𑌪𑌤𑌂𑌜𑌲𑌿 𑌯𑍋𑌗 𑌸𑍂𑌤𑍍𑌰𑌾𑌣𑌿 – 4 (𑌕𑍈𑌵𑌲𑍍𑌯 𑌪𑌾𑌦𑌃)

𑌅𑌥 𑌕𑍈𑌵𑌲𑍍𑌯𑌪𑌾𑌦𑌃 ।

𑌜𑌨𑍍𑌮𑍌𑌷𑌧𑌿𑌮𑌂𑌤𑍍𑌰𑌤𑌪𑌸𑍍𑌸𑌮𑌾𑌧𑌿𑌜𑌾𑌃 𑌸𑌿𑌦𑍍𑌧𑌯𑌃 ॥1॥

𑌜𑌾𑌤𑍍𑌯𑌂𑌤𑌰𑌪𑌰𑌿𑌣𑌾𑌮𑌃 𑌪𑍍𑌰𑌕𑍃𑌤𑍍𑌯𑌾𑌪𑍂𑌰𑌾𑌤𑍍 ॥2॥

𑌨𑌿𑌮𑌿𑌤𑍍𑌤𑌮𑌪𑍍𑌰𑌯𑍋𑌜𑌕𑌂 𑌪𑍍𑌰𑌕𑍃𑌤𑍀𑌨𑌾𑌂𑌵𑌰𑌣𑌭𑍇𑌦𑌸𑍍𑌤𑍁 𑌤𑌤𑌃 𑌕𑍍𑌷𑍇𑌤𑍍𑌰𑌿𑌕𑌵𑌤𑍍 ॥3॥

𑌨𑌿𑌰𑍍𑌮𑌾𑌣𑌚𑌿𑌤𑍍𑌤𑌾𑌨𑍍𑌯𑌸𑍍𑌮𑌿𑌤𑌾𑌮𑌾𑌤𑍍𑌰𑌾𑌤𑍍 ॥4॥

𑌪𑍍𑌰𑌵𑍃𑌤𑍍𑌤𑌿𑌭𑍇𑌦𑍇 𑌪𑍍𑌰𑌯𑍋𑌜𑌕𑌂 𑌚𑌿𑌤𑍍𑌤𑌮𑍇𑌕𑌮𑌨𑍇𑌕𑍇𑌷𑌾𑌮𑍍 ॥5॥

𑌤𑌤𑍍𑌰 𑌧𑍍𑌯𑌾𑌨𑌜𑌮𑌨𑌾𑌶𑌯𑌮𑍍 ॥6॥

𑌕𑌰𑍍𑌮𑌾𑌶𑍁𑌕𑍍𑌲𑌾𑌕𑍃𑌷𑍍𑌣𑌂 𑌯𑍋𑌗𑌿𑌨𑌃 𑌤𑍍𑌰𑌿𑌵𑌿𑌧𑌮𑌿𑌤𑌰𑍇𑌷𑌾𑌮𑍍 ॥𑍭॥

𑌤𑌤𑌸𑍍𑌤𑌦𑍍𑌵𑌿𑌪𑌾𑌕𑌾𑌨𑍁𑌗𑍁𑌣𑌾𑌨𑌾𑌮𑍇𑌵𑌾𑌭𑌿𑌵𑍍𑌯𑌕𑍍𑌤𑌿𑌰𑍍𑌵𑌾𑌸𑌨𑌾𑌨𑌾𑌮𑍍 ॥𑍮॥

𑌜𑌾𑌤𑌿 𑌦𑍇𑌶 𑌕𑌾𑌲 𑌵𑍍𑌯𑌵𑌹𑌿𑌤𑌾𑌨𑌾𑌮𑌪𑍍𑌯𑌾𑌨𑌂𑌤𑌰𑍍𑌯𑌂 𑌸𑍍𑌮𑍃𑌤𑌿𑌸𑌂𑌸𑍍𑌕𑌾𑌰𑌯𑍋𑌃 𑌏𑌕𑌰𑍂𑌪𑌤𑍍𑌵𑌾𑌤𑍍 ॥𑍯॥

𑌤𑌾𑌸𑌾𑌮𑌨𑌾𑌦𑌿𑌤𑍍𑌵𑌂 𑌚𑌾𑌶𑌿𑌷𑍋 𑌨𑌿𑌤𑍍𑌯𑌤𑍍𑌵𑌾𑌤𑍍 ॥10॥

𑌹𑍇𑌤𑍁𑌫𑌲𑌾𑌶𑍍𑌰𑌯𑌾𑌲𑌂𑌬𑌨𑍈𑌃 𑌸𑌂𑌗𑍃𑌹𑍀𑌤𑌤𑍍𑌵𑌾𑌤𑍇𑌷𑌾𑌮𑌭𑌾𑌵𑍇𑌤𑌦𑌭𑌾𑌵𑌃 ॥11॥

𑌅𑌤𑍀𑌤𑌾𑌨𑌾𑌗𑌤𑌂 𑌸𑍍𑌵𑌰𑍂𑌪𑌤𑍋𑌽𑌸𑍍𑌤𑍍𑌯𑌧𑍍𑌵𑌭𑍇𑌦𑌾𑌦𑍍𑌧𑌰𑍍𑌮𑌾𑌣𑌾𑌮𑍍 ॥12॥

𑌤𑍇 𑌵𑍍𑌯𑌕𑍍𑌤𑌸𑍂𑌕𑍍𑌷𑍍𑌮𑌾𑌃 𑌗𑍁𑌣𑌾𑌤𑍍𑌮𑌾𑌨𑌃 ॥13॥

𑌪𑌰𑌿𑌣𑌾𑌮𑍈𑌕𑌤𑍍𑌵𑌾𑌤𑍍 𑌵𑌸𑍍𑌤𑍁𑌤𑌤𑍍𑌤𑍍𑌵𑌮𑍍 ॥14॥

𑌵𑌸𑍍𑌤𑍁𑌸𑌾𑌮𑍍𑌯𑍇 𑌚𑌿𑌤𑍍𑌤𑌭𑍇𑌦𑌾𑌤𑍍𑌤𑌯𑍋𑌰𑍍𑌵𑌿𑌭𑌕𑍍𑌤𑌃 𑌪𑌂𑌥𑌾𑌃 ॥15॥

𑌨 𑌚𑍈𑌕𑌚𑌿𑌤𑍍𑌤𑌤𑌂𑌤𑍍𑌰𑌂 𑌵𑌸𑍍𑌤𑍁 𑌤𑌦𑌪𑍍𑌰𑌮𑌾𑌣𑌕𑌂 𑌤𑌦𑌾 𑌕𑌿𑌂 𑌸𑍍𑌯𑌾𑌤𑍍 ॥16॥

𑌤𑌦𑍁𑌪𑌰𑌾𑌗𑌾𑌪𑍇𑌕𑍍𑌷𑌿𑌤𑍍𑌵𑌾𑌤𑍍 𑌚𑌿𑌤𑍍𑌤𑌸𑍍𑌯 𑌵𑌸𑍍𑌤𑍁𑌜𑍍𑌞𑌾𑌤𑌾𑌜𑍍𑌞𑌾𑌤𑌮𑍍 ॥1𑍭॥

𑌸𑌦𑌾𑌜𑍍𑌞𑌾𑌤𑌾𑌃 𑌚𑌿𑌤𑍍𑌤𑌵𑍃𑌤𑍍𑌤𑌯𑌃 𑌤𑌤𑍍𑌪𑍍𑌰𑌭𑍋𑌃 𑌪𑍁𑌰𑍁𑌷𑌸𑍍𑌯𑌾𑌪𑌰𑌿𑌣𑌾𑌮𑌿𑌤𑍍𑌵𑌾𑌤𑍍 ॥1𑍮॥

𑌨 𑌤𑌤𑍍𑌸𑍍𑌵𑌾𑌭𑌾𑌸𑌂 𑌦𑍃𑌶𑍍𑌯𑌤𑍍𑌵𑌾𑌤𑍍 ॥1𑍯॥

𑌏𑌕 𑌸𑌮𑌯𑍇 𑌚𑍋𑌭𑌯𑌾𑌨𑌵𑌧𑌾𑌰𑌣𑌮𑍍 ॥20॥

𑌚𑌿𑌤𑍍𑌤𑌾𑌂𑌤𑌰 𑌦𑍃𑌶𑍍𑌯𑍇 𑌬𑍁𑌦𑍍𑌧𑌿𑌬𑍁𑌦𑍍𑌧𑍇𑌃 𑌅𑌤𑌿𑌪𑍍𑌰𑌸𑌂𑌗𑌃 𑌸𑍍𑌮𑍃𑌤𑌿𑌸𑌂𑌕𑌰𑌶𑍍𑌚 ॥21॥

𑌚𑌿𑌤𑍇𑌰𑌪𑍍𑌰𑌤𑌿𑌸𑌂𑌕𑍍𑌰𑌮𑌾𑌯𑌾𑌃 𑌤𑌦𑌾𑌕𑌾𑌰𑌾𑌪𑌤𑍍𑌤𑍌 𑌸𑍍𑌵𑌬𑍁𑌦𑍍𑌧𑌿 𑌸𑌂𑌵𑍇𑌦𑌨𑌮𑍍 ॥22॥

𑌦𑍍𑌰𑌷𑍍𑌟𑍃𑌦𑍃𑌶𑍍𑌯𑍋𑌪𑌰𑌕𑍍𑌤𑌂 𑌚𑌿𑌤𑍍𑌤𑌂 𑌸𑌰𑍍𑌵𑌾𑌰𑍍𑌥𑌮𑍍 ॥23॥

𑌤𑌦𑌸𑌂𑌖𑍍𑌯𑍇𑌯 𑌵𑌾𑌸𑌨𑌾𑌭𑌿𑌃 𑌚𑌿𑌤𑍍𑌰𑌮𑌪𑌿 𑌪𑌰𑌾𑌰𑍍𑌥𑌂 𑌸𑌂𑌹𑌤𑍍𑌯𑌕𑌾𑌰𑌿𑌤𑍍𑌵𑌾𑌤𑍍 ॥24॥

𑌵𑌿𑌶𑍇𑌷𑌦𑌰𑍍𑌶𑌿𑌨𑌃 𑌆𑌤𑍍𑌮𑌭𑌾𑌵𑌭𑌾𑌵𑌨𑌾𑌨𑌿𑌵𑍃𑌤𑍍𑌤𑌿𑌃 ॥25॥

𑌤𑌦𑌾 𑌵𑌿𑌵𑍇𑌕𑌨𑌿𑌮𑍍𑌨𑌂 𑌕𑍈𑌵𑌲𑍍𑌯𑌪𑍍𑌰𑌾𑌗𑍍𑌭𑌾𑌰𑌂 𑌚𑌿𑌤𑍍𑌤𑌮𑍍 ॥26॥

𑌤𑌚𑍍𑌛𑌿𑌦𑍍𑌰𑍇𑌷𑍁 𑌪𑍍𑌰𑌤𑍍𑌯𑌯𑌾𑌂𑌤𑌰𑌾𑌣𑌿 𑌸𑌂𑌸𑍍𑌕𑌾𑌰𑍇𑌭𑍍𑌯𑌃 ॥2𑍭॥

𑌹𑌾𑌨𑌮𑍇𑌷𑌾𑌂 𑌕𑍍𑌲𑍇𑌶𑌵𑌦𑍁𑌕𑍍𑌤𑌮𑍍 ॥2𑍮॥

𑌪𑍍𑌰𑌸𑌂𑌖𑍍𑌯𑌾𑌨𑍇𑌽𑌪𑍍𑌯𑌕𑍁𑌸𑍀𑌦𑌸𑍍𑌯 𑌸𑌰𑍍𑌵𑌥𑌾 𑌵𑌿𑌵𑍇𑌕𑌖𑍍𑌯𑌾𑌤𑍇𑌃 𑌧𑌰𑍍𑌮𑌮𑍇𑌘𑌸𑍍𑌸𑌮𑌾𑌧𑌿𑌃 ॥2𑍯॥

𑌤𑌤𑌃 𑌕𑍍𑌲𑍇𑌶𑌕𑌰𑍍𑌮𑌨𑌿𑌵𑍃𑌤𑍍𑌤𑌿𑌃 ॥30॥

𑌤𑌦𑌾 𑌸𑌰𑍍𑌵𑌾𑌵𑌰𑌣𑌮𑌲𑌾𑌪𑍇𑌤𑌸𑍍𑌯 𑌜𑍍𑌞𑌾𑌨𑌸𑍍𑌯𑌾𑌨𑌂𑌤𑍍𑌯𑌾𑌤𑍍 𑌜𑍍𑌞𑍇𑌯𑌮𑌲𑍍𑌪𑌮𑍍 ॥31॥

𑌤𑌤𑌃 𑌕𑍃𑌤𑌾𑌰𑍍𑌥𑌾𑌨𑌾𑌂 𑌪𑌰𑌿𑌣𑌾𑌮𑌕𑍍𑌰𑌮𑌸𑌮𑌾𑌪𑍍𑌤𑌿𑌰𑍍𑌗𑍁𑌣𑌾𑌨𑌾𑌮𑍍 ॥32॥

𑌕𑍍𑌷𑌣𑌪𑍍𑌰𑌤𑌿𑌯𑍋𑌗𑍀 𑌪𑌰𑌿𑌣𑌾𑌮𑌾𑌪𑌰𑌾𑌂𑌤 𑌨𑌿𑌰𑍍𑌗𑍍𑌰𑌾𑌹𑍍𑌯𑌃 𑌕𑍍𑌰𑌮𑌃 ॥33॥

𑌪𑍁𑌰𑍁𑌷𑌾𑌰𑍍𑌥𑌶𑍂𑌨𑍍𑌯𑌾𑌨𑌾𑌂 𑌗𑍁𑌣𑌾𑌨𑌾𑌂𑌪𑍍𑌰𑌤𑌿𑌪𑍍𑌰𑌸𑌵𑌃 𑌕𑍈𑌵𑌲𑍍𑌯𑌂 𑌸𑍍𑌵𑌰𑍂𑌪𑌪𑍍𑌰𑌤𑌿𑌷𑍍𑌠𑌾 𑌵𑌾 𑌚𑌿𑌤𑌿𑌶𑌕𑍍𑌤𑌿𑌰𑌿𑌤𑌿 ॥34॥

𑌇𑌤𑌿 𑌪𑌾𑌤𑌂𑌜𑌲𑌯𑍋𑌗𑌦𑌰𑍍𑌶𑌨𑍇 𑌕𑍈𑌵𑌲𑍍𑌯𑌪𑌾𑌦𑍋 𑌨𑌾𑌮 𑌚𑌤𑍁𑌰𑍍𑌥𑌃 𑌪𑌾𑌦𑌃 ।