ദേവ്യപരാധ ക്ഷമാപണ സ്തോത്രമ്

ന മംത്രം നോ യംത്രം തദപി ച ന ജാനേ സ്തുതിമഹോ
ന ചാഹ്വാനം ധ്യാനം തദപി ച ന ജാനേ സ്തുതികഥാഃ ।
ന ജാനേ മുദ്രാസ്തേ തദപി ച ന ജാനേ വിലപനം
പരം ജാനേ മാതസ്ത്വദനുസരണം ക്ലേശഹരണമ് ॥ 1 ॥

വിധേരജ്ഞാനേന ദ്രവിണവിരഹേണാലസതയാ
വിധേയാശക്യത്വാത്തവ ചരണയോര്യാ ച്യുതിരഭൂത് ।
തദേതത് ക്ഷംതവ്യം ജനനി സകലോദ്ധാരിണി ശിവേ
കുപുത്രോ ജായേത ക്വചിദപി കുമാതാ ന ഭവതി ॥ 2 ॥

പൃഥിവ്യാം പുത്രാസ്തേ ജനനി ബഹവഃ സംതി സരലാഃ
പരം തേഷാം മധ്യേ വിരലതരലോഽഹം തവ സുതഃ ।
മദീയോഽയം ത്യാഗഃ സമുചിതമിദം നോ തവ ശിവേ
കുപുത്രോ ജായേത ക്വചിദപി കുമാതാ ന ഭവതി ॥ 3 ॥

ജഗന്മാതര്മാതസ്തവ ചരണസേവാ ന രചിതാ
ന വാ ദത്തം ദേവി ദ്രവിണമപി ഭൂയസ്തവ മയാ ।
തഥാപി ത്വം സ്നേഹം മയി നിരുപമം യത്പ്രകുരുഷേ
കുപുത്രോ ജായേത ക്വചിദപി കുമാതാ ന ഭവതി ॥ 4 ॥

പരിത്യക്താ ദേവാന്വിവിധവിധിസേവാകുലതയാ
മയാ പംചാശീതേരധികമപനീതേ തു വയസി ।
ഇദാനീം ചേന്മാതസ്തവ യദി കൃപാ നാപി ഭവിതാ
നിരാലംബോ ലംബോദരജനനി കം യാമി ശരണമ് ॥ 5 ॥

ശ്വപാകോ ജല്പാകോ ഭവതി മധുപാകോപമഗിരാ
നിരാതംകോ രംകോ വിഹരതി ചിരം കോടികനകൈഃ ।
തവാപര്ണേ കര്ണേ വിശതി മനുവര്ണേ ഫലമിദം
ജനഃ കോ ജാനീതേ ജനനി ജപനീയം ജപവിധൌ ॥ 6 ॥

ചിതാഭസ്മാലേപോ ഗരളമശനം ദിക്പടധരോ
ജടാധാരീ കംഠേ ഭുജഗപതിഹാരീ പശുപതിഃ ।
കപാലീ ഭൂതേശോ ഭജതി ജഗദീശൈകപദവീം
ഭവാനീ ത്വത്പാണിഗ്രഹണപരിപാടീ ഫലമിദമ് ॥ 7 ॥

ന മോക്ഷസ്യാകാംക്ഷാ ന ച വിഭവവാംഛാപി ച ന മേ
ന വിജ്ഞാനാപേക്ഷാ ശശിമുഖി സുഖേച്ഛാപി ന പുനഃ ।
അതസ്ത്വാം സംയാചേ ജനനി ജനനം യാതു മമ വൈ
മൃഡാനീ രുദ്രാണീ ശിവ ശിവ ഭവാനീതി ജപതഃ ॥ 8 ॥

നാരാധിതാസി വിധിനാ വിവിധോപചാരൈഃ
കിം രൂക്ഷചിംതനപരൈര്ന കൃതം വചോഭിഃ ।
ശ്യാമേ ത്വമേവ യദി കിംചന മയ്യനാഥേ
ധത്സേ കൃപാമുചിതമംബ പരം തവൈവ ॥ 9 ॥

ആപത്സു മഗ്നഃ സ്മരണം ത്വദീയം
കരോമി ദുര്ഗേ കരുണാര്ണവേ ശിവേ ।
നൈതച്ഛഠത്വം മമ ഭാവയേഥാഃ
ക്ഷുധാതൃഷാര്താഃ ജനനീം സ്മരംതി ॥ 10 ॥

ജഗദംബ വിചിത്രമത്ര കിം
പരിപൂര്ണാ കരുണാസ്തി ചേന്മയി ।
അപരാധപരംപരാവൃതം
ന ഹി മാതാ സമുപേക്ഷതേ സുതമ് ॥ 11 ॥

മത്സമഃ പാതകീ നാസ്തി പാപഘ്നീ ത്വത്സമാ ന ഹി ।
ഏവം ജ്ഞാത്വാ മഹാദേവീ യഥാ യോഗ്യം തഥാ കുരു ॥ 12 ॥

ഇതി ശ്രീമച്ഛംകരാചാര്യ വിരചിതം ദേവ്യപരാധക്ഷമാപണ സ്തോത്രമ് ।