𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍮0 – 𑌸𑍍𑌯𑌮𑌂𑌤𑌕𑍋𑌪𑌾𑌖𑍍𑌯𑌾𑌨𑌮𑍍

𑌸𑌤𑍍𑌰𑌾𑌜𑌿𑌤𑌸𑍍𑌤𑍍𑌵𑌮𑌥 𑌲𑍁𑌬𑍍𑌧𑌵𑌦𑌰𑍍𑌕𑌲𑌬𑍍𑌧𑌂
𑌦𑌿𑌵𑍍𑌯𑌂 𑌸𑍍𑌯𑌮𑌂𑌤𑌕𑌮𑌣𑌿𑌂 𑌭𑌗𑌵𑌨𑍍𑌨𑌯𑌾𑌚𑍀𑌃 ।
𑌤𑌤𑍍𑌕𑌾𑌰𑌣𑌂 𑌬𑌹𑍁𑌵𑌿𑌧𑌂 𑌮𑌮 𑌭𑌾𑌤𑌿 𑌨𑍂𑌨𑌂
𑌤𑌸𑍍𑌯𑌾𑌤𑍍𑌮𑌜𑌾𑌂 𑌤𑍍𑌵𑌯𑌿 𑌰𑌤𑌾𑌂 𑌛𑌲𑌤𑍋 𑌵𑌿𑌵𑍋𑌢𑍁𑌮𑍍 ॥1॥

𑌅𑌦𑌤𑍍𑌤𑌂 𑌤𑌂 𑌤𑍁𑌭𑍍𑌯𑌂 𑌮𑌣𑌿𑌵𑌰𑌮𑌨𑍇𑌨𑌾𑌲𑍍𑌪𑌮𑌨𑌸𑌾
𑌪𑍍𑌰𑌸𑍇𑌨𑌸𑍍𑌤𑌦𑍍𑌭𑍍𑌰𑌾𑌤𑌾 𑌗𑌲𑌭𑍁𑌵𑌿 𑌵𑌹𑌨𑍍 𑌪𑍍𑌰𑌾𑌪 𑌮𑍃𑌗𑌯𑌾𑌮𑍍 ।
𑌅𑌹𑌨𑍍𑌨𑍇𑌨𑌂 𑌸𑌿𑌂𑌹𑍋 𑌮𑌣𑌿𑌮𑌹𑌸𑌿 𑌮𑌾𑌂𑌸𑌭𑍍𑌰𑌮𑌵𑌶𑌾𑌤𑍍
𑌕𑌪𑍀𑌂𑌦𑍍𑌰𑌸𑍍𑌤𑌂 𑌹𑌤𑍍𑌵𑌾 𑌮𑌣𑌿𑌮𑌪𑌿 𑌚 𑌬𑌾𑌲𑌾𑌯 𑌦𑌦𑌿𑌵𑌾𑌨𑍍 ॥2॥

𑌶𑌶𑌂𑌸𑍁𑌃 𑌸𑌤𑍍𑌰𑌾𑌜𑌿𑌦𑍍𑌗𑌿𑌰𑌮𑌨𑍁 𑌜𑌨𑌾𑌸𑍍𑌤𑍍𑌵𑌾𑌂 𑌮𑌣𑌿𑌹𑌰𑌂
𑌜𑌨𑌾𑌨𑌾𑌂 𑌪𑍀𑌯𑍂𑌷𑌂 𑌭𑌵𑌤𑌿 𑌗𑍁𑌣𑌿𑌨𑌾𑌂 𑌦𑍋𑌷𑌕𑌣𑌿𑌕𑌾 ।
𑌤𑌤𑌃 𑌸𑌰𑍍𑌵𑌜𑍍𑌞𑍋𑌽𑌪𑌿 𑌸𑍍𑌵𑌜𑌨𑌸𑌹𑌿𑌤𑍋 𑌮𑌾𑌰𑍍𑌗𑌣𑌪𑌰𑌃
𑌪𑍍𑌰𑌸𑍇𑌨𑌂 𑌤𑌂 𑌦𑍃𑌷𑍍𑌟𑍍𑌵𑌾 𑌹𑌰𑌿𑌮𑌪𑌿 𑌗𑌤𑍋𑌽𑌭𑍂𑌃 𑌕𑌪𑌿𑌗𑍁𑌹𑌾𑌮𑍍 ॥3॥

𑌭𑌵𑌂𑌤𑌮𑌵𑌿𑌤𑌰𑍍𑌕𑌯𑌨𑍍𑌨𑌤𑌿𑌵𑌯𑌾𑌃 𑌸𑍍𑌵𑌯𑌂 𑌜𑌾𑌂𑌬𑌵𑌾𑌨𑍍
𑌮𑍁𑌕𑍁𑌂𑌦𑌶𑌰𑌣𑌂 𑌹𑌿 𑌮𑌾𑌂 𑌕 𑌇𑌹 𑌰𑍋𑌦𑍍𑌧𑍁𑌮𑌿𑌤𑍍𑌯𑌾𑌲𑌪𑌨𑍍 ।
𑌵𑌿𑌭𑍋 𑌰𑌘𑍁𑌪𑌤𑍇 𑌹𑌰𑍇 𑌜𑌯 𑌜𑌯𑍇𑌤𑍍𑌯𑌲𑌂 𑌮𑍁𑌷𑍍𑌟𑌿𑌭𑌿-
𑌶𑍍𑌚𑌿𑌰𑌂 𑌤𑌵 𑌸𑌮𑌰𑍍𑌚𑌨𑌂 𑌵𑍍𑌯𑌧𑌿𑌤 𑌭𑌕𑍍𑌤𑌚𑍂𑌡𑌾𑌮𑌣𑌿𑌃 ॥4॥

𑌬𑍁𑌧𑍍𑌵𑌾𑌽𑌥 𑌤𑍇𑌨 𑌦𑌤𑍍𑌤𑌾𑌂 𑌨𑌵𑌰𑌮𑌣𑍀𑌂 𑌵𑌰𑌮𑌣𑌿𑌂 𑌚 𑌪𑌰𑌿𑌗𑍃𑌹𑍍𑌣𑌨𑍍 ।
𑌅𑌨𑍁𑌗𑍃𑌹𑍍𑌣𑌨𑍍𑌨𑌮𑍁𑌮𑌾𑌗𑌾𑌃 𑌸𑌪𑌦𑌿 𑌚 𑌸𑌤𑍍𑌰𑌾𑌜𑌿𑌤𑍇 𑌮𑌣𑌿𑌂 𑌪𑍍𑌰𑌾𑌦𑌾𑌃 ॥5॥

𑌤𑌦𑌨𑍁 𑌸 𑌖𑌲𑍁 𑌬𑍍𑌰𑍀𑌲𑌾𑌲𑍋𑌲𑍋 𑌵𑌿𑌲𑍋𑌲𑌵𑌿𑌲𑍋𑌚𑌨𑌾𑌂
𑌦𑍁𑌹𑌿𑌤𑌰𑌮𑌹𑍋 𑌧𑍀𑌮𑌾𑌨𑍍 𑌭𑌾𑌮𑌾𑌂 𑌗𑌿𑌰𑍈𑌵 𑌪𑌰𑌾𑌰𑍍𑌪𑌿𑌤𑌾𑌮𑍍 ।
𑌅𑌦𑌿𑌤 𑌮𑌣𑌿𑌨𑌾 𑌤𑍁𑌭𑍍𑌯𑌂 𑌲𑌭𑍍𑌯𑌂 𑌸𑌮𑍇𑌤𑍍𑌯 𑌭𑌵𑌾𑌨𑌪𑌿
𑌪𑍍𑌰𑌮𑍁𑌦𑌿𑌤𑌮𑌨𑌾𑌸𑍍𑌤𑌸𑍍𑌯𑍈𑌵𑌾𑌦𑌾𑌨𑍍𑌮𑌣𑌿𑌂 𑌗𑌹𑌨𑌾𑌶𑌯𑌃 ॥6॥

𑌵𑍍𑌰𑍀𑌲𑌾𑌕𑍁𑌲𑌾𑌂 𑌰𑌮𑌯𑌤𑌿 𑌤𑍍𑌵𑌯𑌿 𑌸𑌤𑍍𑌯𑌭𑌾𑌮𑌾𑌂
𑌕𑍌𑌂𑌤𑍇𑌯𑌦𑌾𑌹𑌕𑌥𑌯𑌾𑌥 𑌕𑍁𑌰𑍂𑌨𑍍 𑌪𑍍𑌰𑌯𑌾𑌤𑍇 ।
𑌹𑍀 𑌗𑌾𑌂𑌦𑌿𑌨𑍇𑌯𑌕𑍃𑌤𑌵𑌰𑍍𑌮𑌗𑌿𑌰𑌾 𑌨𑌿𑌪𑌾𑌤𑍍𑌯
𑌸𑌤𑍍𑌰𑌾𑌜𑌿𑌤𑌂 𑌶𑌤𑌧𑌨𑍁𑌰𑍍𑌮𑌣𑌿𑌮𑌾𑌜𑌹𑌾𑌰 ॥𑍭॥

𑌶𑍋𑌕𑌾𑌤𑍍 𑌕𑍁𑌰𑍂𑌨𑍁𑌪𑌗𑌤𑌾𑌮𑌵𑌲𑍋𑌕𑍍𑌯 𑌕𑌾𑌂𑌤𑌾𑌂
𑌹𑌤𑍍𑌵𑌾 𑌦𑍍𑌰𑍁𑌤𑌂 𑌶𑌤𑌧𑌨𑍁𑌂 𑌸𑌮𑌹𑌰𑍍𑌷𑌯𑌸𑍍𑌤𑌾𑌮𑍍 ।
𑌰𑌤𑍍𑌨𑍇 𑌸𑌶𑌂𑌕 𑌇𑌵 𑌮𑍈𑌥𑌿𑌲𑌗𑍇𑌹𑌮𑍇𑌤𑍍𑌯
𑌰𑌾𑌮𑍋 𑌗𑌦𑌾𑌂 𑌸𑌮𑌶𑌿𑌶𑌿𑌕𑍍𑌷𑌤 𑌧𑌾𑌰𑍍𑌤𑌰𑌾𑌷𑍍𑌟𑍍𑌰𑌮𑍍 ॥𑍮॥

𑌅𑌕𑍍𑌰𑍂𑌰 𑌏𑌷 𑌭𑌗𑌵𑌨𑍍 𑌭𑌵𑌦𑌿𑌚𑍍𑌛𑌯𑍈𑌵
𑌸𑌤𑍍𑌰𑌾𑌜𑌿𑌤𑌃 𑌕𑍁𑌚𑌰𑌿𑌤𑌸𑍍𑌯 𑌯𑍁𑌯𑍋𑌜 𑌹𑌿𑌂𑌸𑌾𑌮𑍍 ।
𑌅𑌕𑍍𑌰𑍂𑌰𑌤𑍋 𑌮𑌣𑌿𑌮𑌨𑌾𑌹𑍃𑌤𑌵𑌾𑌨𑍍 𑌪𑍁𑌨𑌸𑍍𑌤𑍍𑌵𑌂
𑌤𑌸𑍍𑌯𑍈𑌵 𑌭𑍂𑌤𑌿𑌮𑍁𑌪𑌧𑌾𑌤𑍁𑌮𑌿𑌤𑌿 𑌬𑍍𑌰𑍁𑌵𑌂𑌤𑌿 ॥𑍯॥

𑌭𑌕𑍍𑌤𑌸𑍍𑌤𑍍𑌵𑌯𑌿 𑌸𑍍𑌥𑌿𑌰𑌤𑌰𑌃 𑌸 𑌹𑌿 𑌗𑌾𑌂𑌦𑌿𑌨𑍇𑌯-
𑌸𑍍𑌤𑌸𑍍𑌯𑍈𑌵 𑌕𑌾𑌪𑌥𑌮𑌤𑌿𑌃 𑌕𑌥𑌮𑍀𑌶 𑌜𑌾𑌤𑌾 ।
𑌵𑌿𑌜𑍍𑌞𑌾𑌨𑌵𑌾𑌨𑍍 𑌪𑍍𑌰𑌶𑌮𑌵𑌾𑌨𑌹𑌮𑌿𑌤𑍍𑌯𑍁𑌦𑍀𑌰𑍍𑌣𑌂
𑌗𑌰𑍍𑌵𑌂 𑌧𑍍𑌰𑍁𑌵𑌂 𑌶𑌮𑌯𑌿𑌤𑍁𑌂 𑌭𑌵𑌤𑌾 𑌕𑍃𑌤𑍈𑌵 ॥10॥

𑌯𑌾𑌤𑌂 𑌭𑌯𑍇𑌨 𑌕𑍃𑌤𑌵𑌰𑍍𑌮𑌯𑍁𑌤𑌂 𑌪𑍁𑌨𑌸𑍍𑌤-
𑌮𑌾𑌹𑍂𑌯 𑌤𑌦𑍍𑌵𑌿𑌨𑌿𑌹𑌿𑌤𑌂 𑌚 𑌮𑌣𑌿𑌂 𑌪𑍍𑌰𑌕𑌾𑌶𑍍𑌯 ।
𑌤𑌤𑍍𑌰𑍈𑌵 𑌸𑍁𑌵𑍍𑌰𑌤𑌧𑌰𑍇 𑌵𑌿𑌨𑌿𑌧𑌾𑌯 𑌤𑍁𑌷𑍍𑌯𑌨𑍍
𑌭𑌾𑌮𑌾𑌕𑍁𑌚𑌾𑌂𑌤𑌶𑌯𑌨𑌃 𑌪𑌵𑌨𑍇𑌶 𑌪𑌾𑌯𑌾𑌃 ॥11॥