𑌵𑌿𑌷𑍍𑌣𑍁 𑌪𑌾𑌦𑌾𑌦𑌿 𑌕𑍇𑌶𑌾𑌂𑌤 𑌵𑌰𑍍𑌣𑌨 𑌸𑍍𑌤𑍋𑌤𑍍𑌰𑌂

𑌲𑌕𑍍𑌷𑍍𑌮𑍀𑌭𑌰𑍍𑌤𑍁𑌰𑍍𑌭𑍁𑌜𑌾𑌗𑍍𑌰𑍇 𑌕𑍃𑌤𑌵𑌸𑌤𑌿 𑌸𑌿𑌤𑌂 𑌯𑌸𑍍𑌯 𑌰𑍂𑌪𑌂 𑌵𑌿𑌶𑌾𑌲𑌂
𑌨𑍀𑌲𑌾𑌦𑍍𑌰𑍇𑌸𑍍𑌤𑍁𑌂𑌗𑌶𑍃𑌂𑌗𑌸𑍍𑌥𑌿𑌤𑌮𑌿𑌵 𑌰𑌜𑌨𑍀𑌨𑌾𑌥𑌬𑌿𑌂𑌬𑌂 𑌵𑌿𑌭𑌾𑌤𑌿 ।
𑌪𑌾𑌯𑌾𑌨𑍍𑌨𑌃 𑌪𑌾𑌂𑌚𑌜𑌨𑍍𑌯𑌃 𑌸 𑌦𑌿𑌤𑌿𑌸𑍁𑌤𑌕𑍁𑌲𑌤𑍍𑌰𑌾𑌸𑌨𑍈𑌃 𑌪𑍂𑌰𑌯𑌨𑍍𑌸𑍍𑌵𑍈-
-𑌰𑍍𑌨𑌿𑌧𑍍𑌵𑌾𑌨𑍈𑌰𑍍𑌨𑍀𑌰𑌦𑍌𑌘𑌧𑍍𑌵𑌨𑌿𑌪𑌰𑌿𑌭𑌵𑌦𑍈𑌰𑌂𑌬𑌰𑌂 𑌕𑌂𑌬𑍁𑌰𑌾𑌜𑌃 ॥ 1 ॥

𑌆𑌹𑍁𑌰𑍍𑌯𑌸𑍍𑌯 𑌸𑍍𑌵𑌰𑍂𑌪𑌂 𑌕𑍍𑌷𑌣𑌮𑍁𑌖𑌮𑌖𑌿𑌲𑌂 𑌸𑍂𑌰𑌯𑌃 𑌕𑌾𑌲𑌮𑍇𑌤𑌂
𑌧𑍍𑌵𑌾𑌂𑌤𑌸𑍍𑌯𑍈𑌕𑌾𑌂𑌤𑌮𑌂𑌤𑌂 𑌯𑌦𑌪𑌿 𑌚 𑌪𑌰𑌮𑌂 𑌸𑌰𑍍𑌵𑌧𑌾𑌮𑍍𑌨𑌾𑌂 𑌚 𑌧𑌾𑌮 ।
𑌚𑌕𑍍𑌰𑌂 𑌤𑌚𑍍𑌚𑌕𑍍𑌰𑌪𑌾𑌣𑍇𑌰𑍍𑌦𑌿𑌤𑌿𑌜𑌤𑌨𑍁𑌗𑌲𑌦𑍍𑌰𑌕𑍍𑌤𑌧𑌾𑌰𑌾𑌕𑍍𑌤𑌧𑌾𑌰𑌂
𑌶𑌶𑍍𑌵𑌨𑍍𑌨𑍋 𑌵𑌿𑌶𑍍𑌵𑌵𑌂𑌦𑍍𑌯𑌂 𑌵𑌿𑌤𑌰𑌤𑍁 𑌵𑌿𑌪𑍁𑌲𑌂 𑌶𑌰𑍍𑌮 𑌧𑌰𑍍𑌮𑌾𑌂𑌶𑍁𑌶𑍋𑌭𑌮𑍍 ॥ 2 ॥

𑌅𑌵𑍍𑌯𑌾𑌨𑍍𑌨𑌿𑌰𑍍𑌘𑌾𑌤𑌘𑍋𑌰𑍋 𑌹𑌰𑌿𑌭𑍁𑌜𑌪𑌵𑌨𑌾𑌮𑌰𑍍𑌶𑌨𑌾𑌧𑍍𑌮𑌾𑌤𑌮𑍂𑌰𑍍𑌤𑍇-
-𑌰𑌸𑍍𑌮𑌾𑌨𑍍𑌵𑌿𑌸𑍍𑌮𑍇𑌰𑌨𑍇𑌤𑍍𑌰𑌤𑍍𑌰𑌿𑌦𑌶𑌨𑍁𑌤𑌿𑌵𑌚𑌃𑌸𑌾𑌧𑍁𑌕𑌾𑌰𑍈𑌃 𑌸𑍁𑌤𑌾𑌰𑌃 ।
𑌸𑌰𑍍𑌵𑌂 𑌸𑌂𑌹𑌰𑍍𑌤𑍁𑌮𑌿𑌚𑍍𑌛𑍋𑌰𑌰𑌿𑌕𑍁𑌲𑌭𑍁𑌵𑌨 𑌸𑍍𑌫𑌾𑌰𑌵𑌿𑌷𑍍𑌫𑌾𑌰𑌨𑌾𑌦𑌃
𑌸𑌂𑌯𑌤𑍍𑌕𑌲𑍍𑌪𑌾𑌂𑌤𑌸𑌿𑌂𑌧𑍌 𑌶𑌰𑌸𑌲𑌿𑌲𑌘𑌟𑌾𑌵𑌾𑌰𑍍𑌮𑍁𑌚𑌃 𑌕𑌾𑌰𑍍𑌮𑍁𑌕𑌸𑍍𑌯 ॥ 3 ॥

𑌜𑍀𑌮𑍂𑌤𑌶𑍍𑌯𑌾𑌮𑌭𑌾𑌸𑌾 𑌮𑍁𑌹𑍁𑌰𑌪𑌿 𑌭𑌗𑌵𑌦𑍍𑌬𑌾𑌹𑍁𑌨𑌾 𑌮𑍋𑌹𑌯𑌂𑌤𑍀
𑌯𑍁𑌦𑍍𑌧𑍇𑌷𑍂𑌦𑍍𑌧𑍂𑌯𑌮𑌾𑌨𑌾 𑌝𑌟𑌿𑌤𑌿 𑌤𑌟𑌿𑌦𑌿𑌵𑌾𑌲𑌕𑍍𑌷𑍍𑌯𑌤𑍇 𑌯𑌸𑍍𑌯 𑌮𑍂𑌰𑍍𑌤𑌿𑌃 ।
𑌸𑍋𑌽𑌸𑌿𑌸𑍍𑌤𑍍𑌰𑌾𑌸𑌾𑌕𑍁𑌲𑌾𑌕𑍍𑌷𑌤𑍍𑌰𑌿𑌦𑌶𑌰𑌿𑌪𑍁𑌵𑌪𑍁𑌃𑌶𑍋𑌣𑌿𑌤𑌾𑌸𑍍𑌵𑌾𑌦𑌤𑍃𑌪𑍍𑌤𑍋
𑌨𑌿𑌤𑍍𑌯𑌾𑌨𑌂𑌦𑌾𑌯 𑌭𑍂𑌯𑌾𑌨𑍍𑌮𑌧𑍁𑌮𑌥𑌨𑌮𑌨𑍋𑌨𑌂𑌦𑌨𑍋 𑌨𑌂𑌦𑌕𑍋 𑌨𑌃 ॥ 4 ॥

𑌕𑌮𑍍𑌰𑌾𑌕𑌾𑌰𑌾 𑌮𑍁𑌰𑌾𑌰𑍇𑌃 𑌕𑌰𑌕𑌮𑌲𑌤𑌲𑍇𑌨𑌾𑌨𑍁𑌰𑌾𑌗𑌾𑌦𑍍𑌗𑍃𑌹𑍀𑌤𑌾
𑌸𑌮𑍍𑌯𑌗𑍍𑌵𑍃𑌤𑍍𑌤𑌾 𑌸𑍍𑌥𑌿𑌤𑌾𑌗𑍍𑌰𑍇 𑌸𑌪𑌦𑌿 𑌨 𑌸𑌹𑌤𑍇 𑌦𑌰𑍍𑌶𑌨𑌂 𑌯𑌾 𑌪𑌰𑍇𑌷𑌾𑌮𑍍 ।
𑌰𑌾𑌜𑌂𑌤𑍀 𑌦𑍈𑌤𑍍𑌯𑌜𑍀𑌵𑌾𑌸𑌵𑌮𑌦𑌮𑍁𑌦𑌿𑌤𑌾 𑌲𑍋𑌹𑌿𑌤𑌾𑌲𑍇𑌪𑌨𑌾𑌰𑍍𑌦𑍍𑌰𑌾
𑌕𑌾𑌮𑌂 𑌦𑍀𑌪𑍍𑌤𑌾𑌂𑌶𑍁𑌕𑌾𑌂𑌤𑌾 𑌪𑍍𑌰𑌦𑌿𑌶𑌤𑍁 𑌦𑌯𑌿𑌤𑍇𑌵𑌾𑌸𑍍𑌯 𑌕𑍌𑌮𑍋𑌦𑌕𑍀 𑌨𑌃 ॥ 5 ॥

𑌯𑍋 𑌵𑌿𑌶𑍍𑌵𑌪𑍍𑌰𑌾𑌣𑌭𑍂𑌤𑌸𑍍𑌤𑌨𑍁𑌰𑌪𑌿 𑌚 𑌹𑌰𑍇𑌰𑍍𑌯𑌾𑌨𑌕𑍇𑌤𑍁𑌸𑍍𑌵𑌰𑍂𑌪𑍋
𑌯𑌂 𑌸𑌂𑌚𑌿𑌂𑌤𑍍𑌯𑍈𑌵 𑌸𑌦𑍍𑌯𑌃 𑌸𑍍𑌵𑌯𑌮𑍁𑌰𑌗𑌵𑌧𑍂𑌵𑌰𑍍𑌗𑌗𑌰𑍍𑌭𑌾𑌃 𑌪𑌤𑌂𑌤𑌿 ।
𑌚𑌂𑌚𑌚𑍍𑌚𑌂𑌡𑍋𑌰𑍁𑌤𑍁𑌂𑌡𑌤𑍍𑌰𑍁𑌟𑌿𑌤𑌫𑌣𑌿𑌵𑌸𑌾𑌰𑌕𑍍𑌤𑌪𑌂𑌕𑌾𑌂𑌕𑌿𑌤𑌸𑍍𑌯𑌂
𑌵𑌂𑌦𑍇 𑌛𑌂𑌦𑍋𑌮𑌯𑌂 𑌤𑌂 𑌖𑌗𑌪𑌤𑌿𑌮𑌮𑌲𑌸𑍍𑌵𑌰𑍍𑌣𑌵𑌰𑍍𑌣𑌂 𑌸𑍁𑌪𑌰𑍍𑌣𑌮𑍍 ॥ 6 ॥

𑌵𑌿𑌷𑍍𑌣𑍋𑌰𑍍𑌵𑌿𑌶𑍍𑌵𑍇𑌶𑍍𑌵𑌰𑌸𑍍𑌯 𑌪𑍍𑌰𑌵𑌰𑌶𑌯𑌨𑌕𑍃𑌤𑍍𑌸𑌰𑍍𑌵𑌲𑍋𑌕𑍈𑌕𑌧𑌰𑍍𑌤𑌾
𑌸𑍋𑌽𑌨𑌂𑌤𑌃 𑌸𑌰𑍍𑌵𑌭𑍂𑌤𑌃 𑌪𑍃𑌥𑍁𑌵𑌿𑌮𑌲𑌯𑌶𑌾𑌃 𑌸𑌰𑍍𑌵𑌵𑍇𑌦𑍈𑌶𑍍𑌚 𑌵𑍇𑌦𑍍𑌯𑌃 ।
𑌪𑌾𑌤𑌾 𑌵𑌿𑌶𑍍𑌵𑌸𑍍𑌯 𑌶𑌶𑍍𑌵𑌤𑍍𑌸𑌕𑌲𑌸𑍁𑌰𑌰𑌿𑌪𑍁𑌧𑍍𑌵𑌂𑌸𑌨𑌃 𑌪𑌾𑌪𑌹𑌂𑌤𑌾
𑌸𑌰𑍍𑌵𑌜𑍍𑌞𑌃 𑌸𑌰𑍍𑌵𑌸𑌾𑌕𑍍𑌷𑍀 𑌸𑌕𑌲𑌵𑌿𑌷𑌭𑌯𑌾𑌤𑍍𑌪𑌾𑌤𑍁 𑌭𑍋𑌗𑍀𑌶𑍍𑌵𑌰𑍋 𑌨𑌃 ॥ 𑍭 ॥

𑌵𑌾𑌗𑍍𑌭𑍂𑌗𑍈𑌰𑍍𑌯𑌾𑌦𑌿𑌭𑍇𑌦𑍈𑌰𑍍𑌵𑌿𑌦𑍁𑌰𑌿𑌹 𑌮𑍁𑌨𑌯𑍋 𑌯𑌾𑌂 𑌯𑌦𑍀𑌯𑍈𑌶𑍍𑌚 𑌪𑍁𑌂𑌸𑌾𑌂
𑌕𑌾𑌰𑍁𑌣𑍍𑌯𑌾𑌰𑍍𑌦𑍍𑌰𑍈𑌃 𑌕𑌟𑌾𑌕𑍍𑌷𑍈𑌃 𑌸𑌕𑍃𑌦𑌪𑌿 𑌪𑌤𑌿𑌤𑍈𑌃 𑌸𑌂𑌪𑌦𑌃 𑌸𑍍𑌯𑍁𑌃 𑌸𑌮𑌗𑍍𑌰𑌾𑌃 ।
𑌕𑍁𑌂𑌦𑍇𑌂𑌦𑍁𑌸𑍍𑌵𑌚𑍍𑌛𑌮𑌂𑌦𑌸𑍍𑌮𑌿𑌤𑌮𑌧𑍁𑌰𑌮𑍁𑌖𑌾𑌂𑌭𑍋𑌰𑍁𑌹𑌾𑌂 𑌸𑍁𑌂𑌦𑌰𑌾𑌂𑌗𑍀𑌂
𑌵𑌂𑌦𑍇 𑌵𑌂𑌦𑍍𑌯𑌾𑌮𑌶𑍇𑌷𑍈𑌰𑌪𑌿 𑌮𑍁𑌰𑌭𑌿𑌦𑍁𑌰𑍋𑌮𑌂𑌦𑌿𑌰𑌾𑌮𑌿𑌂𑌦𑌿𑌰𑌾𑌂 𑌤𑌾𑌮𑍍 ॥ 𑍮 ॥

𑌯𑌾 𑌸𑍂𑌤𑍇 𑌸𑌤𑍍𑌤𑍍𑌵𑌜𑌾𑌲𑌂 𑌸𑌕𑌲𑌮𑌪𑌿 𑌸𑌦𑌾 𑌸𑌂𑌨𑌿𑌧𑌾𑌨𑍇𑌨 𑌪𑍁𑌂𑌸𑍋
𑌧𑌤𑍍𑌤𑍇 𑌯𑌾 𑌤𑌤𑍍𑌤𑍍𑌵𑌯𑍋𑌗𑌾𑌚𑍍𑌚𑌰𑌮𑌚𑌰𑌮𑌿𑌦𑌂 𑌭𑍂𑌤𑌯𑍇 𑌭𑍂𑌤𑌜𑌾𑌤𑌮𑍍 ।
𑌧𑌾𑌤𑍍𑌰𑍀𑌂 𑌸𑍍𑌥𑌾𑌤𑍍𑌰𑍀𑌂 𑌜𑌨𑌿𑌤𑍍𑌰𑍀𑌂 𑌪𑍍𑌰𑌕𑍃𑌤𑌿𑌮𑌵𑌿𑌕𑍃𑌤𑌿𑌂 𑌵𑌿𑌶𑍍𑌵𑌶𑌕𑍍𑌤𑌿𑌂 𑌵𑌿𑌧𑌾𑌤𑍍𑌰𑍀𑌂
𑌵𑌿𑌷𑍍𑌣𑍋𑌰𑍍𑌵𑌿𑌶𑍍𑌵𑌾𑌤𑍍𑌮𑌨𑌸𑍍𑌤𑌾𑌂 𑌵𑌿𑌪𑍁𑌲𑌗𑍁𑌣𑌮𑌯𑍀𑌂 𑌪𑍍𑌰𑌾𑌣𑌨𑌾𑌥𑌾𑌂 𑌪𑍍𑌰𑌣𑍌𑌮𑌿 ॥ 𑍯 ॥

𑌯𑍇𑌭𑍍𑌯𑍋𑌽𑌸𑍂𑌯𑌦𑍍𑌭𑌿𑌰𑍁𑌚𑍍𑌚𑍈𑌃 𑌸𑌪𑌦𑌿 𑌪𑌦𑌮𑍁𑌰𑍁 𑌤𑍍𑌯𑌜𑍍𑌯𑌤𑍇 𑌦𑍈𑌤𑍍𑌯𑌵𑌰𑍍𑌗𑍈-
-𑌰𑍍𑌯𑍇𑌭𑍋 𑌧𑌰𑍍𑌤𑍁𑌂 𑌚 𑌮𑍂𑌰𑍍𑌧𑍍𑌨𑌾 𑌸𑍍𑌪𑍃𑌹𑌯𑌤𑌿 𑌸𑌤𑌤𑌂 𑌸𑌰𑍍𑌵𑌗𑍀𑌰𑍍𑌵𑌾𑌣𑌵𑌰𑍍𑌗𑌃 ।
𑌨𑌿𑌤𑍍𑌯𑌂 𑌨𑌿𑌰𑍍𑌮𑍂𑌲𑌯𑍇𑌯𑍁𑌰𑍍𑌨𑌿𑌚𑌿𑌤𑌤𑌰𑌮𑌮𑍀 𑌭𑌕𑍍𑌤𑌿𑌨𑌿𑌘𑍍𑌨𑌾𑌤𑍍𑌮𑌨𑌾𑌂 𑌨𑌃
𑌪𑌦𑍍𑌮𑌾𑌕𑍍𑌷𑌸𑍍𑌯𑌾𑌂𑌘𑍍𑌰𑌿𑌪𑌦𑍍𑌮𑌦𑍍𑌵𑌯𑌤𑌲𑌨𑌿𑌲𑌯𑌾𑌃 𑌪𑌾𑌂𑌸𑌵𑌃 𑌪𑌾𑌪𑌪𑌂𑌕𑌮𑍍 ॥ 10 ॥

𑌰𑍇𑌖𑌾 𑌲𑍇𑌖𑌾𑌦𑌿𑌵𑌂𑌦𑍍𑌯𑌾𑌶𑍍𑌚𑌰𑌣𑌤𑌲𑌗𑌤𑌾𑌶𑍍𑌚𑌕𑍍𑌰𑌮𑌤𑍍𑌸𑍍𑌯𑌾𑌦𑌿𑌰𑍂𑌪𑌾𑌃
𑌸𑍍𑌨𑌿𑌗𑍍𑌧𑌾𑌃 𑌸𑍂𑌕𑍍𑌷𑍍𑌮𑌾𑌃 𑌸𑍁𑌜𑌾𑌤𑌾 𑌮𑍃𑌦𑍁𑌲𑌲𑌿𑌤𑌤𑌰𑌕𑍍𑌷𑍌𑌮𑌸𑍂𑌤𑍍𑌰𑌾𑌯𑌮𑌾𑌣𑌾𑌃 ।
𑌦𑌦𑍍𑌯𑍁𑌰𑍍𑌨𑍋 𑌮𑌂𑌗𑌳𑌾𑌨𑌿 𑌭𑍍𑌰𑌮𑌰𑌭𑌰𑌜𑍁𑌷𑌾 𑌕𑍋𑌮𑌲𑍇𑌨𑌾𑌬𑍍𑌧𑌿𑌜𑌾𑌯𑌾𑌃
𑌕𑌮𑍍𑌰𑍇𑌣𑌾𑌮𑍍𑌰𑍇𑌡𑍍𑌯𑌮𑌾𑌨𑌾𑌃 𑌕𑌿𑌸𑌲𑌯𑌮𑍃𑌦𑍁𑌨𑌾 𑌪𑌾𑌣𑌿𑌨𑌾 𑌚𑌕𑍍𑌰𑌪𑌾𑌣𑍇𑌃 ॥ 11 ॥

𑌯𑌸𑍍𑌮𑌾𑌦𑌾𑌕𑍍𑌰𑌾𑌮𑌤𑍋 𑌦𑍍𑌯𑌾𑌂 𑌗𑌰𑍁𑌡𑌮𑌣𑌿𑌶𑌿𑌲𑌾𑌕𑍇𑌤𑍁𑌦𑌂𑌡𑌾𑌯𑌮𑌾𑌨𑌾
𑌦𑌾𑌶𑍍𑌚𑍍𑌯𑍋𑌤𑌂𑌤𑍀 𑌬𑌭𑌾𑌸𑍇 𑌸𑍁𑌰𑌸𑌰𑌿𑌦𑌮𑌲𑌾 𑌵𑍈𑌜𑌯𑌂𑌤𑍀𑌵 𑌕𑌾𑌂𑌤𑌾 ।
𑌭𑍂𑌮𑌿𑌷𑍍𑌠𑍋 𑌯𑌸𑍍𑌤𑌥𑌾𑌨𑍍𑌯𑍋 𑌭𑍁𑌵𑌨𑌗𑍃𑌹𑌬𑍃𑌹𑌤𑍍‍𑌸𑍍𑌤𑌂𑌭𑌶𑍋𑌭𑌾𑌂 𑌦𑌧𑍌 𑌨𑌃
𑌪𑌾𑌤𑌾𑌮𑍇𑌤𑍌 𑌪𑌾𑌯𑍋𑌜𑍋𑌦𑌰𑌲𑌲𑌿𑌤𑌤𑌲𑍌 𑌪𑌂𑌕𑌜𑌾𑌕𑍍𑌷𑌸𑍍𑌯 𑌪𑌾𑌦𑍌 ॥ 12 ॥

𑌆𑌕𑍍𑌰𑌾𑌮𑌦𑍍𑌭𑍍𑌯𑌾𑌂 𑌤𑍍𑌰𑌿𑌲𑍋𑌕𑍀𑌮𑌸𑍁𑌰𑌸𑍁𑌰𑌪𑌤𑍀 𑌤𑌤𑍍𑌕𑍍𑌷𑌣𑌾𑌦𑍇𑌵 𑌨𑍀𑌤𑍌
𑌯𑌾𑌭𑍍𑌯𑌾𑌂 𑌵𑍈𑌰𑍋𑌚𑌨𑍀𑌂𑌦𑍍𑌰𑍌 𑌯𑍁𑌗𑌪𑌦𑌪𑌿 𑌵𑌿𑌪𑌤𑍍𑌸𑌂𑌪𑌦𑍋𑌰𑍇𑌕𑌧𑌾𑌮𑌃 ।
𑌤𑌾𑌭𑍍𑌯𑌾𑌂 𑌤𑌾𑌮𑍍𑌰𑍋𑌦𑌰𑌾𑌭𑍍𑌯𑌾𑌂 𑌮𑍁𑌹𑍁𑌰𑌹𑌮𑌜𑌿𑌤𑌸𑍍𑌯𑌾𑌂𑌚𑌿𑌤𑌾𑌭𑍍𑌯𑌾𑌮𑍁𑌭𑌾𑌭𑍍𑌯𑌾𑌂
𑌪𑍍𑌰𑌾𑌜𑍍𑌯𑍈𑌶𑍍𑌵𑌰𑍍𑌯𑌪𑍍𑌰𑌦𑌾𑌭𑍍𑌯𑌾𑌂 𑌪𑍍𑌰𑌣𑌤𑌿𑌮𑍁𑌪𑌗𑌤𑌃 𑌪𑌾𑌦𑌪𑌂𑌕𑍇𑌰𑍁𑌹𑌾𑌭𑍍𑌯𑌾𑌮𑍍 ॥ 13 ॥

𑌯𑍇𑌭𑍍𑌯𑍋 𑌵𑌰𑍍𑌣𑌶𑍍𑌚𑌤𑍁𑌰𑍍𑌥𑌶𑍍𑌚𑌰𑌮𑌤 𑌉𑌦𑌭𑍂𑌦𑌾𑌦𑌿𑌸𑌰𑍍𑌗𑍇 𑌪𑍍𑌰𑌜𑌾𑌨𑌾𑌂
𑌸𑌾𑌹𑌸𑍍𑌰𑍀 𑌚𑌾𑌪𑌿 𑌸𑌂𑌖𑍍𑌯𑌾 𑌪𑍍𑌰𑌕𑌟𑌮𑌭𑌿𑌹𑌿𑌤𑌾 𑌸𑌰𑍍𑌵𑌵𑍇𑌦𑍇𑌷𑍁 𑌯𑍇𑌷𑌾𑌮𑍍 ।
𑌪𑍍𑌰𑌾𑌪𑍍𑌤𑌾 𑌵𑌿𑌶𑍍𑌵𑌂𑌭𑌰𑌾 𑌯𑍈𑌰𑌤𑌿𑌵𑌿𑌤𑌤𑌤𑌨𑍋𑌰𑍍𑌵𑌿𑌶𑍍𑌵𑌮𑍂𑌰𑍍𑌤𑍇𑌰𑍍𑌵𑌿𑌰𑌾𑌜𑍋
𑌵𑌿𑌷𑍍𑌣𑍋𑌸𑍍𑌤𑍇𑌭𑍍𑌯𑍋 𑌮𑌹𑌦𑍍𑌭𑍍𑌯𑌃 𑌸𑌤𑌤𑌮𑌪𑌿 𑌨𑌮𑍋𑌽𑌸𑍍𑌤𑍍𑌵𑌂𑌘𑍍𑌰𑌿𑌪𑌂𑌕𑍇𑌰𑍁𑌹𑍇𑌭𑍍𑌯𑌃 ॥ 14 ॥

𑌵𑌿𑌷𑍍𑌣𑍋𑌃 𑌪𑌾𑌦𑌦𑍍𑌵𑌯𑌾𑌗𑍍𑌰𑍇 𑌵𑌿𑌮𑌲𑌨𑌖𑌮𑌣𑌿𑌭𑍍𑌰𑌾𑌜𑌿𑌤𑌾 𑌰𑌾𑌜𑌤𑍇 𑌯𑌾
𑌰𑌾𑌜𑍀𑌵𑌸𑍍𑌯𑍇𑌵 𑌰𑌮𑍍𑌯𑌾 𑌹𑌿𑌮𑌜𑌲𑌕𑌣𑌿𑌕𑌾𑌲𑌂𑌕𑍃𑌤𑌾𑌗𑍍𑌰𑌾 𑌦𑌲𑌾𑌲𑍀 ।
𑌅𑌸𑍍𑌮𑌾𑌕𑌂 𑌵𑌿𑌸𑍍𑌮𑌯𑌾𑌰𑍍𑌹𑌾𑌣𑍍𑌯𑌖𑌿𑌲𑌜𑌨𑌮𑌨 𑌪𑍍𑌰𑌾𑌰𑍍𑌥𑌨𑍀𑌯𑌾 𑌹𑌿 𑌸𑍇𑌯𑌂
𑌦𑌦𑍍𑌯𑌾𑌦𑌾𑌦𑍍𑌯𑌾𑌨𑌵𑌦𑍍𑌯𑌾 𑌤𑌤𑌿𑌰𑌤𑌿𑌰𑍁𑌚𑌿𑌰𑌾 𑌮𑌂𑌗𑌳𑌾𑌨𑍍𑌯𑌂𑌗𑍁𑌳𑍀𑌨𑌾𑌮𑍍 ॥ 15 ॥

𑌯𑌸𑍍𑌯𑌾𑌂 𑌦𑍃𑌷𑍍𑌟𑍍𑌵𑌾𑌮𑌲𑌾𑌯𑌾𑌂 𑌪𑍍𑌰𑌤𑌿𑌕𑍃𑌤𑌿𑌮𑌮𑌰𑌾𑌃 𑌸𑌂𑌭𑌵𑌂𑌤𑍍𑌯𑌾𑌨𑌮𑌂𑌤𑌃
𑌸𑍇𑌂𑌦𑍍𑌰𑌾𑌃 𑌸𑌾𑌂𑌦𑍍𑌰𑍀𑌕𑍃𑌤𑍇𑌰𑍍𑌷𑍍𑌯𑌾𑌸𑍍𑌤𑍍𑌵𑌪𑌰𑌸𑍁𑌰𑌕𑍁𑌲𑌾𑌶𑌂𑌕𑌯𑌾𑌤𑌂𑌕𑌵𑌂𑌤𑌃 ।
𑌸𑌾 𑌸𑌦𑍍𑌯𑌃 𑌸𑌾𑌤𑌿𑌰𑍇𑌕𑌾𑌂 𑌸𑌕𑌲𑌸𑍁𑌖𑌕𑌰𑍀𑌂 𑌸𑌂𑌪𑌦𑌂 𑌸𑌾𑌧𑌯𑍇𑌨𑍍𑌨-
-𑌶𑍍𑌚𑌂𑌚𑌚𑍍𑌚𑌾𑌰𑍍𑌵𑌂𑌶𑍁𑌚𑌕𑍍𑌰𑌾 𑌚𑌰𑌣𑌨𑌳𑌿𑌨𑌯𑍋𑌶𑍍𑌚𑌕𑍍𑌰𑌪𑌾𑌣𑍇𑌰𑍍𑌨𑌖𑌾𑌲𑍀 ॥ 16 ॥

𑌪𑌾𑌦𑌾𑌂𑌭𑍋𑌜𑌨𑍍𑌮𑌸𑍇𑌵𑌾𑌸𑌮𑌵𑌨𑌤𑌸𑍁𑌰𑌵𑍍𑌰𑌾𑌤𑌭𑌾𑌸𑍍𑌵𑌤𑍍𑌕𑌿𑌰𑍀𑌟-
-𑌪𑍍𑌰𑌤𑍍𑌯𑍁𑌪𑍍𑌤𑍋𑌚𑍍𑌚𑌾𑌵𑌚𑌾𑌶𑍍𑌮𑌪𑍍𑌰𑌵𑌰𑌕𑌰𑌗𑌣𑍈𑌶𑍍𑌚𑌿𑌂𑌤𑌿𑌤𑌂 𑌯𑌦𑍍𑌵𑌿𑌭𑌾𑌤𑌿 ।
𑌨𑌮𑍍𑌰𑌾𑌂𑌗𑌾𑌨𑌾𑌂 𑌹𑌰𑍇𑌰𑍍𑌨𑍋 𑌹𑌰𑌿𑌦𑍁𑌪𑌲𑌮𑌹𑌾𑌕𑍂𑌰𑍍𑌮𑌸𑍌𑌂𑌦𑌰𑍍𑌯𑌹𑌾𑌰𑌿-
-𑌚𑍍𑌛𑌾𑌯𑌂 𑌶𑍍𑌰𑍇𑌯𑌃𑌪𑍍𑌰𑌦𑌾𑌯𑌿 𑌪𑍍𑌰𑌪𑌦𑌯𑍁𑌗𑌮𑌿𑌦𑌂 𑌪𑍍𑌰𑌾𑌪𑌯𑍇𑌤𑍍𑌪𑌾𑌪𑌮𑌂𑌤𑌮𑍍 ॥ 1𑍭 ॥

𑌶𑍍𑌰𑍀𑌮𑌤𑍍𑌯𑍌 𑌚𑌾𑌰𑍁𑌵𑍃𑌤𑍍𑌤𑍇 𑌕𑌰𑌪𑌰𑌿𑌮𑌲𑌨𑌾𑌨𑌂𑌦𑌹𑍃𑌷𑍍𑌟𑍇 𑌰𑌮𑌾𑌯𑌾𑌃
𑌸𑍌𑌂𑌦𑌰𑍍𑌯𑌾𑌢𑍍𑌯𑍇𑌂𑌦𑍍𑌰𑌨𑍀𑌲𑍋𑌪𑌲𑌰𑌚𑌿𑌤𑌮𑌹𑌾𑌦𑌂𑌡𑌯𑍋𑌃 𑌕𑌾𑌂𑌤𑌿𑌚𑍋𑌰𑍇 ।
𑌸𑍂𑌰𑍀𑌂𑌦𑍍𑌰𑍈𑌃 𑌸𑍍𑌤𑍂𑌯𑌮𑌾𑌨𑍇 𑌸𑍁𑌰𑌕𑍁𑌲𑌸𑍁𑌖𑌦𑍇 𑌸𑍂𑌦𑌿𑌤𑌾𑌰𑌾𑌤𑌿𑌸𑌂𑌘𑍇
𑌜𑌂𑌘𑍇 𑌨𑌾𑌰𑌾𑌯𑌣𑍀𑌯𑍇 𑌮𑍁𑌹𑍁𑌰𑌪𑌿 𑌜𑌯𑌤𑌾𑌮𑌸𑍍𑌮𑌦𑌂𑌹𑍋 𑌹𑌰𑌂𑌤𑍍𑌯𑍌 ॥ 1𑍮 ॥

𑌸𑌮𑍍𑌯𑌕𑍍𑌸𑌾𑌹𑍍𑌯𑌂 𑌵𑌿𑌧𑌾𑌤𑍁𑌂 𑌸𑌮𑌮𑌿𑌵 𑌸𑌤𑌤𑌂 𑌜𑌂𑌘𑌯𑍋𑌃 𑌖𑌿𑌨𑍍𑌨𑌯𑍋𑌰𑍍𑌯𑍇
𑌭𑌾𑌰𑍀𑌭𑍂𑌤𑍋𑌰𑍁𑌦𑌂𑌡𑌦𑍍𑌵𑌯𑌭𑌰𑌣𑌕𑍃𑌤𑍋𑌤𑍍𑌤𑌂𑌭𑌭𑌾𑌵𑌂 𑌭𑌜𑍇𑌤𑍇 ।
𑌚𑌿𑌤𑍍𑌤𑌾𑌦𑌰𑍍𑌶𑌂 𑌨𑌿𑌧𑌾𑌤𑍁𑌂 𑌮𑌹𑌿𑌤𑌮𑌿𑌵 𑌸𑌤𑌾𑌂 𑌤𑍇 𑌸𑌮𑍁𑌦𑍍𑌰𑌾𑌯𑌮𑌾𑌨𑍇
𑌵𑍃𑌤𑍍𑌤𑌾𑌕𑌾𑌰𑍇 𑌵𑌿𑌧𑌤𑍍𑌤𑌾𑌂 𑌹𑍍𑌯𑌦𑌿 𑌮𑍁𑌦𑌮𑌜𑌿𑌤𑌸𑍍𑌯𑌾𑌨𑌿𑌶𑌂 𑌜𑌾𑌨𑍁𑌨𑍀 𑌨𑌃 ॥ 1𑍯 ॥

𑌦𑍇𑌵𑍋 𑌭𑍀𑌤𑌿𑌂 𑌵𑌿𑌧𑌾𑌤𑍁𑌃 𑌸𑌪𑌦𑌿 𑌵𑌿𑌦𑌧𑌤𑍌 𑌕𑍈𑌟𑌭𑌾𑌖𑍍𑌯𑌂 𑌮𑌧𑍁𑌂 𑌚𑌾-
-𑌪𑍍𑌯𑌾𑌰𑍋𑌪𑍍𑌯𑌾𑌰𑍂𑌢𑌗𑌰𑍍𑌵𑌾𑌵𑌧𑌿𑌜𑌲𑌧𑌿 𑌯𑌯𑍋𑌰𑌾𑌦𑌿𑌦𑍈𑌤𑍍𑌯𑍌 𑌜𑌘𑌾𑌨 ।
𑌵𑍃𑌤𑍍𑌤𑌾𑌵𑌨𑍍𑌯𑍋𑌨𑍍𑌯𑌤𑍁𑌲𑍍𑌯𑍌 𑌚𑌤𑍁𑌰𑌮𑍁𑌪𑌚𑌯𑌂 𑌬𑌿𑌭𑍍𑌰𑌤𑌾𑌵𑌭𑍍𑌰𑌨𑍀𑌲𑌾-
-𑌵𑍂𑌰𑍂 𑌚𑌾𑌰𑍂 𑌹𑌰𑍇𑌸𑍍𑌤𑍌 𑌮𑍁𑌦𑌮𑌤𑌿𑌶𑌯𑌿𑌨𑍀𑌂 𑌮𑌾𑌨𑌸𑍇 𑌨𑍋 𑌵𑌿𑌧𑌤𑍍𑌤𑌾𑌮𑍍 ॥ 20 ॥

𑌪𑍀𑌤𑍇𑌨 𑌦𑍍𑌯𑍋𑌤𑌤𑍇 𑌯𑌚𑍍𑌚𑌤𑍁𑌰𑌪𑌰𑌿𑌹𑌿𑌤𑍇𑌨𑌾𑌂𑌬𑌰𑍇𑌣𑌾𑌤𑍍𑌯𑍁𑌦𑌾𑌰𑌂
𑌜𑌾𑌤𑌾𑌲𑌂𑌕𑌾𑌰𑌯𑍋𑌗𑌂 𑌜𑌲𑌮𑌿𑌵 𑌜𑌲𑌧𑍇𑌰𑍍𑌬𑌾𑌡𑌬𑌾𑌗𑍍𑌨𑌿𑌪𑍍𑌰𑌭𑌾𑌭𑌿𑌃 ।
𑌏𑌤𑌤𑍍𑌪𑌾𑌤𑌿𑌤𑍍𑌯𑌦𑌾𑌨𑍍𑌨𑍋 𑌜𑌘𑌨𑌮𑌤𑌿𑌘𑌨𑌾𑌦𑍇𑌨𑌸𑍋 𑌮𑌾𑌨𑌨𑍀𑌯𑌂
𑌸𑌾𑌤𑌤𑍍𑌯𑍇𑌨𑍈𑌵 𑌚𑍇𑌤𑍋𑌵𑌿𑌷𑌯𑌮𑌵𑌤𑌰𑌤𑍍𑌪𑌾𑌤𑍁 𑌪𑍀𑌤𑌾𑌂𑌬𑌰𑌸𑍍𑌯 ॥ 21 ॥

𑌯𑌸𑍍𑌯𑌾 𑌦𑌾𑌮𑍍𑌨𑌾 𑌤𑍍𑌰𑌿𑌧𑌾𑌮𑍍𑌨𑍋 𑌜𑌘𑌨𑌕𑌲𑌿𑌤𑌯𑌾 𑌭𑍍𑌰𑌾𑌜𑌤𑍇𑌽𑌂𑌗𑌂 𑌯𑌥𑌾𑌬𑍍𑌧𑍇-
-𑌰𑍍𑌮𑌧𑍍𑌯𑌸𑍍𑌥𑍋 𑌮𑌂𑌦𑌰𑌾𑌦𑍍𑌰𑌿𑌰𑍍𑌭𑍁𑌜𑌗𑌪𑌤𑌿𑌮𑌹𑌾𑌭𑍋𑌗𑌸𑌂𑌨𑌦𑍍𑌧𑌮𑌧𑍍𑌯𑌃 ।
𑌕𑌾𑌂𑌚𑍀 𑌸𑌾 𑌕𑌾𑌂𑌚𑌨𑌾𑌭𑌾 𑌮𑌣𑌿𑌵𑌰𑌕𑌿𑌰𑌣𑍈𑌰𑍁𑌲𑍍𑌲𑌸𑌦𑍍𑌭𑌿𑌃 𑌪𑍍𑌰𑌦𑍀𑌪𑍍𑌤𑌾
𑌕𑌲𑍍𑌯𑌾𑌂 𑌕𑌳𑍍𑌯𑌾𑌣𑌦𑌾𑌤𑍍𑌰𑍀𑌂 𑌮𑌮 𑌮𑌤𑌿𑌮𑌨𑌿𑌶𑌂 𑌕𑌮𑍍𑌰𑌰𑍂𑌪𑌾𑌂 𑌕𑌰𑍋𑌤𑍁 ॥ 22 ॥

𑌉𑌨𑍍𑌨𑌮𑍍𑌰𑌂 𑌕𑌮𑍍𑌰𑌮𑍁𑌚𑍍𑌚𑍈𑌰𑍁𑌪𑌚𑌿𑌤𑌮𑍁𑌦𑌭𑍂𑌦𑍍𑌯𑌤𑍍𑌰 𑌪𑌤𑍍𑌰𑍈𑌰𑍍𑌵𑌿𑌚𑌿𑌤𑍍𑌰𑍈𑌃
𑌪𑍂𑌰𑍍𑌵𑌂 𑌗𑍀𑌰𑍍𑌵𑌾𑌣𑌪𑍂𑌜𑍍𑌯𑌂 𑌕𑌮𑌲𑌜𑌮𑌧𑍁𑌪𑌸𑍍𑌯𑌾𑌸𑍍𑌪𑌦𑌂 𑌤𑌤𑍍𑌪𑌯𑍋𑌜𑌮𑍍 ।
𑌯𑌸𑍍𑌮𑌿𑌨𑍍𑌨𑍀𑌲𑌾𑌶𑍍𑌮𑌨𑍀𑌲𑍈𑌸𑍍𑌤𑌰𑌲𑌰𑍁𑌚𑌿𑌜𑌲𑍈𑌃 𑌪𑍂𑌰𑌿𑌤𑍇 𑌕𑍇𑌲𑌿𑌬𑍁𑌦𑍍𑌧𑍍𑌯𑌾
𑌨𑌾𑌲𑍀𑌕𑌾𑌕𑍍𑌷𑌸𑍍𑌯 𑌨𑌾𑌭𑍀𑌸𑌰𑌸𑌿 𑌵𑌸𑌤𑍁 𑌨𑌶𑍍𑌚𑌿𑌤𑍍𑌤𑌹𑌂𑌸𑌶𑍍𑌚𑌿𑌰𑌾𑌯 ॥ 23 ॥

𑌪𑌾𑌤𑌾𑌲𑌂 𑌯𑌸𑍍𑌯 𑌨𑌾𑌲𑌂 𑌵𑌲𑌯𑌮𑌪𑌿 𑌦𑌿𑌶𑌾𑌂 𑌪𑌤𑍍𑌰𑌪𑌂𑌕𑍍𑌤𑍀𑌰𑍍𑌨𑌗𑍇𑌂𑌦𑍍𑌰𑌾-
-𑌨𑍍𑌵𑌿𑌦𑍍𑌵𑌾𑌂𑌸𑌃 𑌕𑍇𑌸𑌰𑌾𑌲𑍀𑌰𑍍𑌵𑌿𑌦𑍁𑌰𑌿𑌹 𑌵𑌿𑌪𑍁𑌲𑌾𑌂 𑌕𑌰𑍍𑌣𑌿𑌕𑌾𑌂 𑌸𑍍𑌵𑌰𑍍𑌣𑌶𑍈𑌲𑌮𑍍 ।
𑌭𑍂𑌯𑌾𑌦𑍍𑌗𑌾𑌯𑌤𑍍𑌸𑍍𑌵𑌯𑌂𑌭𑍂𑌮𑌧𑍁𑌕𑌰𑌭𑌵𑌨𑌂 𑌭𑍂𑌮𑌯𑌂 𑌕𑌾𑌮𑌦𑌂 𑌨𑍋
𑌨𑌾𑌲𑍀𑌕𑌂 𑌨𑌾𑌭𑌿𑌪𑌦𑍍𑌮𑌾𑌕𑌰𑌭𑌵𑌮𑍁𑌰𑍁 𑌤𑌨𑍍𑌨𑌾𑌗𑌶𑌯𑍍𑌯𑌸𑍍𑌯 𑌶𑍌𑌰𑍇𑌃 ॥ 24 ॥

𑌆𑌦𑍌 𑌕𑌲𑍍𑌪𑌸𑍍𑌯 𑌯𑌸𑍍𑌮𑌾𑌤𑍍𑌪𑍍𑌰𑌭𑌵𑌤𑌿 𑌵𑌿𑌤𑌤𑌂 𑌵𑌿𑌶𑍍𑌵𑌮𑍇𑌤𑌦𑍍𑌵𑌿𑌕𑌲𑍍𑌪𑍈𑌃
𑌕𑌲𑍍𑌪𑌾𑌂𑌤𑍇 𑌯𑌸𑍍𑌯 𑌚𑌾𑌂𑌤 𑌪𑍍𑌰𑌵𑌿𑌶𑌤𑌿 𑌸𑌕𑌲𑌂 𑌸𑍍𑌥𑌾𑌵𑌰𑌂 𑌜𑌂𑌗𑌮𑌂 𑌚 ।
𑌅𑌤𑍍𑌯𑌂𑌤𑌾𑌚𑌿𑌂𑌤𑍍𑌯𑌮𑍂𑌰𑍍𑌤𑍇𑌶𑍍𑌚𑌿𑌰𑌤𑌰𑌮𑌜𑌿𑌤𑌸𑍍𑌯𑌾𑌂𑌤𑌰𑌿𑌕𑍍𑌷𑌸𑍍𑌵𑌰𑍂𑌪𑍇
𑌤𑌸𑍍𑌮𑌿𑌨𑍍𑌨𑌸𑍍𑌮𑌾𑌕𑌮𑌂𑌤𑌃𑌕𑌰𑌣𑌮𑌤𑌿𑌮𑍁𑌦𑌾 𑌕𑍍𑌰𑍀𑌡𑌤𑌾𑌤𑍍𑌕𑍍𑌰𑍋𑌡𑌭𑌾𑌗𑍇 ॥ 25 ॥

𑌕𑌾𑌂𑌤𑍍𑌯𑌂𑌭𑌃𑌪𑍂𑌰𑌪𑍂𑌰𑍍𑌣𑍇 𑌲𑌸𑌦𑌸𑌿𑌤𑌵𑌲𑍀𑌭𑌂𑌗𑌭𑌾𑌸𑍍𑌵𑌤𑍍𑌤𑌰𑌂𑌗𑍇
𑌗𑌂𑌭𑍀𑌰𑌾𑌕𑌾𑌰𑌨𑌾𑌭𑍀𑌚𑌤𑍁𑌰𑌤𑌰𑌮𑌹𑌾𑌵𑌰𑍍𑌤𑌶𑍋𑌭𑌿𑌨𑍍𑌯𑍁𑌦𑌾𑌰𑍇 ।
𑌕𑍍𑌰𑍀𑌡𑌤𑍍𑌵𑌾𑌨𑌦𑍍𑌵𑌹𑍇𑌮𑍋𑌦𑌰𑌨𑌹𑌨𑌮𑌹𑌾𑌬𑌾𑌡𑌬𑌾𑌗𑍍𑌨𑌿𑌪𑍍𑌰𑌭𑌾𑌢𑍍𑌯𑍇
𑌕𑌾𑌮𑌂 𑌦𑌾𑌮𑍋𑌦𑌰𑍀𑌯𑍋𑌦𑌰𑌸𑌲𑌿𑌲𑌨𑌿𑌧𑍌 𑌚𑌿𑌤𑍍𑌤𑌮𑌤𑍍𑌸𑍍𑌯𑌶𑍍𑌚𑌿𑌰𑌂 𑌨𑌃 ॥ 26 ॥

𑌨𑌾𑌭𑍀𑌨𑌾𑌲𑍀𑌕𑌮𑍂𑌲𑌾𑌦𑌧𑌿𑌕𑌪𑌰𑌿𑌮𑌳𑍋𑌨𑍍𑌮𑍋𑌹𑌿𑌤𑌾𑌨𑌾𑌮𑌲𑍀𑌨𑌾𑌂
𑌮𑌾𑌲𑌾 𑌨𑍀𑌲𑍇𑌵 𑌯𑌾𑌂𑌤𑍀 𑌸𑍍𑌫𑍁𑌰𑌤𑌿 𑌰𑍁𑌚𑌿𑌮𑌤𑍀 𑌵𑌕𑍍𑌤𑍍𑌰𑌪𑌦𑍍𑌮𑍋𑌨𑍍𑌮𑍁𑌖𑍀 𑌯𑌾 ।
𑌰𑌮𑍍𑌯𑌾 𑌸𑌾 𑌰𑍋𑌮𑌰𑌾𑌜𑌿𑌰𑍍𑌮𑌹𑌿𑌤𑌰𑍁𑌚𑌿𑌕𑌰𑍀 𑌮𑌧𑍍𑌯𑌭𑌾𑌗𑌸𑍍𑌯 𑌵𑌿𑌷𑍍𑌣𑍋-
-𑌶𑍍𑌚𑌿𑌤𑍍𑌤𑌸𑍍𑌥𑌾 𑌮𑌾 𑌵𑌿𑌰𑌂𑌸𑍀𑌚𑍍𑌚𑌿𑌰𑌤𑌰𑌮𑍁𑌚𑌿𑌤𑌾𑌂 𑌸𑌾𑌧𑌯𑌂𑌤𑍀 𑌶𑍍𑌰𑌿𑌯𑌂 𑌨𑌃 ॥ 2𑍭 ॥

𑌸𑌂𑌸𑍍𑌤𑍀𑌰𑍍𑌣𑌂 𑌕𑍌𑌸𑍍𑌤𑍁𑌭𑌾𑌂𑌶𑍁𑌪𑍍𑌰𑌸𑌰𑌕𑌿𑌸𑌲𑌯𑍈𑌰𑍍𑌮𑍁𑌗𑍍𑌧𑌮𑍁𑌕𑍍𑌤𑌾𑌫𑌲𑌾𑌢𑍍𑌯𑌂
𑌶𑍍𑌰𑍀𑌵𑌤𑍍𑌸𑍋𑌲𑍍𑌲𑌾𑌸𑌿 𑌫𑍁𑌲𑍍𑌲𑌪𑍍𑌰𑌤𑌿𑌨𑌵𑌵𑌨𑌮𑌾𑌲𑌾𑌂𑌕𑌿 𑌰𑌾𑌜𑌦𑍍𑌭𑍁𑌜𑌾𑌂𑌤𑌮𑍍 ।
𑌵𑌕𑍍𑌷𑌃 𑌶𑍍𑌰𑍀𑌵𑍃𑌕𑍍𑌷𑌕𑌾𑌂𑌤𑌂 𑌮𑌧𑍁𑌕𑌰𑌨𑌿𑌕𑌰𑌶𑍍𑌯𑌾𑌮𑌲𑌂 𑌶𑌾𑌰𑍍𑌙𑍍𑌗𑌪𑌾𑌣𑍇𑌃
𑌸𑌂𑌸𑌾𑌰𑌾𑌧𑍍𑌵𑌶𑍍𑌰𑌮𑌾𑌰𑍍𑌤𑍈𑌰𑍁𑌪𑌵𑌨𑌮𑌿𑌵 𑌯𑌤𑍍𑌸𑍇𑌵𑌿𑌤𑌂 𑌤𑌤𑍍𑌪𑍍𑌰𑌪𑌦𑍍𑌯𑍇 ॥ 2𑍮 ॥

𑌕𑌾𑌂𑌤𑌂 𑌵𑌕𑍍𑌷𑍋 𑌨𑌿𑌤𑌾𑌂𑌤𑌂 𑌵𑌿𑌦𑌧𑌦𑌿𑌵 𑌗𑌲𑌂 𑌕𑌾𑌲𑌿𑌮𑌾 𑌕𑌾𑌲𑌶𑌤𑍍𑌰𑍋-
-𑌰𑌿𑌂𑌦𑍋𑌰𑍍𑌬𑌿𑌂𑌬𑌂 𑌯𑌥𑌾𑌂𑌕𑍋 𑌮𑌧𑍁𑌪 𑌇𑌵 𑌤𑌰𑍋𑌰𑍍𑌮𑌂𑌜𑌰𑍀𑌂 𑌰𑌾𑌜𑌤𑍇 𑌯𑌃 ।
𑌶𑍍𑌰𑍀𑌮𑌾𑌨𑍍𑌨𑌿𑌤𑍍𑌯𑌂 𑌵𑌿𑌧𑍇𑌯𑌾𑌦𑌵𑌿𑌰𑌲𑌮𑌿𑌲𑌿𑌤𑌃 𑌕𑍌𑌸𑍍𑌤𑍁𑌭𑌶𑍍𑌰𑍀𑌪𑍍𑌰𑌤𑌾𑌨𑍈𑌃
𑌶𑍍𑌰𑍀𑌵𑌤𑍍𑌸𑌃 𑌶𑍍𑌰𑍀𑌪𑌤𑍇𑌃 𑌸 𑌶𑍍𑌰𑌿𑌯 𑌇𑌵 𑌦𑌯𑌿𑌤𑍋 𑌵𑌤𑍍𑌸 𑌉𑌚𑍍𑌚𑍈𑌃𑌶𑍍𑌰𑌿𑌯𑌂 𑌨𑌃 ॥ 2𑍯 ॥

𑌸𑌂𑌭𑍂𑌯𑌾𑌂𑌭𑍋𑌧𑌿𑌮𑌧𑍍𑌯𑌾𑌤𑍍𑌸𑌪𑌦𑌿 𑌸𑌹𑌜𑌯𑌾 𑌯𑌃 𑌶𑍍𑌰𑌿𑌯𑌾 𑌸𑌂𑌨𑌿𑌧𑌤𑍍𑌤𑍇
𑌨𑍀𑌲𑍇 𑌨𑌾𑌰𑌾𑌯𑌣𑍋𑌰𑌃𑌸𑍍𑌥𑌲𑌗𑌗𑌨𑌤𑌲𑍇 𑌹𑌾𑌰𑌤𑌾𑌰𑍋𑌪𑌸𑍇𑌵𑍍𑌯𑍇 ।
𑌆𑌶𑌾𑌃 𑌸𑌰𑍍𑌵𑌾𑌃 𑌪𑍍𑌰𑌕𑌾𑌶𑌾 𑌵𑌿𑌦𑌧𑌦𑌪𑌿𑌦𑌧𑌚𑍍𑌚𑌾𑌤𑍍𑌮𑌭𑌾𑌸𑌾𑌨𑍍𑌯𑌤𑍇𑌜𑌾-
-𑌸𑍍𑌯𑌾𑌶𑍍𑌚𑌰𑍍𑌯𑌸𑍍𑌯𑌾𑌕𑌰𑍋 𑌨𑍋 𑌦𑍍𑌯𑍁𑌮𑌣𑌿𑌰𑌿𑌵 𑌮𑌣𑌿𑌃 𑌕𑍌𑌸𑍍𑌤𑍁𑌭𑌃 𑌸𑍋𑌽𑌸𑍍𑌤𑍁𑌭𑍂𑌤𑍍𑌯𑍈 ॥ 30 ॥

𑌯𑌾 𑌵𑌾𑌯𑌾𑌵𑌾𑌨𑍁𑌕𑍂𑌲𑍍𑌯𑌾𑌤𑍍𑌸𑌰𑌤𑌿 𑌮𑌣𑌿𑌰𑍁𑌚𑌾 𑌭𑌾𑌸𑌮𑌾𑌨𑌾 𑌸𑌮𑌾𑌨𑌾
𑌸𑌾𑌕𑌂 𑌸𑌾𑌕𑌂𑌪𑌮𑌂𑌸𑍇 𑌵𑌸𑌤𑌿 𑌵𑌿𑌦𑌧𑌤𑍀 𑌵𑌾𑌸𑍁𑌭𑌦𑍍𑌰𑌂 𑌸𑍁𑌭𑌦𑍍𑌰𑌮𑍍 ।
𑌸𑌾𑌰𑌂 𑌸𑌾𑌰𑌂𑌗𑌸𑌂𑌘𑍈𑌰𑍍𑌮𑍁𑌖𑌰𑌿𑌤𑌕𑍁𑌸𑍁𑌮𑌾 𑌮𑍇𑌚𑌕𑌾𑌂𑌤𑌾 𑌚 𑌕𑌾𑌂𑌤𑌾
𑌮𑌾𑌲𑌾 𑌮𑌾𑌲𑌾𑌲𑌿𑌤𑌾𑌸𑍍𑌮𑌾𑌨𑍍𑌨 𑌵𑌿𑌰𑌮𑌤𑍁 𑌸𑍁𑌖𑍈𑌰𑍍𑌯𑍋𑌜𑌯𑌂𑌤𑍀 𑌜𑌯𑌂𑌤𑍀 ॥ 31 ॥

𑌹𑌾𑌰𑌸𑍍𑌯𑍋𑌰𑍁𑌪𑍍𑌰𑌭𑌾𑌭𑌿𑌃 𑌪𑍍𑌰𑌤𑌿𑌨𑌵𑌵𑌨𑌮𑌾𑌲𑌾𑌶𑍁𑌭𑌿𑌃 𑌪𑍍𑌰𑌾𑌂𑌶𑍁𑌰𑍂𑌪𑍈𑌃
𑌶𑍍𑌰𑍀𑌭𑌿𑌶𑍍𑌚𑌾𑌪𑍍𑌯𑌂𑌗𑌦𑌾𑌨𑌾𑌂 𑌕𑌬𑌲𑌿𑌤𑌰𑍁𑌚𑌿 𑌯𑌨𑍍𑌨𑌿𑌷𑍍𑌕𑌭𑌾𑌭𑌿𑌶𑍍𑌚 𑌭𑌾𑌤𑌿 ।
𑌬𑌾𑌹𑍁𑌲𑍍𑌯𑍇𑌨𑍈𑌵 𑌬𑌦𑍍𑌧𑌾𑌂𑌜𑌲𑌿𑌪𑍁𑌟𑌮𑌜𑌿𑌤𑌸𑍍𑌯𑌾𑌭𑌿𑌯𑌾𑌚𑌾𑌮𑌹𑍇 𑌤-
-𑌦𑍍𑌵𑌂𑌧𑌾𑌰𑍍𑌤𑌿𑌂 𑌬𑌾𑌧𑌤𑌾𑌂 𑌨𑍋 𑌬𑌹𑍁𑌵𑌿𑌹𑌤𑌿𑌕𑌰𑍀𑌂 𑌬𑌂𑌧𑍁𑌰𑌂 𑌬𑌾𑌹𑍁𑌮𑍂𑌲𑌮𑍍 ॥ 32 ॥

𑌵𑌿𑌶𑍍𑌵𑌤𑍍𑌰𑌾𑌣𑍈𑌕𑌦𑍀𑌕𑍍𑌷𑌾𑌸𑍍𑌤𑌦𑌨𑍁𑌗𑍁𑌣𑌗𑍁𑌣𑌕𑍍𑌷𑌤𑍍𑌰𑌨𑌿𑌰𑍍𑌮𑌾𑌣𑌦𑌕𑍍𑌷𑌾𑌃
𑌕𑌰𑍍𑌤𑌾𑌰𑍋 𑌦𑍁𑌰𑍍𑌨𑌿𑌰𑍂𑌪𑌸𑍍𑌫𑍁𑌟𑌗𑍁𑌣𑌯𑌶𑌸𑌾 𑌕𑌰𑍍𑌮𑌣𑌾𑌮𑌦𑍍𑌭𑍁𑌤𑌾𑌨𑌾𑌮𑍍 ।
𑌶𑌾𑌰𑍍𑌙𑍍𑌗𑌂 𑌬𑌾𑌣𑌂 𑌕𑍃𑌪𑌾𑌣𑌂 𑌫𑌲𑌕𑌮𑌰𑌿𑌗𑌦𑍇 𑌪𑌦𑍍𑌮𑌶𑌂𑌖𑍌 𑌸𑌹𑌸𑍍𑌰𑌂
𑌬𑌿𑌭𑍍𑌰𑌾𑌣𑌾𑌃 𑌶𑌸𑍍𑌤𑍍𑌰𑌜𑌾𑌲𑌂 𑌮𑌮 𑌦𑌧𑌤𑍁 𑌹𑌰𑍇𑌰𑍍𑌬𑌾𑌹𑌵𑍋 𑌮𑍋𑌹𑌹𑌾𑌨𑌿𑌮𑍍 ॥ 33 ॥

𑌕𑌂𑌠𑌾𑌕𑌲𑍍𑌪𑍋𑌦𑍍𑌗𑌤𑍈𑌰𑍍𑌯𑌃 𑌕𑌨𑌕𑌮𑌯𑌲𑌸𑌤𑍍𑌕𑍁𑌂𑌡𑌲𑍋𑌤𑍍𑌥𑍈𑌰𑍁𑌦𑌾𑌰𑍈-
-𑌰𑍁𑌦𑍍𑌯𑍋𑌤𑍈𑌃 𑌕𑍌𑌸𑍍𑌤𑍁𑌭𑌸𑍍𑌯𑌾𑌪𑍍𑌯𑍁𑌰𑍁𑌭𑌿𑌰𑍁𑌪𑌚𑌿𑌤𑌶𑍍𑌚𑌿𑌤𑍍𑌰𑌵𑌰𑍍𑌣𑍋 𑌵𑌿𑌭𑌾𑌤𑌿 ।
𑌕𑌂𑌠𑌾𑌶𑍍𑌲𑍇𑌷𑍇 𑌰𑌮𑌾𑌯𑌾𑌃 𑌕𑌰𑌵𑌲𑌯𑌪𑌦𑍈𑌰𑍍𑌮𑍁𑌦𑍍𑌰𑌿𑌤𑍇 𑌭𑌦𑍍𑌰𑌰𑍂𑌪𑍇
𑌵𑍈𑌕𑍁𑌂𑌠𑍀𑌯𑍇𑌽𑌤𑍍𑌰 𑌕𑌂𑌠𑍇 𑌵𑌸𑌤𑍁 𑌮𑌮 𑌮𑌤𑌿𑌃 𑌕𑍁𑌂𑌠𑌭𑌾𑌵𑌂 𑌵𑌿𑌹𑌾𑌯 ॥ 34 ॥

𑌪𑌦𑍍𑌮𑌾𑌨𑌂𑌦𑌪𑍍𑌰𑌦𑌾𑌤𑌾 𑌪𑌰𑌿𑌲𑌸𑌦𑌰𑍁𑌣𑌶𑍍𑌰𑍀𑌪𑌰𑍀𑌤𑌾𑌗𑍍𑌰𑌭𑌾𑌗𑌃
𑌕𑌾𑌲𑍇 𑌕𑌾𑌲𑍇 𑌚 𑌕𑌂𑌬𑍁𑌪𑍍𑌰𑌵𑌰𑌶𑌶𑌧𑌰𑌾𑌪𑍂𑌰𑌣𑍇 𑌯𑌃 𑌪𑍍𑌰𑌵𑍀𑌣𑌃 ।
𑌵𑌕𑍍𑌤𑍍𑌰𑌾𑌕𑌾𑌶𑌾𑌂𑌤𑌰𑌸𑍍𑌥𑌸𑍍𑌤𑌿𑌰𑌯𑌤𑌿 𑌨𑌿𑌤𑌰𑌾𑌂 𑌦𑌂𑌤𑌤𑌾𑌰𑍌𑌘𑌶𑍋𑌭𑌾𑌂
𑌶𑍍𑌰𑍀𑌭𑌰𑍍𑌤𑍁𑌰𑍍𑌦𑌂𑌤𑌵𑌾𑌸𑍋𑌦𑍍𑌯𑍁𑌮𑌣𑌿𑌰𑌘𑌤𑌮𑍋𑌨𑌾𑌶𑌨𑌾𑌯𑌾𑌸𑍍𑌤𑍍𑌵𑌸𑍌 𑌨𑌃 ॥ 35 ॥

𑌨𑌿𑌤𑍍𑌯𑌂 𑌸𑍍𑌨𑍇𑌹𑌾𑌤𑌿𑌰𑍇𑌕𑌾𑌨𑍍𑌨𑌿𑌜𑌕𑌮𑌿𑌤𑍁𑌰𑌲𑌂 𑌵𑌿𑌪𑍍𑌰𑌯𑍋𑌗𑌾𑌕𑍍𑌷𑌮𑌾 𑌯𑌾
𑌵𑌕𑍍𑌤𑍍𑌰𑍇𑌂𑌦𑍋𑌰𑌂𑌤𑌰𑌾𑌲𑍇 𑌕𑍃𑌤𑌵𑌸𑌤𑌿𑌰𑌿𑌵𑌾𑌭𑌾𑌤𑌿 𑌨𑌕𑍍𑌷𑌤𑍍𑌰𑌰𑌾𑌜𑌿𑌃 ।
𑌲𑌕𑍍𑌷𑍍𑌮𑍀𑌕𑌾𑌂𑌤𑌸𑍍𑌯 𑌕𑌾𑌂𑌤𑌾𑌕𑍃𑌤𑌿𑌰𑌤𑌿𑌵𑌿𑌲𑌸𑌨𑍍𑌮𑍁𑌗𑍍𑌧𑌮𑍁𑌕𑍍𑌤𑌾𑌵𑌲𑌿𑌶𑍍𑌰𑍀-
-𑌰𑍍𑌦𑌂𑌤𑌾𑌲𑍀 𑌸𑌂𑌤𑌤𑌂 𑌸𑌾 𑌨𑌤𑌿𑌨𑍁𑌤𑌿𑌨𑌿𑌰𑌤𑌾𑌨𑌕𑍍𑌷𑌤𑌾𑌨𑍍𑌰𑌕𑍍𑌷𑌤𑌾𑌨𑍍𑌨𑌃 ॥ 36 ॥

𑌬𑍍𑌰𑌹𑍍𑌮𑌨𑍍𑌬𑍍𑌰𑌹𑍍𑌮𑌣𑍍𑌯𑌜𑌿𑌹𑍍𑌮𑌾𑌂 𑌮𑌤𑌿𑌮𑌪𑌿 𑌕𑍁𑌰𑍁𑌷𑍇 𑌦𑍇𑌵 𑌸𑌂𑌭𑌾𑌵𑌯𑍇 𑌤𑍍𑌵𑌾𑌂
𑌶𑌂𑌭𑍋 𑌶𑌕𑍍𑌰 𑌤𑍍𑌰𑌿𑌲𑍋𑌕𑍀𑌮𑌵𑌸𑌿 𑌕𑌿𑌮𑌮𑌰𑍈𑌰𑍍𑌨𑌾𑌰𑌦𑌾𑌦𑍍𑌯𑌾𑌃 𑌸𑍁𑌖𑌂 𑌵𑌃 ।
𑌇𑌤𑍍𑌥𑌂 𑌸𑍇𑌵𑌾𑌵𑌨𑌮𑍍𑌰𑌂 𑌸𑍁𑌰𑌮𑍁𑌨𑌿𑌨𑌿𑌕𑌰𑌂 𑌵𑍀𑌕𑍍𑌷𑍍𑌯 𑌵𑌿𑌷𑍍𑌣𑍋𑌃 𑌪𑍍𑌰𑌸𑌨𑍍𑌨-
-𑌸𑍍𑌯𑌾𑌸𑍍𑌯𑍇𑌂𑌦𑍋𑌰𑌾𑌸𑍍𑌰𑌵𑌂𑌤𑍀 𑌵𑌰𑌵𑌚𑌨𑌸𑍁𑌧𑌾𑌹𑍍𑌲𑌾𑌦𑌯𑍇𑌨𑍍𑌮𑌾𑌨𑌸𑌂 𑌨𑌃 ॥ 3𑍭 ॥

𑌕𑌰𑍍𑌣𑌸𑍍𑌥𑌸𑍍𑌵𑌰𑍍𑌣𑌕𑌮𑍍𑌰𑍋𑌜𑍍𑌜𑍍𑌵𑌲𑌮𑌕𑌰𑌮𑌹𑌾𑌕𑍁𑌂𑌡𑌲𑌪𑍍𑌰𑍋𑌤𑌦𑍀𑌪𑍍𑌯-
-𑌨𑍍𑌮𑌾𑌣𑌿𑌕𑍍𑌯𑌶𑍍𑌰𑍀𑌪𑍍𑌰𑌤𑌾𑌨𑍈𑌃 𑌪𑌰𑌿𑌮𑌿𑌲𑌿𑌤𑌮𑌲𑌿𑌶𑍍𑌯𑌾𑌮𑌲𑌂 𑌕𑍋𑌮𑌲𑌂 𑌯𑌤𑍍 ।
𑌪𑍍𑌰𑍋𑌦𑍍𑌯𑌤𑍍𑌸𑍂𑌰𑍍𑌯𑌾𑌂𑌶𑍁𑌰𑌾𑌜𑌨𑍍𑌮𑌰𑌕𑌤𑌮𑍁𑌕𑍁𑌰𑌾𑌕𑌾𑌰𑌚𑍋𑌰𑌂 𑌮𑍁𑌰𑌾𑌰𑍇-
-𑌰𑍍𑌗𑌾𑌢𑌾𑌮𑌾𑌗𑌾𑌮𑌿𑌨𑍀𑌂 𑌨𑌃 𑌶𑌮𑌯𑌤𑍁 𑌵𑌿𑌪𑌦𑌂 𑌗𑌂𑌡𑌯𑍋𑌰𑍍𑌮𑌂𑌡𑌲𑌂 𑌤𑌤𑍍 ॥ 3𑍮 ॥

𑌵𑌕𑍍𑌤𑍍𑌰𑌾𑌂𑌭𑍋𑌜𑍇 𑌲𑌸𑌂𑌤𑌂 𑌮𑍁𑌹𑍁𑌰𑌧𑌰𑌮𑌣𑌿𑌂 𑌪𑌕𑍍𑌵𑌬𑌿𑌂𑌬𑌾𑌭𑌿𑌰𑌾𑌮𑌂
𑌦𑍃𑌷𑍍𑌟𑍍𑌵𑌾 𑌦𑍍𑌰𑌷𑍍𑌟𑍁𑌂 𑌶𑍁𑌕𑌸𑍍𑌯 𑌸𑍍𑌫𑍁𑌟𑌮𑌵𑌤𑌰𑌤𑌸𑍍𑌤𑍁𑌂𑌡𑌦𑌂𑌡𑌾𑌯𑌤𑍇 𑌯𑌃 ।
𑌘𑍋𑌣𑌃 𑌶𑍋𑌣𑍀𑌕𑍃𑌤𑌾𑌤𑍍𑌮𑌾 𑌶𑍍𑌰𑌵𑌣𑌯𑍁𑌗𑌳𑌸𑌤𑍍𑌕𑍁𑌂𑌡𑌲𑍋𑌸𑍍𑌰𑍈𑌰𑍍𑌮𑍁𑌰𑌾𑌰𑍇𑌃
𑌪𑍍𑌰𑌾𑌣𑌾𑌖𑍍𑌯𑌸𑍍𑌯𑌾𑌨𑌿𑌲𑌸𑍍𑌯 𑌪𑍍𑌰𑌸𑌰𑌣𑌸𑌰𑌣𑌿𑌃 𑌪𑍍𑌰𑌾𑌣𑌦𑌾𑌨𑌾𑌯 𑌨𑌃 𑌸𑍍𑌯𑌾𑌤𑍍 ॥ 3𑍯 ॥

𑌦𑌿𑌕𑍍𑌕𑌾𑌲𑍌 𑌵𑍇𑌦𑌯𑌂𑌤𑍌 𑌜𑌗𑌤𑌿 𑌮𑍁𑌹𑍁𑌰𑌿𑌮𑍌 𑌸𑌂𑌚𑌰𑌂𑌤𑍌 𑌰𑌵𑍀𑌂𑌦𑍂
𑌤𑍍𑌰𑍈𑌲𑍋𑌕𑍍𑌯𑌾𑌲𑍋𑌕𑌦𑍀𑌪𑌾𑌵𑌭𑌿𑌦𑌧𑌤𑌿 𑌯𑌯𑍋𑌰𑍇𑌵 𑌰𑍂𑌪𑌂 𑌮𑍁𑌨𑍀𑌂𑌦𑍍𑌰𑌾𑌃 ।
𑌅𑌸𑍍𑌮𑌾𑌨𑌬𑍍𑌜𑌪𑍍𑌰𑌭𑍇 𑌤𑍇 𑌪𑍍𑌰𑌚𑍁𑌰𑌤𑌰𑌕𑍃𑌪𑌾𑌨𑌿𑌰𑍍𑌭𑌰𑌂 𑌪𑍍𑌰𑍇𑌕𑍍𑌷𑌮𑌾𑌣𑍇
𑌪𑌾𑌤𑌾𑌮𑌾𑌤𑌾𑌮𑍍𑌰𑌶𑍁𑌕𑍍𑌲𑌾𑌸𑌿𑌤𑌰𑍁𑌚𑌿𑌰𑍁𑌚𑌿𑌰𑍇 𑌪𑌦𑍍𑌮𑌨𑍇𑌤𑍍𑌰𑌸𑍍𑌯 𑌨𑍇𑌤𑍍𑌰𑍇 ॥ 40 ॥

𑌪𑌾𑌤𑌾𑌤𑍍𑌪𑌾𑌤𑌾𑌲𑌪𑌾𑌤𑌾𑌤𑍍𑌪𑌤𑌗𑌪𑌤𑌿𑌗𑌤𑍇𑌰𑍍𑌭𑍍𑌰𑍂𑌯𑍁𑌗𑌂 𑌭𑍁𑌗𑍍𑌨𑌮𑌧𑍍𑌯𑌂
𑌯𑍇𑌨𑍇𑌷𑌚𑍍𑌚𑌾𑌲𑌿𑌤𑍇𑌨 𑌸𑍍𑌵𑌪𑌦𑌨𑌿𑌯𑌮𑌿𑌤𑌾𑌃 𑌸𑌾𑌸𑍁𑌰𑌾 𑌦𑍇𑌵𑌸𑌂𑌘𑌾𑌃 ।
𑌨𑍃𑌤𑍍𑌯𑌲𑍍𑌲𑌾𑌲𑌾𑌟𑌰𑌂𑌗𑍇 𑌰𑌜𑌨𑌿𑌕𑌰𑌤𑌨𑍋𑌰𑌰𑍍𑌧𑌖𑌂𑌡𑌾𑌵𑌦𑌾𑌤𑍇
𑌕𑌾𑌲𑌵𑍍𑌯𑌾𑌲𑌦𑍍𑌵𑌯𑌂 𑌵𑌾 𑌵𑌿𑌲𑌸𑌤𑌿 𑌸𑌮𑌯𑌾 𑌵𑌾𑌲𑌿𑌕𑌾𑌮𑌾𑌤𑌰𑌂 𑌨𑌃 ॥ 41 ॥

𑌲𑌕𑍍𑌷𑍍𑌮𑌾𑌕𑌾𑌰𑌾𑌲𑌕𑌾𑌲𑌿𑌸𑍍𑌫𑍁𑌰𑌦𑌲𑌿𑌕𑌶𑌶𑌾𑌂𑌕𑌾𑌰𑍍𑌧𑌸𑌂𑌦𑌰𑍍𑌶𑌮𑍀𑌲-
-𑌨𑍍𑌨𑍇𑌤𑍍𑌰𑌾𑌂𑌭𑍋𑌜𑌪𑍍𑌰𑌬𑍋𑌧𑍋𑌤𑍍𑌸𑍁𑌕𑌨𑌿𑌭𑍃𑌤𑌤𑌰𑌾𑌲𑍀𑌨𑌭𑍃𑌂𑌗𑌚𑍍𑌛𑌟𑌾𑌭𑍇 ।
𑌲𑌕𑍍𑌷𑍍𑌮𑍀𑌨𑌾𑌥𑌸𑍍𑌯 𑌲𑌕𑍍𑌷𑍍𑌯𑍀𑌕𑍃𑌤𑌵𑌿𑌬𑍁𑌧𑌗𑌣𑌾𑌪𑌾𑌂𑌗𑌬𑌾𑌣𑌾𑌸𑌨𑌾𑌰𑍍𑌧-
-𑌚𑍍𑌛𑌾𑌯𑍇 𑌨𑍋 𑌭𑍂𑌰𑌿𑌭𑍂𑌤𑌿𑌪𑍍𑌰𑌸𑌵𑌕𑍁𑌶𑌲𑌤𑍇 𑌭𑍍𑌰𑍂𑌲𑌤𑍇 𑌪𑌾𑌲𑌯𑍇𑌤𑌾𑌮𑍍 ॥ 42 ॥

𑌰𑍂𑌕𑍍𑌷𑌸𑍍𑌮𑌾𑌰𑍇𑌕𑍍𑌷𑍁𑌚𑌾𑌪𑌚𑍍𑌯𑍁𑌤𑌶𑌰𑌨𑌿𑌕𑌰𑌕𑍍𑌷𑍀𑌣𑌲𑌕𑍍𑌷𑍍𑌮𑍀𑌕𑌟𑌾𑌕𑍍𑌷-
-𑌪𑍍𑌰𑍋𑌤𑍍𑌫𑍁𑌲𑍍𑌲𑌤𑍍𑌪𑌦𑍍𑌮𑌮𑌾𑌲𑌾𑌵𑌿𑌲𑌸𑌿𑌤𑌮𑌹𑌿𑌤𑌸𑍍𑌫𑌾𑌟𑌿𑌕𑍈𑌶𑌾𑌨𑌲𑌿𑌂𑌗𑌮𑍍 ।
𑌭𑍂𑌯𑌾𑌦𑍍𑌭𑍂𑌯𑍋 𑌵𑌿𑌭𑍂𑌤𑍍𑌯𑍈 𑌮𑌮 𑌭𑍁𑌵𑌨𑌪𑌤𑍇𑌰𑍍𑌭𑍍𑌰𑍂𑌲𑌤𑌾𑌦𑍍𑌵𑌂𑌦𑍍𑌵𑌮𑌧𑍍𑌯𑌾-
-𑌦𑍁𑌤𑍍𑌥𑌂 𑌤𑌤𑍍𑌪𑍁𑌂𑌡𑍍𑌰𑌮𑍂𑌰𑍍𑌧𑍍𑌵𑌂 𑌜𑌨𑌿𑌮𑌰𑌣𑌤𑌮𑌃𑌖𑌂𑌡𑌨𑌂 𑌮𑌂𑌡𑌨𑌂 𑌚 ॥ 43 ॥

𑌪𑍀𑌠𑍀𑌭𑍂𑌤𑌾𑌲𑌕𑌾𑌂𑌤𑍇 𑌕𑍃𑌤𑌮𑌕𑍁𑌟𑌮𑌹𑌾𑌦𑍇𑌵𑌲𑌿𑌂𑌗𑌪𑍍𑌰𑌤𑌿𑌷𑍍𑌠𑍇
𑌲𑌾𑌲𑌾𑌟𑍇 𑌨𑌾𑌟𑍍𑌯𑌰𑌂𑌗𑍇 𑌵𑌿𑌕𑌟𑌤𑌰𑌤𑌟𑍇 𑌕𑍈𑌟𑌭𑌾𑌰𑍇𑌶𑍍𑌚𑌿𑌰𑌾𑌯 ।
𑌪𑍍𑌰𑍋𑌦𑍍𑌧𑌾𑌟𑍍𑌯𑍈𑌵𑌾𑌤𑍍𑌮𑌤𑌂𑌦𑍍𑌰𑍀𑌪𑍍𑌰𑌕𑌟𑌪𑌟𑌕𑍁𑌟𑍀𑌂 𑌪𑍍𑌰𑌸𑍍𑌫𑍁𑌰𑌂𑌤𑍀𑌂 𑌸𑍍𑌫𑍁𑌟𑌾𑌂𑌗𑌂
𑌪𑌟𑍍𑌵𑍀𑌯𑌂 𑌭𑌾𑌵𑌨𑌾𑌖𑍍𑌯𑌾𑌂 𑌚𑌟𑍁𑌲𑌮𑌤𑌿𑌨𑌟𑍀 𑌨𑌾𑌟𑌿𑌕𑌾𑌂 𑌨𑌾𑌟𑌯𑍇𑌨𑍍𑌨𑌃 ॥ 44 ॥

𑌮𑌾𑌲𑌾𑌲𑍀𑌵𑌾𑌲𑌿𑌧𑌾𑌮𑍍𑌨𑌃 𑌕𑍁𑌵𑌲𑌯𑌕𑌲𑌿𑌤𑌾 𑌶𑍍𑌰𑍀𑌪𑌤𑍇𑌃 𑌕𑍁𑌂𑌤𑌲𑌾𑌲𑍀
𑌕𑌾𑌲𑌿𑌂𑌦𑍍𑌯𑌾𑌰𑍁𑌹𑍍𑌯 𑌮𑍂𑌰𑍍𑌧𑍍𑌨𑍋 𑌗𑌲𑌤𑌿 𑌹𑌰𑌶𑌿𑌰𑌃𑌸𑍍𑌵𑌰𑍍𑌧𑍁𑌨𑍀𑌸𑍍𑌪𑌰𑍍𑌧𑌯𑌾 𑌨𑍁 ।
𑌰𑌾𑌹𑍁𑌰𑍍𑌵𑌾 𑌯𑌾𑌤𑌿 𑌵𑌕𑍍𑌤𑍍𑌰𑌂 𑌸𑌕𑌲𑌶𑌶𑌿𑌕𑌲𑌾𑌭𑍍𑌰𑌾𑌂𑌤𑌿𑌲𑍋𑌲𑌾𑌂𑌤𑌰𑌾𑌤𑍍𑌮𑌾
𑌲𑍋𑌕𑍈𑌰𑌾𑌲𑍋𑌕𑍍𑌯𑌤𑍇 𑌯𑌾 𑌪𑍍𑌰𑌦𑌿𑌶𑌤𑍁 𑌸𑌤𑌤𑌂 𑌸𑌾𑌖𑌿𑌲𑌂 𑌮𑌂𑌗𑌳𑌂 𑌨𑌃 ॥ 45 ॥

𑌸𑍁𑌪𑍍𑌤𑌾𑌕𑌾𑌰𑌾𑌃 𑌪𑍍𑌰𑌸𑍁𑌪𑍍𑌤𑍇 𑌭𑌗𑌵𑌤𑌿 𑌵𑌿𑌬𑍁𑌧𑍈𑌰𑌪𑍍𑌯𑌦𑍃𑌷𑍍𑌟𑌸𑍍𑌵𑌰𑍂𑌪𑌾
𑌵𑍍𑌯𑌾𑌪𑍍𑌤𑌵𑍍𑌯𑍋𑌮𑌾𑌂𑌤𑌰𑌾𑌲𑌾𑌸𑍍𑌤𑌰𑌲𑌮𑌣𑌿𑌰𑍁𑌚𑌾 𑌰𑌂𑌜𑌿𑌤𑌾𑌃 𑌸𑍍𑌪𑌷𑍍𑌟𑌭𑌾𑌸𑌃 ।
𑌦𑍇𑌹𑌚𑍍𑌛𑌾𑌯𑍋𑌦𑍍𑌗𑌮𑌾𑌭𑌾 𑌰𑌿𑌪𑍁𑌵𑌪𑍁𑌰𑌗𑍁𑌰𑍁𑌪𑍍𑌲𑍋𑌷𑌰𑍋𑌷𑌾𑌗𑍍𑌨𑌿𑌧𑍂𑌮𑍍𑌯𑌾𑌃
𑌕𑍇𑌶𑌾𑌃 𑌕𑍇𑌶𑌿𑌦𑍍𑌵𑌿𑌷𑍋 𑌨𑍋 𑌵𑌿𑌦𑌧𑌤𑍁 𑌵𑌿𑌪𑍁𑌲𑌕𑍍𑌲𑍇𑌶𑌪𑌾𑌶𑌪𑍍𑌰𑌣𑌾𑌶𑌮𑍍 ॥ 46 ॥

𑌯𑌤𑍍𑌰 𑌪𑍍𑌰𑌤𑍍𑌯𑍁𑌪𑍍𑌤𑌰𑌤𑍍𑌨𑌪𑍍𑌰𑌵𑌰𑌪𑌰𑌿𑌲𑌸𑌦𑍍𑌭𑍂𑌰𑌿𑌰𑍋𑌚𑌿𑌷𑍍𑌪𑍍𑌰𑌤𑌾𑌨-
-𑌸𑍍𑌫𑍂𑌰𑍍𑌤𑍍𑌯𑌾𑌂 𑌮𑍂𑌰𑍍𑌤𑌿𑌰𑍍𑌮𑍁𑌰𑌾𑌰𑍇𑌰𑍍𑌦𑍍𑌯𑍁𑌮𑌣𑌿𑌶𑌤𑌚𑌿𑌤𑌵𑍍𑌯𑍋𑌮𑌵𑌦𑍍𑌦𑍁𑌰𑍍𑌨𑌿𑌰𑍀𑌕𑍍𑌷𑍍𑌯𑌾 ।
𑌕𑍁𑌰𑍍𑌵𑌤𑍍𑌪𑌾𑌰𑍇𑌪𑌯𑍋𑌧𑌿 𑌜𑍍𑌵𑌲𑌦𑌕𑍃𑌶𑌶𑌿𑌖𑌾𑌭𑌾𑌸𑍍𑌵𑌦𑍌𑌰𑍍𑌵𑌾𑌗𑍍𑌨𑌿𑌶𑌂𑌕𑌾𑌂
𑌶𑌶𑍍𑌵𑌨𑍍𑌨𑌃 𑌶𑌰𑍍𑌮 𑌦𑌿𑌶𑍍𑌯𑌾𑌤𑍍𑌕𑌲𑌿𑌕𑌲𑍁𑌷𑌤𑌮𑌃𑌪𑌾𑌟𑌨𑌂 𑌤𑌤𑍍𑌕𑌿𑌰𑍀𑌟𑌮𑍍 ॥ 4𑍭 ॥

𑌭𑍍𑌰𑌾𑌂𑌤𑍍𑌵𑌾 𑌭𑍍𑌰𑌾𑌂𑌤𑍍𑌵𑌾 𑌯𑌦𑌂𑌤𑌸𑍍𑌤𑍍𑌰𑌿𑌭𑍁𑌵𑌨𑌗𑍁𑌰𑍁𑌰𑌪𑍍𑌯𑌬𑍍𑌦𑌕𑍋𑌟𑍀𑌰𑌨𑍇𑌕𑌾
𑌗𑌂𑌤𑍁𑌂 𑌨𑌾𑌂𑌤𑌂 𑌸𑌮𑌰𑍍𑌥𑍋 𑌭𑍍𑌰𑌮𑌰 𑌇𑌵 𑌪𑍁𑌨𑌰𑍍𑌨𑌾𑌭𑌿𑌨𑌾𑌲𑍀𑌕𑌨𑌾𑌲𑌾𑌤𑍍 ।
𑌉𑌨𑍍𑌮𑌜𑍍𑌜𑌨𑍍𑌨𑍂𑌰𑍍𑌜𑌿𑌤𑌶𑍍𑌰𑍀𑌸𑍍𑌤𑍍𑌰𑌿𑌭𑍁𑌵𑌨𑌮𑌪𑌰𑌂 𑌨𑌿𑌰𑍍𑌮𑌮𑍇 𑌤𑌤𑍍𑌸𑌦𑍃𑌕𑍍𑌷𑌂
𑌦𑍇𑌹𑌾𑌂𑌭𑍋𑌧𑌿𑌃 𑌸 𑌦𑍇𑌯𑌾𑌨𑍍𑌨𑌿𑌰𑌵𑌧𑌿𑌰𑌮𑍃𑌤𑌂 𑌦𑍈𑌤𑍍𑌯𑌵𑌿𑌦𑍍𑌵𑍇𑌷𑌿𑌣𑍋 𑌨𑌃 ॥ 4𑍮 ॥

𑌮𑌤𑍍𑌸𑍍𑌯𑌃 𑌕𑍂𑌰𑍍𑌮𑍋 𑌵𑌰𑌾𑌹𑍋 𑌨𑌰𑌹𑌰𑌿𑌣𑌪𑌤𑌿𑌰𑍍𑌵𑌾𑌮𑌨𑍋 𑌜𑌾𑌮𑌦𑌗𑍍𑌨𑍍𑌯𑌃
𑌕𑌾𑌕𑍁𑌤𑍍𑌸𑍍𑌥𑌃 𑌕𑌂𑌸𑌘𑌾𑌤𑍀 𑌮𑌨𑌸𑌿𑌜𑌵𑌿𑌜𑌯𑍀 𑌯𑌶𑍍𑌚 𑌕𑌲𑍍𑌕𑌿𑌰𑍍𑌭𑌵𑌿𑌷𑍍𑌯𑌨𑍍 ।
𑌵𑌿𑌷𑍍𑌣𑍋𑌰𑌂𑌶𑌾𑌵𑌤𑌰𑌾 𑌭𑍁𑌵𑌨𑌹𑌿𑌤𑌕𑌰𑌾 𑌧𑌰𑍍𑌮𑌸𑌂𑌸𑍍𑌥𑌾𑌪𑌨𑌾𑌰𑍍𑌥𑌾𑌃
𑌪𑌾𑌯𑌾𑌸𑍁𑌰𑍍𑌮𑌾𑌂 𑌤 𑌏𑌤𑍇 𑌗𑍁𑌰𑍁𑌤𑌰𑌕𑌰𑍁𑌣𑌾𑌭𑌾𑌰𑌖𑌿𑌨𑍍𑌨𑌾𑌶𑌯𑌾 𑌯𑍇 ॥ 4𑍯 ॥

𑌯𑌸𑍍𑌮𑌾𑌦𑍍𑌵𑌾𑌚𑍋 𑌨𑌿𑌵𑍃𑌤𑍍𑌤𑌾𑌃 𑌸𑌮𑌮𑌪𑌿 𑌮𑌨𑌸𑌾 𑌲𑌕𑍍𑌷𑌣𑌾𑌮𑍀𑌕𑍍𑌷𑌮𑌾𑌣𑌾𑌃
𑌸𑍍𑌵𑌾𑌰𑍍𑌥𑌾𑌲𑌾𑌭𑌾𑌤𑍍𑌪𑌰𑌾𑌰𑍍𑌥𑌵𑍍𑌯𑌪𑌗𑌮𑌕𑌥𑌨𑌶𑍍𑌲𑌾𑌘𑌿𑌨𑍋 𑌵𑍇𑌦𑌵𑌾𑌦𑌾𑌃 ।
𑌨𑌿𑌤𑍍𑌯𑌾𑌨𑌂𑌦𑌂 𑌸𑍍𑌵𑌸𑌂𑌵𑌿𑌨𑍍𑌨𑌿𑌰𑌵𑌧𑌿𑌵𑌿𑌮𑌲𑌸𑍍𑌵𑌾𑌂𑌤𑌸𑌂𑌕𑍍𑌰𑌾𑌂𑌤𑌬𑌿𑌂𑌬-
-𑌚𑍍𑌛𑌾𑌯𑌾𑌪𑌤𑍍𑌯𑌾𑌪𑌿 𑌨𑌿𑌤𑍍𑌯𑌂 𑌸𑍁𑌖𑌯𑌤𑌿 𑌯𑌮𑌿𑌨𑍋 𑌯𑌤𑍍𑌤𑌦𑌵𑍍𑌯𑌾𑌨𑍍𑌮𑌹𑍋 𑌨𑌃 ॥ 50 ॥

𑌆𑌪𑌾𑌦𑌾𑌦𑌾 𑌚 𑌶𑍀𑌰𑍍𑌷𑌾𑌦𑍍𑌵𑌪𑍁𑌰𑌿𑌦𑌮𑌨𑌘𑌂 𑌵𑍈𑌷𑍍𑌣𑌵𑌂 𑌯𑌃 𑌸𑍍𑌵𑌚𑌿𑌤𑍍𑌤𑍇
𑌧𑌤𑍍𑌤𑍇 𑌨𑌿𑌤𑍍𑌯𑌂 𑌨𑌿𑌰𑌸𑍍𑌤𑌾𑌖𑌿𑌲𑌕𑌲𑌿𑌕𑌲𑍁𑌷 𑌸𑌂𑌤𑌤𑌾𑌂𑌤𑌃 𑌪𑍍𑌰𑌮𑍋𑌦𑌮𑍍 ।
𑌜𑍁𑌹𑍍𑌵𑌜𑍍𑌜𑌿𑌹𑍍𑌵𑌾𑌕𑍃𑌶𑌾𑌨𑍌 𑌹𑌰𑌿𑌚𑌰𑌿𑌤𑌹𑌵𑌿𑌃 𑌸𑍍𑌤𑍋𑌤𑍍𑌰𑌮𑌂𑌤𑍍𑌰𑌾𑌨𑍁𑌪𑌾𑌠𑍈-
-𑌸𑍍𑌤𑌤𑍍𑌪𑌾𑌦𑌾𑌂𑌭𑍋𑌰𑍁𑌹𑌾𑌭𑍍𑌯𑌾𑌂 𑌸𑌤𑌤𑌮𑌪𑌿 𑌨𑌮𑌸𑍍𑌕𑍁𑌰𑍍𑌮𑌹𑍇 𑌨𑌿𑌰𑍍𑌮𑌲𑌾𑌭𑍍𑌯𑌾𑌮𑍍 ॥ 51 ॥

𑌮𑍋𑌦𑌾𑌤𑍍𑌪𑌾𑌦𑌾𑌦𑌿𑌕𑍇𑌶𑌸𑍍𑌤𑍁𑌤𑌿𑌮𑌿𑌤𑌿𑌰𑌚𑌿𑌤𑌾 𑌕𑍀𑌰𑍍𑌤𑌯𑌿𑌤𑍍𑌵𑌾 𑌤𑍍𑌰𑌿𑌧𑌾𑌮𑍍𑌨
𑌪𑌾𑌦𑌾𑌬𑍍𑌜𑌦𑍍𑌵𑌂𑌦𑍍𑌵𑌸𑍇𑌵𑌾𑌸𑌮𑌯𑌨𑌤𑌮𑌤𑌿𑌰𑍍𑌮𑌸𑍍𑌤𑌕𑍇𑌨𑌾𑌨𑌮𑍇𑌦𑍍𑌯 ।
𑌉𑌨𑍍𑌮𑍁𑌚𑍍𑌯𑍈𑌵𑌾𑌤𑍍𑌮𑌨𑍈𑌨𑍋𑌨𑌿𑌚𑌯𑌕𑌵𑌚𑌕 𑌪𑌂𑌚𑌤𑌾𑌮𑍇𑌤𑍍𑌯 𑌭𑌾𑌨𑍋-
-𑌰𑍍𑌬𑌿𑌂𑌬𑌾𑌂𑌤𑌰𑍍𑌗𑍋𑌚𑌰 𑌸 𑌪𑍍𑌰𑌵𑌿𑌶𑌤𑌿 𑌪𑌰𑌮𑌾𑌨𑌂𑌦𑌮𑌾𑌤𑍍𑌮𑌸𑍍𑌵𑌰𑍂𑌪𑌮𑍍 ॥ 52 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌶𑍍𑌰𑍀 𑌵𑌿𑌷𑍍𑌣𑍁 𑌪𑌾𑌦𑌾𑌦𑌿𑌕𑍇𑌶𑌾𑌂𑌤𑌵𑌰𑍍𑌣𑌣 𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ।