𑌶𑍍𑌰𑍀 𑌰𑌾𑌮 𑌕𑌰𑍍𑌣𑌾𑌮𑍃𑌤𑌮𑍍

𑌮𑌂𑌗𑌳𑌶𑍍𑌲𑍋𑌕𑌾𑌃
𑌮𑌂𑌗𑌳𑌂 𑌭𑌗𑌵𑌾𑌨𑍍𑌵𑌿𑌷𑍍𑌣𑍁𑌰𑍍𑌮𑌂𑌗𑌳𑌂 𑌮𑌧𑍁𑌸𑍂𑌦𑌨𑌃 ।
𑌮𑌂𑌗𑌳𑌂 𑌪𑍁𑌂𑌡𑌰𑍀𑌕𑌾𑌕𑍍𑌷𑍋 𑌮𑌂𑌗𑌳𑌂 𑌗𑌰𑍁𑌡𑌧𑍍𑌵𑌜𑌃 ॥ 1

𑌮𑌂𑌗𑌳𑌂 𑌕𑍋𑌸𑌲𑍇𑌂𑌦𑍍𑌰𑌾𑌯 𑌮𑌹𑌨𑍀𑌯𑌗𑍁𑌣𑌾𑌬𑍍𑌧𑌯𑍇 ।
𑌚𑌕𑍍𑌰𑌵𑌰𑍍𑌤𑌿𑌤𑌨𑍂𑌜𑌾𑌯 𑌸𑌾𑌰𑍍𑌵𑌭𑍌𑌮𑌾𑌯 𑌮𑌂𑌗𑌳𑌮𑍍 ॥ 2

𑌵𑍇𑌦𑌵𑍇𑌦𑌾𑌂𑌤𑌵𑍇𑌦𑍍𑌯𑌾𑌯 𑌮𑍇𑌘𑌶𑍍𑌯𑌾𑌮𑌲𑌮𑍂𑌰𑍍𑌤𑌯𑍇 ।
𑌪𑍁𑌂𑌸𑌾𑌂 𑌮𑍋𑌹𑌨𑌰𑍂𑌪𑌾𑌯 𑌪𑍁𑌣𑍍𑌯𑌶𑍍𑌲𑍋𑌕𑌾𑌯 𑌮𑌂𑌗𑌳𑌮𑍍 ॥ 3

𑌵𑌿𑌶𑍍𑌵𑌾𑌮𑌿𑌤𑍍𑌰𑌾𑌂𑌤𑌰𑌂𑌗𑌾𑌯 𑌮𑌿𑌥𑌿𑌲𑌾𑌨𑌗𑌰𑍀𑌪𑌤𑍇𑌃 ।
𑌭𑌾𑌗𑍍𑌯𑌾𑌨𑌾𑌂 𑌪𑌰𑌿𑌪𑌾𑌕𑌾𑌯 𑌭𑌵𑍍𑌯𑌰𑍂𑌪𑌾𑌯 𑌮𑌂𑌗𑌳𑌮𑍍 ॥ 4

𑌪𑌿𑌤𑍃𑌭𑌕𑍍𑌤𑌾𑌯 𑌸𑌤𑌤𑌂 𑌭𑍍𑌰𑌾𑌤𑍃𑌭𑌿𑌃 𑌸𑌹 𑌸𑍀𑌤𑌯𑌾 ।
𑌨𑌂𑌦𑌿𑌤𑌾𑌖𑌿𑌲𑌲𑍋𑌕𑌾𑌯 𑌰𑌾𑌮𑌚𑌂𑌦𑍍𑌰𑌾𑌯 𑌮𑌂𑌗𑌳𑌮𑍍 ॥ 5

𑌤𑍍𑌯𑌕𑍍𑌤𑌸𑌾𑌕𑍇𑌤𑌵𑌾𑌸𑌾𑌯 𑌚𑌿𑌤𑍍𑌰𑌕𑍂𑌟𑌵𑌿𑌹𑌾𑌰𑌿𑌣𑍇 ।
𑌸𑍇𑌵𑍍𑌯𑌾𑌯 𑌸𑌰𑍍𑌵𑌯𑌮𑌿𑌨𑌾𑌂 𑌧𑍀𑌰𑍋𑌦𑌾𑌤𑍍𑌤𑌾𑌯 𑌮𑌂𑌗𑌳𑌮𑍍 ॥ 6

𑌸𑍌𑌮𑌿𑌤𑍍𑌰𑌿𑌣𑌾 𑌚 𑌜𑌾𑌨𑌕𑍍𑌯𑌾 𑌚𑌾𑌪𑌬𑌾𑌣𑌾𑌸𑌿𑌧𑌾𑌰𑌿𑌣𑌾 ।
𑌸𑌂𑌸𑍇𑌵𑍍𑌯𑌾𑌯 𑌸𑌦𑌾 𑌭𑌕𑍍𑌤𑍍𑌯𑌾 𑌸𑌾𑌨𑍁𑌜𑌾𑌯𑌾𑌸𑍍𑌤𑍁 𑌮𑌂𑌗𑌳𑌮𑍍 ॥ 𑍭

𑌦𑌂𑌡𑌕𑌾𑌰𑌣𑍍𑌯𑌵𑌾𑌸𑌾𑌯 𑌖𑌂𑌡𑌿𑌤𑌾𑌮𑌰𑌶𑌤𑍍𑌰𑌵𑍇 ।
𑌗𑍃𑌧𑍍𑌰𑌰𑌾𑌜𑌾𑌯 𑌭𑌕𑍍𑌤𑌾𑌯 𑌮𑍁𑌕𑍍𑌤𑌿𑌦𑌾𑌯𑌾𑌸𑍍𑌤𑍁 𑌮𑌂𑌗𑌳𑌮𑍍 ॥ 𑍮

𑌸𑌾𑌦𑌰𑌂 𑌶𑌬𑌰𑍀𑌦𑌤𑍍𑌤𑌫𑌲𑌮𑍂𑌲𑌾𑌭𑌿𑌲𑌾𑌷𑌿𑌣𑍇 ।
𑌸𑍌𑌲𑌭𑍍𑌯𑌪𑌰𑌿𑌪𑍂𑌰𑍍𑌣𑌾𑌯 𑌸𑌤𑍍𑌤𑍍𑌵𑍋𑌦𑍍𑌯𑍁𑌕𑍍𑌤𑌾𑌯 𑌮𑌂𑌗𑌳𑌮𑍍 ॥ 𑍯

𑌹𑌨𑍂𑌮𑌤𑍍𑌸𑌮𑌵𑍇𑌤𑌾𑌯 𑌹𑌰𑍀𑌶𑌾𑌭𑍀𑌷𑍍𑌟𑌦𑌾𑌯𑌿𑌨𑍇 ।
𑌵𑌾𑌲𑌿𑌪𑍍𑌰𑌮𑌥𑌨𑌾𑌯𑌾𑌸𑍍𑌤𑍁 𑌮𑌹𑌾𑌧𑍀𑌰𑌾𑌯 𑌮𑌂𑌗𑌳𑌮𑍍 ॥ 10

𑌶𑍍𑌰𑍀𑌮𑌤𑍇 𑌰𑌘𑍁𑌵𑍀𑌰𑌾𑌯 𑌸𑍇𑌤𑍁𑌲𑌂𑌘𑌿𑌤𑌸𑌿𑌂𑌧𑌵𑍇 ।
𑌜𑌿𑌤𑌰𑌾𑌕𑍍𑌷𑌸𑌰𑌾𑌜𑌾𑌯 𑌰𑌣𑌧𑍀𑌰𑌾𑌯 𑌮𑌂𑌗𑌳𑌮𑍍 ॥ 11

𑌆𑌸𑌾𑌦𑍍𑌯 𑌨𑌗𑌰𑍀𑌂 𑌦𑌿𑌵𑍍𑌯𑌾𑌮𑌭𑌿𑌷𑌿𑌕𑍍𑌤𑌾𑌯 𑌸𑍀𑌤𑌯𑌾 ।
𑌰𑌾𑌜𑌾𑌧𑌿𑌰𑌾𑌜𑌰𑌾𑌜𑌾𑌯 𑌰𑌾𑌮𑌭𑌦𑍍𑌰𑌾𑌯 𑌮𑌂𑌗𑌳𑌮𑍍 ॥ 12

𑌵𑌿𑌭𑍀𑌷𑌣𑌕𑍃𑌤𑍇 𑌪𑍍𑌰𑍀𑌤𑍍𑌯𑌾 𑌵𑌿𑌶𑍍𑌵𑌾𑌭𑍀𑌷𑍍𑌟𑌪𑍍𑌰𑌦𑌾𑌯𑌿𑌨𑍇 ।
𑌜𑌾𑌨𑌕𑍀𑌪𑍍𑌰𑌾𑌣𑌨𑌾𑌥𑌾𑌯 𑌸𑌦𑌾 𑌰𑌾𑌮𑌾𑌯 𑌮𑌂𑌗𑌳𑌮𑍍 ॥ 13

—-

𑌶𑍍𑌰𑍀𑌰𑌾𑌮𑌂 𑌤𑍍𑌰𑌿𑌜𑌗𑌦𑍍𑌗𑍁𑌰𑍁𑌂 𑌸𑍁𑌰𑌵𑌰𑌂 𑌸𑍀𑌤𑌾𑌮𑌨𑍋𑌨𑌾𑌯𑌕𑌂
𑌶𑍍𑌯𑌾𑌮𑌾𑌂𑌗𑌂 𑌶𑌶𑌿𑌕𑍋𑌟𑌿𑌪𑍂𑌰𑍍𑌣𑌵𑌦𑌨𑌂 𑌚𑌂𑌚𑌤𑍍𑌕𑌲𑌾𑌕𑍌𑌸𑍍𑌤𑍁𑌭𑌮𑍍 ।
𑌸𑍌𑌮𑍍𑌯𑌂 𑌸𑌤𑍍𑌯𑌗𑍁𑌣𑍋𑌤𑍍𑌤𑌮𑌂 𑌸𑍁𑌸𑌰𑌯𑍂𑌤𑍀𑌰𑍇 𑌵𑌸𑌂𑌤𑌂 𑌪𑍍𑌰𑌭𑍁𑌂
𑌤𑍍𑌰𑌾𑌤𑌾𑌰𑌂 𑌸𑌕𑌲𑌾𑌰𑍍𑌥𑌸𑌿𑌦𑍍𑌧𑌿𑌸𑌹𑌿𑌤𑌂 𑌵𑌂𑌦𑍇 𑌰𑌘𑍂𑌣𑌾𑌂 𑌪𑌤𑌿𑌮𑍍 ॥ 14

𑌶𑍍𑌰𑍀𑌰𑌾𑌘𑌵𑌂 𑌦𑌶𑌰𑌥𑌾𑌤𑍍𑌮𑌜𑌮𑌪𑍍𑌰𑌮𑍇𑌯𑌂
𑌸𑍀𑌤𑌾𑌪𑌤𑌿𑌂 𑌰𑌘𑍁𑌵𑌰𑌾𑌨𑍍𑌵𑌯𑌰𑌤𑍍𑌨𑌦𑍀𑌪𑌮𑍍 ।
𑌆𑌜𑌾𑌨𑍁𑌬𑌾𑌹𑍁𑌮𑌰𑌵𑌿𑌂𑌦𑌦𑌳𑌾𑌯𑌤𑌾𑌕𑍍𑌷𑌂
𑌰𑌾𑌮𑌂 𑌨𑌿𑌶𑌾𑌚𑌰𑌵𑌿𑌨𑌾𑌶𑌕𑌰𑌂 𑌨𑌮𑌾𑌮𑌿 ॥ 15

𑌶𑍍𑌰𑍀𑌰𑌾𑌮𑌚𑌂𑌦𑍍𑌰 𑌕𑌰𑍁𑌣𑌾𑌕𑌰 𑌰𑌾𑌘𑌵𑍇𑌂𑌦𑍍𑌰
𑌰𑌾𑌜𑍇𑌂𑌦𑍍𑌰𑌚𑌂𑌦𑍍𑌰 𑌰𑌘𑍁𑌵𑌂𑌶𑌸𑌮𑍁𑌦𑍍𑌰𑌚𑌂𑌦𑍍𑌰 ।
𑌸𑍁𑌗𑍍𑌰𑍀𑌵𑌨𑍇𑌤𑍍𑌰𑌯𑍁𑌗𑌳𑍋𑌤𑍍𑌪𑌲-𑌪𑍂𑌰𑍍𑌣𑌚𑌂𑌦𑍍𑌰
𑌸𑍀𑌤𑌾𑌮𑌨𑌃𑌕𑍁𑌮𑍁𑌦𑌚𑌂𑌦𑍍𑌰 𑌨𑌮𑍋 𑌨𑌮𑌸𑍍𑌤𑍇 ॥ 16

𑌸𑍀𑌤𑌾𑌮𑌨𑍋𑌮𑌾𑌨𑌸𑌰𑌾𑌜𑌹𑌂𑌸
𑌸𑌂𑌸𑌾𑌰𑌸𑌂𑌤𑌾𑌪𑌹𑌰 𑌕𑍍𑌷𑌮𑌾𑌵𑌨𑍍 ।
𑌶𑍍𑌰𑍀𑌰𑌾𑌮 𑌦𑍈𑌤𑍍𑌯𑌾𑌂𑌤𑌕 𑌶𑌾𑌂𑌤𑌰𑍂𑌪
𑌶𑍍𑌰𑍀𑌤𑌾𑌰𑌕𑌬𑍍𑌰𑌹𑍍𑌮 𑌨𑌮𑍋 𑌨𑌮𑌸𑍍𑌤𑍇 ॥ 1𑍭

𑌵𑌿𑌷𑍍𑌣𑍋 𑌰𑌾𑌘𑌵 𑌵𑌾𑌸𑍁𑌦𑍇𑌵 𑌨𑍃𑌹𑌰𑍇 𑌦𑍇𑌵𑍌𑌘𑌚𑍂𑌡𑌾𑌮𑌣𑍇 ।
𑌸𑌂𑌸𑌾𑌰𑌾𑌰𑍍𑌣𑌵𑌕𑌰𑍍𑌣𑌧𑌾𑌰𑌕 𑌹𑌰𑍇 𑌕𑍃𑌷𑍍𑌣𑌾𑌯 𑌤𑍁𑌭𑍍𑌯𑌂 𑌨𑌮𑌃 ॥ 1𑍮

𑌸𑍁𑌗𑍍𑌰𑍀𑌵𑌾𑌦𑌿𑌸𑌮𑌸𑍍𑌤𑌵𑌾𑌨𑌰𑌵𑌰𑍈𑌸𑍍𑌸𑌂𑌸𑍇𑌵𑍍𑌯𑌮𑌾𑌨𑌂 𑌸𑌦𑌾 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌪𑌰𑌾𑌶𑌰𑌾𑌦𑌿𑌮𑍁𑌨𑌿𑌭𑌿𑌸𑍍𑌸𑌂𑌸𑍍𑌤𑍂𑌯𑌮𑌾𑌨𑌂 𑌭𑌜𑍇 ॥ 1𑍯

𑌰𑌾𑌮𑌂 𑌚𑌂𑌦𑌨𑌶𑍀𑌤𑌲𑌂 𑌕𑍍𑌷𑌿𑌤𑌿𑌸𑍁𑌤𑌾𑌮𑍋𑌹𑌾𑌕𑌰𑌂 𑌶𑍍𑌰𑍀𑌕𑌰𑌂
𑌵𑍈𑌦𑍇𑌹𑍀𑌨𑌯𑌨𑌾𑌰𑌵𑌿𑌂𑌦𑌮𑌿𑌹𑌿𑌰𑌂 𑌸𑌂𑌪𑍂𑌰𑍍𑌣𑌚𑌂𑌦𑍍𑌰𑌾𑌨𑌨𑌮𑍍 ।
𑌰𑌾𑌜𑌾𑌨𑌂 𑌕𑌰𑍁𑌣𑌾𑌸𑌮𑍇𑌤𑌨𑌯𑌨𑌂 𑌸𑍀𑌤𑌾𑌮𑌨𑍋𑌨𑌂𑌦𑌨𑌂
𑌸𑍀𑌤𑌾𑌦𑌰𑍍𑌪𑌣𑌚𑌾𑌰𑍁𑌗𑌂𑌡𑌲𑌲𑌿𑌤𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 20

𑌜𑌾𑌨𑌾𑌤𑌿 𑌰𑌾𑌮 𑌤𑌵 𑌨𑌾𑌮𑌰𑍁𑌚𑌿𑌂 𑌮𑌹𑍇𑌶𑍋
𑌜𑌾𑌨𑌾𑌤𑌿 𑌗𑍌𑌤𑌮𑌸𑌤𑍀 𑌚𑌰𑌣𑌪𑍍𑌰𑌭𑌾𑌵𑌮𑍍 ।
𑌜𑌾𑌨𑌾𑌤𑌿 𑌦𑍋𑌰𑍍𑌬𑌲𑌪𑌰𑌾𑌕𑍍𑌰𑌮𑌮𑍀𑌶𑌚𑌾𑌪𑍋
𑌜𑌾𑌨𑌾𑌤𑍍𑌯𑌮𑍋𑌘𑌪𑌟𑍁𑌬𑌾𑌣𑌗𑌤𑌿𑌂 𑌪𑌯𑍋𑌧𑌿𑌃 ॥ 21

𑌮𑌾𑌤𑌾 𑌰𑌾𑌮𑍋 𑌮𑌤𑍍𑌪𑌿𑌤𑌾 𑌰𑌾𑌮𑌚𑌂𑌦𑍍𑌰𑍋
𑌭𑍍𑌰𑌾𑌤𑌾 𑌰𑌾𑌮𑍋 𑌮𑌤𑍍𑌸𑌖𑌾 𑌰𑌾𑌘𑌵𑍇𑌶𑌃 ।
𑌸𑌰𑍍𑌵𑌸𑍍𑌵𑌂 𑌮𑍇 𑌰𑌾𑌮𑌚𑌂𑌦𑍍𑌰𑍋 𑌦𑌾𑌯𑌾𑌳𑍁-
𑌰𑍍𑌨𑌾𑌨𑍍𑌯𑌂 𑌦𑍈𑌵𑌂 𑌨𑍈𑌵 𑌜𑌾𑌨𑍇 𑌨 𑌜𑌾𑌨𑍇 ॥ 22

𑌵𑌿𑌮𑌲𑌕𑌮𑌲𑌨𑍇𑌤𑍍𑌰𑌂 𑌵𑌿𑌸𑍍𑌫𑍁𑌰𑌨𑍍𑌨𑍀𑌲𑌗𑌾𑌤𑍍𑌰𑌂
𑌤𑌪𑌨𑌕𑍁𑌲𑌪𑌵𑌿𑌤𑍍𑌰𑌂 𑌦𑌾𑌨𑌵𑌧𑍍𑌵𑌂𑌤𑌮𑌿𑌤𑍍𑌰𑌮𑍍 ।
𑌭𑍁𑌵𑌨𑌶𑍁𑌭𑌚𑌰𑌿𑌤𑍍𑌰𑌂 𑌭𑍂𑌮𑌿𑌪𑍁𑌤𑍍𑌰𑍀𑌕𑌳𑌤𑍍𑌰𑌂
𑌦𑌶𑌰𑌥𑌵𑌰𑌪𑍁𑌤𑍍𑌰𑌂 𑌨𑍌𑌮𑌿 𑌰𑌾𑌮𑌾𑌖𑍍𑌯𑌮𑌿𑌤𑍍𑌰𑌮𑍍 ॥ 23

𑌮𑌾𑌰𑍍𑌗𑍇 𑌮𑌾𑌰𑍍𑌗𑍇 𑌶𑌾𑌖𑌿𑌨𑌾𑌂 𑌰𑌤𑍍𑌨𑌵𑍇𑌦𑍀
𑌵𑍇𑌦𑍍𑌯𑌾𑌂 𑌵𑍇𑌦𑍍𑌯𑌾𑌂 𑌕𑌿𑌨𑍍𑌨𑌰𑍀𑌬𑍃𑌂𑌦𑌗𑍀𑌤𑌮𑍍 ।
𑌗𑍀𑌤𑍇 𑌗𑍀𑌤𑍇 𑌮𑌂𑌜𑍁𑌲𑌾𑌲𑌾𑌪𑌗𑍋𑌷𑍍𑌠𑍀
𑌗𑍋𑌷𑍍𑌠𑍍𑌯𑌾𑌂 𑌗𑍋𑌷𑍍𑌠𑍍𑌯𑌾𑌂 𑌤𑍍𑌵𑌤𑍍𑌕𑌥𑌾 𑌰𑌾𑌮𑌚𑌂𑌦𑍍𑌰 ॥ 24

𑌵𑍃𑌕𑍍𑌷𑍇 𑌵𑍃𑌕𑍍𑌷𑍇 𑌵𑍀𑌕𑍍𑌷𑌿𑌤𑌾𑌃 𑌪𑌕𑍍𑌷𑌿𑌸𑌂𑌘𑌾𑌃
𑌸𑌂𑌘𑍇 𑌸𑌂𑌘𑍇 𑌮𑌂𑌜𑍁𑌲𑌾𑌮𑍋𑌦𑌵𑌾𑌕𑍍𑌯𑌮𑍍 ।
𑌵𑌾𑌕𑍍𑌯𑍇 𑌵𑌾𑌕𑍍𑌯𑍇 𑌮𑌂𑌜𑍁𑌲𑌾𑌲𑌾𑌪𑌗𑍋𑌷𑍍𑌠𑍀
𑌗𑍋𑌷𑍍𑌠𑍍𑌯𑌾𑌂 𑌗𑍋𑌷𑍍𑌠𑍍𑌯𑌾𑌂 𑌤𑍍𑌵𑌤𑍍𑌕𑌥𑌾 𑌰𑌾𑌮𑌚𑌂𑌦𑍍𑌰 ॥ 25

𑌦𑍁𑌰𑌿𑌤𑌤𑌿𑌮𑌿𑌰𑌚𑌂𑌦𑍍𑌰𑍋 𑌦𑍁𑌷𑍍𑌟𑌕𑌂𑌜𑌾𑌤𑌚𑌂𑌦𑍍𑌰𑌃
𑌸𑍁𑌰𑌕𑍁𑌵𑌲𑌯𑌚𑌂𑌦𑍍𑌰𑌸𑍍𑌸𑍂𑌰𑍍𑌯𑌵𑌂𑌶𑌾𑌬𑍍𑌧𑌿𑌚𑌂𑌦𑍍𑌰𑌃 ।
𑌸𑍍𑌵𑌜𑌨𑌨𑌿𑌵𑌹𑌚𑌂𑌦𑍍𑌰𑌶𑍍𑌶𑌤𑍍𑌰𑍁𑌰𑌾𑌜𑍀𑌵𑌚𑌂𑌦𑍍𑌰𑌃
𑌪𑍍𑌰𑌣𑌤𑌕𑍁𑌮𑍁𑌦𑌚𑌂𑌦𑍍𑌰𑌃 𑌪𑌾𑌤𑍁 𑌮𑌾𑌂 𑌰𑌾𑌮𑌚𑌂𑌦𑍍𑌰𑌃 ॥ 26

𑌕𑌳𑍍𑌯𑌾𑌣𑌦𑌂 𑌕𑍌𑌶𑌿𑌕𑌯𑌜𑍍𑌞𑌪𑌾𑌲𑌂
𑌕𑌳𑌾𑌨𑌿𑌧𑌿𑌂 𑌕𑌾𑌂𑌚𑌨𑌶𑍈𑌲𑌧𑍀𑌰𑌮𑍍 ।
𑌕𑌂𑌜𑌾𑌤𑌨𑍇𑌤𑍍𑌰𑌂 𑌕𑌰𑍁𑌣𑌾𑌸𑌮𑍁𑌦𑍍𑌰𑌂
𑌕𑌾𑌕𑍁𑌤𑍍𑌸𑍍𑌥𑌰𑌾𑌮𑌂 𑌕𑌲𑌯𑌾𑌮𑌿 𑌚𑌿𑌤𑍍𑌤𑍇 ॥ 2𑍭

𑌰𑌾𑌜𑍀𑌵𑌾𑌯𑌤𑌲𑍋𑌚𑌨𑌂 𑌰𑌘𑍁𑌵𑌰𑌂 𑌨𑍀𑌲𑍋𑌤𑍍𑌪𑌲𑌶𑍍𑌯𑌾𑌮𑌲𑌂
𑌮𑌂𑌦𑌾𑌰𑌾𑌂𑌚𑌿𑌤𑌮𑌂𑌡𑌪𑍇 𑌸𑍁𑌲𑌲𑌿𑌤𑍇 𑌸𑍌𑌵𑌰𑍍𑌣𑌕𑍇 𑌪𑍁𑌷𑍍𑌪𑌕𑍇 ।
𑌆𑌸𑍍𑌥𑌾𑌨𑍇 𑌨𑌵𑌰𑌤𑍍𑌨𑌰𑌾𑌜𑌿𑌖𑌚𑌿𑌤𑍇 𑌸𑌿𑌂𑌹𑌾𑌸𑌨𑍇 𑌸𑌂𑌸𑍍𑌥𑌿𑌤𑌂
𑌸𑍀𑌤𑌾𑌲𑌕𑍍𑌷𑍍𑌮𑌣𑌲𑍋𑌕𑌪𑌾𑌲𑌸𑌹𑌿𑌤𑌂 𑌵𑌂𑌦𑍇 𑌮𑍁𑌨𑍀𑌂𑌦𑍍𑌰𑌾𑌸𑍍𑌪𑌦𑌮𑍍 ॥ 2𑍮

𑌧𑍍𑌯𑌾𑌯𑍇 𑌰𑌾𑌮𑌂 𑌸𑍁𑌧𑌾𑌂𑌶𑍁𑌂 𑌨𑌤𑌸𑌕𑌲𑌭𑌵𑌾𑌰𑌣𑍍𑌯𑌤𑌾𑌪𑌪𑍍𑌰𑌹𑌾𑌰𑌮𑍍 ।
𑌶𑍍𑌯𑌾𑌮𑌂 𑌶𑌾𑌂𑌤𑌂 𑌸𑍁𑌰𑍇𑌂𑌦𑍍𑌰𑌂 𑌸𑍁𑌰𑌮𑍁𑌨𑌿𑌵𑌿𑌨𑍁𑌤𑌂 𑌕𑍋𑌟𑌿𑌸𑍂𑌰𑍍𑌯𑌪𑍍𑌰𑌕𑌾𑌶𑌮𑍍 ।
𑌸𑍀𑌤𑌾𑌸𑍌𑌮𑌿𑌤𑍍𑌰𑌿𑌸𑍇𑌵𑍍𑌯𑌂 𑌸𑍁𑌰𑌨𑌰𑌸𑍁𑌗𑌮𑌂 𑌦𑌿𑌵𑍍𑌯𑌸𑌿𑌂𑌹𑌾𑌸𑌨𑌸𑍍𑌥𑌮𑍍 ।
𑌸𑌾𑌯𑌾𑌹𑍍𑌨𑍇 𑌰𑌾𑌮𑌚𑌂𑌦𑍍𑌰𑌂 𑌸𑍍𑌮𑌿𑌤𑌰𑍁𑌚𑌿𑌰𑌮𑍁𑌖𑌂 𑌸𑌰𑍍𑌵𑌦𑌾 𑌮𑍇 𑌪𑍍𑌰𑌸𑌨𑍍𑌨𑌮𑍍 ॥ 2𑍯

𑌇𑌂𑌦𑍍𑌰𑌨𑍀𑌲𑌮𑌣𑌿𑌸𑌨𑍍𑌨𑌿𑌭𑌦𑍇𑌹𑌂
𑌵𑌂𑌦𑌨𑍀𑌯𑌮𑌸𑌕𑍃𑌨𑍍𑌮𑍁𑌨𑌿𑌬𑍃𑌂𑌦𑍈𑌃 ।
𑌲𑌂𑌬𑌮𑌾𑌨𑌤𑍁𑌲𑌸𑍀𑌵𑌨𑌮𑌾𑌲𑌂
𑌚𑌿𑌂𑌤𑌯𑌾𑌮𑌿 𑌸𑌤𑌤𑌂 𑌰𑌘𑍁𑌵𑍀𑌰𑌮𑍍 ॥ 30

𑌸𑌂𑌪𑍂𑌰𑍍𑌣𑌚𑌂𑌦𑍍𑌰𑌵𑌦𑌨𑌂 𑌸𑌰𑌸𑍀𑌰𑍁𑌹𑌾𑌕𑍍𑌷𑌂
𑌮𑌾𑌣𑌿𑌕𑍍𑌯𑌕𑍁𑌂𑌡𑌲𑌧𑌰𑌂 𑌮𑍁𑌕𑍁𑌟𑌾𑌭𑌿𑌰𑌾𑌮𑌮𑍍 ।
𑌚𑌾𑌂𑌪𑍇𑌯𑌗𑍌𑌰𑌵𑌸𑌨𑌂 𑌶𑌰𑌚𑌾𑌪𑌹𑌸𑍍𑌤𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌮𑌨𑌿𑌶𑌂 𑌮𑌨𑌸𑌾 𑌸𑍍𑌮𑌰𑌾𑌮𑌿 ॥ 31

𑌮𑌾𑌤𑍁𑌃 𑌪𑌾𑌰𑍍𑌶𑍍𑌵𑍇 𑌚𑌰𑌂𑌤𑌂 𑌮𑌣𑌿𑌮𑌯𑌶𑌯𑌨𑍇 𑌮𑌂𑌜𑍁𑌭𑍂𑌷𑌾𑌂𑌚𑌿𑌤𑌾𑌂𑌗𑌮𑍍 ।
𑌮𑌂𑌦𑌂 𑌮𑌂𑌦𑌂 𑌪𑌿𑌬𑌂𑌤𑌂 𑌮𑍁𑌕𑍁𑌳𑌿𑌤𑌨𑌯𑌨𑌂 𑌸𑍍𑌤𑌨𑍍𑌯𑌮𑌨𑍍𑌯𑌸𑍍𑌤𑌨𑌾𑌗𑍍𑌰𑌮𑍍 ।
𑌅𑌂𑌗𑍁𑌳𑍍𑌯𑌾𑌗𑍍𑌰𑍈𑌃 𑌸𑍍𑌪𑍃𑌶𑌂𑌤𑌂 𑌸𑍁𑌖𑌪𑌰𑌵𑌶𑌯𑌾 𑌸𑌸𑍍𑌮𑌿𑌤𑌾𑌲𑌿𑌂𑌗𑌿𑌤𑌾𑌂𑌗𑌮𑍍 ।
𑌗𑌾𑌢𑌂 𑌗𑌾𑌢𑌂 𑌜𑌨𑌨𑍍𑌯𑌾 𑌕𑌲𑌯𑌤𑍁 𑌹𑍃𑌦𑌯𑌂 𑌮𑌾𑌮𑌕𑌂 𑌰𑌾𑌮𑌬𑌾𑌲𑌮𑍍 ॥ 32

𑌰𑌾𑌮𑌾𑌭𑌿𑌰𑌾𑌮𑌂 𑌨𑌯𑌨𑌾𑌭𑌿𑌰𑌾𑌮𑌂
𑌵𑌾𑌚𑌾𑌭𑌿𑌰𑌾𑌮𑌂 𑌵𑌦𑌨𑌾𑌭𑌿𑌰𑌾𑌮𑌮𑍍 ।
𑌸𑌰𑍍𑌵𑌾𑌭𑌿𑌰𑌾𑌮𑌂 𑌚 𑌸𑌦𑌾𑌭𑌿𑌰𑌾𑌮𑌂
𑌵𑌂𑌦𑍇 𑌸𑌦𑌾 𑌦𑌾𑌶𑌰𑌥𑌿𑌂 𑌚 𑌰𑌾𑌮𑌮𑍍 ॥ 33

𑌰𑌾𑌶𑌬𑍍𑌦𑍋𑌚𑍍𑌚𑌾𑌰𑌮𑌾𑌤𑍍𑌰𑍇𑌣 𑌮𑍁𑌖𑌾𑌨𑍍𑌨𑌿𑌰𑍍𑌯𑌾𑌤𑌿 𑌪𑌾𑌤𑌕𑌾𑌃 ।
𑌪𑍁𑌨𑌃 𑌪𑍍𑌰𑌵𑍇𑌶𑌭𑍀𑌤𑍍𑌯𑌾 𑌚 𑌮𑌕𑌾𑌰𑌸𑍍𑌤𑍁 𑌕𑌵𑌾𑌟𑌵𑌤𑍍 ॥ 34

𑌅𑌨𑌰𑍍𑌘𑌮𑌾𑌣𑌿𑌕𑍍𑌯𑌵𑌿𑌰𑌾𑌜𑌮𑌾𑌨-
𑌶𑍍𑌰𑍀𑌪𑌾𑌦𑍁𑌕𑌾𑌲𑌂𑌕𑍃𑌤𑌶𑍋𑌭𑌨𑌾𑌭𑍍𑌯𑌾𑌮𑍍 ।
𑌅𑌶𑍇𑌷𑌬𑍃𑌂𑌦𑌾𑌰𑌕𑌵𑌂𑌦𑌿𑌤𑌾𑌭𑍍𑌯𑌾𑌂
𑌨𑌮𑍋 𑌨𑌮𑍋 𑌰𑌾𑌮𑌪𑌦𑌾𑌂𑌬𑍁𑌜𑌾𑌭𑍍𑌯𑌾𑌮𑍍 ॥ 35

𑌚𑌲𑌤𑍍𑌕𑌨𑌕𑌕𑍁𑌂𑌡𑌲𑍋𑌲𑍍𑌲𑌸𑌿𑌤𑌦𑌿𑌵𑍍𑌯𑌗𑌂𑌡𑌸𑍍𑌥𑌲𑌂
𑌚𑌰𑌾𑌚𑌰𑌜𑌗𑌨𑍍𑌮𑌯𑌂 𑌚𑌰𑌣𑌪𑌦𑍍𑌮𑌗𑌂𑌗𑌾𑌶𑍍𑌰𑌯𑌮𑍍 ।
𑌚𑌤𑍁𑌰𑍍𑌵𑌿𑌧𑌫𑌲𑌪𑍍𑌰𑌦𑌂 𑌚𑌰𑌮𑌪𑍀𑌠𑌮𑌧𑍍𑌯𑌸𑍍𑌥𑌿𑌤𑌂
𑌚𑌿𑌦𑌂𑌶𑌮𑌖𑌿𑌲𑌾𑌸𑍍𑌪𑌦𑌂 𑌦𑌶𑌰𑌥𑌾𑌤𑍍𑌮𑌜𑌂 𑌚𑌿𑌂𑌤𑌯𑍇 ॥ 36

𑌸𑌨𑌂𑌦𑌨𑌮𑍁𑌨𑌿𑌪𑍍𑌰𑌿𑌯𑌂 𑌸𑌕𑌲𑌵𑌰𑍍𑌣𑌵𑍇𑌦𑌾𑌤𑍍𑌮𑌕𑌂
𑌸𑌮𑌸𑍍𑌤𑌨𑌿𑌗𑌮𑌾𑌗𑌮𑌸𑍍𑌫𑍁𑌰𑌿𑌤𑌤𑌤𑍍𑌤𑍍𑌵𑌸𑌿𑌂𑌹𑌾𑌸𑌨𑌮𑍍 ।
𑌸𑌹𑌸𑍍𑌰𑌨𑌯𑌨𑌾𑌬𑍍𑌜𑌜𑌾𑌦𑍍𑌯𑌮𑌰𑌬𑍃𑌂𑌦𑌸𑌂𑌸𑍇𑌵𑌿𑌤𑌂
𑌸𑌮𑌷𑍍𑌟𑌿𑌪𑍁𑌰𑌵𑌲𑍍𑌲𑌭𑌂 𑌦𑌶𑌰𑌥𑌾𑌤𑍍𑌮𑌜𑌂 𑌚𑌿𑌂𑌤𑌯𑍇 ॥ 3𑍭

𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿-𑌕𑌾𑌲𑌵𑌿𑌲𑌸𑌤𑍍𑌤𑌤𑍍𑌤𑍍𑌵𑌾𑌤𑍍𑌮𑌚𑌿𑌨𑍍𑌮𑌾𑌤𑍍𑌰𑌕𑌂
𑌚𑍈𑌤𑌨𑍍𑌯𑌾𑌤𑍍𑌮𑌕𑌮𑌾𑌧𑌿𑌪𑌾𑌪𑌰𑌹𑌿𑌤𑌂 𑌭𑍂𑌮𑍍𑌯𑌾𑌦𑌿𑌤𑌨𑍍𑌮𑌾𑌤𑍍𑌰𑌕𑌮𑍍 ।
𑌶𑌾𑌂𑌭𑌵𑍍𑌯𑌾𑌦𑌿𑌸𑌮𑌸𑍍𑌤𑌯𑍋𑌗𑌕𑍁𑌲𑌕𑌂 𑌸𑌾𑌂𑌖𑍍𑌯𑌾𑌦𑌿𑌤𑌤𑍍𑌤𑍍𑌵𑌾𑌤𑍍𑌪𑌰𑌂
𑌶𑌬𑍍𑌦𑌾𑌵𑌾𑌚𑍍𑌯𑌮𑌹𑌂 𑌨𑌮𑌾𑌮𑌿 𑌸𑌤𑌤𑌂 𑌵𑍍𑌯𑍁𑌤𑍍𑌪𑌤𑍍𑌤𑌿𑌨𑌾𑌶𑌾𑌤𑍍𑌪𑌰𑌮𑍍 ॥ 3𑍮

𑌇𑌕𑍍𑌷𑍍𑌵𑌾𑌕𑍁𑌵𑌂𑌶𑌾𑌰𑍍𑌣𑌵𑌜𑌾𑌤𑌰𑌤𑍍𑌨𑌂
𑌸𑍀𑌤𑌾𑌂𑌗𑌨𑌾𑌯𑍌𑌵𑌨𑌭𑌾𑌗𑍍𑌯𑌰𑌤𑍍𑌨𑌮𑍍 ।
𑌵𑍈𑌕𑍁𑌂𑌠𑌰𑌤𑍍𑌨𑌂 𑌮𑌮 𑌭𑌾𑌗𑍍𑌯𑌰𑌤𑍍𑌨𑌂
𑌶𑍍𑌰𑍀𑌰𑌾𑌮𑌰𑌤𑍍𑌨𑌂 𑌶𑌿𑌰𑌸𑌾 𑌨𑌮𑌾𑌮𑌿 ॥ 3𑍯

𑌇𑌕𑍍𑌷𑍍𑌵𑌾𑌕𑍁𑌨𑌂𑌦𑌨𑌂 𑌸𑍁𑌗𑍍𑌰𑍀𑌵𑌪𑍂𑌜𑌿𑌤𑌂
𑌤𑍍𑌰𑍈𑌲𑍋𑌕𑍍𑌯𑌰𑌕𑍍𑌷𑌕𑌂 𑌸𑌤𑍍𑌯𑌸𑌂𑌧𑌂 𑌸𑌦𑌾 ।
𑌰𑌾𑌘𑌵𑌂 𑌰𑌘𑍁𑌪𑌤𑌿𑌂 𑌰𑌾𑌜𑍀𑌵𑌲𑍋𑌚𑌨𑌂
𑌰𑌾𑌮𑌚𑌂𑌦𑍍𑌰𑌂 𑌭𑌜𑍇 𑌰𑌾𑌘𑌵𑍇𑌶𑌂 𑌭𑌜𑍇 ॥ 40

𑌭𑌕𑍍𑌤𑌪𑍍𑌰𑌿𑌯𑌂 𑌭𑌕𑍍𑌤𑌸𑌮𑌾𑌧𑌿𑌗𑌮𑍍𑌯𑌂
𑌚𑌿𑌂𑌤𑌾𑌹𑌰𑌂 𑌚𑌿𑌂𑌤𑌿𑌤𑌕𑌾𑌮𑌧𑍇𑌨𑍁𑌮𑍍 ।
𑌸𑍂𑌰𑍍𑌯𑍇𑌂𑌦𑍁𑌕𑍋𑌟𑌿𑌦𑍍𑌯𑍁𑌤𑌿𑌭𑌾𑌸𑍍𑌵𑌰𑌂 𑌤𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵𑌰𑌾𑌮𑌚𑌂𑌦𑍍𑌰𑌮𑍍 ॥ 41

𑌶𑍍𑌰𑍀𑌰𑌾𑌮𑌂 𑌜𑌨𑌕𑌕𑍍𑌷𑌿𑌤𑍀𑌶𑍍𑌵𑌰𑌸𑍁𑌤𑌾𑌵𑌕𑍍𑌤𑍍𑌰𑌾𑌂𑌬𑍁𑌜𑌾𑌹𑌾𑌰𑌿𑌣𑌂
𑌶𑍍𑌰𑍀𑌮𑌦𑍍𑌭𑌾𑌨𑍁𑌕𑍁𑌲𑌾𑌬𑍍𑌧𑌿𑌕𑍌𑌸𑍍𑌤𑍁𑌭𑌮𑌣𑌿𑌂 𑌶𑍍𑌰𑍀𑌰𑌤𑍍𑌨𑌵𑌕𑍍𑌷𑌸𑍍𑌸𑍍𑌥𑌲𑌮𑍍 ।
𑌶𑍍𑌰𑍀𑌕𑌂𑌠𑌾𑌦𑍍𑌯𑌮𑌰𑍌𑌘𑌰𑌤𑍍𑌨𑌮𑌕𑍁𑌟𑌾𑌲𑌂𑌕𑌾𑌰𑌪𑌾𑌦𑌾𑌂𑌬𑍁𑌜𑌂
𑌶𑍍𑌰𑍀𑌵𑌤𑍍𑌸𑍋𑌜𑍍𑌜𑍍𑌵𑌲𑌮𑌿𑌂𑌦𑍍𑌰𑌨𑍀𑌲𑌸𑌦𑍃𑌶𑌂 𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌂 𑌭𑌜𑍇 ॥ 42

𑌰𑌾𑌮𑌚𑌂𑌦𑍍𑌰 𑌚𑌰𑌿𑌤𑌾𑌕𑌥𑌾𑌮𑍃𑌤𑌂
𑌲𑌕𑍍𑌷𑍍𑌮𑌣𑌾𑌗𑍍𑌰𑌜𑌗𑍁𑌣𑌾𑌨𑍁𑌕𑍀𑌰𑍍𑌤𑌨𑌮𑍍 ।
𑌰𑌾𑌘𑌵𑍇𑌶 𑌤𑌵 𑌪𑌾𑌦𑌸𑍇𑌵𑌨𑌂
𑌸𑌂𑌭𑌵𑌂𑌤𑍁 𑌮𑌮 𑌜𑌨𑍍𑌮𑌜𑌨𑍍𑌮𑌨𑌿 ॥ 43

𑌅𑌜𑍍𑌞𑌾𑌨𑌸𑌂𑌭𑌵-𑌭𑌵𑌾𑌂𑌬𑍁𑌧𑌿𑌬𑌾𑌡𑌬𑌾𑌗𑍍𑌨𑌿-
𑌰𑌵𑍍𑌯𑌕𑍍𑌤𑌤𑌤𑍍𑌤𑍍𑌵𑌨𑌿𑌕𑌰𑌪𑍍𑌰𑌣𑌵𑌾𑌧𑌿𑌰𑍂𑌢𑌃 ।
𑌸𑍀𑌤𑌾𑌸𑌮𑍇𑌤𑌮𑌨𑍁𑌜𑍇𑌨 𑌹𑍃𑌦𑌂𑌤𑌰𑌾𑌳𑍇
𑌪𑍍𑌰𑌾𑌣𑌪𑍍𑌰𑌯𑌾𑌣𑌸𑌮𑌯𑍇 𑌮𑌮 𑌸𑌨𑍍𑌨𑌿𑌧𑌤𑍍𑌤𑍇 ॥ 44

𑌰𑌾𑌮𑍋 𑌮𑌤𑍍𑌕𑍁𑌲𑌦𑍈𑌵𑌤𑌂 𑌸𑌕𑌰𑍁𑌣𑌂 𑌰𑌾𑌮𑌂 𑌭𑌜𑍇 𑌸𑌾𑌦𑌰𑌂
𑌰𑌾𑌮𑍇𑌣𑌾𑌖𑌿𑌲𑌘𑍋𑌰𑌪𑌾𑌪𑌨𑌿𑌹𑌤𑍀 𑌰𑌾𑌮𑌾𑌯 𑌤𑌸𑍍𑌮𑍈 𑌨𑌮𑌃 ।
𑌰𑌾𑌮𑌾𑌨𑍍𑌨𑌾𑌸𑍍𑌤𑌿 𑌜𑌗𑌤𑍍𑌰𑌯𑍈𑌕𑌸𑍁𑌲𑌭𑍋 𑌰𑌾𑌮𑌸𑍍𑌯 𑌦𑌾𑌸𑍋𑌽𑌸𑍍𑌮𑍍𑌯𑌹𑌂
𑌰𑌾𑌮𑍇 𑌪𑍍𑌰𑍀𑌤𑌿𑌰𑌤𑍀𑌵 𑌮𑍇 𑌕𑍁𑌲𑌗𑍁𑌰𑍋 𑌶𑍍𑌰𑍀𑌰𑌾𑌮 𑌰𑌕𑍍𑌷𑌸𑍍𑌵 𑌮𑌾𑌮𑍍 ॥ 45

𑌵𑍈𑌦𑍇𑌹𑍀𑌸𑌹𑌿𑌤𑌂 𑌸𑍁𑌰𑌦𑍍𑌰𑍁𑌮𑌤𑌲𑍇 𑌹𑍈𑌮𑍇 𑌮𑌹𑌾𑌮𑌂𑌟𑌪𑍇 ।
𑌮𑌧𑍍𑌯𑍇𑌪𑍁𑌷𑍍𑌪𑌕𑌮𑌾𑌸𑌨𑍇 𑌮𑌣𑌿𑌮𑌯𑍇 𑌵𑍀𑌰𑌾𑌸𑌨𑍇 𑌸𑌂𑌸𑍍𑌥𑌿𑌤𑌮𑍍 ।
𑌅𑌗𑍍𑌰𑍇 𑌵𑌾𑌚𑌯𑌤𑌿 𑌪𑍍𑌰𑌭𑌂𑌜𑌨𑌸𑍁𑌤𑍇 𑌤𑌤𑍍𑌤𑍍𑌵𑌂 𑌮𑍁𑌨𑌿𑌭𑍍𑌯𑌃 𑌪𑌰𑌮𑍍 ।
𑌵𑍍𑌯𑌾𑌖𑍍𑌯𑌾𑌂𑌤𑌂 𑌭𑌰𑌤𑌾𑌦𑌿𑌭𑌿𑌃 𑌪𑌰𑌿𑌵𑍃𑌤𑌂 𑌰𑌾𑌮𑌂 𑌭𑌜𑍇 𑌶𑍍𑌯𑌾𑌮𑌲𑌮𑍍 ॥ 46

𑌵𑌾𑌮𑍇 𑌭𑍂𑌮𑌿𑌸𑍁𑌤𑌾 𑌪𑍁𑌰𑌸𑍍𑌤𑍁 𑌹𑌨𑍁𑌮𑌾𑌨𑍍𑌪𑌶𑍍𑌚𑌾𑌤𑍍𑌸𑍁𑌮𑌿𑌤𑍍𑌰𑌾𑌸𑍁𑌤-
𑌶𑍍𑌶𑌤𑍍𑌰𑍁𑌘𑍍𑌨𑍋 𑌭𑌰𑌤𑌶𑍍𑌚 𑌪𑌾𑌰𑍍𑌶𑍍𑌵𑌦𑌳𑌯𑍋𑌰𑍍𑌵𑌾𑌯𑍍𑌵𑌾𑌦𑌿𑌕𑍋𑌣𑍇𑌷𑍍𑌵𑌪𑌿 ।
𑌸𑍁𑌗𑍍𑌰𑍀𑌵𑌶𑍍𑌚 𑌵𑌿𑌭𑍀𑌷𑌣𑌶𑍍𑌚 𑌯𑍁𑌵𑌰𑌾𑌟𑍍 𑌤𑌾𑌰𑌾𑌸𑍁𑌤𑍋 𑌜𑌾𑌂𑌬𑌵𑌾𑌨𑍍
𑌮𑌧𑍍𑌯𑍇 𑌨𑍀𑌲𑌸𑌰𑍋𑌜𑌕𑍋𑌮𑌲𑌰𑍁𑌚𑌿𑌂 𑌰𑌾𑌮𑌂 𑌭𑌜𑍇 𑌶𑍍𑌯𑌾𑌮𑌲𑌮𑍍 ॥ 4𑍭

𑌕𑍇𑌯𑍂𑌰𑌾𑌂𑌗𑌦𑌕𑌂𑌕𑌣𑍈𑌰𑍍𑌮𑌣𑌿𑌗𑌣𑍈𑌰𑍍𑌵𑍈𑌰𑍋𑌚𑌮𑌾𑌨𑌂 𑌸𑌦𑌾
𑌰𑌾𑌕𑌾𑌪𑌰𑍍𑌵𑌣𑌿𑌚𑌂𑌦𑍍𑌰𑌕𑍋𑌟𑌿𑌸𑌦𑍃𑌶𑌂 𑌛𑌤𑍍𑌰𑍇𑌣 𑌵𑍈𑌰𑌾𑌜𑌿𑌤𑌮𑍍 ।
𑌹𑍇𑌮𑌸𑍍𑌤𑌂𑌭𑌸𑌹𑌸𑍍𑌰𑌷𑍋𑌡𑌶𑌯𑍁𑌤𑍇 𑌮𑌧𑍍𑌯𑍇 𑌮𑌹𑌾𑌮𑌂𑌡𑌪𑍇
𑌦𑍇𑌵𑍇𑌶𑌂 𑌭𑌰𑌤𑌾𑌦𑌿𑌭𑌿𑌃 𑌪𑌰𑌿𑌵𑍃𑌤𑌂 𑌰𑌾𑌮𑌂 𑌭𑌜𑍇 𑌶𑍍𑌯𑌾𑌮𑌲𑌮𑍍 ॥ 4𑍮

𑌸𑌾𑌕𑍇𑌤𑍇 𑌶𑌰𑌦𑌿𑌂𑌦𑍁𑌕𑍁𑌂𑌦𑌧𑌵𑌳𑍇 𑌸𑍌𑌘𑍇 𑌮𑌹𑌾𑌮𑌂𑌟𑌪𑍇 ।
𑌪𑌰𑍍𑌯𑌸𑍍𑌤𑌾𑌗𑌰𑍁𑌧𑍂𑌪𑌧𑍂𑌮𑌪𑌟𑌲𑍇 𑌕𑌰𑍍𑌪𑍂𑌰𑌦𑍀𑌪𑍋𑌜𑍍𑌜𑍍𑌵𑌲𑍇 ।
𑌸𑍁𑌗𑍍𑌰𑍀𑌵𑌾𑌂𑌗𑌦𑌵𑌾𑌯𑍁𑌪𑍁𑌤𑍍𑌰𑌸𑌹𑌿𑌤𑌂 𑌸𑍌𑌮𑌿𑌤𑍍𑌰𑌿𑌣𑌾 𑌸𑍇𑌵𑌿𑌤𑌂
𑌲𑍀𑌲𑌾𑌮𑌾𑌨𑍁𑌷𑌵𑌿𑌗𑍍𑌰𑌹𑌂 𑌰𑌘𑍁𑌪𑌤𑌿𑌂 𑌰𑌾𑌮𑌂 𑌭𑌜𑍇 𑌶𑍍𑌯𑌾𑌮𑌲𑌮𑍍 ॥ 4𑍯

𑌶𑌾𑌂𑌤𑌂 𑌶𑌾𑌰𑌦𑌚𑌂𑌦𑍍𑌰𑌕𑍋𑌟𑌿𑌸𑌦𑍃𑌶𑌂 𑌚𑌂𑌦𑍍𑌰𑌾𑌭𑌿𑌰𑌾𑌮𑌾𑌨𑌨𑌂
𑌚𑌂𑌦𑍍𑌰𑌾𑌰𑍍𑌕𑌾𑌗𑍍𑌨𑌿𑌵𑌿𑌕𑌾𑌸𑌿𑌕𑍁𑌂𑌡𑌲𑌧𑌰𑌂 𑌚𑌂𑌦𑍍𑌰𑌾𑌵𑌤𑌂𑌸𑌸𑍍𑌤𑍁𑌤𑌮𑍍 ।
𑌵𑍀𑌣𑌾𑌪𑍁𑌸𑍍𑌤𑌕𑌸𑌾𑌕𑍍𑌷𑌸𑍂𑌤𑍍𑌰𑌵𑌿𑌲𑌸𑌦𑍍𑌵𑍍𑌯𑌾𑌖𑍍𑌯𑌾𑌨𑌮𑍁𑌦𑍍𑌰𑌾𑌕𑌰𑌂
𑌦𑍇𑌵𑍇𑌶𑌂 𑌭𑌰𑌤𑌾𑌦𑌿𑌭𑌿𑌃 𑌪𑌰𑌿𑌵𑍃𑌤𑌂 𑌰𑌾𑌮𑌂 𑌭𑌜𑍇 𑌶𑍍𑌯𑌾𑌮𑌲𑌮𑍍 ॥ 50

𑌰𑌾𑌮𑌂 𑌰𑌾𑌕𑍍𑌷𑌸𑌮𑌰𑍍𑌦𑌨𑌂 𑌰𑌘𑍁𑌪𑌤𑌿𑌂 𑌶𑌕𑍍𑌰𑌾𑌰𑌿𑌵𑌿𑌧𑍍𑌵𑌂𑌸𑌿𑌨𑌂
𑌸𑍁𑌗𑍍𑌰𑍀𑌵𑍇𑌪𑍍𑌸𑌿𑌤𑌰𑌾𑌜𑍍𑌯𑌦𑌂 𑌸𑍁𑌰𑌪𑌤𑍇𑌃 𑌪𑍁𑌤𑍍𑌰𑌾𑌂𑌤𑌕𑌂 𑌶𑌾𑌰𑍍‍𑌂𑌗𑌿𑌣𑌮𑍍 ।
𑌭𑌕𑍍𑌤𑌾𑌨𑌾𑌮𑌭𑌯𑌪𑍍𑌰𑌦𑌂 𑌭𑌯𑌹𑌰𑌂 𑌪𑌾𑌪𑍌𑌘𑌵𑌿𑌧𑍍𑌵𑌂𑌸𑌿𑌨𑌂
𑌸𑍀𑌤𑌾𑌸𑍇𑌵𑌿𑌤𑌪𑌾𑌦𑌪𑌦𑍍𑌮𑌯𑍁𑌗𑌳𑌂 𑌰𑌾𑌮𑌂 𑌭𑌜𑍇 𑌶𑍍𑌯𑌾𑌮𑌲𑌮𑍍 ॥ 51

𑌕𑌂𑌦𑌰𑍍𑌪𑌾𑌯𑍁𑌤𑌕𑍋𑌟𑌿𑌕𑍋𑌟𑌿𑌤𑍁𑌲𑌿𑌤𑌂 𑌕𑌾𑌲𑌾𑌂𑌬𑍁𑌦𑌶𑍍𑌯𑌾𑌮𑌲𑌂
𑌕𑌂𑌬𑍁𑌗𑍍𑌰𑍀𑌵𑌮𑍁𑌦𑌾𑌰𑌕𑍌𑌸𑍍𑌤𑍁𑌭𑌧𑌰𑌂 𑌕𑌰𑍍𑌣𑌾𑌵𑌤𑌂𑌸𑍋𑌤𑍍𑌪𑌲𑌮𑍍 ।
𑌕𑌸𑍍𑌤𑍂𑌰𑍀𑌤𑌿𑌲𑌕𑍋𑌜𑍍𑌜𑍍𑌵𑌲𑌂 𑌸𑍍𑌮𑌿𑌤𑌮𑍁𑌖𑌂 𑌚𑌿𑌨𑍍𑌮𑍁𑌦𑍍𑌰𑌯𑌾𑌲𑌂𑌕𑍃𑌤𑌂
𑌸𑍀𑌤𑌾𑌲𑌕𑍍𑌷𑍍𑌮𑌣𑌵𑌾𑌯𑍁𑌪𑍁𑌤𑍍𑌰𑌸𑌹𑌿𑌤𑌂 𑌸𑌿𑌂𑌹𑌾𑌸𑌨𑌸𑍍𑌥𑌂 𑌭𑌜𑍇 ॥ 52

𑌸𑌾𑌕𑍇𑌤𑍇 𑌨𑌵𑌰𑌤𑍍𑌨𑌪𑌂𑌕𑍍𑌤𑌿𑌖𑌚𑌿𑌤𑍇 𑌚𑌿𑌤𑍍𑌰𑌧𑍍𑌵𑌜𑌾𑌲𑌂𑌕𑍃𑌤𑍇
𑌵𑌾𑌸𑍇 𑌸𑍍𑌵𑌰𑍍𑌣𑌮𑌯𑍇 𑌦𑌳𑌾𑌷𑍍𑌟𑌲𑌲𑌿𑌤𑍇 𑌪𑌦𑍍𑌮𑍇 𑌵𑌿𑌮𑌾𑌨𑍋𑌤𑍍𑌤𑌮𑍇 ।
𑌆𑌸𑍀𑌨𑌂 𑌭𑌰𑌤𑌾𑌦𑌿𑌸𑍋𑌦𑌰𑌜𑌨𑍈𑌃 𑌶𑌾𑌖𑌾𑌮𑍃𑌗𑍈𑌃 𑌕𑌿𑌨𑍍𑌨𑌰𑍈𑌃
𑌦𑌿𑌕𑍍𑌪𑌾𑌲𑍈𑌰𑍍𑌮𑍁𑌨𑌿𑌪𑍁𑌂𑌗𑌵𑍈𑌰𑍍𑌨𑍃𑌪𑌗𑌣𑍈𑌸𑍍𑌸𑌂𑌸𑍇𑌵𑍍𑌯𑌮𑌾𑌨𑌂 𑌭𑌜𑍇 ॥ 53

𑌕𑌸𑍍𑌤𑍂𑌰𑍀𑌘𑌨𑌸𑌾𑌰𑌕𑍁𑌂𑌕𑍁𑌮𑌲𑌸𑌚𑍍𑌛𑍍𑌰𑍀𑌚𑌂𑌦𑌨𑌾𑌲𑌂𑌕𑍃𑌤𑌂
𑌕𑌂𑌦𑌰𑍍𑌪𑌾𑌧𑌿𑌕𑌸𑍁𑌂𑌦𑌰𑌂 𑌘𑌨𑌨𑌿𑌭𑌂 𑌕𑌾𑌕𑍁𑌤𑍍𑌸𑍍𑌥𑌵𑌂𑌶𑌧𑍍𑌵𑌜𑌮𑍍 ।
𑌕𑌳𑍍𑌯𑌾𑌣𑌾𑌂𑌭𑌰𑌵𑍇𑌷𑍍𑌟𑌿𑌤𑌂 𑌕𑌮𑌲𑌯𑌾 𑌯𑍁𑌕𑍍𑌤𑌂 𑌕𑌲𑌾𑌵𑌲𑍍𑌲𑌭𑌂
𑌕𑌳𑍍𑌯𑌾𑌣𑌾𑌚𑌲𑌕𑌾𑌰𑍍𑌮𑍁𑌕𑌪𑍍𑌰𑌿𑌯𑌸𑌖𑌂 𑌕𑌳𑍍𑌯𑌾𑌣𑌰𑌾𑌮𑌂 𑌭𑌜𑍇 ॥ 54

𑌮𑍁𑌕𑍍𑌤𑍇𑌰𑍍𑌮𑍂𑌲𑌂 𑌮𑍁𑌨𑌿𑌵𑌰𑌹𑍃𑌦𑌾𑌨𑌂𑌦𑌕𑌂𑌦𑌂 𑌮𑍁𑌕𑍁𑌂𑌦𑌂
𑌕𑍂𑌟𑌸𑍍𑌥𑌾𑌖𑍍𑌯𑌂 𑌸𑌕𑌲𑌵𑌰𑌦𑌂 𑌸𑌰𑍍𑌵𑌚𑍈𑌤𑌨𑍍𑌯𑌰𑍂𑌪𑌮𑍍 ।
𑌨𑌾𑌦𑌾𑌤𑍀𑌤𑌂 𑌕𑌮𑌲𑌨𑌿𑌲𑌯𑌂 𑌨𑌾𑌦𑌨𑌾𑌦𑌾𑌂𑌤𑌤𑌤𑍍𑌤𑍍𑌵𑌂
𑌨𑌾𑌦𑌾𑌤𑍀𑌤𑌂 𑌪𑍍𑌰𑌕𑍃𑌤𑌿𑌰𑌹𑌿𑌤𑌂 𑌰𑌾𑌮𑌚𑌂𑌦𑍍𑌰𑌂 𑌭𑌜𑍇𑌽𑌹𑌮𑍍 ॥ 55

𑌤𑌾𑌰𑌾𑌕𑌾𑌰𑌂 𑌨𑌿𑌖𑌿𑌲𑌨𑌿𑌲𑌯𑌂 𑌤𑌤𑍍𑌤𑍍𑌵𑌮𑌸𑍍𑌯𑌾𑌦𑌿𑌲𑌕𑍍𑌷𑍍𑌯𑌂
𑌶𑌬𑍍𑌦𑌾𑌵𑌾𑌚𑍍𑌯𑌂 𑌤𑍍𑌰𑌿𑌗𑍁𑌣𑌰𑌹𑌿𑌤𑌂 𑌵𑍍𑌯𑍋𑌮𑌮𑌂𑌗𑍁𑌷𑍍𑌠𑌮𑌾𑌤𑍍𑌰𑌮𑍍 ।
𑌨𑌿𑌰𑍍𑌵𑌾𑌣𑌾𑌖𑍍𑌯𑌂 𑌸𑌗𑍁𑌣𑌮𑌗𑍁𑌣𑌵𑍍𑌯𑍋𑌮𑌰𑌂𑌧𑍍𑌰𑌾𑌂𑌤𑌰𑌸𑍍𑌥𑌂
𑌸𑍌𑌷𑍁𑌮𑍍𑌨𑌾𑌂𑌤𑌃 𑌪𑍍𑌰𑌣𑌵𑌸𑌹𑌿𑌤𑌂 𑌰𑌾𑌮𑌚𑌂𑌦𑍍𑌰𑌂 𑌭𑌜𑍇𑌽𑌹𑌮𑍍 ॥ 56

𑌨𑌿𑌜𑌾𑌨𑌂𑌦𑌾𑌕𑌾𑌰𑌂 𑌨𑌿𑌗𑌮𑌤𑍁𑌰𑌗𑌾𑌰𑌾𑌧𑌿𑌤𑌪𑌦𑌂
𑌪𑌰𑌬𑍍𑌰𑌹𑍍𑌮𑌾𑌨𑌂𑌦𑌂 𑌪𑌰𑌮𑌪𑌦𑌗𑌂 𑌪𑌾𑌪𑌹𑌰𑌣𑌮𑍍 ।
𑌕𑍃𑌪𑌾𑌪𑌾𑌰𑌾𑌵𑌾𑌰𑌂 𑌪𑌰𑌮𑌪𑍁𑌰𑍁𑌷𑌂 𑌪𑌦𑍍𑌮𑌨𑌿𑌲𑌯𑌂
𑌭𑌜𑍇 𑌰𑌾𑌮𑌂 𑌶𑍍𑌯𑌾𑌮𑌂 𑌪𑍍𑌰𑌕𑍃𑌤𑌿𑌰𑌹𑌿𑌤𑌂 𑌨𑌿𑌰𑍍𑌗𑍁𑌣𑌮𑌹𑌮𑍍 ॥ 5𑍭

𑌸𑌾𑌕𑍇𑌤𑍇 𑌨𑌗𑌰𑍇 𑌸𑌮𑌸𑍍𑌤𑌮𑌹𑌿𑌮𑌾𑌧𑌾𑌰𑍇 𑌜𑌗𑌨𑍍𑌮𑍋𑌹𑌨𑍇
𑌰𑌤𑍍𑌨𑌸𑍍𑌤𑌂𑌭𑌸𑌹𑌸𑍍𑌰𑌮𑌂𑌟𑌪𑌮𑌹𑌾𑌸𑌿𑌂𑌹𑌾𑌸𑌨𑍇 𑌸𑌾𑌂𑌬𑍁𑌜𑍇 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌸𑌿𑌷𑍍𑌠𑌗𑍌𑌤𑌮𑌶𑍁𑌕𑌵𑍍𑌯𑌾𑌸𑌾𑌦𑌿𑌭𑌿𑌰𑍍𑌮𑍌𑌨𑌿𑌭𑌿𑌃
𑌧𑍍𑌯𑍇𑌯𑌂 𑌲𑌕𑍍𑌷𑍍𑌮𑌣𑌲𑍋𑌕𑌪𑌾𑌲𑌸𑌹𑌿𑌤𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 5𑍮

𑌰𑌾𑌮𑌂 𑌶𑍍𑌯𑌾𑌮𑌾𑌭𑌿𑌰𑌾𑌮𑌂 𑌰𑌵𑌿𑌶𑌶𑌿𑌨𑌯𑌨𑌂 𑌕𑍋𑌟𑌿𑌸𑍂𑌰𑍍𑌯𑌪𑍍𑌰𑌕𑌾𑌶𑌂
𑌦𑌿𑌵𑍍𑌯𑌂 𑌦𑌿𑌵𑍍𑌯𑌾𑌸𑍍𑌤𑍍𑌰𑌪𑌾𑌣𑌿𑌂 𑌶𑌰𑌮𑍁𑌖𑌶𑌰𑌧𑌿𑌂 𑌚𑌾𑌰𑍁𑌕𑍋𑌡𑌂𑌡𑌹𑌸𑍍𑌤𑌮𑍍 ।
𑌕𑌾𑌲𑌂 𑌕𑌾𑌲𑌾𑌗𑍍𑌨𑌿𑌰𑍁𑌦𑍍𑌰𑌂 𑌰𑌿𑌪𑍁𑌕𑍁𑌲𑌦𑌹𑌨𑌂 𑌵𑌿𑌘𑍍𑌨𑌵𑌿𑌚𑍍𑌛𑍇𑌦𑌦𑌕𑍍𑌷𑌂
𑌭𑍀𑌮𑌂 𑌭𑍀𑌮𑌾𑌟𑍍𑌟𑌹𑌾𑌸𑌂 𑌸𑌕𑌲𑌭𑌯𑌹𑌰𑌂 𑌰𑌾𑌮𑌚𑌂𑌦𑍍𑌰𑌂 𑌭𑌜𑍇𑌽𑌹𑌮𑍍 ॥ 5𑍯

𑌶𑍍𑌰𑍀𑌰𑌾𑌮𑌂 𑌭𑍁𑌵𑌨𑍈𑌕𑌸𑍁𑌂𑌦𑌰𑌤𑌨𑍁𑌂 𑌧𑌾𑌰𑌾𑌧𑌰𑌶𑍍𑌯𑌾𑌮𑌲𑌂
𑌰𑌾𑌜𑍀𑌵𑌾𑌯𑌤𑌲𑍋𑌚𑌨𑌂 𑌰𑌘𑍁𑌵𑌰𑌂 𑌰𑌾𑌕𑍇𑌂𑌦𑍁𑌬𑌿𑌂𑌬𑌾𑌨𑌨𑌮𑍍 ।
𑌕𑍋𑌦𑌂𑌡𑌾𑌦𑌿𑌨𑌿𑌜𑌾𑌯𑍁𑌧𑌾𑌶𑍍𑌰𑌿𑌤𑌭𑍁𑌜𑍈𑌰𑍍𑌭𑍍𑌰𑌾𑌂𑌤𑌂 𑌵𑌿𑌦𑍇𑌹𑌾𑌤𑍍𑌮𑌜𑌾-
𑌧𑍀𑌶𑌂 𑌭𑌕𑍍𑌤𑌜𑌨𑌾𑌵𑌨𑌂 𑌰𑌘𑍁𑌵𑌰𑌂 𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌂 𑌭𑌜𑍇 ॥ 60

𑌶𑍍𑌰𑍀𑌵𑌤𑍍𑌸𑌾𑌂𑌕𑌮𑍁𑌦𑌾𑌰𑌕𑍌𑌸𑍍𑌤𑍁𑌭𑌲𑌸𑌤𑍍𑌪𑍀𑌤𑌾𑌂𑌬𑌰𑌾𑌲𑌂𑌕𑍃𑌤𑌂
𑌨𑌾𑌨𑌾𑌰𑌤𑍍𑌨𑌵𑌿𑌰𑌾𑌜𑌮𑌾𑌨𑌮𑌕𑍁𑌟𑌂 𑌨𑍀𑌲𑌾𑌂𑌬𑍁𑌦𑌶𑍍𑌯𑌾𑌮𑌲𑌮𑍍 ।
𑌕𑌸𑍍𑌤𑍂𑌰𑍀𑌘𑌨𑌸𑌾𑌰𑌚𑌰𑍍𑌚𑌿𑌤𑌤𑌨𑍁𑌂 𑌮𑌂𑌦𑌾𑌰𑌮𑌾𑌲𑌾𑌧𑌰𑌂
𑌕𑌂𑌦𑌰𑍍𑌪𑌾𑌯𑍁𑌤𑌸𑍁𑌂𑌦𑌰𑌂 𑌰𑌘𑍁𑌪𑌤𑌿𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 61

𑌸𑌦𑌾𑌨𑌂𑌦𑌦𑍇𑌵𑍇 𑌸𑌹𑌸𑍍𑌰𑌾𑌰𑌪𑌦𑍍𑌮𑍇
𑌗𑌲𑌚𑍍𑌚𑌂𑌦𑍍𑌰𑌪𑍀𑌯𑍂𑌷𑌧𑌾𑌰𑌾𑌮𑍃𑌤𑌾𑌂𑌤𑍇 ।
𑌸𑍍𑌥𑌿𑌤𑌂 𑌰𑌾𑌮𑌮𑍂𑌰𑍍𑌤𑌿𑌂 𑌨𑌿𑌷𑍇𑌵𑍇 𑌨𑌿𑌷𑍇𑌵𑍇-
𑌽𑌨𑍍𑌯𑌦𑍈𑌵𑌂 𑌨 𑌸𑍇𑌵𑍇 𑌨 𑌸𑍇𑌵𑍇 𑌨 𑌸𑍇𑌵𑍇 ॥ 62

𑌸𑍁𑌧𑌾𑌭𑌾𑌸𑌿𑌤𑌦𑍍𑌵𑍀𑌪𑌮𑌧𑍍𑌯𑍇 𑌵𑌿𑌮𑌾𑌨𑍇
𑌸𑍁𑌪𑌰𑍍𑌵𑌾𑌳𑌿𑌵𑍃𑌕𑍍𑌷𑍋𑌜𑍍𑌜𑍍𑌵𑌲𑍇 𑌶𑍇𑌷𑌤𑌲𑍍𑌪𑍇 ।
𑌨𑌿𑌷𑌣𑍍𑌣𑌂 𑌰𑌮𑌾𑌂𑌕𑌂 𑌨𑌿𑌷𑍇𑌵𑍇 𑌨𑌿𑌷𑍇𑌵𑍇-
𑌽𑌨𑍍𑌯𑌦𑍈𑌵𑌂 𑌨 𑌸𑍇𑌵𑍇 𑌨 𑌸𑍇𑌵𑍇 𑌨 𑌸𑍇𑌵𑍇 ॥ 63

𑌚𑌿𑌦𑌂𑌶𑌂 𑌸𑌮𑌾𑌨𑌂𑌦𑌮𑌾𑌨𑌂𑌦𑌕𑌂𑌦𑌂
𑌸𑍁𑌷𑍁𑌮𑍍𑌨𑌾𑌖𑍍𑌯𑌰𑌂𑌧𑍍𑌰𑌾𑌂𑌤𑌰𑌾𑌳𑍇 𑌚 𑌹𑌂𑌸𑌮𑍍 ।
𑌸𑌚𑌕𑍍𑌰𑌂 𑌸𑌶𑌂𑌖𑌂 𑌸𑌪𑍀𑌤𑌾𑌂𑌬𑌰𑌾𑌂𑌕𑌂
𑌪𑌰𑌂𑌚𑌾𑌨𑍍𑌯𑌦𑍈𑌵𑌂 𑌨 𑌜𑌾𑌨𑍇 𑌨 𑌜𑌾𑌨𑍇 ॥ 64

𑌚𑌤𑍁𑌰𑍍𑌵𑍇𑌦𑌕𑍂𑌟𑍋𑌲𑍍𑌲𑌸𑌤𑍍𑌕𑌾𑌰𑌣𑌾𑌖𑍍𑌯𑌂
𑌸𑍍𑌫𑍁𑌰𑌦𑍍𑌦𑌿𑌵𑍍𑌯𑌵𑍈𑌮𑌾𑌨𑌿𑌕𑍇 𑌭𑍋𑌗𑌿𑌤𑌲𑍍𑌪𑍇 ।
𑌪𑌰𑌂𑌧𑌾𑌮𑌮𑍂𑌰𑍍𑌤𑌿𑌂 𑌨𑌿𑌷𑌣𑍍𑌣𑌂 𑌨𑌿𑌷𑍇𑌵𑍇
𑌨𑌿𑌷𑍇𑌵𑍇𑌽𑌨𑍍𑌯𑌦𑍈𑌵𑌂 𑌨 𑌸𑍇𑌵𑍇 𑌨 𑌸𑍇𑌵𑍇 ॥ 65

𑌸𑌿𑌂𑌹𑌾𑌸𑌨𑌸𑍍𑌥𑌂 𑌸𑍁𑌰𑌸𑍇𑌵𑌿𑌤𑌵𑍍𑌯𑌂
𑌰𑌤𑍍𑌨𑌾𑌂𑌕𑌿𑌤𑌾𑌲𑌂𑌕𑍃𑌤𑌪𑌾𑌦𑌪𑌦𑍍𑌮𑌮𑍍 ।
𑌸𑍀𑌤𑌾𑌸𑌮𑍇𑌤𑌂 𑌶𑌶𑌿𑌸𑍂𑌰𑍍𑌯𑌨𑍇𑌤𑍍𑌰𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵 𑌰𑌾𑌮𑌚𑌂𑌦𑍍𑌰𑌮𑍍 ॥ 66

𑌰𑌾𑌮𑌂 𑌪𑍁𑌰𑌾𑌣𑌪𑍁𑌰𑍁𑌷𑌂 𑌰𑌮𑌣𑍀𑌯𑌵𑍇𑌷𑌂
𑌰𑌾𑌜𑌾𑌧𑌿𑌰𑌾𑌜𑌮𑌕𑍁𑌟𑌾𑌰𑍍𑌚𑌿𑌤𑌪𑌾𑌦𑌪𑍀𑌠𑌮𑍍 ।
𑌸𑍀𑌤𑌾𑌪𑌤𑌿𑌂 𑌸𑍁𑌨𑌯𑌨𑌂 𑌜𑌗𑌦𑍇𑌕𑌵𑍀𑌰𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌮𑌨𑌿𑌶𑌂 𑌕𑌲𑌯𑌾𑌮𑌿 𑌚𑌿𑌤𑍍𑌤𑍇 ॥ 6𑍭

𑌪𑌰𑌾𑌨𑌂𑌦𑌵𑌸𑍍𑌤𑍁𑌸𑍍𑌵𑌰𑍂𑌪𑌾𑌦𑌿𑌸𑌾𑌕𑍍𑌷𑌿𑌂
𑌪𑌰𑌬𑍍𑌰𑌹𑍍𑌮𑌗𑌮𑍍𑌯𑌂 𑌪𑌰𑌂𑌜𑍍𑌯𑍋𑌤𑌿𑌮𑍂𑌰𑍍𑌤𑌿𑌮𑍍 ।
𑌪𑌰𑌾𑌶𑌕𑍍𑌤𑌿𑌮𑌿𑌤𑍍𑌰𑌾𑌽𑌪𑍍𑌰𑌿𑌯𑌾𑌰𑌾𑌧𑌿𑌤𑌾𑌂𑌘𑍍𑌰𑌿𑌂
𑌪𑌰𑌂𑌧𑌾𑌮𑌰𑍂𑌪𑌂 𑌭𑌜𑍇 𑌰𑌾𑌮𑌚𑌂𑌦𑍍𑌰𑌮𑍍 ॥ 6𑍮

𑌮𑌂𑌦𑌸𑍍𑌮𑌿𑌤𑌂 𑌕𑍁𑌂𑌡𑌲𑌗𑌂𑌡𑌭𑌾𑌗𑌂
𑌪𑍀𑌤𑌾𑌂𑌬𑌰𑌂 𑌭𑍂𑌷𑌣𑌭𑍂𑌷𑌿𑌤𑌾𑌂𑌗𑌮𑍍 ।
𑌨𑍀𑌲𑍋𑌤𑍍𑌪𑌲𑌾𑌂𑌗𑌂 𑌭𑍁𑌵𑌨𑍈𑌕𑌮𑌿𑌤𑍍𑌰𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵 𑌰𑌾𑌮𑌚𑌂𑌦𑍍𑌰𑌮𑍍 ॥ 6𑍯

𑌅𑌚𑌿𑌂𑌤𑍍𑌯𑌮𑌵𑍍𑌯𑌕𑍍𑌤𑌮𑌨𑌂𑌤𑌰𑍂𑌪-
𑌮𑌦𑍍𑌵𑍈𑌤𑌮𑌾𑌨𑌂𑌦𑌮𑌨𑌾𑌦𑌿𑌗𑌮𑍍𑌯𑌮𑍍 ।
𑌪𑍁𑌣𑍍𑌯𑌸𑍍𑌵𑌰𑍂𑌪𑌂 𑌪𑍁𑌰𑍁𑌷𑍋𑌤𑍍𑌤𑌮𑌾𑌖𑍍𑌯𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵 𑌰𑌾𑌮𑌚𑌂𑌦𑍍𑌰𑌮𑍍 ॥ 𑍭0

𑌪𑌦𑍍𑌮𑌾𑌸𑌨𑌸𑍍𑌥𑌂 𑌸𑍁𑌰𑌸𑍇𑌵𑌿𑌤𑌵𑍍𑌯𑌂
𑌪𑌦𑍍𑌮𑌾𑌲𑌯𑌾𑌨𑌂𑌦𑌕𑌟𑌾𑌕𑍍𑌷𑌵𑍀𑌕𑍍𑌷𑍍𑌯𑌮𑍍 ।
𑌗𑌂𑌧𑌰𑍍𑌵𑌵𑌿𑌦𑍍𑌯𑌾𑌧𑌰𑌗𑍀𑌯𑌮𑌾𑌨𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵 𑌰𑌾𑌮𑌚𑌂𑌦𑍍𑌰𑌮𑍍 ॥ 𑍭1

𑌅𑌨𑌂𑌤𑌕𑍀𑌰𑍍𑌤𑌿𑌂 𑌵𑌰𑌦𑌂 𑌪𑍍𑌰𑌸𑌨𑍍𑌨𑌂
𑌪𑌦𑍍𑌮𑌾𑌸𑌨𑌂 𑌸𑍇𑌵𑌕𑌪𑌾𑌰𑌿𑌜𑌾𑌤𑌮𑍍 ।
𑌰𑌾𑌜𑌾𑌧𑌿𑌰𑌾𑌜𑌂 𑌰𑌘𑍁𑌵𑍀𑌰𑌕𑍇𑌤𑍁𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵 𑌰𑌾𑌮𑌚𑌂𑌦𑍍𑌰𑌮𑍍 ॥ 𑍭2

𑌸𑍁𑌗𑍍𑌰𑍀𑌵𑌮𑌿𑌤𑍍𑌰𑌂 𑌸𑍁𑌜𑌨𑌾𑌨𑍁𑌰𑍂𑌪𑌂
𑌲𑌂𑌕𑌾𑌹𑌰𑌂 𑌰𑌾𑌕𑍍𑌷𑌸𑌵𑌂𑌶𑌨𑌾𑌶𑌮𑍍 ।
𑌵𑍇𑌦𑌾𑌶𑍍𑌰𑌯𑌾𑌂𑌗𑌂 𑌵𑌿𑌪𑍁𑌲𑌾𑌯𑌤𑌾𑌕𑍍𑌷𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵 𑌰𑌾𑌮𑌚𑌂𑌦𑍍𑌰𑌮𑍍 ॥ 𑍭3

𑌸𑌕𑍃𑌤𑍍𑌪𑍍𑌰𑌣𑌤𑌰𑌕𑍍𑌷𑌾𑌯𑌾𑌂 𑌸𑌾𑌕𑍍𑌷𑍀 𑌯𑌸𑍍𑌯 𑌵𑌿𑌭𑍀𑌷𑌣𑌃 ।
𑌸𑌾𑌪𑌰𑌾𑌧𑌪𑍍𑌰𑌤𑍀𑌕𑌾𑌰𑌃 𑌸 𑌶𑍍𑌰𑍀𑌰𑌾𑌮𑍋 𑌗𑌤𑌿𑌰𑍍𑌮𑌮 ॥ 𑍭4

𑌫𑌲𑌮𑍂𑌲𑌾𑌶𑌿𑌨𑍌 𑌦𑌾𑌂𑌤𑍌 𑌤𑌾𑌪𑌸𑍌 𑌧𑌰𑍍𑌮𑌚𑌾𑌰𑌿𑌣𑍌 ।
𑌰𑌕𑍍𑌷𑌃𑌕𑍁𑌲𑌵𑌿𑌹𑌂𑌤𑌾𑌰𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 𑍭5

𑌤𑌰𑍁𑌣𑍌 𑌰𑍂𑌪𑌸𑌂𑌪𑌨𑍍𑌨𑍌 𑌸𑍁𑌕𑍁𑌮𑌾𑌰𑍌 𑌮𑌹𑌾𑌬𑌲𑍌 ।
𑌪𑍁𑌂𑌡𑌰𑍀𑌕 𑌵𑌿𑌶𑌾𑌲𑌾𑌕𑍍𑌷𑍌 𑌚𑍀𑌰𑌕𑍃𑌷𑍍𑌣𑌾𑌜𑌿𑌨𑌾𑌂𑌬𑌰𑍌 ॥ 𑍭6

𑌕𑍌𑌸𑌲𑍍𑌯𑌾𑌨𑌯𑌨𑍇𑌂𑌦𑍁𑌂 𑌦𑌶𑌰𑌥𑌮𑍁𑌖𑌾𑌰𑌵𑌿𑌂𑌦𑌮𑌾𑌰𑍍𑌤𑌾𑌂𑌡𑌮𑍍 ।
𑌸𑍀𑌤𑌾𑌮𑌾𑌨𑌸𑌹𑌂𑌸𑌂 𑌰𑌾𑌮𑌂 𑌰𑌾𑌜𑍀𑌵𑌲𑍋𑌚𑌨𑌂 𑌵𑌂𑌦𑍇 ॥ 𑍭𑍭

𑌭𑌰𑍍𑌜𑌨𑌂 𑌭𑌵𑌬𑍀𑌜𑌾𑌨𑌾𑌂 𑌮𑌾𑌰𑍍𑌜𑌨𑌂 𑌸𑍁𑌖𑌸𑌂𑌪𑌦𑌾𑌮𑍍 ।
𑌤𑌰𑍍𑌜𑌨𑌂 𑌯𑌮𑌦𑍂𑌤𑌾𑌨𑌾𑌂 𑌰𑌾𑌮𑌰𑌾𑌮𑍇𑌤𑌿 𑌕𑍀𑌰𑍍𑌤𑌨𑌮𑍍 ॥ 𑍭𑍮

𑌨 𑌜𑌾𑌨𑍇 𑌜𑌾𑌨𑌕𑍀 𑌜𑌾𑌨𑍇 𑌰𑌾𑌮 𑌤𑍍𑌵𑌨𑍍𑌨𑌾𑌮𑌵𑍈𑌭𑌵𑌮𑍍 ।
𑌸𑌰𑍍𑌵𑍇𑌶𑍋 𑌭𑌗𑌵𑌾𑌨𑍍 𑌶𑌂𑌭𑍁𑌰𑍍𑌵𑌾𑌲𑍍𑌮𑍀𑌕𑌿𑌰𑍍𑌵𑍇𑌤𑍍𑌤𑌿 𑌵𑌾 𑌨𑌵𑌾 ॥ 𑍭𑍯

𑌕𑌰𑌤𑌲𑌧𑍃𑌤𑌚𑌾𑌪𑌂 𑌕𑌾𑌲𑌮𑍇𑌘𑌸𑍍𑌵𑌰𑍂𑌪𑌂
𑌸𑌰𑌸𑌿𑌜𑌦𑌳𑌨𑍇𑌤𑍍𑌰𑌂 𑌚𑌾𑌰𑍁𑌹𑌾𑌸𑌂 𑌸𑍁𑌗𑌾𑌤𑍍𑌰𑌮𑍍 ।
𑌵𑌿𑌚𑌿𑌨𑍁𑌤𑌵𑌨𑌵𑌾𑌸𑌂 𑌵𑌿𑌕𑍍𑌰𑌮𑍋𑌦𑌗𑍍𑌰𑌵𑍇𑌷𑌂
𑌪𑍍𑌰𑌣𑌮𑌤 𑌰𑌘𑍁𑌨𑌾𑌥𑌂 𑌜𑌾𑌨𑌕𑍀𑌪𑍍𑌰𑌾𑌣𑌨𑌾𑌥𑌮𑍍 ॥ 𑍮0

𑌵𑌿𑌦𑍍𑌯𑍁𑌤𑍍𑌸𑍍𑌫𑍁𑌰𑌨𑍍𑌮𑌕𑌰𑌕𑍁𑌂𑌡𑌲𑌦𑍀𑌪𑍍𑌤𑌚𑌾𑌰𑍁-
𑌗𑌂𑌡𑌸𑍍𑌥𑌲𑌂 𑌮𑌣𑌿𑌕𑌿𑌰𑍀𑌟𑌵𑌿𑌰𑌾𑌜𑌮𑌾𑌨𑌮𑍍 ।
𑌪𑍀𑌤𑌾𑌂𑌬𑌰𑌂 𑌜𑌲𑌦𑌨𑍀𑌲𑌮𑍁𑌦𑌾𑌰𑌕𑌾𑌂𑌤𑌿𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌮𑌨𑌿𑌶𑌂 𑌕𑌲𑌯𑌾𑌮𑌿 𑌚𑌿𑌤𑍍𑌤𑍇 ॥ 𑍮1

𑌰𑌤𑍍𑌨𑍋𑌲𑍍𑌲𑌸𑌜𑍍𑌜𑍍𑌵𑌲𑌿𑌤𑌕𑍁𑌂𑌡𑌲𑌗𑌂𑌡𑌭𑌾𑌗𑌂
𑌕𑌸𑍍𑌤𑍂𑌰𑌿𑌕𑌾𑌤𑌿𑌲𑌕𑌶𑍋𑌭𑌿𑌤𑌫𑌾𑌲𑌭𑌾𑌗𑌮𑍍 ।
𑌕𑌰𑍍𑌣𑌾𑌂𑌤𑌦𑍀𑌰𑍍𑌘𑌨𑌯𑌨𑌂 𑌕𑌰𑍁𑌣𑌾𑌕𑌟𑌾𑌕𑍍𑌷𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰 𑌮𑍁𑌖𑌮𑌾𑌤𑍍𑌮𑌨𑌿 𑌸𑌨𑍍𑌨𑌿𑌧𑌤𑍍𑌤𑌮𑍍 ॥ 𑍮2

𑌵𑍈𑌦𑍇𑌹𑍀𑌸𑌹𑌿𑌤𑌂 𑌚 𑌲𑌕𑍍𑌷𑍍𑌮𑌣𑌯𑍁𑌤𑌂 𑌕𑍈𑌕𑍇𑌯𑌿𑌪𑍁𑌤𑍍𑌰𑌾𑌨𑍍𑌵𑌿𑌤𑌂
𑌸𑍁𑌗𑍍𑌰𑍀𑌵𑌂 𑌚 𑌵𑌿𑌭𑍀𑌷𑌣𑌾𑌨𑌿𑌲𑌸𑍁𑌤𑍌 𑌨𑍀𑌲𑌂 𑌨𑌲𑌂 𑌸𑌾𑌂𑌗𑌦𑌮𑍍 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌸𑌿𑌷𑍍𑌠𑌗𑍌𑌤𑌮𑌭𑌰𑌦𑍍𑌵𑌾𑌜𑌾𑌦𑌿𑌕𑌾𑌨𑍍 𑌮𑌾𑌨𑌯𑌨𑍍
𑌰𑌾𑌮𑍋 𑌮𑌾𑌰𑍁𑌤𑌿𑌸𑍇𑌵𑌿𑌤𑌃 𑌸𑍍𑌮𑌰𑌤𑍁 𑌮𑌾𑌂 𑌸𑌾𑌮𑍍𑌰𑌾𑌜𑍍𑌯𑌸𑌿𑌂𑌹𑌾𑌸𑌨𑍇 ॥ 𑍮3

𑌸𑌕𑌲𑌗𑍁𑌣𑌨𑌿𑌧𑌾𑌨𑌂 𑌯𑍋𑌗𑌿𑌭𑌿𑌸𑍍𑌸𑍍𑌤𑍂𑌯𑌮𑌾𑌨𑌂
𑌭𑌜𑌿𑌤𑌸𑍁𑌰𑌵𑌿𑌮𑌾𑌨𑌂 𑌰𑌕𑍍𑌷𑌿𑌤𑍇𑌂𑌦𑍍𑌰𑌾𑌦𑌿𑌮𑌾𑌨𑌮𑍍 ।
𑌮𑌹𑌿𑌤𑌵𑍃𑌷𑌭𑌯𑌾𑌨𑌂 𑌸𑍀𑌤𑌯𑌾 𑌶𑍋𑌭𑌮𑌾𑌨𑌂
𑌸𑍍𑌮𑌰𑌤𑍁 𑌹𑍃𑌦𑌯𑌭𑌾𑌨𑍁𑌂 𑌬𑍍𑌰𑌹𑍍𑌮𑌰𑌾𑌮𑌾𑌭𑌿𑌰𑌾𑌮𑌮𑍍 ॥ 𑍮4

𑌤𑍍𑌰𑌿𑌦𑌶𑌕𑍁𑌮𑍁𑌦𑌚𑌂𑌦𑍍𑌰𑍋 𑌦𑌾𑌨𑌵𑌾𑌂𑌭𑍋𑌜𑌚𑌂𑌦𑍍𑌰𑍋
𑌦𑍁𑌰𑌿𑌤𑌤𑌿𑌮𑌿𑌰𑌚𑌂𑌦𑍍𑌰𑍋 𑌯𑍋𑌗𑌿𑌨𑌾𑌂 𑌜𑍍𑌞𑌾𑌨𑌚𑌂𑌦𑍍𑌰𑌃 ।
𑌪𑍍𑌰𑌣𑌤𑌨𑌯𑌨𑌚𑌂𑌦𑍍𑌰𑍋 𑌮𑍈𑌥𑌿𑌲𑍀𑌨𑍇𑌤𑍍𑌰𑌚𑌂𑌦𑍍𑌰𑍋
𑌦𑌶𑌮𑍁𑌖𑌰𑌿𑌪𑍁𑌚𑌂𑌦𑍍𑌰𑌃 𑌪𑌾𑌤𑍁 𑌮𑌾𑌂 𑌰𑌾𑌮𑌚𑌂𑌦𑍍𑌰𑌃 ॥ 𑍮5

𑌯𑌨𑍍𑌨𑌾𑌮𑍈𑌵 𑌸𑌹𑌸𑍍𑌰𑌨𑌾𑌮𑌸𑌦𑍃𑌶𑌂 𑌯𑌨𑍍𑌨𑌾𑌮 𑌵𑍇𑌦𑍈𑌸𑍍𑌸𑌮𑌂
𑌯𑌨𑍍𑌨𑌾𑌮𑌾𑌂𑌕𑌿𑌤𑌵𑌾𑌕𑍍𑌯-𑌮𑌾𑌸𑍁𑌰𑌬𑌲𑌸𑍍𑌤𑍍𑌰𑍀𑌗𑌰𑍍𑌭𑌵𑌿𑌚𑍍𑌛𑍇𑌦𑌨𑌮𑍍 ।
𑌯𑌨𑍍𑌨𑌾𑌮 𑌶𑍍𑌵𑌪𑌚𑌾𑌰𑍍𑌯𑌭𑍇𑌦𑌰𑌹𑌿𑌤𑌂 𑌮𑍁𑌕𑍍𑌤𑌿𑌪𑍍𑌰𑌦𑌾𑌨𑍋𑌜𑍍𑌜𑍍𑌵𑌲𑌂
𑌤𑌨𑍍𑌨𑌾𑌮𑌾𑌽𑌲𑌘𑍁𑌰𑌾𑌮𑌰𑌾𑌮𑌰𑌮𑌣𑌂 𑌶𑍍𑌰𑍀𑌰𑌾𑌮𑌨𑌾𑌮𑌾𑌮𑍃𑌤𑌮𑍍 ॥ 𑍮6

𑌰𑌾𑌜𑍀𑌵𑌨𑍇𑌤𑍍𑌰 𑌰𑌘𑍁𑌪𑍁𑌂𑌗𑌵 𑌰𑌾𑌮𑌭𑌦𑍍𑌰
𑌰𑌾𑌕𑍇𑌂𑌦𑍁𑌬𑌿𑌂𑌬𑌸𑌦𑍃𑌶𑌾𑌨𑌨 𑌨𑍀𑌲𑌗𑌾𑌤𑍍𑌰 ।
𑌰𑌾𑌮𑌾𑌽𑌭𑌿𑌰𑌾𑌮 𑌰𑌘𑍁𑌵𑌂𑌶𑌸𑌮𑍁𑌦𑍍𑌭𑌵 𑌤𑍍𑌵𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 𑍮𑍭

𑌮𑌾𑌣𑌿𑌕𑍍𑌯𑌮𑌂𑌜𑍀𑌰𑌪𑌦𑌾𑌰𑌵𑌿𑌂𑌦𑌂
𑌰𑌾𑌮𑌾𑌰𑍍𑌕𑌸𑌂𑌫𑍁𑌲𑍍𑌲𑌮𑍁𑌖𑌾𑌰𑌵𑌿𑌂𑌦𑌮𑍍 ।
𑌭𑌕𑍍𑌤𑌾𑌭𑌯𑌪𑍍𑌰𑌾𑌪𑌿𑌕𑌰𑌾𑌰𑌵𑌿𑌂𑌦𑌾𑌂
𑌦𑍇𑌵𑍀𑌂 𑌭𑌜𑍇 𑌰𑌾𑌘𑌵𑌵𑌲𑍍𑌲𑌭𑌾𑌂 𑌤𑌾𑌮𑍍 ॥ 𑍮𑍮

𑌜𑌯𑌤𑍁 𑌵𑌿𑌜𑌯𑌕𑌾𑌰𑍀 𑌜𑌾𑌨𑌕𑍀𑌮𑍋𑌦𑌕𑌾𑌰𑍀
𑌤𑌪𑌨𑌕𑍁𑌲𑌵𑌿𑌹𑌾𑌰𑍀 𑌦𑌂𑌡𑌕𑌾𑌰𑌣𑍍𑌯𑌚𑌾𑌰𑍀 ।
𑌦𑌶𑌵𑌦𑌨𑌕𑍁𑌠𑌾𑌰𑍀 𑌦𑍈𑌤𑍍𑌯𑌵𑌿𑌚𑍍𑌛𑍇𑌦𑌕𑌾𑌰𑍀
𑌮𑌣𑌿𑌮𑌕𑍁𑌟𑌕𑌧𑌾𑌰𑍀 𑌚𑌂𑌡𑌕𑍋𑌦𑌂𑌡𑌧𑌾𑌰𑍀 ॥ 𑍮𑍯

𑌰𑌾𑌮𑌃 𑌪𑌿𑌤𑌾 𑌰𑌘𑌵 𑌏𑌵 𑌮𑌾𑌤𑌾
𑌰𑌾𑌮𑌸𑍍𑌸𑍁𑌬𑌂𑌧𑍁𑌶𑍍𑌚 𑌸𑌖𑌾 𑌹𑌿𑌤𑌶𑍍𑌚 ।
𑌰𑌾𑌮𑍋 𑌗𑍁𑌰𑍁𑌰𑍍𑌮𑍇 𑌪𑌰𑌮𑌂 𑌚 𑌦𑍈𑌵𑌂
𑌰𑌾𑌮𑌂 𑌵𑌿𑌨𑌾 𑌨𑌾𑌽𑌨𑍍𑌯𑌮𑌹𑌂 𑌸𑍍𑌮𑌰𑌾𑌮𑌿 ॥ 𑍯0

𑌶𑍍𑌰𑍀𑌰𑌾𑌮 𑌮𑍇 𑌤𑍍𑌵𑌂 𑌹𑌿 𑌪𑌿𑌤𑌾 𑌚 𑌮𑌾𑌤𑌾
𑌶𑍍𑌰𑍀𑌰𑌾𑌮 𑌮𑍇 𑌤𑍍𑌵𑌂 𑌹𑌿 𑌸𑍁𑌹𑍃𑌚𑍍𑌚 𑌬𑌂𑌧𑍁𑌃 ।
𑌶𑍍𑌰𑍀𑌰𑌾𑌮 𑌮𑍇 𑌤𑍍𑌵𑌂 𑌹𑌿 𑌗𑍁𑌰𑍁𑌶𑍍𑌚 𑌗𑍋𑌷𑍍𑌠𑍀
𑌶𑍍𑌰𑍀𑌰𑌾𑌮 𑌮𑍇 𑌤𑍍𑌵𑌂 𑌹𑌿 𑌸𑌮𑌸𑍍𑌤𑌮𑍇𑌵 ॥ 𑍯1

𑌰𑌾𑌮𑌚𑌂𑌦𑍍𑌰𑌚𑌰𑌿𑌤𑌾𑌮𑍃𑌤𑌪𑌾𑌨𑌂
𑌸𑍋𑌮𑌪𑌾𑌨𑌶𑌤𑌕𑍋𑌟𑌿𑌸𑌮𑌾𑌨𑌮𑍍 ।
𑌸𑍋𑌮𑌪𑌾𑌨𑌶𑌤𑌕𑍋𑌟𑌿𑌭𑌿𑌰𑍀𑌯𑌾-
𑌜𑍍𑌜𑌨𑍍𑌮 𑌨𑍈𑌤𑌿 𑌰𑌘𑍁𑌨𑌾𑌯𑌕𑌨𑌾𑌮𑍍𑌨𑌾 ॥ 𑍯2

𑌰𑌾𑌮 𑌰𑌾𑌮 𑌦𑌯𑌾𑌸𑌿𑌂𑌧𑍋 𑌰𑌾𑌵𑌣𑌾𑌰𑍇 𑌜𑌗𑌤𑍍𑌪𑌤𑍇 ।
𑌤𑍍𑌵𑌤𑍍𑌪𑌾𑌦𑌕𑌮𑌲𑌾𑌸𑌕𑍍𑌤𑌿-𑌰𑍍𑌭𑌵𑍇𑌜𑍍𑌜𑌨𑍍𑌮𑌨𑌿 𑌜𑌨𑍍𑌮𑌨𑌿 ॥ 𑍯3

𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑍇𑌤𑌿 𑌦𑌯𑌾𑌪𑌰𑍇𑌤𑌿
𑌭𑌕𑍍𑌤𑌪𑍍𑌰𑌿𑌯𑍇𑌤𑌿 𑌭𑌵𑌬𑌂𑌧𑌨𑌮𑍋𑌚𑌨𑍇𑌤𑌿 ।
𑌨𑌾𑌥𑍇𑌤𑌿 𑌨𑌾𑌗𑌶𑌯𑌨𑍇𑌤𑌿 𑌸𑌦𑌾 𑌸𑍍𑌤𑍁𑌵𑌂𑌤𑌂
𑌮𑌾𑌂 𑌪𑌾𑌹𑌿 𑌭𑍀𑌤𑌮𑌨𑌿𑌶𑌂 𑌕𑍃𑌪𑌣𑌂 𑌕𑍃𑌪𑌾𑌳𑍋 ॥ 𑍯4

𑌅𑌯𑍋𑌧𑍍𑌯𑌾𑌨𑌾𑌥 𑌰𑌾𑌜𑍇𑌂𑌦𑍍𑌰 𑌸𑍀𑌤𑌾𑌕𑌾𑌂𑌤 𑌜𑌗𑌤𑍍𑌪𑌤𑍇 ।
𑌶𑍍𑌰𑍀𑌰𑌾𑌮 𑌪𑍁𑌂𑌡𑌰𑍀𑌕𑌾𑌕𑍍𑌷 𑌰𑌾𑌮𑌚𑌂𑌦𑍍𑌰 𑌨𑌮𑍋𑌽𑌸𑍍𑌤𑍁 𑌤𑍇 ॥ 𑍯5

𑌹𑍇 𑌰𑌾𑌮 𑌹𑍇 𑌰𑌮𑌣 𑌹𑍇 𑌜𑌗𑌦𑍇𑌕𑌵𑍀𑌰
𑌹𑍇 𑌨𑌾𑌥 𑌹𑍇 𑌰𑌘𑍁𑌪𑌤𑍇 𑌕𑌰𑍁𑌣𑌾𑌲𑌵𑌾𑌲 ।
𑌹𑍇 𑌜𑌾𑌨𑌕𑍀𑌰𑌮𑌣 𑌹𑍇 𑌜𑌗𑌦𑍇𑌕𑌬𑌂𑌧𑍋
𑌮𑌾𑌂 𑌪𑌾𑌹𑌿 𑌦𑍀𑌨𑌮𑌨𑌿𑌶𑌂 𑌕𑍃𑌪𑌣𑌂 𑌕𑍃𑌤𑌘𑍍𑌨𑌮𑍍 ॥ 𑍯6

𑌜𑌾𑌨𑌾𑌤𑌿 𑌰𑌾𑌮 𑌤𑌵 𑌤𑌤𑍍𑌤𑍍𑌵𑌗𑌤𑌿𑌂 𑌹𑌨𑍂𑌮𑌾𑌨𑍍 ।
𑌜𑌾𑌨𑌾𑌤𑌿 𑌰𑌾𑌮 𑌤𑌵 𑌸𑌖𑍍𑌯𑌗𑌤𑌿𑌂 𑌕𑌪𑍀𑌶𑌃 ।
𑌜𑌾𑌨𑌾𑌤𑌿 𑌰𑌾𑌮 𑌤𑌵 𑌯𑍁𑌦𑍍𑌧𑌗𑌤𑌿𑌂 𑌦𑌶𑌾𑌸𑍍𑌯𑍋 ।
𑌜𑌾𑌨𑌾𑌤𑌿 𑌰𑌾𑌮 𑌧𑌨𑌦𑌾𑌨𑍁𑌜 𑌏𑌵 𑌸𑌤𑍍𑌯𑌮𑍍 ॥ 𑍯𑍭

𑌸𑍇𑌵𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌶𑍍𑌰𑌵𑌣𑌶𑍁𑌭𑌕𑌰𑌂 𑌶𑍍𑌰𑍇𑌷𑍍𑌠𑌸𑍁𑌜𑍍𑌞𑌾𑌨𑌿𑌮𑌂𑌤𑍍𑌰𑌂
𑌸𑍍𑌤𑌵𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌨𑌰𑌕𑌦𑍁𑌰𑌿𑌤𑌦𑍁𑌰𑍍𑌵𑌾𑌰𑌨𑌿𑌰𑍍𑌘𑌾𑌤𑌮𑌂𑌤𑍍𑌰𑌮𑍍 ।
𑌭𑌵𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌭𑌜𑌤𑍁 𑌭𑌜𑌤𑍁 𑌸𑌂𑌸𑌾𑌰𑌨𑌿𑌸𑍍𑌤𑌾𑌰𑌮𑌂𑌤𑍍𑌰𑌂
𑌦𑌿𑌵𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌦𑌿𑌵𑌿 𑌭𑍁𑌵𑌿 𑌵𑌿𑌲𑌸𑌨𑍍𑌮𑍋𑌕𑍍𑌷𑌰𑌕𑍍𑌷𑍈𑌕𑌮𑌂𑌤𑍍𑌰𑌮𑍍 ॥ 𑍯𑍮

𑌨𑌿𑌖𑌿𑌲𑌨𑌿𑌲𑌯𑌮𑌂𑌤𑍍𑌰𑌂 𑌨𑌿𑌤𑍍𑌯𑌤𑌤𑍍𑌤𑍍𑌵𑌾𑌖𑍍𑌯𑌮𑌂𑌤𑍍𑌰𑌂
𑌭𑌵𑌕𑍁𑌲𑌹𑌰𑌮𑌂𑌤𑍍𑌰𑌂 𑌭𑍂𑌮𑌿𑌜𑌾𑌪𑍍𑌰𑌾𑌣𑌮𑌂𑌤𑍍𑌰𑌮𑍍 ।
𑌪𑌵𑌨𑌜𑌨𑍁𑌤𑌮𑌂𑌤𑍍𑌰𑌂 𑌪𑌾𑌰𑍍𑌵𑌤𑍀𑌮𑍋𑌕𑍍𑌷𑌮𑌂𑌤𑍍𑌰𑌂
𑌪𑌶𑍁𑌪𑌤𑌿𑌨𑌿𑌜𑌮𑌂𑌤𑍍𑌰𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌮𑌂𑌤𑍍𑌰𑌮𑍍 ॥ 𑍯𑍯

𑌪𑍍𑌰𑌣𑌵𑌨𑌿𑌲𑌯𑌮𑌂𑌤𑍍𑌰𑌂 𑌪𑍍𑌰𑌾𑌣𑌨𑌿𑌰𑍍𑌵𑌾𑌣𑌮𑌂𑌤𑍍𑌰𑌂
𑌪𑍍𑌰𑌕𑍃𑌤𑌿𑌪𑍁𑌰𑍁𑌷𑌮𑌂𑌤𑍍𑌰𑌂 𑌬𑍍𑌰𑌹𑍍𑌮𑌰𑍁𑌦𑍍𑌰𑍇𑌂𑌦𑍍𑌰𑌮𑌂𑌤𑍍𑌰𑌮𑍍 ।
𑌪𑍍𑌰𑌕𑌟𑌦𑍁𑌰𑌿𑌤𑌰𑌾𑌗𑌦𑍍𑌵𑍇𑌷𑌨𑌿𑌰𑍍𑌣𑌾𑌶𑌮𑌂𑌤𑍍𑌰𑌂
𑌰𑌘𑍁𑌪𑌤𑌿𑌨𑌿𑌜𑌮𑌂𑌤𑍍𑌰𑌂 𑌰𑌾𑌮𑌰𑌾𑌮𑍇𑌤𑌿𑌮𑌂𑌤𑍍𑌰𑌮𑍍 ॥ 100

𑌦𑌶𑌰𑌥𑌸𑍁𑌤𑌮𑌂𑌤𑍍𑌰𑌂 𑌦𑍈𑌤𑍍𑌯𑌸𑌂𑌹𑌾𑌰𑌮𑌂𑌤𑍍𑌰𑌂
𑌵𑌿𑌬𑍁𑌧𑌵𑌿𑌨𑍁𑌤𑌮𑌂𑌤𑍍𑌰𑌂 𑌵𑌿𑌶𑍍𑌵𑌵𑌿𑌖𑍍𑌯𑌾𑌤𑌮𑌂𑌤𑍍𑌰𑌮𑍍 ।
𑌮𑍁𑌨𑌿𑌗𑌣𑌨𑍁𑌤𑌮𑌂𑌤𑍍𑌰𑌂 𑌮𑍁𑌕𑍍𑌤𑌿𑌮𑌾𑌰𑍍𑌗𑍈𑌕𑌮𑌂𑌤𑍍𑌰𑌂
𑌰𑌘𑍁𑌪𑌤𑌿𑌨𑌿𑌜𑌮𑌂𑌤𑍍𑌰𑌂 𑌰𑌾𑌮𑌰𑌾𑌮𑍇𑌤𑌿𑌮𑌂𑌤𑍍𑌰𑌮𑍍 ॥ 101

𑌸𑌂𑌸𑌾𑌰𑌸𑌾𑌗𑌰𑌭𑌯𑌾𑌪𑌹𑌵𑌿𑌶𑍍𑌵𑌮𑌂𑌤𑍍𑌰𑌂
𑌸𑌾𑌕𑍍𑌷𑌾𑌨𑍍𑌮𑍁𑌮𑍁𑌕𑍍𑌷𑍁𑌜𑌨𑌸𑍇𑌵𑌿𑌤𑌸𑌿𑌦𑍍𑌧𑌮𑌂𑌤𑍍𑌰𑌮𑍍 ।
𑌸𑌾𑌰𑌂𑌗𑌹𑌸𑍍𑌤𑌮𑍁𑌖𑌹𑌸𑍍𑌤𑌨𑌿𑌵𑌾𑌸𑌮𑌂𑌤𑍍𑌰𑌂
𑌕𑍈𑌵𑌲𑍍𑌯𑌮𑌂𑌤𑍍𑌰𑌮𑌨𑌿𑌶𑌂 𑌭𑌜 𑌰𑌾𑌮𑌮𑌂𑌤𑍍𑌰𑌮𑍍 ॥ 102

𑌜𑌯𑌤𑍁 𑌜𑌯𑌤𑍁 𑌮𑌂𑌤𑍍𑌰𑌂 𑌜𑌨𑍍𑌮𑌸𑌾𑌫𑌲𑍍𑌯𑌮𑌂𑌤𑍍𑌰𑌂
𑌜𑌨𑌨𑌮𑌰𑌣𑌭𑍇𑌦𑌕𑍍𑌲𑍇𑌶𑌵𑌿𑌚𑍍𑌛𑍇𑌦𑌮𑌂𑌤𑍍𑌰𑌮𑍍 ।
𑌸𑌕𑌲𑌨𑌿𑌗𑌮𑌮𑌂𑌤𑍍𑌰𑌂 𑌸𑌰𑍍𑌵𑌶𑌾𑌸𑍍𑌤𑍍𑌰𑍈𑌕𑌮𑌂𑌤𑍍𑌰𑌂
𑌰𑌘𑍁𑌪𑌤𑌿𑌨𑌿𑌜𑌮𑌂𑌤𑍍𑌰𑌂 𑌰𑌾𑌮𑌰𑌾𑌮𑍇𑌤𑌿𑌮𑌂𑌤𑍍𑌰𑌮𑍍 ॥ 103

𑌜𑌗𑌤𑌿 𑌵𑌿𑌶𑌦𑌮𑌂𑌤𑍍𑌰𑌂 𑌜𑌾𑌨𑌕𑍀𑌪𑍍𑌰𑌾𑌣𑌮𑌂𑌤𑍍𑌰𑌂
𑌵𑌿𑌬𑍁𑌧𑌵𑌿𑌨𑍁𑌤𑌮𑌂𑌤𑍍𑌰𑌂 𑌵𑌿𑌶𑍍𑌵𑌵𑌿𑌖𑍍𑌯𑌾𑌤𑌮𑌂𑌤𑍍𑌰𑌮𑍍 ।
𑌦𑌶𑌰𑌥𑌸𑍁𑌤𑌮𑌂𑌤𑍍𑌰𑌂 𑌦𑍈𑌤𑍍𑌯𑌸𑌂𑌹𑌾𑌰𑌮𑌂𑌤𑍍𑌰𑌂
𑌰𑌘𑍁𑌪𑌤𑌿𑌨𑌿𑌜𑌮𑌂𑌤𑍍𑌰𑌂 𑌰𑌾𑌮𑌰𑌾𑌮𑍇𑌤𑌿𑌮𑌂𑌤𑍍𑌰𑌮𑍍 ॥ 104

𑌬𑍍𑌰𑌹𑍍𑌮𑌾𑌦𑌿𑌯𑍋𑌗𑌿𑌮𑍁𑌨𑌿𑌪𑍂𑌜𑌿𑌤𑌸𑌿𑌦𑍍𑌧𑌮𑌂𑌤𑍍𑌰𑌂
𑌦𑌾𑌰𑌿𑌦𑍍𑌰𑍍𑌯𑌦𑍁𑌃𑌖𑌭𑌵𑌰𑍋𑌗𑌵𑌿𑌨𑌾𑌶𑌮𑌂𑌤𑍍𑌰𑌮𑍍 ।
𑌸𑌂𑌸𑌾𑌰𑌸𑌾𑌗𑌰𑌸𑌮𑍁𑌤𑍍𑌤𑌰𑌣𑍈𑌕𑌮𑌂𑌤𑍍𑌰𑌂
𑌵𑌂𑌦𑍇 𑌮𑌹𑌾𑌭𑌯𑌹𑌰𑌂 𑌰𑌘𑍁𑌰𑌾𑌮𑌮𑌂𑌤𑍍𑌰𑌮𑍍 ॥ 105

𑌶𑌤𑍍𑌰𑍁𑌚𑍍𑌛𑍇𑌦𑍈𑌕𑌮𑌂𑌤𑍍𑌰𑌂 𑌸𑌰𑌸𑌮𑍁𑌪𑌨𑌿𑌷𑌦𑍍𑌵𑌾𑌕𑍍𑌯𑌸𑌂𑌪𑍂𑌜𑍍𑌯𑌮𑌂𑌤𑍍𑌰𑌂
𑌸𑌂𑌸𑌾𑌰𑍋𑌤𑍍𑌤𑌾𑌰𑌮𑌂𑌤𑍍𑌰𑌂 𑌸𑌮𑍁𑌚𑌿𑌤𑌸𑌮𑌯𑍇 𑌸𑌂𑌗𑌨𑌿𑌰𑍍𑌯𑌾𑌣𑌮𑌂𑌤𑍍𑌰𑌮𑍍 ।
𑌸𑌰𑍍𑌵𑍈𑌶𑍍𑌵𑌰𑍍𑌯𑍈𑌕𑌮𑌂𑌤𑍍𑌰𑌂 𑌵𑍍𑌯𑌸𑌨𑌭𑍁𑌜𑌗𑌸𑌂𑌦𑌷𑍍𑌟𑌸𑌂𑌤𑍍𑌰𑌾𑌣𑌮𑌂𑌤𑍍𑌰𑌂
𑌜𑌿𑌹𑍍𑌵𑍇 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌜𑌪 𑌜𑌪 𑌸𑌫𑌲𑌂 𑌜𑌨𑍍𑌮𑌸𑌾𑌫𑌲𑍍𑌯𑌮𑌂𑌤𑍍𑌰𑌮𑍍 ॥ 106

𑌨𑌿𑌤𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌨𑌿𑌰𑍁𑌪𑌮𑌮𑌧𑌿𑌕𑌂 𑌨𑍀𑌤𑌿𑌸𑍁𑌜𑍍𑌞𑌾𑌨𑌮𑌂𑌤𑍍𑌰𑌂
𑌸𑌤𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌸𑌦𑌮𑌲𑌹𑍃𑌦𑌯𑍇 𑌸𑌰𑍍𑌵𑌦𑌾𑌰𑍋𑌗𑍍𑌯𑌮𑌂𑌤𑍍𑌰𑌮𑍍 ।
𑌸𑍍𑌤𑍁𑌤𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌸𑍁𑌲𑌲𑌿𑌤𑌸𑍁𑌮𑌨𑌸𑍍𑌸𑍌𑌖𑍍𑌯𑌸𑍌𑌭𑌾𑌗𑍍𑌯𑌮𑌂𑌤𑍍𑌰𑌂
𑌪𑌠𑍍𑌯𑌂 𑌶𑍍𑌰𑍀𑌰𑌾𑌮𑌮𑌂𑌤𑍍𑌰𑌂 𑌪𑌵𑌨𑌜𑌵𑌰𑌦𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌮𑌂𑌤𑍍𑌰𑌮𑍍 ॥ 10𑍭

𑌵𑍍𑌯𑌾𑌮𑍋𑌹𑌪𑍍𑌰𑌶𑌮𑍌𑌷𑌧𑌂 𑌮𑍁𑌨𑌿𑌮𑌨𑍋𑌵𑍃𑌤𑍍𑌤𑌿𑌪𑍍𑌰𑌵𑍃𑌤𑍍𑌤𑍍𑌯𑍌𑌷𑌧𑌂
𑌦𑍈𑌤𑍍𑌯𑍋𑌨𑍍𑌮𑍂𑌲𑌕𑌰𑍌𑌷𑌧𑌂 𑌭𑌵𑌭𑌯𑌪𑍍𑌰𑌧𑍍𑌵𑌂𑌸𑌨𑍈𑌕𑍌𑌷𑌧𑌮𑍍 ।
𑌭𑌕𑍍𑌤𑌾𑌨𑌂𑌦𑌕𑌰𑍌𑌷𑌧𑌂 𑌤𑍍𑌰𑌿𑌭𑍁𑌵𑌨𑍇 𑌸𑌂𑌜𑍀𑌵𑌨𑍈𑌕𑍌𑌷𑌧𑌂
𑌶𑍍𑌰𑍇𑌯𑌃 𑌪𑍍𑌰𑌾𑌪𑍍𑌤𑌿𑌕𑌰𑍌𑌷𑌧𑌂 𑌪𑌿𑌬 𑌮𑌨𑌃 𑌶𑍍𑌰𑍀𑌰𑌾𑌮𑌨𑌾𑌮𑍌𑌷𑌧𑌮𑍍 ॥ 10𑍮

𑌸𑌕𑌲𑌭𑍁𑌵𑌨𑌰𑌤𑍍𑌨𑌂 𑌸𑌰𑍍𑌵𑌶𑌾𑌸𑍍𑌤𑍍𑌰𑌾𑌰𑍍𑌥𑌰𑌤𑍍𑌨𑌂
𑌸𑌮𑌰𑌵𑌿𑌜𑌯𑌰𑌤𑍍𑌨𑌂 𑌸𑌚𑍍𑌚𑌿𑌦𑌾𑌨𑌂𑌦𑌰𑌤𑍍𑌨𑌮𑍍 ।
𑌦𑌶𑌮𑍁𑌖𑌹𑌰𑌰𑌤𑍍𑌨𑌂 𑌦𑌾𑌨𑌵𑌾𑌰𑌾𑌤𑌿𑌰𑌤𑍍𑌨𑌂
𑌰𑌘𑍁𑌕𑍁𑌲𑌨𑍃𑌪𑌰𑌤𑍍𑌨𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌰𑌤𑍍𑌨𑌮𑍍 ॥ 10𑍯

𑌸𑌕𑌲𑌭𑍁𑌵𑌨𑌰𑌤𑍍𑌨𑌂 𑌸𑌚𑍍𑌚𑌿𑌦𑌾𑌨𑌂𑌦𑌰𑌤𑍍𑌨𑌂
𑌸𑌕𑌲𑌹𑍃𑌦𑌯𑌰𑌤𑍍𑌨𑌂 𑌸𑍂𑌰𑍍𑌯𑌬𑌿𑌂𑌬𑌾𑌂𑌤𑌰𑌤𑍍𑌨𑌮𑍍 ।
𑌵𑌿𑌮𑌲𑌸𑍁𑌕𑍃𑌤𑌰𑌤𑍍𑌨𑌂 𑌵𑍇𑌦𑌵𑍇𑌦𑌾𑌂𑌤𑌰𑌤𑍍𑌨𑌂
𑌪𑍁𑌰𑌹𑌰𑌜𑌪𑌰𑌤𑍍𑌨𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌰𑌤𑍍𑌨𑌮𑍍 ॥ 110

𑌨𑌿𑌗𑌮𑌶𑌿𑌖𑌰𑌰𑌤𑍍𑌨𑌂 𑌨𑌿𑌰𑍍𑌮𑌲𑌾𑌨𑌂𑌦𑌰𑌤𑍍𑌨𑌂
𑌨𑌿𑌰𑍁𑌪𑌮𑌗𑍁𑌣𑌰𑌤𑍍𑌨𑌂 𑌨𑌾𑌦𑌨𑌾𑌦𑌾𑌂𑌤𑌰𑌤𑍍𑌨𑌮𑍍 ।
𑌦𑌶𑌰𑌥𑌕𑍁𑌲𑌰𑌤𑍍𑌨𑌂 𑌦𑍍𑌵𑌾𑌦𑌶𑌾𑌂𑌤𑌸𑍍𑌸𑍍𑌥𑌰𑌤𑍍𑌨𑌂
𑌪𑌶𑍁𑌪𑌤𑌿𑌜𑌪𑌰𑌤𑍍𑌨𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌰𑌤𑍍𑌨𑌮𑍍 ॥ 111

𑌶𑌤𑌮𑌖𑌸𑍁𑌤𑌰𑌤𑍍𑌨𑌂 𑌷𑍋𑌡𑌶𑌾𑌂𑌤𑌸𑍍𑌸𑍍𑌥𑌰𑌤𑍍𑌨𑌂
𑌮𑍁𑌨𑌿𑌜𑌨𑌜𑌪𑌰𑌤𑍍𑌨𑌂 𑌮𑍁𑌖𑍍𑌯𑌵𑍈𑌕𑍁𑌂𑌠𑌰𑌤𑍍𑌨𑌮𑍍 ।
𑌨𑌿𑌰𑍁𑌪𑌮𑌗𑍁𑌣𑌰𑌤𑍍𑌨𑌂 𑌨𑍀𑌰𑌜𑌾𑌂𑌤𑌸𑍍𑌸𑍍𑌥𑌰𑌤𑍍𑌨𑌂
𑌪𑌰𑌮𑌪𑌦𑌵𑌿𑌰𑌤𑍍𑌨𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌰𑌤𑍍𑌨𑌮𑍍 ॥ 112

𑌸𑌕𑌲𑌸𑍁𑌕𑍃𑌤𑌰𑌤𑍍𑌨𑌂 𑌸𑌤𑍍𑌯𑌵𑌾𑌕𑍍𑌯𑌾𑌰𑍍𑌥𑌰𑌤𑍍𑌨𑌂
𑌶𑌮𑌦𑌮𑌗𑍁𑌣𑌰𑌤𑍍𑌨𑌂 𑌶𑌾𑌶𑍍𑌵𑌤𑌾𑌨𑌂𑌦𑌰𑌤𑍍𑌨𑌮𑍍 ।
𑌪𑍍𑌰𑌣𑌯𑌨𑌿𑌲𑌯𑌰𑌤𑍍𑌨𑌂 𑌪𑍍𑌰𑌸𑍍𑌫𑍁𑌟𑌦𑍍𑌯𑍋𑌤𑌿𑌰𑌤𑍍𑌨𑌂
𑌪𑌰𑌮𑌪𑌦𑌵𑌿𑌰𑌤𑍍𑌨𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌰𑌤𑍍𑌨𑌮𑍍 ॥ 113

𑌨𑌿𑌗𑌮𑌶𑌿𑌖𑌰𑌰𑌤𑍍𑌨𑌂 𑌨𑌿𑌤𑍍𑌯𑌮𑌾𑌶𑌾𑌸𑍍𑌯𑌰𑌤𑍍𑌨𑌂
𑌜𑌨𑌨𑍁𑌤𑌨𑍃𑌪𑌰𑌤𑍍𑌨𑌂 𑌜𑌾𑌨𑌕𑍀𑌰𑍂𑌪𑌰𑌤𑍍𑌨𑌮𑍍 ।
𑌭𑍁𑌵𑌨𑌵𑌲𑌯𑌰𑌤𑍍𑌨𑌂 𑌭𑍂𑌭𑍁𑌜𑌾𑌮𑍇𑌕𑌰𑌤𑍍𑌨𑌂
𑌰𑌘𑍁𑌕𑍁𑌲𑌵𑌰𑌰𑌤𑍍𑌨𑌂 𑌪𑌾𑌤𑍁 𑌮𑌾𑌂 𑌰𑌾𑌮𑌰𑌤𑍍𑌨𑌮𑍍 ॥ 114

𑌵𑌿𑌶𑌾𑌲𑌨𑍇𑌤𑍍𑌰𑌂 𑌪𑌰𑌿𑌪𑍂𑌰𑍍𑌣𑌗𑌾𑌤𑍍𑌰𑌂
𑌸𑍀𑌤𑌾𑌕𑌲𑌤𑍍𑌰𑌂 𑌸𑍁𑌰𑌵𑍈𑌰𑌿𑌜𑍈𑌤𑍍𑌰𑌮𑍍 ।
𑌕𑌾𑌰𑍁𑌣𑍍𑌯𑌪𑌾𑌤𑍍𑌰𑌂 𑌜𑌗𑌤𑌃 𑌪𑌵𑌿𑌤𑍍𑌰𑌂
𑌶𑍍𑌰𑍀𑌰𑌾𑌮𑌰𑌤𑍍𑌨𑌂 𑌪𑍍𑌰𑌣𑌤𑍋𑌽𑌸𑍍𑌮𑌿 𑌨𑌿𑌤𑍍𑌯𑌮𑍍 ॥ 115

𑌹𑍇 𑌗𑍋𑌪𑌾𑌲𑌕 𑌹𑍇 𑌦𑌯𑌾𑌜𑌲𑌨𑌿𑌧𑍇 𑌹𑍇 𑌸𑌦𑍍𑌗𑍁𑌣𑌾𑌂𑌭𑍋𑌨𑌿𑌧𑍇
𑌹𑍇 𑌦𑍈𑌤𑍍𑌯𑌾𑌂𑌤𑌕 𑌹𑍇 𑌵𑌿𑌭𑍀𑌷𑌣𑌦𑌯𑌾𑌪𑌰𑍀𑌣 𑌹𑍇 𑌭𑍂𑌪𑌤𑍇 ।
𑌹𑍇 𑌵𑍈𑌦𑍇𑌹𑌸𑍁𑌤𑌾𑌮𑌨𑍋𑌜𑌵𑌿𑌹𑍃𑌤𑍇 𑌹𑍇 𑌕𑍋𑌟𑌿𑌮𑌾𑌰𑌾𑌕𑍃𑌤𑍇
𑌹𑍇 𑌨𑌵𑍍𑌯𑌾𑌂𑌬𑍁𑌜𑌨𑍇𑌤𑍍𑌰 𑌪𑌾𑌲𑌯 𑌪𑌰𑌂 𑌜𑌾𑌨𑌾𑌮𑌿 𑌨 𑌤𑍍𑌵𑌾𑌂 𑌵𑌿𑌨𑌾 ॥ 116

𑌯𑌸𑍍𑌯 𑌕𑌿𑌂𑌚𑌿𑌦𑌪𑌿 𑌨𑍋 𑌹𑌰𑌣𑍀𑌯𑌂
𑌕𑌰𑍍𑌮 𑌕𑌿𑌂𑌚𑌿𑌦𑌪𑌿 𑌨𑍋 𑌚𑌰𑌣𑍀𑌯𑌮𑍍 ।
𑌰𑌾𑌮𑌨𑌾𑌮 𑌚 𑌸𑌦𑌾 𑌸𑍍𑌮𑌰𑌣𑍀𑌯𑌂
𑌲𑍀𑌲𑌯𑌾 𑌭𑌵𑌜𑌲𑌂 𑌤𑌰𑌣𑍀𑌯𑌮𑍍 ॥ 11𑍭

𑌦𑌶𑌰𑌥𑌸𑍁𑌤𑌮𑍀𑌶𑌂 𑌦𑌂𑌡𑌕𑌾𑌰𑌣𑍍𑌯𑌵𑌾𑌸𑌂
𑌶𑌤𑌮𑌖𑌮𑌣𑌿𑌨𑍀𑌲𑌂 𑌜𑌾𑌨𑌕𑍀𑌪𑍍𑌰𑌾𑌣𑌲𑍋𑌲𑌮𑍍 ।
𑌸𑌕𑌲𑌭𑍁𑌵𑌨𑌮𑍋𑌹𑌂 𑌸𑌨𑍍𑌨𑍁𑌤𑌾𑌂𑌭𑍋𑌦𑌦𑍇𑌹𑌂
𑌬𑌹𑍁𑌳𑌨𑍁𑌤𑌸𑌮𑍁𑌦𑍍𑌰𑌂 𑌭𑌾𑌵𑌯𑍇 𑌰𑌾𑌮𑌭𑌦𑍍𑌰𑌮𑍍 ॥ 11𑍮

𑌵𑌿𑌶𑌾𑌲𑌨𑍇𑌤𑍍𑌰𑌂 𑌪𑌰𑌿𑌪𑍂𑌰𑍍𑌣𑌗𑌾𑌤𑍍𑌰𑌂
𑌸𑍀𑌤𑌾𑌕𑌳𑌤𑍍𑌰𑌂 𑌸𑍁𑌰𑌵𑍈𑌰𑌿𑌜𑍈𑌤𑍍𑌰𑌮𑍍 ।
𑌜𑌗𑌤𑍍𑌪𑌵𑌿𑌤𑍍𑌰𑌂 𑌪𑌰𑌮𑌾𑌤𑍍𑌮𑌤𑌂𑌤𑍍𑌰𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌂 𑌪𑍍𑌰𑌣𑌮𑌾𑌮𑌿 𑌚𑌿𑌤𑍍𑌤𑍇 ॥ 11𑍯

𑌜𑌯 𑌜𑌯 𑌰𑌘𑍁𑌰𑌾𑌮 𑌶𑍍𑌰𑍀𑌮𑍁𑌖𑌾𑌂𑌭𑍋𑌜𑌭𑌾𑌨𑍋
𑌜𑌯 𑌜𑌯 𑌰𑌘𑍁𑌵𑍀𑌰 𑌶𑍍𑌰𑍀𑌮𑌦𑌂𑌭𑍋𑌜𑌨𑍇𑌤𑍍𑌰 ।
𑌜𑌯 𑌜𑌯 𑌰𑌘𑍁𑌨𑌾𑌥 𑌶𑍍𑌰𑍀𑌕𑌰𑌾𑌭𑍍𑌯𑌰𑍍𑌚𑌿𑌤𑌾𑌂𑌘𑍍𑌰𑌿
𑌜𑌯 𑌜𑌯 𑌰𑌘𑍁𑌵𑌰𑍍𑌯 𑌶𑍍𑌰𑍀𑌶 𑌕𑌾𑌰𑍁𑌣𑍍𑌯𑌸𑌿𑌂𑌧𑍋 ॥ 120

𑌮𑌂𑌦𑌾𑌰𑌮𑍂𑌲𑍇 𑌮𑌣𑌿𑌪𑍀𑌠𑌸𑌂𑌸𑍍𑌥𑌂
𑌸𑍁𑌧𑌾𑌪𑍍𑌲𑍁𑌤𑌂 𑌦𑌿𑌵𑍍𑌯𑌵𑌿𑌰𑌾𑌟𑍍𑌸𑍍𑌵𑌰𑍂𑌪𑌮𑍍 ।
𑌸𑌬𑌿𑌂𑌦𑍁𑌨𑌾𑌦𑌾𑌂𑌤𑌕𑌲𑌾𑌂𑌤𑌤𑍁𑌰𑍍𑌯-
𑌮𑍂𑌰𑍍𑌤𑌿𑌂 𑌭𑌜𑍇𑌽𑌹𑌂 𑌰𑌘𑍁𑌵𑌂𑌶𑌰𑌤𑍍𑌨𑌮𑍍 ॥ 121

𑌨𑌾𑌦𑌂 𑌨𑌾𑌦𑌵𑌿𑌨𑍀𑌲𑌚𑌿𑌤𑍍𑌤𑌪𑌵𑌨𑌂 𑌨𑌾𑌦𑌾𑌂𑌤𑌤𑍍𑌤𑍍𑌵𑌪𑍍𑌰𑌿𑌯𑌂
𑌨𑌾𑌮𑌾𑌕𑌾𑌰𑌵𑌿𑌵𑌰𑍍𑌜𑌿𑌤𑌂 𑌨𑌵𑌘𑌨𑌶𑍍𑌯𑌾𑌮𑌾𑌂𑌗𑌨𑌾𑌦𑌪𑍍𑌰𑌿𑌯𑌮𑍍 ।
𑌨𑌾𑌦𑌾𑌂𑌭𑍋𑌜𑌮𑌰𑌂𑌦𑌮𑌤𑍍𑌤𑌵𑌿𑌲𑌸𑌦𑍍𑌭𑍃𑌂𑌗𑌂 𑌮𑌦𑌾𑌂𑌤𑌸𑍍𑌸𑍍𑌥𑌿𑌤𑌂
𑌨𑌾𑌦𑌾𑌂𑌤𑌧𑍃𑌵𑌮𑌂𑌡𑌲𑌾𑌬𑍍𑌜𑌰𑍁𑌚𑌿𑌰𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 122

𑌨𑌾𑌨𑌾𑌭𑍂𑌤𑌹𑍃𑌦𑌬𑍍𑌜𑌪𑌦𑍍𑌮𑌨𑌿𑌲𑌯𑌂 𑌨𑌾𑌮𑍋𑌜𑍍𑌜𑍍𑌵𑌲𑌾𑌭𑍂𑌷𑌣𑌮𑍍 ।
𑌨𑌾𑌮𑌸𑍍𑌤𑍋𑌤𑍍𑌰𑌪𑌵𑌿𑌤𑍍𑌰𑌿𑌤𑌤𑍍𑌰𑌿𑌭𑍁𑌵𑌨𑌂 𑌨𑌾𑌰𑌾𑌯𑌣𑌾𑌷𑍍𑌟𑌾𑌕𑍍𑌷𑌰𑌮𑍍 ।
𑌨𑌾𑌦𑌾𑌂𑌤𑍇𑌂𑌦𑍁𑌗𑌳𑌤𑍍𑌸𑍁𑌧𑌾𑌪𑍍𑌲𑍁𑌤𑌤𑌨𑍁𑌂 𑌨𑌾𑌨𑌾𑌤𑍍𑌮𑌚𑌿𑌨𑍍𑌮𑌾𑌤𑍍𑌰𑌕𑌮𑍍 ।
𑌨𑌾𑌨𑌾𑌕𑍋𑌟𑌿𑌯𑍁𑌗𑌾𑌂𑌤𑌭𑌾𑌨𑍁𑌸𑌦𑍃𑌶𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 123

𑌵𑍇𑌦𑍍𑌯𑌂 𑌵𑍇𑌦𑌗𑍁𑌰𑍁𑌂 𑌵𑌿𑌰𑌿𑌂𑌚𑌿𑌜𑌨𑌕𑌂 𑌵𑍇𑌦𑌾𑌂𑌤𑌮𑍂𑌰𑍍𑌤𑌿𑌂 𑌸𑍍𑌫𑍁𑌰-
𑌦𑍍𑌵𑍇𑌦𑌂 𑌵𑍇𑌦𑌕𑌲𑌾𑌪𑌮𑍂𑌲𑌮𑌹𑌿𑌮𑌾𑌧𑌾𑌰𑌾𑌂𑌤𑌕𑌂𑌦𑌾𑌂𑌕𑍁𑌰𑌮𑍍 ।
𑌵𑍇𑌦𑌶𑍃𑌂𑌗𑌸𑌮𑌾𑌨𑌶𑍇𑌷𑌶𑌯𑌨𑌂 𑌵𑍇𑌦𑌾𑌂𑌤𑌵𑍇𑌦𑍍𑌯𑌾𑌤𑍍𑌮𑌕𑌂
𑌵𑍇𑌦𑌾𑌰𑌾𑌧𑌿𑌤𑌪𑌾𑌦𑌪𑌂𑌕𑌜𑌮𑌹𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 124

𑌮𑌜𑍍𑌜𑍀𑌵𑌂 𑌮𑌦𑌨𑍁𑌗𑍍𑌰𑌹𑌂 𑌮𑌦𑌧𑌿𑌪𑌂 𑌮𑌦𑍍𑌭𑌾𑌵𑌨𑌂 𑌮𑌤𑍍𑌸𑍁𑌖𑌂
𑌮𑌤𑍍𑌤𑌾𑌤𑌂 𑌮𑌮 𑌸𑌦𑍍𑌗𑍁𑌰𑍁𑌂 𑌮𑌮 𑌵𑌰𑌂 𑌮𑍋𑌹𑌾𑌂𑌧𑌵𑌿𑌚𑍍𑌛𑍇𑌦𑌨𑌮𑍍 ।
𑌮𑌤𑍍𑌪𑍁𑌣𑍍𑌯𑌂 𑌮𑌦𑌨𑍇𑌕𑌬𑌾𑌂𑌧𑌵𑌜𑌨𑌂 𑌮𑌜𑍍𑌜𑍀𑌵𑌨𑌂 𑌮𑌨𑍍𑌨𑌿𑌧𑌿𑌂
𑌮𑌤𑍍𑌸𑌿𑌦𑍍𑌧𑌿𑌂 𑌮𑌮 𑌸𑌰𑍍𑌵𑌕𑌰𑍍𑌮𑌸𑍁𑌕𑍃𑌤𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 125

𑌨𑌿𑌤𑍍𑌯𑌂 𑌨𑍀𑌰𑌜𑌲𑍋𑌚𑌨𑌂 𑌨𑌿𑌰𑍁𑌪𑌮𑌂 𑌨𑍀𑌵𑌾𑌰𑌶𑍂𑌕𑍋𑌪𑌮𑌂
𑌨𑌿𑌰𑍍𑌭𑍇𑌦𑌾𑌨𑍁𑌭𑌵𑌂 𑌨𑌿𑌰𑌂𑌤𑌰𑌗𑍁𑌣𑌂 𑌨𑍀𑌲𑌾𑌂𑌗𑌰𑌾𑌗𑍋𑌜𑍍𑌜𑍍𑌵𑌲𑌮𑍍 ।
𑌨𑌿𑌷𑍍𑌪𑌾𑌪𑌂 𑌨𑌿𑌗𑌮𑌾𑌗𑌮𑌾𑌰𑍍𑌚𑌿𑌤𑌪𑌦𑌂 𑌨𑌿𑌤𑍍𑌯𑌾𑌤𑍍𑌮𑌕𑌂 𑌨𑌿𑌰𑍍𑌮𑌲𑌂
𑌨𑌿𑌷𑍍𑌪𑍁𑌣𑍍𑌯𑌂 𑌨𑌿𑌖𑌿𑌲𑌂 𑌨𑌿𑌰𑌂𑌜𑌨𑌪𑌦𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 126

𑌧𑍍𑌯𑌾𑌯𑍇 𑌤𑍍𑌵𑌾𑌂 𑌹𑍃𑌦𑌯𑌾𑌂𑌬𑍁𑌜𑍇 𑌰𑌘𑍁𑌪𑌤𑌿𑌂 𑌵𑌿𑌜𑍍𑌞𑌾𑌨𑌦𑍀𑌪𑌾𑌂𑌕𑍁𑌰𑌂
𑌹𑌂𑌸𑍋𑌹𑌂𑌸𑌪𑌰𑌂𑌪𑌰𑌾𑌦𑌿𑌮𑌹𑌿𑌮𑌾𑌧𑌾𑌰𑌂 𑌜𑌗𑌨𑍍𑌮𑍋𑌹𑌨𑌮𑍍 ।
𑌹𑌸𑍍𑌤𑌾𑌂𑌭𑍋𑌜𑌗𑌦𑌾𑌬𑍍𑌜𑌚𑌕𑍍𑌰𑌮𑌤𑍁𑌲𑌂 𑌪𑍀𑌤𑌾𑌂𑌬𑌰𑌂 𑌕𑍌𑌸𑍍𑌤𑍁𑌭𑌂
𑌶𑍍𑌰𑍀𑌵𑌤𑍍𑌸𑌂 𑌪𑍁𑌰𑍁𑌷𑍋𑌤𑍍𑌤𑌮𑌂 𑌮𑌣𑌿𑌨𑌿𑌭𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 12𑍭

𑌸𑌤𑍍𑌯𑌜𑍍𑌞𑌾𑌨𑌮𑌨𑌂𑌤𑌮𑌚𑍍𑌯𑍁𑌤𑌮𑌜𑌂 𑌚𑌾𑌵𑍍𑌯𑌾𑌕𑍃𑌤𑌂 𑌤𑌤𑍍𑌪𑌰𑌂
𑌕𑍂𑌟𑌸𑍍𑌥𑌾𑌦𑌿𑌸𑌮𑌸𑍍𑌤𑌸𑌾𑌕𑍍𑌷𑌿𑌮𑌨𑌘𑌂 𑌸𑌾𑌕𑍍𑌷𑌾𑌦𑍍𑌵𑌿𑌰𑌾𑌟𑍍𑌤𑌤𑍍𑌤𑍍𑌵𑌦𑌮𑍍 ।
𑌵𑍇𑌦𑍍𑌯𑌂 𑌵𑌿𑌶𑍍𑌵𑌮𑌯𑌂 𑌸𑍍𑌵𑌲𑍀𑌨𑌭𑍁𑌵𑌨𑌸𑍍𑌵𑌾𑌰𑌾𑌜𑍍𑌯𑌸𑍌𑌖𑍍𑌯𑌪𑍍𑌰𑌦𑌂
𑌪𑍂𑌰𑍍𑌣𑌂 𑌪𑍂𑌰𑍍𑌣𑌤𑌰𑌂 𑌪𑍁𑌰𑌾𑌣𑌪𑍁𑌰𑍁𑌷𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 12𑍮

𑌰𑌾𑌮𑌂 𑌰𑌾𑌕𑍍𑌷𑌸𑌵𑌂𑌶𑌨𑌾𑌶𑌨𑌕𑌰𑌂 𑌰𑌾𑌕𑍇𑌂𑌦𑍁𑌬𑌿𑌂𑌬𑌾𑌨𑌨𑌂
𑌰𑌕𑍍𑌷𑍋𑌰𑌿𑌂 𑌰𑌘𑍁𑌵𑌂𑌶𑌵𑌰𑍍𑌧𑌨𑌕𑌰𑌂 𑌰𑌕𑍍𑌤𑌾𑌧𑌰𑌂 𑌰𑌾𑌘𑌵𑌮𑍍 ।
𑌰𑌾𑌧𑌾𑌯𑌾𑌤𑍍𑌮𑌨𑌿𑌵𑌾𑌸𑌿𑌨𑌂 𑌰𑌵𑌿𑌨𑌿𑌭𑌂 𑌰𑌮𑍍𑌯𑌂 𑌰𑌮𑌾𑌨𑌾𑌯𑌕𑌂
𑌰𑌂𑌧𑍍𑌰𑌾𑌂𑌤𑌰𑍍𑌗𑌤𑌶𑍇𑌷𑌶𑌾𑌯𑌿𑌨𑌮𑌹𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 12𑍯

𑌓𑌤𑌪𑍍𑌰𑍋𑌤𑌸𑌮𑌸𑍍𑌤𑌵𑌸𑍍𑌤𑍁𑌨𑌿𑌚𑌯𑌂 𑌓𑌂𑌕𑌾𑌰𑌬𑍀𑌜𑌾𑌕𑍍𑌷𑌰𑌂
𑌓𑌂𑌕𑌾𑌰𑌪𑍍𑌰𑌕𑍃𑌤𑌿𑌂 𑌷𑌡𑌕𑍍𑌷𑌰𑌹𑌿𑌤𑌂 𑌓𑌂𑌕𑌾𑌰𑌕𑌂𑌦𑌾𑌂𑌕𑍁𑌰𑌮𑍍 ।
𑌓𑌂𑌕𑌾𑌰𑌸𑍍𑌫𑍁𑌟𑌭𑍂𑌰𑍍𑌭𑍁𑌵𑌸𑍍𑌸𑍁𑌪𑌰𑌿𑌤𑌂 𑌓𑌘𑌤𑍍𑌰𑌯𑌾𑌰𑌾𑌧𑌿𑌤𑌮𑍍
𑌓𑌂𑌕𑌾𑌰𑍋𑌜𑍍𑌜𑍍𑌵𑌲𑌸𑌿𑌂𑌹𑌪𑍀𑌠𑌨𑌿𑌲𑌯𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 130

𑌸𑌾𑌕𑍇𑌤𑍇 𑌨𑌗𑌰𑍇 𑌸𑌮𑌸𑍍𑌤𑌸𑍁𑌖𑌦𑍇 𑌹𑌰𑍍𑌮𑍍𑌯𑍇𑌽𑌬𑍍𑌜𑌕𑍋𑌟𑌿𑌦𑍍𑌯𑍁𑌤𑍇
𑌨𑌕𑍍𑌷𑌤𑍍𑌰𑌗𑍍𑌰𑌹𑌪𑌂𑌕𑍍𑌤𑌿𑌲𑌗𑍍𑌨𑌶𑌿𑌖𑌰𑍇 𑌚𑌾𑌂𑌤𑌰𑍍𑌯𑌪𑌂𑌕𑍇𑌰𑍁𑌹𑍇 ।
𑌵𑌾𑌲𑍍𑌮𑍀𑌕𑌾𑌤𑍍𑌰𑌿𑌪𑌰𑌾𑌶𑌰𑌾𑌦𑌿𑌮𑍁𑌨𑌿𑌭𑌿𑌸𑍍𑌸𑌂𑌸𑍇𑌵𑍍𑌯𑌮𑌾𑌨𑌂 𑌸𑍍𑌥𑌿𑌤𑌂
𑌸𑍀𑌤𑌾𑌲𑌂𑌕𑍃𑌤𑌵𑌾𑌮𑌭𑌾𑌗𑌮𑌨𑌿𑌶𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 131

𑌵𑍈𑌕𑍁𑌂𑌠𑍇 𑌨𑌗𑌰𑍇 𑌸𑍁𑌰𑌦𑍍𑌰𑍁𑌮𑌤𑌲𑍇 𑌚𑌾𑌨𑌂𑌦𑌵𑌪𑍍𑌰𑌾𑌂𑌤𑌰𑍇
𑌨𑌾𑌨𑌾𑌰𑌤𑍍𑌨𑌵𑌿𑌨𑌿𑌰𑍍𑌮𑌿𑌤𑌸𑍍𑌫𑍁𑌟𑌪𑌟𑍁𑌪𑍍𑌰𑌾𑌕𑌾𑌰𑌸𑌂𑌵𑍇𑌷𑍍𑌟𑌿𑌤𑍇 ।
𑌸𑍌𑌧𑍇𑌂𑌦𑍂𑌪𑌲𑌶𑍇𑌷𑌤𑌲𑍍𑌪𑌲𑌲𑌿𑌤𑍇 𑌨𑍀𑌲𑍋𑌤𑍍𑌪𑌲𑌚𑍍𑌛𑌾𑌦𑌿𑌤𑍇
𑌪𑌰𑍍𑌯𑌂𑌕𑍇 𑌶𑌯𑌨𑌂 𑌰𑌮𑌾𑌦𑌿𑌸𑌹𑌿𑌤𑌂 𑌰𑌾𑌮𑌂 𑌭𑌜𑍇 𑌤𑌾𑌰𑌕𑌮𑍍 ॥ 132

𑌵𑌂𑌦𑍇 𑌰𑌾𑌮𑌮𑌨𑌾𑌦𑌿𑌪𑍂𑌰𑍁𑌷𑌮𑌜𑌂 𑌵𑌂𑌦𑍇 𑌰𑌮𑌾𑌨𑌾𑌯𑌕𑌂
𑌵𑌂𑌦𑍇 𑌹𑌾𑌰𑌿𑌕𑌿𑌰𑍀𑌟𑌕𑍁𑌂𑌡𑌲𑌧𑌰𑌂 𑌵𑌂𑌦𑍇 𑌸𑍁𑌨𑍀𑌲𑌦𑍍𑌯𑍁𑌤𑌿𑌮𑍍 ।
𑌵𑌂𑌦𑍇 𑌚𑌾𑌪𑌕𑌲𑌂𑌬𑌕𑍋𑌜𑍍𑌜𑍍𑌵𑌲𑌕𑌰𑌂 𑌵𑌂𑌦𑍇 𑌜𑌗𑌨𑍍𑌮𑌂𑌗𑌳𑌂
𑌵𑌂𑌦𑍇 𑌪𑌂𑌕𑍍𑌤𑌿𑌰𑌥𑌾𑌤𑍍𑌮𑌜𑌂 𑌮𑌮 𑌗𑍁𑌰𑍁𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 133

𑌵𑌂𑌦𑍇 𑌶𑍌𑌨𑌕𑌗𑍌𑌤𑌮𑌾𑌦𑍍𑌯𑌭𑌿𑌨𑍁𑌤𑌂 𑌵𑌂𑌦𑍇 𑌘𑌨𑌶𑍍𑌯𑌾𑌮𑌲𑌂
𑌵𑌂𑌦𑍇 𑌤𑌾𑌰𑌕𑌪𑍀𑌠𑌮𑌧𑍍𑌯𑌨𑌿𑌲𑌯𑌂 𑌵𑌂𑌦𑍇 𑌜𑌗𑌨𑍍𑌨𑌾𑌯𑌕𑌮𑍍 ।
𑌵𑌂𑌦𑍇 𑌭𑌕𑍍𑌤𑌜𑌨𑍌𑌘𑌦𑍇𑌵𑌿𑌵𑌟𑌪𑌂 𑌵𑌂𑌦𑍇 𑌧𑌨𑍁𑌰𑍍𑌵𑌲𑍍𑌲𑌭𑌂
𑌵𑌂𑌦𑍇 𑌤𑌤𑍍𑌤𑍍𑌵𑌮𑌸𑍀𑌤𑌿𑌵𑌾𑌕𑍍𑌯𑌜𑌨𑌕𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 134

𑌵𑌂𑌦𑍇 𑌸𑍂𑌰𑍍𑌯𑌶𑌶𑌾𑌂𑌕𑌲𑍋𑌚𑌨𑌯𑍁𑌗𑌂 𑌵𑌂𑌦𑍇 𑌜𑌗𑌤𑍍𑌪𑌾𑌵𑌨𑌂
𑌵𑌂𑌦𑍇 𑌪𑌤𑍍𑌰𑌸𑌹𑌸𑍍𑌰𑌪𑌦𑍍𑌮𑌨𑌿𑌲𑌯𑌂 𑌵𑌂𑌦𑍇 𑌪𑍁𑌰𑌾𑌰𑌿𑌪𑍍𑌰𑌿𑌯𑌮𑍍 ।
𑌵𑌂𑌦𑍇 𑌰𑌾𑌕𑍍𑌷𑌸𑌵𑌂𑌶𑌨𑌾𑌶𑌨𑌕𑌰𑌂 𑌵𑌂𑌦𑍇 𑌸𑍁𑌧𑌾𑌶𑍀𑌤𑌲𑌂
𑌵𑌂𑌦𑍇 𑌦𑍇𑌵𑌕𑌪𑍀𑌂𑌦𑍍𑌰𑌕𑍋𑌟𑌿𑌵𑌿𑌨𑍁𑌤𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 135

𑌵𑌂𑌦𑍇 𑌸𑌾𑌗𑌰𑌗𑌰𑍍𑌵𑌭𑌂𑌗𑌵𑌿𑌶𑌿𑌖𑌂 𑌵𑌂𑌦𑍇 𑌜𑌗𑌜𑍍𑌜𑍀𑌵𑌨𑌂
𑌵𑌂𑌦𑍇 𑌕𑍌𑌶𑌿𑌕𑌯𑌾𑌗𑌰𑌕𑍍𑌷𑌣𑌕𑌰𑌂 𑌵𑌂𑌦𑍇 𑌗𑍁𑌰𑍁𑌣𑌾𑌂 𑌗𑍁𑌰𑍁𑌮𑍍 ।
𑌵𑌂𑌦𑍇 𑌬𑌾𑌣𑌶𑌰𑌾𑌸𑌨𑍋𑌜𑍍𑌜𑍍𑌵𑌲𑌕𑌰𑌂 𑌵𑌂𑌦𑍇 𑌜𑌟𑌾𑌵𑌲𑍍𑌕𑌲𑌂
𑌵𑌂𑌦𑍇 𑌲𑌕𑍍𑌷𑍍𑌮𑌣𑌭𑍂𑌮𑌿𑌜𑌾𑌨𑍍𑌵𑌿𑌤𑌮𑌹𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 136

𑌵𑌂𑌦𑍇 𑌪𑌾𑌂𑌡𑌰𑌪𑍁𑌂𑌡𑌰𑍀𑌕𑌨𑌯𑌨𑌂 𑌵𑌂𑌦𑍇𑌽𑌬𑍍𑌜𑌬𑌿𑌂𑌬𑌾𑌨𑌨𑌂
𑌵𑌂𑌦𑍇 𑌕𑌂𑌬𑍁𑌗𑌳𑌂 𑌕𑌰𑌾𑌬𑍍𑌜𑌯𑍁𑌗𑌳𑌂 𑌵𑌂𑌦𑍇 𑌲𑌲𑌾𑌟𑍋𑌜𑍍𑌜𑍍𑌵𑌲𑌮𑍍 ।
𑌵𑌂𑌦𑍇 𑌪𑍀𑌤𑌦𑍁𑌕𑍂𑌲𑌮𑌂𑌬𑍁𑌦𑌨𑌿𑌭𑌂 𑌵𑌂𑌦𑍇 𑌜𑌗𑌨𑍍𑌮𑍋𑌹𑌨𑌂
𑌵𑌂𑌦𑍇 𑌕𑌾𑌰𑌣𑌮𑌾𑌨𑍁𑌷𑍋𑌜𑍍𑌜𑍍𑌵𑌲𑌤𑌨𑍁𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 13𑍭

𑌵𑌂𑌦𑍇 𑌨𑍀𑌲𑌸𑌰𑍋𑌜𑌕𑍋𑌮𑌲𑌰𑍁𑌚𑌿𑌂 𑌵𑌂𑌦𑍇 𑌜𑌗𑌦𑍍𑌵𑌂𑌦𑌿𑌤𑌂
𑌵𑌂𑌦𑍇 𑌸𑍂𑌰𑍍𑌯𑌕𑍁𑌲𑌾𑌬𑍍𑌧𑌿𑌕𑍌𑌸𑍍𑌤𑍁𑌭𑌮𑌣𑌿𑌂 𑌵𑌂𑌦𑍇 𑌸𑍁𑌰𑌾𑌰𑌾𑌧𑌿𑌤𑌮𑍍 ।
𑌵𑌂𑌦𑍇 𑌪𑌾𑌤𑌕𑌪𑌂𑌚𑌕𑌪𑍍𑌰𑌹𑌰𑌣𑌂 𑌵𑌂𑌦𑍇 𑌜𑌗𑌤𑍍𑌕𑌾𑌰𑌣𑌂
𑌵𑌂𑌦𑍇 𑌵𑌿𑌂𑌶𑌤𑌿𑌪𑌂𑌚𑌤𑌤𑍍𑌤𑍍𑌵𑌰𑌹𑌿𑌤𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 13𑍮

𑌵𑌂𑌦𑍇 𑌸𑌾𑌧𑌕𑌵𑌰𑍍𑌗𑌕𑌲𑍍𑌪𑌕𑌤𑌰𑍁𑌂 𑌵𑌂𑌦𑍇 𑌤𑍍𑌰𑌿𑌮𑍂𑌰𑍍𑌤𑍍𑌯𑌾𑌤𑍍𑌮𑌕𑌂
𑌵𑌂𑌦𑍇 𑌨𑌾𑌦𑌲𑌯𑌾𑌂𑌤𑌰𑌸𑍍𑌥𑌲𑌗𑌤𑌂 𑌵𑌂𑌦𑍇 𑌤𑍍𑌰𑌿𑌵𑌰𑍍𑌗𑌾𑌤𑍍𑌮𑌕𑌮𑍍 ।
𑌵𑌂𑌦𑍇 𑌰𑌾𑌗𑌵𑌿𑌹𑍀𑌨𑌚𑌿𑌤𑍍𑌤𑌸𑍁𑌲𑌭𑌂 𑌵𑌂𑌦𑍇 𑌸𑌭𑌾𑌨𑌾𑌯𑌕𑌂
𑌵𑌂𑌦𑍇 𑌪𑍂𑌰𑍍𑌣𑌦𑌯𑌾𑌮𑍃𑌤𑌾𑌰𑍍𑌣𑌵𑌮𑌹𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 13𑍯

𑌵𑌂𑌦𑍇 𑌸𑌾𑌤𑍍𑌤𑍍𑌵𑌿𑌕𑌤𑌤𑍍𑌤𑍍𑌵𑌮𑍁𑌦𑍍𑌰𑌿𑌤𑌤𑌨𑍁𑌂 𑌵𑌂𑌦𑍇 𑌸𑍁𑌧𑌾𑌦𑌾𑌯𑌕𑌂
𑌵𑌂𑌦𑍇 𑌚𑌾𑌰𑍁𑌚𑌤𑍁𑌰𑍍𑌭𑍁𑌜𑌂 𑌮𑌣𑌿𑌨𑌿𑌭𑌂 𑌵𑌂𑌦𑍇 𑌷𑌡𑌬𑍍𑌜𑌸𑍍𑌥𑌿𑌤𑌮𑍍 ।
𑌵𑌂𑌦𑍇 𑌬𑍍𑌰𑌹𑍍𑌮𑌪𑌿𑌪𑍀𑌲𑌿𑌕𑌾𑌦𑌿𑌨𑌿𑌲𑌯𑌂 𑌵𑌂𑌦𑍇 𑌵𑌿𑌰𑌾𑌟𑍍𑌵𑌿𑌗𑍍𑌰𑌹𑌂
𑌵𑌂𑌦𑍇 𑌪𑌨𑍍𑌨𑌗𑌤𑌲𑍍𑌪𑌶𑌾𑌯𑌿𑌨𑌮𑌹𑌂 𑌵𑌂𑌦𑍇 𑌸𑌦𑌾 𑌰𑌾𑌘𑌵𑌮𑍍 ॥ 140

𑌸𑌿𑌂𑌹𑌾𑌸𑌨𑌸𑍍𑌥𑌂 𑌮𑍁𑌨𑌿𑌸𑌿𑌦𑍍𑌧𑌸𑍇𑌵𑍍𑌯𑌂
𑌰𑌕𑍍𑌤𑍋𑌤𑍍𑌪𑌲𑌾𑌲𑌂𑌕𑍃𑌤𑌪𑌾𑌦𑌪𑌦𑍍𑌮𑌮𑍍 ।
𑌸𑍀𑌤𑌾𑌸𑌮𑍇𑌤𑌂 𑌶𑌶𑌿𑌸𑍂𑌰𑍍𑌯𑌨𑍇𑌤𑍍𑌰𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵𑌰𑌾𑌮𑌚𑌂𑌦𑍍𑌰𑌮𑍍 ॥ 141

𑌶𑍍𑌰𑍀𑌰𑌾𑌮𑌭𑌦𑍍𑌰𑌾𑌶𑍍𑌰𑌿𑌤𑌸𑌦𑍍𑌗𑍁𑌰𑍂𑌣𑌾𑌂
𑌪𑌾𑌦𑌾𑌰𑌵𑌿𑌂𑌦𑌂 𑌭𑌜𑌤𑌾𑌂 𑌨𑌰𑌾𑌣𑌾𑌮𑍍 ।
𑌆𑌰𑍋𑌗𑍍𑌯𑌮𑍈𑌶𑍍𑌵𑌰𑍍𑌯𑌮𑌨𑌂𑌤𑌕𑍀𑌰𑍍𑌤𑌿-
𑌰𑌂𑌤𑍇 𑌚 𑌵𑌿𑌷𑍍𑌣𑍋𑌃 𑌪𑌦𑌮𑌸𑍍𑌤𑌿 𑌸𑌤𑍍𑌯𑌮𑍍 ॥ 142

𑌦𑌶𑌰𑌥𑌵𑌰𑌪𑍁𑌤𑍍𑌰𑌂 𑌜𑌾𑌨𑌕𑍀𑌸𑌤𑍍𑌕𑌳𑌤𑍍𑌰𑌂
𑌦𑌶𑌮𑍁𑌖𑌹𑌰𑌦𑌕𑍍𑌷𑌂 𑌪𑌦𑍍𑌮𑌪𑌤𑍍𑌰𑌾𑌯𑌤𑌾𑌕𑍍𑌷𑌮𑍍 ।
𑌕𑌰𑌧𑍃𑌤𑌶𑌰𑌚𑌾𑌪𑌂 𑌚𑌾𑌰𑍁𑌮𑍁𑌕𑍍𑌤𑌾𑌕𑌲𑌾𑌪𑌂
𑌰𑌘𑍁𑌕𑍁𑌲𑌨𑍃𑌵𑌰𑍇𑌣𑍍𑌯𑌂 𑌰𑌾𑌮𑌮𑍀𑌡𑍇 𑌶𑌰𑌣𑍍𑌯𑌮𑍍 ॥ 143

𑌦𑌶𑌮𑍁𑌖𑌗𑌜𑌸𑌿𑌂𑌹𑌂 𑌦𑍈𑌤𑍍𑌯𑌗𑌰𑍍𑌵𑌾𑌤𑌿𑌰𑌂𑌹𑌂
𑌕𑌦𑌨𑌭𑌯𑌦𑌹𑌸𑍍𑌤𑌂 𑌤𑌾𑌰𑌕𑌬𑍍𑌰𑌹𑍍𑌮 𑌶𑌸𑍍𑌤𑌮𑍍 ।
𑌮𑌣𑌿𑌖𑌚𑌿𑌤𑌕𑌿𑌰𑍀𑌟𑌂 𑌮𑌂𑌜𑍁𑌲𑌾𑌲𑌾𑌪𑌵𑌾𑌟𑌂
𑌦𑌶𑌰𑌥𑌕𑍁𑌲𑌚𑌂𑌦𑍍𑌰𑌂 𑌰𑌾𑌮𑌚𑌂𑌦𑍍𑌰𑌂 𑌭𑌜𑍇𑌽𑌹𑌮𑍍 ॥ 144

𑌰𑌾𑌮𑌂 𑌰𑌕𑍍𑌤𑌸𑌰𑍋𑌰𑍁𑌹𑌾𑌕𑍍𑌷𑌮𑌮𑌲𑌂 𑌲𑌂𑌕𑌾𑌧𑌿𑌨𑌾𑌥𑌾𑌂𑌤𑌕𑌂
𑌕𑍌𑌸𑌲𑍍𑌯𑌾𑌨𑌯𑌨𑍋𑌤𑍍𑌸𑍁𑌕𑌂 𑌰𑌘𑍁𑌵𑌰𑌂 𑌨𑌾𑌗𑍇𑌂𑌦𑍍𑌰𑌤𑌲𑍍𑌪𑌸𑍍𑌥𑌿𑌤𑌮𑍍 ।
𑌵𑍈𑌦𑍇𑌹𑍀𑌕𑍁𑌚𑌕𑍁𑌂𑌭𑌕𑍁𑌂𑌕𑍁𑌮𑌰𑌜𑍋𑌲𑌂𑌕𑌾𑌰𑌹𑌾𑌰𑌂 𑌹𑌰𑌿𑌂
𑌮𑌾𑌯𑌾𑌮𑌾𑌨𑍁𑌷𑌵𑌿𑌗𑍍𑌰𑌹𑌂 𑌰𑌘𑍁𑌪𑌤𑌿𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 145

𑌰𑌾𑌮𑌂 𑌰𑌾𑌕𑍍𑌷𑌸𑌮𑌰𑍍𑌦𑌨𑌂 𑌰𑌘𑍁𑌵𑌰𑌂 𑌦𑍈𑌤𑍇𑌯𑌭𑌿𑌧𑍍𑌵𑌂𑌸𑌿𑌨𑌂
𑌸𑍁𑌗𑍍𑌰𑍀𑌵𑍇𑌪𑍍𑌸𑌿𑌤𑌰𑌾𑌜𑍍𑌯𑌦𑌂 𑌸𑍁𑌰𑌪𑌤𑍇𑌰𑍍𑌭𑍀𑌤𑍍𑌯𑌂𑌤𑌕𑌂 𑌶𑌾𑌰𑍍‍𑌂𑌗𑌿𑌣𑌮𑍍 ।
𑌭𑌕𑍍𑌤𑌾𑌨𑌾𑌮𑌭𑌯𑌪𑍍𑌰𑌦𑌂 𑌭𑌯𑌹𑌰𑌂 𑌪𑌾𑌪𑍌𑌘𑌵𑌿𑌧𑍍𑌵𑌂𑌸𑌿𑌨𑌂
𑌸𑌾𑌮𑍀𑌰𑌿𑌸𑍍𑌤𑍁𑌤𑌪𑌾𑌦𑌪𑌦𑍍𑌮𑌯𑍁𑌗𑌳𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 146

𑌯𑌤𑍍𑌪𑌾𑌦𑌾𑌂𑌬𑍁𑌜𑌰𑍇𑌣𑍁𑌨𑌾 𑌮𑍁𑌨𑌿𑌸𑌤𑍀 𑌮𑍁𑌕𑍍𑌤𑌿𑌂𑌗𑌤𑌾 𑌯𑌨𑍍𑌮𑌹𑌃
𑌪𑍁𑌣𑍍𑌯𑌂 𑌪𑌾𑌤𑌕𑌨𑌾𑌶𑌨𑌂 𑌤𑍍𑌰𑌿𑌜𑌗𑌤𑌾𑌂 𑌭𑌾𑌤𑌿 𑌸𑍍𑌮𑍃𑌤𑌂 𑌪𑌾𑌵𑌨𑌮𑍍 ।
𑌸𑍍𑌮𑍃𑌤𑍍𑌵𑌾 𑌰𑌾𑌘𑌵𑌮𑌪𑍍𑌰𑌮𑍇𑌯𑌮𑌮𑌲𑌂 𑌪𑍂𑌰𑍍𑌣𑍇𑌂𑌦𑍁𑌮𑌂𑌦𑌸𑍍𑌮𑌿𑌤𑌂
𑌤𑌂 𑌰𑌾𑌮𑌂 𑌸𑌰𑌸𑍀𑌰𑍁𑌹𑌾𑌕𑍍𑌷𑌮𑌮𑌲𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 14𑍭

𑌵𑍈𑌦𑍇𑌹𑍀𑌕𑍁𑌚𑌮𑌂𑌡𑌲𑌾𑌗𑍍𑌰-𑌵𑌿𑌲𑌸𑌨𑍍𑌮𑌾𑌣𑌿𑌕𑍍𑌯𑌹𑌸𑍍𑌤𑌾𑌂𑌬𑍁𑌜𑌂
𑌚𑌂𑌚𑌤𑍍𑌕𑌂𑌕𑌣𑌹𑌾𑌰𑌨𑍂𑌪𑍁𑌰-𑌲𑌸𑌤𑍍𑌕𑍇𑌯𑍂𑌰𑌹𑌾𑌰𑌾𑌨𑍍𑌵𑌿𑌤𑌮𑍍 ।
𑌦𑌿𑌵𑍍𑌯𑌶𑍍𑌰𑍀𑌮𑌣𑌿𑌕𑍁𑌂𑌡𑌲𑍋𑌜𑍍𑌜𑍍𑌵𑌲-𑌮𑌹𑌾𑌭𑍂𑌷𑌾𑌸𑌹𑌸𑍍𑌰𑌾𑌨𑍍𑌵𑌿𑌤𑌂
𑌵𑍀𑌰𑌶𑍍𑌰𑍀𑌰𑌘𑍁𑌪𑍁𑌂𑌗𑌵𑌂 𑌗𑍁𑌣𑌨𑌿𑌧𑌿𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 14𑍮

𑌵𑍈𑌦𑍇𑌹𑍀𑌕𑍁𑌚𑌮𑌂𑌡𑌲𑍋𑌪𑌰𑌿-𑌲𑌸𑌨𑍍𑌮𑌾𑌣𑌿𑌕𑍍𑌯𑌹𑌾𑌰𑌾𑌵𑌳𑍀-
𑌮𑌧𑍍𑌯𑌸𑍍𑌥𑌂 𑌨𑌵𑌨𑍀𑌤𑌕𑍋𑌮𑌲𑌰𑍁𑌚𑌿𑌂 𑌨𑍀𑌲𑍋𑌤𑍍𑌪𑌲𑌶𑍍𑌯𑌾𑌮𑌲𑌮𑍍 ।
𑌕𑌂𑌦𑌰𑍍𑌪𑌾𑌯𑍁𑌤𑌕𑍋𑌟𑌿𑌸𑍁𑌂𑌦𑌰𑌤𑌨𑍁𑌂 𑌪𑍂𑌰𑍍𑌣𑍇𑌂𑌦𑍁𑌬𑌿𑌂𑌬𑌾𑌨𑌨𑌂
𑌕𑍌𑌸𑌲𑍍𑌯𑌾𑌕𑍁𑌲𑌭𑍂𑌷𑌣𑌂 𑌰𑌘𑍁𑌪𑌤𑌿𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 14𑍯

𑌦𑌿𑌵𑍍𑌯𑌾𑌰𑌣𑍍𑌯𑌯𑌤𑍀𑌂𑌦𑍍𑌰𑌨𑌾𑌮𑌨𑌗𑌰𑍇 𑌮𑌧𑍍𑌯𑍇 𑌮𑌹𑌾𑌮𑌂𑌟𑌪𑍇
𑌸𑍍𑌵𑌰𑍍𑌣𑌸𑍍𑌤𑌂𑌭𑌸𑌹𑌸𑍍𑌰𑌷𑍋𑌡𑌶𑌯𑍁𑌤𑍇 𑌮𑌂𑌦𑌾𑌰𑌮𑍂𑌲𑌾𑌶𑍍𑌰𑌿𑌤𑍇 ।
𑌨𑌾𑌨𑌾𑌰𑌤𑍍𑌨𑌵𑌿𑌚𑌿𑌤𑍍𑌰𑌨𑌿𑌰𑍍𑌮𑌲𑌮𑌹𑌾𑌸𑌿𑌂𑌹𑌾𑌸𑌨𑍇 𑌸𑌂𑌸𑍍𑌥𑌿𑌤𑌂
𑌸𑍀𑌤𑌾𑌲𑌕𑍍𑌷𑍍𑌮𑌣𑌸𑍇𑌵𑌿𑌤𑌂 𑌰𑌘𑍁𑌪𑌤𑌿𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 150

𑌕𑌸𑍍𑌤𑍂𑌰𑍀𑌤𑌿𑌲𑌕𑌂 𑌕𑌪𑍀𑌂𑌦𑍍𑌰𑌹𑌰𑌣𑌂 𑌕𑌾𑌰𑍁𑌣𑍍𑌯𑌵𑌾𑌰𑌾𑌂𑌨𑌿𑌧𑌿𑌂
𑌕𑍍𑌷𑍀𑌰𑌾𑌂𑌭𑍋𑌧𑌿𑌸𑍁𑌤𑌾𑌮𑍁𑌖𑌾𑌬𑍍𑌜𑌮𑌧𑍁𑌪𑌂 𑌕𑌲𑍍𑌯𑌾𑌣𑌸𑌂𑌪𑌨𑍍𑌨𑌿𑌧𑌿𑌮𑍍 ।
𑌕𑍌𑌸𑌲𑍍𑌯𑌾𑌨𑌯𑌨𑍋𑌤𑍍𑌸𑍁𑌕𑌂 𑌕𑌪𑌿𑌵𑌰𑌤𑍍𑌰𑌾𑌣𑌂 𑌮𑌹𑌾𑌪𑍌𑌰𑍁𑌷𑌂
𑌕𑍌𑌮𑌾𑌰𑌪𑍍𑌰𑌿𑌯𑌮𑌰𑍍𑌕𑌕𑍋𑌟𑌿𑌸𑌦𑍃𑌶𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 151

𑌵𑌿𑌦𑍍𑌯𑍁𑌤𑍍𑌕𑍋𑌟𑌿𑌦𑌿𑌵𑌾𑌕𑌰𑌦𑍍𑌯𑍁𑌤𑌿𑌨𑌿𑌭𑌂 𑌶𑍍𑌰𑍀𑌕𑍌𑌸𑍍𑌤𑍁𑌭𑌾𑌲𑌂𑌕𑍃𑌤𑌂
𑌯𑍋𑌗𑍀𑌂𑌦𑍍𑌰𑍈𑌸𑍍𑌸𑌨𑌕𑌾𑌦𑌿𑌭𑌿𑌃 𑌪𑌰𑌿𑌵𑍃𑌤𑌂 𑌕𑍈𑌲𑌾𑌸𑌨𑌾𑌥𑌪𑍍𑌰𑌿𑌯𑌮𑍍 ।
𑌮𑍁𑌕𑍍𑌤𑌾𑌰𑌤𑍍𑌨𑌕𑌿𑌰𑍀𑌟𑌕𑍁𑌂𑌡𑌲𑌧𑌰𑌂 𑌗𑍍𑌰𑍈𑌵𑍇𑌯𑌹𑌾𑌰𑌾𑌨𑍍𑌵𑌿𑌤𑌂
𑌵𑍈𑌦𑍇𑌹𑍀𑌕𑍁𑌚𑌸𑌨𑍍𑌨𑌿𑌵𑌾𑌸𑌮𑌨𑌿𑌶𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 152

𑌮𑍇𑌘𑌶𑍍𑌯𑌾𑌮𑌲𑌮𑌂𑌬𑍁𑌜𑌾𑌤𑌨𑌯𑌨𑌂 𑌵𑌿𑌸𑍍𑌤𑍀𑌰𑍍𑌣𑌵𑌕𑍍𑌷𑌸𑍍𑌸𑍍𑌥𑌲𑌂
𑌬𑌾𑌹𑍁𑌦𑍍𑌵𑌂𑌦𑍍𑌵𑌵𑌿𑌰𑌾𑌜𑌿𑌤𑌂 𑌸𑍁𑌵𑌦𑌨𑌂 𑌶𑍋𑌣𑌾𑌂𑌘𑍍𑌰𑌿𑌪𑌂𑌕𑍇𑌰𑍁𑌹𑌮𑍍 ।
𑌨𑌾𑌨𑌾𑌰𑌤𑍍𑌨𑌵𑌿𑌚𑌿𑌤𑍍𑌰𑌭𑍂𑌷𑌣𑌯𑍁𑌤𑌂 𑌕𑍋𑌦𑌂𑌡𑌬𑌾𑌣𑌾𑌂𑌕𑌿𑌤𑌂
𑌤𑍍𑌰𑍈𑌲𑍋𑌕𑍍𑌯𑌾𑌽𑌪𑍍𑌰𑌤𑌿𑌮𑌾𑌨𑌸𑍁𑌂𑌦𑌰𑌤𑌨𑍁𑌂 𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 153

𑌵𑍈𑌦𑍇𑌹𑍀𑌯𑍁𑌤𑌵𑌾𑌮𑌭𑌾𑌗𑌮𑌤𑍁𑌲𑌂 𑌵𑌂𑌦𑌾𑌰𑍁𑌮𑌂𑌦𑌾𑌰𑌕𑌂
𑌵𑌂𑌦𑍇 𑌪𑍍𑌰𑌸𑍍𑌤𑍁𑌤𑌕𑍀𑌰𑍍𑌤𑌿𑌵𑌾𑌸𑌿𑌤𑌤𑌰𑍁𑌚𑍍𑌛𑌾𑌯𑌾𑌨𑍁𑌕𑌾𑌰𑌿𑌪𑍍𑌰𑌭𑌮𑍍 ।
𑌵𑍈𑌦𑍇𑌹𑍀𑌕𑍁𑌚𑌕𑍁𑌂𑌕𑍁𑌮𑌾𑌂𑌕𑌿𑌤𑌮𑌹𑍋𑌰𑌸𑍍𑌕𑌂 𑌮𑌹𑌾𑌭𑍂𑌷𑌣𑌂
𑌵𑍇𑌦𑌾𑌂𑌤𑍈𑌰𑍁𑌪𑌗𑍀𑌯𑌮𑌾𑌨𑌮𑌸𑌕𑍃𑌤𑍍𑌸𑍀𑌤𑌾𑌸𑌮𑍇𑌤𑌂 𑌭𑌜𑍇 ॥ 154

𑌦𑍇𑌵𑌾𑌨𑌾𑌂 𑌹𑌿𑌤𑌕𑌾𑌰𑌣𑍇𑌨 𑌭𑍁𑌵𑌨𑍇 𑌧𑍃𑌤𑍍𑌵𑌾𑌽𑌵𑌤𑌾𑌰𑌂 𑌧𑍍𑌰𑍁𑌵𑌂
𑌰𑌾𑌮𑌂 𑌕𑍌𑌶𑌿𑌕𑌯𑌜𑍍𑌞𑌵𑌿𑌘𑍍𑌨𑌦𑌲𑌨𑌂 𑌤𑌤𑍍𑌤𑌾𑌟𑌕𑌾𑌸𑌂𑌹𑌰𑌮𑍍 ।
𑌨𑌿𑌤𑍍𑌯𑌂 𑌗𑍌𑌤𑌮𑌪𑌤𑍍𑌨𑌿𑌶𑌾𑌪𑌦𑌲𑌨𑌶𑍍𑌰𑍀𑌪𑌾𑌦𑌰𑍇𑌣𑍁𑌂 𑌶𑍁𑌭𑌂
𑌶𑌂𑌭𑍋𑌰𑍁𑌤𑍍𑌕𑌟𑌚𑌾𑌪𑌖𑌂𑌡𑌨𑌮𑌹𑌾𑌸𑌤𑍍𑌵𑌂 𑌭𑌜𑍇 𑌰𑌾𑌘𑌵𑌮𑍍 ॥ 155

𑌶𑍍𑌰𑍀𑌰𑌾𑌮𑌂 𑌨𑌵𑌰𑌤𑍍𑌨𑌕𑍁𑌂𑌡𑌲𑌧𑌰𑌂 𑌶𑍍𑌰𑍀𑌰𑌾𑌮𑌰𑌕𑍍𑌷𑌾𑌮𑌣𑌿𑌂
𑌶𑍍𑌰𑍀𑌰𑌾𑌮𑌂 𑌚 𑌸𑌹𑌸𑍍𑌰𑌭𑌾𑌨𑍁𑌸𑌦𑍃𑌶𑌂 𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑍋𑌦𑌯𑌮𑍍 ।
𑌶𑍍𑌰𑍀𑌰𑌾𑌮𑌂 𑌶𑍍𑌰𑍁𑌤𑌕𑍀𑌰𑍍𑌤𑌿𑌮𑌾𑌕𑌰𑌮𑌹𑌂 𑌶𑍍𑌰𑍀𑌰𑌾𑌮𑌮𑍁𑌕𑍍𑌤𑌿𑌪𑍍𑌰𑌦𑌂
𑌶𑍍𑌰𑍀𑌰𑌾𑌮𑌂 𑌰𑌘𑍁𑌨𑌂𑌦𑌨𑌂 𑌭𑌯𑌹𑌰𑌂 𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌂 𑌭𑌜𑍇 ॥ 156

𑌰𑌾𑌮𑌮𑌿𑌂𑌦𑍀𑌵𑌰𑌶𑍍𑌯𑌾𑌮𑌂 𑌰𑌾𑌜𑍀𑌵𑌾𑌯𑌤𑌲𑍋𑌚𑌨𑌮𑍍 ।
𑌜𑍍𑌯𑌾𑌘𑍋𑌷𑌨𑌿𑌰𑍍𑌜𑌿𑌤𑌾𑌰𑌾𑌤𑌿𑌂 𑌜𑌾𑌨𑌕𑍀𑌰𑌮𑌣𑌂 𑌭𑌜𑍇 ॥ 15𑍭

𑌦𑍀𑌰𑍍𑌘𑌬𑌾𑌹𑍁𑌮𑌰𑌵𑌿𑌂𑌦𑌲𑍋𑌚𑌨𑌂
𑌦𑍀𑌨𑌵𑌤𑍍𑌸𑌲𑌮𑌨𑌾𑌥𑌰𑌕𑍍𑌷𑌕𑌮𑍍 ।
𑌦𑍀𑌕𑍍𑌷𑌿𑌤𑌂 𑌸𑌕𑌲𑌲𑍋𑌕𑌰𑌕𑍍𑌷𑌣𑍇
𑌦𑍈𑌵𑌤𑌂 𑌦𑌶𑌰𑌥𑌾𑌤𑍍𑌮𑌜𑌂 𑌭𑌜𑍇 ॥ 15𑍮

𑌪𑍍𑌰𑌾𑌤𑌸𑍍𑌸𑍍𑌮𑌰𑌾𑌮𑌿 𑌰𑌘𑍁𑌨𑌾𑌥𑌮𑍁𑌖𑌾𑌰𑌵𑌿𑌂𑌦𑌂
𑌮𑌂𑌦𑌸𑍍𑌮𑌿𑌤𑌂 𑌮𑌧𑍁𑌰𑌭𑌾𑌷𑌿 𑌵𑌿𑌶𑌾𑌲𑌫𑌾𑌲𑌮𑍍 ।
𑌕𑌰𑍍𑌣𑌾𑌵𑌲𑌂𑌬𑌿𑌚𑌲𑌕𑍁𑌂𑌡𑌲𑌗𑌂𑌡𑌭𑌾𑌗𑌂
𑌕𑌰𑍍𑌣𑌾𑌂𑌤𑌦𑍀𑌰𑍍𑌘𑌨𑌯𑌨𑌂 𑌨𑌯𑌨𑌾𑌭𑌿𑌰𑌾𑌮𑌮𑍍 ॥ 15𑍯

𑌪𑍍𑌰𑌾𑌤𑌰𑍍𑌭𑌜𑌾𑌮𑌿 𑌰𑌘𑍁𑌨𑌾𑌥𑌕𑌰𑌾𑌰𑌵𑌿𑌂𑌦𑌂
𑌰𑌕𑍍𑌷𑍋𑌗𑌣𑌾𑌯 𑌭𑌯𑌦𑌂 𑌵𑌰𑌦𑌂 𑌨𑌿𑌜𑍇𑌭𑍍𑌯𑌃 ।
𑌯𑌦𑍍𑌰𑌾𑌜𑌸𑌂𑌸𑌦𑌿 𑌵𑌿𑌭𑌿𑌦𑍍𑌯 𑌮𑌹𑍇𑌶𑌚𑌾𑌪𑌂
𑌸𑍀𑌤𑌾𑌕𑌰𑌗𑍍𑌰𑌹𑌣𑌮𑌂𑌗𑌳𑌮𑌾𑌪 𑌸𑌦𑍍𑌯𑌃 ॥ 160

𑌪𑍍𑌰𑌾𑌤𑌰𑍍𑌨𑌮𑌾𑌮𑌿 𑌰𑌘𑍁𑌨𑌾𑌥𑌪𑌦𑌾𑌰𑌵𑌿𑌂𑌦𑌂
𑌪𑌦𑍍𑌮𑌾𑌂𑌕𑍁𑌶𑌾𑌦𑌿𑌶𑍁𑌭𑌰𑍇𑌖𑌶𑍁𑌭𑌾𑌵𑌹𑌂 𑌚 ।
𑌯𑍋𑌗𑍀𑌂𑌦𑍍𑌰𑌮𑌾𑌨𑌸𑌮𑌧𑍁𑌵𑍍𑌰𑌤𑌸𑍇𑌵𑍍𑌯𑌮𑌾𑌨𑌂
𑌶𑌾𑌪𑌾𑌪𑌹𑌂 𑌸𑌪𑌦𑌿 𑌗𑍌𑌤𑌮𑌧𑌰𑍍𑌮𑌪𑌤𑍍𑌨𑍍𑌯𑌾𑌃 ॥ 161

𑌪𑍍𑌰𑌾𑌤𑌰𑍍𑌵𑌦𑌾𑌮𑌿 𑌵𑌚𑌸𑌾 𑌰𑌘𑍁𑌨𑌾𑌥𑌨𑌾𑌮
𑌵𑌾𑌗𑍍𑌦𑍋𑌷𑌹𑌾𑌰𑌿 𑌸𑌕𑌲𑌂 𑌕𑌲𑍁𑌷𑌂 𑌨𑌿𑌹𑌂𑌤𑍃 ।
𑌯𑌤𑍍𑌪𑌾𑌰𑍍𑌵𑌤𑍀 𑌸𑍍𑌵𑌪𑌤𑌿𑌨𑌾 𑌸𑌹 𑌭𑍋𑌕𑍍𑌤𑍁𑌕𑌾𑌮𑌾
𑌪𑍍𑌰𑍀𑌤𑍍𑌯𑌾 𑌸𑌹𑌸𑍍𑌰𑌹𑌰𑌿𑌨𑌾𑌮𑌸𑌮𑌂 𑌜𑌜𑌾𑌪 ॥ 162

𑌪𑍍𑌰𑌾𑌤𑌃 𑌶𑍍𑌰𑌯𑍇 𑌶𑍍𑌰𑍁𑌤𑌿𑌨𑍁𑌤𑌂 𑌰𑌘𑍁𑌨𑌾𑌥𑌮𑍂𑌰𑍍𑌤𑌿𑌂
𑌨𑍀𑌲𑌾𑌂𑌬𑍁𑌦𑍋𑌤𑍍𑌪𑌲𑌸𑌿𑌤𑍇𑌤𑌰𑌰𑌤𑍍𑌨𑌨𑍀𑌲𑌾𑌮𑍍 ।
𑌆𑌮𑍁𑌕𑍍𑌤𑌮𑍌𑌕𑍍𑌤𑌿𑌕𑌵𑌿𑌶𑍇𑌷𑌵𑌿𑌭𑍂𑌷𑌣𑌾𑌢𑍍𑌯𑌾𑌂
𑌧𑍍𑌯𑍇𑌯𑌾𑌂 𑌸𑌮𑌸𑍍𑌤𑌮𑍁𑌨𑌿𑌭𑌿𑌰𑍍𑌨𑌿𑌜𑌭𑍃𑌤𑍍𑌯𑌮𑍁𑌖𑍍𑌯𑍈𑌃 ॥ 163

𑌰𑌘𑍁𑌕𑍁𑌲𑌵𑌰𑌨𑌾𑌥𑍋 𑌜𑌾𑌨𑌕𑍀𑌪𑍍𑌰𑌾𑌣𑌨𑌾𑌥𑌃
𑌪𑌿𑌤𑍃𑌵𑌚𑌨𑌵𑌿𑌧𑌾𑌤𑌾 𑌕𑍀𑌶𑌰𑌾𑌜𑍍𑌯𑌪𑍍𑌰𑌦𑌾𑌤𑌾 ।
𑌪𑍍𑌰𑌤𑌿𑌨𑌿𑌶𑌿𑌚𑌰𑌨𑌾𑌶𑌃 𑌪𑍍𑌰𑌾𑌪𑍍𑌤𑌰𑌾𑌜𑍍𑌯𑌪𑍍𑌰𑌵𑍇𑌶𑍋
𑌵𑌿𑌹𑌿𑌤𑌭𑍁𑌵𑌨𑌰𑌕𑍍𑌷𑌃 𑌪𑌾𑌤𑍁 𑌪𑌦𑍍𑌮𑌾𑌯𑌤𑌾𑌕𑍍𑌷𑌃 ॥ 164

𑌕𑍁𑌵𑌲𑌯𑌦𑌳𑌨𑍀𑌲𑌃 𑌪𑍀𑌤𑌵𑌾𑌸𑌾𑌃 𑌸𑍍𑌮𑌿𑌤𑌾𑌸𑍍𑌯𑍋
𑌵𑌿𑌵𑌿𑌧𑌰𑍁𑌚𑌿𑌰𑌭𑍂𑌷𑌾𑌭𑍂𑌷𑌿𑌤𑍋 𑌦𑌿𑌵𑍍𑌯𑌮𑍂𑌰𑍍𑌤𑌿𑌃 ।
𑌦𑌶𑌰𑌥𑌕𑍁𑌲𑌨𑌾𑌥𑍋 𑌜𑌾𑌨𑌕𑍀𑌪𑍍𑌰𑌾𑌣𑌨𑌾𑌥𑍋
𑌨𑌿𑌵𑌸𑌤𑍁 𑌮𑌮 𑌚𑌿𑌤𑍍𑌤𑍇 𑌸𑌰𑍍𑌵𑌦𑌾 𑌰𑌾𑌮𑌚𑌂𑌦𑍍𑌰𑌃 ॥ 165

𑌜𑌯𑌤𑍁 𑌜𑌯𑌤𑍁 𑌰𑌾𑌮𑍋 𑌜𑌾𑌨𑌕𑍀𑌵𑌲𑍍𑌲𑌭𑍋𑌽𑌯𑌂
𑌜𑌯𑌤𑍁 𑌜𑌯𑌤𑍁 𑌰𑌾𑌮𑌶𑍍𑌚𑌂𑌦𑍍𑌰𑌚𑍂𑌡𑌾𑌰𑍍𑌚𑌿𑌤𑌾𑌂𑌘𑍍𑌰𑌿𑌃 ।
𑌜𑌯𑌤𑍁 𑌜𑌯𑌤𑍁 𑌵𑌾𑌣𑍀𑌨𑌾𑌥𑌨𑌾𑌥𑌃 𑌪𑌰𑌾𑌤𑍍𑌮𑌾
𑌜𑌯𑌤𑍁 𑌜𑌯𑌤𑍁 𑌰𑌾𑌮𑍋𑌽𑌨𑌾𑌥𑌨𑌾𑌥𑌃 𑌕𑍃𑌪𑌾𑌳𑍁𑌃 ॥ 166

𑌵𑌦𑌤𑍁 𑌵𑌦𑌤𑍁 𑌵𑌾𑌣𑍀 𑌰𑌾𑌮𑌰𑌾𑌮𑍇𑌤𑌿 𑌨𑌿𑌤𑍍𑌯𑌂
𑌜𑌯𑌤𑍁 𑌜𑌯𑌤𑍁 𑌚𑌿𑌤𑍍𑌤𑌂 𑌰𑌾𑌮𑌪𑌾𑌦𑌾𑌰𑌵𑌿𑌂𑌦𑌮𑍍 ।
𑌨𑌮𑌤𑍁 𑌨𑌮𑌤𑍁 𑌦𑍇𑌹𑌂 𑌸𑌂𑌤𑌤𑌂 𑌰𑌾𑌮𑌚𑌂𑌦𑍍𑌰𑌂
𑌨 𑌭𑌵𑌤𑍁 𑌮𑌮 𑌪𑌾𑌪𑌂 𑌜𑌨𑍍𑌮𑌜𑌨𑍍𑌮𑌾𑌂𑌤𑌰𑍇𑌷𑍁 ॥ 16𑍭

𑌆𑌨𑌂𑌦𑌰𑍂𑌪𑌂 𑌵𑌰𑌦𑌂 𑌪𑍍𑌰𑌸𑌨𑍍𑌨𑌂
𑌸𑌿𑌂𑌹𑍇𑌕𑍍𑌷𑌣𑌂 𑌸𑍇𑌵𑌕𑌪𑌾𑌰𑌿𑌜𑌾𑌤𑌮𑍍 ।
𑌨𑍀𑌲𑍋𑌤𑍍𑌪𑌲𑌾𑌂𑌗𑌂 𑌭𑍁𑌵𑌨𑍈𑌕𑌮𑌿𑌤𑍍𑌰𑌂
𑌰𑌾𑌮𑌂 𑌭𑌜𑍇 𑌰𑌾𑌘𑌵𑌰𑌾𑌮𑌚𑌂𑌦𑍍𑌰𑌮𑍍 ॥ 16𑍮

𑌲𑌂𑌕𑌾𑌵𑌿𑌰𑌾𑌮𑌂 𑌰𑌣𑌰𑌂𑌗𑌭𑍀𑌮𑌂
𑌰𑌾𑌜𑍀𑌵𑌨𑍇𑌤𑍍𑌰𑌂 𑌰𑌘𑍁𑌵𑌂𑌶𑌮𑌿𑌤𑍍𑌰𑌮𑍍 ।
𑌕𑌾𑌰𑍁𑌣𑍍𑌯𑌮𑍂𑌰𑍍𑌤𑌿𑌂 𑌕𑌰𑍁𑌣𑌾𑌪𑍍𑌰𑌪𑍂𑌰𑍍𑌤𑌿𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 16𑍯

𑌸𑍁𑌗𑍍𑌰𑍀𑌵𑌮𑌿𑌤𑍍𑌰𑌂 𑌪𑌰𑌮𑌂 𑌪𑌵𑌿𑌤𑍍𑌰𑌂
𑌸𑍀𑌤𑌾𑌕𑌳𑌤𑍍𑌰𑌂 𑌨𑌵𑌹𑍇𑌮𑌸𑍂𑌤𑍍𑌰𑌮𑍍 ।
𑌕𑌾𑌰𑍁𑌣𑍍𑌯𑌪𑌾𑌤𑍍𑌰𑌂 𑌶𑌤𑌪𑌤𑍍𑌰𑌨𑍇𑌤𑍍𑌰𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌂 𑌶𑌿𑌰𑌸𑌾 𑌨𑌮𑌾𑌮𑌿 ॥ 1𑍭0

𑌶𑍍𑌰𑍀𑌰𑌾𑌘𑌵𑍇𑌤𑌿 𑌰𑌮𑌣𑍇𑌤𑌿 𑌰𑌘𑍂𑌦𑍍𑌵𑌹𑍇𑌤𑌿
𑌰𑌾𑌮𑍇𑌤𑌿 𑌰𑌾𑌵𑌣𑌹𑌰𑍇𑌤𑌿 𑌰𑌮𑌾𑌧𑌵𑍇𑌤𑌿 ।
𑌸𑌾𑌕𑍇𑌤𑌨𑌾𑌥𑌸𑍁𑌮𑍁𑌖𑍇𑌤𑌿 𑌚 𑌸𑍁𑌵𑍍𑌰𑌤𑍇𑌤𑌿
𑌵𑌾𑌣𑍀 𑌸𑌦𑌾 𑌵𑌦𑌤𑍁 𑌰𑌾𑌮 𑌹𑌰𑍇 𑌹𑌰𑍇𑌤𑌿 ॥ 1𑍭1

𑌶𑍍𑌰𑍀𑌰𑌾𑌮𑌨𑌾𑌮𑌾𑌮𑍃𑌤𑌮𑌂𑌤𑍍𑌰𑌬𑍀𑌜𑌂
𑌸𑌂𑌜𑍀𑌵𑌨𑌂 𑌚𑍇𑌨𑍍𑌮𑌨𑌸𑌿 𑌪𑍍𑌰𑌤𑌿𑌷𑍍𑌠𑌮𑍍 ।
𑌹𑌾𑌲𑌾𑌹𑌲𑌂 𑌵𑌾 𑌪𑍍𑌰𑌳𑌯𑌾𑌨𑌲𑌂 𑌵𑌾
𑌮𑍃𑌤𑍍𑌯𑍋𑌰𑍍𑌮𑍁𑌖𑌂 𑌵𑌾 𑌵𑌿𑌤𑌥𑍀𑌕𑌰𑍋𑌤𑌿 ॥ 1𑍭2

𑌕𑌿𑌂 𑌯𑍋𑌗𑌶𑌾𑌸𑍍𑌤𑍍𑌰𑍈𑌃 𑌕𑌿𑌮𑌶𑍇𑌷𑌵𑌿𑌦𑍍𑌯𑌾
𑌕𑌿𑌂 𑌯𑌾𑌗𑌗𑌂𑌗𑌾𑌦𑌿𑌵𑌿𑌶𑍇𑌷𑌤𑍀𑌰𑍍𑌥𑍈𑌃 ।
𑌕𑌿𑌂 𑌬𑍍𑌰𑌹𑍍𑌮𑌚𑌰𑍍𑌯𑌾𑌶𑍍𑌰𑌮𑌸𑌂𑌚𑌰𑍇𑌣
𑌭𑌕𑍍𑌤𑌿𑌰𑍍𑌨𑌚𑍇𑌤𑍍𑌤𑍇 𑌰𑌘𑍁𑌵𑌂𑌶𑌕𑍀𑌰𑍍𑌤𑍍𑌯𑌾𑌮𑍍 ॥ 1𑍭3

𑌇𑌦𑌂 𑌶𑌰𑍀𑌰𑌂 𑌶𑍍𑌲𑌥𑌸𑌂𑌧𑌿𑌜𑌰𑍍𑌝𑌰𑌂
𑌪𑌤𑌤𑍍𑌯𑌵𑌶𑍍𑌯𑌂 𑌪𑌰𑌿𑌣𑌾𑌮𑌪𑍇𑌶𑌲𑌮𑍍 ।
𑌕𑌿𑌮𑍌𑌷𑌥𑌂 𑌪𑍃𑌚𑍍𑌛𑌸𑌿 𑌮𑍂𑌢 𑌦𑍁𑌰𑍍𑌮𑌤𑍇
𑌨𑌿𑌰𑌾𑌮𑌯𑌂 𑌰𑌾𑌮𑌕𑌥𑌾𑌮𑍃𑌤𑌂 𑌪𑌿𑌬 ॥ 1𑍭4

𑌹𑍇 𑌰𑌾𑌮𑌭𑌦𑍍𑌰𑌾𑌶𑍍𑌰𑌯 𑌹𑍇 𑌕𑍃𑌪𑌾𑌳𑍋
𑌹𑍇 𑌭𑌕𑍍𑌤𑌲𑍋𑌕𑍈𑌕𑌶𑌰𑌣𑍍𑌯𑌮𑍂𑌰𑍍𑌤𑍇 ।
𑌪𑍁𑌨𑍀𑌹𑌿 𑌮𑌾𑌂 𑌤𑍍𑌵𑌚𑍍𑌚𑌰𑌣𑌾𑌰𑌵𑌿𑌂𑌦𑌂
𑌜𑌗𑌤𑍍𑌪𑌵𑌿𑌤𑍍𑌰𑌂 𑌶𑌰𑌣𑌂 𑌮𑌮𑌾𑌽𑌸𑍍𑌤𑍁 ॥ 1𑍭5

𑌨𑍀𑌲𑌾𑌭𑍍𑌰𑌦𑍇𑌹 𑌨𑌿𑌖𑌿𑌲𑍇𑌶 𑌜𑌗𑌨𑍍𑌨𑌿𑌵𑌾𑌸
𑌰𑌾𑌜𑍀𑌵𑌨𑍇𑌤𑍍𑌰 𑌰𑌮𑌣𑍀𑌯𑌗𑍁𑌣𑌾𑌭𑌿𑌰𑌾𑌮 ।
𑌶𑍍𑌰𑍀𑌦𑌾𑌮 𑌦𑍈𑌤𑍍𑌯𑌕𑍁𑌲𑌮𑌰𑍍𑌦𑌨 𑌰𑌾𑌮𑌚𑌂𑌦𑍍𑌰
𑌤𑍍𑌵𑌤𑍍𑌪𑌾𑌦𑌪𑌦𑍍𑌮𑌮𑌨𑌿𑌶𑌂 𑌕𑌲𑌯𑌾𑌮𑌿 𑌚𑌿𑌤𑍍𑌤𑍇 ॥ 1𑍭6

𑌶𑍍𑌰𑍀𑌰𑌾𑌮𑌚𑌂𑌦𑍍𑌰 𑌕𑌰𑍁𑌣𑌾𑌕𑌰 𑌦𑍀𑌨𑌬𑌂𑌧𑍋
𑌸𑍀𑌤𑌾𑌸𑌮𑍇𑌤 𑌭𑌰𑌤𑌾𑌗𑍍𑌰𑌜 𑌰𑌾𑌘𑌵𑍇𑌶 ।
𑌪𑌾𑌪𑌾𑌰𑍍𑌤𑌿𑌭𑌂𑌜𑌨 𑌭𑌯𑌾𑌤𑍁𑌰𑌦𑍀𑌨𑌬𑌂𑌧𑍋
𑌪𑌾𑌪𑌾𑌂𑌬𑍁𑌧𑍌 𑌪𑌤𑌿𑌤𑌮𑍁𑌦𑍍𑌧𑌰 𑌮𑌾𑌮𑌨𑌾𑌥𑌮𑍍 ॥ 1𑍭𑍭

𑌇𑌂𑌦𑍀𑌵𑌰𑌦𑌳𑌶𑍍𑌯𑌾𑌮-𑌮𑌿𑌂𑌦𑍁𑌕𑍋𑌟𑌿𑌨𑌿𑌭𑌾𑌨𑌨𑌮𑍍 ।
𑌕𑌂𑌦𑌰𑍍𑌪𑌕𑍋𑌟𑌿𑌲𑌾𑌵𑌣𑍍𑌯𑌂 𑌵𑌂𑌦𑍇𑌽𑌹𑌂 𑌰𑌘𑍁𑌨𑌂𑌦𑌨𑌮𑍍 ॥ 1𑍭5

𑌇𑌤𑌿 𑌶𑍍𑌰𑍀𑌬𑍋𑌧𑍇𑌂𑌦𑍍𑌰𑌸𑌰𑌸𑍍𑌵𑌤𑍀 𑌕𑍃𑌤 𑌶𑍍𑌰𑍀𑌰𑌾𑌮𑌕𑌰𑍍𑌣𑌾𑌮𑍃𑌤𑌮𑍍 ॥