ശ്രീ ശീതലാ ദേവീ അഷ്ടകമ് (ശീതലാഷ്ടകമ്)

അസ്യ ശ്രീശീതലാസ്തോത്രസ്യ മഹാദേവ ഋഷിഃ അനുഷ്ടുപ് ഛംദഃ ശീതലാ ദേവതാ ലക്ഷ്മീര്ബീജം ഭവാനീ ശക്തിഃ സർവവിസ്ഫോടകനിവൃത്യര്ഥേ ജപേ വിനിയോഗഃ ॥

ഈശ്വര ഉവാച ।
വംദേഽഹം ശീതലാം ദേവീം രാസഭസ്ഥാം ദിഗംബരാമ് ।
മാര്ജനീകലശോപേതാം ശൂര്പാലംകൃതമസ്തകാമ് ॥ 1 ॥

വംദേഽഹം ശീതലാം ദേവീം സർവരോഗഭയാപഹാമ് ।
യാമാസാദ്യ നിവര്തേത വിസ്ഫോടകഭയം മഹത് ॥ 2 ॥

ശീതലേ ശീതലേ ചേതി യോ ബ്രൂയാദ്ദാഹപീഡിതഃ ।
വിസ്ഫോടകഭയം ഘോരം ക്ഷിപ്രം തസ്യ പ്രണശ്യതി ॥ 3 ॥

യസ്ത്വാമുദകമധ്യേ തു ധ്യാത്വാ സംപൂജയേന്നരഃ ।
വിസ്ഫോടകഭയം ഘോരം ഗൃഹേ തസ്യ ന ജായതേ ॥ 4 ॥

ശീതലേ ജ്വരദഗ്ധസ്യ പൂതിഗംധയുതസ്യ ച ।
പ്രണഷ്ടചക്ഷുഷഃ പുംസസ്ത്വാമാഹുര്ജീവനൌഷധമ് ॥ 5 ॥

ശീതലേ തനുജാന് രോഗാന് നൃണാം ഹരസി ദുസ്ത്യജാന് ।
വിസ്ഫോടകവിദീര്ണാനാം ത്വമേകാഽമൃതവര്ഷിണീ ॥ 6 ॥

ഗലഗംഡഗ്രഹാ രോഗാ യേ ചാന്യേ ദാരുണാ നൃണാമ് ।
ത്വദനുധ്യാനമാത്രേണ ശീതലേ യാംതി സംക്ഷയമ് ॥ 7 ॥

ന മംത്രോ നൌഷധം തസ്യ പാപരോഗസ്യ വിദ്യതേ ।
ത്വാമേകാം ശീതലേ ധാത്രീം നാന്യാം പശ്യാമി ദേവതാമ് ॥ 8 ॥

മൃണാലതംതുസദൃശീം നാഭിഹൃന്മധ്യസംസ്ഥിതാമ് ।
യസ്ത്വാം സംചിംതയേദ്ദേവി തസ്യ മൃത്യുര്ന ജായതേ ॥ 9 ॥

അഷ്ടകം ശീതലാദേവ്യാ യോ നരഃ പ്രപഠേത്സദാ ।
വിസ്ഫോടകഭയം ഘോരം ഗൃഹേ തസ്യ ന ജായതേ ॥ 10 ॥

ശ്രോതവ്യം പഠിതവ്യം ച ശ്രദ്ധാഭക്തിസമന്വിതൈഃ ।
ഉപസര്ഗവിനാശായ പരം സ്വസ്ത്യയനം മഹത് ॥ 11 ॥

ശീതലേ ത്വം ജഗന്മാതാ ശീതലേ ത്വം ജഗത്പിതാ ।
ശീതലേ ത്വം ജഗദ്ധാത്രീ ശീതലായൈ നമോ നമഃ ॥ 12 ॥

രാസഭോ ഗര്ദഭശ്ചൈവ ഖരോ വൈശാഖനംദനഃ ।
ശീതലാവാഹനശ്ചൈവ ദൂർവാകംദനികൃംതനഃ ॥ 13 ॥

ഏതാനി ഖരനാമാനി ശീതലാഗ്രേ തു യഃ പഠേത് ।
തസ്യ ഗേഹേ ശിശൂനാം ച ശീതലാരുങ് ന ജായതേ ॥ 14 ॥

ശീതലാഷ്ടകമേവേദം ന ദേയം യസ്യകസ്യചിത് ।
ദാതവ്യം ച സദാ തസ്മൈ ശ്രദ്ധാഭക്തിയുതായ വൈ ॥ 15 ॥

ഇതി ശ്രീസ്കാംദപുരാണേ ശീതലാഷ്ടകമ് ॥