𑌪𑌤𑌂𑌜𑌲𑌿 𑌯𑍋𑌗 𑌸𑍂𑌤𑍍𑌰𑌾𑌣𑌿 – 2 (𑌸𑌾𑌧𑌨 𑌪𑌾𑌦)

𑌅𑌥 𑌸𑌾𑌧𑌨𑌪𑌾𑌦𑌃 ।

𑌤𑌪𑌃 𑌸𑍍𑌵𑌾𑌧𑍍𑌯𑌾𑌯𑍇𑌶𑍍𑌵𑌰𑌪𑍍𑌰𑌣𑌿𑌧𑌾𑌨𑌾𑌨𑌿 𑌕𑍍𑌰𑌿𑌯𑌾𑌯𑍋𑌗𑌃 ॥1॥

𑌸𑌮𑌾𑌧𑌿𑌭𑌾𑌵𑌨𑌾𑌰𑍍𑌥𑌃 𑌕𑍍𑌲𑍇𑌶𑌤𑌨𑍂𑌕𑌰𑌣𑌾𑌰𑍍𑌥𑌶𑍍𑌚 ॥2॥

𑌅𑌵𑌿𑌦𑍍𑌯𑌾𑌸𑍍𑌮𑌿𑌤𑌾𑌰𑌾𑌗𑌦𑍍𑌵𑍇𑌷𑌾𑌭𑌿𑌨𑌿𑌵𑍇𑌶𑌾𑌃 𑌕𑍍𑌲𑍇𑌶𑌾𑌃 ॥3॥

𑌅𑌵𑌿𑌦𑍍𑌯𑌾 𑌕𑍍𑌷𑍇𑌤𑍍𑌰𑌮𑍁𑌤𑍍𑌤𑌰𑍇𑌷𑌾𑌂 𑌪𑍍𑌰𑌸𑍁𑌪𑍍𑌤𑌤𑌨𑍁𑌵𑌿𑌚𑍍𑌛𑌿𑌨𑍍𑌨𑍋𑌦𑌾𑌰𑌾𑌣𑌾𑌮𑍍 ॥4॥

𑌅𑌨𑌿𑌤𑍍𑌯𑌾𑌶𑍁𑌚𑌿𑌦𑍁𑌃𑌖𑌾𑌨𑌾𑌤𑍍𑌮𑌸𑍁 𑌨𑌿𑌤𑍍𑌯𑌶𑍁𑌚𑌿𑌸𑍁𑌖𑌾𑌤𑍍𑌮𑌖𑍍𑌯𑌾𑌤𑌿𑌰𑌵𑌿𑌦𑍍𑌯𑌾 ॥5॥

𑌦𑍃𑌗𑍍𑌦𑌰𑍍𑌶𑌨𑌶𑌕𑍍𑌤𑍍𑌯𑍋𑌰𑍇𑌕𑌾𑌤𑍍𑌮𑌤𑍇𑌵𑌾𑌸𑍍𑌮𑌿𑌤𑌾 ॥6॥

𑌸𑍁𑌖𑌾𑌨𑍁𑌶𑌯𑍀 𑌰𑌾𑌗𑌃 ॥𑍭॥

𑌦𑍁𑌃𑌖𑌾𑌨𑍁𑌶𑌯𑍀 𑌦𑍍𑌵𑍇𑌷𑌃 ॥𑍮॥

𑌸𑍍𑌵𑌰𑌸𑌵𑌾𑌹𑍀 𑌵𑌿𑌦𑍁𑌷𑍋𑌽𑌪𑌿 𑌤𑌥𑌾𑌰𑍂𑌢𑍋𑌽𑌭𑌿𑌨𑌿𑌵𑍇𑌶𑌃 ॥𑍯॥

𑌤𑍇 𑌪𑍍𑌰𑌤𑌿𑌪𑍍𑌰𑌸𑌵𑌹𑍇𑌯𑌾𑌃 𑌸𑍂𑌕𑍍𑌷𑍍𑌮𑌾𑌃 ॥10॥

𑌧𑍍𑌯𑌾𑌨𑌹𑍇𑌯𑌾𑌸𑍍𑌤𑌦𑍍𑌵𑍃𑌤𑍍𑌤𑌯𑌃 ॥11॥

𑌕𑍍𑌲𑍇𑌶𑌮𑍂𑌲𑌃 𑌕𑌰𑍍𑌮𑌾𑌶𑌯𑍋 𑌦𑍃𑌷𑍍𑌟𑌾𑌦𑍃𑌷𑍍𑌟𑌜𑌨𑍍𑌮𑌵𑍇𑌦𑌨𑍀𑌯𑌃 ॥12॥

𑌸𑌤𑌿 𑌮𑍂𑌲𑍇 𑌤𑌦𑍍 𑌵𑌿𑌪𑌾𑌕𑍋 𑌜𑌾𑌤𑍍𑌯𑌾𑌯𑍁𑌰𑍍𑌭𑍋𑌗𑌾𑌃 ॥13॥

𑌤𑍇 𑌹𑍍𑌲𑌾𑌦𑌪𑌰𑌿𑌤𑌾𑌪𑌫𑌲𑌾𑌃 𑌪𑍁𑌣𑍍𑌯𑌾𑌪𑍁𑌣𑍍𑌯𑌹𑍇𑌤𑍁𑌤𑍍𑌵𑌾𑌤𑍍 ॥14॥

𑌪𑌰𑌿𑌣𑌾𑌮𑌤𑌾𑌪𑌸𑌂𑌸𑍍𑌕𑌾𑌰𑌦𑍁𑌃𑌖𑍈𑌰𑍍𑌗𑍁𑌣𑌵𑍃𑌤𑍍𑌤𑌿𑌵𑌿𑌰𑍋𑌧𑌾𑌚𑍍𑌚 𑌦𑍁𑌃𑌖𑌮𑍇𑌵 𑌸𑌰𑍍𑌵𑌂 𑌵𑌿𑌵𑍇𑌕𑌿𑌨𑌃 ॥15॥

𑌹𑍇𑌯𑌂 𑌦𑍁𑌃𑌖𑌮𑌨𑌾𑌗𑌤𑌮𑍍 ॥16॥

𑌦𑍍𑌰𑌷𑍍𑌟𑍃𑌦𑍃𑌶𑍍𑌯𑌯𑍋𑌃 𑌸𑌂𑌯𑍋𑌗𑍋 𑌹𑍇𑌯𑌹𑍇𑌤𑍁𑌃॥1𑍭॥

𑌪𑍍𑌰𑌕𑌾𑌶𑌕𑍍𑌰𑌿𑌯𑌾𑌸𑍍𑌥𑌿𑌤𑌿𑌶𑍀𑌲𑌂 𑌭𑍂𑌤𑍇𑌂𑌦𑍍𑌰𑌿𑌯𑌾𑌤𑍍𑌮𑌕𑌂 𑌭𑍋𑌗𑌾𑌪𑌵𑌰𑍍𑌗𑌾𑌰𑍍𑌥𑌂 𑌦𑍃𑌶𑍍𑌯𑌮𑍍 ॥1𑍮॥

𑌵𑌿𑌶𑍇𑌷𑌾𑌵𑌿𑌶𑍇𑌷𑌲𑌿𑌂𑌗𑌮𑌾𑌤𑍍𑌰𑌾𑌲𑌿𑌂𑌗𑌾𑌨𑌿 𑌗𑍁𑌣𑌪𑌰𑍍𑌵𑌾𑌣𑌿 ॥1𑍯॥

𑌦𑍍𑌰𑌷𑍍𑌟𑌾 𑌦𑍃𑌶𑌿𑌮𑌾𑌤𑍍𑌰𑌃 𑌶𑍁𑌦𑍍𑌧𑍋𑌽𑌪𑌿 𑌪𑍍𑌰𑌤𑍍𑌯𑌯𑌾𑌨𑍁𑌪𑌶𑍍𑌯𑌃 ॥20॥

𑌤𑌦𑌰𑍍𑌥 𑌏𑌵 𑌦𑍃𑌶𑍍𑌯𑌸𑍍𑌯𑌾𑌤𑍍𑌮𑌾 ॥21॥

𑌕𑍃𑌤𑌾𑌰𑍍𑌥𑌂 𑌪𑍍𑌰𑌤𑌿 𑌨𑌷𑍍𑌟𑌮𑌪𑍍𑌯𑌨𑌷𑍍𑌟𑌂 𑌤𑌦𑌨𑍍𑌯𑌸𑌾𑌧𑌾𑌰𑌣𑌤𑍍𑌵𑌾𑌤𑍍 ॥22॥

𑌸𑍍𑌵𑌸𑍍𑌵𑌾𑌮𑌿𑌶𑌕𑍍𑌤𑍍𑌯𑍋𑌃 𑌸𑍍𑌵𑌰𑍂𑌪𑍋𑌪𑌲𑌬𑍍𑌧𑌿𑌹𑍇𑌤𑍁𑌃 𑌸𑌂𑌯𑍋𑌗𑌃 ॥23॥

𑌤𑌸𑍍𑌯 𑌹𑍇𑌤𑍁𑌰𑌵𑌿𑌦𑍍𑌯𑌾 ॥24॥

𑌤𑌦𑌭𑌾𑌵𑌾𑌤𑍍𑌸𑌂𑌯𑍋𑌗𑌾𑌭𑌾𑌵𑍋 𑌹𑌾𑌨𑌂 𑌤𑌦𑍍 𑌦𑍃𑌶𑍇𑌃 𑌕𑍈𑌵𑌲𑍍𑌯𑌮𑍍 ॥25॥

𑌵𑌿𑌵𑍇𑌕𑌖𑍍𑌯𑌾𑌤𑌿𑌰𑌵𑌿𑌪𑍍𑌲𑌵𑌾 𑌹𑌾𑌨𑍋𑌪𑌾𑌯𑌃 ॥26॥

𑌤𑌸𑍍𑌯 𑌸𑌪𑍍𑌤𑌧𑌾 𑌪𑍍𑌰𑌾𑌂𑌤𑌭𑍂𑌮𑌿𑌃 𑌪𑍍𑌰𑌜𑍍𑌞𑌾 ॥2𑍭॥

𑌯𑍋𑌗𑌾𑌂𑌗𑌾𑌨𑍁𑌷𑍍𑌠𑌾𑌨𑌾𑌦𑌶𑍁𑌦𑍍𑌧𑌿𑌕𑍍𑌷𑌯𑍇 𑌜𑍍𑌞𑌾𑌨𑌦𑍀𑌪𑍍𑌤𑌿𑌰𑌾𑌵𑌿𑌵𑍇𑌕𑌖𑍍𑌯𑌾𑌤𑍇𑌃 ॥2𑍮॥

𑌯𑌮𑌨𑌿𑌯𑌮𑌾𑌸𑌨𑌪𑍍𑌰𑌾𑌣𑌾𑌯𑌾𑌮𑌪𑍍𑌰𑌤𑍍𑌯𑌾𑌹𑌾𑌰𑌧𑌾𑌰𑌣𑌾𑌧𑍍𑌯𑌾𑌨𑌸𑌮𑌾𑌧𑌯𑍋𑌽𑌷𑍍𑌟𑌾𑌵𑌂𑌗𑌾𑌨𑌿 ॥2𑍯॥

𑌅𑌹𑌿𑌂𑌸𑌾𑌸𑌤𑍍𑌯𑌾𑌸𑍍𑌤𑍇𑌯𑌬𑍍𑌰𑌹𑍍𑌮𑌚𑌰𑍍𑌯𑌾𑌪𑌰𑌿𑌗𑍍𑌰𑌹𑌾 𑌯𑌮𑌾𑌃 ॥30॥

𑌜𑌾𑌤𑌿𑌦𑍇𑌶𑌕𑌾𑌲𑌸𑌮𑌯𑌾𑌨𑌵𑌚𑍍𑌛𑌿𑌨𑍍𑌨𑌾𑌃 𑌸𑌾𑌰𑍍𑌵𑌭𑍌𑌮𑌾 𑌮𑌹𑌾𑌵𑍍𑌰𑌤𑌮𑍍 ॥31॥

𑌶𑍌𑌚𑌸𑌂𑌤𑍋𑌷𑌤𑌪𑌃 𑌸𑍍𑌵𑌾𑌧𑍍𑌯𑌾𑌯𑍇𑌶𑍍𑌵𑌰𑌪𑍍𑌰𑌣𑌿𑌧𑌾𑌨𑌾𑌨𑌿 𑌨𑌿𑌯𑌮𑌾𑌃 ॥32॥

𑌵𑌿𑌤𑌰𑍍𑌕𑌬𑌾𑌧𑌨𑍇 𑌪𑍍𑌰𑌤𑌿𑌪𑌕𑍍𑌷𑌭𑌾𑌵𑌨𑌮𑍍 ॥33॥

𑌵𑌿𑌤𑌰𑍍𑌕𑌾𑌹𑌿𑌂𑌸𑌾𑌦𑌯𑌃 𑌕𑍃𑌤𑌕𑌾𑌰𑌿𑌤𑌾𑌨𑍁𑌮𑍋𑌦𑌿𑌤𑌾 𑌲𑍋𑌭𑌕𑍍𑌰𑍋𑌧𑌮𑍋𑌹𑌪𑍂𑌰𑍍𑌵𑌕𑌾 𑌮𑍃𑌦𑍁𑌮𑌧𑍍𑌯𑌾𑌧𑌿𑌮𑌾𑌤𑍍𑌰𑌾 𑌦𑍁𑌃𑌖𑌾𑌜𑍍𑌞𑌾𑌨𑌾𑌨𑌂𑌤𑌫𑌲𑌾 𑌇𑌤𑌿 𑌪𑍍𑌰𑌤𑌿𑌪𑌕𑍍𑌷𑌭𑌾𑌵𑌨𑌮𑍍 ॥34॥

𑌅𑌹𑌿𑌂𑌸𑌾𑌪𑍍𑌰𑌤𑌿𑌷𑍍𑌠𑌾𑌯𑌾𑌂 𑌤𑌤𑍍𑌸𑌨𑍍𑌨𑌿𑌧𑍌 𑌵𑍈𑌰𑌤𑍍𑌯𑌾𑌗𑌃 ॥35॥

𑌸𑌤𑍍𑌯𑌪𑍍𑌰𑌤𑌿𑌷𑍍𑌠𑌾𑌯𑌾𑌂 𑌕𑍍𑌰𑌿𑌯𑌾𑌫𑌲𑌾𑌶𑍍𑌰𑌯𑌤𑍍𑌵𑌮𑍍 ॥36॥

𑌅𑌸𑍍𑌤𑍇𑌯𑌪𑍍𑌰𑌤𑌿𑌷𑍍𑌠𑌾𑌯𑌾𑌂 𑌸𑌰𑍍𑌵𑌰𑌤𑍍𑌨𑍋𑌪𑌸𑍍𑌥𑌾𑌨𑌮𑍍 ॥3𑍭॥

𑌬𑍍𑌰𑌹𑍍𑌮𑌚𑌰𑍍𑌯𑌪𑍍𑌰𑌤𑌿𑌷𑍍𑌠𑌾𑌯𑌾𑌂 𑌵𑍀𑌰𑍍𑌯𑌲𑌾𑌭𑌃 ॥3𑍮॥

𑌅𑌪𑌰𑌿𑌗𑍍𑌰𑌹𑌸𑍍𑌥𑍈𑌰𑍍𑌯𑍇 𑌜𑌨𑍍𑌮𑌕𑌥𑌂𑌤𑌾𑌸𑌂𑌬𑍋𑌧𑌃 ॥3𑍯॥

𑌶𑍌𑌚𑌾𑌤𑍍𑌸𑍍𑌵𑌾𑌂𑌗𑌜𑍁𑌗𑍁𑌪𑍍𑌸𑌾 𑌪𑌰𑍈𑌰𑌸𑌂𑌸𑌰𑍍𑌗𑌃 ॥40॥

𑌸𑌤𑍍𑌤𑍍𑌵𑌶𑍁𑌦𑍍𑌧𑌿-𑌸𑍌𑌮𑌨𑌸𑍍𑌯𑍈𑌕𑌾𑌗𑍍𑌰𑍍𑌯𑍇𑌂𑌦𑍍𑌰𑌿𑌯𑌜𑌯𑌾𑌤𑍍𑌮𑌦𑌰𑍍𑌶𑌨-𑌯𑍋𑌗𑍍𑌯𑌤𑍍𑌵𑌾𑌨𑌿 𑌚 ॥41॥

𑌸𑌂𑌤𑍋𑌷𑌾𑌤𑍍 𑌅𑌨𑍁𑌤𑍍𑌤𑌮𑌃𑌸𑍁𑌖𑌲𑌾𑌭𑌃 ॥42॥

𑌕𑌾𑌯𑍇𑌂𑌦𑍍𑌰𑌿𑌯𑌸𑌿𑌦𑍍𑌧𑌿𑌰𑌶𑍁𑌦𑍍𑌧𑌿𑌕𑍍𑌷𑌯𑌾𑌤𑍍 𑌤𑌪𑌸𑌃 ॥43॥

𑌸𑍍𑌵𑌾𑌧𑍍𑌯𑌾𑌯𑌾𑌦𑌿𑌷𑍍𑌟𑌦𑍇𑌵𑌤𑌾𑌸𑌂𑌪𑍍𑌰𑌯𑍋𑌗𑌃 ॥44॥

𑌸𑌮𑌾𑌧𑌿𑌸𑌿𑌦𑍍𑌧𑌿𑌰𑍀𑌶𑍍𑌵𑌰𑌪𑍍𑌰𑌣𑌿𑌧𑌾𑌨𑌾𑌤𑍍 ॥45॥

𑌸𑍍𑌥𑌿𑌰𑌸𑍁𑌖𑌮𑌾𑌸𑌨𑌮𑍍 ॥46॥

𑌪𑍍𑌰𑌯𑌤𑍍𑌨𑌶𑍈𑌥𑌿𑌲𑍍𑌯𑌾𑌨𑌂𑌤𑌸𑌮𑌾𑌪𑌤𑍍𑌤𑌿𑌭𑍍𑌯𑌾𑌮𑍍 ॥4𑍭॥

𑌤𑌤𑍋 𑌦𑍍𑌵𑌂𑌦𑍍𑌵𑌾𑌨𑌭𑌿𑌘𑌾𑌤𑌃 ॥4𑍮॥

𑌤𑌸𑍍𑌮𑌿𑌨𑍍 𑌸𑌤𑌿 𑌶𑍍𑌵𑌾𑌸𑌪𑍍𑌰𑌶𑍍𑌵𑌾𑌸𑌯𑍋𑌰𑍍𑌗𑌤𑌿𑌵𑌿𑌚𑍍𑌛𑍇𑌦𑌃 𑌪𑍍𑌰𑌾𑌣𑌾𑌯𑌾𑌮𑌃 ॥4𑍯॥

(𑌸 𑌤𑍁) 𑌬𑌾𑌹𑍍𑌯𑌾𑌭𑍍𑌯𑌂𑌤𑌰𑌸𑍍𑌤𑌂𑌭𑌵𑍃𑌤𑍍𑌤𑌿𑌰𑍍𑌦𑍇𑌶𑌕𑌾𑌲𑌸𑌂𑌖𑍍𑌯𑌾𑌭𑌿𑌃 𑌪𑌰𑌿𑌦𑍃𑌷𑍍𑌟𑍋 𑌦𑍀𑌰𑍍𑌘𑌸𑍂𑌕𑍍𑌷𑍍𑌮𑌃 ॥50॥

𑌬𑌾𑌹𑍍𑌯𑌾𑌭𑍍𑌯𑌂𑌤𑌰𑌵𑌿𑌷𑌯𑌾𑌕𑍍𑌷𑍇𑌪𑍀 𑌚𑌤𑍁𑌰𑍍𑌥𑌃 ॥51॥

𑌤𑌤𑌃 𑌕𑍍𑌷𑍀𑌯𑌤𑍇 𑌪𑍍𑌰𑌕𑌾𑌶𑌾𑌵𑌰𑌣𑌮𑍍 ॥52॥

𑌧𑌾𑌰𑌣𑌾𑌸𑍁 𑌚 𑌯𑍋𑌗𑍍𑌯𑌤𑌾 𑌮𑌨𑌸𑌃 ॥53॥

𑌸𑍍𑌵𑌵𑌿𑌷𑌯𑌾𑌸𑌂𑌪𑍍𑌰𑌯𑍋𑌗𑍇 𑌚𑌿𑌤𑍍𑌤𑌸𑍍𑌵𑌰𑍂𑌪𑌾𑌨𑍁𑌕𑌾𑌰 𑌇𑌵𑍇𑌂𑌦𑍍𑌰𑌿𑌯𑌾𑌣𑌾𑌂 𑌪𑍍𑌰𑌤𑍍𑌯𑌾𑌹𑌾𑌰𑌃 ॥54॥

𑌤𑌤𑌃 𑌪𑌰𑌮𑌾𑌵𑌶𑍍𑌯𑌤𑍇𑌂𑌦𑍍𑌰𑌿𑌯𑌾𑌣𑌾𑌮𑍍 ॥55॥

𑌇𑌤𑌿 𑌪𑌾𑌤𑌂𑌜𑌲𑌯𑍋𑌗𑌦𑌰𑍍𑌶𑌨𑍇 𑌸𑌾𑌧𑌨𑌪𑌾𑌦𑍋 𑌨𑌾𑌮 𑌦𑍍𑌵𑌿𑌤𑍀𑌯𑌃 𑌪𑌾𑌦𑌃 ।