ସଂକ୍ଷେପ ରାମାୟଣମ୍
ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପ୍ରଥମସ୍ସର୍ଗଃ ।
ତପସ୍ସ୍ଵାଧ୍ୟାୟନିରତଂ ତପସ୍ଵୀ ଵାଗ୍ଵିଦାଂ ଵରମ୍ ।
ନାରଦଂ ପରିପପ୍ରଚ୍ଛ ଵାଲ୍ମୀକିର୍ମୁନିପୁଂଗଵମ୍ ॥ 1 ॥
କୋଽନ୍ଵସ୍ମିନ୍ସାଂପ୍ରତଂ ଲୋକେ ଗୁଣଵାନ୍ କଶ୍ଚ ଵୀର୍ୟଵାନ୍ ।
ଧର୍ମଜ୍ଞଶ୍ଚ କୃତଜ୍ଞଶ୍ଚ ସତ୍ୟଵାକ୍ୟୋ ଦୃଢଵ୍ରତଃ ॥ 2 ॥
ଚାରିତ୍ରେଣ ଚ କୋ ୟୁକ୍ତଃ ସର୍ଵଭୂତେଷୁ କୋ ହିତଃ ।
ଵିଦ୍ଵାନ୍ କଃ କଃ ସମର୍ଥଶ୍ଚ କଶ୍ଚୈକପ୍ରିୟଦର୍ଶନଃ ॥ 3 ॥
ଆତ୍ମଵାନ୍ କୋ ଜିତକ୍ରୋଧୋ ଦ୍ୟୁତିମାନ୍ କୋଽନସୂୟକଃ ।
କସ୍ୟ ବିଭ୍ୟତି ଦେଵାଶ୍ଚ ଜାତରୋଷସ୍ୟ ସଂୟୁଗେ ॥ 4 ॥
ଏତଦିଚ୍ଛାମ୍ୟହଂ ଶ୍ରୋତୁଂ ପରଂ କୌତୂହଲଂ ହି ମେ ।
ମହର୍ଷେ ତ୍ଵଂ ସମର୍ଥୋଽସି ଜ୍ଞାତୁମେଵଂଵିଧଂ ନରମ୍ ॥ 5 ॥
ଶ୍ରୁତ୍ଵା ଚୈତତ୍ତ୍ରିଲୋକଜ୍ଞୋ ଵାଲ୍ମୀକେର୍ନାରଦୋ ଵଚଃ ।
ଶ୍ରୂୟତାମିତି ଚାମଂତ୍ର୍ୟ ପ୍ରହୃଷ୍ଟୋ ଵାକ୍ୟମବ୍ରଵୀତ୍ ॥ 6 ॥
ବହଵୋ ଦୁର୍ଲଭାଶ୍ଚୈଵ ୟେ ତ୍ଵୟା କୀର୍ତିତା ଗୁଣାଃ ।
ମୁନେ ଵକ୍ଷ୍ୟାମ୍ୟହଂ ବୁଦ୍ଧ୍ଵା ତୈର୍ୟୁକ୍ତଃ ଶ୍ରୂୟତାଂ ନରଃ ॥ 7 ॥
ଇକ୍ଷ୍ଵାକୁଵଂଶପ୍ରଭଵୋ ରାମୋ ନାମ ଜନୈଃ ଶ୍ରୁତଃ ।
ନିୟତାତ୍ମା ମହାଵୀର୍ୟୋ ଦ୍ୟୁତିମାନ୍ ଧୃତିମାନ୍ ଵଶୀ ॥ 8 ॥
ବୁଦ୍ଧିମାନ୍ ନୀତିମାନ୍ ଵାଗ୍ମୀ ଶ୍ରୀମାନ୍ ଶତ୍ରୁନିବର୍ହଣଃ ।
ଵିପୁଲାଂସୋ ମହାବାହୁଃ କଂବୁଗ୍ରୀଵୋ ମହାହନୁଃ ॥ 9 ॥
ମହୋରସ୍କୋ ମହେଷ୍ଵାସୋ ଗୂଢଜତ୍ରୁରରିଂଦମଃ ।
ଆଜାନୁବାହୁଃ ସୁଶିରାଃ ସୁଲଲାଟଃ ସୁଵିକ୍ରମଃ ॥ 10 ॥
ସମଃ ସମଵିଭକ୍ତାଂଗଃ ସ୍ନିଗ୍ଧଵର୍ଣଃ ପ୍ରତାପଵାନ୍ ।
ପୀନଵକ୍ଷା ଵିଶାଲାକ୍ଷୋ ଲକ୍ଷ୍ମୀଵାନ୍ ଶୁଭଲକ୍ଷଣଃ ॥ 11 ॥
ଧର୍ମଜ୍ଞଃ ସତ୍ୟସଂଧଶ୍ଚ ପ୍ରଜାନାଂ ଚ ହିତେ ରତଃ ।
ୟଶସ୍ଵୀ ଜ୍ଞାନସଂପନ୍ନଃ ଶୁଚିର୍ଵଶ୍ୟଃ ସମାଧିମାନ୍ ॥ 12 ॥
ପ୍ରଜାପତିସମଃ ଶ୍ରୀମାନ୍ ଧାତା ରିପୁନିଷୂଦନଃ ।
ରକ୍ଷିତା ଜୀଵଲୋକସ୍ୟ ଧର୍ମସ୍ୟ ପରିରକ୍ଷିତା ॥ 13 ॥
ରକ୍ଷିତା ସ୍ଵସ୍ୟ ଧର୍ମସ୍ୟ ସ୍ଵଜନସ୍ୟ ଚ ରକ୍ଷିତା ।
ଵେଦଵେଦାଂଗତତ୍ତ୍ଵଜ୍ଞୋ ଧନୁର୍ଵେଦେ ଚ ନିଷ୍ଠିତଃ ॥ 14 ॥
ସର୍ଵଶାସ୍ତ୍ରାର୍ଥତତ୍ତ୍ଵଜ୍ଞୋ ସ୍ମୃତିମାନ୍ପ୍ରତିଭାନଵାନ୍ ।
ସର୍ଵଲୋକପ୍ରିୟଃ ସାଧୁରଦୀନାତ୍ମା ଵିଚକ୍ଷଣଃ ॥ 15 ॥
ସର୍ଵଦାଭିଗତଃ ସଦ୍ଭିଃ ସମୁଦ୍ର ଇଵ ସିଂଧୁଭିଃ ।
ଆର୍ୟଃ ସର୍ଵସମଶ୍ଚୈଵ ସଦୈକପ୍ରିୟଦର୍ଶନଃ ॥ 16 ॥
ସ ଚ ସର୍ଵଗୁଣୋପେତଃ କୌସଲ୍ୟାନଂଦଵର୍ଧନଃ ।
ସମୁଦ୍ର ଇଵ ଗାଂଭୀର୍ୟେ ଧୈର୍ୟେଣ ହିମଵାନିଵ ॥ 17 ॥
ଵିଷ୍ଣୁନା ସଦୃଶୋ ଵୀର୍ୟେ ସୋମଵତ୍ପ୍ରିୟଦର୍ଶନଃ ।
କାଲାଗ୍ନିସଦୃଶଃ କ୍ରୋଧେ କ୍ଷମୟା ପୃଥିଵୀସମଃ ॥ 18 ॥
ଧନଦେନ ସମସ୍ତ୍ୟାଗେ ସତ୍ୟେ ଧର୍ମ ଇଵାପରଃ ।
ତମେଵଂ ଗୁଣସଂପନ୍ନଂ ରାମଂ ସତ୍ୟପରାକ୍ରମମ୍ ॥ 19 ॥
ଜ୍ୟେଷ୍ଠଂ ଶ୍ରେଷ୍ଠଗୁଣୈର୍ୟୁକ୍ତଂ ପ୍ରିୟଂ ଦଶରଥଃ ସୁତମ୍ ।
ପ୍ରକୃତୀନାଂ ହିତୈର୍ୟୁକ୍ତଂ ପ୍ରକୃତି ପ୍ରିୟ କାମ୍ୟୟା ॥ 20 ॥
ୟୌଵରାଜ୍ୟେନ ସଂୟୋକ୍ତୁମୈଚ୍ଛତ୍ପ୍ରୀତ୍ୟା ମହୀପତିଃ ।
ତସ୍ୟାଭିଷେକସଂଭାରାନ୍ ଦୃଷ୍ଟ୍ଵା ଭାର୍ୟାଽଥ କୈକୟୀ ॥ 21 ॥
ପୂର୍ଵଂ ଦତ୍ତଵରା ଦେଵୀ ଵରମେନମୟାଚତ ।
ଵିଵାସନଂ ଚ ରାମସ୍ୟ ଭରତସ୍ୟାଭିଷେଚନମ୍ ॥ 22 ॥
ସ ସତ୍ୟଵଚନାଦ୍ରାଜା ଧର୍ମପାଶେନ ସଂୟତଃ ।
ଵିଵାସୟାମାସ ସୁତଂ ରାମଂ ଦଶରଥଃ ପ୍ରିୟମ୍ ॥ 23 ॥
ସ ଜଗାମ ଵନଂ ଵୀରଃ ପ୍ରତିଜ୍ଞାମନୁପାଲୟନ୍ ।
ପିତୁର୍ଵଚନନିର୍ଦେଶାତ୍କୈକେୟ୍ୟାଃ ପ୍ରିୟକାରଣାତ୍ ॥ 24 ॥
ତଂ ଵ୍ରଜଂତଂ ପ୍ରିୟୋ ଭ୍ରାତା ଲକ୍ଷ୍ମଣୋଽନୁଜଗାମ ହ ।
ସ୍ନେହାଦ୍ଵିନୟସଂପନ୍ନଃ ସୁମିତ୍ରାନଂଦଵର୍ଧନଃ ॥ 25 ॥
ଭ୍ରାତରଂ ଦୟିତୋ ଭ୍ରାତୁଃ ସୌଭ୍ରାତ୍ରମନୁଦର୍ଶୟନ୍ ।
ରାମସ୍ୟ ଦୟିତା ଭାର୍ୟା ନିତ୍ୟଂ ପ୍ରାଣସମାହିତା ॥ 26 ॥
ଜନକସ୍ୟ କୁଲେ ଜାତା ଦେଵମାୟେଵ ନିର୍ମିତା ।
ସର୍ଵଲକ୍ଷଣସଂପନ୍ନା ନାରୀଣାମୁତ୍ତମା ଵଧୂଃ ॥ 27 ॥
ସୀତାଽପ୍ୟନୁଗତା ରାମଂ ଶଶିନଂ ରୋହିଣୀ ୟଥା ।
ପୌରୈରନୁଗତୋ ଦୂରଂ ପିତ୍ରା ଦଶରଥେନ ଚ ॥ 28 ॥
ଶୃଂଗିବେରପୁରେ ସୂତଂ ଗଂଗାକୂଲେ ଵ୍ୟସର୍ଜୟତ୍ ।
ଗୁହମାସାଦ୍ୟ ଧର୍ମାତ୍ମା ନିଷାଦାଧିପତିଂ ପ୍ରିୟମ୍ ॥ 29 ॥
ଗୁହେନ ସହିତୋ ରାମଃ ଲକ୍ଷ୍ମଣେନ ଚ ସୀତୟା ।
ତେ ଵନେନ ଵନଂ ଗତ୍ଵା ନଦୀସ୍ତୀର୍ତ୍ଵା ବହୂଦକାଃ ॥ 30 ॥
ଚିତ୍ରକୂଟମନୁପ୍ରାପ୍ୟ ଭରଦ୍ଵାଜସ୍ୟ ଶାସନାତ୍ ।
ରମ୍ୟମାଵସଥଂ କୃତ୍ଵା ରମମାଣା ଵନେ ତ୍ରୟଃ ॥ 31 ॥
ଦେଵଗଂଧର୍ଵସଂକାଶାସ୍ତତ୍ର ତେ ନ୍ୟଵସନ୍ସୁଖମ୍ ।
ଚିତ୍ରକୂଟଂ ଗତେ ରାମେ ପୁତ୍ରଶୋକାତୁରସ୍ତଥା ॥ 32 ॥
ରାଜା ଦଶରଥଃ ସ୍ଵର୍ଗଂ ଜଗାମ ଵିଲପନ୍ସୁତମ୍ ।
ମୃତେ ତୁ ତସ୍ମିନ୍ଭରତୋ ଵସିଷ୍ଠପ୍ରମୁଖୈର୍ଦ୍ଵିଜୈଃ ॥ 33 ॥
ନିୟୁଜ୍ୟମାନୋ ରାଜ୍ୟାୟ ନୈଚ୍ଛଦ୍ରାଜ୍ୟଂ ମହାବଲଃ ।
ସ ଜଗାମ ଵନଂ ଵୀରୋ ରାମପାଦପ୍ରସାଦକଃ ॥ 34 ॥
ଗତ୍ଵା ତୁ ସ ମହାତ୍ମାନଂ ରାମଂ ସତ୍ୟପରାକ୍ରମମ୍ ।
ଅୟାଚଦ୍ଭ୍ରାତରଂ ରାମଂ ଆର୍ୟଭାଵପୁରସ୍କୃତଃ ॥ 35 ॥
ତ୍ଵମେଵ ରାଜା ଧର୍ମଜ୍ଞ ଇତି ରାମଂ ଵଚୋଽବ୍ରଵୀତ୍ ।
ରାମୋଽପି ପରମୋଦାରଃ ସୁମୁଖସ୍ସୁମହାୟଶାଃ ॥ 36 ॥
ନ ଚୈଚ୍ଛତ୍ପିତୁରାଦେଶାଦ୍ରାଜ୍ୟଂ ରାମୋ ମହାବଲଃ ।
ପାଦୁକେ ଚାସ୍ୟ ରାଜ୍ୟାୟ ନ୍ୟାସଂ ଦତ୍ତ୍ଵା ପୁନଃ ପୁନଃ ॥ 37 ॥
ନିଵର୍ତୟାମାସ ତତୋ ଭରତଂ ଭରତାଗ୍ରଜଃ ।
ସ କାମମନଵାପ୍ୟୈଵ ରାମପାଦାଵୁପସ୍ପୃଶନ୍ ॥ 38 ॥
ନଂଦିଗ୍ରାମେଽକରୋଦ୍ରାଜ୍ୟଂ ରାମାଗମନକାଂକ୍ଷୟା ।
ଗତେ ତୁ ଭରତେ ଶ୍ରୀମାନ୍ ସତ୍ୟସଂଧୋ ଜିତେଂଦ୍ରିୟଃ ॥ 39 ॥
ରାମସ୍ତୁ ପୁନରାଲକ୍ଷ୍ୟ ନାଗରସ୍ୟ ଜନସ୍ୟ ଚ ।
ତତ୍ରାଗମନମେକାଗ୍ରୋ ଦଂଡକାନ୍ପ୍ରଵିଵେଶ ହ ॥ 40 ॥
ପ୍ରଵିଶ୍ୟ ତୁ ମହାରଣ୍ୟଂ ରାମୋ ରାଜୀଵଲୋଚନଃ ।
ଵିରାଧଂ ରାକ୍ଷସଂ ହତ୍ଵା ଶରଭଂଗଂ ଦଦର୍ଶ ହ ॥ 41 ॥
ସୁତୀକ୍ଷ୍ଣଂ ଚାପ୍ୟଗସ୍ତ୍ୟଂ ଚ ଅଗସ୍ତ୍ୟଭ୍ରାତରଂ ତଥା ।
ଅଗସ୍ତ୍ୟଵଚନାଚ୍ଚୈଵ ଜଗ୍ରାହୈଂଦ୍ରଂ ଶରାସନମ୍ ॥ 42 ॥
ଖଡ୍ଗଂ ଚ ପରମପ୍ରୀତସ୍ତୂଣୀ ଚାକ୍ଷୟସାୟକୌ ।
ଵସତସ୍ତସ୍ୟ ରାମସ୍ୟ ଵନେ ଵନଚରୈଃ ସହ ॥ 43 ॥
ଋଷୟୋଽଭ୍ୟାଗମନ୍ସର୍ଵେ ଵଧାୟାସୁରରକ୍ଷସାମ୍ ।
ସ ତେଷାଂ ପ୍ରତିଶୁଶ୍ରାଵ ରାକ୍ଷସାନାଂ ତଥା ଵନେ ॥ 44 ॥
ପ୍ରତିଜ୍ଞାତଶ୍ଚ ରାମେଣ ଵଧଃ ସଂୟତି ରକ୍ଷସାମ୍ ।
ଋଷୀଣାମଗ୍ନିକଲ୍ପାନାଂ ଦଂଡକାରଣ୍ୟଵାସିନାମ୍ ॥ 45 ॥
ତେନ ତତ୍ରୈଵ ଵସତା ଜନସ୍ଥାନନିଵାସିନୀ ।
ଵିରୂପିତା ଶୂର୍ପଣଖା ରାକ୍ଷସୀ କାମରୂପିଣୀ ॥ 46 ॥
ତତଃ ଶୂର୍ପଣଖାଵାକ୍ୟାଦୁଦ୍ୟୁକ୍ତାନ୍ସର୍ଵରାକ୍ଷସାନ୍ ।
ଖରଂ ତ୍ରିଶିରସଂ ଚୈଵ ଦୂଷଣଂ ଚୈଵ ରାକ୍ଷସମ୍ ॥ 47 ॥
ନିଜଘାନ ରଣେ ରାମସ୍ତେଷାଂ ଚୈଵ ପଦାନୁଗାନ୍ ।
ଵନେ ତସ୍ମିନ୍ନିଵସତା ଜନସ୍ଥାନନିଵାସିନାମ୍ ॥ 48 ॥
ରକ୍ଷସାଂ ନିହତାନ୍ୟାସନ୍ସହସ୍ରାଣି ଚତୁର୍ଦଶ ।
ତତୋ ଜ୍ଞାତିଵଧଂ ଶ୍ରୁତ୍ଵା ରାଵଣଃ କ୍ରୋଧମୂର୍ଛିତଃ ॥ 49 ॥
ସହାୟଂ ଵରୟାମାସ ମାରୀଚଂ ନାମ ରାକ୍ଷସମ୍ ।
ଵାର୍ୟମାଣଃ ସୁବହୁଶୋ ମାରୀଚେନ ସ ରାଵଣଃ ॥ 50 ॥
ନ ଵିରୋଧୋ ବଲଵତା କ୍ଷମୋ ରାଵଣ ତେନ ତେ ।
ଅନାଦୃତ୍ୟ ତୁ ତଦ୍ଵାକ୍ୟଂ ରାଵଣଃ କାଲଚୋଦିତଃ ॥ 51 ॥
ଜଗାମ ସହମାରୀଚଃ ତସ୍ୟାଶ୍ରମପଦଂ ତଦା ।
ତେନ ମାୟାଵିନା ଦୂରମପଵାହ୍ୟ ନୃପାତ୍ମଜୌ ॥ 52 ॥
ଜହାର ଭାର୍ୟାଂ ରାମସ୍ୟ ଗୃଧ୍ରଂ ହତ୍ଵା ଜଟାୟୁଷମ୍ ।
ଗୃଧ୍ରଂ ଚ ନିହତଂ ଦୃଷ୍ଟ୍ଵା ହୃତାଂ ଶ୍ରୁତ୍ଵା ଚ ମୈଥିଲୀମ୍ ॥ 53 ॥
ରାଘଵଃ ଶୋକସଂତପ୍ତୋ ଵିଲଲାପାକୁଲେଂଦ୍ରିୟଃ ।
ତତସ୍ତେନୈଵ ଶୋକେନ ଗୃଧ୍ରଂ ଦଗ୍ଧ୍ଵା ଜଟାୟୁଷମ୍ ॥ 54 ॥
ମାର୍ଗମାଣୋ ଵନେ ସୀତାଂ ରାକ୍ଷସଂ ସଂଦଦର୍ଶ ହ ।
କବଂଧଂ ନାମ ରୂପେଣ ଵିକୃତଂ ଘୋରଦର୍ଶନମ୍ ॥ 55 ॥
ତଂ ନିହତ୍ୟ ମହାବାହୁଃ ଦଦାହ ସ୍ଵର୍ଗତଶ୍ଚ ସଃ ।
ସ ଚାସ୍ୟ କଥୟାମାସ ଶବରୀଂ ଧର୍ମଚାରିଣୀମ୍ ॥ 56 ॥
ଶ୍ରମଣୀଂ ଧର୍ମନିପୁଣାମଭିଗଚ୍ଛେତି ରାଘଵମ୍ ।
ସୋଽଭ୍ୟଗଚ୍ଛନ୍ମହାତେଜାଃ ଶବରୀଂ ଶତ୍ରୁସୂଦନଃ ॥ 57 ॥
ଶବର୍ୟା ପୂଜିତଃ ସମ୍ୟଗ୍ରାମୋ ଦଶରଥାତ୍ମଜଃ ।
ପଂପାତୀରେ ହନୁମତା ସଂଗତୋ ଵାନରେଣ ହ ॥ 58 ॥
ହନୁମଦ୍ଵଚନାଚ୍ଚୈଵ ସୁଗ୍ରୀଵେଣ ସମାଗତଃ ।
ସୁଗ୍ରୀଵାୟ ଚ ତତ୍ସର୍ଵଂ ଶଂସଦ୍ରାମୋ ମହାବଲଃ ॥ 59 ॥
ଆଦିତସ୍ତଦ୍ୟଥାଵୃତ୍ତଂ ସୀତୟାଶ୍ଚ ଵିଶେଷତଃ ।
ସୁଗ୍ରୀଵଶ୍ଚାପି ତତ୍ସର୍ଵଂ ଶ୍ରୁତ୍ଵା ରାମସ୍ୟ ଵାନରଃ ॥ 60 ॥
ଚକାର ସଖ୍ୟଂ ରାମେଣ ପ୍ରୀତଶ୍ଚୈଵାଗ୍ନିସାକ୍ଷିକମ୍ ।
ତତୋ ଵାନରରାଜେନ ଵୈରାନୁକଥନଂ ପ୍ରତି ॥ 61 ॥
ରାମାୟାଵେଦିତଂ ସର୍ଵଂ ପ୍ରଣୟାଦ୍ଦୁଃଖିତେନ ଚ ।
ପ୍ରତିଜ୍ଞାତଂ ଚ ରାମେଣ ତଦା ଵାଲିଵଧଂ ପ୍ରତି ॥ 62 ॥
ଵାଲିନଶ୍ଚ ବଲଂ ତତ୍ର କଥୟାମାସ ଵାନରଃ ।
ସୁଗ୍ରୀଵଃ ଶଂକିତଶ୍ଚାସୀନ୍ନିତ୍ୟଂ ଵୀର୍ୟେଣ ରାଘଵେ ॥ 63 ॥
ରାଘଵଃ ପ୍ରତ୍ୟୟାର୍ଥଂ ତୁ ଦୁଂଦୁଭେଃ କାୟମୁତ୍ତମମ୍ ।
ଦର୍ଶୟାମାସ ସୁଗ୍ରୀଵୋ ମହାପର୍ଵତ ସନ୍ନିଭମ୍ ॥ 64 ॥
ଉତ୍ସ୍ମୟିତ୍ଵା ମହାବାହୁଃ ପ୍ରେକ୍ଷ୍ୟ ଚାସ୍ଥି ମହାବଲଃ ।
ପାଦାଂଗୁଷ୍ଠେନ ଚିକ୍ଷେପ ସଂପୂର୍ଣଂ ଦଶୟୋଜନମ୍ ॥ 65 ॥
ବିଭେଦ ଚ ପୁନଃ ସାଲାନ୍ସପ୍ତୈକେନ ମହେଷୁଣା ।
ଗିରିଂ ରସାତଲଂ ଚୈଵ ଜନୟନ୍ ପ୍ରତ୍ୟୟଂ ତଦା ॥ 66 ॥
ତତଃ ପ୍ରୀତମନାସ୍ତେନ ଵିଶ୍ଵସ୍ତଃ ସ ମହାକପିଃ ।
କିଷ୍କିଂଧାଂ ରାମସହିତୋ ଜଗାମ ଚ ଗୁହାଂ ତଦା ॥ 67 ॥
ତତୋଽଗର୍ଜଦ୍ଧରିଵରଃ ସୁଗ୍ରୀଵୋ ହେମପିଂଗଳଃ ।
ତେନ ନାଦେନ ମହତା ନିର୍ଜଗାମ ହରୀଶ୍ଵରଃ ॥ 68 ॥
ଅନୁମାନ୍ୟ ତଦା ତାରାଂ ସୁଗ୍ରୀଵେଣ ସମାଗତଃ ।
ନିଜଘାନ ଚ ତତ୍ରୈନଂ ଶରେଣୈକେନ ରାଘଵଃ ॥ 69 ॥
ତତଃ ସୁଗ୍ରୀଵଵଚନାଦ୍ଧତ୍ଵା ଵାଲିନମାହଵେ ।
ସୁଗ୍ରୀଵମେଵ ତଦ୍ରାଜ୍ୟେ ରାଘଵଃ ପ୍ରତ୍ୟପାଦୟତ୍ ॥ 70 ॥
ସ ଚ ସର୍ଵାନ୍ସମାନୀୟ ଵାନରାନ୍ଵାନରର୍ଷଭଃ ।
ଦିଶଃ ପ୍ରସ୍ଥାପୟାମାସ ଦିଦୃକ୍ଷୁର୍ଜନକାତ୍ମଜାମ୍ ॥ 71 ॥
ତତୋ ଗୃଧ୍ରସ୍ୟ ଵଚନାତ୍ସଂପାତେର୍ହନୁମାନ୍ବଲୀ ।
ଶତୟୋଜନଵିସ୍ତୀର୍ଣଂ ପୁପ୍ଲୁଵେ ଲଵଣାର୍ଣଵମ୍ ॥ 72 ॥
ତତ୍ର ଲଂକାଂ ସମାସାଦ୍ୟ ପୁରୀଂ ରାଵଣପାଲିତାମ୍ ।
ଦଦର୍ଶ ସୀତାଂ ଧ୍ୟାୟଂତୀଂ ଅଶୋକଵନିକାଂ ଗତାମ୍ ॥ 73 ॥
ନିଵେଦୟିତ୍ଵାଽଭିଜ୍ଞାନଂ ପ୍ରଵୃତ୍ତିଂ ଚ ନିଵେଦ୍ୟ ଚ ।
ସମାଶ୍ଵାସ୍ୟ ଚ ଵୈଦେହୀଂ ମର୍ଦୟାମାସ ତୋରଣମ୍ ॥ 74 ॥
ପଂଚ ସେନାଗ୍ରଗାନ୍ହତ୍ଵା ସପ୍ତ ମଂତ୍ରିସୁତାନପି ।
ଶୂରମକ୍ଷଂ ଚ ନିଷ୍ପିଷ୍ୟ ଗ୍ରହଣଂ ସମୁପାଗମତ୍ ॥ 75 ॥
ଅସ୍ତ୍ରେଣୋନ୍ମୁକ୍ତମାତ୍ମାନଂ ଜ୍ଞାତ୍ଵା ପୈତାମହାଦ୍ଵରାତ୍ ।
ମର୍ଷୟନ୍ରାକ୍ଷସାନ୍ଵୀରୋ ୟଂତ୍ରିଣସ୍ତାନ୍ୟଦୃଚ୍ଛୟା ॥ 76 ॥
ତତୋ ଦଗ୍ଧ୍ଵା ପୁରୀଂ ଲଂକାଂ ଋତେ ସୀତାଂ ଚ ମୈଥିଲୀମ୍ ।
ରାମାୟ ପ୍ରିୟମାଖ୍ୟାତୁଂ ପୁନରାୟାନ୍ମହାକପିଃ ॥ 77 ॥
ସୋଽଭିଗମ୍ୟ ମହାତ୍ମାନଂ କୃତ୍ଵା ରାମଂ ପ୍ରଦକ୍ଷିଣମ୍ ।
ନ୍ୟଵେଦୟଦମେୟାତ୍ମା ଦୃଷ୍ଟା ସୀତେତି ତତ୍ତ୍ଵତଃ ॥ 78 ॥
ତତଃ ସୁଗ୍ରୀଵସହିତୋ ଗତ୍ଵା ତୀରଂ ମହୋଦଧେଃ ।
ସମୁଦ୍ରଂ କ୍ଷୋଭୟାମାସ ଶରୈରାଦିତ୍ୟସନ୍ନିଭୈଃ ॥ 79 ॥
ଦର୍ଶୟାମାସ ଚାତ୍ମାନଂ ସମୁଦ୍ରଃ ସରିତାଂ ପତିଃ ।
ସମୁଦ୍ରଵଚନାଚ୍ଚୈଵ ନଲଂ ସେତୁମକାରୟତ୍ ॥ 80 ॥
ତେନ ଗତ୍ଵା ପୁରୀଂ ଲଂକାଂ ହତ୍ଵା ରାଵଣମାହଵେ ।
ରାମଃ ସୀତାମନୁପ୍ରାପ୍ୟ ପରାଂ ଵ୍ରୀଡାମୁପାଗମତ୍ ॥ 81 ॥
ତାମୁଵାଚ ତତୋ ରାମଃ ପରୁଷଂ ଜନସଂସଦି ।
ଅମୃଷ୍ୟମାଣା ସା ସୀତା ଵିଵେଶ ଜ୍ଵଲନଂ ସତୀ ॥ 82 ॥
ତତୋଽଗ୍ନିଵଚନାତ୍ସୀତାଂ ଜ୍ଞାତ୍ଵା ଵିଗତକଲ୍ମଷାମ୍ ।
ବଭୌ ରାମଃ ସଂପ୍ରହୃଷ୍ଟଃ ପୂଜିତଃ ସର୍ଵଦୈଵତୈଃ ॥ 83 ॥
କର୍ମଣା ତେନ ମହତା ତ୍ରୈଲୋକ୍ୟଂ ସଚରାଚରମ୍ ।
ସଦେଵର୍ଷିଗଣଂ ତୁଷ୍ଟଂ ରାଘଵସ୍ୟ ମହାତ୍ମନଃ ॥ 84 ॥
ଅଭିଷିଚ୍ୟ ଚ ଲଂକାୟାଂ ରାକ୍ଷସେଂଦ୍ରଂ ଵିଭୀଷଣମ୍ ।
କୃତକୃତ୍ୟସ୍ତଦା ରାମୋ ଵିଜ୍ଵରଃ ପ୍ରମୁମୋଦ ହ ॥ 85 ॥
ଦେଵତାଭ୍ୟୋ ଵରଂ ପ୍ରାପ୍ୟ ସମୁତ୍ଥାପ୍ୟ ଚ ଵାନରାନ୍ ।
ଅୟୋଧ୍ୟାଂ ପ୍ରସ୍ଥିତୋ ରାମଃ ପୁଷ୍ପକେଣ ସୁହୃଦ୍ଵୃତଃ ॥ 86 ॥
ଭରଦ୍ଵାଜାଶ୍ରମଂ ଗତ୍ଵା ରାମଃ ସତ୍ୟପରାକ୍ରମଃ ।
ଭରତସ୍ୟାଂତିକଂ ରାମୋ ହନୂମଂତଂ ଵ୍ୟସର୍ଜୟତ୍ ॥ 87 ॥
ପୁନରାଖ୍ୟାୟିକାଂ ଜଲ୍ପନ୍ସୁଗ୍ରୀଵସହିତଶ୍ଚ ସଃ ।
ପୁଷ୍ପକଂ ତତ୍ସମାରୁହ୍ୟ ନଂଦିଗ୍ରାମଂ ୟୟୌ ତଦା ॥ 88 ॥
ନଂଦିଗ୍ରାମେ ଜଟାଂ ହିତ୍ଵା ଭ୍ରାତୃଭିଃ ସହିତୋଽନଘଃ ।
ରାମଃ ସୀତାମନୁପ୍ରାପ୍ୟ ରାଜ୍ୟଂ ପୁନରଵାପ୍ତଵାନ୍ ॥ 89 ॥
ପ୍ରହୃଷ୍ଟମୁଦିତୋ ଲୋକସ୍ତୁଷ୍ଟଃ ପୁଷ୍ଟଃ ସୁଧାର୍ମିକଃ ।
ନିରାମୟୋ ହ୍ୟରୋଗଶ୍ଚ ଦୁର୍ଭିକ୍ଷ ଭୟଵର୍ଜିତଃ ॥ 90 ॥
ନ ପୁତ୍ରମରଣଂ କିଂଚିଦ୍ଦ୍ରକ୍ଷ୍ୟଂତି ପୁରୁଷାଃ କ୍ଵଚିତ୍ ।
ନାର୍ୟଶ୍ଚାଵିଧଵା ନିତ୍ୟଂ ଭଵିଷ୍ୟଂତି ପତିଵ୍ରତାଃ ॥ 91 ॥
ନ ଚାଗ୍ନିଜଂ ଭୟଂ କିଂଚିନ୍ନାପ୍ସୁ ମଜ୍ଜଂତି ଜଂତଵଃ ।
ନ ଵାତଜଂ ଭୟଂ କିଂଚିନ୍ନାପି ଜ୍ଵରକୃତଂ ତଥା ॥ 92 ॥
ନ ଚାପି କ୍ଷୁଦ୍ଭୟଂ ତତ୍ର ନ ତସ୍କରଭୟଂ ତଥା ।
ନଗରାଣି ଚ ରାଷ୍ଟ୍ରାଣି ଧନଧାନ୍ୟୟୁତାନି ଚ ॥ 93 ॥
ନିତ୍ୟଂ ପ୍ରମୁଦିତାଃ ସର୍ଵେ ୟଥା କୃତୟୁଗେ ତଥା ।
ଅଶ୍ଵମେଧଶତୈରିଷ୍ଟ୍ଵା ତଥା ବହୁସୁଵର୍ଣକୈଃ ॥ 94 ॥
ଗଵାଂ କୋଟ୍ୟୟୁତଂ ଦତ୍ଵା ବ୍ରହ୍ମଲୋକଂ ପ୍ରୟାସ୍ୟତି ।
ଅସଂଖ୍ୟେୟଂ ଧନଂ ଦତ୍ଵା ବ୍ରାହ୍ମଣେଭ୍ୟୋ ମହାୟଶାଃ ॥ 95 ॥
ରାଜଵଂଶାନ୍ ଶତଗୁଣାନ୍ ସ୍ଥାପୟିଷ୍ୟତି ରାଘଵଃ ।
ଚାତୁର୍ଵର୍ଣ୍ୟଂ ଚ ଲୋକେଽସ୍ମିନ୍ ସ୍ଵେ ସ୍ଵେ ଧର୍ମେ ନିୟୋକ୍ଷ୍ୟତି ॥ 96 ॥
ଦଶଵର୍ଷସହସ୍ରାଣି ଦଶଵର୍ଷଶତାନି ଚ ।
ରାମୋ ରାଜ୍ୟମୁପାସିତ୍ଵା ବ୍ରହ୍ମଲୋକଂ ଗମିଷ୍ୟତି ॥ 97 ॥
ଇଦଂ ପଵିତ୍ରଂ ପାପଘ୍ନଂ ପୁଣ୍ୟଂ ଵେଦୈଶ୍ଚ ସମ୍ମିତମ୍ ।
ୟଃ ପଠେଦ୍ରାମଚରିତଂ ସର୍ଵପାପୈଃ ପ୍ରମୁଚ୍ୟତେ ॥ 98 ॥
ଏତଦାଖ୍ୟାନମାୟୁଷ୍ୟଂ ପଠନ୍ରାମାୟଣଂ ନରଃ ।
ସପୁତ୍ରପୌତ୍ରଃ ସଗଣଃ ପ୍ରେତ୍ୟ ସ୍ଵର୍ଗେ ମହୀୟତେ ॥ 99 ॥
ପଠନ୍ ଦ୍ଵିଜୋ ଵାଗୃଷଭତ୍ଵମୀୟାତ୍
ସ୍ୟାତ୍ କ୍ଷତ୍ରିୟୋ ଭୂମିପତିତ୍ଵମୀୟାତ୍ ।
ଵଣିଗ୍ଜନଃ ପଣ୍ୟଫଲତ୍ଵମୀୟାତ୍
ଜନଶ୍ଚ ଶୂଦ୍ରୋଽପି ମହତ୍ତ୍ଵମୀୟାତ୍ ॥ 100 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟେ ଆଦିକାଵ୍ୟେ ବାଲକାଂଡେ ନାରଦଵାକ୍ୟଂ ନାମ ପ୍ରଥମଃ ସର୍ଗଃ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ସଂକ୍ଷେପ ରାମାୟଣମ୍?
ସଂକ୍ଷେପ ରାମାୟଣମ୍ is a Sri Rama Stotrams available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ସଂକ୍ଷେପ ରାମାୟଣମ୍ online?
Yes. The imported text is available directly on this page for online reading and recitation.
Can I download ସଂକ୍ଷେପ ରାମାୟଣମ୍ as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.