ଗଣେଶ ମାନସ ପୂଜ

ଗୃତ୍ସମଦ ଉଵାଚ ।
ଵିଘ୍ନେଶଵୀର୍ୟାଣି ଵିଚିତ୍ରକାଣି
ବଂଦୀଜନୈର୍ମାଗଧକୈଃ ସ୍ମୃତାନି ।
ଶ୍ରୁତ୍ଵା ସମୁତ୍ତିଷ୍ଠ ଗଜାନନ ତ୍ଵଂ
ବ୍ରାହ୍ମେ ଜଗନ୍ମଂଗଳକଂ କୁରୁଷ୍ଵ ॥ 1 ॥

ଏଵଂ ମୟା ପ୍ରାର୍ଥିତ ଵିଘ୍ନରାଜ-
-ଶ୍ଚିତ୍ତେନ ଚୋତ୍ଥାୟ ବହିର୍ଗଣେଶଃ ।
ତଂ ନିର୍ଗତଂ ଵୀକ୍ଷ୍ୟ ନମଂତି ଦେଵାଃ
ଶଂଭ୍ଵାଦୟୋ ୟୋଗିମୁଖାସ୍ତଥାହମ୍ ॥ 2 ॥

ଶୌଚାଦିକଂ ତେ ପରିକଲ୍ପୟାମି
ହେରଂବ ଵୈ ଦଂତଵିଶୁଦ୍ଧିମେଵମ୍ ।
ଵସ୍ତ୍ରେଣ ସଂପ୍ରୋକ୍ଷ୍ୟ ମୁଖାରଵିଂଦଂ
ଦେଵଂ ସଭାୟାଂ ଵିନିଵେଶୟାମି ॥ 3 ॥

ଦ୍ଵିଜାଦିସର୍ଵୈରଭିଵଂଦିତଂ ଚ
ଶୁକାଦିଭିର୍ମୋଦସୁମୋଦକାଦ୍ୟୈଃ ।
ସଂଭାଷ୍ୟ ଚାଲୋକ୍ୟ ସମୁତ୍ଥିତଂ ତଂ
ସୁମଂଡପଂ କଲ୍ପ୍ୟ ନିଵେଶୟାମି ॥ 4 ॥

ରତ୍ନୈଃ ସୁଦୀପ୍ତୈଃ ପ୍ରତିବିଂବିତଂ ତଂ
ପଶ୍ୟାମି ଚିତ୍ତେନ ଵିନାୟକଂ ଚ ।
ତତ୍ରାସନଂ ରତ୍ନସୁଵର୍ଣୟୁକ୍ତଂ
ସଂକଲ୍ପ୍ୟ ଦେଵଂ ଵିନିଵେଶୟାମି ॥ 5 ॥

ସିଦ୍ଧ୍ୟା ଚ ବୁଦ୍ଧ୍ୟା ସହ ଵିଘ୍ନରାଜ
ପାଦ୍ୟଂ କୁରୁ ପ୍ରେମଭରେଣ ସର୍ଵୈଃ ।
ସୁଵାସିତଂ ନୀରମଥୋ ଗୃହାଣ
ଚିତ୍ତେନ ଦତ୍ତଂ ଚ ସୁଖୋଷ୍ଣଭାଵମ୍ ॥ 6 ॥

ତତଃ ସୁଵସ୍ତ୍ରେଣ ଗଣେଶମାଦୌ
ସଂପ୍ରୋକ୍ଷ୍ୟ ଦୂର୍ଵାଦିଭିରର୍ଚୟାମି ।
ଚିତ୍ତେନ ଭାଵପ୍ରିୟ ଦୀନବଂଧୋ
ମନୋ ଵିଲୀନଂ କୁରୁ ତେ ପଦାବ୍ଜେ ॥ 7 ॥

କର୍ପୂରକୈଲାଦିସୁଵାସିତଂ ତୁ
ସୁକଲ୍ପିତଂ ତୋୟମଥୋ ଗୃହାଣ ।
ଆଚମ୍ୟ ତେନୈଵ ଗଜାନନ ତ୍ଵଂ
କୃପାକଟାକ୍ଷେଣ ଵିଲୋକୟାଶୁ ॥ 8 ॥

ପ୍ରଵାଲମୁକ୍ତାଫଲହାଟକାଦ୍ୟୈଃ
ସୁସଂସ୍କୃତଂ ହ୍ୟଂତରଭାଵକେନ ।
ଅନର୍ଘ୍ୟମର୍ଘ୍ୟଂ ସଫଲଂ କୁରୁଷ୍ଵ
ମୟା ପ୍ରଦତ୍ତଂ ଗଣରାଜ ଢୁଂଢେ ॥ 9 ॥

ସୌଗଂଧ୍ୟୟୁକ୍ତଂ ମଧୁପର୍କମାଦ୍ୟଂ
ସଂକଲ୍ପିତଂ ଭାଵୟୁତଂ ଗୃହାଣ ।
ପୁନସ୍ତଥାଚମ୍ୟ ଵିନାୟକ ତ୍ଵଂ
ଭକ୍ତାଂଶ୍ଚ ଭକ୍ତେଶ ସୁରକ୍ଷୟାଶୁ ॥ 10 ॥

ସୁଵାସିତଂ ଚଂପକଜାତିକାଦ୍ୟୈ-
-ସ୍ତୈଲଂ ମୟା କଲ୍ପିତମେଵ ଢୁଂଢେ ।
ଗୃହାଣ ତେନ ପ୍ରଵିମର୍ଦୟାମି
ସର୍ଵାଂଗମେଵଂ ତଵ ସେଵନାୟ ॥ 11 ॥

ତତଃ ସୁଖୋଷ୍ଣେନ ଜଲେନ ଚାହ-
-ମନେକତୀର୍ଥାହୃତକେନ ଢୁଂଢେ ।
ଚିତ୍ତେନ ଶୁଦ୍ଧେନ ଚ ସ୍ନାପୟାମି
ସ୍ନାନଂ ମୟା ଦତ୍ତମଥୋ ଗୃହାଣ ॥ 12 ॥

ତତଃ ପୟଃସ୍ନାନମଚିଂତ୍ୟଭାଵ
ଗୃହାଣ ତୋୟସ୍ୟ ତଥା ଗଣେଶ ।
ପୁନର୍ଦଧିସ୍ନାନମନାମୟ ତ୍ଵଂ
ଚିତ୍ତେନ ଦତ୍ତଂ ଚ ଜଲସ୍ୟ ଚୈଵ ॥ 13 ॥

ତତୋ ଘୃତସ୍ନାନମପାରଵଂଦ୍ୟ
ସୁତୀର୍ଥଜଂ ଵିଘ୍ନହର ପ୍ରସୀଦ ।
ଗୃହାଣ ଚିତ୍ତେନ ସୁକଲ୍ପିତଂ ତୁ
ତତୋ ମଧୁସ୍ନାନମଥୋ ଜଲସ୍ୟ ॥ 14 ॥

ସୁଶର୍କରାୟୁକ୍ତମଥୋ ଗୃହାଣ
ସ୍ନାନଂ ମୟା କଲ୍ପିତମେଵ ଢୁଂଢେ ।
ତତୋ ଜଲସ୍ନାନମଘାପହଂତୃ
ଵିଘ୍ନେଶ ମାୟାଭ୍ରମଂ ଵାରୟାଶୁ ॥ 15 ॥

ସୁୟକ୍ଷପଂକସ୍ଥମଥୋ ଗୃହାଣ
ସ୍ନାନଂ ପରେଶାଧିପତେ ତତଶ୍ଚ ।
କୌମଂଡଲୀସଂଭଵଜଂ କୁରୁଷ୍ଵ
ଵିଶୁଦ୍ଧମେଵଂ ପରିକଲ୍ପିତଂ ତୁ ॥ 16 ॥

ତତସ୍ତୁ ସୂକ୍ତୈର୍ମନସା ଗଣେଶଂ
ସଂପୂଜ୍ୟ ଦୂର୍ଵାଦିଭିରଲ୍ପଭାଵୈଃ ।
ଅପାରକୈର୍ମଂଡଲଭୂତବ୍ରହ୍ମ-
-ଣସ୍ପତ୍ୟକୈସ୍ତଂ ହ୍ୟଭିଷେଚୟାମି ॥ 17 ॥

ତତଃ ସୁଵସ୍ତ୍ରେଣ ତୁ ପ୍ରୋଂଛନଂ ତ୍ଵଂ
ଗୃହାଣ ଚିତ୍ତେନ ମୟା ସୁକଲ୍ପିତମ୍ ।
ତତୋ ଵିଶୁଦ୍ଧେନ ଜଲେନ ଢୁଂଢେ
ହ୍ୟାଚାଂତମେଵଂ କୁରୁ ଵିଘ୍ନରାଜ ॥ 18 ॥

ଅଗ୍ନୌ ଵିଶୁଦ୍ଧେ ତୁ ଗୃହାଣ ଵସ୍ତ୍ରେ
ହ୍ୟନର୍ଘ୍ୟମୌଲ୍ୟେ ମନସା ମୟା ତେ ।
ଦତ୍ତେ ପରିଚ୍ଛାଦ୍ୟ ନିଜାତ୍ମଦେହଂ
ତାଭ୍ୟାଂ ମୟୂରେଶ ଜନାଂଶ୍ଚ ପାଲୟ ॥ 19 ॥

ଆଚମ୍ୟ ଵିଘ୍ନେଶ ପୁନସ୍ତଥୈଵ
ଚିତ୍ତେନ ଦତ୍ତଂ ମୁଖମୁତ୍ତରୀୟମ୍ ।
ଗୃହାଣ ଭକ୍ତପ୍ରତିପାଲକ ତ୍ଵଂ
ନମୋ ୟଥା ତାରକସଂୟୁତଂ ତୁ ॥ 20 ॥

ୟଜ୍ଞୋପଵୀତଂ ତ୍ରିଗୁଣସ୍ଵରୂପଂ
ସୌଵର୍ଣମେଵଂ ହ୍ୟହିନାଥଭୂତମ୍ ।
ଭାଵେନ ଦତ୍ତଂ ଗଣନାଥ ତତ୍ତ୍ଵଂ
ଗୃହାଣ ଭକ୍ତୋଦ୍ଧୃତିକାରଣାୟ ॥ 21 ॥

ଆଚାଂତମେଵଂ ମନସା ପ୍ରଦତ୍ତଂ
କୁରୁଷ୍ଵ ଶୁଦ୍ଧେନ ଜଲେନ ଢୁଂଢେ ।
ପୁନଶ୍ଚ କୌମଂଡଲକେନ ପାହି ଵିଶ୍ଵଂ
ପ୍ରଭୋ ଖେଲକରଂ ସଦା ତେ ॥ 22 ॥

ଉଦ୍ୟଦ୍ଦିନେଶାଭମଥୋ ଗୃହାଣ
ସିଂଦୂରକଂ ତେ ମନସା ପ୍ରଦତ୍ତମ୍ ।
ସର୍ଵାଂଗସଂଲେପନମାଦରାଦ୍ଵୈ
କୁରୁଷ୍ଵ ହେରଂବ ଚ ତେନ ପୂର୍ଣମ୍ ॥ 23 ॥

ସହସ୍ରଶୀର୍ଷଂ ମନସା ମୟା ତ୍ଵଂ
ଦତ୍ତଂ କିରୀଟଂ ତୁ ସୁଵର୍ଣଜଂ ଵୈ ।
ଅନେକରତ୍ନୈଃ ଖଚିତଂ ଗୃହାଣ
ବ୍ରହ୍ମେଶ ତେ ମସ୍ତକଶୋଭନାୟ ॥ 24 ॥

ଵିଚିତ୍ରରତ୍ନୈଃ କନକେନ ଢୁଂଢେ
ୟୁତାନି ଚିତ୍ତେନ ମୟା ପରେଶ ।
ଦତ୍ତାନି ନାନାପଦକୁଂଡଲାନି
ଗୃହାଣ ଶୂର୍ପଶ୍ରୁତିଭୂଷଣାୟ ॥ 25 ॥

ଶୁଂଡାଵିଭୂଷାର୍ଥମନଂତଖେଲିନ୍
ସୁଵର୍ଣଜଂ କଂଚୁକମାଗୃହାଣ ।
ରତ୍ନୈଶ୍ଚ ୟୁକ୍ତଂ ମନସା ମୟା ୟ-
-ଦ୍ଦତ୍ତଂ ପ୍ରଭୋ ତତ୍ସଫଲଂ କୁରୁଷ୍ଵ ॥ 26 ॥

ସୁଵର୍ଣରତ୍ନୈଶ୍ଚ ୟୁତାନି ଢୁଂଢେ
ସଦୈକଦଂତାଭରଣାନି କଲ୍ପ୍ୟ ।
ଗୃହାଣ ଚୂଡାକୃତୟେ ପରେଶ
ଦତ୍ତାନି ଦଂତସ୍ୟ ଚ ଶୋଭନାର୍ଥମ୍ ॥ 27 ॥

ରତ୍ନୈଃ ସୁଵର୍ଣେନ କୃତାନି ତାନି
ଗୃହାଣ ଚତ୍ଵାରି ମୟା ପ୍ରକଲ୍ପ୍ୟ ।
ସଂଭୂଷୟ ତ୍ଵଂ କଟକାନି ନାଥ
ଚତୁର୍ଭୁଜେଷୁ ହ୍ୟଜ ଵିଘ୍ନହାରିନ୍ ॥ 28 ॥

ଵିଚିତ୍ରରତ୍ନୈଃ ଖଚିତଂ ସୁଵର୍ଣ-
-ସଂଭୂତକଂ ଗୃହ୍ୟ ମୟା ପ୍ରଦତ୍ତମ୍ ।
ତଥାଂଗୁଲୀଷ୍ଵଂଗୁଲିକଂ ଗଣେଶ
ଚିତ୍ତେନ ସଂଶୋଭୟ ତତ୍ପରେଶ ॥ 29 ॥

ଵିଚିତ୍ରରତ୍ନୈଃ ଖଚିତାନି ଢୁଂଢେ
କେୟୂରକାଣି ହ୍ୟଥ କଲ୍ପିତାନି ।
ସୁଵର୍ଣଜାନି ପ୍ରମଥାଧିନାଥ
ଗୃହାଣ ଦତ୍ତାନି ତୁ ବାହୁଷୁ ତ୍ଵମ୍ ॥ 30 ॥

ପ୍ରଵାଲମୁକ୍ତାଫଲରତ୍ନଜୈସ୍ତ୍ଵଂ
ସୁଵର୍ଣସୂତ୍ରୈଶ୍ଚ ଗୃହାଣ କଂଠେ ।
ଚିତ୍ତେନ ଦତ୍ତା ଵିଵିଧାଶ୍ଚ ମାଲା
ଉରୋଦରେ ଶୋଭୟ ଵିଘ୍ନରାଜ ॥ 31 ॥

ଚଂଦ୍ରଂ ଲଲାଟେ ଗଣନାଥ ପୂର୍ଣଂ
ଵୃଦ୍ଧିକ୍ଷୟାଭ୍ୟାଂ ତୁ ଵିହୀନମାଦ୍ୟମ୍ ।
ସଂଶୋଭୟ ତ୍ଵଂ ଵରସଂୟୁତଂ ତେ
ଭକ୍ତିପ୍ରିୟତ୍ଵଂ ପ୍ରକଟୀକୁରୁଷ୍ଵ ॥ 32 ॥

ଚିଂତାମଣିଂ ଚିଂତିତଦଂ ପରେଶ
ହୃଦ୍ଦେଶଗଂ ଜ୍ୟୋତିର୍ମୟଂ କୁରୁଷ୍ଵ ।
ମଣିଂ ସଦାନଂଦସୁଖପ୍ରଦଂ ଚ
ଵିଘ୍ନେଶ ଦୀନାର୍ଥଦ ପାଲୟସ୍ଵ ॥ 33 ॥

ନାଭୌ ଫଣୀଶଂ ଚ ସହସ୍ରଶୀର୍ଷଂ
ସଂଵେଷ୍ଟନେନୈଵ ଗଣାଧିନାଥ ।
ଭକ୍ତଂ ସୁଭୂଷଂ କୁରୁ ଭୂଷଣେନ
ଵରପ୍ରଦାନଂ ସଫଲଂ ପରେଶ ॥ 34 ॥

କଟୀତଟେ ରତ୍ନସୁଵର୍ଣୟୁକ୍ତାଂ
କାଂଚୀଂ ସୁଚିତ୍ତେନ ଚ ଧାରୟାମି ।
ଵିଘ୍ନେଶ ଜ୍ୟୋତିର୍ଗଣଦୀପନୀଂ ତେ
ପ୍ରସୀଦ ଭକ୍ତଂ କୁରୁ ମାଂ ଦୟାବ୍ଧେ ॥ 35 ॥

ହେରଂବ ତେ ରତ୍ନସୁଵର୍ଣୟୁକ୍ତେ
ସୁନୂପୁରେ ମଂଜିରକେ ତଥୈଵ ।
ସୁକିଂକିଣୀନାଦୟୁତେ ସୁବୁଦ୍ଧ୍ୟା
ସୁପାଦୟୋଃ ଶୋଭୟ ମେ ପ୍ରଦତ୍ତେ ॥ 36 ॥

ଇତ୍ୟାଦି ନାନାଵିଧଭୂଷଣାନି
ତଵେଚ୍ଛୟା ମାନସକଲ୍ପିତାନି ।
ସଂଭୂଷୟାମ୍ୟେଵ ତ୍ଵଦଂଗକେଷୁ
ଵିଚିତ୍ରଧାତୁପ୍ରଭଵାନି ଢୁଂଢେ ॥ 37 ॥

ସୁଚଂଦନଂ ରକ୍ତମମୋଘଵୀର୍ୟଂ
ସୁଘର୍ଷିତଂ ହ୍ୟଷ୍ଟକଗଂଧମୁଖ୍ୟୈଃ ।
ୟୁକ୍ତଂ ମୟା କଲ୍ପିତମେକଦଂତ
ଗୃହାଣ ତେ ତ୍ଵଂଗଵିଲେପନାର୍ଥମ୍ ॥ 38 ॥

ଲିପ୍ତେଷୁ ଵୈଚିତ୍ର୍ୟମଥାଷ୍ଟଗଂଧୈ-
-ରଂଗେଷୁ ତେଽହଂ ପ୍ରକରୋମି ଚିତ୍ରମ୍ ।
ପ୍ରସୀଦ ଚିତ୍ତେନ ଵିନାୟକ ତ୍ଵଂ
ତତଃ ସୁରକ୍ତଂ ରଵିମେଵ ଫାଲେ ॥ 39 ॥

ଘୃତେନ ଵୈ କୁଂକୁମକେନ ରକ୍ତାନ୍
ସୁତଂଡୁଲାଂସ୍ତେ ପରିକଲ୍ପୟାମି ।
ଫାଲେ ଗଣାଧ୍ୟକ୍ଷ ଗୃହାଣ ପାହି
ଭକ୍ତାନ୍ ସୁଭକ୍ତିପ୍ରିୟ ଦୀନବଂଧୋ ॥ 40 ॥

ଗୃହାଣ ଭୋ ଚଂପକମାଲତୀନି
ଜଲପଂକଜାନି ସ୍ଥଲପଂକଜାନି ।
ଚିତ୍ତେନ ଦତ୍ତାନି ଚ ମଲ୍ଲିକାନି
ପୁଷ୍ପାଣି ନାନାଵିଧଵୃକ୍ଷଜାନି ॥ 41 ॥

ପୁଷ୍ପୋପରି ତ୍ଵଂ ମନସା ଗୃହାଣ
ହେରଂବ ମଂଦାରଶମୀଦଳାନି ।
ମୟା ସୁଚିତ୍ତେନ ପ୍ରକଲ୍ପିତାନି
ହ୍ୟପାରକାଣି ପ୍ରଣଵାକୃତେ ତୁ ॥ 42 ॥

ଦୂର୍ଵାଂକୁରାନ୍ଵୈ ମନସା ପ୍ରଦତ୍ତାଂ-
-ସ୍ତ୍ରିପଂଚପତ୍ରୈର୍ୟୁତକାଂଶ୍ଚ ସ୍ନିଗ୍ଧାନ୍ ।
ଗୃହାଣ ଵିଘ୍ନେଶ୍ଵର ସଂଖ୍ୟୟା ତ୍ଵଂ
ହୀନାଂଶ୍ଚ ସର୍ଵୋପରି ଵକ୍ରତୁଂଡ ॥ 43 ॥

ଦଶାଂଗଭୂତଂ ମନସା ମୟା ତେ
ଧୂପଂ ପ୍ରଦତ୍ତଂ ଗଣରାଜ ଢୁଂଢେ ।
ଗୃହାଣ ସୌରଭ୍ୟକରଂ ପରେଶ
ସିଦ୍ଧ୍ୟା ଚ ବୁଦ୍ଧ୍ୟା ସହ ଭକ୍ତପାଲ ॥ 44 ॥

ଦୀପଂ ସୁଵର୍ତ୍ୟା ୟୁତମାଦରାତ୍ତେ
ଦତ୍ତଂ ମୟା ମାନସକଂ ଗଣେଶ ।
ଗୃହାଣ ନାନାଵିଧଜଂ ଘୃତାଦି-
-ତୈଲାଦିସଂଭୂତମମୋଘଦୃଷ୍ଟେ ॥ 45 ॥

ଭୋଜ୍ୟଂ ଚ ଲେହ୍ୟଂ ଗଣରାଜ ପେୟଂ
ଚୋଷ୍ୟଂ ଚ ନାନାଵିଧଷଡ୍ରସାଢ୍ୟମ୍ ।
ଗୃହାଣ ନୈଵେଦ୍ୟମଥୋ ମୟା ତେ
ସୁକଲ୍ପିତଂ ପୁଷ୍ଟିପତେ ମହାତ୍ମନ୍ ॥ 46 ॥

ସୁଵାସିତଂ ଭୋଜନମଧ୍ୟଭାଗେ
ଜଲଂ ମୟା ଦତ୍ତମଥୋ ଗୃହାଣ ।
କମଂଡଲୁସ୍ଥଂ ମନସା ଗଣେଶ
ପିବସ୍ଵ ଵିଶ୍ଵାଦିକତୃପ୍ତିକାରିନ୍ ॥ 47 ॥

ତତଃ କରୋଦ୍ଵର୍ତନକଂ ଗୃହାଣ
ସୌଗଂଧ୍ୟୟୁକ୍ତଂ ମୁଖମାର୍ଜନାୟ ।
ସୁଵାସିତେନୈଵ ସୁତୀର୍ଥଜେନ
ସୁକଲ୍ପିତଂ ନାଥ ଗୃହାଣ ଢୁଂଢେ ॥ 48 ॥

ପୁନସ୍ତଥାଚମ୍ୟ ସୁଵାସିତଂ ଚ
ଦତ୍ତଂ ମୟା ତୀର୍ଥଜଲଂ ପିବସ୍ଵ ।
ପ୍ରକଲ୍ପ୍ୟ ଵିଘ୍ନେଶ ତତଃ ପରଂ ତେ
ସଂପ୍ରୋଂଛନଂ ହସ୍ତମୁଖେ କରୋମି ॥ 49 ॥

ଦ୍ରାକ୍ଷାଦିରଂଭାଫଲଚୂତକାନି
ଖାର୍ଜୂରକାର୍କଂଧୁକଦାଡିମାନି ।
ସୁସ୍ଵାଦୟୁକ୍ତାନି ମୟା ପ୍ରକଲ୍ପ୍ୟ
ଗୃହାଣ ଦତ୍ତାନି ଫଲାନି ଢୁଂଢେ ॥ 50 ॥

ପୁନର୍ଜଲେନୈଵ କରାଦିକଂ ତେ
ସଂକ୍ଷାଲୟାମି ମନସା ଗଣେଶ ।
ସୁଵାସିତଂ ତୋୟମଥୋ ପିବସ୍ଵ
ମୟା ପ୍ରଦତ୍ତଂ ମନସା ପରେଶ ॥ 51 ॥

ଅଷ୍ଟାଂଗୟୁକ୍ତଂ ଗଣନାଥ ଦତ୍ତଂ
ତାଂବୂଲକଂ ତେ ମନସା ମୟା ଵୈ ।
ଗୃହାଣ ଵିଘ୍ନେଶ୍ଵର ଭାଵୟୁକ୍ତଂ
ସଦା ସକୃତ୍ତୁଂଡଵିଶୋଧନାର୍ଥମ୍ ॥ 52 ॥

ତତୋ ମୟା କଲ୍ପିତକେ ଗଣେଶ
ମହାସନେ ରତ୍ନସୁଵର୍ଣୟୁକ୍ତେ ।
ମଂଦାରକାର୍ପାସକୟୁକ୍ତଵସ୍ତ୍ରୈ-
-ରନର୍ଘ୍ୟସଂଛାଦିତକେ ପ୍ରସୀଦ ॥ 53 ॥

ତତସ୍ତ୍ଵଦୀୟାଵରଣଂ ପରେଶ
ସଂପୂଜୟାମି ମନସା ୟଥାଵତ୍ ।
ନାନୋପଚାରୈଃ ପରମପ୍ରିୟୈସ୍ତୁ
ତ୍ଵତ୍ପ୍ରୀତିକାମାର୍ଥମନାଥବଂଧୋ ॥ 54 ॥

ଗୃହାଣ ଲଂବୋଦର ଦକ୍ଷିଣାଂ ତେ
ହ୍ୟସଂଖ୍ୟଭୂତାଂ ମନସା ପ୍ରଦତ୍ତାମ୍ ।
ସୌଵର୍ଣମୁଦ୍ରାଦିକମୁଖ୍ୟଭାଵାଂ
ପାହି ପ୍ରଭୋ ଵିଶ୍ଵମିଦଂ ଗଣେଶ ॥ 55 ॥

ରାଜୋପଚାରାନ୍ଵିଵିଧାନ୍ଗୃହାଣ
ହସ୍ତ୍ୟଶ୍ଵଛତ୍ରାଦିକମାଦରାଦ୍ଵୈ ।
ଚିତ୍ତେନ ଦତ୍ତାନ୍ ଗଣନାଥ ଢୁଂଢେ
ହ୍ୟପାରସଂଖ୍ୟାନ୍ ସ୍ଥିରଜଂଗମାଂସ୍ତେ ॥ 56 ॥

ଦାନାୟ ନାନାଵିଧରୂପକାଂସ୍ତେ
ଗୃହାଣ ଦତ୍ତାନ୍ମନସା ମୟା ଵୈ ।
ପଦାର୍ଥଭୂତାନ୍ ସ୍ଥିରଜଂଗମାଂଶ୍ଚ
ହେରଂବ ମାଂ ତାରୟ ମୋହଭାଵାତ୍ ॥ 57 ॥

ମଂଦାରପୁଷ୍ପାଣି ଶମୀଦଳାନି
ଦୂର୍ଵାଂକୁରାଂସ୍ତେ ମନସା ଦଦାମି ।
ହେରଂବ ଲଂବୋଦର ଦୀନପାଲ
ଗୃହାଣ ଭକ୍ତଂ କୁରୁ ମାଂ ପଦେ ତେ ॥ 58 ॥

ତତୋ ହରିଦ୍ରାମବିରଂ ଗୁଲାଲଂ
ସିଂଦୂରକଂ ତେ ପରିକଲ୍ପୟାମି ।
ସୁଵାସିତଂ ଵସ୍ତୁ ସୁଵାସଭୂତୈ-
-ର୍ଗୃହାଣ ବ୍ରହ୍ମେଶ୍ଵର ଶୋଭନାର୍ଥମ୍ ॥ 59 ॥

ତତଃ ଶୁକାଦ୍ୟାଃ ଶିଵଵିଷ୍ଣୁମୁଖ୍ୟା
ଇଂଦ୍ରାଦୟଃ ଶେଷମୁଖାସ୍ତଥାନ୍ୟେ ।
ମୁନୀଂଦ୍ରକାଃ ସେଵକଭାଵୟୁକ୍ତାଃ
ସଭାସନସ୍ଥଂ ପ୍ରଣମଂତି ଢୁଂଢିମ୍ ॥ 60 ॥

ଵାମାଂଗକେ ଶକ୍ତିୟୁତା ଗଣେଶଂ
ସିଦ୍ଧିସ୍ତୁ ନାନାଵିଧସିଦ୍ଧିଭିସ୍ତମ୍ ।
ଅତ୍ୟଂତଭାଵେନ ସୁସେଵତେ ତୁ
ମାୟାସ୍ଵରୂପା ପରମାର୍ଥଭୂତା ॥ 61 ॥

ଗଣେଶ୍ଵରଂ ଦକ୍ଷିଣଭାଗସଂସ୍ଥା
ବୁଦ୍ଧିଃ କଲାଭିଶ୍ଚ ସୁବୋଧିକାଭିଃ ।
ଵିଦ୍ୟାଭିରେଵଂ ଭଜତେ ପରେଶ
ମାୟାସୁ ସାଂଖ୍ୟପ୍ରଦଚିତ୍ତରୂପାଃ ॥ 62 ॥

ପ୍ରମୋଦମୋଦାଦୟଃ ପୃଷ୍ଠଭାଗେ
ଗଣେଶ୍ଵରଂ ଭାଵୟୁତା ଭଜଂତେ ।
ଭକ୍ତେଶ୍ଵରା ମୁଦ୍ଗଲଶଂଭୁମୁଖ୍ୟାଃ
ଶୁକାଦୟସ୍ତଂ ସ୍ମ ପୁରୋ ଭଜଂତେ ॥ 63 ॥

ଗଂଧର୍ଵମୁଖ୍ୟା ମଧୁରଂ ଜଗୁଶ୍ଚ
ଗଣେଶଗୀତଂ ଵିଵିଧସ୍ଵରୂପମ୍ ।
ନୃତ୍ୟଂ କଲାୟୁକ୍ତମଥୋ ପୁରସ୍ତା-
-ଚ୍ଚକ୍ରୁସ୍ତଥା ହ୍ୟପ୍ସରସୋ ଵିଚିତ୍ରମ୍ ॥ 64 ॥

ଇତ୍ୟାଦିନାନାଵିଧଭାଵୟୁକ୍ତୈଃ
ସଂସେଵିତଂ ଵିଘ୍ନପତିଂ ଭଜାମି ।
ଚିତ୍ତେନ ଧ୍ୟାତ୍ଵା ତୁ ନିରଂଜନଂ ଵୈ
କରୋମି ନାନାଵିଧଦୀପୟୁକ୍ତମ୍ ॥ 65 ॥

ଚତୁର୍ଭୁଜଂ ପାଶଧରଂ ଗଣେଶଂ
ତଥାଂକୁଶଂ ଦଂତୟୁତଂ ତମେଵମ୍ ।
ତ୍ରିନେତ୍ରୟୁକ୍ତଂ ତ୍ଵଭୟଂକରଂ ତଂ
ମହୋଦରଂ ଚୈକରଦଂ ଗଜାସ୍ୟମ୍ ॥ 66 ॥

ସର୍ପୋପଵୀତଂ ଗଜକର୍ଣଧାରଂ
ଵିଭୂତିଭିଃ ସେଵିତପାଦପଦ୍ମମ୍ ।
ଧ୍ୟାୟେଦ୍ଗଣେଶଂ ଵିଵିଧପ୍ରକାରୈଃ
ସୁପୂଜିତଂ ଶକ୍ତିୟୁତଂ ପରେଶମ୍ ॥ 67 ॥

ତତୋ ଜପଂ ଵୈ ମନସା କରୋମି
ସ୍ଵମୂଲମଂତ୍ରସ୍ୟ ଵିଧାନୟୁକ୍ତମ୍ ।
ଅସଂଖ୍ୟଭୂତଂ ଗଣରାଜ ହସ୍ତେ
ସମର୍ପୟାମ୍ୟେଵ ଗୃହାଣ ଢୁଂଢେ ॥ 68 ॥

ଆରାର୍ତିକାଂ କର୍ପୂରକାଦିଭୂତା-
-ମପାରଦୀପାଂ ପ୍ରକରୋମି ପୂର୍ଣାମ୍ ।
ଚିତ୍ତେନ ଲଂବୋଦର ତାଂ ଗୃହାଣ
ହ୍ୟଜ୍ଞାନଧ୍ଵାଂତାଘହରାଂ ନିଜାନାମ୍ ॥ 69 ॥

ଵେଦେଷୁ ଵିଘ୍ନେଶ୍ଵରକୈଃ ସୁମଂତ୍ରୈଃ
ସୁମଂତ୍ରିତଂ ପୁଷ୍ପଦଲଂ ପ୍ରଭୂତମ୍ ।
ଗୃହାଣ ଚିତ୍ତେନ ମୟା ପ୍ରଦତ୍ତ-
-ମପାରଵୃତ୍ତ୍ୟା ତ୍ଵଥ ମଂତ୍ରପୁଷ୍ପମ୍ ॥ 70 ॥

ଅପାରଵୃତ୍ୟା ସ୍ତୁତିମେକଦଂତଂ
ଗୃହାଣ ଚିତ୍ତେନ କୃତାଂ ଗଣେଶ ।
ୟୁକ୍ତାଂ ଶ୍ରୁତିସ୍ମାର୍ତଭଵୈଃ ପୁରାଣୈଃ
ସର୍ଵୈଃ ପରେଶାଧିପତେ ମୟା ତେ ॥ 71 ॥

ପ୍ରଦକ୍ଷିଣା ମାନସକଲ୍ପିତାସ୍ତା
ଗୃହାଣ ଲଂବୋଦର ଭାଵୟୁକ୍ତାଃ ।
ସଂଖ୍ୟାଵିହୀନା ଵିଵିଧସ୍ଵରୂପା
ଭକ୍ତାନ୍ ସଦା ରକ୍ଷ ଭଵାର୍ଣଵାଦ୍ଵୈ ॥ 72 ॥

ନତିଂ ତତୋ ଵିଘ୍ନପତେ ଗୃହାଣ
ସାଷ୍ଟାଂଗକାଦ୍ୟାଂ ଵିଵିଧସ୍ଵରୂପାମ୍ ।
ସଂଖ୍ୟାଵିହୀନାଂ ମନସା କୃତାଂ ତେ
ସିଦ୍ଧ୍ୟା ଚ ବୁଦ୍ଧ୍ୟା ପରିପାଲୟାଶୁ ॥ 73 ॥

ନ୍ୟୂନାତିରିକ୍ତଂ ତୁ ମୟା କୃତଂ ଚେ-
-ତ୍ତଦର୍ଥମଂତେ ମନସା ଗୃହାଣ ।
ଦୂର୍ଵାଂକୁରାନ୍ଵିଘ୍ନପତେ ପ୍ରଦତ୍ତାନ୍
ସଂପୂର୍ଣମେଵଂ କୁରୁ ପୂଜନଂ ମେ ॥ 74 ॥

କ୍ଷମସ୍ଵ ଵିଘ୍ନାଧିପତେ ମଦୀୟାନ୍
ସଦାପରାଧାନ୍ ଵିଵିଧସ୍ଵରୂପାନ୍ ।
ଭକ୍ତିଂ ମଦୀୟାଂ ସଫଲାଂ କୁରୁଷ୍ଵ
ସଂପ୍ରାର୍ଥୟାମି ମନସା ଗଣେଶ ॥ 75 ॥

ତତଃ ପ୍ରସନ୍ନେନ ଗଜାନନେନ
ଦତ୍ତଂ ପ୍ରସାଦଂ ଶିରସାଭିଵଂଦ୍ୟ ।
ସ୍ଵମସ୍ତକେ ତଂ ପରିଧାରୟାମି
ଚିତ୍ତେନ ଵିଘ୍ନେଶ୍ଵରମାନତୋଽସ୍ମି ॥ 76 ॥

ଉତ୍ଥାୟ ଵିଘ୍ନେଶ୍ଵର ଏଵ ତସ୍ମା-
-ଦ୍ଗତସ୍ତତସ୍ତ୍ଵଂତରଧାନଶକ୍ତ୍ୟା ।
ଶିଵାଦୟସ୍ତଂ ପ୍ରଣିପତ୍ୟ ସର୍ଵେ
ଗତାଃ ସୁଚିତ୍ତେନ ଚ ଚିଂତୟାମି ॥ 77 ॥

ସର୍ଵାନ୍ନମସ୍କୃତ୍ୟ ତତୋଽହମେଵ
ଭଜାମି ଚିତ୍ତେନ ଗଣାଧିପଂ ତମ୍ ।
ସ୍ଵସ୍ଥାନମାଗତ୍ୟ ମହାନୁଭାଵୈ-
-ର୍ଭକ୍ତୈର୍ଗଣେଶସ୍ୟ ଚ ଖେଲୟାମି ॥ 78 ॥

ଏଵଂ ତ୍ରିକାଲେଷୁ ଗଣାଧିପଂ ତଂ
ଚିତ୍ତେନ ନିତ୍ୟଂ ପରିପୂଜୟାମି ।
ତେନୈଵ ତୁଷ୍ଟଃ ପ୍ରଦଦାତୁ ଭାଵଂ
ଵିଶ୍ଵେଶ୍ଵରୋ ଭକ୍ତିମୟଂ ତୁ ମହ୍ୟମ୍ ॥ 79 ॥

ଗଣେଶପାଦୋଦକପାନକଂ ଚ
ହ୍ୟୁଚ୍ଛିଷ୍ଟଗଂଧସ୍ୟ ସୁଲେପନଂ ତୁ ।
ନିର୍ମାଲ୍ୟସଂଧାରଣକଂ ସୁଭୋଜ୍ୟଂ
ଲଂବୋଦରସ୍ୟାସ୍ତୁ ହି ଭୁକ୍ତଶେଷମ୍ ॥ 80 ॥

ୟଂ ୟଂ କରୋମ୍ୟେଵ ତଦେଵ ଦୀକ୍ଷା
ଗଣେଶ୍ଵରସ୍ୟାସ୍ତୁ ସଦା ଗଣେଶ ।
ପ୍ରସୀଦ ନିତ୍ୟଂ ତଵ ପାଦଭକ୍ତଂ
କୁରୁଷ୍ଵ ମାଂ ବ୍ରହ୍ମପତେ ଦୟାଲୋ ॥ 81 ॥

ତତସ୍ତୁ ଶୟ୍ୟାଂ ପରିକଲ୍ପୟାମି
ମଂଦାରକାର୍ପାସକଵସ୍ତ୍ରୟୁକ୍ତାମ୍ ।
ସୁଵାସପୁଷ୍ପାଦିଭିରର୍ଚିତାଂ
ତେ ଗୃହାଣ ନିଦ୍ରାଂ କୁରୁ ଵିଘ୍ନରାଜ ॥ 82 ॥

ସିଦ୍ଧ୍ୟା ଚ ବୁଦ୍ଧ୍ୟା ସହିତଂ ଗଣେଶ
ସୁନିଦ୍ରିତଂ ଵୀକ୍ଷ୍ୟ ତଥାହମେଵ ।
ଗତ୍ଵା ସ୍ଵଵାସଂ ଚ କରୋମି ନିଦ୍ରାଂ
ଧ୍ୟାତ୍ଵା ହୃଦି ବ୍ରହ୍ମପତିଂ ତଦୀୟଃ ॥ 83 ॥

ଏତାଦୃଶଂ ସୌଖ୍ୟମମୋଘଶକ୍ତେ
ଦେହି ପ୍ରଭୋ ମାନସଜଂ ଗଣେଶ ।
ମହ୍ୟଂ ଚ ତେନୈଵ କୃତାର୍ଥରୂପୋ
ଭଵାମି ଭକ୍ତିରସଲାଲସୋଽହମ୍ ॥ 84 ॥

ଗାର୍ଗ୍ୟ ଉଵାଚ ।
ଏଵଂ ନିତ୍ୟଂ ମହାରାଜ ଗୃତ୍ସମଦୋ ମହାୟଶାଃ ।
ଚକାର ମାନସୀଂ ପୂଜାଂ ୟୋଗୀଂଦ୍ରାଣାଂ ଗୁରୁଃ ସ୍ଵୟମ୍ ॥ 85 ॥

ୟ ଏତାଂ ମାନସୀଂ ପୂଜାଂ କରିଷ୍ୟତି ନରୋତ୍ତମଃ ।
ପଠିଷ୍ୟତି ସଦା ସୋଽପି ଗାଣପତ୍ୟୋ ଭଵିଷ୍ୟତି ॥ 86 ॥

ଶ୍ରାଵୟିଷ୍ୟତି ୟୋ ମର୍ତ୍ୟଃ ଶ୍ରୋଷ୍ୟତେ ଭାଵସଂୟୁତଃ ।
ସ କ୍ରମେଣ ମହୀପାଲ ବ୍ରହ୍ମଭୂତୋ ଭଵିଷ୍ୟତି ॥ 87 ॥

ୟଂ ୟମିଚ୍ଛତି ତଂ ତଂ ଵୈ ସଫଲଂ ତସ୍ୟ ଜାୟତେ ।
ଅଂତେ ସ୍ଵାନଂଦଗଃ ସୋଽପି ୟୋଗିଵଂଦ୍ୟୋ ଭଵିଷ୍ୟତି ॥ 88 ॥

ଇତି ଶ୍ରୀମଦାଂତ୍ୟେ ମୌଦ୍ଗଲ୍ୟେ ଗଣେଶମାନସପୂଜା ସଂପୂର୍ଣମ୍ ।