𑌉𑌪𑌦𑍇𑌶 𑌸𑌾𑌰𑌂 (𑌰𑌮𑌣 𑌮𑌹𑌰𑍍𑌷𑌿)

𑌕𑌰𑍍𑌤𑍁𑌰𑌾𑌜𑍍𑌞𑌯𑌾 𑌪𑍍𑌰𑌾𑌪𑍍𑌯𑌤𑍇 𑌫𑌲𑌮𑍍 ।
𑌕𑌰𑍍𑌮 𑌕𑌿𑌂 𑌪𑌰𑌂 𑌕𑌰𑍍𑌮 𑌤𑌜𑍍𑌜𑌡𑌮𑍍 ॥ 1 ॥

𑌕𑍃𑌤𑌿𑌮𑌹𑍋𑌦𑌧𑍌 𑌪𑌤𑌨𑌕𑌾𑌰𑌣𑌮𑍍 ।
𑌫𑌲𑌮𑌶𑌾𑌶𑍍𑌵𑌤𑌂 𑌗𑌤𑌿𑌨𑌿𑌰𑍋𑌧𑌕𑌮𑍍 ॥ 2 ॥

𑌈𑌶𑍍𑌵𑌰𑌾𑌰𑍍𑌪𑌿𑌤𑌂 𑌨𑍇𑌚𑍍𑌛𑌯𑌾 𑌕𑍃𑌤𑌮𑍍 ।
𑌚𑌿𑌤𑍍𑌤𑌶𑍋𑌧𑌕𑌂 𑌮𑍁𑌕𑍍𑌤𑌿𑌸𑌾𑌧𑌕𑌮𑍍 ॥ 3 ॥

𑌕𑌾𑌯𑌵𑌾𑌙𑍍𑌮𑌨𑌃 𑌕𑌾𑌰𑍍𑌯𑌮𑍁𑌤𑍍𑌤𑌮𑌮𑍍 ।
𑌪𑍂𑌜𑌨𑌂 𑌜𑌪𑌶𑍍𑌚𑌿𑌂𑌤𑌨𑌂 𑌕𑍍𑌰𑌮𑌾𑌤𑍍 ॥ 4 ॥

𑌜𑌗𑌤 𑌈𑌶𑌧𑍀 𑌯𑍁𑌕𑍍𑌤𑌸𑍇𑌵𑌨𑌮𑍍 ।
𑌅𑌷𑍍𑌟𑌮𑍂𑌰𑍍𑌤𑌿𑌭𑍃𑌦𑍍𑌦𑍇𑌵𑌪𑍂𑌜𑌨𑌮𑍍 ॥ 5 ॥

𑌉𑌤𑍍𑌤𑌮𑌸𑍍𑌤𑌵𑌾𑌦𑍁𑌚𑍍𑌚𑌮𑌂𑌦𑌤𑌃 ।
𑌚𑌿𑌤𑍍𑌤𑌜𑌂 𑌜𑌪𑌧𑍍𑌯𑌾𑌨𑌮𑍁𑌤𑍍𑌤𑌮𑌮𑍍 ॥ 6 ॥

𑌆𑌜𑍍𑌯𑌧𑌾𑌰𑌯𑌾 𑌸𑍍𑌰𑍋𑌤𑌸𑌾 𑌸𑌮𑌮𑍍 ।
𑌸𑌰𑌲𑌚𑌿𑌂𑌤𑌨𑌂 𑌵𑌿𑌰𑌲𑌤𑌃 𑌪𑌰𑌮𑍍 ॥ 𑍭 ॥

𑌭𑍇𑌦𑌭𑌾𑌵𑌨𑌾𑌤𑍍 𑌸𑍋𑌽𑌹𑌮𑌿𑌤𑍍𑌯𑌸𑍌 ।
𑌭𑌾𑌵𑌨𑌾𑌽𑌭𑌿𑌦𑌾 𑌪𑌾𑌵𑌨𑍀 𑌮𑌤𑌾 ॥ 𑍮 ॥

𑌭𑌾𑌵𑌶𑍂𑌨𑍍𑌯𑌸𑌦𑍍𑌭𑌾𑌵𑌸𑍁𑌸𑍍𑌥𑌿𑌤𑌿𑌃 ।
𑌭𑌾𑌵𑌨𑌾𑌬𑌲𑌾𑌦𑍍𑌭𑌕𑍍𑌤𑌿𑌰𑍁𑌤𑍍𑌤𑌮𑌾 ॥ 𑍯 ॥

𑌹𑍃𑌤𑍍𑌸𑍍𑌥𑌲𑍇 𑌮𑌨𑌃 𑌸𑍍𑌵𑌸𑍍𑌥𑌤𑌾 𑌕𑍍𑌰𑌿𑌯𑌾 ।
𑌭𑌕𑍍𑌤𑌿𑌯𑍋𑌗𑌬𑍋𑌧𑌾𑌶𑍍𑌚 𑌨𑌿𑌶𑍍𑌚𑌿𑌤𑌮𑍍 ॥ 10 ॥

𑌵𑌾𑌯𑍁𑌰𑍋𑌧𑌨𑌾𑌲𑍍𑌲𑍀𑌯𑌤𑍇 𑌮𑌨𑌃 ।
𑌜𑌾𑌲𑌪𑌕𑍍𑌷𑌿𑌵𑌦𑍍𑌰𑍋𑌧𑌸𑌾𑌧𑌨𑌮𑍍 ॥ 11 ॥

𑌚𑌿𑌤𑍍𑌤𑌵𑌾𑌯𑌵𑌶𑍍𑌚𑌿𑌤𑍍𑌕𑍍𑌰𑌿𑌯𑌾𑌯𑍁𑌤𑌾𑌃 ।
𑌶𑌾𑌖𑌯𑍋𑌰𑍍𑌦𑍍𑌵𑌯𑍀 𑌶𑌕𑍍𑌤𑌿𑌮𑍂𑌲𑌕𑌾 ॥ 12 ॥

𑌲𑌯𑌵𑌿𑌨𑌾𑌶𑌨𑍇 𑌉𑌭𑌯𑌰𑍋𑌧𑌨𑍇 ।
𑌲𑌯𑌗𑌤𑌂 𑌪𑍁𑌨𑌰𑍍𑌭𑌵𑌤𑌿 𑌨𑍋 𑌮𑍃𑌤𑌮𑍍 ॥ 13 ॥

𑌪𑍍𑌰𑌾𑌣𑌬𑌂𑌧𑌨𑌾𑌲𑍍𑌲𑍀𑌨𑌮𑌾𑌨𑌸𑌮𑍍 ।
𑌏𑌕𑌚𑌿𑌂𑌤𑌨𑌾𑌨𑍍𑌨𑌾𑌶𑌮𑍇𑌤𑍍𑌯𑌦𑌃 ॥ 14 ॥

𑌨𑌷𑍍𑌟𑌮𑌾𑌨𑌸𑍋𑌤𑍍𑌕𑍃𑌷𑍍𑌟𑌯𑍋𑌗𑌿𑌨𑌃 ।
𑌕𑍃𑌤𑍍𑌯𑌮𑌸𑍍𑌤𑌿 𑌕𑌿𑌂 𑌸𑍍𑌵𑌸𑍍𑌥𑌿𑌤𑌿𑌂 𑌯𑌤𑌃 ॥ 15 ॥

𑌦𑍃𑌶𑍍𑌯𑌵𑌾𑌰𑌿𑌤𑌂 𑌚𑌿𑌤𑍍𑌤𑌮𑌾𑌤𑍍𑌮𑌨𑌃 ।
𑌚𑌿𑌤𑍍𑌤𑍍𑌵𑌦𑌰𑍍𑌶𑌨𑌂 𑌤𑌤𑍍𑌤𑍍𑌵𑌦𑌰𑍍𑌶𑌨𑌮𑍍 ॥ 16 ॥

𑌮𑌾𑌨𑌸𑌂 𑌤𑍁 𑌕𑌿𑌂 𑌮𑌾𑌰𑍍𑌗𑌣𑍇 𑌕𑍃𑌤𑍇 ।
𑌨𑍈𑌵 𑌮𑌾𑌨𑌸𑌂 𑌮𑌾𑌰𑍍𑌗 𑌆𑌰𑍍𑌜𑌵𑌾𑌤𑍍 ॥ 1𑍭 ॥

𑌵𑍃𑌤𑍍𑌤𑌯𑌸𑍍𑌤𑍍𑌵𑌹𑌂 𑌵𑍃𑌤𑍍𑌤𑌿𑌮𑌾𑌶𑍍𑌰𑌿𑌤𑌾𑌃 ।
𑌵𑍃𑌤𑍍𑌤𑌯𑍋 𑌮𑌨𑍋 𑌵𑌿𑌦𑍍𑌧𑍍𑌯𑌹𑌂 𑌮𑌨𑌃 ॥ 1𑍮 ॥

𑌅𑌹𑌮𑌯𑌂 𑌕𑍁𑌤𑍋 𑌭𑌵𑌤𑌿 𑌚𑌿𑌨𑍍𑌵𑌤𑌃 ।
𑌅𑌯𑌿 𑌪𑌤𑌤𑍍𑌯𑌹𑌂 𑌨𑌿𑌜𑌵𑌿𑌚𑌾𑌰𑌣𑌮𑍍 ॥ 1𑍯 ॥

𑌅𑌹𑌮𑌿 𑌨𑌾𑌶𑌭𑌾𑌜𑍍𑌯𑌹𑌮𑌹𑌂𑌤𑌯𑌾 ।
𑌸𑍍𑌫𑍁𑌰𑌤𑌿 𑌹𑍃𑌤𑍍𑌸𑍍𑌵𑌯𑌂 𑌪𑌰𑌮𑌪𑍂𑌰𑍍𑌣𑌸𑌤𑍍 ॥ 20 ॥

𑌇𑌦𑌮𑌹𑌂 𑌪𑌦𑌾𑌽𑌭𑌿𑌖𑍍𑌯𑌮𑌨𑍍𑌵𑌹𑌮𑍍 ।
𑌅𑌹𑌮𑌿𑌲𑍀𑌨𑌕𑍇𑌽𑌪𑍍𑌯𑌲𑌯𑌸𑌤𑍍𑌤𑌯𑌾 ॥ 21 ॥

𑌵𑌿𑌗𑍍𑌰𑌹𑍇𑌂𑌦𑍍𑌰𑌿𑌯𑌪𑍍𑌰𑌾𑌣𑌧𑍀𑌤𑌮𑌃 ।
𑌨𑌾𑌹𑌮𑍇𑌕𑌸𑌤𑍍𑌤𑌜𑍍𑌜𑌡𑌂 𑌹𑍍𑌯𑌸𑌤𑍍 ॥ 22 ॥

𑌸𑌤𑍍𑌤𑍍𑌵𑌭𑌾𑌸𑌿𑌕𑌾 𑌚𑌿𑌤𑍍𑌕𑍍𑌵𑌵𑍇𑌤𑌰𑌾 ।
𑌸𑌤𑍍𑌤𑌯𑌾 𑌹𑌿 𑌚𑌿𑌚𑍍𑌚𑌿𑌤𑍍𑌤𑌯𑌾 𑌹𑍍𑌯𑌹𑌮𑍍 ॥ 23 ॥

𑌈𑌶𑌜𑍀𑌵𑌯𑍋𑌰𑍍𑌵𑍇𑌷𑌧𑍀𑌭𑌿𑌦𑌾 ।
𑌸𑌤𑍍𑌸𑍍𑌵𑌭𑌾𑌵𑌤𑍋 𑌵𑌸𑍍𑌤𑍁 𑌕𑍇𑌵𑌲𑌮𑍍 ॥ 24 ॥

𑌵𑍇𑌷𑌹𑌾𑌨𑌤𑌃 𑌸𑍍𑌵𑌾𑌤𑍍𑌮𑌦𑌰𑍍𑌶𑌨𑌮𑍍 ।
𑌈𑌶𑌦𑌰𑍍𑌶𑌨𑌂 𑌸𑍍𑌵𑌾𑌤𑍍𑌮𑌰𑍂𑌪𑌤𑌃 ॥ 25 ॥

𑌆𑌤𑍍𑌮𑌸𑌂𑌸𑍍𑌥𑌿𑌤𑌿𑌃 𑌸𑍍𑌵𑌾𑌤𑍍𑌮𑌦𑌰𑍍𑌶𑌨𑌮𑍍 ।
𑌆𑌤𑍍𑌮𑌨𑌿𑌰𑍍𑌦𑍍𑌵𑌯𑌾𑌦𑌾𑌤𑍍𑌮𑌨𑌿𑌷𑍍𑌠𑌤𑌾 ॥ 26 ॥

𑌜𑍍𑌞𑌾𑌨𑌵𑌰𑍍𑌜𑌿𑌤𑌾𑌽𑌜𑍍𑌞𑌾𑌨𑌹𑍀𑌨𑌚𑌿𑌤𑍍 ।
𑌜𑍍𑌞𑌾𑌨𑌮𑌸𑍍𑌤𑌿 𑌕𑌿𑌂 𑌜𑍍𑌞𑌾𑌤𑍁𑌮𑌂𑌤𑌰𑌮𑍍 ॥ 2𑍭 ॥

𑌕𑌿𑌂 𑌸𑍍𑌵𑌰𑍂𑌪𑌮𑌿𑌤𑍍𑌯𑌾𑌤𑍍𑌮𑌦𑌰𑍍𑌶𑌨𑍇 ।
𑌅𑌵𑍍𑌯𑌯𑌾𑌽𑌭𑌵𑌾𑌽𑌽𑌪𑍂𑌰𑍍𑌣𑌚𑌿𑌤𑍍𑌸𑍁𑌖𑌮𑍍 ॥ 2𑍮 ॥

𑌬𑌂𑌧𑌮𑍁𑌕𑍍𑌤𑍍𑌯𑌤𑍀𑌤𑌂 𑌪𑌰𑌂 𑌸𑍁𑌖𑌮𑍍 ।
𑌵𑌿𑌂𑌦𑌤𑍀𑌹 𑌜𑍀𑌵𑌸𑍍𑌤𑍁 𑌦𑍈𑌵𑌿𑌕𑌃 ॥ 2𑍯 ॥

𑌅𑌹𑌮𑌪𑍇𑌤𑌕𑌂 𑌨𑌿𑌜𑌵𑌿𑌭𑌾𑌨𑌕𑌮𑍍 ।
𑌮𑌹𑌦𑌿𑌦𑌂𑌤𑌪𑍋 𑌰𑌮𑌨𑌵𑌾𑌗𑌿𑌯𑌮𑍍 ॥ 30 ॥