𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍮6 – 𑌸𑌾𑌲𑍍𑌵𑌵𑌧𑌂 𑌮𑌹𑌾𑌭𑌾𑌰𑌤𑌯𑍁𑌦𑍍𑌧𑌮𑍍

𑌸𑌾𑌲𑍍𑌵𑍋 𑌭𑍈𑌷𑍍𑌮𑍀𑌵𑌿𑌵𑌾𑌹𑍇 𑌯𑌦𑍁𑌬𑌲𑌵𑌿𑌜𑌿𑌤𑌶𑍍𑌚𑌂𑌦𑍍𑌰𑌚𑍂𑌡𑌾𑌦𑍍𑌵𑌿𑌮𑌾𑌨𑌂
𑌵𑌿𑌂𑌦𑌨𑍍 𑌸𑍌𑌭𑌂 𑌸 𑌮𑌾𑌯𑍀 𑌤𑍍𑌵𑌯𑌿 𑌵𑌸𑌤𑌿 𑌕𑍁𑌰𑍁𑌂𑌸𑍍𑌤𑍍𑌵𑌤𑍍𑌪𑍁𑌰𑍀𑌮𑌭𑍍𑌯𑌭𑌾𑌂𑌕𑍍𑌷𑍀𑌤𑍍 ।
𑌪𑍍𑌰𑌦𑍍𑌯𑍁𑌮𑍍𑌨𑌸𑍍𑌤𑌂 𑌨𑌿𑌰𑍁𑌂𑌧𑌨𑍍𑌨𑌿𑌖𑌿𑌲𑌯𑌦𑍁𑌭𑌟𑍈𑌰𑍍𑌨𑍍𑌯𑌗𑍍𑌰𑌹𑍀𑌦𑍁𑌗𑍍𑌰𑌵𑍀𑌰𑍍𑌯𑌂
𑌤𑌸𑍍𑌯𑌾𑌮𑌾𑌤𑍍𑌯𑌂 𑌦𑍍𑌯𑍁𑌮𑌂𑌤𑌂 𑌵𑍍𑌯𑌜𑌨𑌿 𑌚 𑌸𑌮𑌰𑌃 𑌸𑌪𑍍𑌤𑌵𑌿𑌂𑌶𑌤𑍍𑌯𑌹𑌾𑌂𑌤𑌃 ॥1॥

𑌤𑌾𑌵𑌤𑍍𑌤𑍍𑌵𑌂 𑌰𑌾𑌮𑌶𑌾𑌲𑍀 𑌤𑍍𑌵𑌰𑌿𑌤𑌮𑍁𑌪𑌗𑌤𑌃 𑌖𑌂𑌡𑌿𑌤𑌪𑍍𑌰𑌾𑌯𑌸𑍈𑌨𑍍𑌯𑌂
𑌸𑍌𑌭𑍇𑌶𑌂 𑌤𑌂 𑌨𑍍𑌯𑌰𑍁𑌂𑌧𑌾𑌃 𑌸 𑌚 𑌕𑌿𑌲 𑌗𑌦𑌯𑌾 𑌶𑌾𑌰𑍍𑌙𑍍𑌗𑌮𑌭𑍍𑌰𑌂𑌶𑌯𑌤𑍍𑌤𑍇 ।
𑌮𑌾𑌯𑌾𑌤𑌾𑌤𑌂 𑌵𑍍𑌯𑌹𑌿𑌂𑌸𑍀𑌦𑌪𑌿 𑌤𑌵 𑌪𑍁𑌰𑌤𑌸𑍍𑌤𑌤𑍍𑌤𑍍𑌵𑌯𑌾𑌪𑌿 𑌕𑍍𑌷𑌣𑌾𑌰𑍍𑌧𑌂
𑌨𑌾𑌜𑍍𑌞𑌾𑌯𑍀𑌤𑍍𑌯𑌾𑌹𑍁𑌰𑍇𑌕𑍇 𑌤𑌦𑌿𑌦𑌮𑌵𑌮𑌤𑌂 𑌵𑍍𑌯𑌾𑌸 𑌏𑌵 𑌨𑍍𑌯𑌷𑍇𑌧𑍀𑌤𑍍 ॥2॥

𑌕𑍍𑌷𑌿𑌪𑍍𑌤𑍍𑌵𑌾 𑌸𑍌𑌭𑌂 𑌗𑌦𑌾𑌚𑍂𑌰𑍍𑌣𑌿𑌤𑌮𑍁𑌦𑌕𑌨𑌿𑌧𑍌 𑌮𑌂𑌕𑍍𑌷𑍁 𑌸𑌾𑌲𑍍𑌵𑍇𑌽𑌪𑌿 𑌚𑌕𑍍𑌰𑍇-
𑌣𑍋𑌤𑍍𑌕𑍃𑌤𑍍𑌤𑍇 𑌦𑌂𑌤𑌵𑌕𑍍𑌤𑍍𑌰𑌃 𑌪𑍍𑌰𑌸𑌭𑌮𑌭𑌿𑌪𑌤𑌨𑍍𑌨𑌭𑍍𑌯𑌮𑍁𑌂𑌚𑌦𑍍𑌗𑌦𑌾𑌂 𑌤𑍇 ।
𑌕𑍌𑌮𑍋𑌦𑌕𑍍𑌯𑌾 𑌹𑌤𑍋𑌽𑌸𑌾𑌵𑌪𑌿 𑌸𑍁𑌕𑍃𑌤𑌨𑌿𑌧𑌿𑌶𑍍𑌚𑍈𑌦𑍍𑌯𑌵𑌤𑍍𑌪𑍍𑌰𑌾𑌪𑌦𑍈𑌕𑍍𑌯𑌂
𑌸𑌰𑍍𑌵𑍇𑌷𑌾𑌮𑍇𑌷 𑌪𑍂𑌰𑍍𑌵𑌂 𑌤𑍍𑌵𑌯𑌿 𑌧𑍃𑌤𑌮𑌨𑌸𑌾𑌂 𑌮𑍋𑌕𑍍𑌷𑌣𑌾𑌰𑍍𑌥𑍋𑌽𑌵𑌤𑌾𑌰𑌃 ॥3॥

𑌤𑍍𑌵𑌯𑍍𑌯𑌾𑌯𑌾𑌤𑍇𑌽𑌥 𑌜𑌾𑌤𑍇 𑌕𑌿𑌲 𑌕𑍁𑌰𑍁𑌸𑌦𑌸𑌿 𑌦𑍍𑌯𑍂𑌤𑌕𑍇 𑌸𑌂𑌯𑌤𑌾𑌯𑌾𑌃
𑌕𑍍𑌰𑌂𑌦𑌂𑌤𑍍𑌯𑌾 𑌯𑌾𑌜𑍍𑌞𑌸𑍇𑌨𑍍𑌯𑌾𑌃 𑌸𑌕𑌰𑍁𑌣𑌮𑌕𑍃𑌥𑌾𑌶𑍍𑌚𑍇𑌲𑌮𑌾𑌲𑌾𑌮𑌨𑌂𑌤𑌾𑌮𑍍 ।
𑌅𑌨𑍍𑌨𑌾𑌂𑌤𑌪𑍍𑌰𑌾𑌪𑍍𑌤𑌶𑌰𑍍𑌵𑌾𑌂𑌶𑌜𑌮𑍁𑌨𑌿𑌚𑌕𑌿𑌤𑌦𑍍𑌰𑍌𑌪𑌦𑍀𑌚𑌿𑌂𑌤𑌿𑌤𑍋𑌽𑌥
𑌪𑍍𑌰𑌾𑌪𑍍𑌤𑌃 𑌶𑌾𑌕𑌾𑌨𑍍𑌨𑌮𑌶𑍍𑌨𑌨𑍍 𑌮𑍁𑌨𑌿𑌗𑌣𑌮𑌕𑍃𑌥𑌾𑌸𑍍𑌤𑍃𑌪𑍍𑌤𑌿𑌮𑌂𑌤𑌂 𑌵𑌨𑌾𑌂𑌤𑍇 ॥4॥

𑌯𑍁𑌦𑍍𑌧𑍋𑌦𑍍𑌯𑍋𑌗𑍇𑌽𑌥 𑌮𑌂𑌤𑍍𑌰𑍇 𑌮𑌿𑌲𑌤𑌿 𑌸𑌤𑌿 𑌵𑍃𑌤𑌃 𑌫𑌲𑍍𑌗𑍁𑌨𑍇𑌨 𑌤𑍍𑌵𑌮𑍇𑌕𑌃
𑌕𑍌𑌰𑌵𑍍𑌯𑍇 𑌦𑌤𑍍𑌤𑌸𑍈𑌨𑍍𑌯𑌃 𑌕𑌰𑌿𑌪𑍁𑌰𑌮𑌗𑌮𑍋 𑌦𑍂𑌤𑍍𑌯𑌕𑍃𑌤𑍍 𑌪𑌾𑌂𑌡𑌵𑌾𑌰𑍍𑌥𑌮𑍍 ।
𑌭𑍀𑌷𑍍𑌮𑌦𑍍𑌰𑍋𑌣𑌾𑌦𑌿𑌮𑌾𑌨𑍍𑌯𑍇 𑌤𑌵 𑌖𑌲𑍁 𑌵𑌚𑌨𑍇 𑌧𑌿𑌕𑍍𑌕𑍃𑌤𑍇 𑌕𑍌𑌰𑌵𑍇𑌣
𑌵𑍍𑌯𑌾𑌵𑍃𑌣𑍍𑌵𑌨𑍍 𑌵𑌿𑌶𑍍𑌵𑌰𑍂𑌪𑌂 𑌮𑍁𑌨𑌿𑌸𑌦𑌸𑌿 𑌪𑍁𑌰𑍀𑌂 𑌕𑍍𑌷𑍋𑌭𑌯𑌿𑌤𑍍𑌵𑌾𑌗𑌤𑍋𑌽𑌭𑍂𑌃 ॥5॥

𑌜𑌿𑌷𑍍𑌣𑍋𑌸𑍍𑌤𑍍𑌵𑌂 𑌕𑍃𑌷𑍍𑌣 𑌸𑍂𑌤𑌃 𑌖𑌲𑍁 𑌸𑌮𑌰𑌮𑍁𑌖𑍇 𑌬𑌂𑌧𑍁𑌘𑌾𑌤𑍇 𑌦𑌯𑌾𑌲𑍁𑌂
𑌖𑌿𑌨𑍍𑌨𑌂 𑌤𑌂 𑌵𑍀𑌕𑍍𑌷𑍍𑌯 𑌵𑍀𑌰𑌂 𑌕𑌿𑌮𑌿𑌦𑌮𑌯𑌿 𑌸𑌖𑍇 𑌨𑌿𑌤𑍍𑌯 𑌏𑌕𑍋𑌽𑌯𑌮𑌾𑌤𑍍𑌮𑌾 ।
𑌕𑍋 𑌵𑌧𑍍𑌯𑌃 𑌕𑍋𑌽𑌤𑍍𑌰 𑌹𑌂𑌤𑌾 𑌤𑌦𑌿𑌹 𑌵𑌧𑌭𑌿𑌯𑌂 𑌪𑍍𑌰𑍋𑌜𑍍𑌝𑍍𑌯 𑌮𑌯𑍍𑌯𑌰𑍍𑌪𑌿𑌤𑌾𑌤𑍍𑌮𑌾
𑌧𑌰𑍍𑌮𑍍𑌯𑌂 𑌯𑍁𑌦𑍍𑌧𑌂 𑌚𑌰𑍇𑌤𑌿 𑌪𑍍𑌰𑌕𑍃𑌤𑌿𑌮𑌨𑌯𑌥𑌾 𑌦𑌰𑍍𑌶𑌯𑌨𑍍 𑌵𑌿𑌶𑍍𑌵𑌰𑍂𑌪𑌮𑍍 ॥6॥

𑌭𑌕𑍍𑌤𑍋𑌤𑍍𑌤𑌂𑌸𑍇𑌽𑌥 𑌭𑍀𑌷𑍍𑌮𑍇 𑌤𑌵 𑌧𑌰𑌣𑌿𑌭𑌰𑌕𑍍𑌷𑍇𑌪𑌕𑍃𑌤𑍍𑌯𑍈𑌕𑌸𑌕𑍍𑌤𑍇
𑌨𑌿𑌤𑍍𑌯𑌂 𑌨𑌿𑌤𑍍𑌯𑌂 𑌵𑌿𑌭𑌿𑌂𑌦𑌤𑍍𑌯𑌯𑍁𑌤𑌸𑌮𑌧𑌿𑌕𑌂 𑌪𑍍𑌰𑌾𑌪𑍍𑌤𑌸𑌾𑌦𑍇 𑌚 𑌪𑌾𑌰𑍍𑌥𑍇 ।
𑌨𑌿𑌶𑍍𑌶𑌸𑍍𑌤𑍍𑌰𑌤𑍍𑌵𑌪𑍍𑌰𑌤𑌿𑌜𑍍𑌞𑌾𑌂 𑌵𑌿𑌜𑌹𑌦𑌰𑌿𑌵𑌰𑌂 𑌧𑌾𑌰𑌯𑌨𑍍 𑌕𑍍𑌰𑍋𑌧𑌶𑌾𑌲𑍀-
𑌵𑌾𑌧𑌾𑌵𑌨𑍍 𑌪𑍍𑌰𑌾𑌂𑌜𑌲𑌿𑌂 𑌤𑌂 𑌨𑌤𑌶𑌿𑌰𑌸𑌮𑌥𑍋 𑌵𑍀𑌕𑍍𑌷𑍍𑌯 𑌮𑍋𑌦𑌾𑌦𑌪𑌾𑌗𑌾𑌃 ॥𑍭॥

𑌯𑍁𑌦𑍍𑌧𑍇 𑌦𑍍𑌰𑍋𑌣𑌸𑍍𑌯 𑌹𑌸𑍍𑌤𑌿𑌸𑍍𑌥𑌿𑌰𑌰𑌣𑌭𑌗𑌦𑌤𑍍𑌤𑍇𑌰𑌿𑌤𑌂 𑌵𑍈𑌷𑍍𑌣𑌵𑌾𑌸𑍍𑌤𑍍𑌰𑌂
𑌵𑌕𑍍𑌷𑌸𑍍𑌯𑌾𑌧𑌤𑍍𑌤 𑌚𑌕𑍍𑌰𑌸𑍍𑌥𑌗𑌿𑌤𑌰𑌵𑌿𑌮𑌹𑌾𑌃 𑌪𑍍𑌰𑌾𑌰𑍍𑌦𑌯𑌤𑍍𑌸𑌿𑌂𑌧𑍁𑌰𑌾𑌜𑌮𑍍 ।
𑌨𑌾𑌗𑌾𑌸𑍍𑌤𑍍𑌰𑍇 𑌕𑌰𑍍𑌣𑌮𑍁𑌕𑍍𑌤𑍇 𑌕𑍍𑌷𑌿𑌤𑌿𑌮𑌵𑌨𑌮𑌯𑌨𑍍 𑌕𑍇𑌵𑌲𑌂 𑌕𑍃𑌤𑍍𑌤𑌮𑍌𑌲𑌿𑌂
𑌤𑌤𑍍𑌰𑍇 𑌤𑍍𑌰𑌾𑌪𑌿 𑌪𑌾𑌰𑍍𑌥𑌂 𑌕𑌿𑌮𑌿𑌵 𑌨𑌹𑌿 𑌭𑌵𑌾𑌨𑍍 𑌪𑌾𑌂𑌡𑌵𑌾𑌨𑌾𑌮𑌕𑌾𑌰𑍍𑌷𑍀𑌤𑍍 ॥𑍮॥

𑌯𑍁𑌦𑍍𑌧𑌾𑌦𑍌 𑌤𑍀𑌰𑍍𑌥𑌗𑌾𑌮𑍀 𑌸 𑌖𑌲𑍁 𑌹𑌲𑌧𑌰𑍋 𑌨𑍈𑌮𑌿𑌶𑌕𑍍𑌷𑍇𑌤𑍍𑌰𑌮𑍃𑌚𑍍𑌛-
𑌨𑍍𑌨𑌪𑍍𑌰𑌤𑍍𑌯𑍁𑌤𑍍𑌥𑌾𑌯𑌿𑌸𑍂𑌤𑌕𑍍𑌷𑌯𑌕𑍃𑌦𑌥 𑌸𑍁𑌤𑌂 𑌤𑌤𑍍𑌪𑌦𑍇 𑌕𑌲𑍍𑌪𑌯𑌿𑌤𑍍𑌵𑌾 ।
𑌯𑌜𑍍𑌞𑌘𑍍𑌨𑌂 𑌵𑌲𑍍𑌕𑌲𑌂 𑌪𑌰𑍍𑌵𑌣𑌿 𑌪𑌰𑌿𑌦𑌲𑌯𑌨𑍍 𑌸𑍍𑌨𑌾𑌤𑌤𑍀𑌰𑍍𑌥𑍋 𑌰𑌣𑌾𑌂𑌤𑍇
𑌸𑌂𑌪𑍍𑌰𑌾𑌪𑍍𑌤𑍋 𑌭𑍀𑌮𑌦𑍁𑌰𑍍𑌯𑍋𑌧𑌨𑌰𑌣𑌮𑌶𑌮𑌂 𑌵𑍀𑌕𑍍𑌷𑍍𑌯 𑌯𑌾𑌤𑌃 𑌪𑍁𑌰𑍀𑌂 𑌤𑍇 ॥𑍯॥

𑌸𑌂𑌸𑍁𑌪𑍍𑌤𑌦𑍍𑌰𑍌𑌪𑌦𑍇𑌯𑌕𑍍𑌷𑌪𑌣𑌹𑌤𑌧𑌿𑌯𑌂 𑌦𑍍𑌰𑍌𑌣𑌿𑌮𑍇𑌤𑍍𑌯 𑌤𑍍𑌵𑌦𑍁𑌕𑍍𑌤𑍍𑌯𑌾
𑌤𑌨𑍍𑌮𑍁𑌕𑍍𑌤𑌂 𑌬𑍍𑌰𑌾𑌹𑍍𑌮𑌮𑌸𑍍𑌤𑍍𑌰𑌂 𑌸𑌮𑌹𑍃𑌤 𑌵𑌿𑌜𑌯𑍋 𑌮𑍌𑌲𑌿𑌰𑌤𑍍𑌨𑌂 𑌚 𑌜𑌹𑍍𑌰𑍇 ।
𑌉𑌚𑍍𑌛𑌿𑌤𑍍𑌯𑍈 𑌪𑌾𑌂𑌡𑌵𑌾𑌨𑌾𑌂 𑌪𑍁𑌨𑌰𑌪𑌿 𑌚 𑌵𑌿𑌶𑌤𑍍𑌯𑍁𑌤𑍍𑌤𑌰𑌾𑌗𑌰𑍍𑌭𑌮𑌸𑍍𑌤𑍍𑌰𑍇
𑌰𑌕𑍍𑌷𑌨𑍍𑌨𑌂𑌗𑍁𑌷𑍍𑌠𑌮𑌾𑌤𑍍𑌰𑌃 𑌕𑌿𑌲 𑌜𑌠𑌰𑌮𑌗𑌾𑌶𑍍𑌚𑌕𑍍𑌰𑌪𑌾𑌣𑌿𑌰𑍍𑌵𑌿𑌭𑍋 𑌤𑍍𑌵𑌮𑍍 ॥10॥

𑌧𑌰𑍍𑌮𑍌𑌘𑌂 𑌧𑌰𑍍𑌮𑌸𑍂𑌨𑍋𑌰𑌭𑌿𑌦𑌧𑌦𑌖𑌿𑌲𑌂 𑌛𑌂𑌦𑌮𑍃𑌤𑍍𑌯𑍁𑌸𑍍𑌸 𑌭𑍀𑌷𑍍𑌮-
𑌸𑍍𑌤𑍍𑌵𑌾𑌂 𑌪𑌶𑍍𑌯𑌨𑍍 𑌭𑌕𑍍𑌤𑌿𑌭𑍂𑌮𑍍𑌨𑍈𑌵 𑌹𑌿 𑌸𑌪𑌦𑌿 𑌯𑌯𑍌 𑌨𑌿𑌷𑍍𑌕𑌲𑌬𑍍𑌰𑌹𑍍𑌮𑌭𑍂𑌯𑌮𑍍 ।
𑌸𑌂𑌯𑌾𑌜𑍍𑌯𑌾𑌥𑌾𑌶𑍍𑌵𑌮𑍇𑌧𑍈𑌸𑍍𑌤𑍍𑌰𑌿𑌭𑌿𑌰𑌤𑌿𑌮𑌹𑌿𑌤𑍈𑌰𑍍𑌧𑌰𑍍𑌮𑌜𑌂 𑌪𑍂𑌰𑍍𑌣𑌕𑌾𑌮𑌂
𑌸𑌂𑌪𑍍𑌰𑌾𑌪𑍍𑌤𑍋 𑌦𑍍𑌵𑌰𑌕𑌾𑌂 𑌤𑍍𑌵𑌂 𑌪𑌵𑌨𑌪𑍁𑌰𑌪𑌤𑍇 𑌪𑌾𑌹𑌿 𑌮𑌾𑌂 𑌸𑌰𑍍𑌵𑌰𑍋𑌗𑌾𑌤𑍍 ॥11॥