𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍮𑍯 – 𑌵𑍃𑌕𑌾𑌸𑍁𑌰𑌵𑌧𑌂 – 𑌭𑍃𑌗𑍁𑌪𑌰𑍀𑌕𑍍𑌷𑌣𑌮𑍍

𑌰𑌮𑌾𑌜𑌾𑌨𑍇 𑌜𑌾𑌨𑍇 𑌯𑌦𑌿𑌹 𑌤𑌵 𑌭𑌕𑍍𑌤𑍇𑌷𑍁 𑌵𑌿𑌭𑌵𑍋
𑌨 𑌸𑌦𑍍𑌯𑌸𑍍𑌸𑌂𑌪𑌦𑍍𑌯𑌸𑍍𑌤𑌦𑌿𑌹 𑌮𑌦𑌕𑍃𑌤𑍍𑌤𑍍𑌵𑌾𑌦𑌶𑌮𑌿𑌨𑌾𑌮𑍍 ।
𑌪𑍍𑌰𑌶𑌾𑌂𑌤𑌿𑌂 𑌕𑍃𑌤𑍍𑌵𑍈𑌵 𑌪𑍍𑌰𑌦𑌿𑌶𑌸𑌿 𑌤𑌤𑌃 𑌕𑌾𑌮𑌮𑌖𑌿𑌲𑌂
𑌪𑍍𑌰𑌶𑌾𑌂𑌤𑍇𑌷𑍁 𑌕𑍍𑌷𑌿𑌪𑍍𑌰𑌂 𑌨 𑌖𑌲𑍁 𑌭𑌵𑌦𑍀𑌯𑍇 𑌚𑍍𑌯𑍁𑌤𑌿𑌕𑌥𑌾 ॥1॥

𑌸𑌦𑍍𑌯𑌃 𑌪𑍍𑌰𑌸𑌾𑌦𑌰𑍁𑌷𑌿𑌤𑌾𑌨𑍍 𑌵𑌿𑌧𑌿𑌶𑌂𑌕𑌰𑌾𑌦𑍀𑌨𑍍
𑌕𑍇𑌚𑌿𑌦𑍍𑌵𑌿𑌭𑍋 𑌨𑌿𑌜𑌗𑍁𑌣𑌾𑌨𑍁𑌗𑍁𑌣𑌂 𑌭𑌜𑌂𑌤𑌃 ।
𑌭𑍍𑌰𑌷𑍍𑌟𑌾 𑌭𑌵𑌂𑌤𑌿 𑌬𑌤 𑌕𑌷𑍍𑌟𑌮𑌦𑍀𑌰𑍍𑌘𑌦𑍃𑌷𑍍𑌟𑍍𑌯𑌾
𑌸𑍍𑌪𑌷𑍍𑌟𑌂 𑌵𑍃𑌕𑌾𑌸𑍁𑌰 𑌉𑌦𑌾𑌹𑌰𑌣𑌂 𑌕𑌿𑌲𑌾𑌸𑍍𑌮𑌿𑌨𑍍 ॥2॥

𑌶𑌕𑍁𑌨𑌿𑌜𑌃 𑌸 𑌤𑍁 𑌨𑌾𑌰𑌦𑌮𑍇𑌕𑌦𑌾
𑌤𑍍𑌵𑌰𑌿𑌤𑌤𑍋𑌷𑌮𑌪𑍃𑌚𑍍𑌛𑌦𑌧𑍀𑌶𑍍𑌵𑌰𑌮𑍍 ।
𑌸 𑌚 𑌦𑌿𑌦𑍇𑌶 𑌗𑌿𑌰𑍀𑌶𑌮𑍁𑌪𑌾𑌸𑌿𑌤𑍁𑌂
𑌨 𑌤𑍁 𑌭𑌵𑌂𑌤𑌮𑌬𑌂𑌧𑍁𑌮𑌸𑌾𑌧𑍁𑌷𑍁 ॥3॥

𑌤𑌪𑌸𑍍𑌤𑌪𑍍𑌤𑍍𑌵𑌾 𑌘𑍋𑌰𑌂 𑌸 𑌖𑌲𑍁 𑌕𑍁𑌪𑌿𑌤𑌃 𑌸𑌪𑍍𑌤𑌮𑌦𑌿𑌨𑍇
𑌶𑌿𑌰𑌃 𑌛𑌿𑌤𑍍𑌵𑌾 𑌸𑌦𑍍𑌯𑌃 𑌪𑍁𑌰𑌹𑌰𑌮𑍁𑌪𑌸𑍍𑌥𑌾𑌪𑍍𑌯 𑌪𑍁𑌰𑌤𑌃 ।
𑌅𑌤𑌿𑌕𑍍𑌷𑍁𑌦𑍍𑌰𑌂 𑌰𑍌𑌦𑍍𑌰𑌂 𑌶𑌿𑌰𑌸𑌿 𑌕𑌰𑌦𑌾𑌨𑍇𑌨 𑌨𑌿𑌧𑌨𑌂
𑌜𑌗𑌨𑍍𑌨𑌾𑌥𑌾𑌦𑍍𑌵𑌵𑍍𑌰𑍇 𑌭𑌵𑌤𑌿 𑌵𑌿𑌮𑍁𑌖𑌾𑌨𑌾𑌂 𑌕𑍍𑌵 𑌶𑍁𑌭𑌧𑍀𑌃 ॥4॥

𑌮𑍋𑌕𑍍𑌤𑌾𑌰𑌂 𑌬𑌂𑌧𑌮𑍁𑌕𑍍𑌤𑍋 𑌹𑌰𑌿𑌣𑌪𑌤𑌿𑌰𑌿𑌵 𑌪𑍍𑌰𑌾𑌦𑍍𑌰𑌵𑌤𑍍𑌸𑍋𑌽𑌥 𑌰𑍁𑌦𑍍𑌰𑌂
𑌦𑍈𑌤𑍍𑌯𑌾𑌤𑍍 𑌭𑍀𑌤𑍍𑌯𑌾 𑌸𑍍𑌮 𑌦𑍇𑌵𑍋 𑌦𑌿𑌶𑌿 𑌦𑌿𑌶𑌿 𑌵𑌲𑌤𑍇 𑌪𑍃𑌷𑍍𑌠𑌤𑍋 𑌦𑌤𑍍𑌤𑌦𑍃𑌷𑍍𑌟𑌿𑌃 ।
𑌤𑍂𑌷𑍍𑌣𑍀𑌕𑍇 𑌸𑌰𑍍𑌵𑌲𑍋𑌕𑍇 𑌤𑌵 𑌪𑌦𑌮𑌧𑌿𑌰𑍋𑌕𑍍𑌷𑍍𑌯𑌂𑌤𑌮𑍁𑌦𑍍𑌵𑍀𑌕𑍍𑌷𑍍𑌯 𑌶𑌰𑍍𑌵𑌂
𑌦𑍂𑌰𑌾𑌦𑍇𑌵𑌾𑌗𑍍𑌰𑌤𑌸𑍍𑌤𑍍𑌵𑌂 𑌪𑌟𑍁𑌵𑌟𑍁𑌵𑌪𑍁𑌷𑌾 𑌤𑌸𑍍𑌥𑌿𑌷𑍇 𑌦𑌾𑌨𑌵𑌾𑌯 ॥5॥

𑌭𑌦𑍍𑌰𑌂 𑌤𑍇 𑌶𑌾𑌕𑍁𑌨𑍇𑌯 𑌭𑍍𑌰𑌮𑌸𑌿 𑌕𑌿𑌮𑌧𑍁𑌨𑌾 𑌤𑍍𑌵𑌂 𑌪𑌿𑌶𑌾𑌚𑌸𑍍𑌯 𑌵𑌾𑌚𑌾
𑌸𑌂𑌦𑍇𑌹𑌶𑍍𑌚𑍇𑌨𑍍𑌮𑌦𑍁𑌕𑍍𑌤𑍌 𑌤𑌵 𑌕𑌿𑌮𑍁 𑌨 𑌕𑌰𑍋𑌷𑍍𑌯𑌂𑌗𑍁𑌲𑍀𑌮𑌂𑌗𑌮𑍌𑌲𑍌 ।
𑌇𑌤𑍍𑌥𑌂 𑌤𑍍𑌵𑌦𑍍𑌵𑌾𑌕𑍍𑌯𑌮𑍂𑌢𑌃 𑌶𑌿𑌰𑌸𑌿 𑌕𑍃𑌤𑌕𑌰𑌃 𑌸𑍋𑌽𑌪𑌤𑌚𑍍𑌛𑌿𑌨𑍍𑌨𑌪𑌾𑌤𑌂
𑌭𑍍𑌰𑌂𑌶𑍋 𑌹𑍍𑌯𑍇𑌵𑌂 𑌪𑌰𑍋𑌪𑌾𑌸𑌿𑌤𑍁𑌰𑌪𑌿 𑌚 𑌗𑌤𑌿𑌃 𑌶𑍂𑌲𑌿𑌨𑍋𑌽𑌪𑌿 𑌤𑍍𑌵𑌮𑍇𑌵 ॥6॥

𑌭𑍃𑌗𑍁𑌂 𑌕𑌿𑌲 𑌸𑌰𑌸𑍍𑌵𑌤𑍀𑌨𑌿𑌕𑌟𑌵𑌾𑌸𑌿𑌨𑌸𑍍𑌤𑌾𑌪𑌸𑌾-
𑌸𑍍𑌤𑍍𑌰𑌿𑌮𑍂𑌰𑍍𑌤𑌿𑌷𑍁 𑌸𑌮𑌾𑌦𑌿𑌶𑌨𑍍𑌨𑌧𑌿𑌕𑌸𑌤𑍍𑌤𑍍𑌵𑌤𑌾𑌂 𑌵𑍇𑌦𑌿𑌤𑍁𑌮𑍍 ।
𑌅𑌯𑌂 𑌪𑍁𑌨𑌰𑌨𑌾𑌦𑌰𑌾𑌦𑍁𑌦𑌿𑌤𑌰𑍁𑌦𑍍𑌧𑌰𑍋𑌷𑍇 𑌵𑌿𑌧𑍌
𑌹𑌰𑍇𑌽𑌪𑌿 𑌚 𑌜𑌿𑌹𑌿𑌂𑌸𑌿𑌷𑍌 𑌗𑌿𑌰𑌿𑌜𑌯𑌾 𑌧𑍃𑌤𑍇 𑌤𑍍𑌵𑌾𑌮𑌗𑌾𑌤𑍍 ॥𑍭॥

𑌸𑍁𑌪𑍍𑌤𑌂 𑌰𑌮𑌾𑌂𑌕𑌭𑍁𑌵𑌿 𑌪𑌂𑌕𑌜𑌲𑍋𑌚𑌨𑌂 𑌤𑍍𑌵𑌾𑌂
𑌵𑌿𑌪𑍍𑌰𑍇 𑌵𑌿𑌨𑌿𑌘𑍍𑌨𑌤𑌿 𑌪𑌦𑍇𑌨 𑌮𑍁𑌦𑍋𑌤𑍍𑌥𑌿𑌤𑌸𑍍𑌤𑍍𑌵𑌮𑍍 ।
𑌸𑌰𑍍𑌵𑌂 𑌕𑍍𑌷𑌮𑌸𑍍𑌵 𑌮𑍁𑌨𑌿𑌵𑌰𑍍𑌯 𑌭𑌵𑍇𑌤𑍍 𑌸𑌦𑌾 𑌮𑍇
𑌤𑍍𑌵𑌤𑍍𑌪𑌾𑌦𑌚𑌿𑌨𑍍𑌹𑌮𑌿𑌹 𑌭𑍂𑌷𑌣𑌮𑌿𑌤𑍍𑌯𑌵𑌾𑌦𑍀𑌃 ॥𑍮॥

𑌨𑌿𑌶𑍍𑌚𑌿𑌤𑍍𑌯 𑌤𑍇 𑌚 𑌸𑍁𑌦𑍃𑌢𑌂 𑌤𑍍𑌵𑌯𑌿 𑌬𑌦𑍍𑌧𑌭𑌾𑌵𑌾𑌃
𑌸𑌾𑌰𑌸𑍍𑌵𑌤𑌾 𑌮𑍁𑌨𑌿𑌵𑌰𑌾 𑌦𑌧𑌿𑌰𑍇 𑌵𑌿𑌮𑍋𑌕𑍍𑌷𑌮𑍍 ।
𑌤𑍍𑌵𑌾𑌮𑍇𑌵𑌮𑌚𑍍𑌯𑍁𑌤 𑌪𑍁𑌨𑌶𑍍𑌚𑍍𑌯𑍁𑌤𑌿𑌦𑍋𑌷𑌹𑍀𑌨𑌂
𑌸𑌤𑍍𑌤𑍍𑌵𑍋𑌚𑍍𑌚𑌯𑍈𑌕𑌤𑌨𑍁𑌮𑍇𑌵 𑌵𑌯𑌂 𑌭𑌜𑌾𑌮𑌃 ॥𑍯॥

𑌜𑌗𑌤𑍍𑌸𑍃𑌷𑍍𑌟𑍍𑌯𑌾𑌦𑍌 𑌤𑍍𑌵𑌾𑌂 𑌨𑌿𑌗𑌮𑌨𑌿𑌵𑌹𑍈𑌰𑍍𑌵𑌂𑌦𑌿𑌭𑌿𑌰𑌿𑌵
𑌸𑍍𑌤𑍁𑌤𑌂 𑌵𑌿𑌷𑍍𑌣𑍋 𑌸𑌚𑍍𑌚𑌿𑌤𑍍𑌪𑌰𑌮𑌰𑌸𑌨𑌿𑌰𑍍𑌦𑍍𑌵𑍈𑌤𑌵𑌪𑍁𑌷𑌮𑍍 ।
𑌪𑌰𑌾𑌤𑍍𑌮𑌾𑌨𑌂 𑌭𑍂𑌮𑌨𑍍 𑌪𑌶𑍁𑌪𑌵𑌨𑌿𑌤𑌾𑌭𑌾𑌗𑍍𑌯𑌨𑌿𑌵𑌹𑌂
𑌪𑌰𑌿𑌤𑌾𑌪𑌶𑍍𑌰𑌾𑌂𑌤𑍍𑌯𑍈 𑌪𑌵𑌨𑌪𑍁𑌰𑌵𑌾𑌸𑌿𑌨𑍍 𑌪𑌰𑌿𑌭𑌜𑍇 ॥10॥