𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍯 – 𑌬𑍍𑌰𑌹𑍍𑌮𑌣𑌃 𑌤𑌪𑌃 𑌤𑌥𑌾 𑌲𑍋𑌕𑌸𑍃𑌷𑍍𑌟𑌿𑌃

𑌸𑍍𑌥𑌿𑌤𑌸𑍍𑌸 𑌕𑌮𑌲𑍋𑌦𑍍𑌭𑌵𑌸𑍍𑌤𑌵 𑌹𑌿 𑌨𑌾𑌭𑌿𑌪𑌂𑌕𑍇𑌰𑍁𑌹𑍇
𑌕𑍁𑌤𑌃 𑌸𑍍𑌵𑌿𑌦𑌿𑌦𑌮𑌂𑌬𑍁𑌧𑌾𑌵𑍁𑌦𑌿𑌤𑌮𑌿𑌤𑍍𑌯𑌨𑌾𑌲𑍋𑌕𑌯𑌨𑍍 ।
𑌤𑌦𑍀𑌕𑍍𑌷𑌣𑌕𑍁𑌤𑍂𑌹𑌲𑌾𑌤𑍍 𑌪𑍍𑌰𑌤𑌿𑌦𑌿𑌶𑌂 𑌵𑌿𑌵𑍃𑌤𑍍𑌤𑌾𑌨𑌨-
𑌶𑍍𑌚𑌤𑍁𑌰𑍍𑌵𑌦𑌨𑌤𑌾𑌮𑌗𑌾𑌦𑍍𑌵𑌿𑌕𑌸𑌦𑌷𑍍𑌟𑌦𑍃𑌷𑍍𑌟𑍍𑌯𑌂𑌬𑍁𑌜𑌾𑌮𑍍 ॥1॥

𑌮𑌹𑌾𑌰𑍍𑌣𑌵𑌵𑌿𑌘𑍂𑌰𑍍𑌣𑌿𑌤𑌂 𑌕𑌮𑌲𑌮𑍇𑌵 𑌤𑌤𑍍𑌕𑍇𑌵𑌲𑌂
𑌵𑌿𑌲𑍋𑌕𑍍𑌯 𑌤𑌦𑍁𑌪𑌾𑌶𑍍𑌰𑌯𑌂 𑌤𑌵 𑌤𑌨𑍁𑌂 𑌤𑍁 𑌨𑌾𑌲𑍋𑌕𑌯𑌨𑍍 ।
𑌕 𑌏𑌷 𑌕𑌮𑌲𑍋𑌦𑌰𑍇 𑌮𑌹𑌤𑌿 𑌨𑌿𑌸𑍍𑌸𑌹𑌾𑌯𑍋 𑌹𑍍𑌯𑌹𑌂
𑌕𑍁𑌤𑌃 𑌸𑍍𑌵𑌿𑌦𑌿𑌦𑌂𑌬𑍁𑌜𑌂 𑌸𑌮𑌜𑌨𑍀𑌤𑌿 𑌚𑌿𑌂𑌤𑌾𑌮𑌗𑌾𑌤𑍍 ॥2॥

𑌅𑌮𑍁𑌷𑍍𑌯 𑌹𑌿 𑌸𑌰𑍋𑌰𑍁𑌹𑌃 𑌕𑌿𑌮𑌪𑌿 𑌕𑌾𑌰𑌣𑌂 𑌸𑌂𑌭𑍍𑌵𑍇-
𑌦𑌿𑌤𑌿 𑌸𑍍𑌮 𑌕𑍃𑌤𑌨𑌿𑌶𑍍𑌚𑌯𑌸𑍍𑌸 𑌖𑌲𑍁 𑌨𑌾𑌲𑌰𑌂𑌧𑍍𑌰𑌾𑌧𑍍𑌵𑌨𑌾 ।
𑌸𑍍𑌵𑌯𑍋𑌗𑌬𑌲𑌵𑌿𑌦𑍍𑌯𑌯𑌾 𑌸𑌮𑌵𑌰𑍂𑌢𑌵𑌾𑌨𑍍 𑌪𑍍𑌰𑍌𑌢𑌧𑍀 –
𑌸𑍍𑌤𑍍𑌵𑌦𑍀𑌯𑌮𑌤𑌿𑌮𑍋𑌹𑌨𑌂 𑌨 𑌤𑍁 𑌕𑌲𑍇𑌵𑌰𑌂 𑌦𑍃𑌷𑍍𑌟𑌵𑌾𑌨𑍍 ॥3॥

𑌤𑌤𑌃 𑌸𑌕𑌲𑌨𑌾𑌲𑌿𑌕𑌾𑌵𑌿𑌵𑌰𑌮𑌾𑌰𑍍𑌗𑌗𑍋 𑌮𑌾𑌰𑍍𑌗𑌯𑌨𑍍
𑌪𑍍𑌰𑌯𑌸𑍍𑌯 𑌶𑌤𑌵𑌤𑍍𑌸𑌰𑌂 𑌕𑌿𑌮𑌪𑌿 𑌨𑍈𑌵 𑌸𑌂𑌦𑍃𑌷𑍍𑌟𑌵𑌾𑌨𑍍 ।
𑌨𑌿𑌵𑍃𑌤𑍍𑌯 𑌕𑌮𑌲𑍋𑌦𑌰𑍇 𑌸𑍁𑌖𑌨𑌿𑌷𑌣𑍍𑌣 𑌏𑌕𑌾𑌗𑍍𑌰𑌧𑍀𑌃
𑌸𑌮𑌾𑌧𑌿𑌬𑌲𑌮𑌾𑌦𑌧𑍇 𑌭𑌵𑌦𑌨𑍁𑌗𑍍𑌰𑌹𑍈𑌕𑌾𑌗𑍍𑌰𑌹𑍀 ॥4॥

𑌶𑌤𑍇𑌨 𑌪𑌰𑌿𑌵𑌤𑍍𑌸𑌰𑍈𑌰𑍍𑌦𑍃𑌢𑌸𑌮𑌾𑌧𑌿𑌬𑌂𑌧𑍋𑌲𑍍𑌲𑌸𑌤𑍍-
𑌪𑍍𑌰𑌬𑍋𑌧𑌵𑌿𑌶𑌦𑍀𑌕𑍃𑌤𑌃 𑌸 𑌖𑌲𑍁 𑌪𑌦𑍍𑌮𑌿𑌨𑍀𑌸𑌂𑌭𑌵𑌃 ।
𑌅𑌦𑍃𑌷𑍍𑌟𑌚𑌰𑌮𑌦𑍍𑌭𑍁𑌤𑌂 𑌤𑌵 𑌹𑌿 𑌰𑍂𑌪𑌮𑌂𑌤𑌰𑍍𑌦𑍃𑌶𑌾
𑌵𑍍𑌯𑌚𑌷𑍍𑌟 𑌪𑌰𑌿𑌤𑍁𑌷𑍍𑌟𑌧𑍀𑌰𑍍𑌭𑍁𑌜𑌗𑌭𑍋𑌗𑌭𑌾𑌗𑌾𑌶𑍍𑌰𑌯𑌮𑍍 ॥5॥

𑌕𑌿𑌰𑍀𑌟𑌮𑍁𑌕𑍁𑌟𑍋𑌲𑍍𑌲𑌸𑌤𑍍𑌕𑌟𑌕𑌹𑌾𑌰𑌕𑍇𑌯𑍂𑌰𑌯𑍁𑌙𑍍-
𑌮𑌣𑌿𑌸𑍍𑌫𑍁𑌰𑌿𑌤𑌮𑍇𑌖𑌲𑌂 𑌸𑍁𑌪𑌰𑌿𑌵𑍀𑌤𑌪𑍀𑌤𑌾𑌂𑌬𑌰𑌮𑍍 ।
𑌕𑌲𑌾𑌯𑌕𑍁𑌸𑍁𑌮𑌪𑍍𑌰𑌭𑌂 𑌗𑌲𑌤𑌲𑍋𑌲𑍍𑌲𑌸𑌤𑍍𑌕𑍌𑌸𑍍𑌤𑍁𑌭𑌂
𑌵𑌪𑍁𑌸𑍍𑌤𑌦𑌯𑌿 𑌭𑌾𑌵𑌯𑍇 𑌕𑌮𑌲𑌜𑌨𑍍𑌮𑍇 𑌦𑌰𑍍𑌶𑌿𑌤𑌮𑍍 ॥6॥

𑌶𑍍𑌰𑍁𑌤𑌿𑌪𑍍𑌰𑌕𑌰𑌦𑌰𑍍𑌶𑌿𑌤𑌪𑍍𑌰𑌚𑍁𑌰𑌵𑍈𑌭𑌵 𑌶𑍍𑌰𑍀𑌪𑌤𑍇
𑌹𑌰𑍇 𑌜𑌯 𑌜𑌯 𑌪𑍍𑌰𑌭𑍋 𑌪𑌦𑌮𑍁𑌪𑍈𑌷𑌿 𑌦𑌿𑌷𑍍𑌟𑍍𑌯𑌾 𑌦𑍃𑌶𑍋𑌃 ।
𑌕𑍁𑌰𑍁𑌷𑍍𑌵 𑌧𑌿𑌯𑌮𑌾𑌶𑍁 𑌮𑍇 𑌭𑍁𑌵𑌨𑌨𑌿𑌰𑍍𑌮𑌿𑌤𑍌 𑌕𑌰𑍍𑌮𑌠𑌾-
𑌮𑌿𑌤𑌿 𑌦𑍍𑌰𑍁𑌹𑌿𑌣𑌵𑌰𑍍𑌣𑌿𑌤𑌸𑍍𑌵𑌗𑍁𑌣𑌬𑌂𑌹𑌿𑌮𑌾 𑌪𑌾𑌹𑌿 𑌮𑌾𑌮𑍍 ॥𑍭॥

𑌲𑌭𑌸𑍍𑌵 𑌭𑍁𑌵𑌨𑌤𑍍𑌰𑌯𑍀𑌰𑌚𑌨𑌦𑌕𑍍𑌷𑌤𑌾𑌮𑌕𑍍𑌷𑌤𑌾𑌂
𑌗𑍃𑌹𑌾𑌣 𑌮𑌦𑌨𑍁𑌗𑍍𑌰𑌹𑌂 𑌕𑍁𑌰𑍁 𑌤𑌪𑌶𑍍𑌚 𑌭𑍂𑌯𑍋 𑌵𑌿𑌧𑍇 ।
𑌭𑌵𑌤𑍍𑌵𑌖𑌿𑌲𑌸𑌾𑌧𑌨𑍀 𑌮𑌯𑌿 𑌚 𑌭𑌕𑍍𑌤𑌿𑌰𑌤𑍍𑌯𑍁𑌤𑍍𑌕𑌟𑍇-
𑌤𑍍𑌯𑍁𑌦𑍀𑌰𑍍𑌯 𑌗𑌿𑌰𑌮𑌾𑌦𑌧𑌾 𑌮𑍁𑌦𑌿𑌤𑌚𑍇𑌤𑌸𑌂 𑌵𑍇𑌧𑌸𑌮𑍍 ॥𑍮॥

𑌶𑌤𑌂 𑌕𑍃𑌤𑌤𑌪𑌾𑌸𑍍𑌤𑌤𑌃 𑌸 𑌖𑌲𑍁 𑌦𑌿𑌵𑍍𑌯𑌸𑌂𑌵𑌤𑍍𑌸𑌰𑌾-
𑌨𑌵𑌾𑌪𑍍𑌯 𑌚 𑌤𑌪𑍋𑌬𑌲𑌂 𑌮𑌤𑌿𑌬𑌲𑌂 𑌚 𑌪𑍂𑌰𑍍𑌵𑌾𑌧𑌿𑌕𑌮𑍍 ।
𑌉𑌦𑍀𑌕𑍍𑌷𑍍𑌯 𑌕𑌿𑌲 𑌕𑌂𑌪𑌿𑌤𑌂 𑌪𑌯𑌸𑌿 𑌪𑌂𑌕𑌜𑌂 𑌵𑌾𑌯𑍁𑌨𑌾
𑌭𑌵𑌦𑍍𑌬𑌲𑌵𑌿𑌜𑍃𑌂𑌭𑌿𑌤𑌃 𑌪𑌵𑌨𑌪𑌾𑌥𑌸𑍀 𑌪𑍀𑌤𑌵𑌾𑌨𑍍 ॥𑍯॥

𑌤𑌵𑍈𑌵 𑌕𑍃𑌪𑌯𑌾 𑌪𑍁𑌨𑌸𑍍𑌸𑌰𑌸𑌿𑌜𑍇𑌨 𑌤𑍇𑌨𑍈𑌵 𑌸𑌃
𑌪𑍍𑌰𑌕𑌲𑍍𑌪𑍍𑌯 𑌭𑍁𑌵𑌨𑌤𑍍𑌰𑌯𑍀𑌂 𑌪𑍍𑌰𑌵𑌵𑍃𑌤𑍇 𑌪𑍍𑌰𑌜𑌾𑌨𑌿𑌰𑍍𑌮𑌿𑌤𑍌 ।
𑌤𑌥𑌾𑌵𑌿𑌧𑌕𑍃𑌪𑌾𑌭𑌰𑍋 𑌗𑍁𑌰𑍁𑌮𑌰𑍁𑌤𑍍𑌪𑍁𑌰𑌾𑌧𑍀𑌶𑍍𑌵𑌰
𑌤𑍍𑌵𑌮𑌾𑌶𑍁 𑌪𑌰𑌿𑌪𑌾𑌹𑌿 𑌮𑌾𑌂 𑌗𑍁𑌰𑍁𑌦𑌯𑍋𑌕𑍍𑌷𑌿𑌤𑍈𑌰𑍀𑌕𑍍𑌷𑌿𑌤𑍈𑌃 ॥10॥