𑌶𑍍𑌰𑍀 𑌕𑍃𑌷𑍍𑌣 𑌸𑌹𑌸𑍍𑌰 𑌨𑌾𑌮 𑌸𑍍𑌤𑍋𑌤𑍍𑌰𑌮𑍍

𑌓𑌂 𑌅𑌸𑍍𑌯 𑌶𑍍𑌰𑍀𑌕𑍃𑌷𑍍𑌣𑌸𑌹𑌸𑍍𑌰𑌨𑌾𑌮𑌸𑍍𑌤𑍋𑌤𑍍𑌰𑌮𑌂𑌤𑍍𑌰𑌸𑍍𑌯 𑌪𑌰𑌾𑌶𑌰 𑌋𑌷𑌿𑌃, 𑌅𑌨𑍁𑌷𑍍𑌟𑍁𑌪𑍍 𑌛𑌂𑌦𑌃, 𑌶𑍍𑌰𑍀𑌕𑍃𑌷𑍍𑌣𑌃 𑌪𑌰𑌮𑌾𑌤𑍍𑌮𑌾 𑌦𑍇𑌵𑌤𑌾, 𑌶𑍍𑌰𑍀𑌕𑍃𑌷𑍍𑌣𑍇𑌤𑌿 𑌬𑍀𑌜𑌮𑍍, 𑌶𑍍𑌰𑍀𑌵𑌲𑍍𑌲𑌭𑍇𑌤𑌿 𑌶𑌕𑍍𑌤𑌿𑌃, 𑌶𑌾𑌰𑌂𑌗𑍀𑌤𑌿 𑌕𑍀𑌲𑌕𑌂, 𑌶𑍍𑌰𑍀𑌕𑍃𑌷𑍍𑌣𑌪𑍍𑌰𑍀𑌤𑍍𑌯𑌰𑍍𑌥𑍇 𑌜𑌪𑍇 𑌵𑌿𑌨𑌿𑌯𑍋𑌗𑌃 ॥

𑌨𑍍𑌯𑌾𑌸𑌃
𑌪𑌰𑌾𑌶𑌰𑌾𑌯 𑌋𑌷𑌯𑍇 𑌨𑌮𑌃 𑌇𑌤𑌿 𑌶𑌿𑌰𑌸𑌿,
𑌅𑌨𑍁𑌷𑍍𑌟𑍁𑌪𑍍 𑌛𑌂𑌦𑌸𑍇 𑌨𑌮𑌃 𑌇𑌤𑌿 𑌮𑍁𑌖𑍇,
𑌗𑍋𑌪𑌾𑌲𑌕𑍃𑌷𑍍𑌣𑌦𑍇𑌵𑌤𑌾𑌯𑍈 𑌨𑌮𑌃 𑌇𑌤𑌿 𑌹𑍃𑌦𑌯𑍇,
𑌶𑍍𑌰𑍀𑌕𑍃𑌷𑍍𑌣𑌾𑌯 𑌬𑍀𑌜𑌾𑌯 𑌨𑌮𑌃 𑌇𑌤𑌿 𑌗𑍁𑌹𑍍𑌯𑍇,
𑌶𑍍𑌰𑍀𑌵𑌲𑍍𑌲𑌭𑌾𑌯 𑌶𑌕𑍍𑌤𑍍𑌯𑍈 𑌨𑌮𑌃 𑌇𑌤𑌿 𑌪𑌾𑌦𑌯𑍋𑌃,
𑌶𑌾𑌰𑍍𑌙𑍍𑌗𑌧𑌰𑌾𑌯 𑌕𑍀𑌲𑌕𑌾𑌯 𑌨𑌮𑌃 𑌇𑌤𑌿 𑌸𑌰𑍍𑌵𑌾𑌂𑌗𑍇 ॥

𑌕𑌰𑌨𑍍𑌯𑌾𑌸𑌃
𑌶𑍍𑌰𑍀𑌕𑍃𑌷𑍍𑌣 𑌇𑌤𑍍𑌯𑌾𑌰𑌭𑍍𑌯 𑌶𑍂𑌰𑌵𑌂𑌶𑍈𑌕𑌧𑍀𑌰𑌿𑌤𑍍𑌯𑌂𑌤𑌾𑌨𑌿 𑌅𑌂𑌗𑍁𑌷𑍍𑌠𑌾𑌭𑍍𑌯𑌾𑌂 𑌨𑌮𑌃 ।
𑌶𑍌𑌰𑌿𑌰𑌿𑌤𑍍𑌯𑌾𑌰𑌭𑍍𑌯 𑌸𑍍𑌵𑌭𑌾𑌸𑍋𑌦𑍍𑌭𑌾𑌸𑌿𑌤𑌵𑍍𑌰𑌜 𑌇𑌤𑍍𑌯𑌂𑌤𑌾𑌨𑌿 𑌤𑌰𑍍𑌜𑌨𑍀𑌭𑍍𑌯𑌾𑌂 𑌨𑌮𑌃 ।
𑌕𑍃𑌤𑌾𑌤𑍍𑌮𑌵𑌿𑌦𑍍𑌯𑌾𑌵𑌿𑌨𑍍𑌯𑌾𑌸 𑌇𑌤𑍍𑌯𑌾𑌰𑌭𑍍𑌯 𑌪𑍍𑌰𑌸𑍍𑌥𑌾𑌨𑌶𑌕𑌟𑌾𑌰𑍂𑌢 𑌇𑌤𑌿 𑌮𑌧𑍍𑌯𑌮𑌾𑌭𑍍𑌯𑌾𑌂 𑌨𑌮𑌃,
𑌬𑍃𑌂𑌦𑌾𑌵𑌨𑌕𑍃𑌤𑌾𑌲𑌯 𑌇𑌤𑍍𑌯𑌾𑌰𑌭𑍍𑌯 𑌮𑌧𑍁𑌰𑌾𑌜𑌨𑌵𑍀𑌕𑍍𑌷𑌿𑌤 𑌇𑌤𑍍𑌯𑌨𑌾𑌮𑌿𑌕𑌾𑌭𑍍𑌯𑌾𑌂 𑌨𑌮𑌃,
𑌰𑌜𑌕𑌪𑍍𑌰𑌤𑌿𑌘𑌾𑌤𑌕 𑌇𑌤𑍍𑌯𑌾𑌰𑌭𑍍𑌯 𑌦𑍍𑌵𑌾𑌰𑌕𑌾𑌪𑍁𑌰𑌕𑌲𑍍𑌪𑌨 𑌇𑌤𑌿 𑌕𑌨𑌿𑌷𑍍𑌠𑌿𑌕𑌾𑌭𑍍𑌯𑌾𑌂 𑌨𑌮𑌃
𑌦𑍍𑌵𑌾𑌰𑌕𑌾𑌨𑌿𑌲𑌯 𑌇𑌤𑍍𑌯𑌾𑌰𑌭𑍍𑌯 𑌪𑌰𑌾𑌶𑌰 𑌇𑌤𑌿 𑌕𑌰𑌤𑌲𑌕𑌰𑌪𑍃𑌷𑍍𑌠𑌾𑌭𑍍𑌯𑌾𑌂 𑌨𑌮𑌃,
𑌏𑌵𑌂 𑌹𑍃𑌦𑌯𑌾𑌦𑌿𑌨𑍍𑌯𑌾𑌸𑌃 ॥

𑌧𑍍𑌯𑌾𑌨𑌮𑍍
𑌕𑍇𑌷𑌾𑌂𑌚𑌿𑌤𑍍𑌪𑍍𑌰𑍇𑌮𑌪𑍁𑌂𑌸𑌾𑌂 𑌵𑌿𑌗𑌲𑌿𑌤𑌮𑌨𑌸𑌾𑌂 𑌬𑌾𑌲𑌲𑍀𑌲𑌾𑌵𑌿𑌲𑌾𑌸𑌂
𑌕𑍇𑌷𑌾𑌂 𑌗𑍋𑌪𑌾𑌲𑌲𑍀𑌲𑌾𑌂𑌕𑌿𑌤𑌰𑌸𑌿𑌕𑌤𑌨𑍁𑌰𑍍𑌵𑍇𑌣𑍁𑌵𑌾𑌦𑍍𑌯𑍇𑌨 𑌦𑍇𑌵𑌮𑍍 ।
𑌕𑍇𑌷𑌾𑌂 𑌵𑌾𑌮𑌾𑌸𑌮𑌾𑌜𑍇 𑌜𑌨𑌿𑌤𑌮𑌨𑌸𑌿𑌜𑍋 𑌦𑍈𑌤𑍍𑌯𑌦𑌰𑍍𑌪𑌾𑌪𑌹𑍈𑌵𑌂
𑌜𑍍𑌞𑌾𑌤𑍍𑌵𑌾 𑌭𑌿𑌨𑍍𑌨𑌾𑌭𑌿𑌲𑌾𑌷𑌂 𑌸 𑌜𑌯𑌤𑌿 𑌜𑌗𑌤𑌾𑌮𑍀𑌶𑍍𑌵𑌰𑌸𑍍𑌤𑌾𑌦𑍃𑌶𑍋𑌽𑌭𑍂𑌤𑍍 ॥ 1 ॥

𑌕𑍍𑌷𑍀𑌰𑌾𑌬𑍍𑌧𑍌 𑌕𑍃𑌤𑌸𑌂𑌸𑍍𑌤𑌵𑌸𑍍𑌸𑍁𑌰𑌗𑌣𑍈𑌰𑍍𑌬𑍍𑌰𑌹𑍍𑌮𑌾𑌦𑌿𑌭𑌿𑌃 𑌪𑌂𑌡𑌿𑌤𑍈𑌃
𑌪𑍍𑌰𑍋𑌦𑍍𑌭𑍂𑌤𑍋 𑌵𑌸𑍁𑌦𑍇𑌵𑌸𑌦𑍍𑌮𑌨𑌿 𑌮𑍁𑌦𑌾 𑌚𑌿𑌕𑍍𑌰𑍀𑌡 𑌯𑍋 𑌗𑍋𑌕𑍁𑌲𑍇 ।
𑌕𑌂𑌸𑌧𑍍𑌵𑌂𑌸𑌕𑍃𑌤𑍇 𑌜𑌗𑌾𑌮 𑌮𑌧𑍁𑌰𑌾𑌂 𑌸𑌾𑌰𑌾𑌮𑌸𑌦𑍍𑌵𑌾𑌰𑌕𑌾𑌂
𑌗𑍋𑌪𑌾𑌲𑍋𑌽𑌖𑌿𑌲𑌗𑍋𑌪𑌿𑌕𑌾𑌜𑌨𑌸𑌖𑌃 𑌪𑌾𑌯𑌾𑌦𑌪𑌾𑌯𑌾𑌤𑍍 𑌸 𑌨𑌃 ॥ 2 ॥

𑌫𑍁𑌲𑍍𑌲𑍇𑌂𑌦𑍀𑌵𑌰𑌕𑌾𑌂𑌤𑌿𑌮𑌿𑌂𑌦𑍁𑌵𑌦𑌨𑌂 𑌬𑌰𑍍𑌹𑌾𑌵𑌤𑌂𑌸𑌪𑍍𑌰𑌿𑌯𑌂
𑌶𑍍𑌰𑍀𑌵𑌤𑍍𑌸𑌾𑌂𑌕𑌮𑍁𑌦𑌾𑌰𑌕𑍌𑌸𑍍𑌤𑍁𑌭𑌧𑌰𑌂 𑌪𑍀𑌤𑌾𑌂𑌬𑌰𑌂 𑌸𑍁𑌂𑌦𑌰𑌮𑍍 ।
𑌗𑍋𑌪𑍀𑌨𑌾𑌂 𑌨𑌯𑌨𑍋𑌤𑍍𑌪𑌲𑌾𑌰𑍍𑌚𑌿𑌤𑌤𑌨𑍁𑌂 𑌗𑍋𑌗𑍋𑌪𑌸𑌂𑌘𑌾𑌵𑍃𑌤𑌂
𑌗𑍋𑌵𑌿𑌂𑌦𑌂 𑌕𑌲𑌵𑍇𑌣𑍁𑌵𑌾𑌦𑌨𑌰𑌤𑌂 𑌦𑌿𑌵𑍍𑌯𑌾𑌂𑌗𑌭𑍂𑌷𑌂 𑌭𑌜𑍇 ॥ 3 ॥

𑌓𑌮𑍍 ।
𑌕𑍃𑌷𑍍𑌣𑌃 𑌶𑍍𑌰𑍀𑌵𑌲𑍍𑌲𑌭𑌃 𑌶𑌾𑌰𑌂𑌗𑍀 𑌵𑌿𑌷𑍍𑌵𑌕𑍍𑌸𑍇𑌨𑌃 𑌸𑍍𑌵𑌸𑌿𑌦𑍍𑌧𑌿𑌦𑌃 ।
𑌕𑍍𑌷𑍀𑌰𑍋𑌦𑌧𑌾𑌮𑌾 𑌵𑍍𑌯𑍂𑌹𑍇𑌶𑌃 𑌶𑍇𑌷𑌶𑌾𑌯𑍀 𑌜𑌗𑌨𑍍𑌮𑌯𑌃 ॥ 1 ॥

𑌭𑌕𑍍𑌤𑌿𑌗𑌮𑍍𑌯𑌸𑍍𑌤𑍍𑌰𑌯𑍀𑌮𑍂𑌰𑍍𑌤𑌿𑌰𑍍𑌭𑌾𑌰𑌾𑌰𑍍𑌤𑌵𑌸𑍁𑌧𑌾𑌸𑍍𑌤𑍁𑌤𑌃 ।
𑌦𑍇𑌵𑌦𑍇𑌵𑍋 𑌦𑌯𑌾𑌸𑌿𑌂𑌧𑍁𑌰𑍍𑌦𑍇𑌵𑌦𑍇𑌵𑌶𑌿𑌖𑌾𑌮𑌣𑌿𑌃 ॥ 2 ॥

𑌸𑍁𑌖𑌭𑌾𑌵𑌸𑍍𑌸𑍁𑌖𑌾𑌧𑌾𑌰𑍋 𑌮𑍁𑌕𑍁𑌂𑌦𑍋 𑌮𑍁𑌦𑌿𑌤𑌾𑌶𑌯𑌃 ।
𑌅𑌵𑌿𑌕𑍍𑌰𑌿𑌯𑌃 𑌕𑍍𑌰𑌿𑌯𑌾𑌮𑍂𑌰𑍍𑌤𑌿𑌰𑌧𑍍𑌯𑌾𑌤𑍍𑌮𑌸𑍍𑌵𑌸𑍍𑌵𑌰𑍂𑌪𑌵𑌾𑌨𑍍 ॥ 3 ॥

𑌶𑌿𑌷𑍍𑌟𑌾𑌭𑌿𑌲𑌕𑍍𑌷𑍍𑌯𑍋 𑌭𑍂𑌤𑌾𑌤𑍍𑌮𑌾 𑌧𑌰𑍍𑌮𑌤𑍍𑌰𑌾𑌣𑌾𑌰𑍍𑌥𑌚𑍇𑌷𑍍𑌟𑌿𑌤𑌃 ।
𑌅𑌂𑌤𑌰𑍍𑌯𑌾𑌮𑍀 𑌕𑌲𑌾𑌰𑍂𑌪𑌃 𑌕𑌾𑌲𑌾𑌵𑌯𑌵𑌸𑌾𑌕𑍍𑌷𑌿𑌕𑌃 ॥ 4 ॥

𑌵𑌸𑍁𑌧𑌾𑌯𑌾𑌸𑌹𑌰𑌣𑍋 𑌨𑌾𑌰𑌦𑌪𑍍𑌰𑍇𑌰𑌣𑍋𑌨𑍍𑌮𑍁𑌖𑌃 ।
𑌪𑍍𑌰𑌭𑍂𑌷𑍍𑌣𑍁𑌰𑍍𑌨𑌾𑌰𑌦𑍋𑌦𑍍𑌗𑍀𑌤𑍋 𑌲𑍋𑌕𑌰𑌕𑍍𑌷𑌾𑌪𑌰𑌾𑌯𑌣𑌃 ॥ 5 ॥

𑌰𑍌𑌹𑌿𑌣𑍇𑌯𑌕𑍃𑌤𑌾𑌨𑌂𑌦𑍋 𑌯𑍋𑌗𑌜𑍍𑌞𑌾𑌨𑌨𑌿𑌯𑍋𑌜𑌕𑌃 ।
𑌮𑌹𑌾𑌗𑍁𑌹𑌾𑌂𑌤𑌰𑍍𑌨𑌿𑌕𑍍𑌷𑌿𑌪𑍍𑌤𑌃 𑌪𑍁𑌰𑌾𑌣𑌵𑌪𑍁𑌰𑌾𑌤𑍍𑌮𑌵𑌾𑌨𑍍 ॥ 6 ॥

𑌶𑍂𑌰𑌵𑌂𑌶𑍈𑌕𑌧𑍀𑌶𑍍𑌶𑍌𑌰𑌿𑌃 𑌕𑌂𑌸𑌶𑌂𑌕𑌾𑌵𑌿𑌷𑌾𑌦𑌕𑍃𑌤𑍍 ।
𑌵𑌸𑍁𑌦𑍇𑌵𑍋𑌲𑍍𑌲𑌸𑌚𑍍𑌛𑌕𑍍𑌤𑌿𑌰𑍍𑌦𑍇𑌵𑌕𑍍𑌯𑌷𑍍𑌟𑌮𑌗𑌰𑍍𑌭𑌗𑌃 ॥ 𑍭 ॥

𑌵𑌸𑍁𑌦𑍇𑌵𑌸𑍁𑌤𑌃 𑌶𑍍𑌰𑍀𑌮𑌾𑌂𑌦𑍇𑌵𑌕𑍀𑌨𑌂𑌦𑌨𑍋 𑌹𑌰𑌿𑌃 ।
𑌆𑌶𑍍𑌚𑌰𑍍𑌯𑌬𑌾𑌲𑌃 𑌶𑍍𑌰𑍀𑌵𑌤𑍍𑌸𑌲𑌕𑍍𑌷𑍍𑌮𑌵𑌕𑍍𑌷𑌾𑌶𑍍𑌚𑌤𑍁𑌰𑍍𑌭𑍁𑌜𑌃 ॥ 𑍮 ॥

𑌸𑍍𑌵𑌭𑌾𑌵𑍋𑌤𑍍𑌕𑍃𑌷𑍍𑌟𑌸𑌦𑍍𑌭𑌾𑌵𑌃 𑌕𑍃𑌷𑍍𑌣𑌾𑌷𑍍𑌟𑌮𑍍𑌯𑌂𑌤𑌸𑌂𑌭𑌵𑌃 ।
𑌪𑍍𑌰𑌾𑌜𑌾𑌪𑌤𑍍𑌯𑌰𑍍𑌕𑍍𑌷𑌸𑌂𑌭𑍂𑌤𑍋 𑌨𑌿𑌶𑍀𑌥𑌸𑌮𑌯𑍋𑌦𑌿𑌤𑌃 ॥ 𑍯 ॥

𑌶𑌂𑌖𑌚𑌕𑍍𑌰𑌗𑌦𑌾𑌪𑌦𑍍𑌮𑌪𑌾𑌣𑌿𑌃 𑌪𑌦𑍍𑌮𑌨𑌿𑌭𑍇𑌕𑍍𑌷𑌣𑌃 ।
𑌕𑌿𑌰𑍀𑌟𑍀 𑌕𑍌𑌸𑍍𑌤𑍁𑌭𑍋𑌰𑌸𑍍𑌕𑌃 𑌸𑍍𑌫𑍁𑌰𑌨𑍍𑌮𑌕𑌰𑌕𑍁𑌂𑌡𑌲𑌃 ॥ 10 ॥

𑌪𑍀𑌤𑌵𑌾𑌸𑌾 𑌘𑌨𑌶𑍍𑌯𑌾𑌮𑌃 𑌕𑍁𑌂𑌚𑌿𑌤𑌾𑌂𑌚𑌿𑌤𑌕𑍁𑌂𑌤𑌲𑌃 ।
𑌸𑍁𑌵𑍍𑌯𑌕𑍍𑌤𑌵𑍍𑌯𑌕𑍍𑌤𑌾𑌭𑌰𑌣𑌃 𑌸𑍂𑌤𑌿𑌕𑌾𑌗𑍃𑌹𑌭𑍂𑌷𑌣𑌃 ॥ 11 ॥

𑌕𑌾𑌰𑌾𑌗𑌾𑌰𑌾𑌂𑌧𑌕𑌾𑌰𑌘𑍍𑌨𑌃 𑌪𑌿𑌤𑍃𑌪𑍍𑌰𑌾𑌗𑍍𑌜𑌨𑍍𑌮𑌸𑍂𑌚𑌕𑌃 ।
𑌵𑌸𑍁𑌦𑍇𑌵𑌸𑍍𑌤𑍁𑌤𑌃 𑌸𑍍𑌤𑍋𑌤𑍍𑌰𑌂 𑌤𑌾𑌪𑌤𑍍𑌰𑌯𑌨𑌿𑌵𑌾𑌰𑌣𑌃 ॥ 12 ॥

𑌨𑌿𑌰𑌵𑌦𑍍𑌯𑌃 𑌕𑍍𑌰𑌿𑌯𑌾𑌮𑍂𑌰𑍍𑌤𑌿𑌰𑍍𑌨𑍍𑌯𑌾𑌯𑌵𑌾𑌕𑍍𑌯𑌨𑌿𑌯𑍋𑌜𑌕𑌃 ।
𑌅𑌦𑍃𑌷𑍍𑌟𑌚𑍇𑌷𑍍𑌟𑌃 𑌕𑍂𑌟𑌸𑍍𑌥𑍋 𑌧𑍃𑌤𑌲𑍌𑌕𑌿𑌕𑌵𑌿𑌗𑍍𑌰𑌹𑌃 ॥ 13 ॥

𑌮𑌹𑌰𑍍𑌷𑌿𑌮𑌾𑌨𑌸𑍋𑌲𑍍𑌲𑌾𑌸𑍋 𑌮𑌹𑍀𑌮𑌂𑌗𑌲𑌦𑌾𑌯𑌕𑌃 ।
𑌸𑌂𑌤𑍋𑌷𑌿𑌤𑌸𑍁𑌰𑌵𑍍𑌰𑌾𑌤𑌃 𑌸𑌾𑌧𑍁𑌚𑌿𑌤𑍍𑌤𑌪𑍍𑌰𑌸𑌾𑌦𑌕𑌃 ॥ 14 ॥

𑌜𑌨𑌕𑍋𑌪𑌾𑌯𑌨𑌿𑌰𑍍𑌦𑍇𑌷𑍍𑌟𑌾 𑌦𑍇𑌵𑌕𑍀𑌨𑌯𑌨𑍋𑌤𑍍𑌸𑌵𑌃 ।
𑌪𑌿𑌤𑍃𑌪𑌾𑌣𑌿𑌪𑌰𑌿𑌷𑍍𑌕𑌾𑌰𑍋 𑌮𑍋𑌹𑌿𑌤𑌾𑌗𑌾𑌰𑌰𑌕𑍍𑌷𑌕𑌃 ॥ 15 ॥

𑌸𑍍𑌵𑌶𑌕𑍍𑌤𑍍𑌯𑍁𑌦𑍍𑌧𑌾𑌟𑌿𑌤𑌾𑌶𑍇𑌷𑌕𑌪𑌾𑌟𑌃 𑌪𑌿𑌤𑍃𑌵𑌾𑌹𑌕𑌃 ।
𑌶𑍇𑌷𑍋𑌰𑌗𑌫𑌣𑌾𑌚𑍍𑌛𑌤𑍍𑌰𑌶𑍍𑌶𑍇𑌷𑍋𑌕𑍍𑌤𑌾𑌖𑍍𑌯𑌾𑌸𑌹𑌸𑍍𑌰𑌕𑌃 ॥ 16 ॥

𑌯𑌮𑍁𑌨𑌾𑌪𑍂𑌰𑌵𑌿𑌧𑍍𑌵𑌂𑌸𑍀 𑌸𑍍𑌵𑌭𑌾𑌸𑍋𑌦𑍍𑌭𑌾𑌸𑌿𑌤𑌵𑍍𑌰𑌜𑌃 ।
𑌕𑍃𑌤𑌾𑌤𑍍𑌮𑌵𑌿𑌦𑍍𑌯𑌾𑌵𑌿𑌨𑍍𑌯𑌾𑌸𑍋 𑌯𑍋𑌗𑌮𑌾𑌯𑌾𑌗𑍍𑌰𑌸𑌂𑌭𑌵𑌃 ॥ 1𑍭 ॥

𑌦𑍁𑌰𑍍𑌗𑌾𑌨𑌿𑌵𑍇𑌦𑌿𑌤𑍋𑌦𑍍𑌭𑌾𑌵𑍋 𑌯𑌶𑍋𑌦𑌾𑌤𑌲𑍍𑌪𑌶𑌾𑌯𑌕𑌃 ।
𑌨𑌂𑌦𑌗𑍋𑌪𑍋𑌤𑍍𑌸𑌵𑌸𑍍𑌫𑍂𑌰𑍍𑌤𑌿𑌰𑍍𑌵𑍍𑌰𑌜𑌾𑌨𑌂𑌦𑌕𑌰𑍋𑌦𑌯𑌃 ॥ 1𑍮 ॥

𑌸𑍁𑌜𑌾𑌤𑌜𑌾𑌤𑌕𑌰𑍍𑌮 𑌶𑍍𑌰𑍀𑌰𑍍𑌗𑍋𑌪𑍀𑌭𑌦𑍍𑌰𑍋𑌕𑍍𑌤𑌿𑌨𑌿𑌰𑍍𑌵𑍃𑌤𑌃 ।
𑌅𑌲𑍀𑌕𑌨𑌿𑌦𑍍𑌰𑍋𑌪𑌗𑌮𑌃 𑌪𑍂𑌤𑌨𑌾𑌸𑍍𑌤𑌨𑌪𑍀𑌡𑌨𑌃 ॥ 1𑍯 ॥

𑌸𑍍𑌤𑌨𑍍𑌯𑌾𑌤𑍍𑌤𑌪𑍂𑌤𑌨𑌾𑌪𑍍𑌰𑌾𑌣𑌃 𑌪𑍂𑌤𑌨𑌾𑌕𑍍𑌰𑍋𑌶𑌕𑌾𑌰𑌕𑌃 ।
𑌵𑌿𑌨𑍍𑌯𑌸𑍍𑌤𑌰𑌕𑍍𑌷𑌾𑌗𑍋𑌧𑍂𑌲𑌿𑌰𑍍𑌯𑌶𑍋𑌦𑌾𑌕𑌰𑌲𑌾𑌲𑌿𑌤𑌃 ॥ 20 ॥

𑌨𑌂𑌦𑌾𑌘𑍍𑌰𑌾𑌤𑌶𑌿𑌰𑍋𑌮𑌧𑍍𑌯𑌃 𑌪𑍂𑌤𑌨𑌾𑌸𑍁𑌗𑌤𑌿𑌪𑍍𑌰𑌦𑌃 ।
𑌬𑌾𑌲𑌃 𑌪𑌰𑍍𑌯𑌂𑌕𑌨𑌿𑌦𑍍𑌰𑌾𑌲𑍁𑌰𑍍𑌮𑍁𑌖𑌾𑌰𑍍𑌪𑌿𑌤𑌪𑌦𑌾𑌂𑌗𑍁𑌲𑌿𑌃 ॥ 21 ॥

𑌅𑌂𑌜𑌨𑌸𑍍𑌨𑌿𑌗𑍍𑌧𑌨𑌯𑌨𑌃 𑌪𑌰𑍍𑌯𑌾𑌯𑌾𑌂𑌕𑍁𑌰𑌿𑌤𑌸𑍍𑌮𑌿𑌤𑌃 ।
𑌲𑍀𑌲𑌾𑌕𑍍𑌷𑌸𑍍𑌤𑌰𑌲𑌾𑌲𑍋𑌕𑌶𑍍𑌶𑌕𑌟𑌾𑌸𑍁𑌰𑌭𑌂𑌜𑌨𑌃 ॥ 22 ॥

𑌦𑍍𑌵𑌿𑌜𑍋𑌦𑌿𑌤𑌸𑍍𑌵𑌸𑍍𑌤𑍍𑌯𑌯𑌨𑍋 𑌮𑌂𑌤𑍍𑌰𑌪𑍂𑌤𑌜𑌲𑌾𑌪𑍍𑌲𑍁𑌤𑌃 ।
𑌯𑌶𑍋𑌦𑍋𑌤𑍍𑌸𑌂𑌗𑌪𑌰𑍍𑌯𑌂𑌕𑍋 𑌯𑌶𑍋𑌦𑌾𑌮𑍁𑌖𑌵𑍀𑌕𑍍𑌷𑌕𑌃 ॥ 23 ॥

𑌯𑌶𑍋𑌦𑌾𑌸𑍍𑌤𑌨𑍍𑌯𑌮𑍁𑌦𑌿𑌤𑌸𑍍𑌤𑍃𑌣𑌾𑌵𑌰𑍍𑌤𑌾𑌦𑌿𑌦𑍁𑌸𑍍𑌸𑌹𑌃 ।
𑌤𑍃𑌣𑌾𑌵𑌰𑍍𑌤𑌾𑌸𑍁𑌰𑌧𑍍𑌵𑌂𑌸𑍀 𑌮𑌾𑌤𑍃𑌵𑌿𑌸𑍍𑌮𑌯𑌕𑌾𑌰𑌕𑌃 ॥ 24 ॥

𑌪𑍍𑌰𑌶𑌸𑍍𑌤𑌨𑌾𑌮𑌕𑌰𑌣𑍋 𑌜𑌾𑌨𑍁𑌚𑌂𑌕𑍍𑌰𑌮𑌣𑍋𑌤𑍍𑌸𑍁𑌕𑌃 ।
𑌵𑍍𑌯𑌾𑌲𑌂𑌬𑌿𑌚𑍂𑌲𑌿𑌕𑌾𑌰𑌤𑍍𑌨𑍋 𑌘𑍋𑌷𑌗𑍋𑌪𑌪𑍍𑌰𑌹𑌰𑍍𑌷𑌣𑌃 ॥ 25 ॥

𑌸𑍍𑌵𑌮𑍁𑌖𑌪𑍍𑌰𑌤𑌿𑌬𑌿𑌂𑌬𑌾𑌰𑍍𑌥𑍀 𑌗𑍍𑌰𑍀𑌵𑌾𑌵𑍍𑌯𑌾𑌘𑍍𑌰𑌨𑌖𑍋𑌜𑍍𑌜𑍍𑌵𑌲𑌃 ।
𑌪𑌂𑌕𑌾𑌨𑍁𑌲𑍇𑌪𑌰𑍁𑌚𑌿𑌰𑍋 𑌮𑌾𑌂𑌸𑌲𑍋𑌰𑍁𑌕𑌟𑍀𑌤𑌟𑌃 ॥ 26 ॥

𑌘𑍃𑌷𑍍𑌟𑌜𑌾𑌨𑍁𑌕𑌰𑌦𑍍𑌵𑌂𑌦𑍍𑌵𑌃 𑌪𑍍𑌰𑌤𑌿𑌬𑌿𑌂𑌬𑌾𑌨𑍁𑌕𑌾𑌰𑌕𑍃𑌤𑍍 ।
𑌅𑌵𑍍𑌯𑌕𑍍𑌤𑌵𑌰𑍍𑌣𑌵𑌾𑌗𑍍𑌵𑍃𑌤𑍍𑌤𑌿𑌃 𑌸𑍍𑌮𑌿𑌤𑌲𑌕𑍍𑌷𑍍𑌯𑌰𑌦𑍋𑌦𑍍𑌗𑌮𑌃 ॥ 2𑍭 ॥

𑌧𑌾𑌤𑍍𑌰𑍀𑌕𑌰𑌸𑌮𑌾𑌲𑌂𑌬𑍀 𑌪𑍍𑌰𑌸𑍍𑌖𑌲𑌚𑍍𑌚𑌿𑌤𑍍𑌰𑌚𑌂𑌕𑍍𑌰𑌮𑌃 ।
𑌅𑌨𑍁𑌰𑍂𑌪𑌵𑌯𑌸𑍍𑌯𑌾𑌢𑍍𑌯𑌶𑍍𑌚𑌾𑌰𑍁𑌕𑍌𑌮𑌾𑌰𑌚𑌾𑌪𑌲𑌃 ॥ 2𑍮 ॥

𑌵𑌤𑍍𑌸𑌪𑍁𑌚𑍍𑌛𑌸𑌮𑌾𑌕𑍃𑌷𑍍𑌟𑍋 𑌵𑌤𑍍𑌸𑌪𑍁𑌚𑍍𑌛𑌵𑌿𑌕𑌰𑍍𑌷𑌣𑌃 ।
𑌵𑌿𑌸𑍍𑌮𑌾𑌰𑌿𑌤𑌾𑌨𑍍𑌯𑌵𑍍𑌯𑌾𑌪𑌾𑌰𑍋 𑌗𑍋𑌪𑌗𑍋𑌪𑍀𑌮𑍁𑌦𑌾𑌵𑌹𑌃 ॥ 2𑍯 ॥

𑌅𑌕𑌾𑌲𑌵𑌤𑍍𑌸𑌨𑌿𑌰𑍍𑌮𑍋𑌕𑍍𑌤𑌾 𑌵𑍍𑌰𑌜𑌵𑍍𑌯𑌾𑌕𑍍𑌰𑍋𑌶𑌸𑍁𑌸𑍍𑌮𑌿𑌤𑌃 ।
𑌨𑌵𑌨𑍀𑌤𑌮𑌹𑌾𑌚𑍋𑌰𑍋 𑌦𑌾𑌰𑌕𑌾𑌹𑌾𑌰𑌦𑌾𑌯𑌕𑌃 ॥ 30 ॥

𑌪𑍀𑌠𑍋𑌲𑍂𑌖𑌲𑌸𑍋𑌪𑌾𑌨𑌃 𑌕𑍍𑌷𑍀𑌰𑌭𑌾𑌂𑌡𑌵𑌿𑌭𑍇𑌦𑌨𑌃 ।
𑌶𑌿𑌕𑍍𑌯𑌭𑌾𑌂𑌡𑌸𑌮𑌾𑌕𑌰𑍍𑌷𑍀 𑌧𑍍𑌵𑌾𑌂𑌤𑌾𑌗𑌾𑌰𑌪𑍍𑌰𑌵𑍇𑌶𑌕𑍃𑌤𑍍 ॥ 31 ॥

𑌭𑍂𑌷𑌾𑌰𑌤𑍍𑌨𑌪𑍍𑌰𑌕𑌾𑌶𑌾𑌢𑍍𑌯𑍋 𑌗𑍋𑌪𑍍𑌯𑍁𑌪𑌾𑌲𑌂𑌭𑌭𑌰𑍍𑌤𑍍𑌸𑌿𑌤𑌃 ।
𑌪𑌰𑌾𑌗𑌧𑍂𑌸𑌰𑌾𑌕𑌾𑌰𑍋 𑌮𑍃𑌦𑍍𑌭𑌕𑍍𑌷𑌣𑌕𑍃𑌤𑍇𑌕𑍍𑌷𑌣𑌃 ॥ 32 ॥

𑌬𑌾𑌲𑍋𑌕𑍍𑌤𑌮𑍃𑌤𑍍𑌕𑌥𑌾𑌰𑌂𑌭𑍋 𑌮𑌿𑌤𑍍𑌰𑌾𑌂𑌤𑌰𑍍𑌗𑍂𑌢𑌵𑌿𑌗𑍍𑌰𑌹𑌃 ।
𑌕𑍃𑌤𑌸𑌂𑌤𑍍𑌰𑌾𑌸𑌲𑍋𑌲𑌾𑌕𑍍𑌷𑍋 𑌜𑌨𑌨𑍀𑌪𑍍𑌰𑌤𑍍𑌯𑌯𑌾𑌵𑌹𑌃 ॥ 33॥

𑌮𑌾𑌤𑍃𑌦𑍃𑌶𑍍𑌯𑌾𑌤𑍍𑌤𑌵𑌦𑌨𑍋 𑌵𑌕𑍍𑌤𑍍𑌰𑌲𑌕𑍍𑌷𑍍𑌯𑌚𑌰𑌾𑌚𑌰𑌃 ।
𑌯𑌶𑍋𑌦𑌾𑌲𑌾𑌲𑌿𑌤𑌸𑍍𑌵𑌾𑌤𑍍𑌮𑌾 𑌸𑍍𑌵𑌯𑌂 𑌸𑍍𑌵𑌾𑌚𑍍𑌛𑌂𑌦𑍍𑌯𑌮𑍋𑌹𑌨𑌃 ॥ 34 ॥

𑌸𑌵𑌿𑌤𑍍𑌰𑍀𑌸𑍍𑌨𑍇𑌹𑌸𑌂𑌶𑍍𑌲𑌿𑌷𑍍𑌟𑌃 𑌸𑌵𑌿𑌤𑍍𑌰𑍀𑌸𑍍𑌤𑌨𑌲𑍋𑌲𑍁𑌪𑌃 ।
𑌨𑌵𑌨𑍀𑌤𑌾𑌰𑍍𑌥𑌨𑌾𑌪𑍍𑌰𑌹𑍍𑌵𑍋 𑌨𑌵𑌨𑍀𑌤𑌮𑌹𑌾𑌶𑌨𑌃 ॥ 35 ॥

𑌮𑍃𑌷𑌾𑌕𑍋𑌪𑌪𑍍𑌰𑌕𑌂𑌪𑍋𑌷𑍍𑌠𑍋 𑌗𑍋𑌷𑍍𑌠𑌾𑌂𑌗𑌣𑌵𑌿𑌲𑍋𑌕𑌨𑌃 ।
𑌦𑌧𑌿𑌮𑌂𑌥𑌘𑌟𑍀𑌭𑍇𑌤𑍍𑌤𑌾 𑌕𑌿𑌂𑌕𑌿𑌣𑍀𑌕𑍍𑌵𑌾𑌣𑌸𑍂𑌚𑌿𑌤𑌃 ॥ 36 ॥

𑌹𑍈𑌯𑌂𑌗𑌵𑍀𑌨𑌰𑌸𑌿𑌕𑍋 𑌮𑍃𑌷𑌾𑌶𑍍𑌰𑍁𑌶𑍍𑌚𑍌𑌰𑍍𑌯𑌶𑌂𑌕𑌿𑌤𑌃 ।
𑌜𑌨𑌨𑍀𑌶𑍍𑌰𑌮𑌵𑌿𑌜𑍍𑌞𑌾𑌤𑌾 𑌦𑌾𑌮𑌬𑌂𑌧𑌨𑌿𑌯𑌂𑌤𑍍𑌰𑌿𑌤𑌃 ॥ 3𑍭 ॥

𑌦𑌾𑌮𑌾𑌕𑌲𑍍𑌪𑌶𑍍𑌚𑌲𑌾𑌪𑌾𑌂𑌗𑍋 𑌗𑌾𑌢𑍋𑌲𑍂𑌖𑌲𑌬𑌂𑌧𑌨𑌃 ।
𑌆𑌕𑍃𑌷𑍍𑌟𑍋𑌲𑍂𑌖𑌲𑍋𑌽𑌨𑌂𑌤𑌃 𑌕𑍁𑌬𑍇𑌰𑌸𑍁𑌤𑌶𑌾𑌪𑌵𑌿𑌤𑍍 ॥ । 3𑍮 ॥

𑌨𑌾𑌰𑌦𑍋𑌕𑍍𑌤𑌿𑌪𑌰𑌾𑌮𑌰𑍍𑌶𑍀 𑌯𑌮𑌲𑌾𑌰𑍍𑌜𑍁𑌨𑌭𑌂𑌜𑌨𑌃 ।
𑌧𑌨𑌦𑌾𑌤𑍍𑌮𑌜𑌸𑌂𑌘𑍁𑌷𑍍𑌟𑍋 𑌨𑌂𑌦𑌮𑍋𑌚𑌿𑌤𑌬𑌂𑌧𑌨𑌃 ॥ 3𑍯 ॥

𑌬𑌾𑌲𑌕𑍋𑌦𑍍𑌗𑍀𑌤𑌨𑌿𑌰𑌤𑍋 𑌬𑌾𑌹𑍁𑌕𑍍𑌷𑍇𑌪𑍋𑌦𑌿𑌤𑌪𑍍𑌰𑌿𑌯𑌃 ।
𑌆𑌤𑍍𑌮𑌜𑍍𑌞𑍋 𑌮𑌿𑌤𑍍𑌰𑌵𑌶𑌗𑍋 𑌗𑍋𑌪𑍀𑌗𑍀𑌤𑌗𑍁𑌣𑍋𑌦𑌯𑌃 ॥ 40 ॥

𑌪𑍍𑌰𑌸𑍍𑌥𑌾𑌨𑌶𑌕𑌟𑌾𑌰𑍂𑌢𑍋 𑌬𑍃𑌂𑌦𑌾𑌵𑌨𑌕𑍃𑌤𑌾𑌲𑌯𑌃 ।
𑌗𑍋𑌵𑌤𑍍𑌸𑌪𑌾𑌲𑌨𑍈𑌕𑌾𑌗𑍍𑌰𑍋 𑌨𑌾𑌨𑌾𑌕𑍍𑌰𑍀𑌡𑌾𑌪𑌰𑌿𑌚𑍍𑌛𑌦𑌃 ॥ 41 ॥

𑌕𑍍𑌷𑍇𑌪𑌣𑍀𑌕𑍍𑌷𑍇𑌪𑌣𑌪𑍍𑌰𑍀𑌤𑍋 𑌵𑍇𑌣𑍁𑌵𑌾𑌦𑍍𑌯𑌵𑌿𑌶𑌾𑌰𑌦𑌃 ।
𑌵𑍃𑌷𑌵𑌤𑍍𑌸𑌾𑌨𑍁𑌕𑌰𑌣𑍋 𑌵𑍃𑌷𑌧𑍍𑌵𑌾𑌨𑌵𑌿𑌡𑌂𑌬𑌨𑌃 ॥ 42 ॥

𑌨𑌿𑌯𑍁𑌦𑍍𑌧𑌲𑍀𑌲𑌾𑌸𑌂𑌹𑍃𑌷𑍍𑌟𑌃 𑌕𑍂𑌜𑌾𑌨𑍁𑌕𑍃𑌤𑌕𑍋𑌕𑌿𑌲𑌃 ।
𑌉𑌪𑌾𑌤𑍍𑌤𑌹𑌂𑌸𑌗𑌮𑌨𑌸𑍍𑌸𑌰𑍍𑌵𑌜𑌂𑌤𑍁𑌰𑍁𑌤𑌾𑌨𑍁𑌕𑍃𑌤𑍍 ॥ 43 ॥

𑌭𑍃𑌂𑌗𑌾𑌨𑍁𑌕𑌾𑌰𑍀 𑌦𑌧𑍍𑌯𑌨𑍍𑌨𑌚𑍋𑌰𑍋 𑌵𑌤𑍍𑌸𑌪𑍁𑌰𑌸𑍍𑌸𑌰𑌃 ।
𑌬𑌲𑍀 𑌬𑌕𑌾𑌸𑍁𑌰𑌗𑍍𑌰𑌾𑌹𑍀 𑌬𑌕𑌤𑌾𑌲𑍁𑌪𑍍𑌰𑌦𑌾𑌹𑌕𑌃 ॥ 44 ॥

𑌭𑍀𑌤𑌗𑍋𑌪𑌾𑌰𑍍𑌭𑌕𑌾𑌹𑍂𑌤𑍋 𑌬𑌕𑌚𑌂𑌚𑍁𑌵𑌿𑌦𑌾𑌰𑌣𑌃 ।
𑌬𑌕𑌾𑌸𑍁𑌰𑌾𑌰𑌿𑌰𑍍𑌗𑍋𑌪𑌾𑌲𑍋 𑌬𑌾𑌲𑍋 𑌬𑌾𑌲𑌾𑌦𑍍𑌭𑍁𑌤𑌾𑌵𑌹𑌃 ॥ 45 ॥

𑌬𑌲𑌭𑌦𑍍𑌰𑌸𑌮𑌾𑌶𑍍𑌲𑌿𑌷𑍍𑌟𑌃 𑌕𑍃𑌤𑌕𑍍𑌰𑍀𑌡𑌾𑌨𑌿𑌲𑌾𑌯𑌨𑌃 ।
𑌕𑍍𑌰𑍀𑌡𑌾𑌸𑍇𑌤𑍁𑌨𑌿𑌧𑌾𑌨𑌜𑍍𑌞𑌃 𑌪𑍍𑌲𑌵𑌂𑌗𑍋𑌤𑍍𑌪𑍍𑌲𑌵𑌨𑍋𑌽𑌦𑍍𑌭𑍁𑌤𑌃 ॥ 46 ॥

𑌕𑌂𑌦𑍁𑌕𑌕𑍍𑌰𑍀𑌡𑌨𑍋 𑌲𑍁𑌪𑍍𑌤𑌨𑌂𑌦𑌾𑌦𑌿𑌭𑌵𑌵𑍇𑌦𑌨𑌃 ।
𑌸𑍁𑌮𑌨𑍋𑌽𑌲𑌂𑌕𑍃𑌤𑌶𑌿𑌰𑌾𑌃 𑌸𑍍𑌵𑌾𑌦𑍁𑌸𑍍𑌨𑌿𑌗𑍍𑌧𑌾𑌨𑍍𑌨𑌶𑌿𑌕𑍍𑌯𑌭𑍃𑌤𑍍 ॥ 4𑍭 ॥

𑌗𑍁𑌂𑌜𑌾𑌪𑍍𑌰𑌾𑌲𑌂𑌬𑌨𑌚𑍍𑌛𑌨𑍍𑌨𑌃 𑌪𑌿𑌂𑌛𑍈𑌰𑌲𑌕𑌵𑍇𑌷𑌕𑍃𑌤𑍍 ।
𑌵𑌨𑍍𑌯𑌾𑌶𑌨𑌪𑍍𑌰𑌿𑌯𑌃 𑌶𑍃𑌂𑌗𑌰𑌵𑌾𑌕𑌾𑌰𑌿𑌤𑌵𑌤𑍍𑌸𑌕𑌃 ॥ 4𑍮 ॥

𑌮𑌨𑍋𑌜𑍍𑌞𑌪𑌲𑍍𑌲𑌵𑍋𑌤𑍍𑌤𑌂𑌸𑌪𑍁𑌷𑍍𑌪𑌸𑍍𑌵𑍇𑌚𑍍𑌛𑌾𑌤𑍍𑌤𑌷𑌟𑍍𑌪𑌦𑌃 ।
𑌮𑌂𑌜𑍁𑌶𑌿𑌂𑌜𑌿𑌤𑌮𑌂𑌜𑍀𑌰𑌚𑌰𑌣𑌃 𑌕𑌰𑌕𑌂𑌕𑌣𑌃 ॥ 4𑍯 ॥

𑌅𑌨𑍍𑌯𑍋𑌨𑍍𑌯𑌶𑌾𑌸𑌨𑌃 𑌕𑍍𑌰𑍀𑌡𑌾𑌪𑌟𑍁𑌃 𑌪𑌰𑌮𑌕𑍈𑌤𑌵𑌃 ।
𑌪𑍍𑌰𑌤𑌿𑌧𑍍𑌵𑌾𑌨𑌪𑍍𑌰𑌮𑍁𑌦𑌿𑌤𑌃 𑌶𑌾𑌖𑌾𑌚𑌤𑍁𑌰𑌚𑌂𑌕𑍍𑌰𑌮𑌃 ॥ 50 ॥

𑌅𑌘𑌦𑌾𑌨𑌵𑌸𑌂𑌹𑌰𑍍𑌤𑌾 𑌵𑍍𑌰𑌜𑌵𑌿𑌘𑍍𑌨𑌵𑌿𑌨𑌾𑌶𑌨𑌃 ।
𑌵𑍍𑌰𑌜𑌸𑌂𑌜𑍀𑌵𑌨𑌃 𑌶𑍍𑌰𑍇𑌯𑍋𑌨𑌿𑌧𑌿𑌰𑍍𑌦𑌾𑌨𑌵𑌮𑍁𑌕𑍍𑌤𑌿𑌦𑌃 ॥ 51 ॥

𑌕𑌾𑌲𑌿𑌂𑌦𑍀𑌪𑍁𑌲𑌿𑌨𑌾𑌸𑍀𑌨𑌸𑍍𑌸𑌹𑌭𑍁𑌕𑍍𑌤𑌵𑍍𑌰𑌜𑌾𑌰𑍍𑌭𑌕𑌃 ।
𑌕𑌕𑍍𑌷𑌾𑌜𑌠𑌰𑌵𑌿𑌨𑍍𑌯𑌸𑍍𑌤𑌵𑍇𑌣𑍁𑌰𑍍𑌵𑌲𑍍𑌲𑌵𑌚𑍇𑌷𑍍𑌟𑌿𑌤𑌃 ॥ 52 ॥

𑌭𑍁𑌜𑌸𑌂𑌧𑍍𑌯𑌂𑌤𑌰𑌨𑍍𑌯𑌸𑍍𑌤𑌶𑍃𑌂𑌗𑌵𑍇𑌤𑍍𑌰𑌃 𑌶𑍁𑌚𑌿𑌸𑍍𑌮𑌿𑌤𑌃 ।
𑌵𑌾𑌮𑌪𑌾𑌣𑌿𑌸𑍍𑌥𑌦𑌧𑍍𑌯𑌨𑍍𑌨𑌕𑌬𑌲𑌃 𑌕𑌲𑌭𑌾𑌷𑌣𑌃 ॥ 53 ॥

𑌅𑌂𑌗𑍁𑌲𑍍𑌯𑌂𑌤𑌰𑌵𑌿𑌨𑍍𑌯𑌸𑍍𑌤𑌫𑌲𑌃 𑌪𑌰𑌮𑌪𑌾𑌵𑌨𑌃 ।
𑌅𑌦𑍃𑌶𑍍𑌯𑌤𑌰𑍍𑌣𑌕𑌾𑌨𑍍𑌵𑍇𑌷𑍀 𑌵𑌲𑍍𑌲𑌵𑌾𑌰𑍍𑌭𑌕𑌭𑍀𑌤𑌿𑌹𑌾 ॥ 54 ॥

𑌅𑌦𑍃𑌷𑍍𑌟𑌵𑌤𑍍𑌸𑌪𑌵𑍍𑌰𑌾𑌤𑍋 𑌬𑍍𑌰𑌹𑍍𑌮𑌵𑌿𑌜𑍍𑌞𑌾𑌤𑌵𑍈𑌭𑌵𑌃 ।
𑌗𑍋𑌵𑌤𑍍𑌸𑌵𑌤𑍍𑌸𑌪𑌾𑌨𑍍𑌵𑍇𑌷𑍀 𑌵𑌿𑌰𑌾𑌟𑍍-𑌪𑍁𑌰𑍁𑌷𑌵𑌿𑌗𑍍𑌰𑌹𑌃 ॥ 55 ॥

𑌸𑍍𑌵𑌸𑌂𑌕𑌲𑍍𑌪𑌾𑌨𑍁𑌰𑍂𑌪𑌾𑌰𑍍𑌥𑍋 𑌵𑌤𑍍𑌸𑌵𑌤𑍍𑌸𑌪𑌰𑍂𑌪𑌧𑍃𑌕𑍍 ।
𑌯𑌥𑌾𑌵𑌤𑍍𑌸𑌕𑍍𑌰𑌿𑌯𑌾𑌰𑍂𑌪𑍋 𑌯𑌥𑌾𑌸𑍍𑌥𑌾𑌨𑌨𑌿𑌵𑍇𑌶𑌨𑌃 ॥ 56 ॥

𑌯𑌥𑌾𑌵𑍍𑌰𑌜𑌾𑌰𑍍𑌭𑌕𑌾𑌕𑌾𑌰𑍋 𑌗𑍋𑌗𑍋𑌪𑍀𑌸𑍍𑌤𑌨𑍍𑌯𑌪𑌸𑍍𑌸𑍁𑌖𑍀 ।
𑌚𑌿𑌰𑌾𑌦𑍍𑌵𑌲𑍋𑌹𑌿𑌤𑍋 𑌦𑌾𑌂𑌤𑍋 𑌬𑍍𑌰𑌹𑍍𑌮𑌵𑌿𑌜𑍍𑌞𑌾𑌤𑌵𑍈𑌭𑌵𑌃 ॥ 5𑍭 ॥

𑌵𑌿𑌚𑌿𑌤𑍍𑌰𑌶𑌕𑍍𑌤𑌿𑌰𑍍𑌵𑍍𑌯𑌾𑌲𑍀𑌨𑌸𑍃𑌷𑍍𑌟𑌗𑍋𑌵𑌤𑍍𑌸𑌵𑌤𑍍𑌸𑌪𑌃 ।
𑌬𑍍𑌰𑌹𑍍𑌮𑌤𑍍𑌰𑌪𑌾𑌕𑌰𑍋 𑌧𑌾𑌤𑍃𑌸𑍍𑌤𑍁𑌤𑌸𑍍𑌸𑌰𑍍𑌵𑌾𑌰𑍍𑌥𑌸𑌾𑌧𑌕𑌃 ॥ 5𑍮 ॥

𑌬𑍍𑌰𑌹𑍍𑌮 𑌬𑍍𑌰𑌹𑍍𑌮𑌮𑌯𑍋𑌽𑌵𑍍𑌯𑌕𑍍𑌤𑌸𑍍𑌤𑍇𑌜𑍋𑌰𑍂𑌪𑌸𑍍𑌸𑍁𑌖𑌾𑌤𑍍𑌮𑌕𑌃 ।
𑌨𑌿𑌰𑍁𑌕𑍍𑌤𑌂 𑌵𑍍𑌯𑌾𑌕𑍃𑌤𑌿𑌰𑍍𑌵𑍍𑌯𑌕𑍍𑌤𑍋 𑌨𑌿𑌰𑌾𑌲𑌂𑌬𑌨𑌭𑌾𑌵𑌨𑌃 ॥ 5𑍯 ॥

𑌪𑍍𑌰𑌭𑌵𑌿𑌷𑍍𑌣𑍁𑌰𑌤𑌂𑌤𑍍𑌰𑍀𑌕𑍋 𑌦𑍇𑌵𑌪𑌕𑍍𑌷𑌾𑌰𑍍𑌥𑌰𑍂𑌪𑌧𑍃𑌕𑍍 ।
𑌅𑌕𑌾𑌮𑌸𑍍𑌸𑌰𑍍𑌵𑌵𑍇𑌦𑌾𑌦𑌿𑌰𑌣𑍀𑌯𑌸𑍍𑌥𑍂𑌲𑌰𑍂𑌪𑌵𑌾𑌨𑍍 ॥ 60 ॥

𑌵𑍍𑌯𑌾𑌪𑍀 𑌵𑍍𑌯𑌾𑌪𑍍𑌯𑌃 𑌕𑍃𑌪𑌾𑌕𑌰𑍍𑌤𑌾 𑌵𑌿𑌚𑌿𑌤𑍍𑌰𑌾𑌚𑌾𑌰𑌸𑌮𑍍𑌮𑌤𑌃 ।
𑌛𑌂𑌦𑍋𑌮𑌯𑌃 𑌪𑍍𑌰𑌧𑌾𑌨𑌾𑌤𑍍𑌮𑌾 𑌮𑍂𑌰𑍍𑌤𑌾𑌮𑍂𑌰𑍍𑌤𑌿𑌦𑍍𑌵𑌯𑌾𑌕𑍃𑌤𑌿𑌃 ॥ 61 ॥

𑌅𑌨𑍇𑌕𑌮𑍂𑌰𑍍𑌤𑌿𑌰𑌕𑍍𑌰𑍋𑌧𑌃 𑌪𑌰𑌃 𑌪𑍍𑌰𑌕𑍃𑌤𑌿𑌰𑌕𑍍𑌰𑌮𑌃 ।
𑌸𑌕𑌲𑌾𑌵𑌰𑌣𑍋𑌪𑍇𑌤𑌸𑍍𑌸𑌰𑍍𑌵𑌦𑍇𑌵𑍋 𑌮𑌹𑍇𑌶𑍍𑌵𑌰𑌃 ॥ 62 ॥

𑌮𑌹𑌾𑌪𑍍𑌰𑌭𑌾𑌵𑌨𑌃 𑌪𑍂𑌰𑍍𑌵𑌵𑌤𑍍𑌸𑌵𑌤𑍍𑌸𑌪𑌦𑌰𑍍𑌶𑌕𑌃 ।
𑌕𑍃𑌷𑍍𑌣𑌯𑌾𑌦𑌵𑌗𑍋𑌪𑌾𑌲𑍋 𑌗𑍋𑌪𑌾𑌲𑍋𑌕𑌨𑌹𑌰𑍍𑌷𑌿𑌤𑌃 ॥ 63 ॥

𑌸𑍍𑌮𑌿𑌤𑍇𑌕𑍍𑌷𑌾𑌹𑌰𑍍𑌷𑌿𑌤𑌬𑍍𑌰𑌹𑍍𑌮𑌾 𑌭𑌕𑍍𑌤𑌵𑌤𑍍𑌸𑌲𑌵𑌾𑌕𑍍𑌪𑍍𑌰𑌿𑌯𑌃 ।
𑌬𑍍𑌰𑌹𑍍𑌮𑌾𑌨𑌂𑌦𑌾𑌶𑍍𑌰𑍁𑌧𑍌𑌤𑌾𑌂𑌘𑍍𑌰𑌿𑌰𑍍𑌲𑍀𑌲𑌾𑌵𑍈𑌚𑌿𑌤𑍍𑌰𑍍𑌯𑌕𑍋𑌵𑌿𑌦𑌃 ॥ 64 ॥

𑌬𑌲𑌭𑌦𑍍𑌰𑍈𑌕𑌹𑍃𑌦𑌯𑍋 𑌨𑌾𑌮𑌾𑌕𑌾𑌰𑌿𑌤𑌗𑍋𑌕𑍁𑌲𑌃 ।
𑌗𑍋𑌪𑌾𑌲𑌬𑌾𑌲𑌕𑍋 𑌭𑌵𑍍𑌯𑍋 𑌰𑌜𑍍𑌜𑍁𑌯𑌜𑍍𑌞𑍋𑌪𑌵𑍀𑌤𑌵𑌾𑌨𑍍 ॥ 65 ॥

𑌵𑍃𑌕𑍍𑌷𑌚𑍍𑌛𑌾𑌯𑌾𑌹𑌤𑌾𑌶𑌾𑌂𑌤𑌿𑌰𑍍𑌗𑍋𑌪𑍋𑌤𑍍𑌸𑌂𑌗𑍋𑌪𑌬𑌰𑍍𑌹𑌣𑌃 ।
𑌗𑍋𑌪𑌸𑌂𑌵𑌾𑌹𑌿𑌤𑌪𑌦𑍋 𑌗𑍋𑌪𑌵𑍍𑌯𑌜𑌨𑌵𑍀𑌜𑌿𑌤𑌃 ॥ 66।
𑌗𑍋𑌪𑌗𑌾𑌨𑌸𑍁𑌖𑍋𑌨𑍍𑌨𑌿𑌦𑍍𑌰𑌃 𑌶𑍍𑌰𑍀𑌦𑌾𑌮𑌾𑌰𑍍𑌜𑌿𑌤𑌸𑍌𑌹𑍃𑌦𑌃 ।
𑌸𑍁𑌨𑌂𑌦𑌸𑍁𑌹𑍃𑌦𑍇𑌕𑌾𑌤𑍍𑌮𑌾 𑌸𑍁𑌬𑌲𑌪𑍍𑌰𑌾𑌣𑌰𑌂𑌜𑌨𑌃 ॥ 6𑍭 ॥

𑌤𑌾𑌲𑍀𑌵𑌨𑌕𑍃𑌤𑌕𑍍𑌰𑍀𑌡𑍋 𑌬𑌲𑌪𑌾𑌤𑌿𑌤𑌧𑍇𑌨𑍁𑌕𑌃 ।
𑌗𑍋𑌪𑍀𑌸𑍌𑌭𑌾𑌗𑍍𑌯𑌸𑌂𑌭𑌾𑌵𑍍𑌯𑍋 𑌗𑍋𑌧𑍂𑌲𑌿𑌚𑍍𑌛𑍁𑌰𑌿𑌤𑌾𑌲𑌕𑌃 ॥ 6𑍮 ॥

𑌗𑍋𑌪𑍀𑌵𑌿𑌰𑌹𑌸𑌂𑌤𑌪𑍍𑌤𑍋 𑌗𑍋𑌪𑌿𑌕𑌾𑌕𑍃𑌤𑌮𑌜𑍍𑌜𑌨𑌃 ।
𑌪𑍍𑌰𑌲𑌂𑌬𑌬𑌾𑌹𑍁𑌰𑍁𑌤𑍍𑌫𑍁𑌲𑍍𑌲𑌪𑍁𑌂𑌡𑌰𑍀𑌕𑌾𑌵𑌤𑌂𑌸𑌕𑌃 ॥ 6𑍯 ॥

𑌵𑌿𑌲𑌾𑌸𑌲𑌲𑌿𑌤𑌸𑍍𑌮𑍇𑌰𑌗𑌰𑍍𑌭𑌲𑍀𑌲𑌾𑌵𑌲𑍋𑌕𑌨𑌃 ।
𑌸𑍍𑌰𑌗𑍍𑌭𑍂𑌷𑌣𑌾𑌨𑍁𑌲𑍇𑌪𑌾𑌢𑍍𑌯𑍋 𑌜𑌨𑌨𑍍𑌯𑍁𑌪𑌹𑍃𑌤𑌾𑌨𑍍𑌨𑌭𑍁𑌕𑍍 ॥ 𑍭0 ॥

𑌵𑌰𑌶𑌯𑍍𑌯𑌾𑌶𑌯𑍋 𑌰𑌾𑌧𑌾𑌪𑍍𑌰𑍇𑌮𑌸𑌲𑍍𑌲𑌾𑌪𑌨𑌿𑌰𑍍𑌵𑍃𑌤𑌃 ।
𑌯𑌮𑍁𑌨𑌾𑌤𑌟𑌸𑌂𑌚𑌾𑌰𑍀 𑌵𑌿𑌷𑌾𑌰𑍍𑌤𑌵𑍍𑌰𑌜𑌹𑌰𑍍𑌷𑌦𑌃 ॥ 𑍭1 ॥

𑌕𑌾𑌲𑌿𑌯𑌕𑍍𑌰𑍋𑌧𑌜𑌨𑌕𑌃 𑌵𑍃𑌦𑍍𑌧𑌾𑌹𑌿𑌕𑍁𑌲𑌵𑍇𑌷𑍍𑌟𑌿𑌤𑌃 ।
𑌕𑌾𑌲𑌿𑌯𑌾𑌹𑌿𑌫𑌣𑌾𑌰𑌂𑌗𑌨𑌟𑌃 𑌕𑌾𑌲𑌿𑌯𑌮𑌰𑍍𑌦𑌨𑌃 ॥ 𑍭2 ॥

𑌨𑌾𑌗𑌪𑌤𑍍𑌨𑍀𑌸𑍍𑌤𑍁𑌤𑌿𑌪𑍍𑌰𑍀𑌤𑍋 𑌨𑌾𑌨𑌾𑌵𑍇𑌷𑌸𑌮𑍃𑌦𑍍𑌧𑌿𑌕𑍃𑌤𑍍 ।
𑌅𑌵𑌿𑌷𑍍𑌵𑌕𑍍𑌤𑌦𑍃𑌗𑌾𑌤𑍍𑌮𑍇𑌶𑌃 𑌸𑍍𑌵𑌦𑍃𑌗𑌾𑌤𑍍𑌮𑌸𑍍𑌤𑍁𑌤𑌿𑌪𑍍𑌰𑌿𑌯𑌃 ॥ 𑍭3 ॥

𑌸𑌰𑍍𑌵𑍇𑌶𑍍𑌵𑌰𑌸𑍍𑌸𑌰𑍍𑌵𑌗𑍁𑌣𑌃 𑌪𑍍𑌰𑌸𑌿𑌦𑍍𑌧𑌸𑍍𑌸𑌰𑍍𑌵𑌸𑌾𑌤𑍍𑌵𑌤𑌃 ।
𑌅𑌕𑍁𑌂𑌠𑌧𑌾𑌮𑌾 𑌚𑌂𑌦𑍍𑌰𑌾𑌰𑍍𑌕𑌦𑍃𑌷𑍍𑌟𑌿𑌰𑌾𑌕𑌾𑌶𑌨𑌿𑌰𑍍𑌮𑌲𑌃 ॥ 𑍭4 ॥

𑌅𑌨𑌿𑌰𑍍𑌦𑍇𑌶𑍍𑌯𑌗𑌤𑌿𑌰𑍍𑌨𑌾𑌗𑌵𑌨𑌿𑌤𑌾𑌪𑌤𑌿𑌭𑍈𑌕𑍍𑌷𑌦𑌃 ।
𑌸𑍍𑌵𑌾𑌂𑌘𑍍𑌰𑌿𑌮𑍁𑌦𑍍𑌰𑌾𑌂𑌕𑌨𑌾𑌗𑍇𑌂𑌦𑍍𑌰𑌮𑍂𑌰𑍍𑌧𑌾 𑌕𑌾𑌲𑌿𑌯𑌸𑌂𑌸𑍍𑌤𑍁𑌤𑌃 ॥ 𑍭5 ॥

𑌅𑌭𑌯𑍋 𑌵𑌿𑌶𑍍𑌵𑌤𑌶𑍍𑌚𑌕𑍍𑌷𑍁𑌃 𑌸𑍍𑌤𑍁𑌤𑍋𑌤𑍍𑌤𑌮𑌗𑍁𑌣𑌃 𑌪𑍍𑌰𑌭𑍁𑌃 ।
𑌅𑌹𑌮𑌾𑌤𑍍𑌮𑌾 𑌮𑌰𑍁𑌤𑍍𑌪𑍍𑌰𑌾𑌣𑌃 𑌪𑌰𑌮𑌾𑌤𑍍𑌮𑌾 𑌦𑍍𑌯𑍁𑌶𑍀𑌰𑍍𑌷𑌵𑌾𑌨𑍍 ॥ 𑍭6 ॥

𑌨𑌾𑌗𑍋𑌪𑌾𑌯𑌨𑌹𑍃𑌷𑍍𑌟𑌾𑌤𑍍𑌮𑌾 𑌹𑍍𑌰𑌦𑍋𑌤𑍍𑌸𑌾𑌰𑌿𑌤𑌕𑌾𑌲𑌿𑌯𑌃 ।
𑌬𑌲𑌭𑌦𑍍𑌰𑌸𑍁𑌖𑌾𑌲𑌾𑌪𑍋 𑌗𑍋𑌪𑌾𑌲𑌿𑌂𑌗𑌨𑌨𑌿𑌰𑍍𑌵𑍃𑌤𑌃 ॥ 𑍭𑍭 ॥

𑌦𑌾𑌵𑌾𑌗𑍍𑌨𑌿𑌭𑍀𑌤𑌗𑍋𑌪𑌾𑌲𑌗𑍋𑌪𑍍𑌤𑌾 𑌦𑌾𑌵𑌾𑌗𑍍𑌨𑌿𑌨𑌾𑌶𑌨𑌃 ।
𑌨𑌯𑌨𑌾𑌚𑍍𑌛𑌾𑌦𑌨𑌕𑍍𑌰𑍀𑌡𑌾𑌲𑌂𑌪𑌟𑍋 𑌨𑍃𑌪𑌚𑍇𑌷𑍍𑌟𑌿𑌤𑌃 ॥ 𑍭𑍮 ॥

𑌕𑌾𑌕𑌪𑌕𑍍𑌷𑌧𑌰𑌸𑍍𑌸𑍌𑌮𑍍𑌯𑍋 𑌬𑌲𑌵𑌾𑌹𑌕𑌕𑍇𑌲𑌿𑌮𑌾𑌨𑍍 ।
𑌬𑌲𑌘𑌾𑌤𑌿𑌤𑌦𑍁𑌰𑍍𑌧𑌰𑍍𑌷𑌪𑍍𑌰𑌲𑌂𑌬𑍋 𑌬𑌲𑌵𑌤𑍍𑌸𑌲𑌃 ॥ 𑍭𑍯 ॥

𑌮𑍁𑌂𑌜𑌾𑌟𑌵𑍍𑌯𑌗𑍍𑌨𑌿𑌶𑌮𑌨𑌃 𑌪𑍍𑌰𑌾𑌵𑍃𑌟𑍍𑌕𑌾𑌲𑌵𑌿𑌨𑍋𑌦𑌵𑌾𑌨𑍍 ।
𑌶𑌿𑌲𑌾𑌨𑍍𑌯𑌸𑍍𑌤𑌾𑌨𑍍𑌨𑌭𑍃𑌦𑍍𑌦𑍈𑌤𑍍𑌯𑌸𑌂𑌹𑌰𑍍𑌤𑌾 𑌶𑌾𑌦𑍍𑌵𑌲𑌾𑌸𑌨𑌃 ॥ 𑍮0 ॥

𑌸𑌦𑌾𑌪𑍍𑌤𑌗𑍋𑌪𑌿𑌕𑍋𑌦𑍍𑌗𑍀𑌤𑌃 𑌕𑌰𑍍𑌣𑌿𑌕𑌾𑌰𑌾𑌵𑌤𑌂𑌸𑌕𑌃 ।
𑌨𑌟𑌵𑍇𑌷𑌧𑌰𑌃 𑌪𑌦𑍍𑌮𑌮𑌾𑌲𑌾𑌂𑌕𑍋 𑌗𑍋𑌪𑌿𑌕𑌾𑌵𑍃𑌤𑌃 ॥ 𑍮1 ॥

𑌗𑍋𑌪𑍀𑌮𑌨𑍋𑌹𑌰𑌾𑌪𑌾𑌂𑌗𑍋 𑌵𑍇𑌣𑍁𑌵𑌾𑌦𑌨𑌤𑌤𑍍𑌪𑌰𑌃 ।
𑌵𑌿𑌨𑍍𑌯𑌸𑍍𑌤𑌵𑌦𑌨𑌾𑌂𑌭𑍋𑌜𑌶𑍍𑌚𑌾𑌰𑍁𑌶𑌬𑍍𑌦𑌕𑍃𑌤𑌾𑌨𑌨𑌃 ॥ 𑍮2 ॥

𑌬𑌿𑌂𑌬𑌾𑌧𑌰𑌾𑌰𑍍𑌪𑌿𑌤𑍋𑌦𑌾𑌰𑌵𑍇𑌣𑍁𑌰𑍍𑌵𑌿𑌶𑍍𑌵𑌵𑌿𑌮𑍋𑌹𑌨𑌃 ।
𑌵𑍍𑌰𑌜𑌸𑌂𑌵𑌰𑍍𑌣𑌿𑌤𑌶𑍍𑌰𑌾𑌵𑍍𑌯𑌵𑍇𑌣𑍁𑌨𑌾𑌦𑌃 𑌶𑍍𑌰𑍁𑌤𑌿𑌪𑍍𑌰𑌿𑌯𑌃 ॥ 𑍮3 ॥

𑌗𑍋𑌗𑍋𑌪𑌗𑍋𑌪𑍀𑌜𑌨𑍍𑌮𑍇𑌪𑍍𑌸𑍁𑌰𑍍𑌬𑍍𑌰𑌹𑍍𑌮𑍇𑌂𑌦𑍍𑌰𑌾𑌦𑍍𑌯𑌭𑌿𑌵𑌂𑌦𑌿𑌤𑌃 ।
𑌗𑍀𑌤𑌸𑍍𑌨𑍁𑌤𑌿𑌸𑌰𑌿𑌤𑍍𑌪𑍂𑌰𑍋 𑌨𑌾𑌦𑌨𑌰𑍍𑌤𑌿𑌤𑌬𑌰𑍍𑌹𑌿𑌣𑌃 ॥ 𑍮4 ॥

𑌰𑌾𑌗𑌪𑌲𑍍𑌲𑌵𑌿𑌤𑌸𑍍𑌥𑌾𑌣𑍁𑌰𑍍𑌗𑍀𑌤𑌾𑌨𑌮𑌿𑌤𑌪𑌾𑌦𑌪𑌃 ।
𑌵𑌿𑌸𑍍𑌮𑌾𑌰𑌿𑌤𑌤𑍃𑌣𑌗𑍍𑌰𑌾𑌸𑌮𑍃𑌗𑍋 𑌮𑍃𑌗𑌵𑌿𑌲𑍋𑌭𑌿𑌤𑌃 ॥ 𑍮5 ॥

𑌵𑍍𑌯𑌾𑌘𑍍𑌰𑌾𑌦𑌿𑌹𑌿𑌂𑌸𑍍𑌰𑌸𑌹𑌜𑌵𑍈𑌰𑌹𑌰𑍍𑌤𑌾 𑌸𑍁𑌗𑌾𑌯𑌨𑌃 ।
𑌗𑌾𑌢𑍋𑌦𑍀𑌰𑌿𑌤𑌗𑍋𑌬𑍃𑌂𑌦𑌪𑍍𑌰𑍇𑌮𑍋𑌤𑍍𑌕𑌰𑍍𑌣𑌿𑌤𑌤𑌰𑍍𑌣𑌕𑌃 ॥ 𑍮6 ॥

𑌨𑌿𑌷𑍍𑌪𑌂𑌦𑌯𑌾𑌨𑌬𑍍𑌰𑌹𑍍𑌮𑌾𑌦𑌿𑌵𑍀𑌕𑍍𑌷𑌿𑌤𑍋 𑌵𑌿𑌶𑍍𑌵𑌵𑌂𑌦𑌿𑌤𑌃 ।
𑌶𑌾𑌖𑍋𑌤𑍍𑌕𑌰𑍍𑌣𑌶𑌕𑍁𑌂𑌤𑍌𑌘𑌶𑍍𑌛𑌤𑍍𑌰𑌾𑌯𑌿𑌤𑌬𑌲𑌾𑌹𑌕𑌃 ॥ 𑍮𑍭 ॥

𑌪𑍍𑌰𑌸𑌨𑍍𑌨𑌃 𑌪𑌰𑌮𑌾𑌨𑌂𑌦𑌶𑍍𑌚𑌿𑌤𑍍𑌰𑌾𑌯𑌿𑌤𑌚𑌰𑌾𑌚𑌰𑌃 ।
𑌗𑍋𑌪𑌿𑌕𑌾𑌮𑌦𑌨𑍋 𑌗𑍋𑌪𑍀𑌕𑍁𑌚𑌕𑍁𑌂𑌕𑍁𑌮𑌮𑍁𑌦𑍍𑌰𑌿𑌤𑌃 ॥ 𑍮𑍮 ॥

𑌗𑍋𑌪𑌿𑌕𑌨𑍍𑌯𑌾𑌜𑌲𑌕𑍍𑌰𑍀𑌡𑌾𑌹𑍃𑌷𑍍𑌟𑍋 𑌗𑍋𑌪𑍍𑌯𑌂𑌶𑍁𑌕𑌾𑌪𑌹𑍃𑌤𑍍 ।
𑌸𑍍𑌕𑌂𑌧𑌾𑌰𑍋𑌪𑌿𑌤𑌗𑍋𑌪𑌸𑍍𑌤𑍍𑌰𑍀𑌵𑌾𑌸𑌾𑌃 𑌕𑍁𑌂𑌦𑌨𑌿𑌭𑌸𑍍𑌮𑌿𑌤𑌃 ॥ 𑍮𑍯 ॥

𑌗𑍋𑌪𑍀𑌨𑍇𑌤𑍍𑌰𑍋𑌤𑍍𑌪𑌲𑌶𑌶𑍀 𑌗𑍋𑌪𑌿𑌕𑌾𑌯𑌾𑌚𑌿𑌤𑌾𑌂𑌶𑍁𑌕𑌃 ।
𑌗𑍋𑌪𑍀𑌨𑌮𑌸𑍍𑌕𑍍𑌰𑌿𑌯𑌾𑌦𑍇𑌷𑍍𑌟𑌾 𑌗𑍋𑌪𑍍𑌯𑍇𑌕𑌕𑌰𑌵𑌂𑌦𑌿𑌤𑌃 ॥ 𑍯0 ॥

𑌗𑍋𑌪𑍍𑌯𑌂𑌜𑌲𑌿𑌵𑌿𑌶𑍇𑌷𑌾𑌰𑍍𑌥𑍀 𑌗𑍋𑌪𑌕𑍍𑌰𑍀𑌡𑌾𑌵𑌿𑌲𑍋𑌭𑌿𑌤𑌃 ।
𑌶𑌾𑌂𑌤𑌵𑌾𑌸𑌸𑍍𑌫𑍁𑌰𑌦𑍍𑌗𑍋𑌪𑍀𑌕𑍃𑌤𑌾𑌂𑌜𑌲𑌿𑌰𑌘𑌾𑌪𑌹𑌃 ॥ 𑍯1 ॥

𑌗𑍋𑌪𑍀𑌕𑍇𑌲𑌿𑌵𑌿𑌲𑌾𑌸𑌾𑌰𑍍𑌥𑍀 𑌗𑍋𑌪𑍀𑌸𑌂𑌪𑍂𑌰𑍍𑌣𑌕𑌾𑌮𑌦𑌃 ।
𑌗𑍋𑌪𑌸𑍍𑌤𑍍𑌰𑍀𑌵𑌸𑍍𑌤𑍍𑌰𑌦𑍋 𑌗𑍋𑌪𑍀𑌚𑌿𑌤𑍍𑌤𑌚𑍋𑌰𑌃 𑌕𑍁𑌤𑍂𑌹𑌲𑍀 ॥ 𑍯2 ॥

𑌬𑍃𑌂𑌦𑌾𑌵𑌨𑌪𑍍𑌰𑌿𑌯𑍋 𑌗𑍋𑌪𑌬𑌂𑌧𑍁𑌰𑍍𑌯𑌜𑍍𑌵𑌾𑌨𑍍𑌨𑌯𑌾𑌚𑌿𑌤𑌾 ।
𑌯𑌜𑍍𑌞𑍇𑌶𑍋 𑌯𑌜𑍍𑌞𑌭𑌾𑌵𑌜𑍍𑌞𑍋 𑌯𑌜𑍍𑌞𑌪𑌤𑍍𑌨𑍍𑌯𑌭𑌿𑌵𑌾𑌂𑌛𑌿𑌤𑌃 ॥ 𑍯3 ॥

𑌮𑍁𑌨𑌿𑌪𑌤𑍍𑌨𑍀𑌵𑌿𑌤𑍀𑌰𑍍𑌣𑌾𑌨𑍍𑌨𑌤𑍃𑌪𑍍𑌤𑍋 𑌮𑍁𑌨𑌿𑌵𑌧𑍂𑌪𑍍𑌰𑌿𑌯𑌃 ।
𑌦𑍍𑌵𑌿𑌜𑌪𑌤𑍍𑌨𑍍𑌯𑌭𑌿𑌭𑌾𑌵𑌜𑍍𑌞𑍋 𑌦𑍍𑌵𑌿𑌜𑌪𑌤𑍍𑌨𑍀𑌵𑌰𑌪𑍍𑌰𑌦𑌃 ॥ 𑍯4 ॥

𑌪𑍍𑌰𑌤𑌿𑌰𑍁𑌦𑍍𑌧𑌸𑌤𑍀𑌮𑍋𑌕𑍍𑌷𑌪𑍍𑌰𑌦𑍋 𑌦𑍍𑌵𑌿𑌜𑌵𑌿𑌮𑍋𑌹𑌿𑌤𑌾 ।
𑌮𑍁𑌨𑌿𑌜𑍍𑌞𑌾𑌨𑌪𑍍𑌰𑌦𑍋 𑌯𑌜𑍍𑌵𑌸𑍍𑌤𑍁𑌤𑍋 𑌵𑌾𑌸𑌵𑌯𑌾𑌗𑌵𑌿𑌤𑍍 ॥ 𑍯5 ॥

𑌪𑌿𑌤𑍃𑌪𑍍𑌰𑍋𑌕𑍍𑌤𑌕𑍍𑌰𑌿𑌯𑌾𑌰𑍂𑌪𑌶𑌕𑍍𑌰𑌯𑌾𑌗𑌨𑌿𑌵𑌾𑌰𑌣𑌃 ।
𑌶𑌕𑍍𑌰𑌾𑌽𑌮𑌰𑍍𑌷𑌕𑌰𑌶𑍍𑌶𑌕𑍍𑌰𑌵𑍃𑌷𑍍𑌟𑌿𑌪𑍍𑌰𑌶𑌮𑌨𑍋𑌨𑍍𑌮𑍁𑌖𑌃 ॥ 𑍯6 ॥

𑌗𑍋𑌵𑌰𑍍𑌧𑌨𑌧𑌰𑍋 𑌗𑍋𑌪𑌗𑍋𑌬𑍃𑌂𑌦𑌤𑍍𑌰𑌾𑌣𑌤𑌤𑍍𑌪𑌰𑌃 ।
𑌗𑍋𑌵𑌰𑍍𑌧𑌨𑌗𑌿𑌰𑌿𑌚𑍍𑌛𑌤𑍍𑌰𑌚𑌂𑌡𑌦𑌂𑌡𑌭𑍁𑌜𑌾𑌰𑍍𑌗𑌲𑌃 ॥ 𑍯𑍭 ॥

𑌸𑌪𑍍𑌤𑌾𑌹𑌵𑌿𑌧𑍃𑌤𑌾𑌦𑍍𑌰𑍀𑌂𑌦𑍍𑌰𑍋 𑌮𑍇𑌘𑌵𑌾𑌹𑌨𑌗𑌰𑍍𑌵𑌹𑌾 ।
𑌭𑍁𑌜𑌾𑌗𑍍𑌰𑍋𑌪𑌰𑌿𑌵𑌿𑌨𑍍𑌯𑌸𑍍𑌤𑌕𑍍𑌷𑍍𑌮𑌾𑌧𑌰𑌕𑍍𑌷𑍍𑌮𑌾𑌭𑍃𑌦𑌚𑍍𑌯𑍁𑌤𑌃 ॥ 𑍯𑍮 ॥

𑌸𑍍𑌵𑌸𑍍𑌥𑌾𑌨𑌸𑍍𑌥𑌾𑌪𑌿𑌤𑌗𑌿𑌰𑌿𑌰𑍍𑌗𑍋𑌪𑍀𑌦𑌧𑍍𑌯𑌕𑍍𑌷𑌤𑌾𑌰𑍍𑌚𑌿𑌤𑌃 ।
𑌸𑍁𑌮𑌨𑌸𑍍𑌸𑍁𑌮𑌨𑍋𑌵𑍃𑌷𑍍𑌟𑌿𑌹𑍃𑌷𑍍𑌟𑍋 𑌵𑌾𑌸𑌵𑌵𑌂𑌦𑌿𑌤𑌃 ॥ 𑍯𑍯 ॥

𑌕𑌾𑌮𑌧𑍇𑌨𑍁𑌪𑌯𑌃𑌪𑍂𑌰𑌾𑌭𑌿𑌷𑌿𑌕𑍍𑌤𑌸𑍍𑌸𑍁𑌰𑌭𑌿𑌸𑍍𑌤𑍁𑌤𑌃 ।
𑌧𑌰𑌾𑌂𑌘𑍍𑌰𑌿𑌰𑍋𑌷𑌧𑍀𑌰𑍋𑌮𑌾 𑌧𑌰𑍍𑌮𑌗𑍋𑌪𑍍𑌤𑌾 𑌮𑌨𑍋𑌮𑌯𑌃 ॥ 100 ॥

𑌜𑍍𑌞𑌾𑌨𑌯𑌜𑍍𑌞𑌪𑍍𑌰𑌿𑌯𑌶𑍍𑌶𑌾𑌸𑍍𑌤𑍍𑌰𑌨𑍇𑌤𑍍𑌰𑌸𑍍𑌸𑌰𑍍𑌵𑌾𑌰𑍍𑌥𑌸𑌾𑌰𑌥𑌿𑌃 ।
𑌐𑌰𑌾𑌵𑌤𑌕𑌰𑌾𑌨𑍀𑌤𑌵𑌿𑌯𑌦𑍍𑌗𑌂𑌗𑌾𑌪𑍍𑌲𑍁𑌤𑍋 𑌵𑌿𑌭𑍁𑌃 ॥ 101 ॥

𑌬𑍍𑌰𑌹𑍍𑌮𑌾𑌭𑌿𑌷𑌿𑌕𑍍𑌤𑍋 𑌗𑍋𑌗𑍋𑌪𑍍𑌤𑌾 𑌸𑌰𑍍𑌵𑌲𑍋𑌕𑌶𑍁𑌭𑌂𑌕𑌰𑌃 ।
𑌸𑌰𑍍𑌵𑌵𑍇𑌦𑌮𑌯𑍋 𑌮𑌗𑍍𑌨𑌨𑌂𑌦𑌾𑌨𑍍𑌵𑍇𑌷𑌿𑌪𑌿𑌤𑍃𑌪𑍍𑌰𑌿𑌯𑌃 ॥ 102 ॥

𑌵𑌰𑍁𑌣𑍋𑌦𑍀𑌰𑌿𑌤𑌾𑌤𑍍𑌮𑍇𑌕𑍍𑌷𑌾𑌕𑍌𑌤𑍁𑌕𑍋 𑌵𑌰𑍁𑌣𑌾𑌰𑍍𑌚𑌿𑌤𑌃 ।
𑌵𑌰𑍁𑌣𑌾𑌨𑍀𑌤𑌜𑌨𑌕𑍋 𑌗𑍋𑌪𑌜𑍍𑌞𑌾𑌤𑌾𑌤𑍍𑌮𑌵𑍈𑌭𑌵𑌃 ॥ 103 ॥

𑌸𑍍𑌵𑌰𑍍𑌲𑍋𑌕𑌾𑌲𑍋𑌕𑌸𑌂𑌹𑍃𑌷𑍍𑌟𑌗𑍋𑌪𑌵𑌰𑍍𑌗𑌤𑍍𑌰𑌿𑌵𑌰𑍍𑌗𑌦𑌃 ।
𑌬𑍍𑌰𑌹𑍍𑌮𑌹𑍃𑌦𑍍𑌗𑍋𑌪𑌿𑌤𑍋 𑌗𑍋𑌪𑌦𑍍𑌰𑌷𑍍𑌟𑌾 𑌬𑍍𑌰𑌹𑍍𑌮𑌪𑌦𑌪𑍍𑌰𑌦𑌃 ॥ 104 ॥

𑌶𑌰𑌚𑍍𑌚𑌂𑌦𑍍𑌰𑌵𑌿𑌹𑌾𑌰𑍋𑌤𑍍𑌕𑌃 𑌶𑍍𑌰𑍀𑌪𑌤𑌿𑌰𑍍𑌵𑌶𑌕𑍋 𑌕𑍍𑌷𑌮𑌃 ।
𑌭𑌯𑌾𑌪𑌹𑍋 𑌭𑌰𑍍𑌤𑍃𑌰𑍁𑌦𑍍𑌧𑌗𑍋𑌪𑌿𑌕𑌾𑌧𑍍𑌯𑌾𑌨𑌗𑍋𑌚𑌰𑌃 ॥ 105 ॥

𑌗𑍋𑌪𑌿𑌕𑌾𑌨𑌯𑌨𑌾𑌸𑍍𑌵𑌾𑌦𑍍𑌯𑍋 𑌗𑍋𑌪𑍀𑌨𑌰𑍍𑌮𑍋𑌕𑍍𑌤𑌿𑌨𑌿𑌰𑍍𑌵𑍃𑌤𑌃 ।
𑌗𑍋𑌪𑌿𑌕𑌾𑌮𑌾𑌨𑌹𑌰𑌣𑍋 𑌗𑍋𑌪𑌿𑌕𑌾𑌶𑌤𑌯𑍂𑌥𑌪𑌃 ॥ 106 ॥

𑌵𑍈𑌜𑌯𑌂𑌤𑍀𑌸𑍍𑌰𑌗𑌾𑌕𑌲𑍍𑌪𑍋 𑌗𑍋𑌪𑌿𑌕𑌾𑌮𑌾𑌨𑌵𑌰𑍍𑌧𑌨𑌃 ।
𑌗𑍋𑌪𑌕𑌾𑌂𑌤𑌾𑌸𑍁𑌨𑌿𑌰𑍍𑌦𑍇𑌷𑍍𑌟𑌾 𑌕𑌾𑌂𑌤𑍋 𑌮𑌨𑍍𑌮𑌥𑌮𑌨𑍍𑌮𑌥𑌃 ॥ 10𑍭 ॥

𑌸𑍍𑌵𑌾𑌤𑍍𑌮𑌾𑌸𑍍𑌯𑌦𑌤𑍍𑌤𑌤𑌾𑌂𑌬𑍂𑌲𑌃 𑌫𑌲𑌿𑌤𑍋𑌤𑍍𑌕𑍃𑌷𑍍𑌟𑌯𑍌𑌵𑌨𑌃 ।
𑌵𑌲𑍍𑌲𑌵𑍀𑌸𑍍𑌤𑌨𑌸𑌕𑍍𑌤𑌾𑌕𑍍𑌷𑍋 𑌵𑌲𑍍𑌲𑌵𑍀𑌪𑍍𑌰𑍇𑌮𑌚𑌾𑌲𑌿𑌤𑌃 ॥ 10𑍮 ॥

𑌗𑍋𑌪𑍀𑌚𑍇𑌲𑌾𑌂𑌚𑌲𑌾𑌸𑍀𑌨𑍋 𑌗𑍋𑌪𑍀𑌨𑍇𑌤𑍍𑌰𑌾𑌬𑍍𑌜𑌷𑌟𑍍𑌪𑌦𑌃 ।
𑌰𑌾𑌸𑌕𑍍𑌰𑍀𑌡𑌾𑌸𑌮𑌾𑌸𑌕𑍍𑌤𑍋 𑌗𑍋𑌪𑍀𑌮𑌂𑌡𑌲𑌮𑌂𑌡𑌨𑌃 ॥ 10𑍯 ॥

𑌗𑍋𑌪𑍀𑌹𑍇𑌮𑌮𑌣𑌿𑌶𑍍𑌰𑍇𑌣𑌿𑌮𑌧𑍍𑌯𑍇𑌂𑌦𑍍𑌰𑌮𑌣𑌿𑌰𑍁𑌜𑍍𑌜𑍍𑌵𑌲𑌃 ।
𑌵𑌿𑌦𑍍𑌯𑌾𑌧𑌰𑍇𑌂𑌦𑍁𑌶𑌾𑌪𑌘𑍍𑌨𑌶𑍍𑌶𑌂𑌖𑌚𑍂𑌡𑌶𑌿𑌰𑍋𑌹𑌰𑌃 ॥ 110 ॥

𑌶𑌂𑌖𑌚𑍂𑌡𑌶𑌿𑌰𑍋𑌰𑌤𑍍𑌨𑌸𑌂𑌪𑍍𑌰𑍀𑌣𑌿𑌤𑌬𑌲𑍋𑌽𑌨𑌘𑌃 ।
𑌅𑌰𑌿𑌷𑍍𑌟𑌾𑌰𑌿𑌷𑍍𑌟𑌕𑍃𑌦𑍍𑌦𑍁𑌷𑍍𑌟𑌕𑍇𑌶𑌿𑌦𑍈𑌤𑍍𑌯𑌨𑌿𑌷𑍂𑌦𑌨𑌃 ॥ 111 ॥

𑌸𑌰𑌸𑌸𑍍𑌸𑌸𑍍𑌮𑌿𑌤𑌮𑍁𑌖𑌸𑍍𑌸𑍁𑌸𑍍𑌥𑌿𑌰𑍋 𑌵𑌿𑌰𑌹𑌾𑌕𑍁𑌲𑌃 ।
𑌸𑌂𑌕𑌰𑍍𑌷𑌣𑌾𑌰𑍍𑌪𑌿𑌤𑌪𑍍𑌰𑍀𑌤𑌿𑌰𑌕𑍍𑌰𑍂𑌰𑌧𑍍𑌯𑌾𑌨𑌗𑍋𑌚𑌰𑌃 ॥ 112 ॥

𑌅𑌕𑍍𑌰𑍂𑌰𑌸𑌂𑌸𑍍𑌤𑍁𑌤𑍋 𑌗𑍂𑌢𑍋 𑌗𑍁𑌣𑌵𑍃𑌤𑍍𑌯𑍁𑌪𑌲𑌕𑍍𑌷𑌿𑌤𑌃 ।
𑌪𑍍𑌰𑌮𑌾𑌣𑌗𑌮𑍍𑌯𑌸𑍍𑌤𑌨𑍍𑌮𑌾𑌤𑍍𑌰𑌾𑌽𑌵𑌯𑌵𑍀 𑌬𑍁𑌦𑍍𑌧𑌿𑌤𑌤𑍍𑌪𑌰𑌃 ॥ 113 ॥

𑌸𑌰𑍍𑌵𑌪𑍍𑌰𑌮𑌾𑌣𑌪𑍍𑌰𑌮𑌧𑍀𑌸𑍍𑌸𑌰𑍍𑌵𑌪𑍍𑌰𑌤𑍍𑌯𑌯𑌸𑌾𑌧𑌕𑌃 ।
𑌪𑍁𑌰𑍁𑌷𑌶𑍍𑌚 𑌪𑍍𑌰𑌧𑌾𑌨𑌾𑌤𑍍𑌮𑌾 𑌵𑌿𑌪𑌰𑍍𑌯𑌾𑌸𑌵𑌿𑌲𑍋𑌚𑌨𑌃 ॥ 114 ॥

𑌮𑌧𑍁𑌰𑌾𑌜𑌨𑌸𑌂𑌵𑍀𑌕𑍍𑌷𑍍𑌯𑍋 𑌰𑌜𑌕𑌪𑍍𑌰𑌤𑌿𑌘𑌾𑌤𑌕𑌃 ।
𑌵𑌿𑌚𑌿𑌤𑍍𑌰𑌾𑌂𑌬𑌰𑌸𑌂𑌵𑍀𑌤𑍋 𑌮𑌾𑌲𑌾𑌕𑌾𑌰𑌵𑌰𑌪𑍍𑌰𑌦𑌃 ॥ 115 ॥

𑌕𑍁𑌬𑍍𑌜𑌾𑌵𑌕𑍍𑌰𑌤𑍍𑌵𑌨𑌿𑌰𑍍𑌮𑍋𑌕𑍍𑌤𑌾 𑌕𑍁𑌬𑍍𑌜𑌾𑌯𑍌𑌵𑌨𑌦𑌾𑌯𑌕𑌃 ।
𑌕𑍁𑌬𑍍𑌜𑌾𑌂𑌗𑌰𑌾𑌗𑌸𑍁𑌰𑌭𑌿𑌃 𑌕𑌂𑌸𑌕𑍋𑌦𑌂𑌡𑌖𑌂𑌡𑌨𑌃 ॥ 116 ॥

𑌧𑍀𑌰𑌃 𑌕𑍁𑌵𑌲𑌯𑌾𑌪𑍀𑌡𑌮𑌰𑍍𑌦𑌨𑌃 𑌕𑌂𑌸𑌭𑍀𑌤𑌿𑌕𑍃𑌤𑍍 ।
𑌦𑌂𑌤𑌿𑌦𑌂𑌤𑌾𑌯𑍁𑌧𑍋 𑌰𑌂𑌗𑌤𑍍𑌰𑌾𑌸𑌕𑍋 𑌮𑌲𑍍𑌲𑌯𑍁𑌦𑍍𑌧𑌵𑌿𑌤𑍍 ॥ 11𑍭 ॥

𑌚𑌾𑌣𑍂𑌰𑌹𑌂𑌤𑌾 𑌕𑌂𑌸𑌾𑌰𑌿𑌰𑍍𑌦𑍇𑌵𑌕𑍀𑌹𑌰𑍍𑌷𑌦𑌾𑌯𑌕𑌃 ।
𑌵𑌸𑍁𑌦𑍇𑌵𑌪𑌦𑌾𑌨𑌮𑍍𑌰𑌃 𑌪𑌿𑌤𑍃𑌬𑌂𑌧𑌵𑌿𑌮𑍋𑌚𑌨𑌃 ॥ 11𑍮 ॥

𑌉𑌰𑍍𑌵𑍀𑌭𑌯𑌾𑌪𑌹𑍋 𑌭𑍂𑌪 𑌉𑌗𑍍𑌰𑌸𑍇𑌨𑌾𑌧𑌿𑌪𑌤𑍍𑌯𑌦𑌃 ।
𑌆𑌜𑍍𑌞𑌾𑌸𑍍𑌥𑌿𑌤𑌶𑌚𑍀𑌨𑌾𑌥𑌸𑍍𑌸𑍁𑌧𑌰𑍍𑌮𑌾𑌨𑌯𑌨𑌕𑍍𑌷𑌮𑌃 ॥ 11𑍯 ॥

𑌆𑌦𑍍𑌯𑍋 𑌦𑍍𑌵𑌿𑌜𑌾𑌤𑌿𑌸𑌤𑍍𑌕𑌰𑍍𑌤𑌾 𑌶𑌿𑌷𑍍𑌟𑌾𑌚𑌾𑌰𑌪𑍍𑌰𑌦𑌰𑍍𑌶𑌕𑌃 ।
𑌸𑌾𑌂𑌦𑍀𑌪𑌨𑌿𑌕𑍃𑌤𑌾𑌭𑍍𑌯𑌸𑍍𑌤𑌵𑌿𑌦𑍍𑌯𑌾𑌭𑍍𑌯𑌾𑌸𑍈𑌕𑌧𑍀𑌸𑍍𑌸𑍁𑌧𑍀𑌃 ॥ 120 ॥

𑌗𑍁𑌰𑍍𑌵𑌭𑍀𑌷𑍍𑌟𑌕𑍍𑌰𑌿𑌯𑌾𑌦𑌕𑍍𑌷𑌃 𑌪𑌶𑍍𑌚𑌿𑌮𑍋𑌦𑌧𑌿𑌪𑍂𑌜𑌿𑌤𑌃 ।
𑌹𑌤𑌪𑌂𑌚𑌜𑌨𑌪𑍍𑌰𑌾𑌪𑍍𑌤𑌪𑌾𑌂𑌚𑌜𑌨𑍍𑌯𑍋 𑌯𑌮𑌾𑌰𑍍𑌚𑌿𑌤𑌃 ॥ 121 ॥

𑌧𑌰𑍍𑌮𑌰𑌾𑌜𑌜𑌯𑌾𑌨𑍀𑌤𑌗𑍁𑌰𑍁𑌪𑍁𑌤𑍍𑌰 𑌉𑌰𑍁𑌕𑍍𑌰𑌮𑌃 ।
𑌗𑍁𑌰𑍁𑌪𑍁𑌤𑍍𑌰𑌪𑍍𑌰𑌦𑌶𑍍𑌶𑌾𑌸𑍍𑌤𑌾 𑌮𑌧𑍁𑌰𑌾𑌜𑌸𑌭𑌾𑌸𑌦𑌃 ॥ 122 ॥

𑌜𑌾𑌮𑌦𑌗𑍍𑌨𑍍𑌯𑌸𑌮𑌭𑍍𑌯𑌰𑍍𑌚𑍍𑌯𑍋 𑌗𑍋𑌮𑌂𑌤𑌗𑌿𑌰𑌿𑌸𑌂𑌚𑌰𑌃 ।
𑌗𑍋𑌮𑌂𑌤𑌦𑌾𑌵𑌶𑌮𑌨𑍋 𑌗𑌰𑍁𑌡𑌾𑌨𑍀𑌤𑌭𑍂𑌷𑌣𑌃 ॥ 123 ॥

𑌚𑌕𑍍𑌰𑌾𑌦𑍍𑌯𑌾𑌯𑍁𑌧𑌸𑌂𑌶𑍋𑌭𑍀 𑌜𑌰𑌾𑌸𑌂𑌧𑌮𑌦𑌾𑌪𑌹𑌃 ।
𑌸𑍃𑌗𑌾𑌲𑌾𑌵𑌨𑌿𑌪𑌾𑌲𑌘𑍍𑌨𑌸𑍍𑌸𑍃𑌗𑌾𑌲𑌾𑌤𑍍𑌮𑌜𑌰𑌾𑌜𑍍𑌯𑌦𑌃 ॥ 124 ॥

𑌵𑌿𑌧𑍍𑌵𑌸𑍍𑌤𑌕𑌾𑌲𑌯𑌵𑌨𑍋 𑌮𑍁𑌚𑍁𑌕𑍁𑌂𑌦𑌵𑌰𑌪𑍍𑌰𑌦𑌃 ।
𑌆𑌜𑍍𑌞𑌾𑌪𑌿𑌤𑌮𑌹𑌾𑌂𑌭𑍋𑌧𑌿𑌰𑍍𑌦𑍍𑌵𑌾𑌰𑌕𑌾𑌪𑍁𑌰𑌕𑌲𑍍𑌪𑌨𑌃 ॥ 125 ॥

𑌦𑍍𑌵𑌾𑌰𑌕𑌾𑌨𑌿𑌲𑌯𑍋 𑌰𑍁𑌕𑍍𑌮𑌿𑌮𑌾𑌨𑌹𑌂𑌤𑌾 𑌯𑌦𑍂𑌦𑍍𑌵𑌹𑌃 ।
𑌰𑍁𑌚𑌿𑌰𑍋 𑌰𑍁𑌕𑍍𑌮𑌿𑌣𑍀𑌜𑌾𑌨𑌿𑌃 𑌪𑍍𑌰𑌦𑍍𑌯𑍁𑌮𑍍𑌨𑌜𑌨𑌕𑌃 𑌪𑍍𑌰𑌭𑍁𑌃 ॥ 126 ॥

𑌅𑌪𑌾𑌕𑍃𑌤𑌤𑍍𑌰𑌿𑌲𑍋𑌕𑌾𑌰𑍍𑌤𑌿𑌰𑌨𑌿𑌰𑍁𑌦𑍍𑌧𑌪𑌿𑌤𑌾𑌮𑌹𑌃 ।
𑌅𑌨𑌿𑌰𑍁𑌦𑍍𑌧𑌪𑌦𑌾𑌨𑍍𑌵𑍇𑌷𑍀 𑌚𑌕𑍍𑌰𑍀 𑌗𑌰𑍁𑌡𑌵𑌾𑌹𑌨𑌃 ॥ 12𑍭 ॥

𑌬𑌾𑌣𑌾𑌸𑍁𑌰𑌪𑍁𑌰𑍀𑌰𑍋𑌦𑍍𑌧𑌾 𑌰𑌕𑍍𑌷𑌾𑌜𑍍𑌵𑌲𑌨𑌯𑌂𑌤𑍍𑌰𑌜𑌿𑌤𑍍 ।
𑌧𑍂𑌤𑌪𑍍𑌰𑌮𑌥𑌸𑌂𑌰𑌂𑌭𑍋 𑌜𑌿𑌤𑌮𑌾𑌹𑍇𑌶𑍍𑌵𑌰𑌜𑍍𑌵𑌰𑌃 ॥ 12𑍮 ॥

𑌷𑌟𑍍𑌚𑌕𑍍𑌰𑌶𑌕𑍍𑌤𑌿𑌨𑌿𑌰𑍍𑌜𑍇𑌤𑌾 𑌭𑍂𑌤𑌵𑍇𑌤𑌾𑌲𑌮𑍋𑌹𑌕𑍃𑌤𑍍 ।
𑌶𑌂𑌭𑍁𑌤𑍍𑌰𑌿𑌶𑍂𑌲𑌜𑌿𑌚𑍍𑌛𑌂𑌭𑍁𑌜𑍃𑌂𑌭𑌣𑌶𑍍𑌶𑌂𑌭𑍁𑌸𑌂𑌸𑍍𑌤𑍁𑌤𑌃 ॥ 12𑍯 ॥

𑌇𑌂𑌦𑍍𑌰𑌿𑌯𑌾𑌤𑍍𑌮𑍇𑌂𑌦𑍁𑌹𑍃𑌦𑌯𑌸𑍍𑌸𑌰𑍍𑌵𑌯𑍋𑌗𑍇𑌶𑍍𑌵𑌰𑍇𑌶𑍍𑌵𑌰𑌃 ।
𑌹𑌿𑌰𑌣𑍍𑌯𑌗𑌰𑍍𑌭𑌹𑍃𑌦𑌯𑍋 𑌮𑍋𑌹𑌾𑌵𑌰𑍍𑌤𑌨𑌿𑌵𑌰𑍍𑌤𑌨𑌃 ॥ 130 ॥

𑌆𑌤𑍍𑌮𑌜𑍍𑌞𑌾𑌨𑌨𑌿𑌧𑌿𑌰𑍍𑌮𑍇𑌧𑌾 𑌕𑍋𑌶𑌸𑍍𑌤𑌨𑍍𑌮𑌾𑌤𑍍𑌰𑌰𑍂𑌪𑌵𑌾𑌨𑍍 ।
𑌇𑌂𑌦𑍍𑌰𑍋𑌽𑌗𑍍𑌨𑌿𑌵𑌦𑌨𑌃 𑌕𑌾𑌲𑌨𑌾𑌭𑌸𑍍𑌸𑌰𑍍𑌵𑌾𑌗𑌮𑌾𑌧𑍍𑌵𑌗𑌃 ॥ 131 ॥

𑌤𑍁𑌰𑍀𑌯𑌸𑌰𑍍𑌵𑌧𑍀𑌸𑌾𑌕𑍍𑌷𑍀 𑌦𑍍𑌵𑌂𑌦𑍍𑌵𑌾𑌰𑌾𑌮𑌾𑌤𑍍𑌮𑌦𑍂𑌰𑌗𑌃 ।
𑌅𑌜𑍍𑌞𑌾𑌤𑌪𑌾𑌰𑍋 𑌵𑌶𑍍𑌯𑌶𑍍𑌰𑍀𑌰𑌵𑍍𑌯𑌾𑌕𑍃𑌤𑌵𑌿𑌹𑌾𑌰𑌵𑌾𑌨𑍍 ॥ 132 ॥

𑌆𑌤𑍍𑌮𑌪𑍍𑌰𑌦𑍀𑌪𑍋 𑌵𑌿𑌜𑍍𑌞𑌾𑌨𑌮𑌾𑌤𑍍𑌰𑌾𑌤𑍍𑌮𑌾 𑌶𑍍𑌰𑍀𑌨𑌿𑌕𑍇𑌤𑌨𑌃 ।
𑌬𑌾𑌣𑌬𑌾𑌹𑍁𑌵𑌨𑌚𑍍𑌛𑍇𑌤𑍍𑌤𑌾 𑌮𑌹𑍇𑌂𑌦𑍍𑌰𑌪𑍍𑌰𑍀𑌤𑌿𑌵𑌰𑍍𑌧𑌨𑌃 ॥ 133 ॥

𑌅𑌨𑌿𑌰𑍁𑌦𑍍𑌧𑌨𑌿𑌰𑍋𑌧𑌜𑍍𑌞𑍋 𑌜𑌲𑍇𑌶𑌾𑌹𑍃𑌤𑌗𑍋𑌕𑍁𑌲𑌃 ।
𑌜𑌲𑍇𑌶𑌵𑌿𑌜𑌯𑍀 𑌵𑍀𑌰𑌸𑍍𑌸𑌤𑍍𑌰𑌾𑌜𑌿𑌦𑍍𑌰𑌤𑍍𑌨𑌯𑌾𑌚𑌕𑌃 ॥ 134 ॥

𑌪𑍍𑌰𑌸𑍇𑌨𑌾𑌨𑍍𑌵𑍇𑌷𑌣𑍋𑌦𑍍𑌯𑍁𑌕𑍍𑌤𑍋 𑌜𑌾𑌂𑌬𑌵𑌦𑍍𑌧𑍃𑌤𑌰𑌤𑍍𑌨𑌦𑌃 ।
𑌜𑌿𑌤𑌰𑍍𑌕𑍍𑌷𑌰𑌾𑌜𑌤𑌨𑌯𑌾𑌹𑌰𑍍𑌤𑌾 𑌜𑌾𑌂𑌬𑌵𑌤𑍀𑌪𑍍𑌰𑌿𑌯𑌃 ॥ 135 ॥

𑌸𑌤𑍍𑌯𑌭𑌾𑌮𑌾𑌪𑍍𑌰𑌿𑌯𑌃 𑌕𑌾𑌮𑌶𑍍𑌶𑌤𑌧𑌨𑍍𑌵𑌶𑌿𑌰𑍋𑌹𑌰𑌃 ।
𑌕𑌾𑌲𑌿𑌂𑌦𑍀𑌪𑌤𑌿𑌰𑌕𑍍𑌰𑍂𑌰𑌬𑌂𑌧𑍁𑌰𑌕𑍍𑌰𑍂𑌰𑌰𑌤𑍍𑌨𑌦𑌃 ॥ 136 ॥

𑌕𑍈𑌕𑍇𑌯𑍀𑌰𑌮𑌣𑍋 𑌭𑌦𑍍𑌰𑌾𑌭𑌰𑍍𑌤𑌾 𑌨𑌾𑌗𑍍𑌨𑌜𑌿𑌤𑍀𑌧𑌵𑌃 ।
𑌮𑌾𑌦𑍍𑌰𑍀𑌮𑌨𑍋𑌹𑌰𑌶𑍍𑌶𑍈𑌬𑍍𑌯𑌾𑌪𑍍𑌰𑌾𑌣𑌬𑌂𑌧𑍁𑌰𑍁𑌰𑍁𑌕𑍍𑌰𑌮𑌃 ॥ 13𑍭 ॥

𑌸𑍁𑌶𑍀𑌲𑌾𑌦𑌯𑌿𑌤𑍋 𑌮𑌿𑌤𑍍𑌰𑌵𑌿𑌂𑌦𑌾𑌨𑍇𑌤𑍍𑌰𑌮𑌹𑍋𑌤𑍍𑌸𑌵𑌃 ।
𑌲𑌕𑍍𑌷𑍍𑌮𑌣𑌾𑌵𑌲𑍍𑌲𑌭𑍋 𑌰𑍁𑌦𑍍𑌧𑌪𑍍𑌰𑌾𑌗𑍍𑌜𑍍𑌯𑍋𑌤𑌿𑌷𑌮𑌹𑌾𑌪𑍁𑌰𑌃 ॥ 13𑍮 ॥

𑌸𑍁𑌰𑌪𑌾𑌶𑌾𑌵𑍃𑌤𑌿𑌚𑍍𑌛𑍇𑌦𑍀 𑌮𑍁𑌰𑌾𑌰𑌿𑌃 𑌕𑍍𑌰𑍂𑌰𑌯𑍁𑌦𑍍𑌧𑌵𑌿𑌤𑍍 ।
𑌹𑌯𑌗𑍍𑌰𑍀𑌵𑌶𑌿𑌰𑍋𑌹𑌰𑍍𑌤𑌾 𑌸𑌰𑍍𑌵𑌾𑌤𑍍𑌮𑌾 𑌸𑌰𑍍𑌵𑌦𑌰𑍍𑌶𑌨𑌃 ॥ 13𑍯 ॥

𑌨𑌰𑌕𑌾𑌸𑍁𑌰𑌵𑌿𑌚𑍍𑌛𑍇𑌤𑍍𑌤𑌾 𑌨𑌰𑌕𑌾𑌤𑍍𑌮𑌜𑌰𑌾𑌜𑍍𑌯𑌦𑌃।
𑌪𑍃𑌥𑍍𑌵𑍀𑌸𑍍𑌤𑍁𑌤𑌃 𑌪𑍍𑌰𑌕𑌾𑌶𑌾𑌤𑍍𑌮𑌾 𑌹𑍃𑌦𑍍𑌯𑍋 𑌯𑌜𑍍𑌞𑌫𑌲𑌪𑍍𑌰𑌦𑌃 ॥ 140 ॥

𑌗𑍁𑌣𑌗𑍍𑌰𑌾𑌹𑍀 𑌗𑍁𑌣𑌦𑍍𑌰𑌷𑍍𑌟𑌾 𑌗𑍂𑌢𑌸𑍍𑌵𑌾𑌤𑍍𑌮𑌾 𑌵𑌿𑌭𑍂𑌤𑌿𑌮𑌾𑌨𑍍 ।
𑌕𑌵𑌿𑌰𑍍𑌜𑌗𑌦𑍁𑌪𑌦𑍍𑌰𑌷𑍍𑌟𑌾 𑌪𑌰𑌮𑌾𑌕𑍍𑌷𑌰𑌵𑌿𑌗𑍍𑌰𑌹𑌃 ॥ 141 ॥

𑌪𑍍𑌰𑌪𑌨𑍍𑌨𑌪𑌾𑌲𑌨𑍋 𑌮𑌾𑌲𑍀 𑌮𑌹𑌦𑍍𑌬𑍍𑌰𑌹𑍍𑌮𑌵𑌿𑌵𑌰𑍍𑌧𑌨𑌃 ।
𑌵𑌾𑌚𑍍𑌯𑌵𑌾𑌚𑌕𑌶𑌕𑍍𑌤𑍍𑌯𑌰𑍍𑌥𑌸𑍍𑌸𑌰𑍍𑌵𑌵𑍍𑌯𑌾𑌕𑍃𑌤𑌸𑌿𑌦𑍍𑌧𑌿𑌦𑌃 ॥ 142 ॥

𑌸𑍍𑌵𑌯𑌂𑌪𑍍𑌰𑌭𑍁𑌰𑌨𑌿𑌰𑍍𑌵𑍇𑌦𑍍𑌯𑌸𑍍𑌸𑍍𑌵𑌪𑍍𑌰𑌕𑌾𑌶𑌶𑍍𑌚𑌿𑌰𑌂𑌤𑌨𑌃 ।
𑌨𑌾𑌦𑌾𑌤𑍍𑌮𑌾 𑌮𑌂𑌤𑍍𑌰𑌕𑍋𑌟𑍀𑌶𑍋 𑌨𑌾𑌨𑌾𑌵𑌾𑌦𑌨𑌿𑌰𑍋𑌧𑌕𑌃 ॥ 143 ॥

𑌕𑌂𑌦𑌰𑍍𑌪𑌕𑍋𑌟𑌿𑌲𑌾𑌵𑌣𑍍𑌯𑌃 𑌪𑌰𑌾𑌰𑍍𑌥𑍈𑌕𑌪𑍍𑌰𑌯𑍋𑌜𑌕𑌃 ।
𑌅𑌮𑌰𑍀𑌕𑍃𑌤𑌦𑍇𑌵𑍌𑌘𑌃 𑌕𑌨𑍍𑌯𑌕𑌾𑌬𑌂𑌧𑌮𑍋𑌚𑌨𑌃 ॥ 144 ॥

𑌷𑍋𑌡𑌶𑌸𑍍𑌤𑍍𑌰𑍀𑌸𑌹𑌸𑍍𑌰𑍇𑌶𑌃 𑌕𑌾𑌂𑌤𑌃 𑌕𑌾𑌂𑌤𑌾𑌮𑌨𑍋𑌭𑌵𑌃 ।
𑌕𑍍𑌰𑍀𑌡𑌾𑌰𑌤𑍍𑌨𑌾𑌚𑌲𑌾𑌹𑌰𑍍𑌤𑌾 𑌵𑌰𑍁𑌣𑌚𑍍𑌛𑌤𑍍𑌰𑌶𑍋𑌭𑌿𑌤𑌃 ॥ 145 ॥

𑌶𑌕𑍍𑌰𑌾𑌭𑌿𑌵𑌂𑌦𑌿𑌤𑌶𑍍𑌶𑌕𑍍𑌰𑌜𑌨𑌨𑍀𑌕𑍁𑌂𑌡𑌲𑌪𑍍𑌰𑌦𑌃 ।
𑌅𑌦𑌿𑌤𑌿𑌪𑍍𑌰𑌸𑍍𑌤𑍁𑌤𑌸𑍍𑌤𑍋𑌤𑍍𑌰𑍋 𑌬𑍍𑌰𑌾𑌹𑍍𑌮𑌣𑍋𑌦𑍍𑌘𑍁𑌷𑍍𑌟𑌚𑍇𑌷𑍍𑌟𑌨𑌃 ॥ 146 ॥

𑌪𑍁𑌰𑌾𑌣𑌸𑍍𑌸𑌂𑌯𑌮𑍀 𑌜𑌨𑍍𑌮𑌾𑌲𑌿𑌪𑍍𑌤𑌃 𑌷𑌡𑍍𑌵𑌿𑌂𑌶𑌕𑍋𑌽𑌰𑍍𑌥𑌦𑌃 ।
𑌯𑌶𑌸𑍍𑌯𑌨𑍀𑌤𑌿𑌰𑌾𑌦𑍍𑌯𑌂𑌤𑌰𑌹𑌿𑌤𑌸𑍍𑌸𑌤𑍍𑌕𑌥𑌾𑌪𑍍𑌰𑌿𑌯𑌃 ॥ 14𑍭 ॥

𑌬𑍍𑌰𑌹𑍍𑌮𑌬𑍋𑌧𑌃 𑌪𑌰𑌾𑌨𑌂𑌦𑌃 𑌪𑌾𑌰𑌿𑌜𑌾𑌤𑌾𑌪𑌹𑌾𑌰𑌕𑌃 ।
𑌪𑍌𑌂𑌡𑍍𑌰𑌕𑌪𑍍𑌰𑌾𑌣𑌹𑌰𑌣𑌃 𑌕𑌾𑌶𑌿𑌰𑌾𑌜𑌨𑌿𑌷𑍂𑌦𑌨𑌃 ॥ 14𑍮 ॥

𑌕𑍃𑌤𑍍𑌯𑌾𑌗𑌰𑍍𑌵𑌪𑍍𑌰𑌶𑌮𑌨𑍋 𑌵𑌿𑌚𑌕𑍍𑌰𑌵𑌧𑌦𑍀𑌕𑍍𑌷𑌿𑌤𑌃 ।
𑌕𑌂𑌸𑌵𑌿𑌧𑍍𑌵𑌂𑌸𑌨𑌸𑍍𑌸𑌾𑌂𑌬𑌜𑌨𑌕𑍋 𑌡𑌿𑌂𑌭𑌕𑌾𑌰𑍍𑌦𑌨𑌃 ॥ 14𑍯 ॥

𑌮𑍁𑌨𑌿𑌰𑍍𑌗𑍋𑌪𑍍𑌤𑌾 𑌪𑌿𑌤𑍃𑌵𑌰𑌪𑍍𑌰𑌦𑌸𑍍𑌸𑌵𑌨𑌦𑍀𑌕𑍍𑌷𑌿𑌤𑌃 ।
𑌰𑌥𑍀 𑌸𑌾𑌰𑌥𑍍𑌯𑌨𑌿𑌰𑍍𑌦𑍇𑌷𑍍𑌟𑌾 𑌫𑌾𑌲𑍍𑌗𑍁𑌨𑌃 𑌫𑌾𑌲𑍍𑌗𑍁𑌨𑌿𑌪𑍍𑌰𑌿𑌯𑌃 ॥ 150 ॥

𑌸𑌪𑍍𑌤𑌾𑌬𑍍𑌧𑌿𑌸𑍍𑌤𑌂𑌭𑌨𑍋𑌦𑍍𑌭𑌾𑌤𑍋 𑌹𑌰𑌿𑌸𑍍𑌸𑌪𑍍𑌤𑌾𑌬𑍍𑌧𑌿𑌭𑍇𑌦𑌨𑌃 ।
𑌆𑌤𑍍𑌮𑌪𑍍𑌰𑌕𑌾𑌶𑌃 𑌪𑍂𑌰𑍍𑌣𑌶𑍍𑌰𑍀𑌰𑌾𑌦𑌿𑌨𑌾𑌰𑌾𑌯𑌣𑍇𑌕𑍍𑌷𑌿𑌤𑌃 ॥ 151 ॥

𑌵𑌿𑌪𑍍𑌰𑌪𑍁𑌤𑍍𑌰𑌪𑍍𑌰𑌦𑌶𑍍𑌚𑍈𑌵 𑌸𑌰𑍍𑌵𑌮𑌾𑌤𑍃𑌸𑍁𑌤𑌪𑍍𑌰𑌦𑌃 ।
𑌪𑌾𑌰𑍍𑌥𑌵𑌿𑌸𑍍𑌮𑌯𑌕𑍃𑌤𑍍𑌪𑌾𑌰𑍍𑌥𑌪𑍍𑌰𑌣𑌵𑌾𑌰𑍍𑌥𑌪𑍍𑌰𑌬𑍋𑌧𑌨𑌃 ॥ 152 ॥

𑌕𑍈𑌲𑌾𑌸𑌯𑌾𑌤𑍍𑌰𑌾𑌸𑍁𑌮𑍁𑌖𑍋 𑌬𑌦𑌰𑍍𑌯𑌾𑌶𑍍𑌰𑌮𑌭𑍂𑌷𑌣𑌃 ।
𑌘𑌂𑌟𑌾𑌕𑌰𑍍𑌣𑌕𑍍𑌰𑌿𑌯𑌾𑌮𑍌𑌢𑍍𑌯𑌾𑌤𑍍𑌤𑍋𑌷𑌿𑌤𑍋 𑌭𑌕𑍍𑌤𑌵𑌤𑍍𑌸𑌲𑌃 ॥ 153 ॥

𑌮𑍁𑌨𑌿𑌬𑍃𑌂𑌦𑌾𑌦𑌿𑌭𑌿𑌰𑍍𑌧𑍍𑌯𑍇𑌯𑍋 𑌘𑌂𑌟𑌾𑌕𑌰𑍍𑌣𑌵𑌰𑌪𑍍𑌰𑌦𑌃 ।
𑌤𑌪𑌶𑍍𑌚𑌰𑍍𑌯𑌾𑌪𑌰𑌶𑍍𑌚𑍀𑌰𑌵𑌾𑌸𑌾𑌃 𑌪𑌿𑌂𑌗𑌜𑌟𑌾𑌧𑌰𑌃 ॥ 154 ॥

𑌪𑍍𑌰𑌤𑍍𑌯𑌕𑍍𑌷𑍀𑌕𑍃𑌤𑌭𑍂𑌤𑍇𑌶𑌶𑍍𑌶𑌿𑌵𑌸𑍍𑌤𑍋𑌤𑌾 𑌶𑌿𑌵𑌸𑍍𑌤𑍁𑌤𑌃 ।
𑌕𑍃𑌷𑍍𑌣𑌾𑌸𑍍𑌵𑌯𑌂𑌵𑌰𑌾𑌲𑍋𑌕𑌕𑍌𑌤𑍁𑌕𑍀 𑌸𑌰𑍍𑌵𑌸𑌮𑍍𑌮𑌤𑌃 ॥ 155 ॥

𑌬𑌲𑌸𑌂𑌰𑌂𑌭𑌶𑌮𑌨𑍋 𑌬𑌲𑌦𑌰𑍍𑌶𑌿𑌤𑌪𑌾𑌂𑌡𑌵𑌃 ।
𑌯𑌤𑌿𑌵𑍇𑌷𑌾𑌰𑍍𑌜𑍁𑌨𑌾𑌭𑍀𑌷𑍍𑌟𑌦𑌾𑌯𑍀 𑌸𑌰𑍍𑌵𑌾𑌤𑍍𑌮𑌗𑍋𑌚𑌰𑌃 ॥ 156 ॥

𑌸𑍁𑌭𑌦𑍍𑌰𑌾𑌫𑌾𑌲𑍍𑌗𑍁𑌨𑍋𑌦𑍍𑌵𑌾𑌹𑌕𑌰𑍍𑌤𑌾 𑌪𑍍𑌰𑍀𑌣𑌿𑌤𑌫𑌾𑌲𑍍𑌗𑍁𑌨𑌃 ।
𑌖𑌾𑌂𑌡𑌵𑌪𑍍𑌰𑍀𑌣𑌿𑌤𑌾𑌰𑍍𑌚𑌿𑌷𑍍𑌮𑌾𑌨𑍍𑌮𑌯𑌦𑌾𑌨𑌵𑌮𑍋𑌚𑌨𑌃 ॥ 15𑍭 ॥

𑌸𑍁𑌲𑌭𑍋 𑌰𑌾𑌜𑌸𑍂𑌯𑌾𑌰𑍍𑌹𑌯𑍁𑌧𑌿𑌷𑍍𑌠𑌿𑌰𑌨𑌿𑌯𑍋𑌜𑌕𑌃 ।
𑌭𑍀𑌮𑌾𑌰𑍍𑌦𑌿𑌤𑌜𑌰𑌾𑌸𑌂𑌧𑍋 𑌮𑌾𑌗𑌧𑌾𑌤𑍍𑌮𑌜𑌰𑌾𑌜𑍍𑌯𑌦𑌃 ॥ 15𑍮 ॥

𑌰𑌾𑌜𑌬𑌂𑌧𑌨𑌨𑌿𑌰𑍍𑌮𑍋𑌕𑍍𑌤𑌾 𑌰𑌾𑌜𑌸𑍂𑌯𑌾𑌗𑍍𑌰𑌪𑍂𑌜𑌨𑌃 ।
𑌚𑍈𑌦𑍍𑌯𑌾𑌦𑍍𑌯𑌸𑌹𑌨𑍋 𑌭𑍀𑌷𑍍𑌮𑌸𑍍𑌤𑍁𑌤𑌸𑍍𑌸𑌾𑌤𑍍𑌵𑌤𑌪𑍂𑌰𑍍𑌵𑌜𑌃 ॥ 15𑍯 ॥

𑌸𑌰𑍍𑌵𑌾𑌤𑍍𑌮𑌾𑌰𑍍𑌥𑌸𑌮𑌾𑌹𑌰𑍍𑌤𑌾 𑌮𑌂𑌦𑌰𑌾𑌚𑌲𑌧𑌾𑌰𑌕𑌃 ।
𑌯𑌜𑍍𑌞𑌾𑌵𑌤𑌾𑌰𑌃 𑌪𑍍𑌰𑌹𑍍𑌲𑌾𑌦𑌪𑍍𑌰𑌤𑌿𑌜𑍍𑌞𑌾𑌪𑍍𑌰𑌤𑌿𑌪𑌾𑌲𑌕𑌃 ॥ 160 ॥

𑌬𑌲𑌿𑌯𑌜𑍍𑌞𑌸𑌭𑌾𑌧𑍍𑌵𑌂𑌸𑍀 𑌦𑍃𑌪𑍍𑌤𑌕𑍍𑌷𑌤𑍍𑌰𑌕𑍁𑌲𑌾𑌂𑌤𑌕𑌃 ।
𑌦𑌶𑌗𑍍𑌰𑍀𑌵𑌾𑌂𑌤𑌕𑍋 𑌜𑍇𑌤𑌾 𑌰𑍇𑌵𑌤𑍀𑌪𑍍𑌰𑍇𑌮𑌵𑌲𑍍𑌲𑌭𑌃 ॥ 161 ॥

𑌸𑌰𑍍𑌵𑌾𑌵𑌤𑌾𑌰𑌾𑌧𑌿𑌷𑍍𑌠𑌾𑌤𑌾 𑌵𑍇𑌦𑌬𑌾𑌹𑍍𑌯𑌵𑌿𑌮𑍋𑌹𑌨𑌃 ।
𑌕𑌲𑌿𑌦𑍋𑌷𑌨𑌿𑌰𑌾𑌕𑌰𑍍𑌤𑌾 𑌦𑌶𑌨𑌾𑌮𑌾 𑌦𑍃𑌢𑌵𑍍𑌰𑌤𑌃 ॥ 162 ॥

𑌅𑌮𑍇𑌯𑌾𑌤𑍍𑌮𑌾 𑌜𑌗𑌤𑍍𑌸𑍍𑌵𑌾𑌮𑍀 𑌵𑌾𑌗𑍍𑌮𑍀 𑌚𑍈𑌦𑍍𑌯𑌶𑌿𑌰𑍋𑌹𑌰𑌃 ।
𑌦𑍍𑌰𑍌𑌪𑌦𑍀𑌰𑌚𑌿𑌤𑌸𑍍𑌤𑍋𑌤𑍍𑌰𑌃 𑌕𑍇𑌶𑌵𑌃 𑌪𑍁𑌰𑍁𑌷𑍋𑌤𑍍𑌤𑌮𑌃 ॥ 163 ॥

𑌨𑌾𑌰𑌾𑌯𑌣𑍋 𑌮𑌧𑍁𑌪𑌤𑌿𑌰𑍍𑌮𑌾𑌧𑌵𑍋 𑌦𑍋𑌷𑌵𑌰𑍍𑌜𑌿𑌤𑌃 ।
𑌗𑍋𑌵𑌿𑌂𑌦𑌃 𑌪𑍁𑌂𑌡𑌰𑍀𑌕𑌾𑌕𑍍𑌷𑍋 𑌵𑌿𑌷𑍍𑌣𑍁𑌶𑍍𑌚 𑌮𑌧𑍁𑌸𑍂𑌦𑌨𑌃 ॥ 164 ॥

𑌤𑍍𑌰𑌿𑌵𑌿𑌕𑍍𑌰𑌮𑌸𑍍𑌤𑍍𑌰𑌿𑌲𑍋𑌕𑍇𑌶𑍋 𑌵𑌾𑌮𑌨𑌃 𑌶𑍍𑌰𑍀𑌧𑌰𑌃 𑌪𑍁𑌮𑌾𑌨𑍍 ।
𑌹𑍃𑌷𑍀𑌕𑍇𑌶𑍋 𑌵𑌾𑌸𑍁𑌦𑍇𑌵𑌃 𑌪𑌦𑍍𑌮𑌨𑌾𑌭𑍋 𑌮𑌹𑌾𑌹𑍍𑌰𑌦𑌃 ॥ 165 ॥

𑌦𑌾𑌮𑍋𑌦𑌰𑌶𑍍𑌚𑌤𑍁𑌰𑍍𑌵𑍍𑌯𑍂𑌹𑌃 𑌪𑌾𑌂𑌚𑌾𑌲𑍀𑌮𑌾𑌨𑌰𑌕𑍍𑌷𑌣𑌃 ।
𑌸𑌾𑌲𑍍𑌵𑌘𑍍𑌨𑌸𑍍𑌸𑌮𑌰𑌶𑍍𑌲𑌾𑌘𑍀 𑌦𑌂𑌤𑌵𑌕𑍍𑌤𑍍𑌰𑌨𑌿𑌬𑌰𑍍𑌹𑌣𑌃 ॥ 166 ॥

𑌦𑌾𑌮𑍋𑌦𑌰𑌪𑍍𑌰𑌿𑌯𑌸𑌖𑌾 𑌪𑍃𑌥𑍁𑌕𑌾𑌸𑍍𑌵𑌾𑌦𑌨𑌪𑍍𑌰𑌿𑌯𑌃 ॥

𑌘𑍃𑌣𑍀 𑌦𑌾𑌮𑍋𑌦𑌰𑌃 𑌶𑍍𑌰𑍀𑌦𑍋 𑌗𑍋𑌪𑍀𑌪𑍁𑌨𑌰𑌵𑍇𑌕𑍍𑌷𑌕𑌃 ॥ 16𑍭 ॥

𑌗𑍋𑌪𑌿𑌕𑌾𑌮𑍁𑌕𑍍𑌤𑌿𑌦𑍋 𑌯𑍋𑌗𑍀 𑌦𑍁𑌰𑍍𑌵𑌾𑌸𑌸𑍍𑌤𑍃𑌪𑍍𑌤𑌿𑌕𑌾𑌰𑌕𑌃 ।
𑌅𑌵𑌿𑌜𑍍𑌞𑌾𑌤𑌵𑍍𑌰𑌜𑌾𑌕𑍀𑌰𑍍𑌣𑌪𑌾𑌂𑌡𑌵𑌾𑌲𑍋𑌕𑌨𑍋 𑌜𑌯𑍀 ॥ 16𑍮 ॥

𑌪𑌾𑌰𑍍𑌥𑌸𑌾𑌰𑌥𑍍𑌯𑌨𑌿𑌰𑌤𑌃 𑌪𑍍𑌰𑌾𑌜𑍍𑌞𑌃 𑌪𑌾𑌂𑌡𑌵𑌦𑍂𑌤𑍍𑌯𑌕𑍃𑌤𑍍 ।
𑌵𑌿𑌦𑍁𑌰𑌾𑌤𑌿𑌥𑍍𑌯𑌸𑌂𑌤𑍁𑌷𑍍𑌟𑌃 𑌕𑍁𑌂𑌤𑍀𑌸𑌂𑌤𑍋𑌷𑌦𑌾𑌯𑌕𑌃 ॥ 16𑍯 ॥

𑌸𑍁𑌯𑍋𑌧𑌨𑌤𑌿𑌰𑌸𑍍𑌕𑌰𑍍𑌤𑌾 𑌦𑍁𑌰𑍍𑌯𑍋𑌧𑌨𑌵𑌿𑌕𑌾𑌰𑌵𑌿𑌤𑍍 ।
𑌵𑌿𑌦𑍁𑌰𑌾𑌭𑌿𑌷𑍍𑌠𑍁𑌤𑍋 𑌨𑌿𑌤𑍍𑌯𑍋 𑌵𑌾𑌰𑍍𑌷𑍍𑌣𑍇𑌯𑍋 𑌮𑌂𑌗𑌲𑌾𑌤𑍍𑌮𑌕𑌃 ॥ 1𑍭0 ॥

𑌪𑌂𑌚𑌵𑌿𑌂𑌶𑌤𑌿𑌤𑌤𑍍𑌤𑍍𑌵𑍇𑌶𑌶𑍍𑌚𑌤𑍁𑌰𑍍𑌵𑌿𑌂𑌶𑌤𑌿𑌦𑍇𑌹𑌭𑌾𑌕𑍍 ।
𑌸𑌰𑍍𑌵𑌾𑌨𑍁𑌗𑍍𑌰𑌾𑌹𑌕𑌸𑍍𑌸𑌰𑍍𑌵𑌦𑌾𑌶𑌾𑌰𑍍𑌹𑌸𑌤𑌤𑌾𑌰𑍍𑌚𑌿𑌤𑌃 ॥ 1𑍭1 ॥

𑌅𑌚𑌿𑌂𑌤𑍍𑌯𑍋 𑌮𑌧𑍁𑌰𑌾𑌲𑌾𑌪𑌸𑍍𑌸𑌾𑌧𑍁𑌦𑌰𑍍𑌶𑍀 𑌦𑍁𑌰𑌾𑌸𑌦𑌃 ।
𑌮𑌨𑍁𑌷𑍍𑌯𑌧𑌰𑍍𑌮𑌾𑌨𑍁𑌗𑌤𑌃 𑌕𑍌𑌰𑌵𑍇𑌂𑌦𑍍𑌰𑌕𑍍𑌷𑌯𑍇𑌕𑍍𑌷𑌿𑌤𑌾 ॥ 1𑍭2 ॥

𑌉𑌪𑍇𑌂𑌦𑍍𑌰𑍋 𑌦𑌾𑌨𑌵𑌾𑌰𑌾𑌤𑌿𑌰𑍁𑌰𑍁𑌗𑍀𑌤𑍋 𑌮𑌹𑌾𑌦𑍍𑌯𑍁𑌤𑌿𑌃 ।
𑌬𑍍𑌰𑌹𑍍𑌮𑌣𑍍𑌯𑌦𑍇𑌵𑌃 𑌶𑍍𑌰𑍁𑌤𑌿𑌮𑌾𑌨𑍍 𑌗𑍋𑌬𑍍𑌰𑌾𑌹𑍍𑌮𑌣𑌹𑌿𑌤𑌾𑌶𑌯𑌃 ॥ 1𑍭3 ॥

𑌵𑌰𑌶𑍀𑌲𑌶𑍍𑌶𑌿𑌵𑌾𑌰𑌂𑌭𑌸𑍍𑌸𑍁𑌵𑌿𑌜𑍍𑌞𑌾𑌨𑌵𑌿𑌮𑍂𑌰𑍍𑌤𑌿𑌮𑌾𑌨𑍍 ।
𑌸𑍍𑌵𑌭𑌾𑌵𑌶𑍁𑌦𑍍𑌧𑌸𑍍𑌸𑌨𑍍𑌮𑌿𑌤𑍍𑌰𑌸𑍍𑌸𑍁𑌶𑌰𑌣𑍍𑌯𑌸𑍍𑌸𑍁𑌲𑌕𑍍𑌷𑌣𑌃 ॥ 1𑍭4 ॥

𑌧𑍃𑌤𑌰𑌾𑌷𑍍𑌟𑍍𑌰𑌗𑌤𑍌𑌦𑍃𑌷𑍍𑌟𑌿𑌪𑍍𑌰𑌦𑌃 𑌕𑌰𑍍𑌣𑌵𑌿𑌭𑍇𑌦𑌨𑌃 ।
𑌪𑍍𑌰𑌤𑍋𑌦𑌧𑍃𑌗𑍍𑌵𑌿𑌶𑍍𑌵𑌰𑍂𑌪𑌵𑌿𑌸𑍍𑌮𑌾𑌰𑌿𑌤𑌧𑌨𑌂𑌜𑌯𑌃 ॥ 1𑍭5 ॥

𑌸𑌾𑌮𑌗𑌾𑌨𑌪𑍍𑌰𑌿𑌯𑍋 𑌧𑌰𑍍𑌮𑌧𑍇𑌨𑍁𑌰𑍍𑌵𑌰𑍍𑌣𑍋𑌤𑍍𑌤𑌮𑍋𑌽𑌵𑍍𑌯𑌯𑌃 ।
𑌚𑌤𑍁𑌰𑍍𑌯𑍁𑌗𑌕𑍍𑌰𑌿𑌯𑌾𑌕𑌰𑍍𑌤𑌾 𑌵𑌿𑌶𑍍𑌵𑌰𑍂𑌪𑌪𑍍𑌰𑌦𑌰𑍍𑌶𑌕𑌃 ॥ 1𑍭6 ॥

𑌬𑍍𑌰𑌹𑍍𑌮𑌬𑍋𑌧𑌪𑌰𑌿𑌤𑍍𑌰𑌾𑌤𑌪𑌾𑌰𑍍𑌥𑍋 𑌭𑍀𑌷𑍍𑌮𑌾𑌰𑍍𑌥𑌚𑌕𑍍𑌰𑌭𑍃𑌤𑍍 ।
𑌅𑌰𑍍𑌜𑍁𑌨𑌾𑌯𑌾𑌸𑌵𑌿𑌧𑍍𑌵𑌂𑌸𑍀 𑌕𑌾𑌲𑌦𑌂𑌷𑍍𑌟𑍍𑌰𑌾𑌵𑌿𑌭𑍂𑌷𑌣𑌃 ॥ 1𑍭𑍭 ॥

𑌸𑍁𑌜𑌾𑌤𑌾𑌨𑌂𑌤𑌮𑌹𑌿𑌮𑌾 𑌸𑍍𑌵𑌪𑍍𑌨𑌵𑍍𑌯𑌾𑌪𑌾𑌰𑌿𑌤𑌾𑌰𑍍𑌜𑍁𑌨𑌃 ।
𑌅𑌕𑌾𑌲𑌸𑌂𑌧𑍍𑌯𑌾𑌘𑌟𑌨𑌶𑍍𑌚𑌕𑍍𑌰𑌾𑌂𑌤𑌰𑌿𑌤𑌭𑌾𑌸𑍍𑌕𑌰𑌃 ॥ 1𑍭𑍮 ॥

𑌦𑍁𑌷𑍍𑌟𑌪𑍍𑌰𑌮𑌥𑌨𑌃 𑌪𑌾𑌰𑍍𑌥𑌪𑍍𑌰𑌤𑌿𑌜𑍍𑌞𑌾𑌪𑌰𑌿𑌪𑌾𑌲𑌕𑌃 ।
𑌸𑌿𑌂𑌧𑍁𑌰𑌾𑌜𑌶𑌿𑌰𑌃𑌪𑌾𑌤𑌸𑍍𑌥𑌾𑌨𑌵𑌕𑍍𑌤𑌾 𑌵𑌿𑌵𑍇𑌕𑌦𑍃𑌕𑍍 ॥ 1𑍭𑍯 ॥

𑌸𑍁𑌭𑌦𑍍𑌰𑌾𑌶𑍋𑌕𑌹𑌰𑌣𑍋 𑌦𑍍𑌰𑍋𑌣𑍋𑌤𑍍𑌸𑍇𑌕𑌾𑌦𑌿𑌵𑌿𑌸𑍍𑌮𑌿𑌤𑌃 ।
𑌪𑌾𑌰𑍍𑌥𑌮𑌨𑍍𑌯𑍁𑌨𑌿𑌰𑌾𑌕𑌰𑍍𑌤𑌾 𑌪𑌾𑌂𑌡𑌵𑍋𑌤𑍍𑌸𑌵𑌦𑌾𑌯𑌕𑌃 ॥ 1𑍮0 ॥

𑌅𑌂𑌗𑍁𑌷𑍍𑌠𑌾𑌕𑍍𑌰𑌾𑌂𑌤𑌕𑍌𑌂𑌤𑍇𑌯𑌰𑌥𑌶𑍍𑌶𑌕𑍍𑌤𑍋𑌽𑌹𑌿𑌶𑍀𑌰𑍍𑌷𑌜𑌿𑌤𑍍 ।
𑌕𑌾𑌲𑌕𑍋𑌪𑌪𑍍𑌰𑌶𑌮𑌨𑍋 𑌭𑍀𑌮𑌸𑍇𑌨𑌜𑌯𑌪𑍍𑌰𑌦𑌃 ॥ 1𑍮1 ॥

𑌅𑌶𑍍𑌵𑌤𑍍𑌥𑌾𑌮𑌵𑌧𑌾𑌯𑌾𑌸𑌤𑍍𑌰𑌾𑌤𑌪𑌾𑌂𑌡𑍁𑌸𑍁𑌤𑌃 𑌕𑍃𑌤𑍀 ।
𑌇𑌷𑍀𑌕𑌾𑌸𑍍𑌤𑍍𑌰𑌪𑍍𑌰𑌶𑌮𑌨𑍋 𑌦𑍍𑌰𑍌𑌣𑌿𑌰𑌕𑍍𑌷𑌾𑌵𑌿𑌚𑌕𑍍𑌷𑌣𑌃 ॥ 1𑍮2 ॥

𑌪𑌾𑌰𑍍𑌥𑌾𑌪𑌹𑌾𑌰𑌿𑌤𑌦𑍍𑌰𑍌𑌣𑌿𑌚𑍂𑌡𑌾𑌮𑌣𑌿𑌰𑌭𑌂𑌗𑍁𑌰𑌃 ।
𑌧𑍃𑌤𑌰𑌾𑌷𑍍𑌟𑍍𑌰𑌪𑌰𑌾𑌮𑍃𑌷𑍍𑌟𑌭𑍀𑌮𑌪𑍍𑌰𑌤𑌿𑌕𑍃𑌤𑌿𑌸𑍍𑌮𑌯𑌃 ॥ 1𑍮3 ॥

𑌭𑍀𑌷𑍍𑌮𑌬𑍁𑌦𑍍𑌧𑌿𑌪𑍍𑌰𑌦𑌶𑍍𑌶𑌾𑌂𑌤𑌶𑍍𑌶𑌰𑌚𑍍𑌚𑌂𑌦𑍍𑌰𑌨𑌿𑌭𑌾𑌨𑌨𑌃 ।
𑌗𑌦𑌾𑌗𑍍𑌰𑌜𑌨𑍍𑌮𑌾 𑌪𑌾𑌂𑌚𑌾𑌲𑍀𑌪𑍍𑌰𑌤𑌿𑌜𑍍𑌞𑌾𑌪𑌰𑌿𑌪𑌾𑌲𑌕𑌃 ॥ 1𑍮4 ॥

𑌗𑌾𑌂𑌧𑌾𑌰𑍀𑌕𑍋𑌪𑌦𑍃𑌗𑍍𑌗𑍁𑌪𑍍𑌤𑌧𑌰𑍍𑌮𑌸𑍂𑌨𑍁𑌰𑌨𑌾𑌮𑌯𑌃 ।
𑌪𑍍𑌰𑌪𑌨𑍍𑌨𑌾𑌰𑍍𑌤𑌿𑌭𑌯𑌚𑍍𑌛𑍇𑌤𑍍𑌤𑌾 𑌭𑍀𑌷𑍍𑌮𑌶𑌲𑍍𑌯𑌵𑍍𑌯𑌧𑌾𑌵𑌹𑌃 ॥ 1𑍮5 ॥

𑌶𑌾𑌂𑌤𑌶𑍍𑌶𑌾𑌂𑌤𑌨𑌵𑍋𑌦𑍀𑌰𑍍𑌣𑌸𑌰𑍍𑌵𑌧𑌰𑍍𑌮𑌸𑌮𑌾𑌹𑌿𑌤𑌃 ।
𑌸𑍍𑌮𑌾𑌰𑌿𑌤𑌬𑍍𑌰𑌹𑍍𑌮𑌵𑌿𑌦𑍍𑌯𑌾𑌰𑍍𑌥𑌪𑍍𑌰𑍀𑌤𑌪𑌾𑌰𑍍𑌥𑍋 𑌮𑌹𑌾𑌸𑍍𑌤𑍍𑌰𑌵𑌿𑌤𑍍 ॥ 1𑍮6 ॥

𑌪𑍍𑌰𑌸𑌾𑌦𑌪𑌰𑌮𑍋𑌦𑌾𑌰𑍋 𑌗𑌾𑌂𑌗𑍇𑌯𑌸𑍁𑌗𑌤𑌿𑌪𑍍𑌰𑌦𑌃 ।
𑌵𑌿𑌪𑌕𑍍𑌷𑌪𑌕𑍍𑌷𑌕𑍍𑌷𑌯𑌕𑍃𑌤𑍍𑌪𑌰𑍀𑌕𑍍𑌷𑌿𑌤𑍍𑌪𑍍𑌰𑌾𑌣𑌰𑌕𑍍𑌷𑌣𑌃 ॥ 1𑍮𑍭 ॥

𑌜𑌗𑌦𑍍𑌗𑍁𑌰𑍁𑌰𑍍𑌧𑌰𑍍𑌮𑌸𑍂𑌨𑍋𑌰𑍍𑌵𑌾𑌜𑌿𑌮𑍇𑌧𑌪𑍍𑌰𑌵𑌰𑍍𑌤𑌕𑌃 ।
𑌵𑌿𑌹𑌿𑌤𑌾𑌰𑍍𑌥𑌾𑌪𑍍𑌤𑌸𑌤𑍍𑌕𑌾𑌰𑍋 𑌮𑌾𑌸𑌕𑌾𑌤𑍍𑌪𑌰𑌿𑌵𑌰𑍍𑌤𑌦𑌃 ॥ 1𑍮𑍮 ॥

𑌉𑌤𑍍𑌤𑌂𑌕𑌹𑌰𑍍𑌷𑌦𑌾𑌤𑍍𑌮𑍀𑌯𑌦𑌿𑌵𑍍𑌯𑌰𑍂𑌪𑌪𑍍𑌰𑌦𑌰𑍍𑌶𑌕𑌃 ।
𑌜𑌨𑌕𑌾𑌵𑌗𑌤𑌸𑍍𑌵𑍋𑌕𑍍𑌤𑌭𑌾𑌰𑌤𑌸𑍍𑌸𑌰𑍍𑌵𑌭𑌾𑌵𑌨𑌃 ॥ 1𑍮𑍯 ॥

𑌅𑌸𑍋𑌢𑌯𑌾𑌦𑌵𑍋𑌦𑍍𑌰𑍇𑌕𑍋 𑌵𑌿𑌹𑌿𑌤𑌾𑌪𑍍𑌤𑌾𑌦𑌿𑌪𑍂𑌜𑌨𑌃 ॥

𑌸𑌮𑍁𑌦𑍍𑌰𑌸𑍍𑌥𑌾𑌪𑌿𑌤𑌾𑌶𑍍𑌚𑌰𑍍𑌯𑌮𑍁𑌸𑌲𑍋 𑌵𑍃𑌷𑍍𑌣𑌿𑌵𑌾𑌹𑌕𑌃 ॥ 1𑍯0 ॥

𑌮𑍁𑌨𑌿𑌶𑌾𑌪𑌾𑌯𑍁𑌧𑌃 𑌪𑌦𑍍𑌮𑌾𑌸𑌨𑌾𑌦𑌿𑌤𑍍𑌰𑌿𑌦𑌶𑌾𑌰𑍍𑌥𑌿𑌤𑌃 ।
𑌵𑍃𑌷𑍍𑌟𑌿𑌪𑍍𑌰𑌤𑍍𑌯𑌵𑌹𑌾𑌰𑍋𑌤𑍍𑌕𑌸𑍍𑌸𑍍𑌵𑌧𑌾𑌮𑌗𑌮𑌨𑍋𑌤𑍍𑌸𑍁𑌕𑌃 ॥ 1𑍯1 ॥

𑌪𑍍𑌰𑌭𑌾𑌸𑌾𑌲𑍋𑌕𑌨𑍋𑌦𑍍𑌯𑍁𑌕𑍍𑌤𑍋 𑌨𑌾𑌨𑌾𑌵𑌿𑌧𑌨𑌿𑌮𑌿𑌤𑍍𑌤𑌕𑍃𑌤𑍍 ।
𑌸𑌰𑍍𑌵𑌯𑌾𑌦𑌵𑌸𑌂𑌸𑍇𑌵𑍍𑌯𑌸𑍍𑌸𑌰𑍍𑌵𑍋𑌤𑍍𑌕𑍃𑌷𑍍𑌟𑌪𑌰𑌿𑌚𑍍𑌛𑌦𑌃 ॥ 1𑍯2 ॥

𑌵𑍇𑌲𑌾𑌕𑌾𑌨𑌨𑌸𑌂𑌚𑌾𑌰𑍀 𑌵𑍇𑌲𑌾𑌨𑌿𑌲𑌹𑍃𑌤𑌶𑍍𑌰𑌮𑌃 ।
𑌕𑌾𑌲𑌾𑌤𑍍𑌮𑌾 𑌯𑌾𑌦𑌵𑍋𑌽𑌨𑌂𑌤𑌸𑍍𑌸𑍍𑌤𑍁𑌤𑌿𑌸𑌂𑌤𑍁𑌷𑍍𑌟𑌮𑌾𑌨𑌸𑌃 ॥ 1𑍯3 ॥

𑌦𑍍𑌵𑌿𑌜𑌾𑌲𑍋𑌕𑌨𑌸𑌂𑌤𑍁𑌷𑍍𑌟𑌃 𑌪𑍁𑌣𑍍𑌯𑌤𑍀𑌰𑍍𑌥𑌮𑌹𑍋𑌤𑍍𑌸𑌵𑌃 ।
𑌸𑌤𑍍𑌕𑌾𑌰𑌾𑌹𑍍𑌲𑌾𑌦𑌿𑌤𑌾𑌶𑍇𑌷𑌭𑍂𑌸𑍁𑌰𑌸𑍍𑌸𑍁𑌰𑌵𑌲𑍍𑌲𑌭𑌃 ॥ 1𑍯4 ॥

𑌪𑍁𑌣𑍍𑌯𑌤𑍀𑌰𑍍𑌥𑌾𑌪𑍍𑌲𑍁𑌤𑌃 𑌪𑍁𑌣𑍍𑌯𑌃 𑌪𑍁𑌣𑍍𑌯𑌦𑌸𑍍𑌤𑍀𑌰𑍍𑌥𑌪𑌾𑌵𑌨𑌃 ।
𑌵𑌿𑌪𑍍𑌰𑌸𑌾𑌤𑍍𑌕𑍃𑌤𑌗𑍋𑌕𑍋𑌟𑌿𑌶𑍍𑌶𑌤𑌕𑍋𑌟𑌿𑌸𑍁𑌵𑌰𑍍𑌣𑌦𑌃 ॥ 1𑍯5 ॥

𑌸𑍍𑌵𑌮𑌾𑌯𑌾𑌮𑍋𑌹𑌿𑌤𑌾𑌽𑌶𑍇𑌷𑌵𑍃𑌷𑍍𑌣𑌿𑌵𑍀𑌰𑍋 𑌵𑌿𑌶𑍇𑌷𑌵𑌿𑌤𑍍 ।
𑌜𑌲𑌜𑌾𑌯𑍁𑌧𑌨𑌿𑌰𑍍𑌦𑍇𑌷𑍍𑌟𑌾 𑌸𑍍𑌵𑌾𑌤𑍍𑌮𑌾𑌵𑍇𑌶𑌿𑌤𑌯𑌾𑌦𑌵𑌃 ॥ 1𑍯6 ॥

𑌦𑍇𑌵𑌤𑌾𑌭𑍀𑌷𑍍𑌟𑌵𑌰𑌦𑌃 𑌕𑍃𑌤𑌕𑍃𑌤𑍍𑌯𑌃 𑌪𑍍𑌰𑌸𑌨𑍍𑌨𑌧𑍀𑌃 ।
𑌸𑍍𑌥𑌿𑌰𑌶𑍇𑌷𑌾𑌯𑍁𑌤𑌬𑌲𑌸𑍍𑌸𑌹𑌸𑍍𑌰𑌫𑌣𑌿𑌵𑍀𑌕𑍍𑌷𑌣𑌃 ॥ 1𑍯𑍭 ॥

𑌬𑍍𑌰𑌹𑍍𑌮𑌵𑍃𑌕𑍍𑌷𑌵𑌰𑌚𑍍𑌛𑌾𑌯𑌾𑌸𑍀𑌨𑌃 𑌪𑌦𑍍𑌮𑌾𑌸𑌨𑌸𑍍𑌥𑌿𑌤𑌃 ।
𑌪𑍍𑌰𑌤𑍍𑌯𑌗𑌾𑌤𑍍𑌮𑌾 𑌸𑍍𑌵𑌭𑌾𑌵𑌾𑌰𑍍𑌥𑌃 𑌪𑍍𑌰𑌣𑌿𑌧𑌾𑌨𑌪𑌰𑌾𑌯𑌣𑌃 ॥ 1𑍯𑍮 ॥

𑌵𑍍𑌯𑌾𑌧𑍇𑌷𑍁𑌵𑌿𑌦𑍍𑌧𑌪𑍂𑌜𑍍𑌯𑌾𑌂𑌘𑍍𑌰𑌿𑌰𑍍𑌨𑌿𑌷𑌾𑌦𑌭𑌯𑌮𑍋𑌚𑌨𑌃 ।
𑌪𑍁𑌲𑌿𑌂𑌦𑌸𑍍𑌤𑍁𑌤𑌿𑌸𑌂𑌤𑍁𑌷𑍍𑌟𑌃 𑌪𑍁𑌲𑌿𑌂𑌦𑌸𑍁𑌗𑌤𑌿𑌪𑍍𑌰𑌦𑌃 ॥ 1𑍯𑍯 ॥

𑌦𑌾𑌰𑍁𑌕𑌾𑌰𑍍𑌪𑌿𑌤𑌪𑌾𑌰𑍍𑌥𑌾𑌦𑌿𑌕𑌰𑌣𑍀𑌯𑍋𑌕𑍍𑌤𑌿𑌰𑍀𑌶𑌿𑌤𑌾 ।
𑌦𑌿𑌵𑍍𑌯𑌦𑍁𑌂𑌦𑍁𑌭𑌿𑌸𑌂𑌯𑍁𑌕𑍍𑌤𑌃 𑌪𑍁𑌷𑍍𑌪𑌵𑍃𑌷𑍍𑌟𑌿𑌪𑍍𑌰𑌪𑍂𑌜𑌿𑌤𑌃 ॥ 200 ॥

𑌪𑍁𑌰𑌾𑌣𑌃 𑌪𑌰𑌮𑍇𑌶𑌾𑌨𑌃 𑌪𑍂𑌰𑍍𑌣𑌭𑍂𑌮𑌾 𑌪𑌰𑌿𑌷𑍍𑌟𑍁𑌤𑌃 ।
𑌪𑌤𑌿𑌰𑌾𑌦𑍍𑌯𑌃 𑌪𑌰𑌂 𑌬𑍍𑌰𑌹𑍍𑌮 𑌪𑌰𑌮𑌾𑌤𑍍𑌮𑌾 𑌪𑌰𑌾𑌤𑍍𑌪𑌰𑌃 ॥ 201 ॥

𑌶𑍍𑌰𑍀𑌪𑌰𑌮𑌾𑌤𑍍𑌮𑌾 𑌪𑌰𑌾𑌤𑍍𑌪𑌰𑌃 𑌓𑌂 𑌨𑌮𑌃 𑌇𑌤𑌿 ।
𑌫𑌲𑌶𑍍𑌰𑍁𑌤𑌿𑌃 –
𑌇𑌦𑌂 𑌸𑌹𑌸𑍍𑌰𑌂 𑌕𑍃𑌷𑍍𑌣𑌸𑍍𑌯 𑌨𑌾𑌮𑍍𑌨𑌾𑌂 𑌸𑌰𑍍𑌵𑌾𑌰𑍍𑌥𑌦𑌾𑌯𑌕𑌮𑍍 ।
𑌅𑌨𑌂𑌤𑌰𑍂𑌪𑍀 𑌭𑌗𑌵𑌾𑌨𑍍 𑌵𑍍𑌯𑌾𑌖𑍍𑌯𑌾𑌤𑌾𑌦𑍌 𑌸𑍍𑌵𑌯𑌂𑌭𑍁𑌵𑍇 ॥ 202 ॥

𑌤𑍇𑌨 𑌪𑍍𑌰𑍋𑌕𑍍𑌤𑌂 𑌵𑌸𑌿𑌷𑍍𑌠𑌾𑌯 𑌤𑌤𑍋 𑌲𑌬𑍍𑌧𑍍𑌵𑌾 𑌪𑌰𑌾𑌶𑌰𑌃 ।
𑌵𑍍𑌯𑌾𑌸𑌾𑌯 𑌤𑍇𑌨 𑌸𑌂𑌪𑍍𑌰𑍋𑌕𑍍𑌤𑌂 𑌶𑍁𑌕𑍋 𑌵𑍍𑌯𑌾𑌸𑌾𑌦𑌵𑌾𑌪𑍍𑌤𑌵𑌾𑌨𑍍 ॥ 203 ॥

𑌤𑌚𑍍𑌛𑌿𑌷𑍍𑌯𑍈𑌰𑍍𑌬𑌹𑍁𑌭𑌿𑌰𑍍𑌭𑍂𑌮𑍌 𑌖𑍍𑌯𑌾𑌪𑌿𑌤𑌂 𑌦𑍍𑌵𑌾𑌪𑌰𑍇 𑌯𑍁𑌗𑍇 ।
𑌕𑍃𑌷𑍍𑌣𑌾𑌜𑍍𑌞𑌯𑌾 𑌹𑌰𑌿𑌹𑌰𑌃 𑌕𑌲𑍌 𑌪𑍍𑌰𑌖𑍍𑌯𑌾𑌪𑌯𑌦𑍍𑌵𑌿𑌭𑍁𑌃 ॥ 204 ॥

𑌇𑌦𑌂 𑌪𑌠𑌤𑌿 𑌭𑌕𑍍𑌤𑍍𑌯𑌾 𑌯𑌃 𑌶𑍃𑌣𑍋𑌤𑌿 𑌚 𑌸𑌮𑌾𑌹𑌿𑌤𑌃 ।
𑌸𑍍𑌵𑌸𑌿𑌦𑍍𑌧𑍍𑌯𑍈 𑌪𑍍𑌰𑌾𑌰𑍍𑌥𑌯𑌂𑌤𑍍𑌯𑍇𑌨𑌂 𑌤𑍀𑌰𑍍𑌥𑌕𑍍𑌷𑍇𑌤𑍍𑌰𑌾𑌦𑌿𑌦𑍇𑌵𑌤𑌾𑌃 ॥ 205 ॥

𑌪𑍍𑌰𑌾𑌯𑌶𑍍𑌚𑌿𑌤𑍍𑌤𑌾𑌨𑍍𑌯𑌶𑍇𑌷𑌾𑌣𑌿 𑌨𑌾𑌲𑌂 𑌯𑌾𑌨𑌿 𑌵𑍍𑌯𑌪𑍋𑌹𑌿𑌤𑍁𑌮𑍍 ।
𑌤𑌾𑌨𑌿 𑌪𑌾𑌪𑌾𑌨𑌿 𑌨𑌶𑍍𑌯𑌂𑌤𑌿 𑌸𑌕𑍃𑌦𑌸𑍍𑌯 𑌪𑍍𑌰𑌶𑌂𑌸𑌨𑌾𑌤𑍍 ॥ 206 ॥

𑌋𑌣𑌤𑍍𑌰𑌯𑌵𑌿𑌮𑍁𑌕𑍍𑌤𑌸𑍍𑌯 𑌶𑍍𑌰𑍌𑌤𑌸𑍍𑌮𑌾𑌰𑍍𑌤𑌾𑌨𑍁𑌵𑌰𑍍𑌤𑌿𑌨𑌃 ।
𑌋𑌷𑍇𑌸𑍍𑌤𑍍𑌰𑌿𑌮𑍂𑌰𑍍𑌤𑌿𑌰𑍂𑌪𑌸𑍍𑌯 𑌫𑌲𑌂 𑌵𑌿𑌂𑌦𑍇𑌦𑌿𑌦𑌂 𑌪𑌠𑌨𑍍 ॥ 20𑍭 ॥

𑌇𑌦𑌂 𑌨𑌾𑌮𑌸𑌹𑌸𑍍𑌰𑌂 𑌯𑌃 𑌪𑌠𑌤𑍍𑌯𑍇𑌤𑌚𑍍𑌛𑍃𑌣𑍋𑌤𑌿 𑌚 ।
𑌶𑌿𑌵𑌲𑌿𑌂𑌗𑌸𑌹𑌸𑍍𑌰𑌸𑍍𑌯 𑌸 𑌪𑍍𑌰𑌤𑌿𑌷𑍍𑌠𑌾𑌫𑌲𑌂 𑌲𑌭𑍇𑌤𑍍 ॥ 20𑍮 ॥

𑌇𑌦𑌂 𑌕𑌿𑌰𑍀𑌟𑍀 𑌸𑌂𑌜𑌪𑍍𑌯 𑌜𑌯𑍀 𑌪𑌾𑌶𑍁𑌪𑌤𑌾𑌸𑍍𑌤𑍍𑌰𑌭𑌾𑌕𑍍 ।
𑌕𑍃𑌷𑍍𑌣𑌸𑍍𑌯 𑌪𑍍𑌰𑌾𑌣𑌭𑍂𑌤𑌸𑍍𑌸𑌨𑍍 𑌕𑍃𑌷𑍍𑌣𑌂 𑌸𑌾𑌰𑌥𑌿𑌮𑌾𑌪𑍍𑌤𑌵𑌾𑌨𑍍 ॥ 20𑍯 ॥

𑌦𑍍𑌰𑍌𑌪𑌦𑍍𑌯𑌾 𑌦𑌮𑌯𑌂𑌤𑍍𑌯𑌾 𑌚 𑌸𑌾𑌵𑌿𑌤𑍍𑌰𑍍𑌯𑌾 𑌚 𑌸𑍁𑌶𑍀𑌲𑌯𑌾 ।
𑌦𑍁𑌰𑌿𑌤𑌾𑌨𑌿 𑌜𑌿𑌤𑌾𑌨𑍍𑌯𑍇𑌤𑌜𑍍𑌜𑌪𑌾𑌦𑌾𑌪𑍍𑌤𑌂 𑌚 𑌵𑌾𑌂𑌛𑌿𑌤𑌮𑍍 ॥ 210 ॥

𑌕𑌿𑌮𑌿𑌦𑌂 𑌬𑌹𑍁𑌨𑌾 𑌶𑌂𑌸𑌨𑍍𑌮𑌾𑌨𑌵𑍋 𑌮𑍋𑌦𑌨𑌿𑌰𑍍𑌭𑌰𑌃 ।
𑌬𑍍𑌰𑌹𑍍𑌮𑌾𑌨𑌂𑌦𑌮𑌵𑌾𑌪𑍍𑌯𑌾𑌂𑌤𑍇 𑌕𑍃𑌷𑍍𑌣𑌸𑌾𑌯𑍂𑌜𑍍𑌯𑌮𑌾𑌪𑍍𑌨𑍁𑌯𑌾𑌤𑍍 ॥ 211 ॥