𑌶𑍍𑌰𑍀 𑌰𑌾𑌘𑌵𑍇𑌂𑌦𑍍𑌰 𑌸𑍍𑌤𑍋𑌤𑍍𑌰𑌮𑍍

𑌶𑍍𑌰𑍀𑌪𑍂𑌰𑍍𑌣𑌬𑍋𑌧𑌗𑍁𑌰𑍁𑌤𑍀𑌰𑍍𑌥𑌪𑌯𑍋𑌬𑍍𑌧𑌿𑌪𑌾𑌰𑌾
𑌕𑌾𑌮𑌾𑌰𑌿𑌮𑌾𑌕𑍍𑌷𑌵𑌿𑌷𑌮𑌾𑌕𑍍𑌷𑌶𑌿𑌰𑌃 𑌸𑍍𑌪𑍃𑌶𑌂𑌤𑍀 ।
𑌪𑍂𑌰𑍍𑌵𑍋𑌤𑍍𑌤𑌰𑌾𑌮𑌿𑌤𑌤𑌰𑌂𑌗𑌚𑌰𑌤𑍍𑌸𑍁𑌹𑌂𑌸𑌾
𑌦𑍇𑌵𑌾𑌳𑌿𑌸𑍇𑌵𑌿𑌤𑌪𑌰𑌾𑌂𑌘𑍍𑌰𑌿𑌪𑌯𑍋𑌜𑌲𑌗𑍍𑌨𑌾 ॥ 1 ॥

𑌜𑍀𑌵𑍇𑌶𑌭𑍇𑌦𑌗𑍁𑌣𑌪𑍂𑌰𑍍𑌤𑌿𑌜𑌗𑌤𑍍𑌸𑍁𑌸𑌤𑍍𑌤𑍍𑌵-
-𑌨𑍀𑌚𑍋𑌚𑍍𑌚𑌭𑌾𑌵𑌮𑍁𑌖𑌨𑌕𑍍𑌰𑌗𑌣𑍈𑌃 𑌸𑌮𑍇𑌤𑌾 ।
𑌦𑍁𑌰𑍍𑌵𑌾𑌦𑍍𑌯𑌜𑌾𑌪𑌤𑌿𑌗𑌿𑌳𑍈𑌰𑍍𑌗𑍁𑌰𑍁𑌰𑌾𑌘𑌵𑍇𑌂𑌦𑍍𑌰-
-𑌵𑌾𑌗𑍍𑌦𑍇𑌵𑌤𑌾𑌸𑌰𑌿𑌦𑌮𑍁𑌂 𑌵𑌿𑌮𑌲𑍀 𑌕𑌰𑍋𑌤𑍁 ॥ 2 ॥

𑌶𑍍𑌰𑍀𑌰𑌾𑌘𑌵𑍇𑌂𑌦𑍍𑌰𑌃 𑌸𑌕𑌲𑌪𑍍𑌰𑌦𑌾𑌤𑌾
𑌸𑍍𑌵𑌪𑌾𑌦𑌕𑌂𑌜𑌦𑍍𑌵𑌯𑌭𑌕𑍍𑌤𑌿𑌮𑌦𑍍𑌭𑍍𑌯𑌃 ।
𑌅𑌘𑌾𑌦𑍍𑌰𑌿𑌸𑌂𑌭𑍇𑌦𑌨𑌦𑍃𑌷𑍍𑌟𑌿𑌵𑌜𑍍𑌰𑌃
𑌕𑍍𑌷𑌮𑌾𑌸𑍁𑌰𑍇𑌂𑌦𑍍𑌰𑍋𑌽𑌵𑌤𑍁 𑌮𑌾𑌂 𑌸𑌦𑌾𑌽𑌯𑌮𑍍 ॥ 3 ॥

𑌶𑍍𑌰𑍀𑌰𑌾𑌘𑌵𑍇𑌂𑌦𑍍𑌰𑍋 𑌹𑌰𑌿𑌪𑌾𑌦𑌕𑌂𑌜-
-𑌨𑌿𑌷𑍇𑌵𑌣𑌾𑌲𑍍𑌲𑌬𑍍𑌧𑌸𑌮𑌸𑍍𑌤𑌸𑌂𑌪𑌤𑍍 ।
𑌦𑍇𑌵𑌸𑍍𑌵𑌭𑌾𑌵𑍋 𑌦𑌿𑌵𑌿𑌜𑌦𑍍𑌰𑍁𑌮𑍋𑌽𑌯-
-𑌮𑌿𑌷𑍍𑌟𑌪𑍍𑌰𑌦𑍋 𑌮𑍇 𑌸𑌤𑌤𑌂 𑌸 𑌭𑍂𑌯𑌾𑌤𑍍 ॥ 4 ॥

𑌭𑌵𑍍𑌯𑌸𑍍𑌵𑌰𑍂𑌪𑍋 𑌭𑌵𑌦𑍁𑌃𑌖𑌤𑍂𑌲-
-𑌸𑌂𑌘𑌾𑌗𑍍𑌨𑌿𑌚𑌰𑍍𑌯𑌃 𑌸𑍁𑌖𑌧𑍈𑌰𑍍𑌯𑌶𑌾𑌲𑍀 ।
𑌸𑌮𑌸𑍍𑌤𑌦𑍁𑌷𑍍𑌟𑌗𑍍𑌰𑌹𑌨𑌿𑌗𑍍𑌰𑌹𑍇𑌶𑍋
𑌦𑍁𑌰𑌤𑍍𑌯𑌯𑍋𑌪𑌪𑍍𑌲𑌵𑌸𑌿𑌂𑌧𑍁𑌸𑍇𑌤𑍁𑌃 ॥ 5 ॥

𑌨𑌿𑌰𑌸𑍍𑌤𑌦𑍋𑌷𑍋 𑌨𑌿𑌰𑌵𑌦𑍍𑌯𑌵𑍇𑌷𑌃
𑌪𑍍𑌰𑌤𑍍𑌯𑌰𑍍𑌥𑌿𑌮𑍂𑌕𑌤𑍍𑌤𑍍𑌵𑌨𑌿𑌦𑌾𑌨𑌭𑌾𑌷𑌃 ।
𑌵𑌿𑌦𑍍𑌵𑌤𑍍𑌪𑌰𑌿𑌜𑍍𑌞𑍇𑌯𑌮𑌹𑌾𑌵𑌿𑌶𑍇𑌷𑍋
𑌵𑌾𑌗𑍍𑌵𑍈𑌖𑌰𑍀𑌨𑌿𑌰𑍍𑌜𑌿𑌤𑌭𑌵𑍍𑌯𑌶𑍇𑌷𑌃 ॥ 6 ॥

𑌸𑌂𑌤𑌾𑌨𑌸𑌂𑌪𑌤𑍍𑌪𑌰𑌿𑌶𑍁𑌦𑍍𑌧𑌭𑌕𑍍𑌤𑌿-
-𑌵𑌿𑌜𑍍𑌞𑌾𑌨𑌵𑌾𑌗𑍍𑌦𑍇𑌹𑌸𑍁𑌪𑌾𑌟𑌵𑌾𑌦𑍀𑌨𑍍 ।
𑌦𑌤𑍍𑌵𑌾 𑌶𑌰𑍀𑌰𑍋𑌤𑍍𑌥𑌸𑌮𑌸𑍍𑌤𑌦𑍋𑌷𑌾𑌨𑍍
𑌹𑌤𑍍𑌤𑍍𑌵𑌾 𑌸 𑌨𑍋𑌽𑌵𑍍𑌯𑌾𑌦𑍍𑌗𑍁𑌰𑍁𑌰𑌾𑌘𑌵𑍇𑌂𑌦𑍍𑌰𑌃 ॥ 𑍭 ॥

𑌯𑌤𑍍𑌪𑌾𑌦𑍋𑌦𑌕𑌸𑌂𑌚𑌯𑌃 𑌸𑍁𑌰𑌨𑌦𑍀𑌮𑍁𑌖𑍍𑌯𑌾𑌪𑌗𑌾𑌸𑌾𑌦𑌿𑌤𑌾-
-𑌸𑌂𑌖𑍍𑌯𑌾𑌨𑍁𑌤𑍍𑌤𑌮𑌪𑍁𑌣𑍍𑌯𑌸𑌂𑌘𑌵𑌿𑌲𑌸𑌤𑍍𑌪𑍍𑌰𑌖𑍍𑌯𑌾𑌤𑌪𑍁𑌣𑍍𑌯𑌾𑌵𑌹𑌃 ।
𑌦𑍁𑌸𑍍𑌤𑌾𑌪𑌤𑍍𑌰𑌯𑌨𑌾𑌶𑌨𑍋 𑌭𑍁𑌵𑌿 𑌮𑌹𑌾𑌵𑌂𑌧𑍍𑌯𑌾𑌸𑍁𑌪𑍁𑌤𑍍𑌰𑌪𑍍𑌰𑌦𑍋
𑌵𑍍𑌯𑌂𑌗𑌸𑍍𑌵𑌂𑌗𑌸𑌮𑍃𑌦𑍍𑌧𑌿𑌦𑍋 𑌗𑍍𑌰𑌹𑌮𑌹𑌾𑌪𑌾𑌪𑌾𑌪𑌹𑌸𑍍𑌤𑌂 𑌶𑍍𑌰𑌯𑍇 ॥ 𑍮 ॥

𑌯𑌤𑍍𑌪𑌾𑌦𑌕𑌂𑌜𑌰𑌜𑌸𑌾 𑌪𑌰𑌿𑌭𑍂𑌷𑌿𑌤𑌾𑌂𑌗𑌾
𑌯𑌤𑍍𑌪𑌾𑌦𑌪𑌦𑍍𑌮𑌮𑌧𑍁𑌪𑌾𑌯𑌿𑌤𑌮𑌾𑌨𑌸𑌾 𑌯𑍇 ।
𑌯𑌤𑍍𑌪𑌾𑌦𑌪𑌦𑍍𑌮𑌪𑌰𑌿𑌕𑍀𑌰𑍍𑌤𑌨𑌜𑍀𑌰𑍍𑌣𑌵𑌾𑌚
-𑌸𑍍𑌤𑌦𑍍𑌦𑌰𑍍𑌶𑌨𑌂 𑌦𑍁𑌰𑌿𑌤𑌕𑌾𑌨𑌨𑌦𑌾𑌵𑌭𑍂𑌤𑌮𑍍 ॥ 𑍯 ॥

𑌸𑌰𑍍𑌵𑌤𑌂𑌤𑍍𑌰𑌸𑍍𑌵𑌤𑌂𑌤𑍍𑌰𑍋𑌽𑌸𑍌 𑌶𑍍𑌰𑍀𑌮𑌧𑍍𑌵𑌮𑌤𑌵𑌰𑍍𑌧𑌨𑌃
𑌵𑌿𑌜𑌯𑍀𑌂𑌦𑍍𑌰𑌕𑌰𑌾𑌬𑍍𑌜𑍋𑌤𑍍𑌥𑌸𑍁𑌧𑍀𑌂𑌦𑍍𑌰𑌵𑌰𑌪𑍁𑌤𑍍𑌰𑌕𑌃 ॥ 10 ॥

𑌶𑍍𑌰𑍀𑌰𑌾𑌘𑌵𑍇𑌂𑌦𑍍𑌰𑍋 𑌯𑌤𑌿𑌰𑌾𑌟𑍍 𑌗𑍁𑌰𑍁𑌰𑍍𑌮𑍇 𑌸𑍍𑌯𑌾𑌦𑍍𑌭𑌯𑌾𑌪𑌹𑌃
𑌜𑍍𑌞𑌾𑌨𑌭𑌕𑍍𑌤𑌿𑌸𑍁𑌪𑍁𑌤𑍍𑌰𑌾𑌯𑍁𑌰𑍍𑌯𑌶𑌃 𑌶𑍍𑌰𑍀𑌪𑍁𑌣𑍍𑌯𑌵𑌰𑍍𑌧𑌨𑌃 ॥ 11 ॥

𑌪𑍍𑌰𑌤𑌿𑌵𑌾𑌦𑌿𑌜𑌯𑌸𑍍𑌵𑌾𑌂𑌤𑌭𑍇𑌦𑌚𑌿𑌹𑍍𑌨𑌾𑌦𑌰𑍋 𑌗𑍁𑌰𑍁𑌃 ।
𑌸𑌰𑍍𑌵𑌵𑌿𑌦𑍍𑌯𑌾𑌪𑍍𑌰𑌵𑍀𑌣𑍋𑌽𑌨𑍍𑌯𑍋 𑌰𑌾𑌘𑌵𑍇𑌂𑌦𑍍𑌰𑌾𑌨𑍍𑌨 𑌵𑌿𑌦𑍍𑌯𑌤𑍇 ॥ 12 ॥

𑌅𑌪𑌰𑍋𑌕𑍍𑌷𑍀𑌕𑍃𑌤𑌶𑍍𑌰𑍀𑌶𑌃 𑌸𑌮𑍁𑌪𑍇𑌕𑍍𑌷𑌿𑌤𑌭𑌾𑌵𑌜𑌃 ।
𑌅𑌪𑍇𑌕𑍍𑌷𑌿𑌤𑌪𑍍𑌰𑌦𑌾𑌤𑌾𑌽𑌨𑍍𑌯𑍋 𑌰𑌾𑌘𑌵𑍇𑌂𑌦𑍍𑌰𑌾𑌨𑍍𑌨 𑌵𑌿𑌦𑍍𑌯𑌤𑍇 ॥ 13 ॥

𑌦𑌯𑌾𑌦𑌾𑌕𑍍𑌷𑌿𑌣𑍍𑌯𑌵𑍈𑌰𑌾𑌗𑍍𑌯𑌵𑌾𑌕𑍍𑌪𑌾𑌟𑌵𑌮𑍁𑌖𑌾𑌂𑌕𑌿𑌤𑌃 ।
𑌶𑌾𑌪𑌾𑌨𑍁𑌗𑍍𑌰𑌹𑌶𑌕𑍍𑌤𑍋𑌽𑌨𑍍𑌯𑍋 𑌰𑌾𑌘𑌵𑍇𑌂𑌦𑍍𑌰𑌾𑌨𑍍𑌨 𑌵𑌿𑌦𑍍𑌯𑌤𑍇 ॥ 14 ॥

𑌅𑌜𑍍𑌞𑌾𑌨𑌵𑌿𑌸𑍍𑌮𑍃𑌤𑌿𑌭𑍍𑌰𑌾𑌂𑌤𑌿𑌸𑌂𑌶𑌯𑌾𑌽𑌪𑌸𑍍𑌮𑍃𑌤𑌿𑌕𑍍𑌷𑌯𑌾𑌃 ।
𑌤𑌂𑌦𑍍𑌰𑌾𑌕𑌂𑌪𑌵𑌚𑌃𑌕𑍌𑌂𑌠𑍍𑌯𑌮𑍁𑌖𑌾 𑌯𑍇 𑌚𑍇𑌂𑌦𑍍𑌰𑌿𑌯𑍋𑌦𑍍𑌭𑌵𑌾𑌃 ।
𑌦𑍋𑌷𑌾𑌸𑍍𑌤𑍇 𑌨𑌾𑌶𑌮𑌾𑌯𑌾𑌂𑌤𑌿 𑌰𑌾𑌘𑌵𑍇𑌂𑌦𑍍𑌰𑌪𑍍𑌰𑌸𑌾𑌦𑌤𑌃 ॥ 15 ॥

𑌓𑌂 𑌶𑍍𑌰𑍀𑌰𑌾𑌘𑌵𑍇𑌂𑌦𑍍𑌰𑌾𑌯 𑌨𑌮𑌃 𑌇𑌤𑍍𑌯𑌽𑌷𑍍𑌟𑌾𑌕𑍍𑌷𑌰𑌮𑌂𑌤𑍍𑌰𑌤𑌃 ।
𑌜𑌪𑌿𑌤𑌾𑌦𑍍𑌭𑌾𑌵𑌿𑌤𑌾𑌨𑍍𑌨𑌿𑌤𑍍𑌯𑌂 𑌇𑌷𑍍𑌟𑌾𑌰𑍍𑌥𑌾𑌃 𑌸𑍍𑌯𑍁𑌰𑍍𑌨 𑌸𑌂𑌶𑌯𑌃 ॥ 16 ॥

𑌹𑌂𑌤𑍁 𑌨𑌃 𑌕𑌾𑌯𑌜𑌾𑌨𑍍 𑌦𑍋𑌷𑌾𑌨𑍍 𑌆𑌤𑍍𑌮𑌾𑌤𑍍𑌮𑍀𑌯𑌸𑌮𑍁𑌦𑍍𑌭𑌵𑌾𑌨𑍍 ।
𑌸𑌰𑍍𑌵𑌾𑌨𑌪𑌿 𑌪𑍁𑌮𑌰𑍍𑌥𑌾𑌂𑌶𑍍𑌚 𑌦𑌦𑌾𑌤𑍁 𑌗𑍁𑌰𑍁𑌰𑌾𑌤𑍍𑌮𑌵𑌿𑌤𑍍 ॥ 1𑍭 ॥

𑌇𑌤𑌿 𑌕𑌾𑌲𑌤𑍍𑌰𑌯𑍇 𑌨𑌿𑌤𑍍𑌯𑌂 𑌪𑍍𑌰𑌾𑌰𑍍𑌥𑌨𑌾𑌂 𑌯𑌃 𑌕𑌰𑍋𑌤𑌿 𑌸𑌃 ।
𑌇𑌹𑌾𑌮𑍁𑌤𑍍𑌰𑌾𑌪𑍍𑌤𑌸𑌰𑍍𑌵𑍇𑌷𑍍𑌟𑍋 𑌮𑍋𑌦𑌤𑍇 𑌨𑌾𑌤𑍍𑌰 𑌸𑌂𑌶𑌯𑌃 ॥ 1𑍮 ॥

𑌅𑌗𑌮𑍍𑌯𑌮𑌹𑌿𑌮𑌾 𑌲𑍋𑌕𑍇 𑌰𑌾𑌘𑌵𑍇𑌂𑌦𑍍𑌰𑍋 𑌮𑌹𑌾𑌯𑌶𑌾𑌃 ।
𑌶𑍍𑌰𑍀𑌮𑌧𑍍𑌵𑌮𑌤𑌦𑍁𑌗𑍍𑌧𑌾𑌬𑍍𑌧𑌿𑌚𑌂𑌦𑍍𑌰𑍋𑌽𑌵𑌤𑍁 𑌸𑌦𑌾𑌽𑌨𑌘𑌃 ॥ 1𑍯 ॥

𑌸𑌰𑍍𑌵𑌯𑌾𑌤𑍍𑌰𑌾𑌫𑌲𑌾𑌵𑌾𑌪𑍍𑌤𑍍𑌯𑍈 𑌯𑌥𑌾𑌶𑌕𑍍𑌤𑌿𑌪𑍍𑌰𑌦𑌕𑍍𑌷𑌿𑌣𑌮𑍍 ।
𑌕𑌰𑍋𑌮𑌿 𑌤𑌵 𑌸𑌿𑌦𑍍𑌧𑌸𑍍𑌯 𑌬𑍃𑌂𑌦𑌾𑌵𑌨𑌗𑌤𑌂 𑌜𑌲𑌮𑍍 ॥ 20 ॥

𑌶𑌿𑌰𑌸𑌾 𑌧𑌾𑌰𑌯𑌾𑌮𑍍𑌯𑌦𑍍𑌯 𑌸𑌰𑍍𑌵𑌤𑍀𑌰𑍍𑌥𑌫𑌲𑌾𑌪𑍍𑌤𑌯𑍇 ।
𑌸𑌰𑍍𑌵𑌾𑌭𑍀𑌷𑍍𑌟𑌾𑌰𑍍𑌥𑌸𑌿𑌦𑍍𑌧𑍍𑌯𑌰𑍍𑌥𑌂 𑌨𑌮𑌸𑍍𑌕𑌾𑌰𑌂 𑌕𑌰𑍋𑌮𑍍𑌯𑌹𑌮𑍍 ।
𑌤𑌵 𑌸𑌂𑌕𑍀𑌰𑍍𑌤𑌨𑌂 𑌵𑍇𑌦𑌶𑌾𑌸𑍍𑌤𑍍𑌰𑌾𑌰𑍍𑌥𑌜𑍍𑌞𑌾𑌨𑌸𑌿𑌦𑍍𑌧𑌯𑍇 ॥ 21 ॥

𑌸𑌂𑌸𑌾𑌰𑍇𑌽𑌕𑍍𑌷𑌯𑌸𑌾𑌗𑌰𑍇 𑌪𑍍𑌰𑌕𑍃𑌤𑌿𑌤𑍋𑌽𑌗𑌾𑌧𑍇 𑌸𑌦𑌾 𑌦𑍁𑌸𑍍𑌤𑌰𑍇
𑌸𑌰𑍍𑌵𑌾𑌵𑌦𑍍𑌯𑌜𑌲𑌗𑍍𑌰𑌹𑍈𑌰𑌨𑍁𑌪𑌮𑍈𑌃 𑌕𑌾𑌮𑌾𑌦𑌿𑌭𑌂𑌗𑌾𑌕𑍁𑌲𑍇 ।
𑌨𑌾𑌨𑌾𑌵𑌿𑌭𑍍𑌰𑌮𑌦𑍁𑌰𑍍𑌭𑍍𑌰𑌮𑍇𑌽𑌮𑌿𑌤𑌭𑌯𑌸𑍍𑌤𑍋𑌮𑌾𑌦𑌿𑌫𑍇𑌨𑍋𑌤𑍍𑌕𑌟𑍇
𑌦𑍁𑌃𑌖𑍋𑌤𑍍𑌕𑍃𑌷𑍍𑌟𑌵𑌿𑌷𑍇 𑌸𑌮𑍁𑌦𑍍𑌧𑌰 𑌗𑍁𑌰𑍋 𑌮𑌾 𑌮𑌗𑍍𑌨𑌰𑍂𑌪𑌂 𑌸𑌦𑌾 ॥ 22 ॥

𑌰𑌾𑌘𑌵𑍇𑌂𑌦𑍍𑌰𑌗𑍁𑌰𑍁𑌸𑍍𑌤𑍋𑌤𑍍𑌰𑌂 𑌯𑌃 𑌪𑌠𑍇𑌦𑍍𑌭𑌕𑍍𑌤𑌿𑌪𑍂𑌰𑍍𑌵𑌕𑌮𑍍 ।
𑌤𑌸𑍍𑌯 𑌕𑍁𑌷𑍍𑌠𑌾𑌦𑌿𑌰𑍋𑌗𑌾𑌣𑌾𑌂 𑌨𑌿𑌵𑍃𑌤𑍍𑌤𑌿𑌸𑍍𑌤𑍍𑌵𑌰𑌯𑌾 𑌭𑌵𑍇𑌤𑍍 ॥ 23 ॥

𑌅𑌂𑌧𑍋𑌽𑌪𑌿 𑌦𑌿𑌵𑍍𑌯𑌦𑍃𑌷𑍍𑌟𑌿𑌃 𑌸𑍍𑌯𑌾𑌦𑍇𑌡𑌮𑍂𑌕𑍋𑌽𑌪𑌿 𑌵𑌾𑌕𑍍𑌪𑌤𑌿𑌃 ।
𑌪𑍂𑌰𑍍𑌣𑌾𑌯𑍁𑌃 𑌪𑍂𑌰𑍍𑌣𑌸𑌂𑌪𑌤𑍍𑌤𑌿𑌃 𑌸𑍍𑌤𑍋𑌤𑍍𑌰𑌸𑍍𑌯𑌾𑌽𑌸𑍍𑌯 𑌜𑌪𑌾𑌦𑍍𑌭𑌵𑍇𑌤𑍍 ॥ 24 ॥

𑌯𑌃 𑌪𑌿𑌬𑍇𑌜𑍍𑌜𑌲𑌮𑍇𑌤𑍇𑌨 𑌸𑍍𑌤𑍋𑌤𑍍𑌰𑍇𑌣𑍈𑌵𑌾𑌭𑌿𑌮𑌂𑌤𑍍𑌰𑌿𑌤𑌮𑍍 ।
𑌤𑌸𑍍𑌯 𑌕𑍁𑌕𑍍𑌷𑌿𑌗𑌤𑌾 𑌦𑍋𑌷𑌾𑌃 𑌸𑌰𑍍𑌵𑍇 𑌨𑌶𑍍𑌯𑌂𑌤𑌿 𑌤𑌤𑍍 𑌕𑍍𑌷𑌣𑌾𑌤𑍍 ॥ 25 ॥

𑌯𑌦𑍍𑌵𑍃𑌂𑌦𑌾𑌵𑌨𑌮𑌾𑌸𑌾𑌦𑍍𑌯 𑌪𑌂𑌗𑍁𑌃 𑌖𑌂𑌜𑍋𑌽𑌪𑌿 𑌵𑌾 𑌜𑌨𑌃 ।
𑌸𑍍𑌤𑍋𑌤𑍍𑌰𑍇𑌣𑌾𑌨𑍇𑌨 𑌯𑌃 𑌕𑍁𑌰𑍍𑌯𑌾𑌤𑍍 𑌪𑍍𑌰𑌦𑌕𑍍𑌷𑌿𑌣𑌨𑌮𑌸𑍍𑌕𑍃𑌤𑍀 ॥ 26 ॥

𑌸 𑌜𑌂𑌘𑌾𑌲𑍋 𑌭𑌵𑍇𑌦𑍇𑌵 𑌗𑍁𑌰𑍁𑌰𑌾𑌜𑌪𑍍𑌰𑌸𑌾𑌦𑌤𑌃 ।
𑌸𑍋𑌮𑌸𑍂𑌰𑍍𑌯𑍋𑌪𑌰𑌾𑌗𑍇 𑌚 𑌪𑍁𑌷𑍍𑌯𑌾𑌰𑍍𑌕𑌾𑌦𑌿𑌸𑌮𑌾𑌗𑌮𑍇 ॥ 2𑍭 ॥

𑌯𑍋𑌽𑌨𑍁𑌤𑍍𑌤𑌮𑌮𑌿𑌦𑌂 𑌸𑍍𑌤𑍋𑌤𑍍𑌰𑌮𑌷𑍍𑌟𑍋𑌤𑍍𑌤𑌰𑌶𑌤𑌂 𑌜𑌪𑍇𑌤𑍍 ।
𑌭𑍂𑌤𑌪𑍍𑌰𑍇𑌤𑌪𑌿𑌶𑌾𑌚𑌾𑌦𑌿 𑌪𑍀𑌡𑌾 𑌤𑌸𑍍𑌯 𑌨 𑌜𑌾𑌯𑌤𑍇 ॥ 2𑍮 ॥

𑌏𑌤𑌤𑍍 𑌸𑍍𑌤𑍋𑌤𑍍𑌰𑌂 𑌸𑌮𑍁𑌚𑍍𑌚𑌾𑌰𑍍𑌯 𑌗𑍁𑌰𑍋𑌰𑍍𑌵𑍃𑌂𑌦𑌾𑌵𑌨𑌾𑌂𑌤𑌿𑌕𑍇 ।
𑌦𑍀𑌪𑌸𑌂𑌯𑍋𑌜𑌨𑌾𑌜𑍍𑌜𑍍𑌞𑌾𑌨𑌂 𑌪𑍁𑌤𑍍𑌰𑌲𑌾𑌭𑍋 𑌭𑌵𑍇𑌦𑍍𑌧𑍍𑌰𑍁𑌵𑌮𑍍 ॥ 2𑍯 ॥

𑌪𑌰𑌵𑌾𑌦𑌿𑌜𑌯𑍋 𑌦𑌿𑌵𑍍𑌯𑌜𑍍𑌞𑌾𑌨𑌭𑌕𑍍𑌤𑍍𑌯𑌾𑌦𑌿𑌵𑌰𑍍𑌧𑌨𑌮𑍍 ।
𑌸𑌰𑍍𑌵𑌾𑌭𑍀𑌷𑍍𑌟𑌪𑍍𑌰𑌵𑍃𑌦𑍍𑌧𑌿𑌃 𑌸𑍍𑌯𑌾𑌨𑍍𑌨𑌾𑌤𑍍𑌰 𑌕𑌾𑌰𑍍𑌯𑌾 𑌵𑌿𑌚𑌾𑌰𑌣𑌾 ॥ 30 ॥

𑌰𑌾𑌜𑌚𑍋𑌰𑌮𑌹𑌾𑌵𑍍𑌯𑌾𑌘𑍍𑌰𑌸𑌰𑍍𑌪𑌨𑌕𑍍𑌰𑌾𑌦𑌿𑌪𑍀𑌡𑌨𑌮𑍍 ।
𑌨 𑌜𑌾𑌯𑌤𑍇𑌽𑌸𑍍𑌯 𑌸𑍍𑌤𑍋𑌤𑍍𑌰𑌸𑍍𑌯 𑌪𑍍𑌰𑌭𑌾𑌵𑌾𑌨𑍍𑌨𑌾𑌤𑍍𑌰 𑌸𑌂𑌶𑌯𑌃 ॥ 31 ॥

𑌯𑍋 𑌭𑌕𑍍𑌤𑍍𑌯𑌾 𑌗𑍁𑌰𑍁𑌰𑌾𑌘𑌵𑍇𑌂𑌦𑍍𑌰𑌚𑌰𑌣𑌦𑍍𑌵𑌂𑌦𑍍𑌵𑌂 𑌸𑍍𑌮𑌰𑌨𑍍 𑌯𑌃 𑌪𑌠𑍇𑌤𑍍
𑌸𑍍𑌤𑍋𑌤𑍍𑌰𑌂 𑌦𑌿𑌵𑍍𑌯𑌮𑌿𑌦𑌂 𑌸𑌦𑌾 𑌨 𑌹𑌿 𑌭𑌵𑍇𑌤𑍍𑌤𑌸𑍍𑌯𑌾𑌸𑍁𑌖𑌂 𑌕𑌿𑌂𑌚𑌨 ।
𑌕𑌿𑌂 𑌤𑍍𑌵𑌿𑌷𑍍𑌟𑌾𑌰𑍍𑌥𑌸𑌮𑍃𑌦𑍍𑌧𑌿𑌰𑍇𑌵 𑌕𑌮𑌲𑌾𑌨𑌾𑌥𑌪𑍍𑌰𑌸𑌾𑌦𑍋𑌦𑌯𑌾𑌤𑍍
𑌕𑍀𑌰𑍍𑌤𑌿𑌰𑍍𑌦𑌿𑌗𑍍𑌵𑌿𑌦𑌿𑌤𑌾 𑌵𑌿𑌭𑍂𑌤𑌿𑌰𑌤𑍁𑌲𑌾 𑌸𑌾𑌕𑍍𑌷𑍀 𑌹𑌯𑌾𑌸𑍍𑌯𑍋𑌽𑌤𑍍𑌰 𑌹𑌿 ॥ 32 ॥

𑌫𑌲𑌶𑍃𑌤𑌿𑌃
𑌇𑌤𑌿 𑌶𑍍𑌰𑍀 𑌰𑌾𑌘𑌵𑍇𑌂𑌦𑍍𑌰𑌾𑌰𑍍𑌯 𑌗𑍁𑌰𑍁𑌰𑌾𑌜𑌪𑍍𑌰𑌸𑌾𑌦𑌤𑌃 ।
𑌕𑍃𑌤𑌂 𑌸𑍍𑌤𑍋𑌤𑍍𑌰𑌮𑌿𑌦𑌂 𑌪𑍁𑌣𑍍𑌯𑌂 𑌶𑍍𑌰𑍀𑌮𑌦𑍍𑌭𑌿𑌰𑍍𑌹𑍍𑌯𑌪𑍍𑌪𑌣𑌾𑌭𑌿𑌦𑍈𑌃 ॥

𑌪𑍂𑌜𑍍𑌯𑌾𑌯 𑌰𑌾𑌘𑌵𑍇𑌂𑌦𑍍𑌰𑌾𑌯 𑌸𑌤𑍍𑌯𑌧𑌰𑍍𑌮𑌰𑌤𑌾𑌯 𑌚 ।
𑌭𑌜𑌤𑌾𑌂 𑌕𑌲𑍍𑌪𑌵𑍃𑌕𑍍𑌷𑌾𑌯 𑌨𑌮𑌤𑌾𑌂 𑌕𑌾𑌮𑌧𑍇𑌨𑌵𑍇 ॥

𑌆𑌪𑌾𑌦𑌮𑍌𑌳𑌿𑌪𑌰𑍍𑌯𑌂𑌤𑌂 𑌗𑍁𑌰𑍂𑌣𑌾𑌮𑌾𑌕𑍃𑌤𑌿𑌂 𑌸𑍍𑌮𑌰𑍇𑌤𑍍 ।
𑌤𑍇𑌨 𑌵𑌿𑌘𑍍𑌨𑌃 𑌪𑍍𑌰𑌣𑌶𑍍𑌯𑌂𑌤𑌿 𑌸𑌿𑌦𑍍𑌧𑍍𑌯𑌂𑌤𑌿 𑌚 𑌮𑌨𑍋𑌰𑌥𑌾𑌃 ॥

𑌦𑍁𑌰𑍍𑌵𑌾𑌦𑌿𑌧𑍍𑌵𑌾𑌂𑌤𑌰𑌵𑌯𑍇 𑌵𑍈𑌷𑍍𑌣𑌵𑍇𑌂𑌦𑍀𑌵𑌰𑍇𑌂𑌦𑌵𑍇 ।
𑌶𑍍𑌰𑍀𑌰𑌾𑌘𑌵𑍇𑌂𑌦𑍍𑌰 𑌗𑍁𑌰𑌵𑍇 𑌨𑌮𑍋𑌽𑌤𑍍𑌯𑌂𑌤𑌦𑌯𑌾𑌳𑌵𑍇 ॥

𑌮𑍂𑌕𑍋𑌽𑌪𑌿 𑌯𑌤𑍍𑌪𑍍𑌰𑌸𑌾𑌦𑍇𑌨 𑌮𑍁𑌕𑍁𑌂𑌦𑌶𑌯𑌨𑌾𑌯 𑌤𑍇 ।
𑌰𑌾𑌜𑌰𑌾𑌜𑌾𑌯𑌤𑍇 𑌰𑌿𑌕𑍍𑌤𑍋 𑌰𑌾𑌘𑌵𑍇𑌂𑌦𑍍𑌰𑌂 𑌤𑌮𑌾𑌶𑍍𑌰𑌯𑍇 ।

𑌇𑌤𑌿 𑌶𑍍𑌰𑍀 𑌅𑌪𑍍𑌪𑌣𑍍𑌣𑌾𑌚𑌾𑌰𑍍𑌯𑌵𑌿𑌰𑌚𑌿𑌤𑌂 𑌶𑍍𑌰𑍀𑌰𑌾𑌘𑌵𑍇𑌂𑌦𑍍𑌰 𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ॥