥

දශාංගභූතං මනසා මයා තේ
ධූපං ප්රදත්තං ගණරාජ ඪුංඪේ ।
ගෘහාණ සෞරභ්යකරං පරේශ
සිද්ධ්යා ච බුද්ධ්යා සහ භක්තපාල ॥ 44 ॥

දීපං සුවර්ත්යා යුතමාදරාත්තේ
දත්තං මයා මානසකං ගණේශ ।
ගෘහාණ නානාවිධජං ඝෘතාදි-
-තෛලාදිසංභූතමමෝඝදෘෂ්ටේ ॥ 45 ॥

භෝජ්යං ච ලේහ්යං ගණරාජ පේයං
චෝෂ්යං ච නානාවිධෂඩ්රසාඪ්යම් ।
ගෘහාණ නෛවේද්යමථෝ මයා තේ
සුකල්පිතං පුෂ්ටිපතේ මහාත්මන් ॥ 46 ॥

සුවාසිතං භෝජනමධ්යභාගේ
ජලං මයා දත්තමථෝ ගෘහාණ ।
කමංඩලුස්ථං මනසා ගණේශ
පිබස්ව විශ්වාදිකතෘප්තිකාරින් ॥ 47 ॥

තතඃ කරෝද්වර්තනකං ගෘහාණ
සෞගංධ්යයුක්තං මුඛමාර්ජනාය ।
සුවාසිතේනෛව සුතීර්ථජේන
සුකල්පිතං නාථ ගෘහාණ ඪුංඪේ ॥ 48 ॥

පුනස්තථාචම්ය සුවාසිතං ච
දත්තං මයා තීර්ථජලං පිබස්ව ।
ප්රකල්ප්ය විඝ්නේශ තතඃ පරං තේ
සංප්රෝංඡනං හස්තමුඛේ කරෝමි ॥ 49 ॥

ද්රාක්ෂාදිරංභාඵලචූතකානි
ඛාර්ජූරකාර්කංධුකදාඩිමානි ।
සුස්වාදයුක්තානි මයා ප්රකල්ප්ය
ගෘහාණ දත්තානි ඵලානි ඪුංඪේ ॥ 50 ॥

පුනර්ජලේනෛව කරාදිකං තේ
සංක්ෂාලයාමි මනසා ගණේශ ।
සුවාසිතං තෝයමථෝ පිබස්ව
මයා ප්රදත්තං මනසා පරේශ ॥ 51 ॥

අෂ්ටාංගයුක්තං ගණනාථ දත්තං
තාංබූලකං තේ මනසා මයා වෛ ।
ගෘහාණ විඝ්නේශ්වර භාවයුක්තං
සදා සකෘත්තුංඩවිශෝධනාර්ථම් ॥ 52 ॥

තතෝ මයා කල්පිතකේ ගණේශ
මහාසනේ රත්නසුවර්ණයුක්තේ ।
මංදාරකාර්පාසකයුක්තවස්ත්රෛ-
-රනර්ඝ්යසංඡාදිතකේ ප්රසීද ॥ 53 ॥

තතස්ත්වදීයාවරණං පරේශ
සංපූජයාමි මනසා යථාවත් ।
නානෝපචාරෛඃ පරමප්රියෛස්තු
ත්වත්ප්රීතිකාමාර්ථමනාථබංධෝ ॥ 54 ॥

ගෘහාණ ලංබෝදර දක්ෂිණාං තේ
හ්යසංඛ්යභූතාං මනසා ප්රදත්තාම් ।
සෞවර්ණමුද්රාදිකමුඛ්යභාවාං
පාහි ප්රභෝ විශ්වමිදං ගණේශ ॥ 55 ॥

රාජෝපචාරාන්විවිධාන්ගෘහාණ
හස්ත්යශ්වඡත්රාදිකමාදරාද්වෛ ।
චිත්තේන දත්තාන් ගණනාථ ඪුංඪේ
හ්යපාරසංඛ්යාන් ස්ථිරජංගමාංස්තේ ॥ 56 ॥

දානාය නානාවිධරූපකාංස්තේ
ගෘහාණ දත්තාන්මනසා මයා වෛ ।
පදාර්ථභූතාන් ස්ථිරජංගමාංශ්ච
හේරංබ මාං තාරය මෝහභාවාත් ॥ 57 ॥

මංදාරපුෂ්පාණි ශමීදළානි
දූර්වාංකුරාංස්තේ මනසා දදාමි ।
හේරංබ ලංබෝදර දීනපාල
ගෘහාණ භක්තං කුරු මාං පදේ තේ ॥ 58 ॥

තතෝ හරිද්රාමබිරං ගුලාලං
සිංදූරකං තේ පරිකල්පයාමි ।
සුවාසිතං වස්තු සුවාසභූතෛ-
-ර්ගෘහාණ බ්රහ්මේශ්වර ශෝභනාර්ථම් ॥ 59 ॥

තතඃ ශුකාද්යාඃ ශිවවිෂ්ණුමුඛ්යා
ඉංද්රාදයඃ ශේෂමුඛාස්තථාන්යේ ।
මුනීංද්රකාඃ සේවකභාවයුක්තාඃ
සභාසනස්ථං ප්රණමංති ඪුංඪිම් ॥ 60 ॥

වාමාංගකේ ශක්තියුතා ගණේශං
සිද්ධිස්තු නානාවිධසිද්ධිභිස්තම් ।
අත්යංතභාවේන සුසේවතේ තු
මායාස්වරූපා පරමාර්ථභූතා ॥ 61 ॥

ගණේශ්වරං දක්ෂිණභාගසංස්ථා
බුද්ධිඃ කලාභිශ්ච සුබෝධිකාභිඃ ।
විද්යාභිරේවං භජතේ පරේශ
මායාසු සාංඛ්යප්රදචිත්තරූපාඃ ॥ 62 ॥

ප්රමෝදමෝදාදයඃ පෘෂ්ඨභාගේ
ගණේශ්වරං භාවයුතා භජංතේ ।
භක්තේශ්වරා මුද්ගලශංභුමුඛ්යාඃ
ශුකාදයස්තං ස්ම පුරෝ භජංතේ ॥ 63 ॥

ගංධර්වමුඛ්යා මධුරං ජගුශ්ච
ගණේශගීතං විවිධස්වරූපම් ।
නෘත්යං කලායුක්තමථෝ පුරස්තා-
-ච්චක්රුස්තථා හ්යප්සරසෝ විචිත්රම් ॥ 64 ॥

ඉත්යාදිනානාවිධභාවයුක්තෛඃ
සංසේවිතං විඝ්නපතිං භජාමි ।
චිත්තේන ධ්යාත්වා තු නිරංජනං වෛ
කරෝමි නානාවිධදීපයුක්තම් ॥ 65 ॥

චතුර්භුජං පාශධරං ගණේශං
තථාංකුශං දංතයුතං තමේවම් ।
ත්රිනේත්රයුක්තං ත්වභයංකරං තං
මහෝදරං චෛකරදං ගජාස්යම් ॥ 66 ॥

සර්පෝපවීතං ගජකර්ණධාරං
විභූතිභිඃ සේවිතපාදපද්මම් ।
ධ්යායේද්ගණේශං විවිධප්රකාරෛඃ
සුපූජිතං ශක්තියුතං පරේශම් ॥ 67 ॥

තතෝ ජපං වෛ මනසා කරෝමි
ස්වමූලමංත්රස්ය විධානයුක්තම් ।
අසංඛ්යභූතං ගණරාජ හස්තේ
සමර්පයාම්යේව ගෘහාණ ඪුංඪේ ॥ 68 ॥

ආරාර්තිකාං කර්පූරකාදිභූතා-
-මපාරදීපාං ප්රකරෝමි පූර්ණාම් ।
චිත්තේන ලංබෝදර තාං ගෘහාණ
හ්යජ්ඤානධ්වාංතාඝහරාං නිජානාම් ॥ 69 ॥

වේදේෂු විඝ්නේශ්වරකෛඃ සුමංත්රෛඃ
සුමංත්රිතං පුෂ්පදලං ප්රභූතම් ।
ගෘහාණ චිත්තේන මයා ප්රදත්ත-
-මපාරවෘත්ත්යා ත්වථ මංත්රපුෂ්පම් ॥ 70 ॥

අපාරවෘත්යා ස්තුතිමේකදංතං
ගෘහාණ චිත්තේන කෘතාං ගණේශ ।
යුක්තාං ශ්රුතිස්මාර්තභවෛඃ පුරාණෛඃ
සර්වෛඃ පරේශාධිපතේ මයා තේ ॥ 71 ॥

ප්රදක්ෂිණා මානසකල්පිතාස්තා
ගෘහාණ ලංබෝදර භාවයුක්තාඃ ।
සංඛ්යාවිහීනා විවිධස්වරූපා
භක්තාන් සදා රක්ෂ භවාර්ණවාද්වෛ ॥ 72 ॥

නතිං තතෝ විඝ්නපතේ ගෘහාණ
සාෂ්ටාංගකාද්යාං විවිධස්වරූපාම් ।
සංඛ්යාවිහීනාං මනසා කෘතාං තේ
සිද්ධ්යා ච බුද්ධ්යා පරිපාලයාශු ॥ 73 ॥

න්යූනාතිරික්තං තු මයා කෘතං චේ-
-ත්තදර්ථමංතේ මනසා ගෘහාණ ।
දූර්වාංකුරාන්විඝ්නපතේ ප්රදත්තාන්
සංපූර්ණමේවං කුරු පූජනං මේ ॥ 74 ॥

ක්ෂමස්ව විඝ්නාධිපතේ මදීයාන්
සදාපරාධාන් විවිධස්වරූපාන් ।
භක්තිං මදීයාං සඵලාං කුරුෂ්ව
සංප්රාර්ථයාමි මනසා ගණේශ ॥ 75 ॥

තතඃ ප්රසන්නේන ගජානනේන
දත්තං ප්රසාදං ශිරසාභිවංද්ය ।
ස්වමස්තකේ තං පරිධාරයාමි
චිත්තේන විඝ්නේශ්වරමානතෝऽස්මි ॥ 76 ॥

උත්ථාය විඝ්නේශ්වර ඒව තස්මා-
-ද්ගතස්තතස්ත්වංතරධානශක්ත්යා ।
ශිවාදයස්තං ප්රණිපත්ය සර්වේ
ගතාඃ සුචිත්තේන ච චිංතයාමි ॥ 77 ॥

සර්වාන්නමස්කෘත්ය තතෝऽහමේව
භජාමි චිත්තේන ගණාධිපං තම් ।
ස්වස්ථානමාගත්ය මහානුභාවෛ-
-ර්භක්තෛර්ගණේශස්ය ච ඛේලයාමි ॥ 78 ॥

ඒවං ත්රිකාලේෂු ගණාධිපං තං
චිත්තේන නිත්යං පරිපූජයාමි ।
තේනෛව තුෂ්ටඃ ප්රදදාතු භාවං
විශ්වේශ්වරෝ භක්තිමයං තු මහ්යම් ॥ 79 ॥

ගණේශපාදෝදකපානකං ච
හ්යුච්ඡිෂ්ටගංධස්ය සුලේපනං තු ।
නිර්මාල්යසංධාරණකං සුභෝජ්යං
ලංබෝදරස්යාස්තු හි භුක්තශේෂම් ॥ 80 ॥

යං යං කරෝම්යේව තදේව දීක්ෂා
ගණේශ්වරස්යාස්තු සදා ගණේශ ।
ප්රසීද නිත්යං තව පාදභක්තං
කුරුෂ්ව මාං බ්රහ්මපතේ දයාලෝ ॥ 81 ॥

තතස්තු ශය්යාං පරිකල්පයාමි
මංදාරකාර්පාසකවස්ත්රයුක්තාම් ।
සුවාසපුෂ්පාදිභිරර්චිතාං
තේ ගෘහාණ නිද්රාං කුරු විඝ්නරාජ ॥ 82 ॥

සිද්ධ්යා ච බුද්ධ්යා සහිතං ගණේශ
සුනිද්රිතං වීක්ෂ්ය තථාහමේව ।
ගත්වා ස්වවාසං ච කරෝමි නිද්රාං
ධ්යාත්වා හෘදි බ්රහ්මපතිං තදීයඃ ॥ 83 ॥

ඒතාදෘශං සෞඛ්යමමෝඝශක්තේ
දේහි ප්රභෝ මානසජං ගණේශ ।
මහ්යං ච තේනෛව කෘතාර්ථරූපෝ
භවාමි භක්තිරසලාලසෝऽහම් ॥ 84 ॥

ගාර්ග්ය උවාච ।
ඒවං නිත්යං මහාරාජ ගෘත්සමදෝ මහායශාඃ ।
චකාර මානසීං පූජාං යෝගීංද්රාණාං ගුරුඃ ස්වයම් ॥ 85 ॥

ය ඒතාං මානසීං පූජාං කරිෂ්යති නරෝත්තමඃ ।
පඨිෂ්යති සදා සෝऽපි ගාණපත්යෝ භවිෂ්යති ॥ 86 ॥

ශ්රාවයිෂ්යති යෝ මර්ත්යඃ ශ්රෝෂ්යතේ භාවසංයුතඃ ।
ස ක්රමේණ මහීපාල බ්රහ්මභූතෝ භවිෂ්යති ॥ 87 ॥

යං යමිච්ඡති තං තං වෛ සඵලං තස්ය ජායතේ ।
අංතේ ස්වානංදගඃ සෝऽපි යෝගිවංද්යෝ භවිෂ්යති ॥ 88 ॥

ඉති ශ්රීමදාංත්යේ මෞද්ගල්යේ ගණේශමානසපූජා සංපූර්ණම් ।