ගණපති නිත්ය පූජා විධානම්

ආවශ්යකානි වස්තූනි
– ආසනං
– දීපඃ
– ගංධඃ
– කුංකුමං
– අක්ෂතාඃ
– පුෂ්පාණි
– ධූපඃ
– නෛවේද්යං
– තාංබූලං
– ආචමනීයං
– පූජා පාත්රං
– කලශඃ
– ශංඛඃ [optional]
– ගණපති ප්රතිමා වා චිත්රපටඃ වා

පූර්වාංග පූජා
ශ්රීමහාගණාධිපතයේ නමඃ ।
ශ්රී ගුරුභ්යෝ නමඃ ।
හරිඃ ඕම් ।

ශුචිඃ
අපවිත්රඃ පවිත්රෝ වා සර්වාවස්ථාං ගතෝऽපි වා ।
යඃ ස්මරේත් පුංඩරීකාක්ෂං ස බාහ්යාභ්යංතරඃ ශුචිඃ ॥
පුංඩරීකාක්ෂ පුංඩරීකාක්ෂ පුංඩරීකාක්ෂාය නමඃ ॥

ප්රාර්ථනා
ශුක්ලාංබරධරං විෂ්ණුං ශශිවර්ණං චතුර්භුජම් ।
ප්රසන්නවදනං ධ්යායේත් සර්වවිඝ්නෝපශාංතයේ ॥

අගජානන පද්මාර්කං ගජානනමහර්නිශම් ।
අනේකදං තං භක්තානාං ඒකදංතමුපාස්මහේ ॥

තදේව ලග්නං සුදිනං තදේව
තාරාබලං චංද්රබලං තදේව ।
විද්යාබලං දෛවබලං තදේව
ලක්ෂ්මීපතේ තේऽංඝ්රියුගං ස්මරාමි ॥

ගුරුර්බ්රහ්මා ගුරුර්විෂ්ණුඃ ගුරුර්දේවෝ මහේශ්වරඃ ।
ගුරුඃ සාක්ෂාත් පරබ්රහ්ම තස්මෛ ශ්රීගුරවේ නමඃ ॥

සර්වමංගළ මාංගළ්යේ ශිවේ සර්වාර්ථසාධිකේ ।
ශරණ්යේ ත්ර්යංබකේ ගෞරී නාරායණි නමෝऽස්තු තේ ॥

ශ්රීලක්ෂ්මීනාරායණාභ්යාං නමඃ ।
උමාමහේශ්වරාභ්යාං නමඃ ।
වාණීහිරණ්යගර්භාභ්යාං නමඃ ।
ශචීපුරංදරාභ්යාං නමඃ ।
අරුංධතීවසිෂ්ඨාභ්යාං නමඃ ।
ශ්රීසීතාරාමාභ්යාං නමඃ ।
මාතාපිතෘභ්යෝ නමඃ ।
සර්වේභ්යෝ මහාජනේභ්යෝ නමඃ ।

ආචමනං
ඕං කේශවාය ස්වාහා ।
ඕං නාරායණාය ස්වාහා ।
ඕං මාධවාය ස්වාහා ।
ඕං ගෝවිංදාය නමඃ ।
ඕං විෂ්ණවේ නමඃ ।
ඕං මධුසූදනාය නමඃ ।
ඕං ත්රිවික්රමාය නමඃ ।
ඕං වාමනාය නමඃ ।
ඕං ශ්රීධරාය නමඃ ।
ඕං හෘෂීකේශාය නමඃ ।
ඕං පද්මනාභාය නමඃ ।
ඕං දාමෝදරාය නමඃ ।
ඕං සංකර්ෂණාය නමඃ ।
ඕං වාසුදේවාය නමඃ ।
ඕං ප්රද්යුම්නාය නමඃ ।
ඕං අනිරුද්ධාය නමඃ ।
ඕං පුරුෂෝත්තමාය නමඃ ।
ඕං අධෝක්ෂජාය නමඃ ।
ඕං නාරසිංහාය නමඃ ।
ඕං අච්යුතාය නමඃ ।
ඕං ජනාර්දනාය නමඃ ।
ඕං උපේංද්රාය නමඃ ।
ඕං හරයේ නමඃ ।
ඕං ශ්රීකෘෂ්ණාය නමඃ ।

දීපාරාධනම්
දීපස්ත්වං බ්රහ්මරූපෝऽසි ජ්යෝතිෂාං ප්රභුරව්යයඃ ।
සෞභාග්යං දේහි පුත්රාංශ්ච සර්වාන්කාමාංශ්ච දේහි මේ ॥
භෝ දීප දේවි රූපස්ත්වං කර්මසාක්ෂී හ්යවිඝ්නකෘත් ।
යාවත්පූජාං කරිෂ්යාමි තාවත්ත්වං සුස්ථිරෝ භව ॥
දීපාරාධන මුහූර්තඃ සුමුහූර්තෝऽස්තු ॥

භූතෝච්චාටනම්
උත්තිෂ්ඨංතු භූතපිශාචාඃ ය ඒතේ භූමිභාරකාඃ ।
ඒතේෂාමවිරෝධේන බ්රහ්මකර්ම සමාරභේ ॥
අපසර්පංතු තේ භූතා යේ භූතා භූමිසංස්ථිතාඃ ।
යේ භූතා විඝ්නකර්තාරස්තේ ගච්ඡංතු ශිවාऽජ්ඤයා ॥

ප්රාණායාමඃ

ඕං භූඃ । ඕං භුවඃ॑ । ඕග්​ම් සුවඃ॑ । ඕං මහඃ॑ । ඕං ජනඃ॑ । ඕං තපඃ॑ । ඕග්​ම් සත්යම් ।
ඕං තත්ස॑වි॒තුර්වරේ᳚ණ්යං॒ භර්ගෝ॑ දේ॒වස්ය॑ ධීමහි ।
ධියෝ॒ යෝ නඃ॑ ප්රචෝ॒දයා᳚ත් ॥
ඕමාපෝ॒ ජ්යෝතී॒ රසෝ॒ऽමෘතං॒ බ්රහ්ම॒ භූර්භුව॒ස්සුව॒රෝම් ॥

සංකල්පඃ
මම උපාත්ත සමස්ත දුරිතක්ෂය ද්වාරා ශ්රීපරමේශ්වර ප්රීත්යර්ථං, මම/අස්මාකං සහකුටුංබස්ය ක්ෂේම-ස්ථෛර්ය-ධෛර්ය-වීර්ය-විජය-අභය-ආයුඃ-ආරෝග්ය-ඓශ්වර්ය-අභිවෘද්ධ්යර්ථං, ධර්මාර්ථ-කාම-මෝක්ෂ-චතුර්විධ-පුරුෂාර්ථ-ඵල-සිද්ධ්යර්ථං, සර්වාභීෂ්ට-සිද්ධ්යර්ථං, ශ්රීමහාගණපති-ප්රීත්යර්ථං, යාවච්ඡක්ති ධ්යාන-ආවාහනාදි-ෂෝඩශෝපචාර-පූජාං කරිෂ්යේ ॥

තදංග කලශාරාධනං කරිෂ්යේ ॥

කලශාරාධනම්
කලශේ ගංධ පුෂ්පාක්ෂතෛරභ්යර්ච්ය ।
කලශේ උදකං පූරයිත්වා ।
කලශස්යෝපරි හස්තං නිධාය ।

කලශස්ය මුඛේ විෂ්ණුඃ කංඨේ රුද්රඃ සමාශ්රිතඃ ।
මූලේ ත්වස්ය ස්ථිතෝ බ්රහ්මා මධ්යේ මාතෘගණාඃ ස්මෘතාඃ ॥
කුක්ෂෞ තු සාගරාඃ සර්වේ සප්තද්වීපා වසුංධරා ।
ඍග්වේදෝऽථ යජුර්වේදෝ සාමවේදෝ හ්යථර්වණඃ ॥
අංගෛශ්ච සහිතාඃ සර්වේ කලශාංබු සමාශ්රිතාඃ ॥

ගංගේ ච යමුනේ චෛව ගෝදාවරී සරස්වතී ।
නර්මදේ සිංධු කාවේරී ජලේऽස්මින් සන්නිධිං කුරු ॥
කාවේරී තුංගභද්රා ච කෘෂ්ණවේණී ච ගෞතමී ।
භාගීරථීති විඛ්යාතාඃ පංචගංගාඃ ප්රකීර්තිතාඃ ॥

ආයාංතු දේවපූජාර්ථං මම දුරිතක්ෂයකාරකාඃ ।
කලශෝදකේන පූජා ද්රව්යාණි සංප්රෝක්ෂ්ය, දේවං සංප්රෝක්ෂ්ය, ආත්මානං ච සංප්රෝක්ෂ්ය ॥

ශංඛපූජා
ශංඛං චංද්රාර්ක දෛවතං මධ්යේ වරුණ දේවතාම් ।
පෘෂ්ඨේ ප්රජාපතිං විංද්යාදග්රේ ගංගා සරස්වතීම් ॥
ත්රෛලෝක්යේ යානි තීර්ථානි වාසුදේවස්ය ආජ්ඤයා ।
ශංඛේ තිෂ්ඨංතු විප්රේංද්රාඃ තස්මාත් ශංඛං ප්රපූජයේත් ॥

ඕං ශංඛාය නමඃ ।
ඕං ධවළාය නමඃ ।
ඕං පාංචජන්යාය නමඃ ।
ඕං ශංඛදේවතාභ්යෝ නමඃ ।
සකලපූජාර්ථේ අක්ෂතාන් සමර්පයාමි ॥

ඝංටානාදඃ
ආගමාර්ථං තු දේවානාං ගමනාර්ථං තු රාක්ෂසාම් ।
ඝංටාරවං කරෝම්යාදෞ දේවතාහ්වාන ලාංඡනම් ॥
ඕං ඝංටාදේවතාභ්යෝ නමඃ ।
සකලෝපචාර පූජාර්ථේ අක්ෂතාන් සමර්පයාමි ॥

ශ්රී මහාගණපති පූජා

ඕං ග॒ණානාං᳚ ත්වා ග॒ණප॑තිග්​ම් හවාමහේ ක॒විං ක॑වී॒නාං උප॒මශ්ර॑වස්තවම් ।
ජ්යේ॒ෂ්ඨ॒රාජං॒ බ්රහ්ම॑ණාං බ්රහ්මණස්පත॒ ආ නඃ॑ ශෘ॒ණ්වන්නූ॒තිභි॑ස්සීද॒ සාද॑නම් ॥

සුමුඛශ්චෛකදංතශ්ච කපිලෝ ගජකර්ණකඃ ।
ලංබෝදරශ්ච විකටෝ විඝ්නරාජෝ ගණාධිපඃ ॥
ධූමකේතුර්ගණාධ්යක්ෂඃ ඵාලචංද්රෝ ගජානනඃ ।
වක්රතුංඩඃ ශූර්පකර්ණෝ හේරංබඃ ස්කංදපූර්වජඃ ॥

ඕං ශ්රීමහාගණපතයේ නමඃ ।
ධ්යායාමි । ආවාහයාමි । ආසනං සමර්පයාමි ।
පාද්යං සමර්පයාමි । අර්ඝ්යං සමර්පයාමි । ආචමනීයං සමර්පයාමි ।
ස්නානං සමර්පයාමි । වස්ත්රං සමර්පයාමි । යජ්ඤෝපවීතං සමර්පයාමි ।
ගංධං සමර්පයාමි । පුෂ්පාණි සමර්පයාමි ।
ධූපමාඝ්රාපයාමි । දීපං දර්ශයාමි ।
නෛවේද්යං සමර්පයාමි । තාංබූලං සමර්පයාමි ।
නීරාජනං සමර්පයාමි । මංත්රපුෂ්පං සමර්පයාමි ।
ප්රදක්ෂිණ නමස්කාරාන් සමර්පයාමි ॥

ෂෝඩශෝපචාර පූජා
ගණපති ධ්යානම්

ඕං ග॒ණානාං᳚ ත්වා ග॒ණප॑තිග්​ම් හවාමහේ ක॒විං ක॑වී॒නාං උප॒මශ්ර॑වස්තවම් ।
ජ්යේ॒ෂ්ඨ॒රාජං॒ බ්රහ්ම॑ණාං බ්රහ්මණස්පත॒ ආ නඃ॑ ශෘ॒ණ්වන්නූ॒තිභි॑ස්සීද॒ සාද॑නම් ॥


ඒකදං॒තාය॑ වි॒ද්මහේ॑ වක්රතුං॒ඩාය॑ ධීමහි ।
තන්නෝ॑ දංතිඃ ප්රචෝ॒දයා᳚ත් ॥

ඒකදංතං චතුර්හස්තං පාශමංකුශධාරිණම් ।
රදං ච වරදං හස්තෛර්බිභ්රාණං මූෂකධ්වජම් ॥
රක්තං ලංබෝදරං ශූර්පකර්ණකං රක්තවාසසම් ।
රක්තගංධානුලිප්තාංගං රක්තපුෂ්පෛඃ සුපූජිතම් ॥
භක්තානුකංපිනං දේවං ජගත්කාරණමච්යුතම් ।
ආවිර්භූතං ච සෘෂ්ට්යාදෞ ප්රකෘතේඃ පුරුෂාත්පරම් ॥
ඒවං ධ්යායති යෝ නිත්යං ස යෝගී යෝගිනාං වරඃ ॥

චතුර්බාහුං ත්රිනේත්රං ච ගජාස්යං රක්තවර්ණකම් ।
පාශාංකුශාදි සංයුක්තං මායායුක්තං ප්රචිංතයේත් ॥

ඕං ශ්රීමහාගණපතයේ නමඃ ।
ධ්යායාමි । ධ්යානං සමර්පයාමි ॥

ආවාහනම්
ආගච්ඡ බ්රහ්මණාං නාථ සුරාසුරවරාර්චිත ।
සිද්ධිබුද්ධ්යාදි සංයුක්ත භක්තිග්රහණ ලාලස ॥
ඕං ශ්රීමහාගණපතයේ නමඃ ।
ආවාහයාමි । ස්ථාපයාමි । පූජයාමි ॥

ආසනම්
රත්නසිංහාසනං ස්වාමින් ගෘහාණ ගණනායක ।
තත්රෝපවිශ්ය විඝ්නේශ රක්ෂ භක්තාන්විශේෂතඃ ॥
ඕං ශ්රීමහාගණපතයේ නමඃ ।
ආසනං සමර්පයාමි ॥

පාද්යම්
සුවාසිතාභිරද්භිශ්ච පාදප්රක්ෂාලනං ප්රභෝ ।
ශීතෝෂ්ණාංභඃ කරෝමි තේ ගෘහාණ පාද්යමුත්තමම් ॥
ඕං ශ්රීමහාගණපතයේ නමඃ ।
පාදයෝඃ පාද්යං සමර්පයාමි ॥

අර්ඝ්යම්
රත්නප්රවාලමුක්තාද්යෛරනර්ඝ්යෛඃ සංස්කෘතං ප්රභෝ ।
අර්ඝ්යං ගෘහාණ හේරංබ ද්විරදානන තෝෂකම් ॥
ඕං ශ්රීමහාගණපතයේ නමඃ ।
හස්තයෝඃ අර්ඝ්යං සමර්පයාමි ॥

ආචමනීයම්
සර්වතීර්ථාහෘතං තෝයං සුවාසිතං සුවස්තුභිඃ ।
ආචමනං ච තේනෛව කුරුෂ්ව ගණනායක ॥
ඕං ශ්රීමහාගණපතයේ නමඃ ।
මුඛේ ආචමනීයං සමර්පයාමි ॥

ස්නානම්

ආපෝ॒ හිෂ්ඨා ම॑යෝ॒භුව॒ස්තා න॑ ඌ॒ර්ජේ ද॑ධාතන ।
ම॒හේ රණා॑ය॒ චක්ෂ॑සේ ॥
යෝ වඃ॑ ශි॒වත॑මෝ රස॒ස්තස්ය॑ භාජයතේ॒හ නඃ॑ ।
උ॒ශ॒තීරි॑ව මා॒ත॑රඃ ॥
තස්මා॒ අරං॑ ගමාම වෝ॒ යස්ය॒ ක්ෂයා॑ය॒ ජින්ව॑ථ ।
ආපෝ॑ ජ॒නය॑ථා ච නඃ ॥

ඕං ශ්රීමහාගණපතයේ නමඃ ।
ශුද්ධෝදක ස්නානං සමර්පයාමි ॥
ස්නානානංතරං ආචමනීයං සමර්පයාමි ॥

වස්ත්රම්
වස්ත්රයුග්මං ගෘහාණ ත්වමනර්ඝං රක්තවර්ණකම් ।
ලෝකලජ්ජාහරං චෛව විඝ්නනාථ නමෝऽස්තු තේ ॥
ඕං ශ්රීමහාගණපතයේ නමඃ ।
වස්ත්රං සමර්පයාමි ॥

යජ්ඤෝපවීතම්
යජ්ඤෝපවීතං පරමං පවිත්රං ප්රජාපතේර්යත්සහජං පුරස්තාත් ।
ආයුෂ්යමග්ර්යං ප්රතිමුංච ශුභ්රං යජ්ඤෝපවීතං බලමස්තු තේජඃ ॥
ඕං ශ්රීමහාගණපතයේ නමඃ ।
යජ්ඤෝපවීතං සමර්පයාමි ॥

ගංධම්
රක්ත චංදන සංයුක්තං ගංධං ගණේස ගෘහ්යතාම් ।
භක්ත්යා සමර්පිතං තුභ්යං සර්වසංපත්තිප්රදායකම් ॥
ඕං ශ්රීමහාගණපතයේ නමඃ ।
ගංධං සමර්පයාමි ॥

අර්චන
අක්ෂතාන් ධවළාන් දිව්යාන් පුෂ්පාණි ච සුගංධීනි ।
භක්ත්යා දත්තානි ගෘහ්යංතාං සර්වදේවාඃ ප්රසීදත ॥

අංග පූජා
ඕං සුමුඛාය නමඃ – පාදෞ පූජයාමි ।
ඕං ඒකදංතාය නමඃ – ගුල්ඵෞ පූජයාමි ।
ඕං කපිලාය නමඃ – ජානුනී පූජයාමි ।
ඕං ගජකර්ණකාය නමඃ – ඌරූ පූජයාමි ।
ඕං ලංබෝදරාය නමඃ – උදරං පූජයාමි ।
ඕං විකටාය නමඃ – හෘදයං පූජයාමි ।
ඕං විඝ්නරාජාය නමඃ – කංඨං පූජයාමි ।
ඕං ගණාධිපාය නමඃ – ස්කංධෞ පූජයාමි ।
ඕං ධූමකේතවේ නමඃ – මුඛං පූජයාමි ।
ඕං ගණාධ්යක්ෂාය නමඃ – නේත්රේ පූජයාමි ।
ඕං ඵාලචංද්රාය නමඃ – ලලාටං පූජයාමි ।
ඕං ගජානනාය නමඃ – ශිරඃ පූජයාමි ।
ඕං වක්රතුංඩාය නමඃ – සර්වාණ්යංගානි පූජයාමි ॥

[Recite the gaNESa aShTOttara Sata nAmAvaLI, or at least a few known names of Ganapati. Offer flowers or akshatas with each name.]

අථවා ගණපති නාමාවළී පඨනම් ॥

ඕං ශ්රීමහාගණපතයේ නමඃ ।
අෂ්ටෝත්තර ශත නාමාවළී පූජාං සමර්පයාමි ।
අක්ෂතාන් පුෂ්පාණි ච සමර්පයාමි ॥

ධූපම්
දශාංගං ගුග්ගුලූපේතං සුගංධං සුමනෝහරම් ।
උමාසුත නමස්තුභ්යං ධූපෝऽයං ප්රතිගෘහ්යතාම් ॥
ඕං ශ්රීමහාගණපතයේ නමඃ ।
ධූපමාඝ්රාපයාමි ॥

දීපම්
සාජ්යං ත්රිවර්ති සංයුක්තං වහ්නිනා යෝජිතං ප්රියම් ।
ගෘහාණ මංගළං දීපං විඝ්නරාජ නමෝऽස්තු තේ ॥
ඕං ශ්රීමහාගණපතයේ නමඃ ।
දීපං දර්ශයාමි ॥

නෛවේද්යම්
නෛවේද්යං ගෘහ්යතාං දේව භක්ත්යා සංපාදිතං මයා ।
ඉදං ඵලං ච පානීයං සර්වෝපචාර සංයුතම් ॥

ඕං භූර්භුව॒ස්සුවඃ॒ । තත්ස॑වි॒තුර්වරේ᳚ණ්යං॒ භර්ගෝ॑ දේ॒වස්ය॑ ධීමහි ।
ධි॒යෝ යෝ නඃ॑ ප්රචෝ॒දයා᳚ත් ॥

සත්යං ත්වා ඍතේන පරිෂිංචාමි ।
අමෘතමස්තු । අමෘතෝපස්තරණමසි ।
ඕං ප්රාණාය ස්වාහා । ඕං අපානාය ස්වාහා । ඕං ව්යානාය ස්වාහා ।
ඕං උදානාය ස්වාහා । ඕං සමානාය ස්වාහා ।
මධ්යේ මධ්යේ පානීයං සමර්පයාමි ।
අමෘතාපිධානමසි ।
උත්තරාපෝශනං සමර්පයාමි ।
හස්තෞ ප්රක්ෂාළයාමි । පාදෞ ප්රක්ෂාළයාමි ।
ශුද්ධාචමනීයං සමර්පයාමි ॥

ඕං ශ්රීමහාගණපතයේ නමඃ ।
නෛවේද්යං සමර්පයාමි ॥

තාංබූලම්
අෂ්ටාංගං දේව තාංබූලං ගෘහාණ මුඛවාසනම් ।
අසකෘද්විඝ්නරාජ ත්වං මයා දත්තං විශේෂතඃ ॥
ඕං ශ්රීමහාගණපතයේ නමඃ ।
තාංබූලං සමර්පයාමි ॥

නීරාජනම්
නානාදීපසමායුක්තං නීරාජනං ගජානන ।
ගෘහාණ භාව සංයුක්තං සර්වාජ්ඤානවිනාශන ॥
ඕං ශ්රීමහාගණපතයේ නමඃ ।
නීරාජනං සමර්පයාමි ॥

මංත්රපුෂ්පම්

ඕං ග॒ණානාං᳚ ත්වා ග॒ණප॑තිග්​ම් හවාමහේ ක॒විං ක॑වී॒නාං උප॒මශ්ර॑වස්තවම් ।
ජ්යේ॒ෂ්ඨ॒රාජං॒ බ්රහ්ම॑ණාං බ්රහ්මණස්පත॒ ආ නඃ॑ ශෘ॒ණ්වන්නූ॒තිභි॑ස්සීද॒ සාද॑නම් ॥

චතුර්වේදභවෛර්මංත්රෛර්ගාණපත්යෛර්ගජානන ।
මංත්රිතානි ගෘහාණ ත්වං පුෂ්පපත්රාණි විඝ්නප ॥
ඕං ශ්රීමහාගණපතයේ නමඃ ।
මංත්රපුෂ්පං සමර්පයාමි ॥

ප්රදක්ෂිණම්
ඒකවිංශතිසංඛ්යං වා ත්රිසංඛ්යං වා ගජානන ।
ප්රාදක්ෂිණ්යං ගෘහාණ ත්වං බ්රහ්මන් බ්රහ්මේශභාවන ॥
ඕං ශ්රීමහාගණපතයේ නමඃ ।
ප්රදක්ෂිණ නමස්කාරාන් සමර්පයාමි ॥

නමස්කාරඃ
උරසා ශිරසා දෘෂ්ට්යා මනසා වචසා තථා ।
පද්භ්යාං කරාභ්යාං කර්ණාභ්යාං ප්රණාමෝऽෂ්ටාංග උච්යතේ ॥
ඕං ශ්රීමහාගණපතයේ නමඃ ।
නමස්කාරාන් සමර්පයාමි ॥

සර්වෝපචාරාඃ
ඕං ශ්රීමහාගණපතයේ නමඃ ।
ඡත්රං සමර්පයාමි ।
චාමරං සමර්පයාමි ।
ගීතං ශ්රාවයාමි ।
නෘත්යං දර්ශයාමි ।
සමස්ත රාජෝපචාරාන් දේවෝපචාරාන් සමර්පයාමි ॥

ස්තෝත්ර/සූක්ත පඨනම්

ක්ෂමාප්රාර්ථනා
අපරාධානසංඛ්යාතාන් ක්ෂමස්ව ගණනායක ।
භක්තං කුරු ච මාං ඪුංඪේ තව පාදප්රියං සදා ॥

කායේන වාචා මනසේංද්රියෛර්වා
බුද්ධ්යාත්මනා වා ප්රකෘතේඃ ස්වභාවාත් ।
කරෝමි යද්යත් සකලං පරස්මෛ
නාරායණායේති සමර්පයාමි ॥

අනයා ධ්යාන-ආවාහනාදි-ෂෝඩශෝපචාර පූජයා ශ්රීමහාගණපතිඃ සුප්රීතඃ සුප්රසන්නඃ වරදෝ භවතු ॥

උද්වාසනම්
ඕං ශ්රීමහාගණපතයේ නමඃ ।
යථාස්ථානං උද්වාසයාමි ।
ශෝභනාර්ථේ ක්ෂේමාය පුනරාගමනාය ච ॥

ප්රසාද ග්රහණම්
අකාලමෘත්යුහරණං සර්වව්යාධිනිවාරණම් ।
සමස්තපාපක්ෂයකරං දේවතා පාදෝදකං ශුභම් ॥

ශ්රීමහාගණපති ප්රසාදං ශිරසා ගෘහ්ණාමි ॥

ඕං ශාංතිඃ ශාංතිඃ ශාංතිඃ ॥

ඕං තත්සත් බ්රහ්මාර්පණමස්තු ॥