𑌶𑍍𑌰𑍀 𑌸𑍁𑌬𑍍𑌰𑌹𑍍𑌮𑌣𑍍𑌯 𑌹𑍃𑌦𑌯 𑌸𑍍𑌤𑍋𑌤𑍍𑌰𑌮𑍍

𑌅𑌸𑍍𑌯 𑌶𑍍𑌰𑍀𑌸𑍁𑌬𑍍𑌰𑌹𑍍𑌮𑌣𑍍𑌯𑌹𑍃𑌦𑌯𑌸𑍍𑌤𑍋𑌤𑍍𑌰𑌮𑌹𑌾𑌮𑌂𑌤𑍍𑌰𑌸𑍍𑌯, 𑌅𑌗𑌸𑍍𑌤𑍍𑌯𑍋 𑌭𑌗𑌵𑌾𑌨𑍍 𑌋𑌷𑌿𑌃, 𑌅𑌨𑍁𑌷𑍍𑌟𑍁𑌪𑍍𑌛𑌂𑌦𑌃, 𑌶𑍍𑌰𑍀𑌸𑍁𑌬𑍍𑌰𑌹𑍍𑌮𑌣𑍍𑌯𑍋 𑌦𑍇𑌵𑌤𑌾, 𑌸𑍌𑌂 𑌬𑍀𑌜𑌂, 𑌸𑍍𑌵𑌾𑌹𑌾 𑌶𑌕𑍍𑌤𑌿𑌃, 𑌶𑍍𑌰𑍀𑌂 𑌕𑍀𑌲𑌕𑌂, 𑌶𑍍𑌰𑍀𑌸𑍁𑌬𑍍𑌰𑌹𑍍𑌮𑌣𑍍𑌯 𑌪𑍍𑌰𑌸𑌾𑌦𑌸𑌿𑌦𑍍𑌧𑍍𑌯𑌰𑍍𑌥𑍇 𑌜𑌪𑍇 𑌵𑌿𑌨𑌿𑌯𑍋𑌗𑌃 ॥

𑌕𑌰𑌨𑍍𑌯𑌾𑌸𑌃 –
𑌸𑍁𑌬𑍍𑌰𑌹𑍍𑌮𑌣𑍍𑌯𑌾𑌯 𑌅𑌂𑌗𑍁𑌷𑍍𑌠𑌾𑌭𑍍𑌯𑌾𑌂 𑌨𑌮𑌃 ।
𑌷𑌣𑍍𑌮𑍁𑌖𑌾𑌯 𑌤𑌰𑍍𑌜𑌨𑍀𑌭𑍍𑌯𑌾𑌂 𑌨𑌮𑌃 ।
𑌶𑌕𑍍𑌤𑌿𑌧𑌰𑌾𑌯 𑌮𑌧𑍍𑌯𑌮𑌾𑌭𑍍𑌯𑌾𑌂 𑌨𑌮𑌃 ।
𑌷𑌟𑍍𑌕𑍋𑌣𑌸𑌂𑌸𑍍𑌥𑌿𑌤𑌾𑌯 𑌅𑌨𑌾𑌮𑌿𑌕𑌾𑌭𑍍𑌯𑌾𑌂 𑌨𑌮𑌃 ।
𑌸𑌰𑍍𑌵𑌤𑍋𑌮𑍁𑌖𑌾𑌯 𑌕𑌨𑌿𑌷𑍍𑌠𑌿𑌕𑌾𑌭𑍍𑌯𑌾𑌂 𑌨𑌮𑌃 ।
𑌤𑌾𑌰𑌕𑌾𑌂𑌤𑌕𑌾𑌯 𑌕𑌰𑌤𑌲𑌕𑌰𑌪𑍃𑌷𑍍𑌠𑌾𑌭𑍍𑌯𑌾𑌂 𑌨𑌮𑌃 ॥
𑌹𑍃𑌦𑌯𑌾𑌦𑌿 𑌨𑍍𑌯𑌾𑌸𑌃 –
𑌸𑍁𑌬𑍍𑌰𑌹𑍍𑌮𑌣𑍍𑌯𑌾𑌯 𑌹𑍃𑌦𑌯𑌾𑌯 𑌨𑌮𑌃 ।
𑌷𑌣𑍍𑌮𑍁𑌖𑌾𑌯 𑌶𑌿𑌰𑌸𑍇 𑌸𑍍𑌵𑌾𑌹𑌾 ।
𑌶𑌕𑍍𑌤𑌿𑌧𑌰𑌾𑌯 𑌶𑌿𑌖𑌾𑌯𑍈 𑌵𑌷𑌟𑍍 ।
𑌷𑌟𑍍𑌕𑍋𑌣𑌸𑌂𑌸𑍍𑌥𑌿𑌤𑌾𑌯 𑌕𑌵𑌚𑌾𑌯 𑌹𑍁𑌮𑍍 ।
𑌸𑌰𑍍𑌵𑌤𑍋𑌮𑍁𑌖𑌾𑌯 𑌨𑍇𑌤𑍍𑌰𑌤𑍍𑌰𑌯𑌾𑌯 𑌵𑍌𑌷𑌟𑍍 ।
𑌤𑌾𑌰𑌕𑌾𑌂𑌤𑌕𑌾𑌯 𑌅𑌸𑍍𑌤𑍍𑌰𑌾𑌯 𑌫𑌟𑍍 ।
𑌭𑍂𑌰𑍍𑌭𑍁𑌵𑌸𑍍𑌸𑍁𑌵𑌰𑍋𑌮𑌿𑌤𑌿 𑌦𑌿𑌗𑍍𑌬𑌂𑌧𑌃 ॥

𑌧𑍍𑌯𑌾𑌨𑌮𑍍 ।
𑌷𑌡𑍍𑌵𑌕𑍍𑌤𑍍𑌰𑌂 𑌶𑌿𑌖𑌿𑌵𑌾𑌹𑌨𑌂 𑌤𑍍𑌰𑌿𑌨𑌯𑌨𑌂 𑌚𑌿𑌤𑍍𑌰𑌾𑌂𑌬𑌰𑌾𑌲𑌂𑌕𑍃𑌤𑌂
𑌵𑌜𑍍𑌰𑌂 𑌶𑌕𑍍𑌤𑌿𑌮𑌸𑌿𑌂 𑌤𑍍𑌰𑌿𑌶𑍂𑌲𑌮𑌭𑌯𑌂 𑌖𑍇𑌟𑌂 𑌧𑌨𑍁𑌶𑍍𑌚𑌕𑍍𑌰𑌕𑌮𑍍 ।
𑌪𑌾𑌶𑌂 𑌕𑍁𑌕𑍍𑌕𑍁𑌟𑌮𑌂𑌕𑍁𑌶𑌂 𑌚 𑌵𑌰𑌦𑌂 𑌦𑍋𑌰𑍍𑌭𑌿𑌰𑍍𑌦𑌧𑌾𑌨𑌂 𑌸𑌦𑌾
𑌧𑍍𑌯𑌾𑌯𑌾𑌮𑍀𑌪𑍍𑌸𑌿𑌤 𑌸𑌿𑌦𑍍𑌧𑌿𑌦𑌂 𑌶𑌿𑌵𑌸𑍁𑌤𑌂 𑌶𑍍𑌰𑍀𑌦𑍍𑌵𑌾𑌦𑌶𑌾𑌕𑍍𑌷𑌂 𑌗𑍁𑌹𑌮𑍍 ॥

𑌲𑌮𑌿𑌤𑍍𑌯𑌾𑌦𑌿 𑌪𑌂𑌚𑌪𑍂𑌜𑌾𑌂 𑌕𑍁𑌰𑍍𑌯𑌾𑌤𑍍 ।

𑌪𑍀𑌠𑌿𑌕𑌾 ।
𑌸𑌤𑍍𑌯𑌲𑍋𑌕𑍇 𑌸𑌦𑌾𑌨𑌂𑌦𑍇 𑌮𑍁𑌨𑌿𑌭𑌿𑌃 𑌪𑌰𑌿𑌵𑍇𑌷𑍍𑌟𑌿𑌤𑌮𑍍 ।
𑌪𑌪𑍍𑌰𑌚𑍍𑌛𑍁𑌰𑍍𑌮𑍁𑌨𑌯𑌃 𑌸𑌰𑍍𑌵𑍇 𑌬𑍍𑌰𑌹𑍍𑌮𑌾𑌣𑌂 𑌜𑌗𑌤𑌾𑌂 𑌗𑍁𑌰𑍁𑌮𑍍 ॥ 1 ॥

𑌭𑌗𑌵𑌨𑍍 𑌸𑌰𑍍𑌵𑌲𑍋𑌕𑍇𑌶 𑌸𑌰𑍍𑌵𑌜𑍍𑌞 𑌕𑌮𑌲𑌾𑌸𑌨 ।
𑌸𑌦𑌾𑌨𑌂𑌦 𑌜𑍍𑌞𑌾𑌨𑌮𑍂𑌰𑍍𑌤𑍇 𑌸𑌰𑍍𑌵𑌭𑍂𑌤𑌹𑌿𑌤𑍇 𑌰𑌤 ॥ 2 ॥

𑌬𑌹𑍁𑌧𑌾 𑌪𑍍𑌰𑍋𑌕𑍍𑌤𑌮𑍇𑌤𑌸𑍍𑌯 𑌗𑍁𑌹𑌸𑍍𑌯 𑌚𑌰𑌿𑌤𑌂 𑌮𑌹𑌤𑍍 ।
𑌹𑍃𑌦𑌯𑌂 𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌃 𑌤𑌸𑍍𑌯𑍈𑌵 𑌕𑍍𑌰𑍌𑌂𑌚𑌭𑍇𑌦𑌿𑌨𑌃 ॥ 3 ॥

𑌬𑍍𑌰𑌹𑍍𑌮𑍋𑌵𑌾𑌚 ।
𑌶𑍃𑌣𑍍𑌵𑌂𑌤𑍁 𑌮𑍁𑌨𑌯𑌃 𑌸𑌰𑍍𑌵𑍇 𑌗𑍁𑌹𑍍𑌯𑌾𑌦𑍍𑌗𑍁𑌹𑍍𑌯𑌤𑌰𑌂 𑌮𑌹𑌤𑍍 ।
𑌸𑍁𑌬𑍍𑌰𑌹𑍍𑌮𑌣𑍍𑌯𑌸𑍍𑌯 𑌹𑍃𑌦𑌯𑌂 𑌸𑌰𑍍𑌵𑌭𑍂𑌤𑌹𑌿𑌤𑍋𑌦𑌯𑌮𑍍 ॥ 4 ॥

𑌸𑌰𑍍𑌵𑌾𑌰𑍍𑌥𑌸𑌿𑌦𑍍𑌧𑌿𑌦𑌂 𑌪𑍁𑌣𑍍𑌯𑌂 𑌸𑌰𑍍𑌵𑌕𑌾𑌰𑍍𑌯𑍈𑌕 𑌸𑌾𑌧𑌨𑌮𑍍 ।
𑌧𑌰𑍍𑌮𑌾𑌰𑍍𑌥𑌕𑌾𑌮𑌦𑌂 𑌗𑍁𑌹𑍍𑌯𑌂 𑌧𑌨𑌧𑌾𑌨𑍍𑌯𑌪𑍍𑌰𑌵𑌰𑍍𑌧𑌨𑌮𑍍 ॥ 5 ॥

𑌰𑌹𑌸𑍍𑌯𑌮𑍇𑌤𑌦𑍍𑌦𑍇𑌵𑌾𑌨𑌾𑌂 𑌅𑌦𑍇𑌯𑌂 𑌯𑌸𑍍𑌯 𑌕𑌸𑍍𑌯𑌚𑌿𑌤𑍍 ।
𑌸𑌰𑍍𑌵𑌮𑌿𑌤𑍍𑌰𑌕𑌰𑌂 𑌗𑍋𑌪𑍍𑌯𑌂 𑌤𑍇𑌜𑍋𑌬𑌲𑌸𑌮𑌨𑍍𑌵𑌿𑌤𑌮𑍍 ॥ 6 ॥

𑌪𑍍𑌰𑌵𑌕𑍍𑌷𑍍𑌯𑌾𑌮𑌿 𑌹𑌿𑌤𑌾𑌰𑍍𑌥𑌂 𑌵𑌃 𑌪𑌰𑌿𑌤𑍁𑌷𑍍𑌟𑍇𑌨 𑌚𑍇𑌤𑌸𑌾 ।
𑌹𑍃𑌤𑍍𑌪𑌦𑍍𑌮𑌕𑌰𑍍𑌣𑌿𑌕𑌾𑌮𑌧𑍍𑌯𑍇 𑌧𑍍𑌯𑌾𑌯𑍇𑌤𑍍𑌸𑌰𑍍𑌵𑌮𑌨𑍋𑌹𑌰𑌮𑍍 ॥ 𑍭 ॥

𑌅𑌥 𑌹𑍃𑌦𑌯𑌮𑍍 ।
𑌸𑍁𑌵𑌰𑍍𑌣𑌮𑌂𑌡𑌪𑌂 𑌦𑌿𑌵𑍍𑌯𑌂 𑌰𑌤𑍍𑌨𑌤𑍋𑌰𑌣𑌰𑌾𑌜𑌿𑌤𑌮𑍍 ।
𑌰𑌤𑍍𑌨𑌸𑍍𑌤𑌂𑌭𑌸𑌹𑌸𑍍𑌰𑍈𑌶𑍍𑌚 𑌶𑍋𑌭𑌿𑌤𑌂 𑌪𑌰𑌮𑌾𑌦𑍍𑌭𑍁𑌤𑌮𑍍 ॥ 𑍮 ॥

𑌪𑌰𑌮𑌾𑌨𑌂𑌦𑌨𑌿𑌲𑌯𑌂 𑌭𑌾𑌸𑍍𑌵𑌤𑍍𑌸𑍂𑌰𑍍𑌯𑌸𑌮𑌪𑍍𑌰𑌭𑌮𑍍 ।
𑌦𑍇𑌵𑌦𑌾𑌨𑌵𑌗𑌂𑌧𑌰𑍍𑌵𑌗𑌰𑍁𑌡𑍈𑌰𑍍𑌯𑌕𑍍𑌷𑌕𑌿𑌨𑍍𑌨𑌰𑍈𑌃 । ॥ 𑍯 ॥

𑌸𑍇𑌵𑌾𑌰𑍍𑌥𑌮𑌾𑌗𑌤𑍈𑌃 𑌸𑌿𑌦𑍍𑌧𑍈𑌃 𑌸𑌾𑌧𑍍𑌯𑍈𑌰𑌧𑍍𑌯𑍁𑌷𑌿𑌤𑌂 𑌸𑌦𑌾 ।
𑌮𑌹𑌾𑌯𑍋𑌗𑍀𑌂𑌦𑍍𑌰𑌸𑌂𑌸𑍇𑌵𑍍𑌯𑌂 𑌮𑌂𑌦𑌾𑌰𑌤𑌰𑍁𑌮𑌂𑌡𑌿𑌤𑌮𑍍 ॥ 10 ॥

𑌮𑌣𑌿𑌵𑌿𑌦𑍍𑌰𑍁𑌮𑌵𑍇𑌦𑍀𑌭𑌿𑌰𑍍𑌮𑌹𑌤𑍀𑌭𑌿𑌰𑍁𑌦𑌂𑌚𑌿𑌤𑌮𑍍 ।
𑌤𑌨𑍍𑌮𑌧𑍍𑌯𑍇𑌽𑌨𑌂𑌤𑌰𑌤𑍍𑌨 𑌶𑍍𑌰𑍀𑌚𑍍𑌛𑌟𑌾𑌮𑌂𑌡𑌲𑌶𑍋𑌭𑌿𑌤𑌮𑍍 ॥ 11 ॥

𑌰𑌤𑍍𑌨𑌸𑌿𑌂𑌹𑌾𑌸𑌨𑌂 𑌦𑌿𑌵𑍍𑌯𑌂 𑌰𑌵𑌿𑌕𑍋𑌟𑌿𑌸𑌮𑌪𑍍𑌰𑌭𑌮𑍍 ।
𑌸𑌰𑍍𑌵𑌾𑌶𑍍𑌚𑌰𑍍𑌯𑌮𑌯𑌂 𑌪𑍁𑌣𑍍𑌯𑌂 𑌸𑌰𑍍𑌵𑌤𑌃 𑌸𑍁𑌪𑌰𑌿𑌷𑍍𑌕𑍃𑌤𑌮𑍍 ॥ 12 ॥

𑌤𑌨𑍍𑌮𑌧𑍍𑌯𑍇𑌽𑌷𑍍𑌟𑌦𑌲𑌂 𑌪𑌦𑍍𑌮𑌂 𑌉𑌦𑍍𑌯𑌦𑌰𑍍𑌕𑌪𑍍𑌰𑌭𑍋𑌦𑌯𑌮𑍍 ।
𑌨𑌿𑌗𑌮𑌾𑌗𑌮𑌰𑍋𑌲𑌂𑌬𑌲𑌂𑌬𑌿𑌤𑌂 𑌚𑌿𑌨𑍍𑌮𑌯𑍋𑌦𑌯𑌮𑍍 ॥ 13 ॥

𑌦𑌿𑌵𑍍𑌯𑌂 𑌤𑍇𑌜𑍋𑌮𑌯𑌂 𑌦𑌿𑌵𑍍𑌯𑌂 𑌦𑍇𑌵𑌤𑌾𑌭𑌿𑌰𑍍𑌨𑌮𑌸𑍍𑌕𑍃𑌤𑌮𑍍 ।
𑌦𑍇𑌦𑍀𑌪𑍍𑌯𑌮𑌾𑌨𑌂 𑌰𑍁𑌚𑌿𑌭𑌿𑌰𑍍𑌵𑌿𑌶𑌾𑌲𑌂 𑌸𑍁𑌮𑌨𑍋𑌹𑌰𑌮𑍍 ॥ 14 ॥

𑌤𑌨𑍍𑌮𑌧𑍍𑌯𑍇 𑌸𑌰𑍍𑌵𑌲𑍋𑌕𑍇𑌶𑌂 𑌧𑍍𑌯𑌾𑌯𑍇𑌤𑍍𑌸𑌰𑍍𑌵𑌾𑌂𑌗𑌸𑍁𑌂𑌦𑌰𑌮𑍍 ।
𑌅𑌨𑌂𑌤𑌾𑌦𑌿𑌤𑍍𑌯𑌸𑌂𑌕𑌾𑌶𑌂 𑌆𑌶𑍍𑌰𑌿𑌤𑌾𑌭𑍀𑌷𑍍𑌟𑌦𑌾𑌯𑌕𑌮𑍍 ॥ 15 ॥

𑌅𑌚𑌿𑌂𑌤𑍍𑌯𑌜𑍍𑌞𑌾𑌨𑌵𑌿𑌜𑍍𑌞𑌾𑌨𑌤𑍇𑌜𑍋𑌬𑌲𑌸𑌮𑌨𑍍𑌵𑌿𑌤𑌮𑍍 ।
𑌸𑌰𑍍𑌵𑌾𑌯𑍁𑌧𑌧𑌰𑌂 𑌦𑌿𑌵𑍍𑌯𑌂 𑌸𑌰𑍍𑌵𑌾𑌶𑍍𑌚𑌰𑍍𑌯𑌮𑌯𑌂 𑌗𑍁𑌹𑌮𑍍 ॥ 16 ॥

𑌮𑌹𑌾𑌰𑍍𑌹 𑌰𑌤𑍍𑌨𑌖𑌚𑌿𑌤 𑌷𑌟𑍍𑌕𑌿𑌰𑍀𑌟𑌵𑌿𑌰𑌾𑌜𑌿𑌤𑌮𑍍 ।
𑌶𑌶𑌾𑌂𑌕𑌾𑌰𑍍𑌧𑌕𑌲𑌾𑌰𑌮𑍍𑌯 𑌸𑌮𑍁𑌦𑍍𑌯𑌨𑍍𑌮𑍌𑌳𑌿𑌭𑍂𑌷𑌣𑌮𑍍 ॥ 1𑍭 ॥

𑌮𑌦𑌨𑍋𑌜𑍍𑌜𑍍𑌵𑌲𑌕𑍋𑌦𑌂𑌡𑌮𑌂𑌗𑌳𑌭𑍍𑌰𑍂𑌵𑌿𑌰𑌾𑌜𑌿𑌤𑌮𑍍 ।
𑌵𑌿𑌸𑍍𑌤𑍀𑌰𑍍𑌣𑌾𑌰𑍁𑌣𑌪𑌦𑍍𑌮𑌶𑍍𑌰𑍀 𑌵𑌿𑌲𑌸𑌦𑍍𑌦𑍍𑌵𑌾𑌦𑌶𑍇𑌕𑍍𑌷𑌣𑌮𑍍 ॥ 1𑍮 ॥

𑌚𑌾𑌰𑍁𑌶𑍍𑌰𑍀𑌵𑌰𑍍𑌣𑌸𑌂𑌪𑍂𑌰𑍍𑌣𑌮𑍁𑌖𑌶𑍋𑌭𑌾𑌵𑌿𑌭𑌾𑌸𑍁𑌰𑌮𑍍 ।
𑌮𑌣𑌿𑌪𑍍𑌰𑌭𑌾𑌸𑌮𑌗𑍍𑌰𑌶𑍍𑌰𑍀𑌸𑍍𑌫𑍁𑌰𑌨𑍍𑌮𑌕𑌰𑌕𑍁𑌂𑌡𑌲𑌮𑍍 ॥ 1𑍯 ॥

𑌲𑌸𑌦𑍍𑌦𑌰𑍍𑌪𑌣𑌦𑌰𑍍𑌪𑌾𑌢𑍍𑌯 𑌗𑌂𑌡𑌸𑍍𑌥𑌲𑌵𑌿𑌰𑌾𑌜𑌿𑌤𑌮𑍍 ।
𑌦𑌿𑌵𑍍𑌯𑌕𑌾𑌂𑌚𑌨𑌪𑍁𑌷𑍍𑌪𑌶𑍍𑌰𑍀𑌨𑌾𑌸𑌾𑌪𑍁𑌟𑌵𑌿𑌰𑌾𑌜𑌿𑌤𑌮𑍍 ॥ 20 ॥

𑌮𑌂𑌦𑌹𑌾𑌸𑌪𑍍𑌰𑌭𑌾𑌜𑌾𑌲𑌮𑌧𑍁𑌰𑌾𑌧𑌰 𑌶𑍋𑌭𑌿𑌤𑌮𑍍 ।
𑌸𑌰𑍍𑌵𑌲𑌕𑍍𑌷𑌣𑌲𑌕𑍍𑌷𑍍𑌮𑍀𑌭𑍃𑌤𑍍𑌕𑌂𑌬𑍁𑌕𑌂𑌧𑌰 𑌸𑍁𑌂𑌦𑌰𑌮𑍍 ॥ 21 ॥

𑌮𑌹𑌾𑌨𑌰𑍍𑌘𑌮𑌹𑌾𑌰𑌤𑍍𑌨𑌦𑌿𑌵𑍍𑌯𑌹𑌾𑌰𑌵𑌿𑌰𑌾𑌜𑌿𑌤𑌮𑍍 ।
𑌸𑌮𑌗𑍍𑌰𑌨𑌾𑌗𑌕𑍇𑌯𑍂𑌰𑌸𑌨𑍍𑌨𑌦𑍍𑌧𑌭𑍁𑌜𑌮𑌂𑌡𑌲𑌮𑍍 ॥ 22 ॥

𑌰𑌤𑍍𑌨𑌕𑌂𑌕𑌣𑌸𑌂𑌭𑌾𑌸𑍍𑌵𑌤𑍍𑌕𑌰𑌾𑌗𑍍𑌰 𑌶𑍍𑌰𑍀𑌮𑌹𑍋𑌜𑍍𑌜𑍍𑌵𑌲𑌮𑍍 ।
𑌮𑌹𑌾𑌮𑌣𑌿𑌕𑌵𑌾𑌟𑌾𑌭𑌵𑌕𑍍𑌷𑌃𑌸𑍍𑌥𑌲𑌵𑌿𑌰𑌾𑌜𑌿𑌤𑌮𑍍 ॥ 23 ॥

𑌅𑌤𑌿𑌗𑌾𑌂𑌭𑍀𑌰𑍍𑌯𑌸𑌂𑌭𑌾𑌵𑍍𑌯𑌨𑌾𑌭𑍀𑌨𑌵𑌸𑌰𑍋𑌰𑍁𑌹𑌮𑍍 ।
𑌰𑌤𑍍𑌨𑌶𑍍𑌰𑍀𑌕𑌲𑌿𑌤𑌾𑌬𑌦𑍍𑌧𑌲𑌸𑌨𑍍𑌮𑌧𑍍𑌯𑌪𑍍𑌰𑌦𑍇𑌶𑌕𑌮𑍍 ॥ 24 ॥

𑌸𑍍𑌫𑍁𑌰𑌤𑍍𑌕𑌨𑌕𑌸𑌂𑌵𑍀𑌤𑌪𑍀𑌤𑌾𑌂𑌬𑌰𑌸𑌮𑌾𑌵𑍃𑌤𑌮𑍍 ।
𑌶𑍃𑌂𑌗𑌾𑌰𑌰𑌸𑌸𑌂𑌪𑍂𑌰𑍍𑌣 𑌰𑌤𑍍𑌨𑌸𑍍𑌤𑌂𑌭𑍋𑌪𑌮𑍋𑌰𑍁𑌕𑌮𑍍 ॥ 25 ॥

𑌸𑍍𑌵𑌰𑍍𑌣𑌕𑌾𑌹𑌲𑌰𑍋𑌚𑌿𑌷𑍍𑌣𑍁 𑌜𑌂𑌘𑌾𑌯𑍁𑌗𑌳𑌮𑌂𑌡𑌲𑌮𑍍 ।
𑌰𑌤𑍍𑌨𑌮𑌂𑌜𑍀𑌰𑌸𑌨𑍍𑌨𑌦𑍍𑌧 𑌰𑌮𑌣𑍀𑌯 𑌪𑌦𑌾𑌂𑌬𑍁𑌜𑌮𑍍 ॥ 26 ॥

𑌭𑌕𑍍𑌤𑌾𑌭𑍀𑌷𑍍𑌟𑌪𑍍𑌰𑌦𑌂 𑌦𑍇𑌵𑌂 𑌬𑍍𑌰𑌹𑍍𑌮𑌵𑌿𑌷𑍍𑌣𑍍𑌵𑌾𑌦𑌿𑌸𑌂𑌸𑍍𑌤𑍁𑌤𑌮𑍍 ।
𑌕𑌟𑌾𑌕𑍍𑌷𑍈𑌃 𑌕𑌰𑍁𑌣𑌾𑌦𑌕𑍍𑌷𑍈𑌸𑍍𑌤𑍋𑌷𑌯𑌂𑌤𑌂 𑌜𑌗𑌤𑍍𑌪𑌤𑌿𑌮𑍍 ॥ 2𑍭 ॥

𑌚𑌿𑌦𑌾𑌨𑌂𑌦𑌜𑍍𑌞𑌾𑌨𑌮𑍂𑌰𑍍𑌤𑌿𑌂 𑌸𑌰𑍍𑌵𑌲𑍋𑌕𑌪𑍍𑌰𑌿𑌯𑌂𑌕𑌰𑌮𑍍 ।
𑌶𑌂𑌕𑌰𑌸𑍍𑌯𑌾𑌤𑍍𑌮𑌜𑌂 𑌦𑍇𑌵𑌂 𑌧𑍍𑌯𑌾𑌯𑍇𑌚𑍍𑌛𑌰𑌵𑌣𑍋𑌦𑍍𑌭𑌵𑌮𑍍 ॥ 2𑍮 ॥

𑌅𑌨𑌂𑌤𑌾𑌦𑌿𑌤𑍍𑌯𑌚𑌂𑌦𑍍𑌰𑌾𑌗𑍍𑌨𑌿 𑌤𑍇𑌜𑌃 𑌸𑌂𑌪𑍂𑌰𑍍𑌣𑌵𑌿𑌗𑍍𑌰𑌹𑌮𑍍 ।
𑌸𑌰𑍍𑌵𑌲𑍋𑌕𑍈𑌕𑌵𑌰𑌦𑌂 𑌸𑌰𑍍𑌵𑌵𑌿𑌦𑍍𑌯𑌾𑌰𑍍𑌥𑌤𑌤𑍍𑌤𑍍𑌵𑌕𑌮𑍍 ॥ 2𑍯 ॥

𑌸𑌰𑍍𑌵𑍇𑌶𑍍𑌵𑌰𑌂 𑌸𑌰𑍍𑌵𑌵𑌿𑌭𑍁𑌂 𑌸𑌰𑍍𑌵𑌭𑍂𑌤𑌹𑌿𑌤𑍇 𑌰𑌤𑌮𑍍 ।
𑌏𑌵𑌂 𑌧𑍍𑌯𑌾𑌤𑍍𑌵𑌾 𑌤𑍁 𑌹𑍃𑌦𑌯𑌂 𑌷𑌣𑍍𑌮𑍁𑌖𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 30 ॥

𑌸𑌰𑍍𑌵𑌾𑌨𑍍𑌕𑌾𑌮𑌾𑌨𑌵𑌾𑌪𑍍𑌨𑍋𑌤𑌿 𑌸𑌮𑍍𑌯𑌕𑍍 𑌜𑍍𑌞𑌾𑌨𑌂 𑌚 𑌵𑌿𑌂𑌦𑌤𑌿 ।
𑌶𑍁𑌚𑍌 𑌦𑍇𑌶𑍇 𑌸𑌮𑌾𑌸𑍀𑌨𑌃 𑌶𑍁𑌦𑍍𑌧𑌾𑌤𑍍𑌮𑌾 𑌚𑌰𑌿𑌤𑌾𑌹𑍍𑌨𑌿𑌕𑌃 ॥ 31 ॥

𑌪𑍍𑌰𑌾𑌙𑍍𑌮𑍁𑌖𑍋 𑌯𑌤𑌚𑌿𑌤𑍍𑌤𑌶𑍍𑌚 𑌜𑌪𑍇𑌦𑍍𑌧𑍃𑌦𑌯𑌮𑍁𑌤𑍍𑌤𑌮𑌮𑍍 ।
𑌸𑌕𑍃𑌦𑍇𑌵 𑌮𑌨𑍁𑌂 𑌜𑌪𑍍𑌤𑍍𑌵𑌾 𑌸𑌂𑌪𑍍𑌰𑌾𑌪𑍍𑌨𑍋𑌤𑍍𑌯𑌖𑌿𑌲𑌂 𑌶𑍁𑌭𑌮𑍍 ॥ 32 ॥

𑌇𑌦𑌂 𑌸𑌰𑍍𑌵𑌾𑌘𑌹𑌰𑌣𑌂 𑌮𑍃𑌤𑍍𑌯𑍁𑌦𑌾𑌰𑌿𑌦𑍍𑌰𑍍𑌯𑌨𑌾𑌶𑌨𑌮𑍍 ।
𑌸𑌰𑍍𑌵𑌸𑌂𑌪𑌤𑍍𑌕𑌰𑌂 𑌪𑍁𑌣𑍍𑌯𑌂 𑌸𑌰𑍍𑌵𑌰𑍋𑌗𑌨𑌿𑌵𑌾𑌰𑌣𑌮𑍍 ॥ 33 ॥

𑌸𑌰𑍍𑌵𑌕𑌾𑌮𑌕𑌰𑌂 𑌦𑌿𑌵𑍍𑌯𑌂 𑌸𑌰𑍍𑌵𑌾𑌭𑍀𑌷𑍍𑌟𑌪𑍍𑌰𑌦𑌾𑌯𑌕𑌮𑍍 ।
𑌪𑍍𑌰𑌜𑌾𑌕𑌰𑌂 𑌰𑌾𑌜𑍍𑌯𑌕𑌰𑌂 𑌭𑌾𑌗𑍍𑌯𑌦𑌂 𑌬𑌹𑍁𑌪𑍁𑌣𑍍𑌯𑌦𑌮𑍍 ॥ 34 ॥

𑌗𑍁𑌹𑍍𑌯𑌾𑌦𑍍𑌗𑍁𑌹𑍍𑌯𑌤𑌰𑌂 𑌭𑍂𑌯𑍋 𑌦𑍇𑌵𑌾𑌨𑌾𑌮𑌪𑌿 𑌦𑍁𑌰𑍍𑌲𑌭𑌮𑍍 ।
𑌇𑌦𑌂 𑌤𑍁 𑌨𑌾𑌤𑌪𑌸𑍍𑌕𑌾𑌯 𑌨𑌾𑌭𑌕𑍍𑌤𑌾𑌯 𑌕𑌦𑌾𑌚𑌨 ॥ 35 ॥

𑌨 𑌚𑌾𑌶𑍁𑌶𑍍𑌰𑍂𑌷𑌵𑍇 𑌦𑍇𑌯𑌂 𑌨 𑌮𑌦𑌾𑌂𑌧𑌾𑌯 𑌕𑌰𑍍𑌹𑌿𑌚𑌿𑌤𑍍 ।
𑌸𑌚𑍍𑌛𑌿𑌷𑍍𑌯𑌾𑌯 𑌕𑍁𑌲𑍀𑌨𑌾𑌯 𑌸𑍍𑌕𑌂𑌦𑌭𑌕𑍍𑌤𑌿𑌰𑌤𑌾𑌯 𑌚 ॥ 36 ॥

𑌸𑌤𑌾𑌮𑌭𑌿𑌮𑌤𑌾𑌯𑍇𑌦𑌂 𑌦𑌾𑌤𑌵𑍍𑌯𑌂 𑌧𑌰𑍍𑌮𑌵𑌰𑍍𑌧𑌨𑌮𑍍 ।
𑌯 𑌇𑌦𑌂 𑌪𑌰𑌮𑌂 𑌪𑍁𑌣𑍍𑌯𑌂 𑌨𑌿𑌤𑍍𑌯𑌂 𑌜𑌪𑌤𑌿 𑌮𑌾𑌨𑌵𑌃 ।
𑌤𑌸𑍍𑌯 𑌶𑍍𑌰𑍀 𑌭𑌗𑌵𑌾𑌨𑍍 𑌸𑍍𑌕𑌂𑌦𑌃 𑌪𑍍𑌰𑌸𑌨𑍍𑌨𑍋 𑌭𑌵𑌤𑌿 𑌧𑍍𑌰𑍁𑌵𑌮𑍍 ॥ 3𑍭 ॥

𑌇𑌤𑌿 𑌶𑍍𑌰𑍀𑌸𑍍𑌕𑌾𑌂𑌦𑌪𑍁𑌰𑌾𑌣𑍇 𑌸𑍁𑌬𑍍𑌰𑌹𑍍𑌮𑌣𑍍𑌯𑌹𑍃𑌦𑌯𑌸𑍍𑌤𑍋𑌤𑍍𑌰𑌮𑍍 ॥