𑌶𑍍𑌰𑍀 𑌵𑍈𑌕𑍁𑌂𑌠 𑌗𑌦𑍍𑌯𑌮𑍍

𑌯𑌾𑌮𑍁𑌨𑌾𑌰𑍍𑌯𑌸𑍁𑌧𑌾𑌂𑌭𑍋𑌧𑌿𑌮𑌵𑌗𑌾𑌹𑍍𑌯 𑌯𑌥𑌾𑌮𑌤𑌿 ।
𑌆𑌦𑌾𑌯 𑌭𑌕𑍍𑌤𑌿𑌯𑍋𑌗𑌾𑌖𑍍𑌯𑌂 𑌰𑌤𑍍𑌨𑌂 𑌸𑌂𑌦𑌰𑍍𑌶𑌯𑌾𑌮𑍍𑌯𑌹𑌮𑍍 ॥

𑌸𑍍𑌵𑌾𑌧𑍀𑌨 𑌤𑍍𑌰𑌿𑌵𑌿𑌧𑌚𑍇𑌤𑌨𑌾𑌚𑍇𑌤𑌨𑌸𑍍𑌵𑌰𑍂𑌪𑌸𑍍𑌥𑌿𑌤𑌿 𑌪𑍍𑌰𑌵𑍃𑌤𑍍𑌤𑌿𑌭𑍇𑌦𑌂, 𑌕𑍍𑌲𑍇𑌶 𑌕𑌰𑍍𑌮𑌾𑌦𑍍𑌯𑌶𑍇𑌷𑌦𑍋𑌷𑌾𑌸𑌂𑌸𑍍𑌪𑍃𑌷𑍍𑌟𑌂, 𑌸𑍍𑌵𑌾𑌭𑌾𑌵𑌿𑌕𑌾𑌨𑌵𑌧𑌿𑌕𑌾𑌤𑌿𑌶𑌯 𑌜𑍍𑌞𑌾𑌨𑌬𑌲𑍈𑌶𑍍𑌵𑌰𑍍𑌯𑌵𑍀𑌰𑍍𑌯𑌶𑌕𑍍𑌤𑌿𑌤𑍇𑌜𑌃 𑌪𑍍𑌰𑌭𑍃𑌤𑍍𑌯𑌸𑌂𑌖𑍍𑌯𑍇𑌯 𑌕𑌲𑍍𑌯𑌾𑌣𑌗𑍁𑌣𑌗𑌣𑍌𑌘 𑌮𑌹𑌾𑌰𑍍𑌣𑌵𑌂, 𑌪𑌰𑌮𑌪𑍁𑌰𑍁𑌷𑌂, 𑌭𑌗𑌵𑌂𑌤𑌂, 𑌨𑌾𑌰𑌾𑌯𑌣𑌂, 𑌸𑍍𑌵𑌾𑌮𑌿𑌤𑍍𑌵𑍇𑌨 𑌸𑍁𑌹𑍃𑌤𑍍𑌵𑍇𑌨 𑌗𑍁𑌰𑍁𑌤𑍍𑌵𑍇𑌨 𑌚 𑌪𑌰𑌿𑌗𑍃𑌹𑍍𑌯 𑌐𑌕𑌾𑌂𑌤𑌿𑌕𑌾𑌤𑍍𑌯𑌂𑌤𑌿𑌕 𑌤𑌤𑍍𑌪𑌾𑌦𑌾𑌂𑌬𑍁𑌜𑌦𑍍𑌵𑌯 𑌪𑌰𑌿𑌚𑌰𑍍𑌯𑍈𑌕𑌮𑌨𑍋𑌰𑌥𑌃, 𑌤𑌤𑍍𑌪𑍍𑌰𑌾𑌪𑍍𑌤𑌯𑍇 𑌚 𑌤𑌤𑍍𑌪𑌾𑌦𑌾𑌂𑌬𑍁𑌜𑌦𑍍𑌵𑌯 𑌪𑍍𑌰𑌪𑌤𑍍𑌤𑍇𑌰𑌨𑍍𑌯𑌨𑍍𑌨 𑌮𑍇 𑌕𑌲𑍍𑌪𑌕𑍋𑌟𑌿𑌸𑌹𑌸𑍍𑌰𑍇𑌣𑌾𑌪𑌿 𑌸𑌾𑌧𑌨𑌮𑌸𑍍𑌤𑍀𑌤𑌿 𑌮𑌨𑍍𑌵𑌾𑌨𑌃, 𑌤𑌸𑍍𑌯𑍈𑌵 𑌭𑌗𑌵𑌤𑍋 𑌨𑌾𑌰𑌾𑌯𑌣𑌸𑍍𑌯 𑌅𑌖𑌿𑌲𑌸𑌤𑍍𑌤𑍍𑌵𑌦𑌯𑍈𑌕𑌸𑌾𑌗𑌰𑌸𑍍𑌯 𑌅𑌨𑌾𑌲𑍋𑌚𑌿𑌤 𑌗𑍁𑌣𑌗𑍁𑌣𑌾𑌖𑌂𑌡 𑌜𑌨𑌾𑌨𑍁𑌕𑍂𑌲𑌾𑌮𑌰𑍍𑌯𑌾𑌦 𑌶𑍀𑌲𑌵𑌤𑌃, 𑌸𑍍𑌵𑌾𑌭𑌾𑌵𑌿𑌕𑌾𑌨𑌵𑌧𑌿𑌕𑌾𑌤𑌿𑌶𑌯 𑌗𑍁𑌣𑌵𑌤𑍍𑌤𑌯𑌾 𑌦𑍇𑌵𑌤𑌿𑌰𑍍𑌯𑌙𑍍𑌮𑌨𑍁𑌷𑍍𑌯𑌾𑌦𑍍𑌯𑌖𑌿𑌲𑌜𑌨 𑌹𑍃𑌦𑌯𑌾𑌨𑌂𑌦𑌨𑌸𑍍𑌯 𑌆𑌶𑍍𑌰𑌿𑌤𑌵𑌾𑌤𑍍𑌸𑌲𑍍𑌯𑍈𑌕𑌜𑌲𑌧𑍇𑌃 𑌭𑌕𑍍𑌤𑌜𑌨𑌸𑌂𑌶𑍍𑌲𑍇𑌷𑍈𑌕𑌭𑍋𑌗𑌸𑍍𑌯 𑌨𑌿𑌤𑍍𑌯𑌜𑍍𑌞𑌾𑌨𑌕𑍍𑌰𑌿𑌯𑍈𑌶𑍍𑌵𑌰𑍍𑌯𑌾𑌦𑌿 𑌭𑍋𑌗𑌸𑌾𑌮𑌗𑍍𑌰𑍀𑌸𑌮𑍃𑌦𑍍𑌧𑌸𑍍𑌯, 𑌮𑌹𑌾𑌵𑌿𑌭𑍂𑌤𑍇𑌃, 𑌶𑍍𑌰𑍀𑌮𑌚𑍍𑌚𑌰𑌣𑌾𑌰𑌵𑌿𑌂𑌦𑌯𑍁𑌗𑌳𑌂 𑌅𑌨𑌨𑍍𑌯𑌾𑌤𑍍𑌮𑌸𑌂𑌜𑍀𑌵𑌨𑍇𑌨 𑌤𑌦𑍍𑌗𑌤𑌸𑌰𑍍𑌵𑌭𑌾𑌵𑍇𑌨 𑌶𑌰𑌣𑌮𑌨𑍁𑌵𑍍𑌰𑌜𑍇𑌤𑍍 । 𑌤𑌤𑌶𑍍𑌚 𑌪𑍍𑌰𑌤𑍍𑌯𑌹𑌮𑌾𑌤𑍍𑌮𑍋𑌜𑍍𑌜𑍀𑌵𑌨𑌾𑌯𑍈𑌵𑌮𑌨𑍁𑌸𑍍𑌮𑌰𑍇𑌤𑍍 । 𑌚𑌤𑍁𑌰𑍍𑌦𑌶𑌭𑍁𑌵𑌨𑌾𑌤𑍍𑌮𑌕𑌂 𑌅𑌂𑌡𑌂, 𑌦𑌶𑌗𑍁𑌣𑌿𑌤𑍋𑌤𑍍𑌤𑌰𑌂 𑌚 𑌆𑌵𑌰𑌣𑌸𑌪𑍍𑌤𑌕𑌂, 𑌸𑌮𑌸𑍍𑌤𑌂 𑌕𑌾𑌰𑍍𑌯𑌕𑌾𑌰𑌣(𑌜𑌾𑌤)𑌮𑌤𑍀𑌤𑍍𑌯, 𑌵𑌰𑍍𑌤𑌮𑌾𑌨𑍇 𑌪𑌰𑌮𑌵𑍍𑌯𑍋𑌮𑌶𑌬𑍍𑌦𑌾𑌭𑌿𑌧𑍇𑌯𑍇, 𑌬𑍍𑌰𑌹𑍍𑌮𑌾𑌦𑍀𑌨𑌾𑌂 𑌵𑌾𑌙𑍍𑌮𑌨𑌸𑌾𑌽𑌗𑍋𑌚𑌰𑍇, 𑌶𑍍𑌰𑍀𑌮𑌤𑌿 𑌵𑍈𑌕𑍁𑌂𑌠𑍇 𑌦𑌿𑌵𑍍𑌯𑌲𑍋𑌕𑍇, 𑌸𑌨𑌕𑌵𑌿𑌧𑌿𑌶𑌿𑌵𑌾𑌦𑌿𑌭𑌿𑌰𑌪𑌿 𑌅𑌚𑌿𑌂𑌤𑍍𑌯𑌸𑍍𑌵𑌭𑌾𑌵𑍈𑌶𑍍𑌵𑌰𑍍𑌯𑍈𑌃, 𑌨𑌿𑌤𑍍𑌯𑌸𑌿𑌦𑍍𑌧𑍈𑌰𑌨𑌂𑌤𑍈𑌰𑍍𑌭𑌗𑌵𑌦𑌾𑌨𑍁𑌕𑍂𑌲𑍍𑌯𑍈𑌕 𑌭𑍋𑌗𑍈𑌰𑍍𑌦𑌿𑌵𑍍𑌯𑌪𑍁𑌰𑍁𑌷𑍈𑌃 𑌮𑌹𑌾𑌤𑍍𑌮𑌭𑌿𑌃 𑌆𑌪𑍂𑌰𑌿𑌤𑍇, 𑌤𑍇𑌷𑌾𑌮𑌪𑌿 𑌇𑌯𑌤𑍍𑌪𑌰𑌿𑌮𑌾𑌣𑌂, 𑌇𑌯𑌦𑍈𑌶𑍍𑌵𑌰𑍍𑌯𑌂, 𑌈𑌦𑍃𑌶𑌸𑍍𑌵𑌭𑌾𑌵𑌮𑌿𑌤𑌿 𑌪𑌰𑌿𑌚𑍍𑌛𑍇𑌤𑍍𑌤𑍁𑌮𑌯𑍋𑌗𑍍𑌯𑍇, 𑌦𑌿𑌵𑍍𑌯𑌾𑌵𑌰𑌣𑌶𑌤𑌸𑌹𑌸𑍍𑌰𑌾𑌵𑍃𑌤𑍇, 𑌦𑌿𑌵𑍍𑌯𑌕𑌲𑍍𑌪𑌕𑌤𑌰𑍂𑌪𑌶𑍋𑌭𑌿𑌤𑍇, 𑌦𑌿𑌵𑍍𑌯𑍋𑌦𑍍𑌯𑌾𑌨 𑌶𑌤𑌸𑌹𑌸𑍍𑌰𑌕𑍋𑌟𑌿𑌭𑌿𑌰𑌾𑌵𑍃𑌤𑍇, 𑌅𑌤𑌿𑌪𑍍𑌰𑌮𑌾𑌣𑍇 𑌦𑌿𑌵𑍍𑌯𑌾𑌯𑌤𑌨𑍇, 𑌕𑌸𑍍𑌮𑌿𑌂𑌶𑍍𑌚𑌿𑌦𑍍𑌵𑌿𑌚𑌿𑌤𑍍𑌰 𑌦𑌿𑌵𑍍𑌯𑌰𑌤𑍍𑌨𑌮𑌯 𑌦𑌿𑌵𑍍𑌯𑌾𑌸𑍍𑌥𑌾𑌨𑌮𑌂𑌡𑌪𑍇, 𑌦𑌿𑌵𑍍𑌯𑌰𑌤𑍍𑌨𑌸𑍍𑌤𑌂𑌭 𑌶𑌤𑌸𑌹𑌸𑍍𑌰𑌕𑍋𑌟𑌿𑌭𑌿𑌰𑍁𑌪𑌶𑍋𑌭𑌿𑌤𑍇,
𑌦𑌿𑌵𑍍𑌯𑌨𑌾𑌨𑌾𑌰𑌤𑍍𑌨𑌕𑍃𑌤𑌸𑍍𑌥𑌲 𑌵𑌿𑌚𑌿𑌤𑍍𑌰𑌿𑌤𑍇, 𑌦𑌿𑌵𑍍𑌯𑌾𑌲𑌂𑌕𑌾𑌰𑌾𑌲𑌂𑌕𑍃𑌤𑍇, 𑌪𑌰𑌿𑌤𑌃 𑌪𑌤𑌿𑌤𑍈𑌃 𑌪𑌤𑌮𑌾𑌨𑍈𑌃 𑌪𑌾𑌦𑌪𑌸𑍍𑌥𑍈𑌶𑍍𑌚 𑌨𑌾𑌨𑌾𑌗𑌂𑌧𑌵𑌰𑍍𑌣𑍈𑌰𑍍𑌦𑌿𑌵𑍍𑌯𑌪𑍁𑌷𑍍𑌪𑍈𑌃 𑌶𑍋𑌭𑌮𑌾𑌨𑍈𑌰𑍍𑌦𑌿𑌵𑍍𑌯𑌪𑍁𑌷𑍍𑌪𑍋𑌪𑌵𑌨𑍈𑌰𑍁𑌪𑌶𑍋𑌭𑌿𑌤𑍇, 𑌸𑌂𑌕𑍀𑌰𑍍𑌣𑌪𑌾𑌰𑌿𑌜𑌾𑌤𑌾𑌦𑌿 𑌕𑌲𑍍𑌪𑌦𑍍𑌰𑍁𑌮𑍋𑌪𑌶𑍋𑌭𑌿𑌤𑍈𑌃, 𑌅𑌸𑌂𑌕𑍀𑌰𑍍𑌣𑍈𑌶𑍍𑌚 𑌕𑍈𑌶𑍍𑌚𑌿𑌦𑌂𑌤𑌸𑍍𑌸𑍍𑌥𑌪𑍁𑌷𑍍𑌪𑌰𑌤𑍍𑌨𑌾𑌦𑌿𑌨𑌿𑌰𑍍𑌮𑌿𑌤 𑌦𑌿𑌵𑍍𑌯𑌲𑍀𑌲𑌾𑌮𑌂𑌡𑌪 𑌶𑌤𑌸𑌹𑌸𑍍𑌰𑍋𑌪𑌶𑍋𑌭𑌿𑌤𑍈𑌃, 𑌸𑌰𑍍𑌵𑌦𑌾𑌽𑌨𑍁𑌭𑍂𑌯𑌮𑌾𑌨𑍈𑌰𑌪𑍍𑌯𑌪𑍂𑌰𑍍𑌵𑌵𑌦𑌾𑌶𑍍𑌚𑌰𑍍𑌯𑌮𑌾𑌵𑌹𑌦𑍍𑌭𑌿𑌃 𑌕𑍍𑌰𑍀𑌡𑌾𑌶𑍈𑌲 𑌶𑌤𑌸𑌹𑌸𑍍𑌰𑍈𑌰𑌲𑌂𑌕𑍃𑌤𑍈𑌃, 𑌕𑍈𑌶𑍍𑌚𑌿𑌨𑍍𑌨𑌾𑌰𑌾𑌯𑌣𑌦𑌿𑌵𑍍𑌯𑌲𑍀𑌲𑌾𑌽𑌸𑌾𑌧𑌾𑌰𑌣𑍈𑌃, 𑌕𑍈𑌶𑍍𑌚𑌿𑌤𑍍𑌪𑌦𑍍𑌮𑌵𑌨𑌾𑌲𑌯𑌾 𑌦𑌿𑌵𑍍𑌯𑌲𑍀𑌲𑌾𑌽𑌸𑌾𑌧𑌾𑌰𑌣𑍈𑌃, 𑌸𑌾𑌧𑌾𑌰𑌣𑍈𑌶𑍍𑌚 𑌕𑍈𑌶𑍍𑌚𑌿𑌤𑍍 𑌶𑍁𑌕𑌶𑌾𑌰𑌿𑌕𑌾𑌮𑌯𑍂𑌰𑌕𑍋𑌕𑌿𑌲𑌾𑌦𑌿𑌭𑌿𑌃 𑌕𑍋𑌮𑌲𑌕𑍂𑌜𑌿𑌤𑍈𑌰𑌾𑌕𑍁𑌲𑍈𑌃, 𑌦𑌿𑌵𑍍𑌯𑍋𑌦𑍍𑌯𑌾𑌨 𑌶𑌤𑌸𑌹𑌸𑍍𑌰𑍈𑌰𑌾𑌵𑍃𑌤𑍇, 𑌮𑌣𑌿𑌮𑍁𑌕𑍍𑌤𑌾𑌪𑍍𑌰𑌵𑌾𑌲 𑌕𑍃𑌤𑌸𑍋𑌪𑌾𑌨𑍈𑌃, 𑌦𑌿𑌵𑍍𑌯𑌾𑌮𑌲𑌾𑌮𑍃𑌤𑌰𑌸𑍋𑌦𑌕𑍈𑌃, 𑌦𑌿𑌵𑍍𑌯𑌾𑌂𑌡𑌜𑌵𑌰𑍈𑌃, 𑌅𑌤𑌿𑌰𑌮𑌣𑍀𑌯𑌦𑌰𑍍𑌶𑌨𑍈𑌃 𑌅𑌤𑌿𑌮𑌨𑍋𑌹𑌰𑌮𑌧𑍁𑌰𑌸𑍍𑌵𑌰𑍈𑌃 𑌆𑌕𑍁𑌲𑍈𑌃, 𑌅𑌂𑌤𑌸𑍍𑌥 𑌮𑍁𑌕𑍍𑌤𑌾𑌮𑌯 𑌦𑌿𑌵𑍍𑌯𑌕𑍍𑌰𑍀𑌡𑌾𑌸𑍍𑌥𑌾𑌨𑍋𑌪𑌶𑍋𑌭𑌿𑌤𑍈𑌃 𑌦𑌿𑌵𑍍𑌯𑌸𑍌𑌗𑌂𑌧𑌿𑌕𑌵𑌾𑌪𑍀𑌶𑌤𑌸𑌹𑌸𑍍𑌰𑍈𑌃, 𑌦𑌿𑌵𑍍𑌯𑌰𑌾𑌜𑌹𑌂𑌸𑌾𑌵𑌳𑍀𑌵𑌿𑌰𑌾𑌜𑌿𑌤𑍈𑌰𑌾𑌵𑍃𑌤𑍇, 𑌨𑌿𑌰𑌸𑍍𑌤𑌾𑌤𑌿𑌶𑌯𑌾𑌨𑌂𑌦𑍈𑌕𑌰𑌸𑌤𑌯𑌾 𑌚𑌾𑌨𑌂𑌤𑍍𑌯𑌾𑌚𑍍𑌚 𑌪𑍍𑌰𑌵𑌿𑌷𑍍𑌟𑌾𑌨𑍁𑌨𑍍𑌮𑌾𑌦𑌯𑌦𑍍𑌭𑌿𑌃 𑌕𑍍𑌰𑍀𑌡𑍋𑌦𑍍𑌦𑍇𑌶𑍈𑌰𑍍𑌵𑌿𑌰𑌾𑌜𑌿𑌤𑍇, 𑌤𑌤𑍍𑌰 𑌤𑌤𑍍𑌰 𑌕𑍃𑌤 𑌦𑌿𑌵𑍍𑌯𑌪𑍁𑌷𑍍𑌪𑌪𑌰𑍍𑌯𑌂𑌕𑍋𑌪𑌶𑍋𑌭𑌿𑌤𑍇, 𑌨𑌾𑌨𑌾𑌪𑍁𑌷𑍍𑌪𑌾𑌸𑌵𑌾𑌸𑍍𑌵𑌾𑌦 𑌮𑌤𑍍𑌤𑌭𑍃𑌂𑌗𑌾𑌵𑌲𑍀𑌭𑌿𑌃 𑌉𑌦𑍍𑌗𑍀𑌯𑌮𑌾𑌨 𑌦𑌿𑌵𑍍𑌯𑌗𑌾𑌂𑌧𑌰𑍍𑌵𑍇𑌣𑌾𑌪𑍂𑌰𑌿𑌤𑍇, 𑌚𑌂𑌦𑌨𑌾𑌗𑌰𑍁𑌕𑌰𑍍𑌪𑍂𑌰 𑌦𑌿𑌵𑍍𑌯𑌪𑍁𑌷𑍍𑌪𑌾𑌵𑌗𑌾𑌹𑌿 𑌮𑌂𑌦𑌾𑌨𑌿𑌲𑌾𑌸𑍇𑌵𑍍𑌯𑌮𑌾𑌨𑍇, 𑌮𑌧𑍍𑌯𑍇 𑌪𑍁𑌷𑍍𑌪𑌸𑌂𑌚𑌯 𑌵𑌿𑌚𑌿𑌤𑍍𑌰𑌿𑌤𑍇, 𑌮𑌹𑌤𑌿 𑌦𑌿𑌵𑍍𑌯𑌯𑍋𑌗𑌪𑌰𑍍𑌯𑌂𑌕𑍇 𑌅𑌨𑌂𑌤𑌭𑍋𑌗𑌿𑌨𑌿, 𑌶𑍍𑌰𑍀𑌮𑌦𑍍𑌵𑍈𑌕𑍁𑌂𑌠𑍈𑌶𑍍𑌵𑌰𑍍𑌯𑌾𑌦𑌿 𑌦𑌿𑌵𑍍𑌯𑌲𑍋𑌕𑌂 𑌆𑌤𑍍𑌮𑌕𑌾𑌂𑌤𑍍𑌯𑌾 𑌵𑌿𑌶𑍍𑌵𑌮𑌾𑌪𑍍𑌯𑌾𑌯𑌯𑌂𑌤𑍍𑌯𑌾 𑌶𑍇𑌷 𑌶𑍇𑌷𑌾𑌶𑌨𑌾𑌦𑌿 𑌸𑌰𑍍𑌵𑌪𑌰𑌿𑌜𑌨𑌂 𑌭𑌗𑌵𑌤𑌸𑍍𑌤𑌤𑍍𑌤𑌦𑌵𑌸𑍍𑌥𑍋𑌚𑌿𑌤 𑌪𑌰𑌿𑌚𑌰𑍍𑌯𑌾𑌯𑌾𑌂 𑌆𑌜𑍍𑌞𑌾𑌪𑌯𑌂𑌤𑍍𑌯𑌾, 𑌶𑍀𑌲𑌰𑍂𑌪𑌗𑍁𑌣 𑌵𑌿𑌲𑌾𑌸𑌾𑌦𑌿𑌭𑌿𑌃 𑌆𑌤𑍍𑌮𑌾𑌨𑍁𑌰𑍂𑌪𑌯𑌾 𑌶𑍍𑌰𑌿𑌯𑌾 𑌸𑌹𑌾𑌸𑍀𑌨𑌂, 𑌪𑍍𑌰𑌤𑍍𑌯𑌗𑍍𑌰𑍋𑌨𑍍𑌮𑍀𑌲𑌿𑌤 𑌸𑌰𑌸𑌿𑌜𑌸𑌦𑍃𑌶 𑌨𑌯𑌨𑌯𑍁𑌗𑌳𑌂, 𑌸𑍍𑌵𑌚𑍍𑌛𑌨𑍀𑌲𑌜𑍀𑌮𑍂𑌤𑌸𑌂𑌕𑌾𑌶𑌂, 𑌅𑌤𑍍𑌯𑍁𑌜𑍍𑌜𑍍𑌵𑌲𑌪𑍀𑌤𑌵𑌾𑌸𑌸𑌂, 𑌸𑍍𑌵𑌯𑌾 𑌪𑍍𑌰𑌭𑌯𑌾𑌽𑌤𑌿𑌨𑌿𑌰𑍍𑌮𑌲𑌯𑌾 𑌅𑌤𑌿𑌶𑍀𑌤𑌲𑌯𑌾 𑌅𑌤𑌿𑌕𑍋𑌮𑌲𑌯𑌾 𑌸𑍍𑌵𑌚𑍍𑌛𑌮𑌾𑌣𑌿𑌕𑍍𑌯𑌾𑌭𑌯𑌾 𑌕𑍃𑌤𑍍𑌸𑍍𑌨𑌂 𑌜𑌗𑌦𑍍𑌭𑌾𑌸𑌯𑌂𑌤𑌂,
𑌅𑌚𑌿𑌂𑌤𑍍𑌯𑌦𑌿𑌵𑍍𑌯𑌾𑌦𑍍𑌭𑍁𑌤 𑌨𑌿𑌤𑍍𑌯𑌯𑍌𑌵𑌨 𑌸𑍍𑌵𑌭𑌾𑌵𑌲𑌾𑌵𑌣𑍍𑌯𑌮𑌯𑌾𑌮𑍃𑌤𑌸𑌾𑌗𑌰𑌂, 𑌅𑌤𑌿𑌸𑍌𑌕𑍁𑌮𑌾𑌰𑍍𑌯𑌾𑌦𑌿 𑌈𑌷𑌤𑍍 𑌪𑍍𑌰𑌸𑍍𑌵𑌿𑌨𑍍𑌨𑌵𑌦𑌾𑌲𑌕𑍍𑌷𑍍𑌯𑌮𑌾𑌣 𑌲𑌲𑌾𑌟𑌫𑌲𑌕 𑌦𑌿𑌵𑍍𑌯𑌾𑌲𑌕𑌾𑌵𑌲𑍀𑌵𑌿𑌰𑌾𑌜𑌿𑌤𑌂, 𑌪𑍍𑌰𑌬𑍁𑌦𑍍𑌧𑌮𑍁𑌗𑍍𑌧𑌾𑌂𑌬𑍁𑌜 𑌚𑌾𑌰𑍁𑌲𑍋𑌚𑌨𑌂, 𑌸𑌵𑌿𑌭𑍍𑌰𑌮𑌭𑍍𑌰𑍂𑌲𑌤𑌂, 𑌉𑌜𑍍𑌜𑍍𑌵𑌲𑌾𑌧𑌰𑌂, 𑌶𑍁𑌚𑌿𑌸𑍍𑌮𑌿𑌤𑌂, 𑌕𑍋𑌮𑌲𑌗𑌂𑌡𑌂, 𑌉𑌨𑍍𑌨𑌸𑌂, 𑌉𑌦𑌗𑍍𑌰𑌪𑍀𑌨𑌾𑌂𑌸 𑌵𑌿𑌲𑌂𑌬𑌿𑌕𑍁𑌂𑌡𑌲𑌾𑌲𑌕𑌾𑌵𑌲𑍀 𑌬𑌂𑌧𑍁𑌰 𑌕𑌂𑌬𑍁𑌕𑌂𑌧𑌰𑌂, 𑌪𑍍𑌰𑌿𑌯𑌾𑌵𑌤𑌂‍𑌸𑍋𑌤𑍍𑌪𑌲 𑌕𑌰𑍍𑌣𑌭𑍂𑌷𑌣𑌶𑍍𑌲𑌥𑌾𑌲𑌕𑌾𑌬𑌂𑌧 𑌵𑌿𑌮𑌰𑍍𑌦𑌶𑌂𑌸𑌿𑌭𑌿𑌃 𑌚𑌤𑍁𑌰𑍍𑌭𑌿𑌰𑌾𑌜𑌾𑌨𑍁𑌵𑌿𑌲𑌂𑌬𑌿𑌭𑌿𑌰𑍍𑌭𑍁𑌜𑍈𑌰𑍍𑌵𑌿𑌰𑌾𑌜𑌿𑌤𑌂, 𑌅𑌤𑌿𑌕𑍋𑌮𑌲 𑌦𑌿𑌵𑍍𑌯𑌰𑍇𑌖𑌾𑌲𑌂𑌕𑍃𑌤𑌾𑌤𑌾𑌮𑍍𑌰𑌕𑌰𑌤𑌲𑌂, 𑌦𑌿𑌵𑍍𑌯𑌾𑌂𑌗𑍁𑌳𑍀𑌯𑌕𑌵𑌿𑌰𑌾𑌜𑌿𑌤𑌂, 𑌅𑌤𑌿𑌕𑍋𑌮𑌲 𑌦𑌿𑌵𑍍𑌯𑌨𑌖𑌾𑌵𑌳𑍀𑌵𑌿𑌰𑌾𑌜𑌿𑌤𑌂, 𑌅𑌤𑌿𑌰𑌕𑍍𑌤𑌾𑌂𑌗𑍁𑌲𑍀𑌭𑌿𑌰𑌲𑌂𑌕𑍃𑌤𑌂, 𑌤𑌤𑍍𑌕𑍍𑌷𑌣𑍋𑌨𑍍𑌮𑍀𑌲𑌿𑌤 𑌪𑍁𑌂𑌡𑌰𑍀𑌕 𑌸𑌦𑍃𑌶𑌚𑌰𑌣𑌯𑍁𑌗𑌳𑌂, 𑌅𑌤𑌿𑌮𑌨𑍋𑌹𑌰 𑌕𑌿𑌰𑍀𑌟𑌮𑌕𑍁𑌟 𑌚𑍂𑌡𑌾𑌵𑌤𑌂𑌸 𑌮𑌕𑌰𑌕𑍁𑌂𑌡𑌲 𑌗𑍍𑌰𑍈𑌵𑍇𑌯𑌕 𑌹𑌾𑌰 𑌕𑍇𑌯𑍂𑌰 𑌕𑌟𑌕 𑌶𑍍𑌰𑍀𑌵𑌤𑍍𑌸 𑌕𑍌𑌸𑍍𑌤𑍁𑌭 𑌮𑍁𑌕𑍍𑌤𑌾𑌦𑌾𑌮𑍋𑌦𑌰𑌬𑌂𑌧𑌨 𑌪𑍀𑌤𑌾𑌂𑌬𑌰 𑌕𑌾𑌂𑌚𑍀𑌗𑍁𑌣 𑌨𑍂𑌪𑍁𑌰𑌾𑌦𑌿𑌭𑌿𑌰𑌤𑍍𑌯𑌂𑌤 𑌸𑍁𑌖𑌸𑍍𑌪𑌰𑍍𑌶𑍈𑌃 𑌦𑌿𑌵𑍍𑌯𑌗𑌂𑌧𑍈𑌰𑍍𑌭𑍂𑌷𑌣𑍈𑌰𑍍𑌭𑍂𑌷𑌿𑌤𑌂, 𑌶𑍍𑌰𑍀𑌮𑌤𑍍𑌯𑌾 𑌵𑍈𑌜𑌯𑌂𑌤𑍍𑌯𑌾 𑌵𑌨𑌮𑌾𑌲𑌯𑌾 𑌵𑌿𑌰𑌾𑌜𑌿𑌤𑌂, 𑌶𑌂𑌖𑌚𑌕𑍍𑌰𑌗𑌦𑌾𑌽𑌸𑌿 𑌶𑌾𑌰𑌂𑌗𑌾𑌦𑌿 𑌦𑌿𑌵𑍍𑌯𑌾𑌯𑍁𑌧𑍈𑌃 𑌸𑍇𑌵𑍍𑌯𑌮𑌾𑌨𑌂, 𑌸𑍍𑌵𑌸𑌂𑌕𑌲𑍍𑌪𑌮𑌾𑌤𑍍𑌰𑌾𑌵𑌕𑍍𑌲𑍁𑌪𑍍𑌤 𑌜𑌗𑌜𑍍𑌜𑌨𑍍𑌮𑌸𑍍𑌥𑌿𑌤𑌿𑌧𑍍𑌵𑌂𑌸𑌾𑌦𑌿𑌕𑍇 𑌶𑍍𑌰𑍀𑌮𑌤𑌿 𑌵𑌿𑌷𑍍𑌵𑌕𑍍𑌸𑍇𑌨𑍇 𑌨𑍍𑌯𑌸𑍍𑌤 𑌸𑌮𑌸𑍍𑌤𑌾𑌤𑍍𑌮𑍈𑌶𑍍𑌵𑌰𑍍𑌯𑌂, 𑌵𑍈𑌨𑌤𑍇𑌯𑌾𑌦𑌿𑌭𑌿𑌃 𑌸𑍍𑌵𑌭𑌾𑌵𑌤𑍋 𑌨𑌿𑌰𑌸𑍍𑌤 𑌸𑌮𑌸𑍍𑌤 𑌸𑌾𑌂𑌸𑌾𑌰𑌿𑌕 𑌸𑍍𑌵𑌭𑌾𑌵𑍈𑌃 𑌭𑌗𑌵𑌤𑍍𑌪𑌰𑌿𑌚𑌰𑍍𑌯𑌾𑌕𑌰𑌣 𑌯𑍋𑌗𑍍𑌯𑍈𑌰𑍍𑌭𑌗𑌵𑌤𑍍𑌪𑌰𑌿𑌚𑌰𑍍𑌯𑍈𑌕𑌭𑍋𑌗𑍈-𑌰𑍍𑌨𑌿𑌤𑍍𑌯𑌸𑌿𑌦𑍍𑌧𑍈𑌰𑌨𑌂𑌤𑍈𑌃 𑌯𑌥𑌾 𑌯𑍋𑌗𑌂 𑌸𑍇𑌵𑍍𑌯𑌮𑌾𑌨𑌂, 𑌆𑌤𑍍𑌮𑌭𑍋𑌗𑍇𑌨 𑌅𑌨𑌨𑍁𑌸𑌂𑌹𑌿𑌤𑌪𑌰𑌾𑌦𑌿𑌕𑌾𑌲 𑌦𑌿𑌵𑍍𑌯𑌾𑌮𑌲 𑌕𑍋𑌮𑌲𑌾𑌵𑌲𑍋𑌕𑌨𑍇𑌨 𑌵𑌿𑌶𑍍𑌵𑌮𑌾𑌹𑍍𑌲𑌾𑌦𑌯𑌂𑌤𑌂, 𑌈𑌷𑌦𑍁𑌨𑍍𑌮𑍀𑌲𑌿𑌤 𑌮𑍁𑌖𑌾𑌂𑌬𑍁𑌜𑍋𑌦𑌰𑌵𑌿𑌨𑌿𑌰𑍍𑌗𑌤𑍇𑌨 𑌦𑌿𑌵𑍍𑌯𑌾𑌨𑌨𑌾𑌰𑌵𑌿𑌂𑌦 𑌶𑍋𑌭𑌾𑌜𑌨𑌨𑍇𑌨 𑌦𑌿𑌵𑍍𑌯𑌗𑌾𑌂𑌭𑍀𑌰𑍍𑌯𑍌𑌦𑌾𑌰𑍍𑌯 𑌸𑍌𑌂𑌦𑌰𑍍𑌯 𑌮𑌾𑌧𑍁𑌰𑍍𑌯𑌾𑌦𑍍𑌯𑌨𑌵𑌧𑌿𑌕 𑌗𑍁𑌣𑌗𑌣𑌵𑌿𑌭𑍂𑌷𑌿𑌤𑍇𑌨, 𑌅𑌤𑌿𑌮𑌨𑍋𑌹𑌰 𑌦𑌿𑌵𑍍𑌯𑌭𑌾𑌵𑌗𑌰𑍍𑌭𑍇𑌣 𑌦𑌿𑌵𑍍𑌯𑌲𑍀𑌲𑌾𑌽𑌽𑌲𑌾𑌪𑌾𑌮𑍃𑌤𑍇𑌨 𑌅𑌖𑌿𑌲𑌜𑌨 𑌹𑍃𑌦𑌯𑌾𑌂𑌤𑌰𑌾𑌣𑍍𑌯𑌾𑌪𑍂𑌰𑌯𑌂𑌤𑌂 𑌭𑌗𑌵𑌂𑌤𑌂 𑌨𑌾𑌰𑌾𑌯𑌣𑌂 𑌧𑍍𑌯𑌾𑌨𑌯𑍋𑌗𑍇𑌨 𑌦𑍃𑌷𑍍𑌟𑍍𑌵𑌾, 𑌤𑌤𑍋 𑌭𑌗𑌵𑌤𑍋 𑌨𑌿𑌤𑍍𑌯𑌸𑍍𑌵𑌾𑌮𑍍𑌯𑌮𑌾𑌤𑍍𑌮𑌨𑍋 𑌨𑌿𑌤𑍍𑌯𑌦𑌾𑌸𑍍𑌯𑌂 𑌚 𑌯𑌥𑌾𑌵𑌸𑍍𑌥𑌿𑌤𑌮𑌨𑍁𑌸𑌂𑌧𑌾𑌯, 𑌕𑌦𑌾𑌽𑌹𑌂 𑌭𑌗𑌵𑌂𑌤𑌂 𑌨𑌾𑌰𑌾𑌯𑌣𑌂, 𑌮𑌮 𑌕𑍁𑌲𑌨𑌾𑌥𑌂, 𑌮𑌮 𑌕𑍁𑌲𑌦𑍈𑌵𑌤𑌂, 𑌮𑌮 𑌕𑍁𑌲𑌧𑌨𑌂, 𑌮𑌮 𑌭𑍋𑌗𑍍𑌯𑌂, 𑌮𑌮 𑌮𑌾𑌤𑌰𑌂, 𑌮𑌮 𑌪𑌿𑌤𑌰𑌂, 𑌮𑌮 𑌸𑌰𑍍𑌵𑌂 𑌸𑌾𑌕𑍍𑌷𑌾𑌤𑍍𑌕𑌰𑌵𑌾𑌣𑌿 𑌚𑌕𑍍𑌷𑍁𑌷𑌾 ।
𑌕𑌦𑌾𑌽𑌹𑌂 𑌭𑌗𑌵𑌤𑍍𑌪𑌾𑌦𑌾𑌂𑌬𑍁𑌜𑌦𑍍𑌵𑌯𑌂 𑌶𑌿𑌰𑌸𑌾 𑌸𑌂𑌗𑍍𑌰𑌹𑍀𑌷𑍍𑌯𑌾𑌮𑌿 । 𑌕𑌦𑌾𑌽𑌹𑌂 𑌭𑌗𑌵𑌤𑍍𑌪𑌾𑌦𑌾𑌂𑌬𑍁𑌜𑌦𑍍𑌵𑌯 𑌪𑌰𑌿𑌚𑌰𑍍𑌯𑌾𑌽𑌽𑌶𑌯𑌾 𑌨𑌿𑌰𑌸𑍍𑌤𑌸𑌮𑌸𑍍𑌤𑍇𑌤𑌰 𑌭𑍋𑌗𑌾𑌶𑌃, 𑌅𑌪𑌗𑌤 𑌸𑌮𑌸𑍍𑌤 𑌸𑌾𑌂𑌸𑌾𑌰𑌿𑌕𑌸𑍍𑌵𑌭𑌾𑌵𑌃 𑌤𑌤𑍍𑌪𑌾𑌦𑌾𑌂𑌬𑍁𑌜𑌦𑍍𑌵𑌯𑌂 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 । 𑌕𑌦𑌾𑌽𑌹𑌂 𑌭𑌗𑌵𑌤𑍍𑌪𑌾𑌦𑌾𑌂𑌬𑍁𑌜𑌦𑍍𑌵𑌯 𑌪𑌰𑌿𑌚𑌰𑍍𑌯𑌾𑌕𑌰𑌣𑌯𑍋𑌗𑍍𑌯-𑌸𑍍𑌤𑌦𑍇𑌕𑌭𑍋𑌗𑌸𑍍𑌤𑌤𑍍𑌪𑌾𑌦𑍌 𑌪𑌰𑌿𑌚𑌰𑌿𑌷𑍍𑌯𑌾𑌮𑌿 । 𑌕𑌦𑌾 𑌮𑌾𑌂 𑌭𑌗𑌵𑌾𑌨𑍍 𑌸𑍍𑌵𑌕𑍀𑌯𑌯𑌾 𑌅𑌤𑌿𑌶𑍀𑌤𑌲𑌯𑌾 𑌦𑍃𑌶𑌾 𑌅𑌵𑌲𑍋𑌕𑍍𑌯, 𑌸𑍍𑌨𑌿𑌗𑍍𑌧𑌗𑌂𑌭𑍀𑌰𑌮𑌧𑍁𑌰𑌯𑌾 𑌗𑌿𑌰𑌾 𑌪𑌰𑌿𑌚𑌰𑍍𑌯𑌾𑌯𑌾𑌂 𑌆𑌜𑍍𑌞𑌾𑌪𑌯𑌿𑌷𑍍𑌯𑌤𑌿, 𑌇𑌤𑌿 𑌭𑌗𑌵𑌤𑍍𑌪𑌰𑌿𑌚𑌰𑍍𑌯𑌾𑌯𑌾𑌮𑌾𑌶𑌾𑌂 𑌵𑌰𑍍𑌧𑌯𑌿𑌤𑍍𑌵𑌾 𑌤𑌯𑍈𑌵𑌾𑌽𑌶𑌯𑌾 𑌤𑌤𑍍𑌪𑍍𑌰𑌸𑌾𑌦𑍋𑌪𑌬𑍃𑌂𑌹𑌿𑌤𑌯𑌾 𑌭𑌗𑌵𑌂𑌤𑌮𑍁𑌪𑍇𑌤𑍍𑌯, 𑌦𑍂𑌰𑌾𑌦𑍇𑌵 𑌭𑌗𑌵𑌂𑌤𑌂 𑌶𑍇𑌷𑌭𑍋𑌗𑍇 𑌶𑍍𑌰𑌿𑌯𑌾 𑌸𑌹𑌾𑌸𑍀𑌨𑌂 𑌵𑍈𑌨𑌤𑍇𑌯𑌾𑌦𑌿𑌭𑌿𑌃 𑌸𑍇𑌵𑍍𑌯𑌮𑌾𑌨𑌂, 𑌸𑌮𑌸𑍍𑌤𑌪𑌰𑌿𑌵𑌾𑌰𑌾𑌯 𑌶𑍍𑌰𑍀𑌮𑌤𑍇 𑌨𑌾𑌰𑌾𑌯𑌣𑌾𑌯 𑌨𑌮𑌃, 𑌇𑌤𑌿 𑌪𑍍𑌰𑌣𑌮𑍍𑌯 𑌉𑌤𑍍𑌥𑌾𑌯𑍋𑌤𑍍𑌥𑌾𑌯 𑌪𑍁𑌨𑌃 𑌪𑍁𑌨𑌃 𑌪𑍍𑌰𑌣𑌮𑍍𑌯 𑌅𑌤𑍍𑌯𑌂𑌤 𑌸𑌾𑌧𑍍𑌵𑌸𑌵𑌿𑌨𑌯𑌾𑌵𑌨𑌤𑍋 𑌭𑍂𑌤𑍍𑌵𑌾, 𑌭𑌗𑌵𑌤𑍍𑌪𑌾𑌰𑌿𑌷𑌦𑌗𑌣𑌨𑌾𑌯𑌕𑍈𑌰𑍍𑌦𑍍𑌵𑌾𑌰𑌪𑌾𑌲𑍈𑌃 𑌕𑍃𑌪𑌯𑌾 𑌸𑍍𑌨𑍇𑌹𑌗𑌰𑍍𑌭𑌯𑌾 𑌦𑍃𑌶𑌾𑌽𑌵𑌲𑍋𑌕𑌿𑌤𑌃 𑌸𑌮𑍍𑌯𑌗𑌭𑌿𑌵𑌂𑌦𑌿𑌤𑍈𑌸𑍍𑌤𑍈𑌸𑍍𑌤𑍈𑌰𑍇𑌵𑌾𑌨𑍁𑌮𑌤𑍋 𑌭𑌗𑌵𑌂𑌤𑌮𑍁𑌪𑍇𑌤𑍍𑌯, 𑌶𑍍𑌰𑍀𑌮𑌤𑌾 𑌮𑍂𑌲𑌮𑌂𑌤𑍍𑌰𑍇𑌣 𑌮𑌾𑌮𑍈𑌕𑌾𑌂𑌤𑌿𑌕𑌾𑌤𑍍𑌯𑌂𑌤𑌿𑌕 𑌪𑌰𑌿𑌚𑌰𑍍𑌯𑌾𑌕𑌰𑌣𑌾𑌯 𑌪𑌰𑌿𑌗𑍃𑌹𑍍𑌣𑍀𑌷𑍍𑌵 𑌇𑌤𑌿 𑌯𑌾𑌚𑌮𑌾𑌨𑌃 𑌪𑍍𑌰𑌣𑌮𑍍𑌯𑌾𑌤𑍍𑌮𑌾𑌨𑌂 𑌭𑌗𑌵𑌤𑍇 𑌨𑌿𑌵𑍇𑌦𑌯𑍇𑌤𑍍 ।
𑌤𑌤𑍋 𑌭𑌗𑌵𑌤𑌾 𑌸𑍍𑌵𑌯𑌮𑍇𑌵𑌾𑌤𑍍𑌮𑌸𑌂𑌜𑍀𑌵𑌨𑍇𑌨 𑌅𑌮𑌰𑍍𑌯𑌾𑌦𑌶𑍀𑌲𑌵𑌤𑌾 𑌅𑌤𑌿𑌪𑍍𑌰𑍇𑌮𑌾𑌨𑍍𑌵𑌿𑌤𑍇𑌨 𑌅𑌵𑌲𑍋𑌕𑌨𑍇𑌨𑌾𑌵𑌲𑍋𑌕𑍍𑌯 𑌸𑌰𑍍𑌵𑌦𑍇𑌶 𑌸𑌰𑍍𑌵𑌕𑌾𑌲 𑌸𑌰𑍍𑌵𑌾𑌵𑌸𑍍𑌥𑍋𑌚𑌿𑌤𑌾𑌤𑍍𑌯𑌂𑌤𑌶𑍇𑌷𑌭𑌾𑌵𑌾𑌯 𑌸𑍍𑌵𑍀𑌕𑍃𑌤𑍋𑌽𑌨𑍁𑌜𑍍𑌞𑌾𑌤𑌶𑍍𑌚 𑌅𑌤𑍍𑌯𑌂𑌤𑌸𑌾𑌧𑍍𑌵𑌸𑌵𑌿𑌨𑌯𑌾𑌵𑌨𑌤𑌃 𑌕𑌿𑌂𑌕𑍁𑌰𑍍𑌵𑌾𑌣𑌃 𑌕𑍃𑌤𑌾𑌂𑌜𑌲𑌿𑌪𑍁𑌟𑍋 𑌭𑌗𑌵𑌂𑌤𑌮𑍁𑌪𑌾𑌸𑍀𑌤 । 𑌤𑌤𑌶𑍍𑌚𑌾𑌨𑍁𑌭𑍂𑌯𑌮𑌾𑌨 𑌭𑌾𑌵𑌵𑌿𑌶𑍇𑌷𑌃 𑌨𑌿𑌰𑌤𑌿𑌶𑌯𑌪𑍍𑌰𑍀𑌤𑍍𑌯𑌾𑌽𑌨𑍍𑌯𑌤𑍍𑌕𑌿𑌂𑌚𑌿𑌤𑍍𑌕𑌰𑍍𑌤𑍁𑌂 𑌦𑍍𑌰𑌷𑍍𑌟𑍁𑌂 𑌸𑍍𑌮𑌰𑍍𑌤𑍁𑌮𑌶𑌕𑍍𑌤𑌃 𑌪𑍁𑌨𑌰𑌪𑌿 𑌶𑍇𑌷𑌭𑌾𑌵𑌮𑍇𑌵 𑌯𑌾𑌚𑌮𑌾𑌨𑍋 𑌭𑌗𑌵𑌂𑌤𑌮𑍇𑌵𑌾𑌵𑌿𑌚𑍍𑌛𑌿𑌨𑍍𑌨𑌸𑍍𑌰𑍋𑌤𑍋𑌰𑍂𑌪𑍇𑌣𑌾𑌵𑌲𑍋𑌕𑌨𑍇𑌨 𑌅𑌵𑌲𑍋𑌕𑌯𑌨𑍍𑌨𑌾𑌸𑍀𑌤 । 𑌤𑌤𑍋 𑌭𑌗𑌵𑌤𑌾 𑌸𑍍𑌵𑌯𑌮𑍇𑌵𑌾𑌤𑍍𑌮𑌸𑌂𑌜𑍀𑌵𑌨𑍇𑌨𑌾𑌵𑌲𑍋𑌕𑌨𑍇𑌨𑌾𑌵𑌲𑍋𑌕𑍍𑌯 𑌸𑌸𑍍𑌮𑌿𑌤𑌮𑌾𑌹𑍂𑌯 𑌸𑌮𑌸𑍍𑌤𑌕𑍍𑌲𑍇𑌶𑌾𑌪𑌹𑌂 𑌨𑌿𑌰𑌤𑌿𑌶𑌯𑌸𑍁𑌖𑌾𑌵𑌹𑌮𑌾𑌤𑍍𑌮𑍀𑌯𑌂, 𑌶𑍍𑌰𑍀𑌮𑌤𑍍𑌪𑌾𑌦𑌾𑌰𑌵𑌿𑌂𑌦𑌯𑍁𑌗𑌳𑌂 𑌶𑌿𑌰𑌸𑌿 𑌕𑍃𑌤𑌂 𑌧𑍍𑌯𑌾𑌤𑍍𑌵𑌾, 𑌅𑌮𑍃𑌤𑌸𑌾𑌗𑌰𑌾𑌂𑌤𑌰𑍍𑌨𑌿𑌮𑌗𑍍𑌨𑌸𑌰𑍍𑌵𑌾𑌵𑌯𑌵𑌃 𑌸𑍁𑌖𑌮𑌾𑌸𑍀𑌤 ।

𑌲𑌕𑍍𑌷𑍍𑌮𑍀𑌪𑌤𑍇𑌰𑍍𑌯𑌤𑌿𑌪𑌤𑍇𑌶𑍍𑌚 𑌦𑌯𑍈𑌕𑌧𑌾𑌮𑍍𑌨𑍋𑌃
𑌯𑍋𑌽𑌸𑍌 𑌪𑍁𑌰𑌾 𑌸𑌮𑌜𑌨𑌿𑌷𑍍𑌟 𑌜𑌗𑌦𑍍𑌧𑌿𑌤𑌾𑌰𑍍𑌥𑌮𑍍 ।
𑌪𑍍𑌰𑌾𑌪𑍍𑌯𑌂 𑌪𑍍𑌰𑌕𑌾𑌶𑌯𑌤𑍁 𑌨𑌃 𑌪𑌰𑌮𑌂 𑌰𑌹𑌸𑍍𑌯𑌂
𑌸𑌂𑌵𑌾𑌦 𑌏𑌷 𑌶𑌰𑌣𑌾𑌗𑌤𑌿 𑌮𑌂𑌤𑍍𑌰𑌸𑌾𑌰𑌃 ॥

𑌇𑌤𑌿 𑌶𑍍𑌰𑍀𑌭𑌗𑌵𑌦𑍍𑌰𑌾𑌮𑌾𑌨𑍁𑌜𑌵𑌿𑌰𑌚𑌿𑌤𑍇 𑌶𑍍𑌰𑍀𑌵𑍈𑌕𑍁𑌂𑌠𑌗𑌦𑍍𑌯𑌮𑍍 ।