ശ്രീ ദുര്ഗാ സ്തോത്രമ് (യുധിഷ്ഠിര കൃതം)

വിരാടനഗരം രമ്യം ഗച്ഛമാനോ യുധിഷ്ഠിരഃ ।
അസ്തുവന്മനസാ ദേവീം ദുര്ഗാം ത്രിഭുവനേശ്വരീമ് ॥ 1 ॥

യശോദാഗര്ഭസംഭൂതാം നാരായണവരപ്രിയാമ് ।
നംദഗോപകുലേ ജാതാം മംഗള്യാം കുലവര്ധിനീമ് ॥ 2 ॥

കംസവിദ്രാവണകരീമസുരാണാം ക്ഷയംകരീമ് ।
ശിലാതടവിനിക്ഷിപ്താമാകാശം പ്രതി ഗാമിനീമ് ॥ 3 ॥

വാസുദേവസ്യ ഭഗിനീം ദിവ്യമാല്യവിഭൂഷിതാമ് ।
ദിവ്യാംബരധരാം ദേവീം ഖഡ്ഗഖേടകധാരിണീമ് ॥ 4 ॥

ഭാരാവതരണേ പുണ്യേ യേ സ്മരംതി സദാശിവാമ് ।
താന് വൈ താരയതേ പാപാത് പംകേ ഗാമിവ ദുര്ബലാമ് ॥ 5 ॥

സ്തോതും പ്രചക്രമേ ഭൂയോ വിവിധൈഃ സ്തോത്രസംഭവൈഃ ।
ആമംത്ര്യ ദര്ശനാകാംക്ഷീ രാജാ ദേവീം സഹാനുജഃ ॥ 6 ॥

നമോഽസ്തു വരദേ കൃഷ്ണേ കുമാരി ബ്രഹ്മചാരിണി ।
ബാലാര്കസദൃശാകാരേ പൂര്ണചംദ്രനിഭാനനേ ॥ 7 ॥

ചതുര്ഭുജേ ചതുർവക്ത്രേ പീനശ്രോണിപയോധരേ ।
മയൂരപിച്ഛവലയേ കേയൂരാംഗദധാരിണി ॥ 8 ॥

ഭാസി ദേവി യഥാ പദ്മാ നാരായണപരിഗ്രഹഃ ।
സ്വരൂപം ബ്രഹ്മചര്യം ച വിശദം തവ ഖേചരി ॥ 9 ॥

കൃഷ്ണച്ഛവിസമാ കൃഷ്ണാ സംകര്ഷണസമാനനാ ।
ബിഭ്രതീ വിപുലൌ ബാഹൂ ശക്രധ്വജസമുച്ഛ്രയൌ ॥ 10 ॥

പാത്രീ ച പംകജീ ഘംടീ സ്ത്രീവിശുദ്ധാ ച യാ ഭുവി ।
പാശം ധനുര്മഹാചക്രം വിവിധാന്യായുധാനി ച ॥ 11 ॥

കുംഡലാഭ്യാം സുപൂര്ണാഭ്യാം കര്ണാഭ്യാം ച വിഭൂഷിതാ ।
ചംദ്രവിസ്പര്ധിനാ ദേവി മുഖേന ത്വം വിരാജസേ ॥ 12 ॥

മുകുടേന വിചിത്രേണ കേശബംധേന ശോഭിനാ ।
ഭുജംഗാഭോഗവാസേന ശ്രോണിസൂത്രേണ രാജതാ ॥ 13 ॥

വിഭ്രാജസേ ചാബദ്ധേന ഭോഗേനേവേഹ മംദരഃ ।
ധ്വജേന ശിഖിപിച്ഛാനാമുച്ഛ്രിതേന വിരാജസേ ॥ 14 ॥

കൌമാരം വ്രതമാസ്ഥായ ത്രിദിവം പാവിതം ത്വയാ ।
തേന ത്വം സ്തൂയസേ ദേവി ത്രിദശൈഃ പൂജ്യസേഽപി ച ॥ 15 ॥

ത്രൈലോക്യരക്ഷണാര്ഥായ മഹിഷാസുരനാശിനി ।
പ്രസന്നാ മേ സുരശ്രേഷ്ഠേ ദയാം കുരു ശിവാ ഭവ ॥ 16 ॥

ജയാ ത്വം വിജയാ ചൈവ സംഗ്രാമേ ച ജയപ്രദാ ।
മമാപി വിജയം ദേഹി വരദാ ത്വം ച സാംപ്രതമ് ॥ 17 ॥

വിംധ്യേ ചൈവ നഗശ്രേഷ്ഠേ തവ സ്ഥാനം ഹി ശാശ്വതമ് ।
കാളി കാളി മഹാകാളി ശീധുമാംസപശുപ്രിയേ ॥ 18 ॥

കൃതാനുയാത്രാ ഭൂതൈസ്ത്വം വരദാ കാമചാരിണീ ।
ഭാരാവതാരേ യേ ച ത്വാം സംസ്മരിഷ്യംതി മാനവാഃ ॥ 19 ॥

പ്രണമംതി ച യേ ത്വാം ഹി പ്രഭാതേ തു നരാ ഭുവി ।
ന തേഷാം ദുര്ലഭം കിംചിത് പുത്രതോ ധനതോഽപി വാ ॥ 20 ॥

ദുര്ഗാത് താരയസേ ദുര്ഗേ തത് ത്വം ദുര്ഗാ സ്മൃതാ ജനൈഃ ।
കാംതാരേഷ്വവസന്നാനാം മഗ്നാനാം ച മഹാര്ണവേ ।
ദസ്യുഭിർവാ നിരുദ്ധാനാം ത്വം ഗതിഃ പരമാ നൃണാമ് ॥ 21 ॥

ജലപ്രതരണേ ചൈവ കാംതാരേഷ്വടവീഷു ച ।
യേ സ്മരംതി മഹാദേവി ന ച സീദംതി തേ നരാഃ ॥ 22 ॥

ത്വം കീര്തിഃ ശ്രീര്ധൃതിഃ സിദ്ധിര്ഹ്രീർവിദ്യാ സംതതിര്മതിഃ ।
സംധ്യാ രാത്രിഃ പ്രഭാ നിദ്രാ ജ്യോത്സ്നാ കാംതിഃ ക്ഷമാ ദയാ ॥ 23 ॥

നൃണാം ച ബംധനം മോഹം പുത്രനാശം ധനക്ഷയമ് ।
വ്യാധിം മൃത്യും ഭയം ചൈവ പൂജിതാ നാശയിഷ്യസി ॥ 24 ॥

സോഽഹം രാജ്യാത്പരിഭ്രഷ്ടഃ ശരണം ത്വാം പ്രപന്നവാന് ।
പ്രണതശ്ച യഥാ മൂര്ധ്നാ തവ ദേവി സുരേശ്വരി ॥ 25 ॥

ത്രാഹി മാം പദ്മപത്രാക്ഷി സത്യേ സത്യാ ഭവസ്വ നഃ ।
ശരണം ഭവ മേ ദുര്ഗേ ശരണ്യേ ഭക്തവത്സലേ ॥ 26 ॥

ഏവം സ്തുതാ ഹി സാ ദേവീ ദര്ശയാമാസ പാംഡവമ് ।
ഉപഗമ്യ തു രാജാനാമിദം വചനമബ്രവീത് ॥ 27 ॥

ദേവ്യുവാച ।
ശൃണു രാജന് മഹാബാഹോ മദീയം വചനം പ്രഭോ ।
ഭവിഷ്യത്യചിരാദേവ സംഗ്രാമേ വിജയസ്തവ ॥ 28 ॥

മമ പ്രസാദാന്നിര്ജിത്യ ഹത്വാ കൌരവവാഹിനീമ് ।
രാജ്യം നിഷ്കംടകം കൃത്വാ ഭോക്ഷ്യസേ മേദിനീം പുനഃ ॥ 29 ॥

ഭാത്രൃഭിഃ സഹിതോ രാജന് പ്രീതിം പ്രാപ്സ്യസി പുഷ്കലാമ് ।
മത്പ്രസാദാച്ച തേ സൌഖ്യമാരോഗ്യം ച ഭവിഷ്യതി ॥ 30 ॥

യേ ച സംകീര്തയിഷ്യംതി ലോകേ വിഗതകല്മഷാഃ ।
തേഷാം തുഷ്ടാ പ്രദാസ്യാമി രാജ്യമായുർവപുഃ സുതമ് ॥ 31 ॥

പ്രവാസേ നഗരേ ചാപി സംഗ്രാമേ ശത്രുസംകടേ ।
അടവ്യാം ദുര്ഗകാംതാരേ സാഗരേ ഗഹനേ ഗിരൌ ॥ 32 ॥

യേ സ്മരിഷ്യംതി മാം രാജന് യഥാഽഹം ഭവതാ സ്മൃതാ ।
ന തേഷാം ദുര്ലഭം കിംചിദസ്മില്ലോകേ ഭവിഷ്യതി ॥ 33 ॥

ഇദം സ്തോത്രവരം ഭക്ത്യാ ശൃണുയാദ്വാ പഠേത വാ ।
തസ്യ സർവാണി കാര്യാണി സിദ്ധിം യാസ്യംതി പാംഡവാഃ ॥ 34 ॥

മത്പ്രസാദാച്ച വഃ സർവാന്വിരാടനഗരേ സ്ഥിതാന് ।
ന പ്രജ്ഞാസ്യംതി കുരവോ നരാ വാ തന്നിവാസിനഃ ॥ 35 ॥

ഇത്യുക്ത്വാ വരദാ ദേവീ യുധിഷ്ഠിരമരിംദമമ് ।
രക്ഷാം കൃത്വാ ച പാംഡൂനാം തത്രൈവാംതരധീയത ॥ 36 ॥

ഇതി ശ്രീമന്മഹാഭാരതേ വിരാടപർവണി അഷ്ടമോഽധ്യായേ യുധിഷ്ഠിര കൃത ശ്രീ ദുര്ഗാ സ്തോത്രമ് ।