𑌶𑍍𑌰𑍀 𑌪𑌂𑌚𑌾𑌯𑍁𑌧 𑌸𑍍𑌤𑍋𑌤𑍍𑌰𑌮𑍍

𑌸𑍍𑌫𑍁𑌰𑌤𑍍𑌸𑌹𑌸𑍍𑌰𑌾𑌰𑌶𑌿𑌖𑌾𑌤𑌿𑌤𑍀𑌵𑍍𑌰𑌂
𑌸𑍁𑌦𑌰𑍍𑌶𑌨𑌂 𑌭𑌾𑌸𑍍𑌕𑌰𑌕𑍋𑌟𑌿𑌤𑍁𑌲𑍍𑌯𑌮𑍍 ।
𑌸𑍁𑌰𑌦𑍍𑌵𑌿𑌷𑌾𑌂 𑌪𑍍𑌰𑌾𑌣𑌵𑌿𑌨𑌾𑌶𑌿 𑌵𑌿𑌷𑍍𑌣𑍋𑌃
𑌚𑌕𑍍𑌰𑌂 𑌸𑌦𑌾𑌽𑌹𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 1 ॥

𑌵𑌿𑌷𑍍𑌣𑍋𑌰𑍍𑌮𑍁𑌖𑍋𑌤𑍍𑌥𑌾𑌨𑌿𑌲𑌪𑍂𑌰𑌿𑌤𑌸𑍍𑌯
𑌯𑌸𑍍𑌯 𑌧𑍍𑌵𑌨𑌿𑌰𑍍𑌦𑌾𑌨𑌵𑌦𑌰𑍍𑌪𑌹𑌂𑌤𑌾 ।
𑌤𑌂 𑌪𑌾𑌂𑌚𑌜𑌨𑍍𑌯𑌂 𑌶𑌶𑌿𑌕𑍋𑌟𑌿𑌶𑍁𑌭𑍍𑌰𑌂
𑌶𑌂𑌖𑌂 𑌸𑌦𑌾𑌽𑌹𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 2 ॥

𑌹𑌿𑌰𑌣𑍍𑌮𑌯𑍀𑌂 𑌮𑍇𑌰𑍁𑌸𑌮𑌾𑌨𑌸𑌾𑌰𑌾𑌂
𑌕𑍌𑌮𑍋𑌦𑌕𑍀𑌂 𑌦𑍈𑌤𑍍𑌯𑌕𑍁𑌲𑍈𑌕𑌹𑌂𑌤𑍍𑌰𑍀𑌮𑍍 ।
𑌵𑍈𑌕𑍁𑌂𑌠𑌵𑌾𑌮𑌾𑌗𑍍𑌰𑌕𑌰𑌾𑌗𑍍𑌰𑌮𑍃𑌷𑍍𑌟𑌾𑌂
𑌗𑌦𑌾𑌂 𑌸𑌦𑌾𑌽𑌹𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 3 ॥

𑌯𑌜𑍍𑌜𑍍𑌯𑌾𑌨𑌿𑌨𑌾𑌦𑌶𑍍𑌰𑌵𑌣𑌾𑌤𑍍𑌸𑍁𑌰𑌾𑌣𑌾𑌂
𑌚𑍇𑌤𑌾𑌂𑌸𑌿 𑌨𑌿𑌰𑍍𑌮𑍁𑌕𑍍𑌤𑌭𑌯𑌾𑌨𑌿 𑌸𑌦𑍍𑌯𑌃 ।
𑌭𑌵𑌂𑌤𑌿 𑌦𑍈𑌤𑍍𑌯𑌾𑌶𑌨𑌿𑌬𑌾𑌣𑌵𑌰𑍍𑌷𑍈𑌃
𑌶𑌾𑌰𑍍𑌙𑍍𑌗𑌂 𑌸𑌦𑌾𑌽𑌹𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 4 ॥

𑌰𑌕𑍍𑌷𑍋𑌽𑌸𑍁𑌰𑌾𑌣𑌾𑌂 𑌕𑌠𑌿𑌨𑍋𑌗𑍍𑌰𑌕𑌂𑌠-
-𑌚𑍍𑌛𑍇𑌦𑌕𑍍𑌷𑌰𑌤𑍍‍𑌕𑍍𑌷𑍋𑌣𑌿𑌤 𑌦𑌿𑌗𑍍𑌧𑌸𑌾𑌰𑌮𑍍 ।
𑌤𑌂 𑌨𑌂𑌦𑌕𑌂 𑌨𑌾𑌮 𑌹𑌰𑍇𑌃 𑌪𑍍𑌰𑌦𑍀𑌪𑍍𑌤𑌂
𑌖𑌡𑍍𑌗𑌂 𑌸𑌦𑌾𑌽𑌹𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 5 ॥

𑌇𑌮𑌂 𑌹𑌰𑍇𑌃 𑌪𑌂𑌚𑌮𑌹𑌾𑌯𑍁𑌧𑌾𑌨𑌾𑌂
𑌸𑍍𑌤𑌵𑌂 𑌪𑌠𑍇𑌦𑍍𑌯𑍋𑌽𑌨𑍁𑌦𑌿𑌨𑌂 𑌪𑍍𑌰𑌭𑌾𑌤𑍇 ।
𑌸𑌮𑌸𑍍𑌤 𑌦𑍁𑌃𑌖𑌾𑌨𑌿 𑌭𑌯𑌾𑌨𑌿 𑌸𑌦𑍍𑌯𑌃
𑌪𑌾𑌪𑌾𑌨𑌿 𑌨𑌶𑍍𑌯𑌂𑌤𑌿 𑌸𑍁𑌖𑌾𑌨𑌿 𑌸𑌂𑌤𑌿 ॥ 6 ॥

𑌵𑌨𑍇 𑌰𑌣𑍇 𑌶𑌤𑍍𑌰𑍁 𑌜𑌲𑌾𑌗𑍍𑌨𑌿𑌮𑌧𑍍𑌯𑍇
𑌯𑌦𑍃𑌚𑍍𑌛𑌯𑌾𑌪𑌤𑍍𑌸𑍁 𑌮𑌹𑌾𑌭𑌯𑍇𑌷𑍁 ।
𑌪𑌠𑍇𑌤𑍍𑌵𑌿𑌦𑌂 𑌸𑍍𑌤𑍋𑌤𑍍𑌰𑌮𑌨𑌾𑌕𑍁𑌲𑌾𑌤𑍍𑌮𑌾
𑌸𑍁𑌖𑍀𑌭𑌵𑍇𑌤𑍍𑌤𑌤𑍍𑌕𑍃𑌤 𑌸𑌰𑍍𑌵𑌰𑌕𑍍𑌷𑌃 ॥ 𑍭 ॥

𑌸𑌚𑌕𑍍𑌰𑌶𑌂𑌖𑌂 𑌸𑌗𑌦𑌾𑌸𑌿𑌶𑌾𑌰𑍍𑌙𑍍𑌗𑌂
[𑌯𑌚𑍍𑌚𑌕𑍍𑌰𑌶𑌂𑌖𑌂 𑌗𑌦𑌖𑌡𑍍𑌗𑌶𑌾𑌰𑌂𑌗𑌿𑌣𑌂]
𑌪𑍀𑌤𑌾𑌂𑌬𑌰𑌂 𑌕𑍌𑌸𑍍𑌤𑍁𑌭-𑌵𑌤𑍍𑌸-𑌚𑌿𑌹𑍍𑌨𑌮𑍍 । [𑌕𑍌𑌸𑍍𑌤𑍁𑌭-𑌵𑌤𑍍𑌸-𑌲𑌾𑌂𑌛𑌿𑌤𑌮𑍍]
𑌶𑍍𑌰𑌿𑌯𑌾 𑌸𑌮𑍇𑌤𑍋𑌜𑍍𑌜𑍍𑌵𑌲 𑌶𑍋𑌭𑌿𑌤𑌾𑌂𑌗𑌂
𑌵𑌿𑌷𑍍𑌣𑍁𑌂 𑌸𑌦𑌾𑌽𑌹𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥

𑌜𑌲𑍇 𑌰𑌕𑍍𑌷𑌤𑍁 𑌵𑌾𑌰𑌾𑌹𑌃 𑌸𑍍𑌥𑌲𑍇 𑌰𑌕𑍍𑌷𑌤𑍁 𑌵𑌾𑌮𑌨𑌃 ।
𑌅𑌟𑌵𑍍𑌯𑌾𑌂 𑌨𑌾𑌰𑌸𑌿𑌂𑌹𑌶𑍍𑌚 𑌸𑌰𑍍𑌵𑌤𑌃 𑌪𑌾𑌤𑍁 𑌕𑍇𑌶𑌵𑌃 ॥

𑌇𑌤𑌿 𑌪𑌂𑌚𑌾𑌯𑍁𑌧 𑌸𑍍𑌤𑍋𑌤𑍍𑌰𑌮𑍍 ॥