𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍯𑍭 – 𑌉𑌤𑍍𑌤𑌮𑌭𑌕𑍍𑌤𑌿𑌪𑍍𑌰𑌾𑌰𑍍𑌥𑌨𑌾 𑌤𑌥𑌾 𑌮𑌾𑌰𑍍𑌕𑌂𑌡𑍇𑌯 𑌕𑌥𑌾

𑌤𑍍𑌰𑍈𑌗𑍁𑌣𑍍𑌯𑌾𑌦𑍍𑌭𑌿𑌨𑍍𑌨𑌰𑍂𑌪𑌂 𑌭𑌵𑌤𑌿 𑌹𑌿 𑌭𑍁𑌵𑌨𑍇 𑌹𑍀𑌨𑌮𑌧𑍍𑌯𑍋𑌤𑍍𑌤𑌮𑌂 𑌯𑌤𑍍
𑌜𑍍𑌞𑌾𑌨𑌂 𑌶𑍍𑌰𑌦𑍍𑌧𑌾 𑌚 𑌕𑌰𑍍𑌤𑌾 𑌵𑌸𑌤𑌿𑌰𑌪𑌿 𑌸𑍁𑌖𑌂 𑌕𑌰𑍍𑌮 𑌚𑌾𑌹𑌾𑌰𑌭𑍇𑌦𑌾𑌃 ।
𑌤𑍍𑌵𑌤𑍍𑌕𑍍𑌷𑍇𑌤𑍍𑌰𑌤𑍍𑌵𑌨𑍍𑌨𑌿𑌷𑍇𑌵𑌾𑌦𑌿 𑌤𑍁 𑌯𑌦𑌿𑌹 𑌪𑍁𑌨𑌸𑍍𑌤𑍍𑌵𑌤𑍍𑌪𑌰𑌂 𑌤𑌤𑍍𑌤𑍁 𑌸𑌰𑍍𑌵𑌂
𑌪𑍍𑌰𑌾𑌹𑍁𑌰𑍍𑌨𑍈𑌗𑍁𑌣𑍍𑌯𑌨𑌿𑌷𑍍𑌠𑌂 𑌤𑌦𑌨𑍁𑌭𑌜𑌨𑌤𑍋 𑌮𑌂𑌕𑍍𑌷𑍁 𑌸𑌿𑌦𑍍𑌧𑍋 𑌭𑌵𑍇𑌯𑌮𑍍 ॥1॥

𑌤𑍍𑌵𑌯𑍍𑌯𑍇𑌵 𑌨𑍍𑌯𑌸𑍍𑌤𑌚𑌿𑌤𑍍𑌤𑌃 𑌸𑍁𑌖𑌮𑌯𑌿 𑌵𑌿𑌚𑌰𑌨𑍍 𑌸𑌰𑍍𑌵𑌚𑍇𑌷𑍍𑌟𑌾𑌸𑍍𑌤𑍍𑌵𑌦𑌰𑍍𑌥𑌂
𑌤𑍍𑌵𑌦𑍍𑌭𑌕𑍍𑌤𑍈𑌃 𑌸𑍇𑌵𑍍𑌯𑌮𑌾𑌨𑌾𑌨𑌪𑌿 𑌚𑌰𑌿𑌤𑌚𑌰𑌾𑌨𑌾𑌶𑍍𑌰𑌯𑌨𑍍 𑌪𑍁𑌣𑍍𑌯𑌦𑍇𑌶𑌾𑌨𑍍 ।
𑌦𑌸𑍍𑌯𑍌 𑌵𑌿𑌪𑍍𑌰𑍇 𑌮𑍃𑌗𑌾𑌦𑌿𑌷𑍍𑌵𑌪𑌿 𑌚 𑌸𑌮𑌮𑌤𑌿𑌰𑍍𑌮𑍁𑌚𑍍𑌯𑌮𑌾𑌨𑌾𑌵𑌮𑌾𑌨-
𑌸𑍍𑌪𑌰𑍍𑌧𑌾𑌸𑍂𑌯𑌾𑌦𑌿𑌦𑍋𑌷𑌃 𑌸𑌤𑌤𑌮𑌖𑌿𑌲𑌭𑍂𑌤𑍇𑌷𑍁 𑌸𑌂𑌪𑍂𑌜𑌯𑍇 𑌤𑍍𑌵𑌾𑌮𑍍 ॥2॥

𑌤𑍍𑌵𑌦𑍍𑌭𑌾𑌵𑍋 𑌯𑌾𑌵𑌦𑍇𑌷𑍁 𑌸𑍍𑌫𑍁𑌰𑌤𑌿 𑌨 𑌵𑌿𑌶𑌦𑌂 𑌤𑌾𑌵𑌦𑍇𑌵𑌂 𑌹𑍍𑌯𑍁𑌪𑌾𑌸𑍍𑌤𑌿𑌂
𑌕𑍁𑌰𑍍𑌵𑌨𑍍𑌨𑍈𑌕𑌾𑌤𑍍𑌮𑍍𑌯𑌬𑍋𑌧𑍇 𑌝𑌟𑌿𑌤𑌿 𑌵𑌿𑌕𑌸𑌤𑌿 𑌤𑍍𑌵𑌨𑍍𑌮𑌯𑍋𑌽𑌹𑌂 𑌚𑌰𑍇𑌯𑌮𑍍 ।
𑌤𑍍𑌵𑌦𑍍𑌧𑌰𑍍𑌮𑌸𑍍𑌯𑌾𑌸𑍍𑌯 𑌤𑌾𑌵𑌤𑍍 𑌕𑌿𑌮𑌪𑌿 𑌨 𑌭𑌗𑌵𑌨𑍍 𑌪𑍍𑌰𑌸𑍍𑌤𑍁𑌤𑌸𑍍𑌯 𑌪𑍍𑌰𑌣𑌾𑌶-
𑌸𑍍𑌤𑌸𑍍𑌮𑌾𑌤𑍍𑌸𑌰𑍍𑌵𑌾𑌤𑍍𑌮𑌨𑍈𑌵 𑌪𑍍𑌰𑌦𑌿𑌶 𑌮𑌮 𑌵𑌿𑌭𑍋 𑌭𑌕𑍍𑌤𑌿𑌮𑌾𑌰𑍍𑌗𑌂 𑌮𑌨𑍋𑌜𑍍𑌞𑌮𑍍 ॥3॥

𑌤𑌂 𑌚𑍈𑌨𑌂 𑌭𑌕𑍍𑌤𑌿𑌯𑍋𑌗𑌂 𑌦𑍍𑌰𑌢𑌯𑌿𑌤𑍁𑌮𑌯𑌿 𑌮𑍇 𑌸𑌾𑌧𑍍𑌯𑌮𑌾𑌰𑍋𑌗𑍍𑌯𑌮𑌾𑌯𑍁-
𑌰𑍍𑌦𑌿𑌷𑍍𑌟𑍍𑌯𑌾 𑌤𑌤𑍍𑌰𑌾𑌪𑌿 𑌸𑍇𑌵𑍍𑌯𑌂 𑌤𑌵 𑌚𑌰𑌣𑌮𑌹𑍋 𑌭𑍇𑌷𑌜𑌾𑌯𑍇𑌵 𑌦𑍁𑌗𑍍𑌧𑌮𑍍 ।
𑌮𑌾𑌰𑍍𑌕𑌂𑌡𑍇𑌯𑍋 𑌹𑌿 𑌪𑍂𑌰𑍍𑌵𑌂 𑌗𑌣𑌕𑌨𑌿𑌗𑌦𑌿𑌤𑌦𑍍𑌵𑌾𑌦𑌶𑌾𑌬𑍍𑌦𑌾𑌯𑍁𑌰𑍁𑌚𑍍𑌚𑍈𑌃
𑌸𑍇𑌵𑌿𑌤𑍍𑌵𑌾 𑌵𑌤𑍍𑌸𑌰𑌂 𑌤𑍍𑌵𑌾𑌂 𑌤𑌵 𑌭𑌟𑌨𑌿𑌵𑌹𑍈𑌰𑍍𑌦𑍍𑌰𑌾𑌵𑌯𑌾𑌮𑌾𑌸 𑌮𑍃𑌤𑍍𑌯𑍁𑌮𑍍 ॥4॥

𑌮𑌾𑌰𑍍𑌕𑌂𑌡𑍇𑌯𑌶𑍍𑌚𑌿𑌰𑌾𑌯𑍁𑌃 𑌸 𑌖𑌲𑍁 𑌪𑍁𑌨𑌰𑌪𑌿 𑌤𑍍𑌵𑌤𑍍𑌪𑌰𑌃 𑌪𑍁𑌷𑍍𑌪𑌭𑌦𑍍𑌰𑌾-
𑌤𑍀𑌰𑍇 𑌨𑌿𑌨𑍍𑌯𑍇 𑌤𑌪𑌸𑍍𑌯𑌨𑍍𑌨𑌤𑍁𑌲𑌸𑍁𑌖𑌰𑌤𑌿𑌃 𑌷𑌟𑍍 𑌤𑍁 𑌮𑌨𑍍𑌵𑌂𑌤𑌰𑌾𑌣𑌿 ।
𑌦𑍇𑌵𑍇𑌂𑌦𑍍𑌰𑌃 𑌸𑌪𑍍𑌤𑌮𑌸𑍍𑌤𑌂 𑌸𑍁𑌰𑌯𑍁𑌵𑌤𑌿𑌮𑌰𑍁𑌨𑍍𑌮𑌨𑍍𑌮𑌥𑍈𑌰𑍍𑌮𑍋𑌹𑌯𑌿𑌷𑍍𑌯𑌨𑍍
𑌯𑍋𑌗𑍋𑌷𑍍𑌮𑌪𑍍𑌲𑍁𑌷𑍍𑌯𑌮𑌾𑌣𑍈𑌰𑍍𑌨 𑌤𑍁 𑌪𑍁𑌨𑌰𑌶𑌕𑌤𑍍𑌤𑍍𑌵𑌜𑍍𑌜𑌨𑌂 𑌨𑌿𑌰𑍍𑌜𑌯𑍇𑌤𑍍 𑌕𑌃 ॥5॥

𑌪𑍍𑌰𑍀𑌤𑍍𑌯𑌾 𑌨𑌾𑌰𑌾𑌯𑌣𑌾𑌖𑍍𑌯𑌸𑍍𑌤𑍍𑌵𑌮𑌥 𑌨𑌰𑌸𑌖𑌃 𑌪𑍍𑌰𑌾𑌪𑍍𑌤𑌵𑌾𑌨𑌸𑍍𑌯 𑌪𑌾𑌰𑍍𑌶𑍍𑌵𑌂
𑌤𑍁𑌷𑍍𑌟𑍍𑌯𑌾 𑌤𑍋𑌷𑍍𑌟𑍂𑌯𑌮𑌾𑌨𑌃 𑌸 𑌤𑍁 𑌵𑌿𑌵𑌿𑌧𑌵𑌰𑍈𑌰𑍍𑌲𑍋𑌭𑌿𑌤𑍋 𑌨𑌾𑌨𑍁𑌮𑍇𑌨𑍇 ।
𑌦𑍍𑌰𑌷𑍍𑌟𑍁𑌂 𑌮𑌾𑌯𑌾𑌂 𑌤𑍍𑌵𑌦𑍀𑌯𑌾𑌂 𑌕𑌿𑌲 𑌪𑍁𑌨𑌰𑌵𑍃𑌣𑍋𑌦𑍍𑌭𑌕𑍍𑌤𑌿𑌤𑍃𑌪𑍍𑌤𑌾𑌂𑌤𑌰𑌾𑌤𑍍𑌮𑌾
𑌮𑌾𑌯𑌾𑌦𑍁𑌃𑌖𑌾𑌨𑌭𑌿𑌜𑍍𑌞𑌸𑍍𑌤𑌦𑌪𑌿 𑌮𑍃𑌗𑌯𑌤𑍇 𑌨𑍂𑌨𑌮𑌾𑌶𑍍𑌚𑌰𑍍𑌯𑌹𑍇𑌤𑍋𑌃 ॥6॥

𑌯𑌾𑌤𑍇 𑌤𑍍𑌵𑌯𑍍𑌯𑌾𑌶𑍁 𑌵𑌾𑌤𑌾𑌕𑍁𑌲𑌜𑌲𑌦𑌗𑌲𑌤𑍍𑌤𑍋𑌯𑌪𑍂𑌰𑍍𑌣𑌾𑌤𑌿𑌘𑍂𑌰𑍍𑌣𑌤𑍍-
𑌸𑌪𑍍𑌤𑌾𑌰𑍍𑌣𑍋𑌰𑌾𑌶𑌿𑌮𑌗𑍍𑌨𑍇 𑌜𑌗𑌤𑌿 𑌸 𑌤𑍁 𑌜𑌲𑍇 𑌸𑌂𑌭𑍍𑌰𑌮𑌨𑍍 𑌵𑌰𑍍𑌷𑌕𑍋𑌟𑍀𑌃 ।
𑌦𑍀𑌨𑌃 𑌪𑍍𑌰𑍈𑌕𑍍𑌷𑌿𑌷𑍍𑌟 𑌦𑍂𑌰𑍇 𑌵𑌟𑌦𑌲𑌶𑌯𑌨𑌂 𑌕𑌂𑌚𑌿𑌦𑌾𑌶𑍍𑌚𑌰𑍍𑌯𑌬𑌾𑌲𑌂
𑌤𑍍𑌵𑌾𑌮𑍇𑌵 𑌶𑍍𑌯𑌾𑌮𑌲𑌾𑌂𑌗𑌂 𑌵𑌦𑌨𑌸𑌰𑌸𑌿𑌜𑌨𑍍𑌯𑌸𑍍𑌤𑌪𑌾𑌦𑌾𑌂𑌗𑍁𑌲𑍀𑌕𑌮𑍍 ॥𑍭॥

𑌦𑍃𑌷𑍍𑌟𑍍𑌵𑌾 𑌤𑍍𑌵𑌾𑌂 𑌹𑍃𑌷𑍍𑌟𑌰𑍋𑌮𑌾 𑌤𑍍𑌵𑌰𑌿𑌤𑌮𑍁𑌪𑌗𑌤𑌃 𑌸𑍍𑌪𑍍𑌰𑌷𑍍𑌟𑍁𑌕𑌾𑌮𑍋 𑌮𑍁𑌨𑍀𑌂𑌦𑍍𑌰𑌃
𑌶𑍍𑌵𑌾𑌸𑍇𑌨𑌾𑌂𑌤𑌰𑍍𑌨𑌿𑌵𑌿𑌷𑍍𑌟𑌃 𑌪𑍁𑌨𑌰𑌿𑌹 𑌸𑌕𑌲𑌂 𑌦𑍃𑌷𑍍𑌟𑌵𑌾𑌨𑍍 𑌵𑌿𑌷𑍍𑌟𑌪𑍌𑌘𑌮𑍍 ।
𑌭𑍂𑌯𑍋𑌽𑌪𑌿 𑌶𑍍𑌵𑌾𑌸𑌵𑌾𑌤𑍈𑌰𑍍𑌬𑌹𑌿𑌰𑌨𑍁𑌪𑌤𑌿𑌤𑍋 𑌵𑍀𑌕𑍍𑌷𑌿𑌤𑌸𑍍𑌤𑍍𑌵𑌤𑍍𑌕𑌟𑌾𑌕𑍍𑌷𑍈-
𑌰𑍍𑌮𑍋𑌦𑌾𑌦𑌾𑌶𑍍𑌲𑍇𑌷𑍍𑌟𑍁𑌕𑌾𑌮𑌸𑍍𑌤𑍍𑌵𑌯𑌿 𑌪𑌿𑌹𑌿𑌤𑌤𑌨𑍌 𑌸𑍍𑌵𑌾𑌶𑍍𑌰𑌮𑍇 𑌪𑍍𑌰𑌾𑌗𑍍𑌵𑌦𑌾𑌸𑍀𑌤𑍍 ॥𑍮॥

𑌗𑍌𑌰𑍍𑌯𑌾 𑌸𑌾𑌰𑍍𑌧𑌂 𑌤𑌦𑌗𑍍𑌰𑍇 𑌪𑍁𑌰𑌭𑌿𑌦𑌥 𑌗𑌤𑌸𑍍𑌤𑍍𑌵𑌤𑍍𑌪𑍍𑌰𑌿𑌯𑌪𑍍𑌰𑍇𑌕𑍍𑌷𑌣𑌾𑌰𑍍𑌥𑍀
𑌸𑌿𑌦𑍍𑌧𑌾𑌨𑍇𑌵𑌾𑌸𑍍𑌯 𑌦𑌤𑍍𑌵𑌾 𑌸𑍍𑌵𑌯𑌮𑌯𑌮𑌜𑌰𑌾𑌮𑍃𑌤𑍍𑌯𑍁𑌤𑌾𑌦𑍀𑌨𑍍 𑌗𑌤𑍋𑌽𑌭𑍂𑌤𑍍 ।
𑌏𑌵𑌂 𑌤𑍍𑌵𑌤𑍍𑌸𑍇𑌵𑌯𑍈𑌵 𑌸𑍍𑌮𑌰𑌰𑌿𑌪𑍁𑌰𑌪𑌿 𑌸 𑌪𑍍𑌰𑍀𑌯𑌤𑍇 𑌯𑍇𑌨 𑌤𑌸𑍍𑌮𑌾-
𑌨𑍍𑌮𑍂𑌰𑍍𑌤𑌿𑌤𑍍𑌰𑌯𑍍𑌯𑌾𑌤𑍍𑌮𑌕𑌸𑍍𑌤𑍍𑌵𑌂 𑌨𑌨𑍁 𑌸𑌕𑌲𑌨𑌿𑌯𑌂𑌤𑍇𑌤𑌿 𑌸𑍁𑌵𑍍𑌯𑌕𑍍𑌤𑌮𑌾𑌸𑍀𑌤𑍍 ॥𑍯॥

𑌤𑍍𑌰𑍍𑌯𑌂𑌶𑍇𑌸𑍍𑌮𑌿𑌨𑍍 𑌸𑌤𑍍𑌯𑌲𑍋𑌕𑍇 𑌵𑌿𑌧𑌿𑌹𑌰𑌿𑌪𑍁𑌰𑌭𑌿𑌨𑍍𑌮𑌂𑌦𑌿𑌰𑌾𑌣𑍍𑌯𑍂𑌰𑍍𑌧𑍍𑌵𑌮𑍂𑌰𑍍𑌧𑍍𑌵𑌂
𑌤𑍇𑌭𑍋𑌽𑌪𑍍𑌯𑍂𑌰𑍍𑌧𑍍𑌵𑌂 𑌤𑍁 𑌮𑌾𑌯𑌾𑌵𑌿𑌕𑍃𑌤𑌿𑌵𑌿𑌰𑌹𑌿𑌤𑍋 𑌭𑌾𑌤𑌿 𑌵𑍈𑌕𑍁𑌂𑌠𑌲𑍋𑌕𑌃 ।
𑌤𑌤𑍍𑌰 𑌤𑍍𑌵𑌂 𑌕𑌾𑌰𑌣𑌾𑌂𑌭𑌸𑍍𑌯𑌪𑌿 𑌪𑌶𑍁𑌪𑌕𑍁𑌲𑍇 𑌶𑍁𑌦𑍍𑌧𑌸𑌤𑍍𑌤𑍍𑌵𑍈𑌕𑌰𑍂𑌪𑍀
𑌸𑌚𑍍𑌚𑌿𑌤𑍍𑌬𑍍𑌰𑌹𑍍𑌮𑌾𑌦𑍍𑌵𑌯𑌾𑌤𑍍𑌮𑌾 𑌪𑌵𑌨𑌪𑍁𑌰𑌪𑌤𑍇 𑌪𑌾𑌹𑌿 𑌮𑌾𑌂 𑌸𑌰𑍍𑌵𑌰𑍋𑌗𑌾𑌤𑍍 ॥10॥