𑌶𑍍𑌰𑍀 𑌵𑍇𑌂𑌕𑌟𑍇𑌶𑍍𑌵𑌰 𑌶𑌰𑌣𑌾𑌗𑌤𑌿 𑌸𑍍𑌤𑍋𑌤𑍍𑌰𑌮𑍍 (𑌸𑌪𑍍𑌤𑌰𑍍𑌷𑌿 𑌕𑍃𑌤𑌮𑍍)

𑌶𑍇𑌷𑌾𑌚𑌲𑌂 𑌸𑌮𑌾𑌸𑌾𑌦𑍍𑌯 𑌕𑌶𑍍𑌯𑌪𑌾𑌦𑍍𑌯𑌾 𑌮𑌹𑌰𑍍𑌷𑌯𑌃 ।
𑌵𑍇𑌂𑌕𑌟𑍇𑌶𑌂 𑌰𑌮𑌾𑌨𑌾𑌥𑌂 𑌶𑌰𑌣𑌂 𑌪𑍍𑌰𑌾𑌪𑍁𑌰𑌂𑌜𑌸𑌾 ॥ 1 ॥

𑌕𑌲𑌿𑌸𑌂𑌤𑌾𑌰𑌕𑌂 𑌮𑍁𑌖𑍍𑌯𑌂 𑌸𑍍𑌤𑍋𑌤𑍍𑌰𑌮𑍇𑌤𑌜𑍍𑌜𑌪𑍇𑌨𑍍𑌨𑌰𑌃 ।
𑌸𑌪𑍍𑌤𑌰𑍍𑌷𑌿𑌵𑌾𑌕𑍍𑌪𑍍𑌰𑌸𑌾𑌦𑍇𑌨 𑌵𑌿𑌷𑍍𑌣𑍁𑌸𑍍𑌤𑌸𑍍𑌮𑍈 𑌪𑍍𑌰𑌸𑍀𑌦𑌤𑌿 ॥ 2 ॥

𑌕𑌶𑍍𑌯𑌪 𑌉𑌵𑌾𑌚 –
𑌕𑌾𑌦𑌿𑌹𑍍𑌰𑍀𑌮𑌂𑌤𑌵𑌿𑌦𑍍𑌯𑌾𑌯𑌾𑌃 𑌪𑍍𑌰𑌾𑌪𑍍𑌯𑍈𑌵 𑌪𑌰𑌦𑍇𑌵𑌤𑌾 ।
𑌕𑌲𑍌 𑌶𑍍𑌰𑍀𑌵𑍇𑌂𑌕𑌟𑍇𑌶𑌾𑌖𑍍𑌯𑌾 𑌤𑌾𑌮𑌹𑌂 𑌶𑌰𑌣𑌂 𑌭𑌜𑍇 ॥ 3 ॥

𑌅𑌤𑍍𑌰𑌿𑌰𑍁𑌵𑌾𑌚 –
𑌅𑌕𑌾𑌰𑌾𑌦𑌿𑌕𑍍𑌷𑌕𑌾𑌰𑌾𑌂𑌤𑌵𑌰𑍍𑌣𑍈𑌰𑍍𑌯𑌃 𑌪𑍍𑌰𑌤𑌿𑌪𑌾𑌦𑍍𑌯𑌤𑍇 ।
𑌕𑌲𑍌 𑌸 𑌵𑍇𑌂𑌕𑌟𑍇𑌶𑌾𑌖𑍍𑌯𑌃 𑌶𑌰𑌣𑌂 𑌮𑍇 𑌰𑌮𑌾𑌪𑌤𑌿𑌃 ॥ 4 ॥

𑌭𑌰𑌦𑍍𑌵𑌾𑌜 𑌉𑌵𑌾𑌚 –
𑌭𑌗𑌵𑌾𑌨𑍍 𑌭𑌾𑌰𑍍𑌗𑌵𑍀𑌕𑌾𑌂𑌤𑍋 𑌭𑌕𑍍𑌤𑌾𑌭𑍀𑌪𑍍𑌸𑌿𑌤𑌦𑌾𑌯𑌕𑌃 ।
𑌭𑌕𑍍𑌤𑌸𑍍𑌯 𑌵𑍇𑌂𑌕𑌟𑍇𑌶𑌾𑌖𑍍𑌯𑍋 𑌭𑌰𑌦𑍍𑌵𑌾𑌜𑌸𑍍𑌯 𑌮𑍇 𑌗𑌤𑌿𑌃 ॥ 5 ॥

𑌵𑌿𑌶𑍍𑌵𑌾𑌮𑌿𑌤𑍍𑌰 𑌉𑌵𑌾𑌚 –
𑌵𑌿𑌰𑌾𑌡𑍍𑌵𑌿𑌷𑍍𑌣𑍁𑌰𑍍𑌵𑌿𑌧𑌾𑌤𑌾 𑌚 𑌵𑌿𑌶𑍍𑌵𑌵𑌿𑌜𑍍𑌞𑌾𑌨𑌵𑌿𑌗𑍍𑌰𑌹𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌯 𑌶𑌰𑌣𑌂 𑌵𑍇𑌂𑌕𑌟𑍇𑌶𑍋 𑌵𑌿𑌭𑍁𑌃 𑌸𑌦𑌾 ॥ 6 ॥

𑌗𑍌𑌤𑌮 𑌉𑌵𑌾𑌚 –
𑌗𑍌𑌰𑍍𑌗𑍌𑌰𑍀𑌶𑌪𑍍𑌰𑌿𑌯𑍋 𑌨𑌿𑌤𑍍𑌯𑌂 𑌗𑍋𑌵𑌿𑌂𑌦𑍋 𑌗𑍋𑌪𑌤𑌿𑌰𑍍𑌵𑌿𑌭𑍁𑌃 ।
𑌶𑌰𑌣𑌂 𑌗𑍌𑌤𑌮𑌸𑍍𑌯𑌾𑌸𑍍𑌤𑍁 𑌵𑍇𑌂𑌕𑌟𑌾𑌦𑍍𑌰𑌿𑌶𑌿𑌰𑍋𑌮𑌣𑌿𑌃 ॥ 𑍭 ॥

𑌜𑌮𑌦𑌗𑍍𑌨𑌿𑌰𑍁𑌵𑌾𑌚 –
𑌜𑌗𑌤𑍍𑌕𑌰𑍍𑌤𑌾 𑌜𑌗𑌦𑍍𑌭𑌰𑍍𑌤𑌾 𑌜𑌗𑌦𑍍𑌧𑌰𑍍𑌤𑌾 𑌜𑌗𑌨𑍍𑌮𑌯𑌃 ।
𑌜𑌮𑌦𑌗𑍍𑌨𑍇𑌃 𑌪𑍍𑌰𑌪𑌨𑍍𑌨𑌸𑍍𑌯 𑌜𑍀𑌵𑍇𑌶𑍋 𑌵𑍇𑌂𑌕𑌟𑍇𑌶𑍍𑌵𑌰𑌃 ॥ 𑍮 ॥

𑌵𑌸𑌿𑌷𑍍𑌠 𑌉𑌵𑌾𑌚 –
𑌵𑌸𑍍𑌤𑍁𑌵𑌿𑌜𑍍𑌞𑌾𑌨𑌮𑌾𑌤𑍍𑌰𑌂 𑌯𑌨𑍍𑌨𑌿𑌰𑍍𑌵𑌿𑌶𑍇𑌷𑌂 𑌸𑍁𑌖𑌂 𑌚 𑌸𑌤𑍍 ।
𑌤𑌦𑍍𑌬𑍍𑌰𑌹𑍍𑌮𑍈𑌵𑌾𑌹𑌮𑌸𑍍𑌮𑍀𑌤𑌿 𑌵𑍇𑌂𑌕𑌟𑍇𑌶𑌂 𑌭𑌜𑍇 𑌸𑌦𑌾 ॥ 𑍯 ॥

𑌸𑌪𑍍𑌤𑌰𑍍𑌷𑌿𑌰𑌚𑌿𑌤𑌂 𑌸𑍍𑌤𑍋𑌤𑍍𑌰𑌂 𑌸𑌰𑍍𑌵𑌦𑌾 𑌯𑌃 𑌪𑌠𑍇𑌨𑍍𑌨𑌰𑌃 ।
𑌸𑍋𑌽𑌭𑌯𑌂 𑌪𑍍𑌰𑌾𑌪𑍍𑌨𑍁𑌯𑌾𑌤𑍍𑌸𑌤𑍍𑌯𑌂 𑌸𑌰𑍍𑌵𑌤𑍍𑌰 𑌵𑌿𑌜𑌯𑍀 𑌭𑌵𑍇𑌤𑍍 ॥ 10 ॥

𑌇𑌤𑌿 𑌸𑌪𑍍𑌤𑌰𑍍𑌷𑌿𑌭𑌿𑌃 𑌕𑍃𑌤𑌂 𑌶𑍍𑌰𑍀 𑌵𑍇𑌂𑌕𑌟𑍇𑌶𑍍𑌵𑌰 𑌶𑌰𑌣𑌾𑌗𑌤𑌿 𑌸𑍍𑌤𑍋𑌤𑍍𑌰𑌮𑍍 ।