දේව්යපරාධ ක්ෂමාපණ ස්තෝත්රම්

න මංත්රං නෝ යංත්රං තදපි ච න ජානේ ස්තුතිමහෝ
න චාහ්වානං ධ්යානං තදපි ච න ජානේ ස්තුතිකථාඃ ।
න ජානේ මුද්රාස්තේ තදපි ච න ජානේ විලපනං
පරං ජානේ මාතස්ත්වදනුසරණං ක්ලේශහරණම් ॥ 1 ॥

විධේරජ්ඤානේන ද්රවිණවිරහේණාලසතයා
විධේයාශක්යත්වාත්තව චරණයෝර්යා ච්යුතිරභූත් ।
තදේතත් ක්ෂංතව්යං ජනනි සකලෝද්ධාරිණි ශිවේ
කුපුත්රෝ ජායේත ක්වචිදපි කුමාතා න භවති ॥ 2 ॥

පෘථිව්යාං පුත්රාස්තේ ජනනි බහවඃ සංති සරලාඃ
පරං තේෂාං මධ්යේ විරලතරලෝऽහං තව සුතඃ ।
මදීයෝऽයං ත්යාගඃ සමුචිතමිදං නෝ තව ශිවේ
කුපුත්රෝ ජායේත ක්වචිදපි කුමාතා න භවති ॥ 3 ॥

ජගන්මාතර්මාතස්තව චරණසේවා න රචිතා
න වා දත්තං දේවි ද්රවිණමපි භූයස්තව මයා ।
තථාපි ත්වං ස්නේහං මයි නිරුපමං යත්ප්රකුරුෂේ
කුපුත්රෝ ජායේත ක්වචිදපි කුමාතා න භවති ॥ 4 ॥

පරිත්යක්තා දේවාන්විවිධවිධිසේවාකුලතයා
මයා පංචාශීතේරධිකමපනීතේ තු වයසි ।
ඉදානීං චේන්මාතස්තව යදි කෘපා නාපි භවිතා
නිරාලංබෝ ලංබෝදරජනනි කං යාමි ශරණම් ॥ 5 ॥

ශ්වපාකෝ ජල්පාකෝ භවති මධුපාකෝපමගිරා
නිරාතංකෝ රංකෝ විහරති චිරං කෝටිකනකෛඃ ।
තවාපර්ණේ කර්ණේ විශති මනුවර්ණේ ඵලමිදං
ජනඃ කෝ ජානීතේ ජනනි ජපනීයං ජපවිධෞ ॥ 6 ॥

චිතාභස්මාලේපෝ ගරළමශනං දික්පටධරෝ
ජටාධාරී කංඨේ භුජගපතිහාරී පශුපතිඃ ।
කපාලී භූතේශෝ භජති ජගදීශෛකපදවීං
භවානී ත්වත්පාණිග්රහණපරිපාටී ඵලමිදම් ॥ 7 ॥

න මෝක්ෂස්යාකාංක්ෂා න ච විභවවාංඡාපි ච න මේ
න විජ්ඤානාපේක්ෂා ශශිමුඛි සුඛේච්ඡාපි න පුනඃ ।
අතස්ත්වාං සංයාචේ ජනනි ජනනං යාතු මම වෛ
මෘඩානී රුද්රාණී ශිව ශිව භවානීති ජපතඃ ॥ 8 ॥

නාරාධිතාසි විධිනා විවිධෝපචාරෛඃ
කිං රූක්ෂචිංතනපරෛර්න කෘතං වචෝභිඃ ।
ශ්යාමේ ත්වමේව යදි කිංචන මය්යනාථේ
ධත්සේ කෘපාමුචිතමංබ පරං තවෛව ॥ 9 ॥

ආපත්සු මග්නඃ ස්මරණං ත්වදීයං
කරෝමි දුර්ගේ කරුණාර්ණවේ ශිවේ ।
නෛතච්ඡඨත්වං මම භාවයේථාඃ
ක්ෂුධාතෘෂාර්තාඃ ජනනීං ස්මරංති ॥ 10 ॥

ජගදංබ විචිත්රමත්ර කිං
පරිපූර්ණා කරුණාස්ති චේන්මයි ।
අපරාධපරංපරාවෘතං
න හි මාතා සමුපේක්ෂතේ සුතම් ॥ 11 ॥

මත්සමඃ පාතකී නාස්ති පාපඝ්නී ත්වත්සමා න හි ।
ඒවං ජ්ඤාත්වා මහාදේවී යථා යෝග්යං තථා කුරු ॥ 12 ॥

ඉති ශ්රීමච්ඡංකරාචාර්ය විරචිතං දේව්යපරාධක්ෂමාපණ ස්තෝත්රම් ।