𑌪𑌤𑌂𑌜𑌲𑌿 𑌯𑍋𑌗 𑌸𑍂𑌤𑍍𑌰𑌾𑌣𑌿 – 3 (𑌵𑌿𑌭𑍂𑌤𑌿 𑌪𑌾𑌦𑌃)

𑌶𑍍𑌰𑍀𑌪𑌾𑌤𑌂𑌜𑌲𑌯𑍋𑌗𑌦𑌰𑍍𑌶𑌨𑌮𑍍 ।

𑌅𑌥 𑌵𑌿𑌭𑍂𑌤𑌿𑌪𑌾𑌦𑌃 ।

𑌦𑍇𑌶𑌬𑌂𑌧𑌶𑍍𑌚𑌿𑌤𑍍𑌤𑌸𑍍𑌯 𑌧𑌾𑌰𑌣𑌾 ॥1॥

𑌤𑌤𑍍𑌰 𑌪𑍍𑌰𑌤𑍍𑌯𑌯𑍈𑌕𑌤𑌾𑌨𑌤𑌾 𑌧𑍍𑌯𑌾𑌨𑌮𑍍 ॥2॥

𑌤𑌦𑍇𑌵𑌾𑌰𑍍𑌥𑌮𑌾𑌤𑍍𑌰𑌨𑌿𑌰𑍍𑌭𑌾𑌸𑌂 𑌸𑍍𑌵𑌰𑍂𑌪𑌶𑍂𑌨𑍍𑌯𑌮𑌿𑌵 𑌸𑌮𑌾𑌧𑌿𑌃 ॥3॥

𑌤𑍍𑌰𑌯𑌮𑍇𑌕𑌤𑍍𑌰 𑌸𑌂𑌯𑌮𑌃 ॥4॥

𑌤𑌜𑍍𑌜𑌯𑌾𑌤𑍍 𑌪𑍍𑌰𑌜𑍍𑌞𑌾𑌲𑍋𑌕𑌃 ॥5॥

𑌤𑌸𑍍𑌯 𑌭𑍂𑌮𑌿𑌷𑍁 𑌵𑌿𑌨𑌿𑌯𑍋𑌗𑌃 ॥6॥

𑌤𑍍𑌰𑌯𑌮𑌂𑌤𑌰𑌂𑌗𑌂 𑌪𑍂𑌰𑍍𑌵𑍇𑌭𑍍𑌯𑌃 ॥𑍭॥

𑌤𑌦𑌪𑌿 𑌬𑌹𑌿𑌰𑌂𑌗𑌂 𑌨𑌿𑌰𑍍𑌬𑍀𑌜𑌸𑍍𑌯 ॥𑍮॥

𑌵𑍍𑌯𑍁𑌤𑍍𑌥𑌾𑌨𑌨𑌿𑌰𑍋𑌧𑌸𑌂𑌸𑍍𑌕𑌾𑌰𑌯𑍋𑌰𑌭𑌿𑌭𑌵𑌪𑍍𑌰𑌾𑌦𑍁𑌰𑍍𑌭𑌾𑌵𑍌 𑌨𑌿𑌰𑍋𑌧𑌕𑍍𑌷𑌣𑌚𑌿𑌤𑍍𑌤𑌾𑌨𑍍𑌵𑌯𑍋 𑌨𑌿𑌰𑍋𑌧𑌪𑌰𑌿𑌣𑌾𑌮𑌃 ॥𑍯॥

𑌤𑌸𑍍𑌯 𑌪𑍍𑌰𑌶𑌾𑌂𑌤𑌵𑌾𑌹𑌿𑌤𑌾 𑌸𑌂𑌸𑍍𑌕𑌾𑌰𑌾𑌤𑍍 ॥10॥

𑌸𑌰𑍍𑌵𑌾𑌰𑍍𑌥𑌤𑍈𑌕𑌾𑌗𑍍𑌰𑌤𑌯𑍋𑌃 𑌕𑍍𑌷𑌯𑍋𑌦𑌯𑍌 𑌚𑌿𑌤𑍍𑌤𑌸𑍍𑌯 𑌸𑌮𑌾𑌧𑌿𑌪𑌰𑌿𑌣𑌾𑌮𑌃 ॥11॥

𑌤𑌤𑌃 𑌪𑍁𑌨𑌃 𑌶𑌾𑌂𑌤𑍋𑌦𑌿𑌤𑍌 𑌤𑍁𑌲𑍍𑌯𑌪𑍍𑌰𑌤𑍍𑌯𑌯𑍌 𑌚𑌿𑌤𑍍𑌤𑌸𑍍𑌯𑍈𑌕𑌾𑌗𑍍𑌰𑌤𑌾 𑌪𑌰𑌿𑌣𑌾𑌮𑌃 ॥12॥

𑌏𑌤𑍇𑌨 𑌭𑍂𑌤𑍇𑌂𑌦𑍍𑌰𑌿𑌯𑍇𑌷𑍁 𑌧𑌰𑍍𑌮𑌲𑌕𑍍𑌷𑌣𑌾𑌵𑌸𑍍𑌥𑌾𑌪𑌰𑌿𑌣𑌾𑌮𑌾 𑌵𑍍𑌯𑌾𑌖𑍍𑌯𑌾𑌤𑌾𑌃 ॥13॥

𑌶𑌾𑌂𑌤𑍋𑌦𑌿𑌤𑌾𑌵𑍍𑌯𑌪𑌦𑍇𑌶𑍍𑌯𑌧𑌰𑍍𑌮𑌾𑌨𑍁𑌪𑌾𑌤𑍀 𑌧𑌰𑍍𑌮𑍀 ॥14॥

𑌕𑍍𑌰𑌮𑌾𑌨𑍍𑌯𑌤𑍍𑌵𑌂 𑌪𑌰𑌿𑌣𑌾𑌮𑌾𑌨𑍍𑌯𑌤𑍍𑌵𑍇 𑌹𑍇𑌤𑍁𑌃 ॥15॥

𑌪𑌰𑌿𑌣𑌾𑌮𑌤𑍍𑌰𑌯𑌸𑌂𑌯𑌮𑌾𑌦𑌤𑍀𑌤𑌾𑌨𑌾𑌗𑌤𑌜𑍍𑌞𑌾𑌨𑌮𑍍 ॥16॥

𑌶𑌬𑍍𑌦𑌾𑌰𑍍𑌥𑌪𑍍𑌰𑌤𑍍𑌯𑌯𑌾𑌨𑌾𑌮𑌿𑌤𑌰𑍇𑌤𑌰𑌾𑌧𑍍𑌯𑌾𑌸𑌾𑌤𑍍 𑌸𑌂𑌕𑌰𑌸𑍍𑌤𑌤𑍍𑌪𑍍𑌰𑌵𑌿𑌭𑌾𑌗𑌸𑌂𑌯𑌮𑌾𑌤𑍍 𑌸𑌰𑍍𑌵𑌭𑍂𑌤𑌰𑍁𑌤𑌜𑍍𑌞𑌾𑌨𑌮𑍍 ॥1𑍭॥

𑌸𑌂𑌸𑍍𑌕𑌾𑌰𑌸𑌾𑌕𑍍𑌷𑌾𑌤𑍍𑌕𑌰𑌣𑌾𑌤𑍍 𑌪𑍂𑌰𑍍𑌵𑌜𑌾𑌤𑌿𑌜𑍍𑌞𑌾𑌨𑌮𑍍 ॥1𑍮॥

𑌪𑍍𑌰𑌤𑍍𑌯𑌯𑌸𑍍𑌯 𑌪𑌰𑌚𑌿𑌤𑍍𑌤𑌜𑍍𑌞𑌾𑌨𑌮𑍍 ॥1𑍯॥

𑌨 𑌚 𑌤𑌤𑍍 𑌸𑌾𑌲𑌂𑌬𑌨𑌂 𑌤𑌸𑍍𑌯𑌾𑌵𑌿𑌷𑌯𑍀𑌭𑍂𑌤𑌤𑍍𑌵𑌾𑌤𑍍 ॥20॥

𑌕𑌾𑌯𑌰𑍂𑌪𑌸𑌂𑌯𑌮𑌾𑌤𑍍 𑌤𑌦𑍍𑌗𑍍𑌰𑌾𑌹𑍍𑌯𑌶𑌕𑍍𑌤𑌿𑌸𑍍𑌤𑌂𑌭𑍇 𑌚𑌕𑍍𑌷𑍁𑌃 𑌪𑍍𑌰𑌕𑌾𑌶𑌾𑌸𑌂𑌪𑍍𑌰𑌯𑍋𑌗𑍇𑌽𑌂𑌤𑌰𑍍𑌧𑌾𑌨𑌮𑍍 ॥21॥

𑌸𑍋𑌪𑌕𑍍𑌰𑌮𑌂 𑌨𑌿𑌰𑍁𑌪𑌕𑍍𑌰𑌮𑌂 𑌚 𑌕𑌰𑍍𑌮 𑌤𑌤𑍍𑌸𑌂𑌯𑌮𑌾𑌦𑌪𑌰𑌾𑌂𑌤𑌜𑍍𑌞𑌾𑌨𑌮𑌰𑌿𑌷𑍍𑌟𑍇𑌭𑍍𑌯𑍋 𑌵𑌾 ॥22॥

𑌮𑍈𑌤𑍍𑌰𑍍𑌯𑌾𑌦𑌿𑌷𑍁 𑌬𑌲𑌾𑌨𑌿 ॥23॥

𑌬𑌲𑍇𑌷𑍁 𑌹𑌸𑍍𑌤𑌿𑌬𑌲𑌾𑌦𑍀𑌨𑌿 ॥24॥

𑌪𑍍𑌰𑌵𑍃𑌤𑍍𑌤𑍍𑌯𑌾𑌲𑍋𑌕𑌨𑍍𑌯𑌾𑌸𑌾𑌤𑍍 𑌸𑍂𑌕𑍍𑌷𑍍𑌮𑌵𑍍𑌯𑌵𑌹𑌿𑌤𑌵𑌿𑌪𑍍𑌰𑌕𑍃𑌷𑍍𑌟𑌜𑍍𑌞𑌾𑌨𑌮𑍍 ॥25॥

𑌭𑍁𑌵𑌨𑌜𑍍𑌞𑌾𑌨𑌂 𑌸𑍂𑌰𑍍𑌯𑍇 𑌸𑌂𑌯𑌮𑌾𑌤𑍍 ॥26॥

𑌚𑌂𑌦𑍍𑌰𑍇 𑌤𑌾𑌰𑌾𑌵𑍍𑌯𑍂𑌹𑌜𑍍𑌞𑌾𑌨𑌮𑍍 ॥2𑍭॥

𑌧𑍍𑌰𑍁𑌵𑍇 𑌤𑌦𑍍𑌗𑌤𑌿𑌜𑍍𑌞𑌾𑌨𑌮𑍍 ॥2𑍮॥

𑌨𑌾𑌭𑌿𑌚𑌕𑍍𑌰𑍇 𑌕𑌾𑌯𑌵𑍍𑌯𑍂𑌹𑌜𑍍𑌞𑌾𑌨𑌮𑍍 ॥2𑍯॥

𑌕𑌂𑌠𑌕𑍂𑌪𑍇 𑌕𑍍𑌷𑍁𑌤𑍍𑌪𑌿𑌪𑌾𑌸𑌾𑌨𑌿𑌵𑍃𑌤𑍍𑌤𑌿𑌃 ॥30॥

𑌕𑍂𑌰𑍍𑌮𑌨𑌾𑌡𑍍𑌯𑌾𑌂 𑌸𑍍𑌥𑍈𑌰𑍍𑌯𑌮𑍍 ॥31॥

𑌮𑍂𑌰𑍍𑌧𑌜𑍍𑌯𑍋𑌤𑌿𑌷𑌿 𑌸𑌿𑌦𑍍𑌧𑌦𑌰𑍍𑌶𑌨𑌮𑍍 ॥32॥

𑌪𑍍𑌰𑌾𑌤𑌿𑌭𑌾𑌦𑍍𑌵𑌾 𑌸𑌰𑍍𑌵𑌮𑍍 ॥33॥

𑌹𑍃𑌦𑌯𑍇 𑌚𑌿𑌤𑍍𑌤𑌸𑌂𑌵𑌿𑌤𑍍 ॥34॥

𑌸𑌤𑍍𑌤𑍍𑌵𑌪𑍁𑌰𑍁𑌷𑌯𑍋𑌰𑌤𑍍𑌯𑌂𑌤𑌾𑌸𑌂𑌕𑍀𑌰𑍍𑌣𑌯𑍋𑌃 𑌪𑍍𑌰𑌤𑍍𑌯𑌯𑌾𑌵𑌿𑌶𑍇𑌷𑍋 𑌭𑍋𑌗𑌃 𑌪𑌰𑌾𑌰𑍍𑌥𑌤𑍍𑌵𑌾𑌤𑍍 𑌸𑍍𑌵𑌾𑌰𑍍𑌥𑌸𑌂𑌯𑌮𑌾𑌤𑍍 𑌪𑍁𑌰𑍁𑌷𑌜𑍍𑌞𑌾𑌨𑌮𑍍 ॥35॥

𑌤𑌤𑌃 𑌪𑍍𑌰𑌾𑌤𑌿𑌭𑌶𑍍𑌰𑌾𑌵𑌣𑌵𑍇𑌦𑌨𑌾𑌦𑌰𑍍𑌶𑌾𑌸𑍍𑌵𑌾𑌦𑌵𑌾𑌰𑍍𑌤𑌾 𑌜𑌾𑌯𑌂𑌤𑍇 ॥36॥

𑌤𑍇 𑌸𑌮𑌾𑌧𑌾𑌵𑍁𑌪𑌸𑌰𑍍𑌗𑌾𑌵𑍍𑌯𑍁𑌤𑍍𑌥𑌾𑌨𑍇 𑌸𑌿𑌦𑍍𑌧𑌯𑌃 ॥3𑍭॥

𑌬𑌂𑌧𑌕𑌾𑌰𑌣𑌶𑍈𑌥𑌿𑌲𑍍𑌯𑌾𑌤𑍍 𑌪𑍍𑌰𑌚𑌾𑌰𑌸𑌂𑌵𑍇𑌦𑌨𑌾𑌚𑍍𑌚 𑌚𑌿𑌤𑍍𑌤𑌸𑍍𑌯 𑌪𑌰𑌶𑌰𑍀𑌰𑌾𑌵𑍇𑌶𑌃 ॥3𑍮॥

𑌉𑌦𑌾𑌨𑌜𑌯𑌾𑌜𑍍𑌜𑌲𑌪𑌂𑌕𑌕𑌂𑌟𑌕𑌾𑌦𑌿𑌷𑍍𑌵𑌸𑌂𑌗 𑌉𑌤𑍍𑌕𑍍𑌰𑌾𑌂𑌤𑌿𑌶𑍍𑌚 ॥3𑍯॥

𑌸𑌮𑌾𑌨𑌜𑌯𑌾𑌜𑍍𑌜𑍍𑌵𑌲𑌨𑌮𑍍 ॥40॥

𑌶𑍍𑌰𑍋𑌤𑍍𑌰𑌾𑌕𑌾𑌶𑌯𑍋𑌃 𑌸𑌂𑌬𑌂𑌧𑌸𑌂𑌯𑌮𑌾𑌤𑍍 𑌦𑌿𑌵𑍍𑌯𑌂 𑌶𑍍𑌰𑍋𑌤𑍍𑌰𑌮𑍍 ॥41॥

𑌕𑌾𑌯𑌾𑌕𑌾𑌶𑌯𑍋𑌃 𑌸𑌂𑌬𑌂𑌧𑌸𑌂𑌯𑌮𑌾𑌤𑍍 𑌲𑌘𑍁𑌤𑍂𑌲𑌸𑌮𑌾𑌪𑌤𑍍𑌤𑍇𑌶𑍍𑌚 𑌆𑌕𑌾𑌶𑌗𑌮𑌨𑌮𑍍 ॥42॥

𑌬𑌹𑌿𑌰𑌕𑌲𑍍𑌪𑌿𑌤𑌾 𑌵𑍃𑌤𑍍𑌤𑌿𑌰𑍍𑌮𑌹𑌾𑌵𑌿𑌦𑍇𑌹𑌾 𑌤𑌤𑌃 𑌪𑍍𑌰𑌕𑌾𑌶𑌾𑌵𑌰𑌣𑌕𑍍𑌷𑌯𑌃 ॥43॥

𑌸𑍍𑌥𑍂𑌲𑌸𑍍𑌵𑌰𑍂𑌪𑌸𑍂𑌕𑍍𑌷𑍍𑌮𑌾𑌨𑍍𑌵𑌯𑌾𑌰𑍍𑌥𑌵𑌤𑍍𑌤𑍍𑌵𑌸𑌂𑌯𑌮𑌾𑌤𑍍 𑌭𑍂𑌤𑌜𑌯𑌃 ॥44॥

𑌤𑌤𑍋𑌽𑌣𑌿𑌮𑌾𑌦𑌿𑌪𑍍𑌰𑌾𑌦𑍁𑌰𑍍𑌭𑌾𑌵𑌃 𑌕𑌾𑌯𑌸𑌂𑌪𑌤𑍍 𑌤𑌦𑍍𑌧𑌰𑍍𑌮𑌾𑌨𑌭𑌿𑌘𑌾𑌤𑌶𑍍𑌚 ॥45॥

𑌰𑍂𑌪𑌲𑌾𑌵𑌣𑍍𑌯𑌬𑌲𑌵𑌜𑍍𑌰𑌸𑌂𑌹𑌨𑌨𑌤𑍍𑌵𑌾𑌨𑌿 𑌕𑌾𑌯𑌸𑌂𑌪𑌤𑍍 ॥46॥

𑌗𑍍𑌰𑌹𑌣𑌸𑍍𑌵𑌰𑍂𑌪𑌾𑌸𑍍𑌮𑌿𑌤𑌾𑌨𑍍𑌵𑌯𑌾𑌰𑍍𑌥𑌵𑌤𑍍𑌤𑍍𑌵𑌸𑌂𑌯𑌮𑌾𑌦𑌿𑌂𑌦𑍍𑌰𑌿𑌯𑌜𑌯𑌃 ॥4𑍭॥

𑌤𑌤𑍋 𑌮𑌨𑍋𑌜𑌵𑌿𑌤𑍍𑌵𑌂 𑌵𑌿𑌕𑌰𑌣𑌭𑌾𑌵𑌃 𑌪𑍍𑌰𑌧𑌾𑌨𑌜𑌯𑌶𑍍𑌚 ॥4𑍮॥

𑌸𑌤𑍍𑌤𑍍𑌵𑌪𑍁𑌰𑍁𑌷𑌾𑌨𑍍𑌯𑌤𑌾𑌖𑍍𑌯𑌾𑌤𑌿𑌮𑌾𑌤𑍍𑌰𑌸𑍍𑌯 𑌸𑌰𑍍𑌵𑌭𑌾𑌵𑌾𑌧𑌿𑌷𑍍𑌠𑌾𑌤𑍃𑌤𑍍𑌵𑌂 𑌸𑌰𑍍𑌵𑌜𑍍𑌞𑌾𑌤𑍃𑌤𑍍𑌵𑌂𑌚 ॥4𑍯॥

𑌤𑌦𑍍𑌵𑍈𑌰𑌾𑌗𑍍𑌯𑌾𑌦𑌪𑌿 𑌦𑍋𑌷𑌬𑍀𑌜𑌕𑍍𑌷𑌯𑍇 𑌕𑍈𑌵𑌲𑍍𑌯𑌮𑍍 ॥50॥

𑌸𑍍𑌥𑌾𑌨𑍍𑌯𑍁𑌪𑌨𑌿𑌮𑌂𑌤𑍍𑌰𑌣𑍇 𑌸𑌂𑌗𑌸𑍍𑌮𑌯𑌾𑌕𑌰𑌣𑌂 𑌪𑍁𑌨𑌰𑌨𑌿𑌷𑍍𑌟𑌪𑍍𑌰𑌸𑌂𑌗𑌾𑌤𑍍 ॥51॥

𑌕𑍍𑌷𑌣𑌤𑌤𑍍𑌕𑍍𑌰𑌮𑌯𑍋𑌃 𑌸𑌂𑌯𑌮𑌾𑌦𑍍𑌵𑌿𑌵𑍇𑌕𑌜𑌂 𑌜𑍍𑌞𑌾𑌨𑌮𑍍 ॥52॥

𑌜𑌾𑌤𑌿𑌲𑌕𑍍𑌷𑌣𑌦𑍇𑌶𑍈𑌰𑌨𑍍𑌯𑌤𑌾𑌨𑌵𑌚𑍍𑌛𑍇𑌦𑌾𑌤𑍍 𑌤𑍁𑌲𑍍𑌯𑌯𑍋𑌸𑍍𑌤𑌤𑌃 𑌪𑍍𑌰𑌤𑌿𑌪𑌤𑍍𑌤𑌿𑌃 ॥53॥

𑌤𑌾𑌰𑌕𑌂 𑌸𑌰𑍍𑌵𑌵𑌿𑌷𑌯𑌂 𑌸𑌰𑍍𑌵𑌥𑌾𑌵𑌿𑌷𑌯𑌮𑌕𑍍𑌰𑌮𑌂 𑌚𑍇𑌤𑌿 𑌵𑌿𑌵𑍇𑌕𑌜𑌂 𑌜𑍍𑌞𑌾𑌨𑌮𑍍 ॥54॥

𑌸𑌤𑍍𑌤𑍍𑌵𑌪𑍁𑌰𑍁𑌷𑌯𑍋𑌃 𑌶𑍁𑌦𑍍𑌧𑌿𑌸𑌾𑌮𑍍𑌯𑍇 𑌕𑍈𑌵𑌲𑍍𑌯𑌮𑍍 ॥55॥

𑌇𑌤𑌿 𑌶𑍍𑌰𑍀𑌪𑌾𑌤𑌂𑌜𑌲𑌯𑍋𑌗𑌦𑌰𑍍𑌶𑌨𑍇 𑌵𑌿𑌭𑍂𑌤𑌿𑌪𑌾𑌦𑍋 𑌨𑌾𑌮 𑌤𑍃𑌤𑍀𑌯𑌃 𑌪𑌾𑌦𑌃 ।